Mataupu 22

Aapa Atu ma le Alofa i Tagata Fou Liliu Mai ma Tagata Le Toaaga

“E ao ona tatou nofouta i taimi uma i le tiutetauave tele o le faaaumeaina mai … o i latou o e ua o mai i le Ekalesia o ni tagata liliu mai, ma ia aapa atu ma le alofa ia i latou o e … ua laa atu i le ataata o le le toaga [i le Ekalesia].”

Mai le Soifuaga o Gordon B. Hinckley

O se tasi o autu na faamamafaina e Peresitene Hinckley i lana auaunaga atoa o se Peresitene o le Ekalesia o le taua o le aapa atu i tagata fou liliu mai ma i latou o e ua le toe toaaga i le Ekalesia. Sa ia faasoa mai le tele o faataitaiga o ana taumafaiga patino e faatatau i lenei mea, o se tasi o ia aafiaga sa ia faamatalaina ma le lagona ootia o se “tasi o mea na ou toilalo ai.” Sa ia faamatalaina:

“A o auauna atu o se faifeautalai i le Atu Peretania, sa ma aoaoina ai ma la’u soa, ma o sou fiafiaga lo’u papatisoina ai o se alii talavou. Sa lelei ana aoaoga. O Ia o se tamalii. Sa maelega o ia. Sa matuai o’u mitamita lava i lenei alii talavou talenia o le na sau i totonu o le Ekalesia. Sa ou manatu sa ia te ia tulaga manaomia uma o le a avea ai i se aso ma se taitai i o tatou tagata.

“Sa i ai o ia i le ala o le faia o se suiga tele mai le avea ma se tagata liliu mai i se tagata o le Ekalesia. Mo se taimi puupuu a o le’i faamaloloina a’u, sa ou maua le avanoa e avea ai ma ana uo. Ona faamaloloina lea o a’u e toe foi atu i [lo’u] aiga. Sa tuuina atu ia te ia se tiutetauave itiiti i le paranesi i Lonetona. Na te le’i iloa se mea o mea sa faamoemoeina mai ia te ia. Sa ia faia se mea sese. O le taitai o le faalapotopotoga sa ia galue ai o se alii, o le auala sili ou te faamatalaina ai, o se tagata e tau leai se alofa ae malosi i le faitio. I se auala na fai si faalealofa, sa ia tulituliapuina ai la’u uo o le sa faia se mea sese faatauvaa.

“Sa tuua e le alii talavou la tatou fale faafiafia mautotogi i lena po ma le lagona le fiafia ma le tiga. … Sa ia fai ifo ia te ia lava, ‘Afai o ituaiga tagata na e i ai i latou, ou te le toe foi lava i ai.’

“Sa tafea malie atu o ia i le le toe malosi [i le lotu]. Ua mavae atu tausaga. … Ina ua ou [toe] i ai i Egelani, sa ou taumafai malosi lava e sue o ia. … Sa ou toe foi mai i le fale ma mulimuli ane, i le mavae ai o se sailiga umi, sa oo ina mafai ona ou maua o ia.

“Sa ou tusi atu ia te ia. Sa tali mai ae sa leai ma se ta’ua o le talalelei.

“I le isi taimi na ou toe i ai i Lonetona, sa ou toe sailia foi o ia. O le aso na tuu ou te alu ai, na ou maua ai o ia. Na ou valaau atu ia te ia, ma sa ma feiloai i le nofoaga faatali nofoaafi e i lalo o le palapala. Sa ia fusi mai ia te a’u na pei foi ona sa ou fusi atu ia te ia. Sa itiiti lo’u taimi na i ai ae ou te le’i alu e pu’e la’u vaalele, ae sa ma talanoa pupuu ma faatasi ma se mea na ou manatu o ni lagona lelei mo le tasi ma le isi. Sa ia toe opoina a’u ae ou te le’i aluese mai. Sa ou naunau ia le toe motusia lava le ma fesootaiga. …

