Mataupu 6
O Se Mea Malosi Naua le Tatalo
“O le valaau atu i le Alii mo le atamai e sili atu i lo o tatou lava [poto], mo le malosi e fai ai mea e tatau ona tatou faia, mo le toafimalie ma le faamafanafanaga, ma mo le faaali atu o le loto faafetai, o se mea taua ma matagofie.”
Mai le Soifuaga o Gordon B. Hinckley
“E leai se tasi e mafai ona faia toatasia,” o le saunoaga lea a Peresitene Gordon B. Hinckley. “Tatou te manaomia le fesoasoani, le ituaiga o fesoasoani lea e mafai ona oo mai o le tali i tatalo.”1 Sa faataitaiina e Peresitene Hinckley lenei mataupu faavae i faaiuga sa feagai ma ia a o avea ai ma Peresitene o le Ekalesia. Sa saunoa mai Elder Robert D. Hales o le Korama a Aposetolo e Toasefululua e uiga ia [Peresitene Hinckley]: “O ia o se tamalii atamai e tulaga ese lona iloatino, ae a feagai loa ma se faafitauli e faigata ona ia foia, ona ia alu ifo loa lea i ona tulivae.”2
Sa ola ai foi Peresitene Hinckley ma lona faletua o Marjorie i lenei mataupu faavae i lo latou aiga. Na fai mai lo la’ua atalii o Richard: “Ou te le manatua se aso na le’i faia ai se matou tatalo faaleaiga. Pe a oo i lona taimi e fai ai le lotu, sa tatalo ma le faamaoni tama ae sa le’i faia lava e pei o se faaaliga pe faaootia loto. Sa tele ni mea na matou aoaoina e uiga i le loloto o lona faatuatua e ala i le faalogo ia te ia o tatalo. Na te faalupeina le Atua ma le migao tele, e pei ona ia faia ai i se faiaoga po o se faufautua atamai ma faaaloalogia, ma e faasino atu o ia i le Faaola ma ni lagona loloto. A o o’u laitiiti sa ou iloaina o i laua [le Atua ma le Faaola] o ni tagata mo’i ia te ia—sa ia alofaina ma faaaloalogia i laua.”3 Sa faamatala mai e Marjorie e faapea: “Ou te manatu o tatalo faaleaiga sa i ai se aafiaga malosi i le auala sa tali mai ai le ma fanau ia i ma’ua. E ui lava sa le’i talai atu Gordon ia i latou, ae sa latou lagonaina mea uma sa ma mananao ia i latou e faalogo i ai i tatalo faaleaiga.”4
I le taimi atoa o lana auaunaga o se Pulega Aoao, sa uunaia ai e Peresitene Hinckley tagata o le Ekalesia ia “talitonu i le tatalo ma le mana o le tatalo.”5 Sa ia molimau atu “o le tatalo e tatalaina ai mana o le lagi mo i tatou.”6 Sa ia folafola mai, “Ia agaga tatalo ona fiafia mai lea o le Atua o le lagi ia te outou ma faamanuia outou, ma avatu le fiafia i o outou loto ma se lagona o le toafilemu i o outou olaga.”7
“Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tu’itu’i atu, ona toina ai lea ia te outou” (Mataio 7:7).
Aoaoga a Gordon B. Hinckley
1
O le Atua o lo tatou Tama, ma ua Ia valaaulia i tatou e tatalo atu taitoatasi ia te Ia.
