O Leo o Le Au Paia o Aso e Gata Ai
O Se Faamanuiaga mo se Tagata Ese
Ata na tusia e Allen Garns
I tausaga ina ua uma ona matou auai ma lo’u aiga i le Ekalesia, sa o’u mauaina se valaauga e galue i le Misiona a Nigeria Port Harcourt. I se aso mugala lava e lei leva ona ou taunuu atu i lau eria muamua, sa ma o ai ma lau soa mo la maua faatulagaga masani o le talaiga ma faafesootai.
A o ma pasia se auala ua faatumulia, sa ma faalogoina se leo vaivai o tauvalaau mai ia i maua mai se nofoaga ua faapaina maualalo. Sa ma vaai atu i totonu o le pa ma vaaia se alii e faamatua tagata o loo fao i lona manava i talaane o le faitotoa o le pa.
Sa ia talotalo mai ia i maua ma te o atu i totonu, ae sa leai ma se auala e mafai ai ona ma ulu atu i le nofoaga. Sa loka le faitotoa ma sa ma faapea o le feaei i luga o le pa e le talafeagai. Sa uunaia au e toe siaki le loka o i le faitotoa. Ina ua mavae ni nai minute na mafai ona ma aveesea le loka mai fafo ma tatala ai le faitotoa. Sa mafai ona ma iloa atu e ma’i le alii ma e lei i ai se isi na vaaia. Sa ia faamatala mai o ia ua ma’i ma sa ia lagonaina le tiga matautia lea na taofia ai o ia mai le tu i luga.
Ina ua uma ona talanoa atu ia te ia, sa ma mulimuli atu ia te ia ao ia toe tolotolo atu i lona fale. Sa ia talosaga mai ina ia ma tatalo mo ia, ma sa ma ofo atu e tuuina atu sona faamanuiaga. Ina ua tuuina atu o maua lima i luga o lona ao, sa ou lagona se patu i lo’u faaai ma sa le mafai ona fai atu se upu. Na lofituina a’u i le fefe, sa amata ona luluina ma afu, ma sa tafe ifo i lalo loimata i o’u alafau. Sa ou tauivi ina ia tatalo leotele, o lea na amata ai ona ou tatalo i lo’u loto ina ia faamatagataga e le Tama Faalelagi lo’u laulaufaiva e tusa ma Lona finagalo.
Na faafuasei lava, ona mafai e lo’u laulaufaiva ona fai atu se upu. Sa ou iloaina sa ou tautala atu, ae sa ou le pulea ia upu. Sa na o lo’u faalogo atu i lou lava leo o ole atu i le Tama Faalelagi ina ia faamaloloina lenei alii mafatia. Ae ma te lei fai atu amene, ua moe gapepe lenei alii. Sa ma tuua o ia ma o atu i isi a ma’ua gaoioiga faatulagaina ae na fuafua e toe foi mai i lo ma toe foi atu i le ma fale mautotogi e siaki o ia.
Sa ma toe foi atu ma i lo ma ofo tele, sa tamoe mai le alii ia i maua, ma taufono mai, “Na aoga! Na aoga!” Sa matua lofituina i ma’ua i le olioli ma sa le mafai ona taofiofi o’u loimata.
I le sauniga faamanatuga o le Aso Sa na sosoo ai, na faafuasei lava ona tu le epikopo i le pulelaa ma tilotilo sao mai lava i le faitotoa o le falesa. Sa ma tilotilo atu i tua ma vaaia le alii lea sa ma faamanuiaina. Na silafia o ia e le epikopo ma sa ofo i lona ulufale atu i le lotu. Mai i lena taimi, na auai e le aunoa lenei tamalii i sauniga faamanatuga ma isi vasega. Mulimuli ane na ou siitia ese atu mai le eria.
E ese ofoofogia ia te a’u o le ala na saunia ai e le Atua se vavega i lena aso, ma ua faalotomaualaloina a’u i le manatu ai ua finagalo le Tama Faalelagi ua ou agavaa. Ou te iloa sa avea i maua ma ni meafaigaluega i aao o le Atua. O le faamanuiaga o le faamalologa, o lena alii e anaina, ae o le faamanuiaga o le molimau ma le olioli o i ma’ua e anaina.