Mataupu 19

Taitaiga Faaleperisitua i le Ekalesia a Iesu Keriso

“O loo vaavaaia e le Alii lenei galuega. O Lona malo lenei. Ua le o pei i tatou o ni mamoe ua aunoa ma se leoleo mamoe. Ua le o pei i tatou o se autau ua aunoa ma se taitai.”

Mai le Soifuaga o Gordon B. Hinckley

Na faamatalaina e Peresitene Gordon B. Hinckley: “O lo’u tiutetauave muamua lava i le Ekalesia, o le tofi muamua lea na ou umia, o le fesoasoani i se tama sa pulefaamalumalu i le matou korama o le au tiakono. Sa valaau mai le matou epikopo agalelei ou te alu atu ma talanoa mai e uiga i lenei valaauga. Sa matuai faagaeetiaina lava a’u. Sa ou popole ma atuatuvale. O lo’u lava natura, talitonu i ai pe leai, o se tama na fai si matamuli ma ese lava, ma ou te manatu o lenei valaauga e auauna atu o se fesoasoani i le korama a le au tiakono sa o se popolega tele ia te a’u, i tulaga o lou matua ma le potomasani, e pei foi o lo’u tiutetauave o loo i ai nei i tulaga o lo’u matua ma le potomasani.”¹

Sa oo foi ni lagona faapena ia Peresitene Hinckley i le 1961, ina ua valaauina o ia e auauna atu o se tasi o le Korama a le Au Aposetolo e Toasefululua. I lana saunoaga muamua lava i le konafesi aoao i le avea ai ma se Aposetolo, sa ia saunoa ai:

“Ou te manatu ua ou lagona sina mamafa o lenei tiutetauave e tulai o se molimau o le Alii o Iesu Keriso i luma o se lalolagi ua le mananao e talia o ia. ‘Ou te tu ma ofo i le alofa ua ofoina mai e Iesu mo a’u.’ Ua faalotomaualaloina a’u i le talitonu o le Perofeta a le Alii ia te a’u, ma le alofa faaalia o le Usoga nei. … Ou te tatalo mo le malosi; ou te tatalo mo le fesoasoani; ou te tatalo mo le faatuatua ma le naunau ia [ou] usitai ai.”²

I le aso 1 o Aperila, 1995, na saunoa ai Peresitene Hinckley i le sauniga perisistua o le konafesi aoao ina ua uma ona lagolagoina o ia e tagata o le Ekalesia mo le uluai taimi o lo latou perofeta ma le Peresitene. Mo le 14 tausaga na muamua atu, sa auauna ai o ia o se fesoasoani i le toatolu o isi Peresitene o le Ekalesia. Sa faafia ona ia molimau mai e uiga i le paia o o latou valaauga ma uunaia le Au Paia o Aso e Gata Ai e mulimuli i a latou fautuaga. O lenei la, i lona oo ai i lena lava tulaga, sa le faaitiitia ai ona lagona o le faalagolago i le Alii mai lava i le taimi sa avea ai o ia o se tiakono po o se Aposetolo na fou lona valaauina. Nai lo o lena, sa faapea ona atili nofouta ai o ia i lona manaomia o le malosi lagolago o le Alii. Fai mai a ia:

“O lo outou sii aao i le faapotopotoga paia i lenei taeao, ua avea o se faailoaga o lo outou naunau ma le manao e lagolago i matou, o o outou uso ma a outou auauna, i lo outou talitonuina, faatuatua, ma talosaga. Ou te matuai faafetai atu mo lena faailoaga. Ou te faafetai atu, ia te outou taitoatasi. Ou te faamautinoa atu ia te outou, e pei lava ona ua outou silafia, i ala a le Alii, e leai se tausili pe faufau mo le tofi. E pei ona fetalai atu le Alii i Ona soo, ‘Ua le filifilia a’u e outou, a ua filifilia outou e a’u, ua ou faauuina foi outou’ (Ioane 15:16). O le tofiga lenei e le o se tofiga e tausinio i ai. O le aia tatau e filifili ai e a le Alii lava ia. O Ia o le matai o le ola ma le oti. O Lana pule lava e valaau ai. O Lana pule foi e aveese ai. O Lana pule e faatumau ai. E pule o Ia i mea uma.