Mai folafolaga maoae, matagofie ma musuia uma ua ou faitau i ai, o le folafolaga e sili ona faamalosiau ia te a’u o le fetalaiga lea a le Faaola e faapea: “Ia ole atu, ona foaiina mai ai lea ia te outou; ia outou saili, ona outou maua ai lea; ia outou tu’itu’i atu, ona toina ai lea ia te outou.” (Mataio 7:7.)8
Ia aua lava ne’i galo po o ai oe. … O oe moni lava o se atalii po o se afafine o le Atua. … O Ia o lou Tama e Faavavau. E alofa o Ia ia te oe. E mafai ona e alu atu ia te Ia i le tatalo. Ua Ia valaaulia oe e fai lena mea. … O se mea manaia tele lenei mea. E Silisili o Ia i Tagata Uma. O Ia o le Foafoa ma le Pule o le atulaulau. Ae o lenei o le a faafofoga o Ia i au tatalo!9
E mafai ona tatou faalatalata atu i le Alii i a tatou tatalo. O nei tatalo e mafai ona avea ma ni talanoaga o le faafetai. E le mafai ona ou malamalama atoatoa pe faapefea ona valaaulia e le Atua Maoae o le Atulaulau, o le Silisili Ese, i tatou o Ana fanau e talanoa taitoatasi ma Ia. O se avanoa taua tele lenei. O se mea manaia tele le tupu moni o lea mea. Ou te molimau atu, o a tatou tatalo, e tuuina atu ma le faamaualalo ma le faamaoni, e faafofogaina ma taliina mai. O se mea ofoofogia, ae e moni.10
Uso e ma tuafafine, ou te iloa o outou o ni tagata tatalo. O se mea manaia lea i nei aso, i se vaitaimi ua le toe avea ai tatalo ma se vaega o olaga o le toatele. O le valaau atu i le Alii mo le atamai e sili atu i lo o tatou lava [poto], mo le malosi e fai ai mea e tatau ona tatou faia, mo le mafanafana ma le faamaisega, ma mo le faaali atu o le loto faafetai, o se mea taua ma matagofie.11
Ou te aioi atu ina ia taitasi i tatou ma saili e ola latalata atili i le Alii, ma ia fesootai soo atu ma le faatuatua ua faateleina ia te Ia.
Tama ma tina, tatalo mo a outou fanau. Tatalo ina ia malutia i latou mai le leaga o le lalolagi. Tatalo ina ia latou ola i le faatuatua ma le malamalama. Tatalo ina ia taitaia i olaga e aoga mo i latou lava ma isi. Tane, tatalo mo a outou ava. Faailoa atu i le Alii lou lotofaafetai mo i latou ma aioi atu ia te Ia mo i latou. Ava, tatalo mo a outou tane. O le toatele o i latou e faigata olaga o loo ola ai ma le anoanoai o faafitauli ma toatuga. Aioi atu i le Silisiliese ina ia taitaiina i latou, ia faamanuia, puipuia, ma musuia i a latou faatinoga amiotonu.
Tatalo mo le filemu i le lalolagi, ma ia alofa le Silisiliese o le e pulea le lagi ma le lalolagi, ia faaloaloa atu Lona aao ina ia pa’i atu Lona Agaga i loto o tagata, ina ia aua nei fevataua’i malo. … Tatalo mo le poto ma le malamalama a o outou feagai ma faigata o le olaga.12
O le mea taua e uiga i le tatalo o le patino, e toatasi, o se mea e leai se isi tagata e faasalavei atu i ai, e faatatau i lou talanoa atu i lou Tama oi le Lagi i le suafa o le Alii o Iesu Keriso. Ia agaga tatalo. Ole atu i le Alii e faamagalo au agasala. Ole atu i le Alii mo le fesoasoani. Ole atu i le Alii e faamanuia oe. Ole atu i le Alii e fesoasoani ia e iloa ou faanaunauga amiotonu. … Ole atu i le Alii mo mea taua uma e aoga tele i o outou olaga. Ua saunia mai o Ia e fesoasoani. Ia aua lava ne’i galo lena mea.13
2
O tatalo faaleaiga e taitai atu ai i vavega mo tagata taitoatasi, aiga, ma faalapotopotoga.
E tatau ona i ai se faamamafaga fou i le faamaoni, faaaloalo, ma le amiosa’o i o tatou vaitaimi. Seiiloga tatou te toe faaaogaina i o tatou olaga ia uiga mama ua avea ma ute o le tulaga moni o le atinae o le agafesootai, ona faatoa suia ai lea o le mamanu o le vaitaimi. O le fesili ua luiina ai i tatou o le, O fea e tatau ona tatou amata ai?