“Na mavae tausaga. Na faasolosolo ina ou matua ma na faapena foi ia te ia. Sa litaea o ia mai lana galuega ma siitia atu i Suitiselani. I se tasi taimi a o o’u i ai i Suitiselani, sa ou alu ai su’e le nuu sa nofo ai o ia. Ma matou faaaluina faatasi le tele o lena aso—o ia, o lona faletua, o lo’u toalua, ma a’u. Sa manaia le matou taimi faatasi ma i la’ua, ae sa manino lava ua leva ona le toe ola le afi o lona faatuatua. Sa ou taumafai i mea uma lava na ou iloa, ae sa ou le maua se ala e toe tutuina ai. Sa faaauau pea a’u fesootaiga [ia te ia]. Sa ou auina atu ia te ia ni tusi, mekasini, lipine a le Aufaipese a le Tapeneko, ma isi mea, lea sa faailoa mai ai lona agaga faafetai.

“O ni nai masina ua mavae na maliu ai o ia. Sa tusi mai lona faletua e logo mai au e uiga i ai. Sa fai mai o ia, ‘O oe o lana uo lelei lava sa i ai.’

“Sa maligi o’u loimata a o ou faitauina lena tusi. Sa ou iloa na ou toilalo. Masalo ana ou i ai iina e faatu o ia i luga i le taimi muamua lava na pau ai, atonu e ese se mea sa na faia i lona olaga. Ou te manatu e ono mafai ona ou fesoasoani ia te ia i lena taimi. Ou te manatu e ono mafai ona ou fusifusia le manu’a lea sa tigaina ai o ia. E na o le tasi lava le mea ou te mafanafana ai. Sa ou taumafai. E na o le tasi lava le mea ou te faanoanoa ai. Sa ou toilalo.

“O le lu’i i le taimi nei ua tele atu nai lo le taimi na i ai muamua, ona ua tele atu le numera o tagata liliu mai nai lo le mea na tatou iloa ai muamua. … E taua tagata uma ua liliu mai. O tagata uma ua liliu mai, o se atalii po o se afafine o le Atua. O tagata uma ua liliu mai, o se matafaioi tele ma le taua.¹

O le popolega a Peresitene Hinckley mo tagata fou liliu mai ma tagata ua le toe toaaga mai, sa o se taunuuga o lana aafiaga i le vaaia o le ala ua faamanuia ai e le talalelei ia olaga. Sa fesiligia o ia i se tasi taimi e se fai lipoti o talafou e faapea, “O le a se mea e aumaia ia te oe le faamalieina silisili a o e vaai atu i le galuega a le Ekalesia i le aso?” Sa tali atu Peresitene Hinckley:

“O le aafiaga aupito sili ona faamalieina ua ou maua, o le vaaia lea o le mea e faia e le talalelei mo tagata. E avatu ai ia i latou se vaaiga fou i le olaga. E avatu ai ia i latou se manatu latou te le’i lagonaina muamua. E siitia ai lo latou vaaiga i mea e mamalu ma paia. E tupu se mea ia i latou e ofoofogia i le vaai. Latou te vaai atu ia Keriso ma ola ai.”²

O Keriso ma le tamai mamoe — “Sa tuua e le Alii le ivasefulu ma le iva ae su’e le mamoe na leiloa.”

Aoaoga a Gordon B. Hinckley

Ua i ai sa tatou tiutetauave tele e auauna atu i le [tagata e] toatasi.

E tatau ona tatou vaaia faalelei le [tagata e] toatasi. Sa fetalai i taimi uma Keriso e uiga i tagata taitoatasi. Sa ia faamaloloina taitoatasi ia tagata mama’i. Sa Ia fetalai i Ana faataoto e uiga i tagata taitoatasi. E popole le Ekalesia i tagata taitoatasi, e ui lava i lo tatou fuainumera. E tusa lava pe 6 pe 10 pe 12 pe 50 miliona, e le tatau lava ona aveese mai la tatou vaaiga mai le mea moni e faapea, o tagata taitoatasi o le mea taua lea.³