“Ou te le iloa pe aisea o le a maua ai e se tagata e pei o a’u se vaega i Lana fuafuaga maoae. Peitai, o le i ai o lenei tiutetauave i o’u luga, ua ou toe tuuto atu ai nei soo se mea o ia te a’u, o le malosi po o le taimi po o taleni po o le ola i le galuega a lo’u Matai, i le auauna atu i o’u uso ma tuafafine. Ou te toe faafetai atu ia te outou … mo la outou faatinoga i le aso. Ou te tatalo ia ou agavaa. Ou te faamoemoe o le a manatua a’u ia outou talosaga.”³

O Le Au Peresitene Sili, 1995. Peresitene Gordon B. Hinckley *(ogatotonu);* Peresitene Thomas S. Monson, Fesoasoani Muamua *(agavale);* ma Peresitene James E. Faust, Fesoasoani Lua *(taumatau).*

Aoaoga a Gordon B. Hinckley

E valaauina e le Alii ia Peresitene taitasi o le Ekalesia pe a uma ona tofotofoina, faamamaina, ma saunia o ia.

Sa matou galulue ma Peresitene o le Ekalesia mai lava ia Peresitene Heber J. Grant ma i latou na sosoo mai ia te ia. …Ua ou masani i fesoasoani a nei tamalii uma, ma ua ou masani i le Aufono a le Toasefululua i le aluga o tausaga o taitaiga a nei Peresitene. O nei tamalii uma sa i ai ni uiga faaletagata soifua. Sa i ai ni o latou uiga faaletagata ma atonu foi ma ni vaivaiga faaletagata. Ae ui lava i na mea uma, sa i ai i soifuaga o i latou uma taitasi se faailoaga matuai malosi o musumusuga a le Atua. O i latou o e sa avea ma Peresitene sa avea foi ma perofeta i se auala matuai moni lava. Ua ou molimauina patino le agaga o faaaliga i o latou luga. Na oo mai ia tamalii taitoatasi i le Au Peresitene i le mavae ai o ni tausaga se tele o le potomasani i le avea ai o se tagata o le Aufono a le Toasefululua ma i isi gafatia. Sa tapenaina ma saunia e le Alii i latou taitoatasi, tuu atu o ia ia iloa le lotovaivai ma le toilalo, tuu atu ia te ia ia oo i le ma’i ma i nisi o tulaga i le faanoanoa loloto. O nei mea uma na avea o se vaega o le faagasologa maoae o le faamamaina, ma o le taunuuga o lena faagasologa na matagofie le iloga i o latou soifuaga.

Au uo pele i le talalelei, o le galuega lenei a le Atua. O lana Ekalesia lenei ma o le Ekalesia a lona Alo Pele o lona suafa lea o loo ia tauavea. E le mafai ona faatagaina e le Atua se tagata e faafoliga e taitai Lana Ekalesia. O le a ia tofia ana perofeta, ma o le a ia musuia ma faatonu i latou.⁴

Ua faaalia ni atugaluga o nisi e faapea, o le Peresitene o le Ekalesia atonu o taimi uma o se tamalii toeaina, ma o la’u tali i ai, “O se matuai faamanuiaga lava!” … E le faapea e tatau lava ona talavou o ia. Sa ia ma o le a faaauau pea ona tofia ni tamalii talavou atu e femalagaa’i i le lalolagi i le galuega o le talaiga. O ia o le faitaulaga sili pulefaamalumalu, o le tagata o loo i ai uma ki o le perisitua paia, ma o le fofoga taumomoli o faaaliga mai le Atua i lona nuu. …

Ou te manatu ua i ai se faamautinoaga tele i le iloa … o le a i ai sa tatou Peresitene o le na aoaiina ma aoaoina, tofotofoina ma suesueina, o lona tautino faamaoni i le galuega ma o lona amiosa’o i le faamoemoega na faamalosia e ala i auaunaga, ua malosi lona faatuatua, ma ua atinaeina lona latalata atu i le Atua i le aluga o se vaitaimi o ni tausaga se tele.⁵

Ou te tautala atu … i le agaga faafetai mo se perofeta ua taitaia i tatou i nei aso e gata ai. Ou te talosaga atu mo le matuai faamaoni ia te ia o le ua valaauina ma faauuina e le Alii. Ou te talosaga atu mo le tutumau i le lagolagoina o ia ma gauai atu i ana aoaoga. Sa ou faapea atu … afai e i ai sa tatou perofeta, ua i ai ia i tatou mea uma. Afai e le i ai sa tatou perofeta, ua leai se mea o i ai ia i tatou. O loo i ai sa tatou perofeta. Sa i ai lava a tatou perofeta talu mai le faavaega o lenei Ekalesia. O le a le mafai lava ona leai sa tatou perofeta pe afai tatou te ola agavaa mo se perofeta.