Ua faamalieina a’u e tatau ona amata i le faamamaluina o le Atua o lo tatou Tama e Faavavau, o lo tatou sootaga ia te Ia i le avea ai ma Ana fanau, i le talanoa atu ia te Ia e faailoa ai Lona tulaga o le alii sili, ma i le ole atu ia te Ia i aso uma mo Lana taitaiga i a tatou fuafuaga.
Ou te fautuaina e faapea, o se toe foi i le mamanu tuai o le tatalo, tatalo faaleaiga i fale o tagata, o se tasi lea o vaifofo autu o le a tapeina ai le faama’i leaga o loo atia ai amioga a lo tatou faalapotopotoga. E le mafai ona tatou faamoemoe e tupu se vavega i se aso se tasi, ae i se augatupulaga o le a tatou maua ai se vavega. …
O loo i ai se mea i le tulaga tonu lava o le tootuli e faapea ona feteenai ai ma uiga na faamatalaina e Paulo: “faamaualuga … soonafai, faafefeteina.”
O loo i ai se mea i le faiga tonu o le tama ma le tina ma le fanau e tootutuli faatasi, e faapea ona liusuavaia ai isi o na uiga sa ia faamatalaina: “le faalogo i matua, … e le loto aiga.”
O loo i ai se mea i le faatinoga o le talanoa atu i le Atua e faapea ona aveesea ai se lilifa atu i le upuvale ma agai i le avea ma e ua tele le manao i mea faafiafia ae leai se manao i le Atua. [Tagai 2 Timoteo 3:1–4.]
O lenei lilifa atu ina ia le paia, e pei ona faamatalaina ai e Paulo, ina ia le loto faafetai, e aveesea a o faafetai faatasi atu tagata o le aiga i le Alii mo le ola ma le filemu ma mea uma ua latou maua. Ma a o latou faafetai atu i le Alii mo le tasi ma le isi, e faapea ona atinae ai i totonu o le aiga, se talisapaiaga fou, se faaaloalo fou, se faamemelo o le tasi mo le isi. …
I le manatuaina faatasi i luma o le Alii o e matitiva, o e le tagolima, ma e mafatia, e faapena ona atiina a’e ai, ma le le mafaufauina ae moni lava, se alofa mo isi e sili atu nai lo le tagata lava ia, o se faaaloalo mo isi, ma se manao e tali atu i manaoga o isi. E le mafai e se tagata ona ole atu i le Atua e fesoasoani i se tuaoi o puapuagatia e aunoa ma le lagonaina o le faaosofia o le tagata lava ia e faia se mea e fesoasoani ai i lena tuaoi. O a ni vavega o le a tutupu i olaga o le fanauga a le lalolagi pe afai o le a latou faataatiaese o latou lava manatu faapito ae faagalo i latou lava i le auauna atu i isi. O le fatu lea e mafai ona tupu mai ai lenei laau paolo ma le fua tele, e lelei atu le totoina ma le faafaileleina i talosaga i aso taitasi a le aiga. …
E leai se isi mea ua ou iloa o le a matuai fesoasoani tele e tuuitiitia le atuatuvale o le aiga, ma i se auala poto o le a aumaia ai le faaaloalo mo matua lea e oo atu ai i le usiusitai, o le a aafia ai le agaga o le salamo lea o le a tele ina aveesea ai le faama’i o aiga malepelepe, nai lo o le tatalo faatasi, tautau atu faatasi o vaivaiga i luma o le Alii, ma le talosagaina o faamanuiaga a le Alii i luga o le aiga ma i latou o e nonofo ai iina. …
O le aiga o le iunite faavae lea o se faalapotopotoga. O le aiga e tatalo faatasi, o le faamoemoe lea o se faalapotopotoga sili atu. “Ia outou saili ia Ieova manu o mafai ona maua o ia.” Isa. 55:6.)14