Ua avea i tatou ma se faalapotopotoga toatele i le lalolagi. Ae peitai, o o tatou mafaufau ma popolega, e ao lava ona i ai lea i le tagata e toatasi. O tagata uma lava o lenei ekalesia o se alii po o se tamaitai, tama po o se teine e toatasi. O lo tatou tiutetauave sili lava, o le vaai lea o “manatua [i latou taitoatasi] ma tausia i le afioga lelei a le Atua” (Moro. 6:4), o faapea ona i ai i a i latou taitoatasi le avanoa mo le tuputupu a’e ma faaali atu lagona, ma faamasani i le galuega ma ala o le Alii, ma ia leai se tasi e le i ai mea e manaomia o le olaga, ia faapea ona taulimaina manaoga o e matitiva, ia maua e tagata taitoatasi o le ekalesia ia faamalosiauga, aoaoga faamasani ma le avanoa e alualu ai i luma i le ala o le tino ola pea ma le ola e faavavau. …

O le galuega lenei e faatatau i tagata, i atalii po o afafine taitoatasi o le Atua. I le faamatalaina o mea na te ausia, tatou te talanoa ai i fuainumera, ae o a tatou taumafaiga uma e ao lava ona tuuto atu i le atinaega o le tagata e toatasi.⁴

Ou te fia faamamafa atu e faapea, o loo lelei tele ma manaia le tuputupu a’e i totonu o le Ekalesia. … E tele mafuaaga e tatau ai ona tatou lagona le faalototeleina. Ae o soo se tagata liliu mai e oo ina maalili lona faatuatua, o se mala paga lea. Soo se tagata o le ekalesia e pau atu i le le toe toaga [i le Ekalesia] o se tulaga e tatau ona [tatou] atugalu tele ai. Sa tuua e le Alii le ivasefulu ma le iva ae su’e le mamoe na leiloa. O Lona popolega mo [le [mamoe] e tasi] sa matuai ogaoga lava na faapea ona Ia faia ai ma autu o se tasi o Ana lesona maoae [tagai Luka 15:1–7]. E le mafai ona tatou le manatu mamafa i ai. E ao ona tatou faailoa atu i taimi uma i taitai o le Ekalesia ma tagata auai, le tiute tele lea o le faaaumea mai i se auala e sili ona moni ma lelei ma manaia, ia i latou o e e o mai i totonu o le Ekalesia o ni tagata liliu mai, ma ia aapa atu ma le alofa ia i latou o e po o le a lava le pogai ua faasolo atu ai i le le toe toaga mai [i le ekalesia]. Ua lava faamaoniga e iloa ai e mafai ona faia pe afai e i ai le loto e fai ai.⁵

E taua tagata uma e liliu mai ma o se tiutetauave maoae ma taua.

Ua ou lagona o le mala aupito leaga i totonu o le Ekalesia, o le leiloloa o i latou o e auai mai i le Ekalesia ona liliu ese lea. Vagana ai ni nai tagata toalaiti lava, e le tatau ona tupu lea tulaga. Ou te mautinoa e toetoe lava o i latou uma o e ua papatisoina e faifeautalai, na lava ona aoaoina ia maua ai se malamalamaaga ma se molimau e tauamiotonuina ia o latou papatisoga. Peitai e le o se mea faigofie le faia o le suiga e faatatau i le auai mai i lenei Ekalesia. O lona uiga o le tuua o ni fegalegaleaiga tuai. O lona uiga o le tuua o ni uo. O lona uiga o le faataatiaese o ni talitonuga sa pele [ia i latou]. E ono manaomia ai se suiga o mea sa masani ai ma se taofiga o mea sa faamemelo i ai. I le tele lava o tulaga, o lona uiga o le tuuatoatasi faapea foi ma le popole i le le mailoa. E tatau ona i ai le faafaileleina ma le faamalosia i le aluga o lenei vaitau faigata i le olaga o se tagata liliu mai. E tele se tau na totogiina mo lona i ai i totonu o le Ekalesia. O taumafaiga umi a faifeautalai ma le tau o la latou auaunaga, o le vavaeese mai mai mafutaga tuai ma puapuaga e o mai faatasi ma lenei mea atoa, e faapea ona taua ai le taliaina, faamalosiauina, ma le fesoasoani i nei agaga faapelepele i taimi e vaivai ai, ma tuu atu ia i latou le tiutetauave ina ia mafai ona latou tutupu malolosi, ma uunaia ma faafetai atu mo mea uma latou te faia.⁶

