Tatalo faatasi ma Zara
E alaala le tusitala i Kuiniselani, Ausetalia.
I se tasi aso vevela o le taumafanafana, sa valaaulia ai e Reesey ma Cheyenne ia Zara e taalo i lo latou fale. Sa saunia e tina se meaai mama. Sa nonofo teineiti i le laulau e aai ai.
Sa tipitipi e tina mago mai lo latou mago. Sa ia tuuina fasi apu ma ni vine i luga o se ipu. Na tilotilo atu Reesey i le meaai manaia. Na ia manatua e fai se tatalo a o le’i ‘aia lana meaai mama. Sa ia fesili atu ia Zara, “E te tatalo i lo tou fale?”
“O le a lena mea?” Na fesili atu ai Zara.
“E faapenei,” o le tala lea a Cheyenne. Sa piilima ona lima ma punou lona ulu. Sa ia talosagaina se faamanuiaga i meaai. Ina ua uma lana tatalo, sa ia fai mai, “Vaai? E faapena Faigofie!”
“Matou te le faia lena mea i lo matou fale. Na o le aai lava,“ o le tala lea a Zara.
Sa le’i mafaufau lava Reesey e uiga i le le tatalo. “Tina,” o lana tala lea, “e mafai ona tatou taofia le faia o ni tatalo?”
Na soisoi tina a o ia avatuina ni ipu vai aisa i le laulau. “Tatou te fiafia e faafetai i le Tama Faalelagi mo mea ua Ia foai mai ia i tatou. O le a tatou faia pea ia tatalo. Ae e le afaina pe a le faia e isi tagata.”
Na iloa e Reesey e sa’o lava tina. Sa fiafia o ia i le taimi e tatalo ai lona aiga. Atonu o le tatalo o le a fiafia ai foi Zara. “E mafai ona e faataitai i ai,” o lana tala lea ia Zara. “E lelei ia tatalo.”
“Ou te fiafia pe a tatou tatalo,” o le tala lea a Cheyenne. “Ou te lagona e pei o se soisoi fiafia ua i totonu atoa ia te a’u.”
Sa soisoi Zara. “Atonu o le a ou faia,” sa ia fai atu ai a o ‘ai se fasi mago.
Sa fiafia Reesey ma Cheyenne ona ua la tau atu i la laua uo e uiga i le tatalo. Sa maea la latou meaai mama ma toe tamomoe atu i fafo e taaalo.