Sa ou ootia lava i le faamatalaga faamomoiloto a se [faifeautalai] talavou. Fai mai a ia, “Ua tele masina o o’u iinei. E le mafai ona ou aoaoina le gagana. Ou te le fiafia i tagata. Ou te faanoanoa i le aso ae tagi i le po. Sa ou fia oti. Sa ou tusi atu i lo’u tina ma augani atu mo se alofaga ou te toe foi atu ai i le fale. O loo ia te a’u lana tali mai. Sa fai mai o ia: ‘O loo matou tatalo mo oe. E leai se aso e mavae atu matou te le tootutuli faatasi uma ai i le taeao ae matou te le’i aai ma i le afiafi ae matou te le’i momoe ma augani atu i le Alii mo ana faamanuiaga mo oe. Ua matou faaopoopoina le anapogi ia matou tatalo, ma a tatalo ou uso ma tuafafine laiti, latou te faapea atu, “Le Tama Faalelagi, faamanuia ia Sione … ma fesoasoani ia te ia ia ona iloa le gagana ma fai le galuega na valaauina o ia e fai.”’”
Ona fai mai lea o lenei alii talavou ma ona loimata, “O le a ou toe taumafai. O le a ou faaopoopo atu a’u tatalo i a latou tatalo, ma a’u anapogi i a latou anapogi.”
O lenei la, i le fa masina mulimuli ane, ua ou taulimaina se tusi mai ia te ia lea ua ia fai mai ai, “Ua tupu se vaega. Ua oo mai le gagana ia te a’u o se meaalofa mai le Alii. Ua ou aoao e alofa i tagata o lenei atunuu matagofie. Ia faafetaia le Atua mo tatalo a lo’u aiga.”15
Pe mafai ona tatou faamatagofieina atili o tatou aiga? Ioe, e ala i le ta’uina o i tatou lava o se aiga i le Puna o le matagofie moni uma. Pe mafai ona tatou faamalosia faalapotopotoga ma faia o se nofoaga lelei atu e nonofo ai? Ioe, e ala i le faamalosia o le mama o le olaga o o tatou aiga e ala i le tootutuli faatasi ma ole atu i le Silisili Ese i le suafa o Lona Alo Pele.
E mafai ona tatou faamalosia lo tatou aiga e ala i le tootutuli faatasi i le tatalo.
O lenei faiga masani, o le toe foi i tapuaiga faaleaiga, e faasalalau atu i le laueleele ma le lalolagi atoa, i se augatupulaga o le a tele lava ina aveesea ai le faama’i o loo faatamaia ai i tatou. O le a toe aumaia ai le amiosa’o, feavata’i, ma se agaga o le faafetai i loto o tagata.16
Pe o se mea faigata ea le tatalo? Pe o se mea faigata ea le uunaia o tama ma tina e tootutuli faatasi ma a latou fanau laiti ma tatalo atu i le Atua e faailoa atu le agaga faafetai mo faamanuiaga, e tatalo mo i latou o mafatia faapea foi mo i latou lava, ona ole atu lea i le suafa o le Faaola ma le Togiola o le lalolagi? O le tatalo o se mea aoga tele. E mafai ona ou molimau atu e uiga i lena mea, ma e mafai foi ona outou molimau i lena mea. O se matuai maimau leaga lava mo soo se aiga e le faaaoga tatauina lenei faiga masani taua ma le faatauvaa.17
Afai o loo i ai soo se tasi o outou e le o faia tatalo faaleaiga, ia amata nei loa lena faiga masani, ia tootutuli faatasi, pe afai e mafai ona outou faia, i taeao ma afiafi uma, ma talanoa atu i le Alii ma faailoa atu lou faafetai, ma talosagaina Ana faamanuiaga i luga o e matitiva o le lalolagi, ma talanoa atu ia te Ia e uiga i lo oe lava ola manuia.18
E tuuina atu la’u molimau ia te outou, afai e te faaaogaina ma le faamaoni le tatalo faaleaiga, o le a e le aluese atu e aunoa ma se taui. Atonu e le vave ona iloa ni suiga. Atonu e matuai maaleale lava. Peitai, o le a iu ina moni, aua o le Atua “na te tauia mai o e matua saili ia te ia.” (Eperu 11:6.)