O loo vaavaaia e le Alii lenei galuega. O Lona malo lenei. Ua le o pei i tatou o ni mamoe ua aunoa ma se leoleo mamoe. Ua le o pei i tatou o se autau ua aunoa ma se taitai.⁶

Pe a maliu se Peresitene o le Ekalesia, e avea le Aposetolo sinia ma Peresitene e sosoo ai.

O le suiga o le pule [i se Peresitene fou o le Ekalesia], lea sa ou auai i ni nai taimi, e matagofie ona o lona faigofie. O se faaaliga lea o le ala e fai ai e le Alii se mea. O le mulimuli ai i Lana faiga, e filifili ai e le perofeta se tamalii e avea ma se sui o le Aufono a le Au Aposetolo e Toasefululua. Na te le filifilia lenei mea e avea ma se matata. E valaauina o ia, e pei ona sa faia i le Au Aposetolo i le vaitaimi o Iesu, o e na fetalai atu i ai le Alii, “Ua le filifilia a’u e outou, a ua filifilia outou e a’u.” (Ioane 15:16.) E mavae atu tausaga. E aoaoina ma aoaiina o ia i tiute o lona tofi. E femalagaa’i o ia i le lalolagi i le faataunuuina o lona valaauga faaaposetolo. E umi lava le ala o tapenapenaga, lea e oo ina ona masani ai i le Au Paia o Aso e Gata Ai i soo se mea lava e i ai i latou, ma faapea ona latou iloa o ia. E suesueina e le Alii lona loto ma lona agaga. I le faiga masani o mea e tutupu, e tulai mai ai avanoa i lena aufono ma e faia foi ni tofiga fou. O le mulimuli ai i lenei faiga e avea ai se tamalii faapitoa ma Aposetolo sinia. O ki uma o le perisitua sa i ai ia te ia faapea foi i ona uso o le Usoga, ae sa lei aliali ae lava, e tuuina atu ia i latou taitoatasi i le taimi e faauuina ai. Peitai o le pule e faaaoga ai ia ki, e tapulaa lava mo na’o le Peresitene o le Ekalesia. A maliu [le perofeta], ona pau atu lea o le pule e faaaoga ai ia ki uma i le Aposetolo sinia, o le e tofia, ma faauu, e avea ma perofeta ma Peresitene, e ona uso o le Aufono a le Toasefululua.

E leai ni faiga faapalota. E leai ni faiga faatosina. E na’o le faatautaiga filemu ma faigofie o se fuafuaga faalelagi lea e tuuina mai ai le taitaiga musuia ma suesueina.

Sa avea a’u ma molimau, o se molimau patino, i lenei faagasologa matagofie. Ou te tuuina atu la’u molimau e faapea, o le Alii lava e [filifilia le perofeta].⁷

Ona o le maliu o Peresitene [Howard W.] Hunter, na faamaapeina ai loa le Au Peresitene Sili. O i ma’ua ma Uso Monson, sa ma auauna atu o ni ona fesoasoani, sa toe nofoia o ma tulaga i le Korama a le Toasefululua, lea na avea ma pulega faamalumalu o le Ekalesia.

… Sa faapotopoto faatasi uma ia Aposetolo soifua ua faauuina i se agaga o le anapogi ma le tatalo i le afeafe pito i luga o le malumalu. O iinei sa matou lagiina ai se viiga paia ma tatalo faatasi. Sa matou auai i le faamanatuga o le talisuaga a le Alii, ma faafouina i lena molimau paia ma faafaatusa a matou feagaiga ma a matou sootaga ma Ia o le o lo tatou Togiola paia.

Ona toe faatulagaina ai lea o le au peresitene, i le mulimuli ai i se faataitaiga na faavaeina lelei mai lava i augatupulaga ua mavae.

Sa leai se faiga faatosina, leai se tauvaga, leai se tausinio mo le tofi. Sa o se [faagasologa] filemu, toafimalie, faigofie, ma paia. Sa faia e tusa ai ma le mamanu na faatulagaina e le Alii lava Ia.⁸

Ua tuuina mai e le Alii ni mataupu faavae ma faiga mo le taitaiga o Lana Ekalesia pe afai ua le mafai ona galue atoatoa le Peresitene.

