O Leo o Le Au Paia o Aso e Gata Ai
Anapogi mo se Fesoasoani i le Galuega
Atapue © Getty Images
Ina ua maea ona auauna atu ma le faamaoni i se misiona i Mozambique, sa ou toe foi atu i le fale ma, e pei o le toatele o isi faifeautalai ua maea misiona, sa vave ona ou liliu atu i a’u suesuega ma se galuega.
Sa ou nofo i Pasila i se aai e tuaoi ai ma Parakuei ma maua se galuega e auina mai ai fua o faatoaga mo se supamaketi tele i le itu o Parakuei. O le faamanuiaga o le aoaoina o le gagana Peretania i la’u misiona sa fesoasoani ia te a’u e maua ai lenei tulaga. I lena taimi, sa o’u faaipoipo ma faamanuiaina i se afafine.
Ina ua tulai mai se faafitauli tautupe i Pasila na iu ai i le faaitiitia o tupe a le atunuu o Pasila, sa afaina tele la’u galuega. Sa avea ma mafuaaga o le faaitiitia o oloa faatau atu e masani ona ou aumaia i totonu o le atunuu. I le faaiuga o Fepuari i le tausaga na sosoo ai, sa tele ina leai sa’u mea e fai. O le aveesea o la’u galuega sa toetoe lava o se mea mautinoa, e faapea foi le tulaga sa i ai i isi tagata faigaluega. Sa ou popole i le tausia o lo’u toalua ma le afafine laitiiti. Sa amata foi ona saili mo se isi galuega.
Sa ou talanoa ma lo’u toalua e uiga i le mea ua tupu. Sa ia fautua mai ma te anapopogi. A o ma anapopogi, na fusia o maua loto i le filemu ma lagona o le a lelei mea uma, e ui ina sa ou le iloa pe faapefea.
I le aso na sosoo ai i le galuega, na valaau mai ai lo’u pule ia te au. Na ou manatu ua oo mai le taimi na atugalu i ai—o le a aveesea la’u galuega. Ae o se mea na ou tei ai, sa fai mai lou pule e i ai sona manatu. Ona sa i ai lou tomai i le gagana Peretania, sa ia tuuina mai ou te faaliliuina pepa faaletulafono e masani lava ona tuulima atu i loia e faatulaga ai faaliliuga. Na ia fai mai afai e faamanuiaina lou faatinoina o le faaliliuga, o le a tuuina mai ia te au lena galuega ma o le a faasaoina ai tupe mo le matagaluega. Sa amata loa ona ou faaliliuina ia pepa o faamatalaga. Ina ua ou tuuina atu i lou pule le faaliliuga faamanuiaina, sa fiafia lava o ia! Sa ou fiafia foi aua sa mafai ona faaauau ai pea ona ou galue.
Ina ua ou alu e aumai lau siaki, e faapea o le siaki mulimuli lea, sa ou tei i le iloa ua faaopoopoina lou totogi. Na ootia lo’u loto, ma sa ou faafetai i lo tatou Tama Faalelagi. E ala i lenei aafiaga ua ou iloa o le anapogi e tatalaina ai pupuni o le lagi.