alii o loo galulue i le pasika — “Ou te valaaulia tagata uma o le ekalesia ina ia aapa atu i le faauo ma le alofa mo i latou o e o mai i totonu o le Ekalesia o ni tagata liliu mai.”

E leai se uiga o le faia o galuega faafaifeautalai sei vagana ua tatou taofimauina fua o lena taumafaiga. E tatau ona le mavavaeeseina ia mea e lua. E taua tele nei tagata liliu mai. … O tagata liliu mai taitoatasi o se matafaioi tele ma le taua. E matuai taua tele lo tatou vaaia faalelei o i latou ua avea ma se vaega o i tatou. …

Sa ou mauaina i le isi aso se tusi mataina lava. Sa tusia e se tamaitai na auai i le Ekalesia i se tausaga ua tea. Sa ia tusia:

“O la’u malaga i totonu o le Ekalesia sa tulagaese ma sa fai lava si luitauina. O le tausaga lea ua tea o se tausaga sili lea ona faigata talu ona ou ola. Ae o se tausaga foi ua sili ona faamanuiaina. I le avea ai ma se tagata fou o le ekalesia, o loo faaauau pea ona luitauina au i aso uma.” …

Na ia ta’ua e faapea “E le iloa e tagata o le Ekalesia le mea e ta’u o le avea ma se tagata fou o le Ekalesia. O le mea lea, e toetoe lava ina a latou le mafai ona iloa pe faapefea ona lagolagoina i matou.”

Ou te lu’iina outou, ou uso e ma tuafafine, afai tou te le iloaina pe faapei, ia outou taumafai e vaai faalemafaufau i ai pe faapei. E mafai ona matua tuuatoatasi lava. E mafai ona oo ai i le le fiafia. E mafai ona tau faafefe. O i tatou o lenei Ekalesia e matua eseese mamao lava mai le lalolagi nai lo mea o tatou manatu i ai. Sa faaauau le faamatalaga a lenei tamaitai:

“Pe a avea i matou o tagata sailiili ma tagata o le Ekalesia, matou te tete’i i le iloaina ua matou ulufale atu i se lalolagi e matuai ese lava, o se lalolagi e i ai ona lava aganuu, agaifanua, ma gagana. Matou te iloaina ai e leai lava se tagata e toatasi po o se punavai o faamatalaga e mafai ona matou liliu atu i ai mo le taitaiga i la matou malaga i lenei lalolagi fou. O le taimi muamua e faafiafiaina le malaga, o a tatou mea sese e malie, ona oo ai lea ina faanoanoa ma iu ai ina liua le faanoanoa i le ita. Ma o iinei i nei tulaga o le faanoanoa ma le ita matou te o ese ai. Matou te toe foi i le lalolagi na matou o mai ai, i le mea sa matou iloa sa matou i ai, i le mea na matou saofaga ai, ma le mea e mafai ona matou tautatala ai i le gagana.”⁷

O nisi tagata taitoatasi ua na ona papatisoina, e le’i faaaumeaina i latou ma i totonu o le lua po o le tolu masina ona latou faatofa mai lea. E taua tele, o’u uso e ma tuafafine, le vaaia ua liuaina ia [tagata fou na papatisoina], ia i ai i o latou loto se tautinoga e faatatau i lenei galuega maoae. E le o se mea e tau lava o le iloa. O se mea e faatatau i le loto, ma na pa’i i ai le Agaga Paia seia oo ina latou iloa e moni lenei galuega, o Iosefa Samita sa o se perofeta moni a le Atua, ma o loo soifua le Atua ma o loo soifua Iesu Keriso, ma sa la’ua faaali mai i le taulealea o Iosefa Samita, ma e moni le Tusi a Mamona, ma ua i ai iinei le Perisitua faatasi ai ma ana meaalofa ma faamanuiaga uma. E le mafai lava ona ou faamamafaina tele atu lenei mea.⁸

E manaomia e tagata uma e liliu mai se faauoga, se tiutetauave, ma se faafaileleina i le afioga a le Atua.