Sa tuuina mai e Peresitene Hinckley le saunoaga lenei i le 1992, a o auauna ai o ia o se Fesoasoani Muamua i le Au Peresitene Sili: O le faaao o le Ekalesia o le Alii o Iesu Keriso. O Lana Ekalesia. Ae o le faaao i le lalolagi o lo tatou perofeta. O perofeta o ni tamalii o e ua faauuina i se valaauga paia. E ui lava ile paia o lena valaauga, o i latou lava o ni tagata soifua. Latou te oo foi i faafitauli o le olaga nei.

Tatou te alolofa ma faaaloalo ma ava ma vaai atu i lo tatou perofeta o lenei vaitaimi, o Peresitene Ezra Taft Benson. O ia o se taitai maoae ma talenia, o se tamalii ua faasoa atu lana molimau e uiga i lenei galuega i le lalolagi atoa. Ua ia umia ki uma o le perisitua i luga o le fogaeleele i lenei vaitaimi. Ae peitai ua oo o ia i le matua lea ua le mafai ai ona ia faia le tele o mea sa mafai ona ia faia. O lenei mea e le tuuitiitia ai lona valaauga o se perofeta. Ae ua tuu ai ni faatapulaa i luga o ana gaoioiga faaletino.⁹

Sa tuuina mai e Peresitene Hinckley le faamatalaga lenei i le 1994, a o auauna atu o ia o se Fesoasoani Muamua i le Au Peresitene Sili: O le tulaga masani lava le fia iloa e tagata i le Ekalesia atoa le tulaga o le Peresitene. O lenei ua oo le matua o le soifua o Peresitene Benson i le ivasefulu ma le lima. … Ua mafatia lava o ia mai aafiaga o le matua o le soifua ma gasegase, ma ua le mafai ai ona faataunuuina tiute taua o lona tofi paia. E le o se tulaga lenei ua aunoa ma se fuafuaga. Sa gasegase foi pe sa le mafai ona galulue atoatoa isi Peresitene o le Ekalesia, i masina po o tausaga na lata ina iu ai o latou soifua. E ono tulai mai foi lenei mea i le lumanai.

Ua i ai i mataupu ma ala faatutuina ua faia e le Alii mo le taitaiga o Lana ekalesia ni fuafuaga mo tulaga faapenei. E taua … ona le i ai o le masalosalo po o le popole e uiga i le taitaiga o le Ekalesia, ma le faaaogaina o meaalofa faaperofeta, e aofia ai le aia i musumusuga ma faaaliga i le taitaiga o le galuega ma polokalama o le Ekalesia, pe a gasegase le Peresitene pe ua le mafai ona ia galue atoatoa.

O le Au Peresitene Sili ma le Aufono a Aposetolo e Toasefululua, ua tofia ma faauuina e umia ki o le perisitua, ua i ai le pule ma le tiute e taitai ai le Ekalesia, ma faia ai ona sauniga, ma faamalamalama ona mataupu, ma faatuina ma faamautuina ona aoaoga. O alii taitoatasi ua faauuina o se Aposetolo ma lagolagoina o se uso o le Korama a le Toasefululua, e lagolagoina o se perofeta, tagatavaai, ma talifaaaliga. E pei o i latou na muamua atu ia te ia, sa avea Peresitene Benson ma Aposetolo sinia i le taimi sa valaauina ai o ia o se Peresitene o le Ekalesia. O ona Fesoasoani sa filifilia mai i le Aufono a le Toasefululua. O le mea lea, o sui uma o loo i ai nei o le Korama a le Au Peresitene Sili ma le Aufono a le Toasefululua na mauaina ki, aia tatau, ma le pule e faatatau i le tofi paia faaaposetolo.

Ou te sii mai i le Mataupu Faavae ma Feagaiga

“Mai i le Perisitua Mekisateko, e toatolu Faitaulaga Sili Pulefaamalumalu, e filifili e le tino potopoto, e tofia ma faauu i lena tofi, ma e lagolagoina e le talitonuga, faatuatua, ma tatalo a le ekalesia, e faia ai se korama o le Au Peresitene o le Ekalesia” (MF&F 107:22).

