Toe Mauaina o A’u Feagaiga
Sa ou aoao e faapelepele i aʼu feagaiga ina ua uma ona mafatia i lo latou toesea e ala i le tapeina o le igoa.
Ata na tusia e Dilleen Marsh
Sa ou ola a’e i le Ekalesia ma papatisoina ma faamauina i le valu tausaga le matua. Sa avea le talalelei o se auala o le olaga mo a’u ma mo le toatele o tagata na siomia a’u. O le Agaga Paia sa avea ma se soa masani i lo’u olaga.
Ina ua tapeina lo’u igoa, sa ou lagonaina se lagona o le toetoe lava a tuua na o a’u. Sa ou lagonaina faapei ua faalavelave ma faalemuina le faagasologa o lou mafaufau, ma o le faia o faaiuga ua fenumiai ma faigata. Sa ou naunau lava ma sa faigata ona lagonaina le filemu.
Ou te lei iloaina o le aveesea o lo’u auai o le a suia atoa ai lo’u olaga. Sa le toe mafai ona ou ofuina ofusa o le malumalu pe auai atu i le malumalu. Sa le mafai ona totogiina la’u sefuluai, auauna atu i soo se valaauga, ‘ai ma inu i le faamanatuga, pe tuuina atu la’u molimau pe tatalo i le lotu. Sa ou le toe mauaina le meaalofaga o le Agaga Paia. O le mea aupito sili ona taua ua leai so’u sootaga o le feagaiga ma lo’u Faaola e ala i sauniga o le papatisoga ma le malumalu.
Sa lofituina a’u ma sa ou fefe. O la’u fanau e toatolu ua 16, 14, ma le 12 i lena taimi. O i latou o lo’u tupuaga, ma sa ou matua manao lava ia tuua i latou ma se tofi o le faamoemoe. Sa ou nofo i lalo ma i latou ma tau atu ia i latou afai ou te oti ae ou te lei toe papatiso, ou te manaomia i latou e toe faataunuu sauniga mo a’u i le taimi lava e toe faataga ai. Sa ou fefe aua ua le o toe i ai ni o’u faamanuiaga o le tausia o a’u feagaiga o le papatisoga, ma sa ou popole atonu o le a le toe mafai ona toe faamamaina a’u.
O La’u Malaga Toe Foi
E lei i ai lava ni a’u fesili pe moni le Ekalesia ma o le talalelei o le ala lea sa ou manao ia ou ola ai, o lea sa faaauau ai pea ona ou alu i le lotu. Sa ou manao ia silafia e le Tama Faalelagi ou te alofa ia te Ia ma ou te matua faatoese atu mo a’u amioga. Sa ou alu i le lotu i vaiaso uma e ui ina sa faigata tele. Sa le maua e le uarota se toafimalie i lo’u i ai iina, ma sa leai ma se tasi e talanoa mai ia te a’u. Ae ui i lea, sa i ai se tamaitai talavou faapitoa e le atoatoa lona mafaufau e igoa ia Holly lea sa matua agalelei lava o ia. I Aso Sa taitasi ao ou savali atu i le falesa, e tamoe mai ia te a’u, tuuina mai ia te a’u se fusi lapo’a, ma fai mai, “E ese le manaia o le vaai atu ia te oe! Ou te alofa ia te oe!” Sa ou lagonaina e peiseai sa ia galue mo le Faaola, ma faailoa mai ia te a’u ua Ia fiafia i lo’u i ai iina.
Sa matua faigata lava le tuu atu o le faamanatuga e pasi e aunoa ma le tagofia aua na ou iloa ou te le o maua ni faamanuiaga. O le ‘ai ma inu i le faamanatuga o se faamanuiaga. E ese le matagofie o le mauaina o le faamanuiaga o le avea ma tagata mama e ala i le mana o le Faaola ma Lana taulaga togiola, ina ia faamagaloina a tatou agasala ma vaivaiga i vaiaso taitasi, ma toe tautino atu ma le alofa ma le faamaoni i le feagaiga ua tatou osia ina ia manatua pea lo tatou Faaola ma tausi i Ana poloaiga.
Talu ai o le totogiina o la’u sefuluai sa matua taua lava ia te au, sa ou faatulagaina se teugatupe i le faletupe ma tuu i ai la’u sefuluai i masina taitasi. Sa ou manao ia silafia e le Alii e ui lava sa le mafai ona Ia aveina la’u sefulua’i i le taimi nei, ou te manao lava e totogi. Sa ou nofofua i le taimi, ma tausia la’u fanau teine talavou e toatolu, ma sa ou lagona sa ou manaomia na faamanuiaga o le faaali atu i le Alii lo’u naunautaiga ina ia totogi le sefulua’i, e ui lava sa le mafai ona ou faia. Sa leai sou masalosalo sa matuai faamanuiaina ai i matou ona o lena mea.