Ona o le faatupulaia o le fuainumera o tagata liliu mai, e ao ona tatou faia se taumafaiga tele naua e fesoasoani ai ia i latou pe a latou mauaina lo latou ala. E manaomia e i latou uma taitoatasi ni mea se tolu: o se uo, o se tiutetauave, ma ia faafaileleina “i le afioga lelei a le Atua” (Moro. 6:4). O lo tatou tiute ma le avanoa le tuuina atu o nei mea.⁹

Faauoga

E o mai [tagata liliu mai] i totonu o le Ekalesia ma se naunautai mo le mea ua latou mauaina. E tatau ona tatou galulue vave loa i luga o lena naunautai. … Faalogo atu ia i latou, taiala i latou, tali a latou fesili, ma ia i ai iina e fesoasoani i tulaga uma ma i vaega uma lava. … Ou te valaaulia tagata uma o le ekalesia ina ia aapa atu i le faauo ma le alofa mo i latou o e e o mai i totonu o le Ekalesia o ni tagata liliu mai.¹⁰

O loo i ai sa tatou tiute ia i latou o e e papatisoina i totonu o le Ekalesia. E le mafai ona tatou tuulafoaia i latou. E le mafai ona tatou tuua i latou e tutu na o i latou. Latou te manaomia le fesoasoani a o latou tau faamasani i auala ma le aganuu a lenei Ekalesia. Ma o le tatou faamanuiaga ma le avanoa silisili le tuuina atu o lena fesoasoani. … O se ataata agalelei, o se faatalofa faauo, ma se upu faalaeiau o le a faia ai ni mea ofoofogia.¹¹

Ia tatou aapa atu i nei tagata! Ia tatou faauo atu ia i latou! Ia tatou agalelei atu ia i latou! Ia tatou faamalosiau ia i latou! Ia tatou faaopoopo atu i lo latou faatuatua ma lo latou malamalama e uiga i lenei galuega a le Alii.¹²

Ou te talosaga atu ia te outou … ina ia outou faauouo mai ia i latou o e e o mai i totonu o le Ekalesia, ma ia faauo ia i latou ma fai ina ia latou lagona le taliaina ma faamafanafana ia i latou, ma o le a faapea ona tatou vaaia ai ni taunuuga matagofie. O le a faamanuia le Alii ia te outou e fesoasoani ai i lenei faagasologa tele o le faatumauina o tagata liliu mai.¹³

Tiutetauave

E i ai se mea o loo faamoemoe mai e lenei Ekalesia i tagata. E i ai tulaga faatauaina maualuluga. E i ai aoaoga faavae malolosi. O loo faamoemoe mai ni auaunaga maoae mai i tagata. E le na ona latou mulimuli atu ma le faapaie. Tatou te faamoemoe ia latou faia ni mea. E tali mai tagata i lena mea. Latou te talia le avanoa e auauna atu ai, ma a o latou faia lena mea, latou te tuputupu ae i lo latou gafatia, i lo latou malamalama, ma i o latou agavaa e fai ai ni mea ma e lelei ona fai.¹⁴

Tuu atu i [tagata fou o le ekalesia] se mea e fai. O le a latou le ola malolosi i le faatuatua pe aunoa ma le faamalositino. O le faatuatua ma le molimau e pei lava o maso o lou lima. Afai ou te faaaogaina na maso ma fafaga i latou o le a faapea ona malolosi atili. Afai ou te tuua lo’u lima i se siligi ma tuu ai lava iina, e oo ina vaivai ma leai se aoga, e faapena foi i molimau.

