Mataupu 2

O Se Tagavai i Malo, o se Malamalama i le Lalolagi

“O le taimi lenei ia faamalosi ai. O se taimi e agai ai i luma e aunoa ma le faatautu, ma iloa lelei le uiga, o le lautele, ma le taua o la tatou misiona.”

Mai le Soifuaga o Howard W. Hunter

E le’i leva ona foi mai i le aiga mai lana misiona i Egelani, sa faapea ona faataunuuina ai e Gordon B. Hinckley le tofiga mulimuli e tasi mai lana peresitene o le misiona, o Joseph F. Merrill. Sa avea foi Peresitene Merrill o se sui o le Korama a Aposetolo e Toasefululua, ma sa ia talosagaina Gordon e fai atu se lipoti i le Au Peresitene Sili: O Peresitene Heber J. Grant, J. Reuben Clark Jr., ma Tavita O. MaKei. Sa faafesootai e Gordon le failautusi a le Au Peresitene Sili ma faatulaga ai se feiloaiga.

Ina ua ulufale atu Gordon i le potu fono o le Au Peresitene Sili, sa faafeiloai fiafia o ia e Peresitene Grant ma ona fesoasoani. Ona saunoa mai lea o Peresitene Grant, “Uso Hinckley, o le a matou tuu atu ia te oe le sefululima minute e ta’u mai ai ia i matou le mea o loo finagalo Elder Merrill matou te faalogo i ai.” O le tasi le itula ma le sefululima minute mulimuli ane, na faatoa tuua ai e Gordon le potu. I lona taimi atofaina e sefululima minute, sa ia faailoa atu ai atugaluga o lana peresitene o le misiona—e faapea, na manaomia e faifeautalai ni mea e faaaoga e sili atu ona lelei ua lolomiina e fesoasoani ai i le latou galuega. O lana avea’i puupuu na taitai atu ai i fesili mai le Au Peresitene Sili ma se talanoaga e itula le umi.

O le faataunuuina ai o lenei tofiga, sa manatu ai Gordon e faapea, “o lenei la ua uma moni lana misiona, ma ua oo loa i le taimi e agai ai i luma ma fai fuafuaga mo lona lumanai.” Ua uma ona faauu mai i le Iunivesite o Iuta ma se tikeri i le Igilisi, ma sa manao o ia e tulitulimatagau se tikeri maualuga atu i galuega ma mea tau faasalalauga i le Iunivesite o Kolomupia i le Aai o Niu Ioka. Ae peitai o se valaau mai i le telefoni i le lua o aso talu ona mavae le latou fonotaga ma le Au Peresitene Sili na suia ai ana fuafuaga. Sa sau le valaau mai ia Peresitene MaKei, o le na faapea mai: “Uso Hinckley, sa matou soalaupuleina ananafi i le fonotaga a le Au Peresitene Sili ma le Toasefululua le mea na tatou talanoa i ai i le taimi o lau faatalanoaga ma i matou. Ma ua matou faatulagaina ai se komiti e aofia ai ni sui se toaono o le Toasefululua, faapea ma Elder Stephen L Richards e avea ma taitaifono, e talanoaina ai manaoga na e folasiaina mai. Matou te mananao e valaaulia oe e te susu mai tou te galulue faatasi ma lena komiti.”¹

Sa talia e Gordon le valaaulia ma sa faigaluega ai o se failautusi faapitoa o le Komiti fou na faatoa faavaeina mo le Leitio a le Ekalesia, Faasalalauga Faalauaitele ma le Iloa Faitautusi ma Tusitusi a le Misiona. Sa le’i alu lava o ia i le Iunivesite o Kolomupia, ma sa le’i faigaluega lava i galuega ma mea tau faasalalauga e lolomi ai tala fou o le lalolagi. Nai lo o lena, sa ia amataina se taumafaiga umi o le olaga atoa e lolomi le tala fou fiafia o le talalelei. O nei tiutetauave sa faalauteleina mulimuli ane, a o auauna atu o ia o se Pulega Aoao.

