Fitafita mo le Alii
E alaala le tusitala i le Aai o Mekisiko, Mekisiko.
Sa ou filifili pe oute faia le mataupu e au lava pe tuuina atu i aao o le Alii ma taulai atu i lau auaunaga faafaifeautalai.
Foliga faanana mai Getty Images; ata na pueina o fitafita e Krista Rossow/Getty Images
I le tele o tausaga ua mavae sa ou auauna ai o se faifeautalai faamisiona i le Misiona a Mexico Monterrey i Matu. Sa ou lagonaina o se avanoa sili e auauna atu ai faafaifeautalai.
Ina ua amata lau misiona, sa ou tuua se tasi o mataupu e lei foiaina. Sa ou le i mauaina le pepa e faatatau i lou faamalologa mai le auaunaga faamiliteli. O lenei pepa e matua taua lava. O lona uiga ua faamaeaina e se alii talavou lana tautua faamiliteli, ma ua i ai le aia e galue ma suesue ai. E iloa ai o ia o se tagatanuu o Mekisiko.
A o latalata mai le aso e tuuina mai ai lenei pepa, sa amata ona ou popole. Sa ou tusi atu i o’u matua ma talosagaina i latou e vaai pe mafai ona la pikiina la’u tusi o le tautua faamiliteli. Ina ua ou maua le la tusi na sosoo ai, sa atili ai ona ou popole. Sa laua faimai ua uma ona tau atu o le a faamatuu atu lava i na o le tagata e ona le tusi.
Sa ou lagonaina se manaoga faavave e tatalo i le Alii ma ole atu i le mea e fai. O le tali, sa lei vave ona oo mai, e faapea e tatau ona ou faamalamalama atu i lau peresitene o le misiona la’u faafitauli. i la ma talanoaga ma ia, e lua ni manatu sa talanoaina. O se tasi o ia manatu e faapea e tau lava ina “faalagolago i le Alii.” O lona lua o lou alu lea e aumai e au lava. O le faaiuga o lau lea.
Sa ou le mautonu po o le a le mea e fai. Sa ou faailoa atu o’u atugaluga i la’u soa, ma na faamalosia i maua a o ma faitau i lenei mau: “Tou te le iloa ea ua outou iai i aao o le Atua? Tou te le iloa ea ua ia te ia le mana uma, ma o lana poloai silisili e taataai faatasi ai le lalolagi e pei o se tusitaai?” (Mamona 5:23). Na soloia e lenei mau lou ao o le le mautonu. Mai lena lava taimi sa ou faitau i ai, sa ou iloa ai o lo’u tiute o le tuuina atu o au taumafaiga atoatoa i lau auaunaga faafaifeautalai. Ua iai la’u faafitauli i aao o le Alii.
I sina taimi mulimuli ane, sa ou maua ai se isi tusi mai ou matua. Na tusia e lo’u tama le mea nei:
“Atalii e, sa ou foi atu i le ofisa o puipuiga faalemalo mo se taimi mulimuli, e taumafai e saili se tagata e mafai ona fesoasoani e foia lau faafitauli. Ina ua maea ona talanoa atu i le tele o tagata, sa taitaiina atu au i se tasi o nofoaga. Sa ou taunuu ma le lagona lotovaivai ma le atuatuvale. O le mea muamua sa ou vaaia o se faitotoa tele, sa tatala tele ma puipuia e leoleo e fitafita malualii e toalua. Sa tuufaatasia lo’u lototele ma pasi atu, ma maua le leoleo sa faatonuina mo au. A o ou tuitui, sa ou lagona popole ae sa taialaina foi au e le Agaga o le Alii.
“Ina ua ou alu i totonu, sa ou vaaia se alii ofisa o nofo i tua o se kesi. I lona fatafata sa i ai ni pine se tele, ma o puipui o lona ofisa sa faatumulia i tusi faamaonia felanulanuai. Sa ia luluina i le mausali ma le mamalu lou lima, ma fesili mai, ‘O le a le faamoemoega o lau asiasiga?’
“‘E i ai lo’u atalii o loo auauna atu i se misiona,’ sa ou tali atu. ‘Ona o lenei, sa le mafai ai ona oo mai e aveatu lana tusi tautua faamiliteli. Ua ou sau e vaai pe mafai ona fai au ma ona sui oute aveina le tusi.’
“‘Leai, e te le mafaia. E faamatuu atu i na o le tagata lava e ona le tusi,’ o le tala lea a le ofisa.
“I lena taimi, sa faamalamalamaina au e le Agaga o le Alii, ma sa ou fai atu, ‘Lau Susuga, e toatele fitafita i lalo lau taitaiga o e tali atu ia te oe mo le faataunuuina o o latou tiute. I le auala lava lea e tasi, ua faataunuuina ai e lou atalii lona tiute e talai atu le talalelei a le Alii i le taimi nei. I le taimi nei lava, o ia o se fitafita mo le Alii.’
“I lenei, ua tulai mai le ofisa mai lona nofoa ma fai mai, ‘E iai sau pepa faailo? “O ai le igoa o lou alo?”
“Ina ua maea ona ou tali atu i ana fesili, sa ia valaauina se failautusi ma fai atu, ‘Aumai ia te au pepa mo lenei faifeautalai talavou.’
“Sa ia sainia, faamauina, ma tuuina mai ia te au. Sa leai se isi mea na manaomia. Na ou lulu lona lima ma le mausali ma le agaga faafetai. Loʼu atalii e, ua tulaga lelei nei au pepa ma e tatau ona e faaalia lou loto faafetai i le Alii e ala i le auauna atu ia te Ia o se fitafita moni.”
Ina ua mavae le mauaina o lenei tusi, sa ou faafetai i le Alii mo le faaaogaina o Lona mana silisili e fai ma puluvaga mo au, mo le tali na Ia auina mai e tali ai i au talosaga, ma mo le faamalamalamaina o lou tama. Ou te tatalo ina ia tatou tuu uma atu lo tatou talitonuga atoa i le Alii, ma aua nei galo Lana folafolaga: “Ole atu, ma o le a to mai ia te outou; saili, ma o le a outou maua; tuitui atu, ma o le a tatala mai ia te outou. Aua o i latou uma e ole atu, e to mai i ai; ma o ia o le e saili, e maua e ia; ma o le e tuitui atu, o le a tatala mai ia te ia” (3 Nifae 14:7–8).