A gasegase le Peresitene pe ua le mafai ona ia galue atoatoa i tiute uma o lona tofi, o ona Fesoasoani faatasi e toalua, o le Korama lena a le Au Peresitene Sili. O i la’ua e faia galuega o aso taitasi a le Au Peresitene Sili. I tulaga faapitoa e ese lava, a na o se toatasi ua mafai ona galue pea, e mafai ona ia galue i le pule o le tofiga o le Au Peresitene Sili e pei ona faatuina mai i le Mataupu Faavae ma Feagaiga, vaega e 102, fuaiupu 10–11. …

… E faaauau pea e Fesoasoani i le Au Peresitene Sili ia galuega masani o lenei tofi. Ae o soo se mataupu mamafa o aiaiga, tulafono, polokalama, po o mataupu, e iloiloina ma le agaga tatalo faatasi e le Au Peresitene Sili ma le Toasefululua. O nei korama e lua, o le Korama a le Au Peresitene Sili ma le Korama a le Toasefululua, e fono faatasi, ma ua i ai le saolotoga i tamalii uma lava e faailoa ai lona lava finagalo e uiga i mataupu mamafa uma.

Ma ou te toe sii atu mai le afioga a le Alii: “Ma o faaiuga uma e faia e soo se tasi o nei korama e ao lava ina faia i le leo autasi o ia lava korama; o lona uiga, e ao i uso taitoatasi o korama taitasi ona ioe i faaiuga a le korama, ina ia faia a latou faaiuga i le mana po o le pule e tasi ia tasi ma le tasi” (MF&F 107:27). …

… Ia malamalama tagata uma, o Iesu Keriso o loo tu i le faaao o lenei ekalesia, lea o loo tauavea Lona suafa paia. O loo Ia vaavaaia. O loo Ia taialaina. O le tu ai i le itu taumatau o Lona Tama, o loo Ia taitaia ai lenei galuega. O Lana aia tatau, mana, ma le filifiliga e valaau ai tagata i Lana ala i tofi maualuluga ma paia ma faamalolo ai i latou e tusa ai ma Lona finagalo e ala i le faafoiina atu o i latou [e ala i le maliu]. O Ia o le Matai o le ola ma le oti. Ou te le popole i tulaga tatou te oo i ai. Ou te talia nei tulaga o se faaaliga o Lona finagalo. E faapena foi ona ou talia le tiutetauave, e galulue ai ma la’u Usoga, e faia mea uma matou te mafaia e faaalualu ai i luma lenei galuega paia i se agaga o le faapaiaga, alofa, lotomaualalo, tiute ma le faamaoni tuuto.¹⁰

O Aposetolo o ni molimau faapitoa i le suafa o Keriso i le lalolagi atoa.

Ina ua uma ona faauuina i le tofi paia faaaposetolo ma … vaetofia o ni sui o le Aufono a le Toasefululua, o [Aposetolo ua] faamoemoeina e tuuto atu i latou lava i le galuega o le talaiga. Latou … te faamuamua i o latou olaga, nai lo isi lava mea uma, le tiutetauave o le tu atu o ni molimau faapitoa o le suafa o Keriso i le lalolagi atoa. …

E pei foi o i tatou uma lava, o i latou o ni tamalii e i ai lagona faaletagata. E i ai o latou malosiaga ma o latou vaivaiga. Ae e amata mai i lea lava taimi, mo le taimi o totoe o o latou soifuaga, pe afai latou te tumau faamoani, o le latou tiute autu lava e tasi o le faaalualuina i luma o le galuega a le Atua i luga o le fogaeleele. E tatau ona latou popole i le soifua manuia o fanau a lo tatou Tama i le Lagi, o i latou i totonu o le Ekalesia ma i latou i fafo atu o le Ekalesia. E tatau ona latou faia mea uma latou te mafaia e faamafanafana ai ia i latou o e faanoanoa, avatu ai le malosi ia i latou o e vaivai, e avatu ai le faamalosiauga ia i latou ua tautevateva, e faauo i e leai ni uo, e faafailele i le ua mativa, e faamanuia i le ua mai, e tuuina atu le molimau, e le mai se talitonuga ae mai se iloa mautinoa o le Alo o le Atua, o la latou Uo ma le Matai, o i latou o ana auauna. …

… E tuuina atu la’u molimau i lo latou usoga, i lo latou tuuto, lo latou faatuatua, lo latou maelega, ma la latou auaunaga tele i le faaalualuina i luma o le malo o le Atua.¹¹

O Le Korama a Aposetolo e Toasefululua, 1965. *Nonofo mai le agavale i le taumatau:* Ezra Taft Benson, Mark E. Petersen (i luga o le lima o le nofoa), Iosefa Filitia Samita (peresitene o le korama), ma LeGrand Richards. *Tutu mai le tauagavale i le taumatau:* Gordon B. Hinckley, Delbert L. Stapley, Thomas S. Monson, Spencer W. Kimball, Harold B. Lee, Marion G. Romney, Richard L. Evans, ma Howard W. Hunter.