O le atinaeina ai o le gafatia e faamatala manino atu ai o ia lava e oo lava i tulaga faigata, sa masani ai ona maua e Gordon B. Hinckley ni tofiga ina ia faatalanoaina e le au fai lipoti faasalalau o tala fou. I le avea ai ma Peresitene o le Ekalesia, sa faaauau ai ona ia talia na avanoa, i le faiga o lana vaega e fesoasoani ai e aumai le Ekalesia a Iesu Keriso mai “fafo o le lē mailoa” (MF&F 1:30). Sa ia tautino mai:

“Ou te talitonu ma molimau atu, o le misiona a lenei Ekalesia o le tu lea e fai ma tagavai i malo ma se malamalama i le lalolagi. Ua uma ona tuuina mai ia i tatou se poloaiga maoae e le mafai ona tatou aloese mai ai, pe teena foi. Ua tatou taliaina lena poloaiga ma ua mautu o tatou loto e faataunuu, ma o le a tatou faia faatasi ai ma le fesoasoani mai o le Atua.”²

Malumalu o Sate Leki — “O le misiona a lenei Ekalesia o le tu lea e fai ma tagavai i malo ma se malamalama i le lalolagi.”

Aoaoga a Gordon B. Hinckley

E pei o le maa i le miti a Tanielu, ua taavale atu le Ekalesia e faatumulia ai le lalolagi atoa.

O lenei Ekalesia na amataina i le tatalo faamaulalo a le taulealea o Iosefa Samita i le togavao o le faatoaga a lona tama. Mai lena aafiaga ofoofogia, lea ua tatou ta’ua o le Uluai Faaaliga, ua faatupulaia ai lenei galuega. … O le faataunuuga lea o le faaaliga na vaaia e Tanielu o se maa na tofia i le mauga ae lei tofia i lima ua taavale atu ma faatumulia ai le lalolagi (tagai Tanielu 2:44–45).³

Ina ua faavaeina le Ekalesia i le 1830 sa na o le toaono tagata, [ma] e na o ni nai tagata talitonu toalaiti, sa nonofo uma i se nuu e faaleiloa. … Ua malolosi ma ola siteki o Siona i setete uma o le Iunaite Setete, i itumalo uma o Kanata, i setete uma o Mekisiko, i atunuu uma o Amerika Tutotonu ma Amerika i Saute atoa.

O loo i ai aulotu i Atumotu uma o Peretania ma Europa lea e faitauafe ua auai i le Ekalesia i le gasologa mai o tausaga. O lenei galuega ua oo atu i atunuu o Paletika, ma alu ifo ai i lalo i Palekeria ma Alepania, ma isi eria i lena vaega o le lalolagi. Ua oo atu i le eria tele o Rusia. Ua oo atu i Monokolia ma alu ifo ai i lalo i atunuu o Asia ma oo atu ai i atumotu o le Pasefika, Ausetalia, ma Niu Sila, faapea ma Initia ma Initoneisia. Ua lauolaola i le tele o atunuu o Aferika. …

Ma e na o le amataga lenei. O le a faaauau pea ona tupu ma olaola lenei galuega ma agai atu i le lalolagi atoa.⁴

Sa i ai i taitai anamua o le Ekalesia se vaaiga faaperofeta e uiga i le tele o le galuega a le Alii.

I le aso 24 o Iulai, 1847, na oo mai ai le vaega o paionia o o tatou tagata i totonu o le vanu [o Sate Leki]. Sa i ai se vaega televave na taunuu mai i se aso pe lua na muamua atu. Sa taunuu mai Polika Iaga i le Aso Toonai. O le aso na sosoo ai, sa faia ai sauniga o le Sapati i le taeao ma i le aoauli. Sa leai ma se faletele na i ai e faapotopoto ai. Ou te matea i le aasa o le vevela i lena Aso Sa o Iulai, sa latou saofafai ai i luga o laulaufaiva o a latou taavaletoso ma faalagolago i uili a o saunoa atu le Usoga. O le vaitaimi lea o le taufaaiuiuga o le vaitau, ma sa latou feagai ma se galuega tele ma i le taimi lava lena, pe afai o le a latou totoina ni fatu laau mo le vaitau e sosoo ai. Ae sa talosaga atu Peresitene Iaga ia i latou e aua le solia le Sapati i lena taimi pe i le lumanai foi.

O le taeao na sosoo ai, sa latou vaevae ai loa i vaega e suesue o latou siosiomaga. Sa sopo mai Polika Iaga, Uilifoti Uitilafi, ma nisi o le latou vaega mai le nofoaga sa latou tolauapi ai. … Sa latou feaei i se mauga tusa’o i luga, ma sa faafaigata ia Peresitene Iaga ona o lona gasegase sa aafia ai i se taimi sa lei mamao atu.

