O Upumoni Taua—Manaomia Lo Tatou Galulue
Na aumaia e le Uluai Faaaliga ma le Perofeta o Iosefa Samita le malamalama faaopoopo ma le upumoni e taua mo lo tatou fiafia i lenei olaga ma lo tatou faaeaga i le afioaga o le Atua.
Pe tusa ua fitu o’u tausaga, sa ou fesili i lo’u tina, “Pe a oti oe ma a’u ma o i le lagi, pe o le a avea pea oe ma o’u tina?” Na te lei mafaufauina sea ituaiga o fesili. Ae i le tali mai i le mea sili na ia iloa, sa ia fai mai, “E leai, o le a avea i tatou o ni uso ma ni tuafafine i le lagi. O le a le avea a’u ma ou tina.” E le o le tali lea na ou faamoemoeina.
I se taimi talu ona mavae lena talanoaga, sa taunuu atu ai ni alii talavou se toalua i le faitotoa o lo matou fale. O se vavega, aua na faataga e lo’u tama i la’ua e o mai i totonu. Sa la fai mai o i laua o ni faifeautalai mai Le Ekalesia a Iesu Keriso o le Au Paia o Aso e Gata Ai.
Sa amata e nei faifeautalai, pei ona matou aoaoina le igoa e faaigoa ai, ona aoao lo matou aiga.Ou te manatua lelei o matou lagona o le fiafia ma le sagisagi atu i taimi uma sa o mai ai i lo matou fale. Sa la faamatala mai ia te i matou sa i ai se alii talavou na alu i se vao e fesili i le Atua po o le fea ekalesia e moni ma sa ia vaai i le Atua ma Iesu Keriso. Sa faaali mai e faifeau ia i matou se atao lena faaaliga vaaia, ma ina ua ou vaai i ai, sa ou iloaina e moni lava na vaai Iosefa Samita i le Atua le Tama ma Iesu Keriso. Fai mai faifeautalai ona o lena faaaliga vaaia, ua toe i ai nei le Ekalesia moni a Iesu Keriso i le fogaeleele.
Sa aoao mai foi e faifeautalai ia i matou le fuafuaga a le Atua mo le fiafia ma sa tali ai fesili a lo matou aiga e uiga i le lotu. Sa la aoao mai i matou e faapea e moni lava e mafai ona faatasi aiga pe a mavae lenei olaga, o se tama, tina, ma atalii ma afafine.
Sa papatisoina lo matou aiga. O le auala i le suiga o mausa tuai, lafoai tu masani, ma avea ma tagata toaaga o le Ekalesia sa le mauaa i lena taimi. Peitai ona o le alofamutimutivale ma le alofa o le Atua ma faatasi ai ma le fesoasoani a le toatele o taitai ma tagata o le ekalesia, o lea na matou sao mai ai i uluai tausaga faigata.
E faitau miliona ua auai i le Ekalesia, faapea foi le toatele o e ua liliu mai ma papatisoina i vaiaso taitasi, ua maua se molimau o le Uluai Faaaliga. E mafai e le Agaga Paia ona fai faafia lenei molimau ia i tatou taitoatasi a o tatou taumafai e ola i upumoni faigofie o le talalelei a Iesu Keriso.
Na aumaia e le Uluai Faaaliga ma le Perofeta o Iosefa Samita le malamalama faaopoopo ma le upumoni e taua mo lo tatou fiafia i lenei olaga ma lo tatou faaeaga i le afioaga o le Atua. O le a ou ta’ua ni upumoni se tolu sa tatou mauaina ma e tatau ona galulue ai ona o se alii talavou sa tootuli i le tatalo ma le loto faamaoni.
E Valaau e le Atua Perofeta e Taitai ma Taiala i Tatou
O se upumoni taua ua tatou aoao mai le Uluai Faaaliga ma le Perofeta o Iosefa Samita o le, e valaauina e le Atua perofeta, tagatavaai, ma talifaaaliga e faatonutonu, taiala, lapatai, ma taitai i tatou. O nei tamalii o fofoga taumomoli ia o le Atua i le lalolagi, faatasi ai ma le pule e saunoa ai ma galulue i le suafa o le Alii. O le mulimuli i a latou fautuaga, o le a puipuia ai i tatou ma maua faamanuiaga silisili i la tatou malaga fai i lenei lalolagi.
A o ou aoga i le Iunivesite o Polika Iaga o se faifeautalai talavou, nofofua, ua foi mai, sa ou alu i se sauniga a le au perisitua o le konafesi aoao i le Tapeneko i le Lotoa o le Malumalu. Sa uunaia e Peresitene Ezra Taft Benson, o le Peresitene o le Ekalesia i lena taimi, ia faifeautalai uma ua foi mai e matua faataua le faaipoipoga ma ia avea o se faamuamua aupito maualuga i lenei olaga. Ina ua uma le sauniga, sa ou iloaina ua valaauina a’u ia salamo ma sa manaomia ona ou galue i le fautuaga a le perofeta.