Toefuataiina o Faamanuiaga
Sa ou toe papatiso i se taimi e sili laitiiti atu ma le tausaga talu ona tapeina loʼu igoa. Oka, o se lagona o le toafilemu le alu ese mai fafo o le vai i le iloaina ua avea nei Iesu ma oʼu faufautua, ma la’u soa. Sa ia totogiina a’u agasala, ma sa ou toe i ai i se sootaga faafeagaiga ma Ia. Sa faatumulia a’u i le agaga faafetai!
Sa ou toe mauaina le meaalofa o le Agaga Paia. Sa ou toe lagonaina le faatasi moni mai: ua toe foi mai tumau la’u uo pele! Sa ou manao e taumafai malosi e aua nei toe faatiga ia te Ia ia aua ai nei Ona toe tuua o a’u.
Sa ou tapunia le teugatupe o loo i ai la’u sefulua’i, tusi le siaki, ma sagisagi fiafia e tuuina atu i la’u epikopo.
Lima tausaga mulimuli ane, ua mafai ona toefuatai o’u faamanuiaga o le malumalu. Sa ou lagonaina le toafilemu ma le loto faafetai. Ua toe ufiufiina a’u i le alofa ma puipuia i le mana o feagaiga sa ou osia i le malumalu.
Ua faamauina nei a’u i se alii e alofa faapelepele ia te a’u, faapea foi a’u ia te ia, ma o loo ma galulue punouai faatasi ia faavaeina la ma’ua faamauga o se sootaga o le feagaiga lea o le a tumau e oo i le faavavau.
O Le Pologa o le Tausalaina
I le 20 tausaga talu mai lena taimi, na ou lagona i nisi o taimi se lagona o le tausalaina loloto o loo lofituina ai a’u ma mafua ai ona ou faanoanoa tele ma popole. Sa ou mafaufau pe ua lava ea mea ua ou faia e salamo ai ma pe ua faamagaloina moni ea a’u. I se taimi lata mai nei lava e pei o ni nai tausaga ua mavae atu, na tutusa lelei ai lava o’u lagona ma lagona o Alema le Itiiti, o loo faamatalaina i le Alema 36:12–13:
“Sa falo tigaina au i le mafatia faavavau, ona sa laga atuatuvale loʼu agaga i le tulaga silisili atu ona tele, ma falo tigaina i au agasala uma.
“Ioe, sa ou manatua au agasala ma amioletonu uma, ia sa ou mafatia ai i tiga o seoli; ioe, sa ou vaai ua ou fouvale faasaga i loʼu Atua, ma sa ou le tausia ana poloaiga paia.”
I se tasi aso na ou tootuli ifo i lalo i le tatalo ma ole atu, “Tama, ua lava ea mea ou te faia? O le a ou faia soo se mea e tatau ona ou faia, ina ia aveese ai lenei mea mai ia te a’u.” Ona ou faatalitali lea ma faalogo ma lou loto.
Na oo mai le tali ma le manino tele: “Ua lava mea ua e faia.” Sa lofituina au i le fiafia moni. Sa le mafai ona taofi lo’u ataata, ma sa tafe mai loimata o le fiafia. I lena aso atoa sa ou fiafia ma olioli. Ua mou ese atu le maasiasi ma le nofosala.
Sa ou toe tomanatu i le aafiaga a Alema le itiiti:
“Sa ou le toe manatuaina oʼu tiga; ioe, sa ou le toe lagā atuatuvaleina aʼu i le manatuaina o aʼu agasala.
“Ma ‘oi, le olioli e, ma le malamalama ofoofogia tele na ou vaaia; ioe, sa faatumulia loʼu agaga i le olioli sa sili atu ona tele e pei o loʼu tiga!” (Alema 36:19–20).
O laʼu malaga ia toe maua loʼu auai i le Ekalesia ma lo’u sootaga faafeagaiga ma le Faaola sa faamomoiloto ma tiga. Sa ou sau i fafo mai lenei tofotofoga i le iloaina o le Togiola a Iesu Keriso ua sili ona pele. Ua toeitiiti atoa le 20 tausaga o le faagaloina o le maasiasi ma le lagona o le tausalaina o le tapeina o lo’u igoa ma maua ai le malosi e faasoa atu ai o’u aafiaga i isi. Ou te faamoemoe o le a musuia nisi i lo’u aafiaga ina ia maua ai le lototele e sui ai ma aapa atu ai ia i latou o e mananao e sui. E mafai ona ou tu ma molimau atu e aunoa ma se masalosalo e moni le Togiola a Keriso. E mafai e Lona mana ona suia lou olaga e le gata mo le lelei ae faapea foi mo le mea sili.
Ou te alofa faapelepele i loʼu auai i le Ekalesia. O se meaalofa e le mafaatauina ma o se faamanuiaga maoae i lo’u olaga. Ou te le toe fia manao e aveesea mai.