E saili e le Au Peresitene Sili ma le Toasefululua ia faaaliga ma le autasi atoatoa ae latou te le’i faia ni faaiuga.

E leai se tonu mai filifiliga a le Au Peresitene Sili ma le Toasefululua e faia e aunoa ma le autasi o le manatu o i latou uma. I le amataga o le talanoaina o se mataupu, atonu e i ai se eseesega o taofi. O se mea mautinoa lena mea. O nei tamalii e o mai mai siosiomaga eseese. O i latou o ni tamalii e mafaufau mo i latou lava. Peitai a o le’i faia se tonu faaiu, e i ai le autasi i o latou finagalo ma siufofoga.

O le mea mautinoa lenei pe afai e mulimuli i le afioga a le Alii ua faaalia mai [tagai MF&F 107:27, 30–31]. …

… [A o] o’u auauna ai o se sui o le Aufono a le Toasefululua ma [a o] ou auauna atu i le Au Peresitene Sili, e le’i i ai lava se faatinoga tele na faia sa le’i faautagiaina ai lenei faagasologa. … Mai lenei lava faagasologa o le faaleo atu e nei tamalii o o latou lava mafaufauga, na ala mai ai le iloiloga ma le filiga o manatu ma mataupu. Peitai ou te lei vaai lava i se feeseeseaiga tele po o se feitagai o le tasi i le tasi o o’u Uso nei. Ae ua ou matauina se mea matagofie ma ofoofogia—o le aumai faatasi lea, i lalo o le taitaiga a le Agaga Paia ma lalo o le mana o faaaliga, o taofi eseese seia oo lava ina i ai le autasi ma le maliega atoatoa. …

E leai lava se isi tino taitai o soo se ituaiga ua ou iloa na fai i ai se faamatalaga faapenei.¹²

E valaauina se peresitene o le siteki e ala i musumusuga e auauna atu o se faufautua i epikopo ma o se taitai mo ona tagata.

O le peresitene o le siteki o le taitai lea e valaauina e ala i faaaliga e tu i le va o epikopo o uarota ma le Au Pulega Aoao o le Ekalesia. O se tiutetauave taua tele. E aoao o ia e le Au Pulega Aoao, ona ia aoao ai lea o epikopo. …

O le peresitene o le siteki e auauna atu o se faufautua i epikopo. Ua silafia e epikopo uma lava, a oo i se taimi na te taulimaina ai se faafituli matuia, ua i ai se tasi e avanoa i taimi uma e mafai ona alu atu i ai e faasoa atu i ai lana avega ma maua mai ai se fautuaga.

Na te tuuina atu se fuataga faaopoopo o le saogalemu i le iloiloina o i latou ua agavaa e o atu i le maota o le Alii. … E faapena foi ona avea le peresitene ma faamasino lona lua i le iloiloina o le agavaa o i latou o e o atu e fai ma sui o le Ekalesia i le galuega faamisiona. Na te faatalanoaina foi le tagata [talosaga], ma seiiloga lava ua faamalieina o ia i le agavaa o sea tagata, ona faatoa ia sainia loa lea i le talosaga e fautuaina atu ai [lena tagata mo se misiona]. Ua faapena foi ona tuuina atu ia te ia le pule e vaetofia ai i latou ua valaauina i misiona ma tuuina atu faamalologa pe a faamaeaina a latou auaunaga.