Ina tatou faamaoni ia i le faia o se faataitaiga i luma o le lalolagi i lenei faiga masani ma i le uunaia o isi ia faia faapea.19
3
E tatau ona tatou agaga tatalo ma faalogo, aua o le a taliina mai a tatou tatalo.
Aua lava nei e manatu faapea e te mafaia na o oe. E te manaomia le fesoasoani a le Alii. Aua lava e te faatuai e tootuli i se nofoaga paganoa e te lua talanoa ai ma Ia. Oka se ofoofogia ma le matagofie o lenei mea o le tatalo. Mafaufau i ai. E mafai ona tatou talanoa ma lo tatou Tama i le Lagi. E faafofoga mai o Ia ma tali mai foi, ae e tatau ona tatou faalogo atu i lena tali. E leai se mea faapea ua matuia tele ma e leai foi se mea faapea e le taua tele e ta’u atu ia te Ia.20
Tatalo i le Alii ma le faamoemoe mo ni tali. … O le faalavelave i le tele o a tatou tatalo o lo tatou tuuina atu lea e peiseai o tatou siiina i luga le telefoni ma oka se faatauga o oloa e faaaoga—e fai a tatou oka ona tape lea [o le telefoni]. E manaomia ona tatou mafaufau loloto, manatunatu, mafaufau i mea o loo tatou tatalo atu ai, ma mananao i ai, ona talanoa atu lea i le Alii e pei ona talanoa se tagata i le isi tagata. “O loo faapea mai Ieova, o mai ia, ina tatou filifili ia” (Isa. 1:18).21
E leai se mea e sili atu le aoga e pei o le tuuina atu o se mataupu i aao o le Alii. … Ou te le tautoai e faapea atu, sa i ai a’u tatalo na taliina mai. Ua ou iloa lena mea. E le mafai ona ou faafitia. E manaomia ona tatou tatalo mo le taitaiga i lenei vaitaimi faigata. … O le mea e maofa ai, e le tau avea oe ma se tagata poto e te tatalo ai. O le a faafofoga o Ia i le leo o le tagata e sili ona lotomaualalo. … Valaau atu i le Alii. Ua Ia tuuina mai le valaaulia, ma o le a tali mai o Ia.22
Talitonu i le mana ma le malosi o le tatalo. E tali mai le Alii ia tatou tatalo. Ua ou iloa lena mea. Ua ou vaai o tupu i le tele o taimi. O le tatalo e aumaia ai i tatou i se faigapaaga ma le Atua. E tuuina mai ai ia i tatou se avanoa e talanoa ai ma Ia, e faafetai atu ai ia te Ia mo Ana faamanuiaga matagofie, ma ole atu ai ia te Ia mo le taitaiga ma le puipuiga a o tatou savalia ala o le olaga. O lenei galuega maoae, ua faapea ona salalau atu i le lalolagi atoa, sa amataina i le tatalo a se tamaitiiti. Sa faitau o ia i le Tusi Paia a [lona] aiga, “A e afai ua leai se poto i so outou, ina ole atu ia i le Atua, o le foai tele mai i tagata uma ma le le toe ta’uta’ua, ona foaiina mai ai lea ia te ia. A ia ole atu ma le faatuatua, aua lava nei masalosalo. Aua o lē masalosalo e tusa ia ma le peau o le sami ua sousou i le matagi ma felafoaiina ai” (Iakopo 1:5–6). O le folafolaga lena. O i ai ea se folafolaga ua sili atu i le lalolagi nai lo o lena folafolaga?23
Ia agaga tatalo, a’u uo e, ma faalogo. Atonu e te le logonaina lava se leo. Atonu o le a e le logonaina. Ae i se auala e le mafai ona e faamatalaina, o le a uunaia ma faamanuiaina ai oe. Aua ua folafola mai le Alii, “o le a Ou tau atu ia te oe i lou … loto, e ala i le Agaga Paia, lea o le a oo atu i ou luga. …” (MF&F 8:2.)