Ina ua tutu le Usoga i le tumutumu [o le mauga], sa latou vaavaai ifo i le mafola o le vanu i le itu i saute. Sa tele lava ina leai ni mea na ola ai, vagana ai laau lalatotoso [willows] ma ni vaotuaniu sa ola i tafavai o alia na faatafe atu ai le suavai mai mauga i le vaituloto. Sa leai lava ma soo se ituaiga fale na i ai, ae na saunoa Polika Iaga i le Aso Toonai na muamua atu, “O le nofoaga lenei.”

O le tumutumu mauga sa latou tutu ai, sa faaigoaina o le Ensign Peak [Tumutumu o le Tagavai] ona sa faatatau atu i upu maoae faaperofeta nei a Isaia: “E sii i luga foi e ia [e faatatau i le Atua] le tagavai i nuu ese o mamao, na te mapumapu atu foi ia te i latou i tuluiga o le lalolagi: faauta foi, latou te faataalise ona vave o mai.” (Isa. 5:26.)

“E faatuina foi e ia le tagavai mo nuu ese, ma faapotopotoina e ua tulia o Isaraelu, ma aofai e ua faataapeapeina o Iuta i itu e fa o le lalolagi.” Isa. 11:12.) …

Ou te manatu, o [na Usoga] atonu foi i lena taimi na talanoa ai e uiga i le fauina o le malumalu … i le faataunuuga o upu a Isaia:

“O aso e gata ai, e oo ina faatumauina ai o le mauga o i ai le fale o Ieova i tumutumu o atu mauga, e faamaualugaina foi e sili i mauga; ona gasolo ane ai lea o nuu uma i ai.

“E o mai lava nuu e tele ma latou faapea ane, O mai ia, tatou o ae ia i le mauga o Ieova, o le fale o le Atua o Iakopo; e aoao mai foi o ia ia te i tatou ona ala, ona tatou savavali ai lea i ona ala; aua e alu atu le tulafono ai Siona, o le afioga foi a Ieova ai Ierusalema.” (Isa. 2:2–3.)

Atonu e faapea ane se tasi, oka se faavalevalea, pe ana faalogo o ia i nei tamalii i lena taeao o Iulai o le 1847. Sa le’i pei i latou o ni tagata o le malo na i ai ni moemitiga maoae. Sa le’i pei i latou o ni taitai na suesueina ni faafanua ma fuafuaina se malo. O i latou o ni tagata faaaunuua, na tutuliese mai lo latou aai manaia i luga a’e o le [Vaitafe] o Misisipi agai mai i lenei itu toafa o Sisifo. Ae sa ia te i latou se miti na afua mai i tusitusiga paia ma upu o faaaliga.

Ou te maofa i le vaai mamao a lena vaega toaitiiti. Sa le fefefe ma totoa. Sa toetoe lava a le talitonuina. Sa latou i ai iinei, toeitiiti a afe maila [1,600 kilomita] mai le nofoaga aupito lata ane i sasae ae toeitiiti valu selau maila [1,300 kilomita] mai le Talafatai o le Pasefika. Sa latou i ai i se tau sa le’i mailoa. O le palapala sa ese mai i le palapala uliuli lafulemu o Ilinoi ma Aioua, lea sa lata mai ona latou nonofo ai. Latou te le’i totoina ai se laau iinei. Latou te le’i iloa foi se taumalulu. Latou te le’i fauina foi se fale o soo se ituaiga lava. O nei perofeta, sa laei i ni lavalava tuai, ma na masaesae mai femalagaaiga, sa tutu i ni seevae e tau i tuli sa latou seeina mo le silia ma le afe maila mai Navu e tau mai i lenei vanu, sa saunoa e uiga i se vaaiga mamao i le meleniuma. Sa latou saunoa e faavae i se vaaiga faaperofeta i le faasinomaga ofoofogia o lenei faamoemoe. Sa latou o ifo mai le mauga i lena aso ma galulue loa i le faataunuuina o le latou miti.⁵

o taitai i luga o le Ensign Peak [Tumutumu o le Tagavai] — O le lua o aso talu ona taunuu i le Vanu o Sate Leki, sa feaei ai Polika Iaga ma nisi o le usoga i se mauga maualuga tusa’o, lea na faaigoaina o le Ensign Peak [Tumutumu o le Tagavai], ma suesue o latou siosiomaga.