Ae o le mea aupito taua, o ia o le taitai muamua o aoaiga a le siteki. … Na te tauaveina le tiutetauave sili ona mamafa o le vaai o loo faatumauina pea le mama ma le le pisia o le aoaoga faavae e aoaoina i le siteki. O lona tiute le vaai e leai se aoaoga faavae sese o aoaoina po o se faiga sese o faia [i totonu o le siteki]. Afai e i ai soo se tasi o e umia le Perisitua Mekisateko e le o talafeagai ni ana amioga, pe o soo se isi lava tagata e faapena, i lalo o nisi o tulaga, e tatau ona fono ma i latou, ma afai e faaauau pea ona fai e le tagata lana amio, ona faamalosia loa lea o le peresitene e fai se faaiuga i ai. O le a ia samania le tagata solitulafono ina ia tulai i luma o se aufono aoai, lea e mafai ona fai ai se faaiuga e tuu i ai se vaitaimi e nofo vaavaaia ai pe taofia le igoa pe tape le igoa mai le Ekalesia.

O se galuega e sili ona faigata ma le manaia lenei, ae e tatau lava i le peresitene ona faatinoina e aunoa ma le mata’u po o le faaauau. O lenei mea atoa e faia ia ogatasi ma le taitaiga a le Agaga ma e pei ona faatulaga mai i le vasega e 102 o le Mataupu Faavae ma Feagaiga.

Ma a uma lea, e tatau ona ia faia mea uma na te mafaia e galulue faatasi ai, ma toe aumai i le taimi tuupoina le tagata sa aoaiina.

O lenei mea atoa ma le tele o isi mea ona maua ai lea o ona tiutetauave. E faapena foi ona sosoo atu ai, o lona lava olaga e tatau ona fai ma faataitaiga i ona tagata. …

… Talu ai ua matou talitonuina tele [peresitene o siteki], matou te uunaia ai tagata o le ekalesia i lotoifale ina ia aua le saili atu i le Au Pulega Aoao e fautuaina i latou e faamanuia i latou. Ua valaauina o latou peresitene o siteki i lalo o na lava musumusuga e tasi ia na valaauina ai foi le Au Pulega Aoao.¹³

O epikopo o leoleo mamoe o le lafu.

E mafai ona tupu le [Ekalesia] ma faateleina le fuainumera, e pei ona mautinoa lava o le a tupu. E tatau ona aveina atu lenei talalelei i atunuu uma, ma ituaiga, ma gagana, ma nuu. E le mafai ona i ai i le lumanai muai vaaia se taofia o le alualu i luma po o se le mafai ona aapa atu, e agai i luma, e atinae, e faateleina Siona i le salafa o le lalolagi. Peitai faatasi ai ma nei mea uma, e tatau ona faaauau pea ona i ai se faia vavalalata faafaifeau a tagata uma o le ekalesia ma se epikopo po o se peresitene o le paranesi atamai ma agaalofa. O i latou nei o leoleo mamoe o le lafu, o o latou tiutetauave o le vaaia o tagata i ni fuainuera laiti ifo ina ia leai se tasi e faagaloina, le manatulia, pe tuulafoaia foi. O Iesu o le leoleo mamoe moni o le sa aapa atu ia i latou sa mafatia, e tai tasi i le taimi, ma tuuina atu se faamanuiaga patino i o latou luga.¹⁴

O epikopo o le Ekalesia … o loo i ai moni lava i le tulaga o le avea ma leoleo mamoe o Isaraelu. O tagata uma lava [i le Ekalesia] e tali atu i se epikopo po o se peresitene o le paranesi. E tetele tele avega o loo latou tauaveina, ma ou te valaaulia tagata uma o le Ekalesia, ina ia fai mea uma latou te mafaia e siiae ai le avega o loo galulue ai i lalo o tatou epikopo ma peresitene o paranesi.

E tatau ona tatou tatalo mo i latou. Latou te manaomia le fesoasoani a o latou tauaveina a latou avega mamafa. E mafai ona faateleina la tatou lagolagosua ae tuuitiitia le faalagolago atu ia i latou. E mafai ona tatou fesoasoani atu ia i latou i soo se auala lava e mafai ai. E mafai ona tatou faafetai atu ia i latou mo mea uma latou te faia mo i tatou. E le umi lava ae tatou faavaivaia i latou e ala i avega tatou te tuu atu i o latou luga.

… O [epikopo] uma lava o se tamalii na valaauina e ala i le agaga o valoaga ma faaaliga ma vaetofia ma faauuina e ala i le faaee o lima. O i latou uma taitasi o loo umia ki o le au peresitene o lana uarota. O i latou taitoatasi o se faitaulaga sili, o le faitaulaga sili pulefaamalumalu o lana uarota. O loo tauave taitoatasi e i latou le tiutetauave tele o le avea ma tausimea. O i latou taitoatasi e tu o se tama i lona nuu.