O lea, sa tonu ai ia te au ou te foi i lo’u nuu moni o Pasila e sue se toalua. Ae ou te lei tuua mo Pasila e galue faataitai mo le lua masina, sa ou telefoni i lo’u tina ma ni uo ma sa maua mai se lisi pe tusa ma le 10 tamaitai talavou---e tofu onomea uma ona avea o se ava.
A o ou i ai i Pasila, ina ua mavae le mau tatalo ma le manatunatu loloto, sa ou feiloai, faamasani, faamau, ma faatulaga se aso e faaipoipo ai i se tasi o tamaitai talavou sa i le lisi. Sa le o se matati’a fou mo tamaiti aoga i Provo, Iuta, le eva faamasani ma faamau, ae sa vave e ala i tulaga masani i Pasila.
I ni nai masina mulimuli ane, sa ou faaipoipo atu ia Elaine. O ia o le fatu o lo’u olaga ma o se faamanuiaga silisili.
Ou te le o fautua atu faapea e tatau i tagata uma ona faia se lisi, ae ou te fautua atu—pe atonu e sili atu nai lo le fautua atu—e faapea ia tatou galulue e le aunoa pe a saunoa lo tatou perofeta soifua.
O le perofeta a le Atua i aso nei o Peresitene Thomas S. Monson, ma o le a faamanuiaina i tatou i le mulimuli atoatoa i ana fautuaga ma le sa’olele.
O Le Malamalama i le Natura Moni o le Atua
O le isi upumoni ua tatou aoaoina ona o le Uluai Faaaliga ma le Perofeta o Iosefa Samita, o le natura moni o le Atua. Se’i mafaufau i le faamanuiaina o i tatou ua iloa o le Atua o se tagata e i ai se tino o aano ma ivi e mafai ona pa’i i ai pei foi o i tatou, e mafai ona tatou tapuai i se Atua e moni, o le e mafai ona tatou malamalama ai, ma o le na faaalia mai o Ia lava ma Lona Alo i Ana perofeta—o perofeta anamua ma perofeta i nei aso e gata ai. O Ia o se Atua o le faafofoga ma tali mai i a tatou tatalo; o se Atua o le e vaavaaia mai i tatou mai le lagi i luga ma e popole mai lava e le aunoa o Ia mo lo tatou soifua manuia faaleagaga ma le faaletino; o se Atua o le na tuuina mai lo tatou faitalia e filifili ai mo i tatou lava e mulimuli ia te Ia ma usitai i Ana poloaiga e aunoa ma le faamalosia; o se Atua o le tuuina mai faamanuiaga ma faatagaina i tatou e fetaiai ma tofotofoga ina ia mafai ai ona tatou tuputupu ae ma avea e faapei o Ia.
O Ia o se Atua alofa o le na saunia se fuafuaga lea e mafai ai ona tatou sapi i le fiafia i lenei olaga ma i le faavavau.
O Iesu Keriso O Lo Tatou Faaola
Mai le Uluai Faaaliga ma le Perofeta o Iosefa Samita, sa tatou maua ai le malamalama i le moni ma le misiona paia a le Alii o Iesu Keriso, o le maatulimanu o la tatou tapuaiga.
Ona ua oo mai le oti i le lalolagi, e faapei ona moni o loo tatou ola nei, o le a tatou oti uma foi i se aso. O se tasi o aafiaga o le oti o le leiloloa tumau lea o o tatou tino faaletino; semanu e leai se mea tatou te mafaia e toe faafoi mai ai. E le gata i lea, ona tatou te agasala uma i le taimi o la tatou malaga i lenei lalolagi, o le a le mafai lava ona tatou toe foi atu i le afioaga o lo tatou Tama Faalelagi.
Pe mafai ona outou vaai faalemafaufau i taunuuga o le aveesea mai le afioaga o le Atua ma le le toe mafai ona maua se tino?
Sa manaomia se Faaola ma se Togiola e faasaoloto ai i tatou mai le oti ma le agasala. I lalo o le taitaiga a le Tama Faalelagi, sa afio mai ai Iesu Keriso i le lalolagi, puapuagatia, maliu i luga o le satauro, ma sa toetu mai ina ia mafai ai foi ona tatou toetutu ma, faatasi ai ma le salamo ma le lotofaamaoni ma osia ma tausia feagaiga paia, e toe foi atu ai i le afioaga o le Atua.
Sa faamalamalama mai e Iakopo, “E, le silisiliese naʼuā e o le agalelei o lo tatou Atua, o lē ua ia saunia se ala mo lo tatou sosola ese mai le ʼuʼu a lenei sauʼai leaga matautia; ioe, lena sauʼai, o le oti ma seoli, lea ou te taʼua o le oti o le tino, ma le oti foi o le agaga.”
O Iesu o le Mesia na folafola mai, o le Faitulafono, o Le Paia o Isaraelu, o lo tatou Alii, o lo tatou Faaola, o lo tatou Togiola, o lo tatou Tupu, o lo tatou Alii.
Ia tatou faaauau uma ona galulue i nei upumoni taua ma le malamalama, ia ofo atu lo tatou usiusitai i le Atua ma Lona Alo Pele. I le suafa, o Iesu Keriso, amene.