E le tatau ona aveesea la tatou vaaiga i le faasinomaga e faavavau o le galuega a le Atua ma le tatou vaega e faia ai.

O nisi o taimi i nei aso, a o tatou savalia o tatou ala vaapiapi ma faataunuu o tatou tiutetauave talafeagai laiti, e faapea ona aveesea ai la tatou vaai i le ata tele. I aso a o o’u laitiiti, sa taatele ai lava ia solofanua faigaluega. O se vaega taua o le anesi o le faagutu lea. I luga o le faagutu na i ai ni pupuni, e ta’i tasi i le itu. Sa tuu ai iina ina ia tau lava o le vaai sa’o o le solofanua i luma ae le o isi itu. Sa mamanuina ina ia taofi ai o ia mai le fefe pe faalavelave ma ia taulai atu lona mafaufau i le auala e savali ai.

O nisi o i tatou, e fai a tatou galuega e pei na i ai ni pupuni i luga o o tatou mata. E na’o le tatou auala itiiti ma vaapiapi tatou te vaai i ai. E leai se mea tatou te iloa o le vaaiga lautele. Atonu o o tatou tiute o ni tiutetauave itiiti i totonu o le Ekalesia. E lelei le faataunuu o lena tiutetauave ma le filiga. Ma e lelei foi le iloa o auala e saofaga ai lena tiutetauave i le polokalama aoao maoae o le malo tuputupu a’e o le Atua.

Sa saunoa Peresitene Harold B. Lee i se tasi taimi … , i le ta’ua ai o se faamatalaga mai i se tusitala e le mailoa, “Ia iloilo laufanua tetele ona atina’e lea o fasi fanua.”

O la’u faaliliuga o lena faamatalaga e faapea, e tatau ona tatou iloa le lautele, loloto ma le maualuga o se mea—maoae ma matagofie, tele ma aoao—o le polokalama a le Alii, ona galulue lea ma le filiga e faafetauia o tatou tiutetauave mo vaega ua atofaina mai ia i tatou o lena polokalama.

Ua tofu i tatou uma taitoatasi ma se fasi fanua e atinae. A o [tatou] faia o lea mea, e le tatau lava ona aveesea la tatou vaai mai le fuafuaga tele atu, le tuufaatasiga tele o le faasinomaga paia o lenei galuega. Sa tuuina mai ia i tatou e le Atua lo tatou Tama Faavavau, ma ua tofu i tatou taitoatasi ma se vaega e fai i le lalagaina o lana ie lalaga matagofie. Atonu e itiiti a tatou saofaga taitoatasi, ae e le faapea e le taua. …

… A o e faataunuuina le vaega ua valaauina i ai oe, ia aua ne’i aveesea lau vaai mai le ata mataina ma le matagofie atoa o le faamoemoega o lenei, le tisipenisione o le atoatoaga o taimi. Ia lalaga faamanaia lau filo itiiti i le ie lalaga tele, o le mamanu lea na faataatia mai mo i tatou e le Atua o le lagi. Ia tuu maualuga le tulaga faatonuina lea o loo tatou savavali ai i lalo. Ia filiga, ia amiosa’o, ia mama, ia faamaoni, ina ia le i ai se faaletonu i lena tagavai.

O le vaaiga mamao o lenei malo, e le o se li’a i le po lea e mouese pe a oso a’e le la. O le fuafuaga ma le galuega moni a le Atua lo tatou Tama Faavavau. E faatatau i Ana fanau uma lava.

A o eli ese tamai laau malo o nei vanu i sisifo [o Iuta] e faataatia ai faavae mo se setete, a o faia le tele o mea faavaivai tagata sa manaomia ona latou faia ina ia ola ai ma toto [a latou faatoaga], sa tuu ai e o tatou tuaa [paionia] i o latou luma le mamalu o le faamoemoega tele lea sa latou auai ai. O se galuega e ao ona tatou faia ma lena lava vaaiga mamao sa i ai ia te i latou. O se galuega o le a alualu pea pe a tatou o ese atu. Ia fesoasoani mai le Atua ina ia tatou faia le mea e sili ona lelei i le avea ai o ni auauna, na valaauina i lalo o Lona finagalo paia, e faataunuu ma atinae le malo i lima le atoatoa, ae ua tuufaatasia e faatino se mamanu atoatoa.⁶

E mafai ona avea i tatou o se tagavai i malo lea e mafai ai e tagata o le lalolagi ona maua ai le malosiaga.