Ia agaga tatalo, ma o le a e iloa ai e faafofoga ma tali mai le Atua. E le o taimi uma e pei ona tatou mananao e tali mai ai o ia, ae i le aluga o tausaga, o le a e iloa ai e pei o le mautinoa o le oso a’e o le la, sa ia faafofogaina ma tali mai.24
Ia tumau pea i lena lotomaualalo lea o le a mafua ai ona e alu ifo i ou tulivae i le tatalo, e faailoa atu Lona mana ma [Lona] agalelei. O le a Ia le tuulafoaia lava oe. O le a Ia faafofoga i au tatalo. O le a Ia tali mai i au tatalo. I le taaligoligoa o le po, o le a e lagonaina ai musumusuga a Lona Agaga e faatonutonu ai oe i ou taimi o mafatiaga ma puapuaga. O na taimi o le a oo mai ia te oe e pei ona oo mai i tagata uma. Ia tumau le faatuatua i le Atua, ma o le a Ia le tuulafoaia lava oe. O le a le u mai lava Lona tua ia te oe.25
Ia faataga i taimi uma lou Tama oi le Lagi e avea ma au uo, o le e mafai ona e alu atu i ai i le tatalo.26
Fautuaga mo Suesuega ma le Aoaoina Atu
Fesili
-
O faapefea ona fesoasoani le tatalo ia te oe e te latalata atu ai i lou Tama Faalelagi? Toe faamanatu le fautuaga a Peresitene Hinckley e uiga i mea e tatau ona aofia i tatalo (tagai vaega 1). O le a se taimi na fesoasoani ai le tatalo ia e maua le “atamai e sili atu i lo [lou] lava [poto]”? O le a se taimi na aumaia ai e le tatalo ia te oe le “mafanafana ma le faamaisega”? Aisea e tatau ai ona avea nisi o tatalo o ni “talanoaga o le faafetai”?
-
Mafaufau loloto i faamanuiaga taitasi na saunoa mai ai Peresitene Hinckley e mafai ona oo mai e ala i tatalo faaleaiga (tagai vaega 2). O a nisi o auala ua faamanuiaina ai lou aiga e ala i le tatalo faatasi? O a nisi o maagao i le faalaugatasia o tatalo faaleaiga? O a ni auala e mafai e tagata o le aiga ona galulue faatasi e faatoilalo ai nei maagao?
-
E mafai faapefea e le faaaogaina o aoaoga a Peresitene Hinckley o loo i le vaega 3 ona fesoasoani ia i tatou ia atili anoa a tatou tatalo? O a ni mea ua e aoaoina e uiga i auala e tali ai e le Tama Faalelagi ia tatalo? Aisea e i ai ai i le tatalo le mana e aumai ai i tatou “i se faigapaaga ma le Atua”?
Mau Fesootai
Mataio 6:5–15; Luka 18:9–18; 2 Nifae 32:8–9; Alema 34:17–28; 37:36–37; 3 Nifae 18:15–25; MF&F 19:28
Fesoasoani mo Suesuega
“Ia maua se vaaiga lautele, a le o le faitauina faavave o le tusi, mataupu, po o le iloiloina o ulutala. Taumafai ia malamalama i le aano ma le faatulagaga” (Tala’i La’u Talalelei [2004], 24). Mafaufau e faitau se mataupu po o se fuaitau ia sili atu ma le faatasi ina ia e malamalama atili ai. A o e faia faapena, e mafai ona e maua ai ni malamalamaaga loloto.