E leai se tasi e maua ni tupe mo lana auaunaga. E leai se epikopo o le uarota e totogia e le Ekalesia mo lana galuega o se epikopo.

O tulaga e manaomia mo se epikopo i aso nei, e pei lava ona sa i ai i aso o Paulo, o le sa tusi atu ia Timoteo [tagai 1 Timoteo 3:2–6]. …

I lana tusi ia Tito, sa faaopoopo atu Paulo e faapea “e tatau lava i le epikopo ona le matauleagaina o ia, aua o ia o le auauna e tausi i mea a le Atua; …

“Taofi mau i le upumoni, faapei ona aoaoina o ia, ina ia mafaia e ia ona apoapoai atu i le mataupu e ola ai, ma aoai atu i e finau mai” (Tito 1:7, 9).

O na upu e faamatala lelei ai lava se epikopo i aso nei i Le Ekalesia a Iesu Keriso o le Au Paia o Aso e Gata Ai.¹⁵

Ou te uunaia tagata o le Ekalesia, po o fea lava o e i ai, pe a e feagai ma ni faafitauli, ia muamua ona outou taumafai e foia e outou lava na faafitauli. Mafaufau i ai, suesue ni isi auala o avanoa mo oe, tatalo e uiga i ai, ona saili lea i le Alii mo le taitaiga. Afai e le mafai ona outou faaleleia e outou lava, ona talanoa loa lea i lou epikopo po o le peresitene o le paranesi. O ia o se tagata o le Atua, na valaauina e ala i le pule o le perisitua paia e avea ma leoleo mamoe o le lafu.¹⁶

Fautuaga mo Suesuega ma le Aoaoina Atu

Fesili

Aisea tatou te manaomia ai perofeta soifua? O le a se mea e te ootia ai i le “faagasologa o le faamamaina” a le Alii mo le sauniaina ma le valaauina o se Peresitene o le Ekalesia? (Tagai vaega 1.)
O a ni ou lagona a o e toe iloiloina le faamatalaina e Peresitene Hinkley o le auala e filifilia ai se Peresitene fou o le Ekalesia? (Tagai vaega 2.) Aisea e taua ai le iloa, e filifilia le Peresitene e tusa ai ma “se fuafuaga paia lea e tuuina mai ai ni taitaiga musuia ma tofotofoina”?
O a mataupu faavae ma faiga aloaia ua faavaeina e le Alii mo le taitaiga o le Ekalesia pe afai ua le mafai e le Peresitene ona galue atoatoa i ona tiute uma? (Tagai vaega 3.)
O a auala e faaali ai e Aposetolo o aso e gata ai le popole mo fanau uma a le Atua, “ia i latou o e o loo i totonu o le Ekalesia ma i latou o loo i fafo o le Ekalesia”? (Tagai vaega 4.) O a ni auala o loo atagia ai i saunoaga aupito lata mai o konafesi ia lenei popolega? O a ni auala na faamanuiaina ai oe mai aoaoga a perofeta ma aposetolo soifua?
Suesue i aoaoga a Peresitene Hinckley e uiga i le auala e faia ai e le Au Peresitene Sili ma le Korama a le Toasefululua ia faaiuga (tagai vaega 5). O le a se mea e mafai ona tatou aoao mai i le ala latou te faia ai faaiuga? E mafai faapefea ona tatou faatatauina nei mataupu faavae i o tatou aiga ma i le Ekalesia?
A o e toe iloiloina vaega 6 ma le 7, o le a se mea ua e aoaoina e uiga i valaauga o le peresitene o le siteki ma le epikopo? E mafai faapefea ona tatou lagolago lelei atu i o tatou taitai o le Ekalesia?

Mau Fesootai

Efeso 2:19–20; 4:11–14; MF&F 1:38; 21:1–6; Aperaamo 3:22–23; Mataupu Faavae o le Faatuatua 1:5–6

Fesoasoani mo le Aoaoina Atu

“Molimau atu i soo se taimi lava e uunaia ai oe e le Agaga, ae le na o le faaiuga o le lesona. Saunia avanoa mo i latou o loo e aoaoina e fai ai a latou molimau” (O Le Aoao Atu, e Leai se Valaauga e Sili Ai [1999], 47).