O’u uso e ma tuafafine, ua oo mai le taimi tatou te tutulai maualuga teisi ai, ia ea i luga o tatou mata ma falo o tatou mafaufau i se iloa ma se malamalama sili atu e uiga i le misiona maoae o le meleniuma a lenei [ekalesia], Le Ekalesia a Iesu Keriso o le Au Paia o Aso e Gata Ai. O le vaitau lenei ia malolosi ai. O se taimi e agai ai i luma e aunoa ma le faatuai, ma le iloa lelei o le uiga, le lautele, ma le taua o le tatou misiona. O se taimi e fai ai le mea sa’o e tusa lava po o a taunuuga e ono mulimuli mai ai. O se taimi ia maua mai o tausia poloaiga. O se vaitau e aapa atu ai ma le agalelei ma le alofa ia i latou o loo mafatia ma i latou o e o loo fesesea’i solo i le pogisa ma le tiga. O se taimi ia magafagafa ma amio lelei ai, ia tausaafia ma tauagafau i le tasi ma le isi i a tatou faifaiga uma. I se isi faaupuga, ia avea atili e faapei o Keriso.⁷

Seiiloga lava e sui e le lalolagi le ala o loo ui ai nei (ma e masalo e le tupu lena mea); ma afai, i se isi itu, e faaauau pea ona tatou mulimuli i aoaoga a perofeta, o le a faapea ona faateleina lo tatou avea ma se tagata tulaga ese ma iloga lea o le a matau mai e le lalolagi. Mo se faataitaiga, a o talaloa le amiosao o le aiga i lalo o faatosinaga a le lalolagi, o le a atili manino ma atili tulaga ese ai lo tatou tulaga i le paia o le aiga, i se faatusatusaga, pe afai o loo i ai lo tatou faatuatua e faatumau ai lena tulaga.

A o faaauau ona salalau atu le faateleina o le taliaina o feusuaiga, o le aoaoga faavae a le Ekalesia, e pei ona aoaoina ai i taimi uma mo le silia i se seneturi ma le afa, o le a faateleina le tu toatasi ma oo foi ina avea ma se mea ese i le toatele.

A o faateleina le faaaogaina o mea inu malosi ma le faaaogaina faatautala o fualaau faasaina i tausaga taitasi i totonu o tulaga faatauaina o o tatou afioaga, o lo tatou tulaga, ua faataatia mai e le Alii i le silia ma se seneturi ma le afa ua mavae, o le a faasolo ina avea o se mea e le masani ai i luma o le lalolagi. …

A o matele ina avea le Sapati o se aso o faatauga ma faafiafiaga, o i latou o e usitai i le mataupu o le tulafono, na tusia e le aao o le Alii i luga o Sinai ma faamalosia e ala i faaaliga i onaponei, o le a atili foliga ese lava.

E le o taimi uma e faigofie ai ona ola i le lalolagi ae le avea o sona vaega. E le mafai ona tatou ola na o i tatou lava pe mo i tatou lava, pe tatou te mananao foi i ai. E tatau ona tatou milo faatasi ma isi. O le faia o lena mea, e mafai ona tatou agalelei. E mafai ona tatou le faatiga. E mafai ona tatou taofia soo se agaga po o se uiga o le faafia-amiotonu. Ae e mafai ona tatou faatumauina o tatou tulaga faatonuina. …

Afai tatou tausisia nei tulaga faatonuina ma isi tulaga faatonuina o loo aoao mai e le Ekalesia, o le a faaaloalogia i tatou e le toatele o tagata i le lalolagi, ma maua le malosiaga e mulimuli ai i na mea latou te iloa foi e sa’o.

Ma, i upu a Isaia, “E o mai lava nuu e tele ma latou faapea ane, O mai ia, tatou o ae ia i le mauga o Ieova, o le fale o le Atua o Iakopo; e aoao mai foi o ia ia te i tatou ona ala, ona tatou savavali ai lea i ona ala.” Isa. 2:3.)

E le manaomia ona tatou tuu maualalo [o tatou tulaga faatauaina]. E le tatau ona tatou tuu maualalo [o tatou tulaga faatauaina]. O le sulu na tutuina e le Alii i lenei tisipenisione e mafai ona avea ma se malamalama i le lalolagi atoa, ma mafai ai ona taitai atu isi e iloa a tatou galuega lelei e viia lo tatou Tama oi le Lagi ma faataitai ai o latou lava olaga i faataitaiga na latou matauina mai i o tatou olaga.

E amata atu ia te oe ma a’u, o loo i ai ni tagata se toatele o e e mafai, e ala i le mama o o tatou olaga i totonu o o tatou aiga, i a tatou galuega, ma faapena foi i a tatou gaoioiga faafiafia, ona avea ma se aai i luga o le mauga lea e mafai ona vaai atu ma aoao mai ai tagata, ma se tagavai i malo lea e mafai e tagata o le lalolagi ona maua mai ai le malosiaga.⁸

Afai tatou te mananao e tuu i luga lenei Ekalesia e fai ma tagavai o malo ma malamalama i le lalolagi, e tatau la ona tatou tufi taufaoina ia tele uiga tausaafia o le soifuaga o Keriso mo i tatou taitoatasi, ma o tatou lava tulaga faaletagata lava ia. Pe a tatou tutu atu mo le mea tonu, e le tatau ona tatou atuatuvale i taunuuga. E le tatau ona tatou fefefe. Fai mai Paulo ia Timoteo:

“Aua ua le foaiina mai e le Atua ia te i tatou le Agaga e mata’u ai, a o le Agaga e faamalosi ai, ma alofa ai, ma mafaufau tonu ai.

“O lenei, aua e te ma i le molimau i lo tatou Alii” (2 Timoteo 1:7–8).⁹

E le mafai ona e manatu mama i lenei faamoemoega, o le faamoemoega lea o Keriso. E le mafai ona e tutu i autafa ma matamata i le taaloga i le va o le lelei ma le leaga. …

… Ou te uunaia outou ma le malosi uma o ia te a’u, ina ia aapa atu i se tiute e i tua atu o mea e manaomia i o tatou olaga i aso uma; o lona uiga, ia tu malosi, tainane foi le avea ma se taitai i le tautala atu e fai ma sui o na faamoemoega, e faapea ona susulu atu ai o tatou agaifanua ma aumaia ai le mafanafana ma le toafilemu i o tatou olaga. E mafai ona avea oe o se taitai. E tatau ona avea oe o se taitai, o se tagata o lenei Ekalesia, i na faamoemoega o loo faapea ona tu ai lenei Ekalesia. Aua ne’i faatagaina le mata’u e faatoilalo ai au taumafaiga.¹⁰

E leai se mea tatou te fefefe ai. O loo i ai le Atua i le foeuli. O le a Ia tetee atu mo le manuia o lenei galuega. O le a Ia liligi mai faamanuiaga i luga o i latou o e savavali usiusitai i Ana poloaiga. O le mea lena na Ia folafola mai. E leai se tasi o i tatou e mafai ona masalosalo i Lona mafai ona tausisia lena folafolaga.

… Na folafola mai, e lo tatou Faaola, o lo tatou Togiola lea, o le Ieova Silisili, o le Mesia malosi: “O le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai loʼu Agaga i o outou loto, ma siʼo faataamilo outou e aʼu agelu, e sapasapai outou i luga” (MF&F 84:88).

Na fetalai o Ia, “O lea, aua le matatau, le lafu itiiti e; fai mea lelei; ia tuu le lalolagi ma seoli e aufaatasi faasaga mai ia te oulua, auā afai ua lua atiaʼe i luga o laʼu papa, e lē mafai ona latou manumalo. …

“Vaai mai ia te aʼu i mafaufauga uma; aua le masalosalo, aua le fefefe.

“Matau i manuʼa ua tuia ai loʼu itu, ma tulaga fao foi i oʼu lima ma oʼu vae; ia faamaoni, tausi i aʼu poloaiga, ma o le a oulua mautofi ai i le malo o le lagi” (MF&F 6:34, 36–37).

O le tatou galulue faatasi ai, ma uulima faatasi, o le a tatou agai ai i luma o ni auauna a le Atua soifua, i le faiga o le galuega a Lona Alo Pele, o lo tatou Matai, o le ua tatou auauna i ai ma o lona suafa tatou te saili e viia.¹¹

E tatau ona tatou tutu ma le mausali. E tatau ona tatou tetee atu i le lalolagi. Afai tatou te faia, o le a avea le Silisili Ese ma o tatou malosiaga ma o tatou talipupuni, o lo tatou taimua ma le e aumaia faaaliga mo i tatou. O le a tatou maua foi le mafanafana i le iloa o loo tatou faia le mea e finagalo o Ia tatou te faia. Atonu e le ioe nisi faatasi ma i tatou, ae ou te talitonu latou te ava lava ia i tatou. O le a le tuulafoaiina lava i tatou. E toatele i latou [o e] e le auai i lo tatou faatuatuaga, ae e tutusa o tatou lagona. O le a latou lagolagoina i tatou. O le a latou fesoasoani mai foi i a tatou taumafaiga.¹²

Ina tatou olioli ia i lenei vaitau matagofie o le galuega a le Alii. Aua tatou te femitai pe faamaualuluga ai. Ia tatou lotomaulalo ma faafetai. Ma ia tofu i tatou taitoatasi ma se faaiuga i lona lava loto, o le a tatou faaopoopo atu i le matagofie o lenei galuega maoa’e a le Silisili Ese, ina ia susulu atu i le lalolagi atoa, o se faailoilo o le malosi ma le agalelei e vaavaai atu i ai le lalolagi atoa.¹³

faamatalaga auiliili, O Keriso ma le Taulealea Mauoa — “Afai tatou te mananao e tuu i luga lenei Ekalesia e fai ma tagavai o malo ma malamalama i le lalolagi, e tatau la ona tatou tufi taufaoina ia tele uiga tausaafia o le soifuaga o Keriso.”

Fautuaga mo Suesuega ma le Aoaoina Atu

Fesili

A o e faitau i le vaega 1, o a ni ou lagona a o e mafaufau i le tuputupu a’e o le Ekalesia mai le 1830 e tau mai i aso nei?
Toe faamanatu le tala a Peresitene Hinckley e uiga i le taunuu atu o uluai paionia i le Vanu o Sate Leki (tagai i le vaega 2). O le a se mea e mafai ona tatou aoao mai i lenei tala? O a ni auala ua faamanuiaina ai i tatou mai le vaaiga mamao faaperofeta a uluai taitai o le Ekalesia? O le a lou manatu i le uiga o le avea “ma se tagavai i malo”? (Tagai Isaia 5:26; 11:12.)
I le vaega e 3, sa uunaia ai e Peresitene Hinckley i tatou ia vaai i le “ata tele” ma se “vaaiga lautele” o le galuega a le Atua. Aisea e manaomia ai ona tatou vaai i lenei ata tele? Aisea e aveese ai i nisi o taimi la tatou vaaiga i ai? O a ni auala e mafai ona saofaga ai a tatou taumafaiga laiti i le tuputupu a’e o le malo o le Atua?
Toe faamanatu auala na fai mai Peresitene Hinckley ua faasolo ina avea atili ai le Au Paia o Aso e Gata Ai ma ni “tagata tulaga ese ma iloga” (vaega e 4). E mafai faapefea ona tatou atinae se vaaiga ma se lototele sili atu i le faaaga’iina i luma o le galuega a le Atua? E mafai faapefea ona tatou i ai i le lalolagi ae le ni o o le lalolagi? E mafai faapefea ona tatou “tufi taufaoina ia tele uiga tausaafia o le soifuaga o Keriso”? Aisea e taua ai ona tatou tutu atu mo le mea moni?

Mau Fesootai

Mataio 5:14–16; 1 Nifae 14:14; MF&F 1:1–6; 65:1–6; 88:81; 115:5–6

Fesoasoani mo le Aoaoina Atu

“Ia mautinoa ia ‘aua ne’i e talitonu o oe o le ‘faiaoga moni.’ O se mea matuai sese lava lena. … Ia faaeteete ia aua ne’i e faalavelave [i le Agaga]. O le matafaioi autu a se faiaoga o le saunia lea o le auala ina ia maua ai e tagata se feutagaiga faaleagaga ma le Alii” (Gene R. Cook, sii mai i le O Le Aoao Atu, E Leai Se Isi Valaauga E Sili Ai [1999], 43).