Ia, atonu e faapea mai nisi o outou, e le’i saunia i latou e talia se tiutetauave. Ae e leai se tasi o i tatou na saunia i le taimi na oo mai ai le valaauga. E faapena foi ia te a’u lava ia. Pe tou te manatu na ou saunia mo lenei valaauga maoae ma le paia? Sa ou lagona le lofituina. Sa ou lagona le vaivai. O lea lava ou te lagonaina le lofituina. O lea lava ou te lagonaina lo’u vaivai. Ae o loo o’u taumafai e agai pea i luma, saili i faamanuiaga a le Alii ma taumafai e fai Lona finagalo ma faamoemoe ma tatalo o le a Ia taliaina la’u auaunaga. O lo’u tiutetauave muamua lava sa i ai i lenei Ekalesia o se fesoasoani i le peresitene o le korama a le au tiakono, ina ua sefululua o’u tausaga. Ou te le’i lagonaina [so’u] vaivai. Sa ou lagona le lofituina. Ae sa ou taumafai, e pei ona outou faia, ma ina ua uma lena, ona oo mai lea o isi tiutetauave. E le’i i ai lava se lagona o le vaivai, ae sa lagona i taimi uma le agaga faafetai ma se naunau e taumafai.¹⁵

O tagata liliu mai uma o e o mai i totonu o le Ekalesia e tatau ona i ai se tiutetauave i le taimi lava lena. Atonu o se tiutetauave itiiti lava, ae o le a faia ai se eseesega tele i lona olaga.¹⁶

Ioe o le a le iloa e le tagata fou liliu mai mea uma. Atonu foi o le a ia faia ni mea sese. E a la? Tatou te faia uma lava ni mea sese. O le mea taua o le tuputupu a’e lea o le a oo mai ona o le galue ai.¹⁷

tamaitai i le vasega — Na aoao mai Peresitene Hinckley e faapea, e manaomia e tagata fou liliu mai ona maua ni avanoa e auauna ai i totonu o le Ekalesia.

Faafaileleina i le afioga lelei a le Atua

Ou te talitonu … o nei tagata liliu mai ua i ai se molimau e uiga i le talalelei. Ou te talitonu ua i ai lo latou faatuatua i le Alii o Iesu Keriso ma iloa Lona moni e faavavau. Ou te talitonu ua latou salamo moni i a latou agasala ma ua i ai se naunautaiga e auauna atu i le Alii.

[Fai mai] Moronae e uiga ia i latou ina ua uma ona papatisoina: “Ma ina ua uma ona taliaina o i latou i le papatisoga, ma galueaiina ma faamamaina e le mana o le Agaga Paia, sa faitauina i latou i totonu o tagata o le ekalesia a Keriso; ma sa ave o latou igoa ina ia manatua i latou ma tausia i le afioga lelei a le Atua, e faatutumau ai i latou i le ala sao, e faatutumau ai i latou ia mataala e le aunoa i le tatalo, ua nao galuega a Keriso, o le o le pogai ma le iuga o lo latou faatuatua, ua faalagolago i ai” (Moro. 6:4).

I aso nei ma i aso la, o tagata liliu mai e “faitauina i latou i totonu o tagata o le ekalesia … [ina] ia manatua i latou ma tausia i le afioga lelei a le Atua, e faatutumau ai i latou i le ala sao, e faatutumau ai i latou ia mataala e le aunoa i le tatalo.” … Ia tatou fesoasoani ia i latou a o latou faia na laa muamua o ni tagata [o le Ekalesia].¹⁸

E taua le fesootai o [tagata fou liliu mai uma] ma se korama o le perisitua po o le Aualofa, o Tamaitai Talavou, o Alii Talavou, o le Aoga Sa, po o le Peraimeri. E tatau ona uunaia o ia e sau i le lotu faamanatuga e taumafa i le faamanatuga, e faafou ia feagaiga na osia i le taimi o le papatisoga.¹⁹

E mafai ona tatou maua ni mea se tele ae leai se mea e maumau e ala i le toe toaga mai i le Ekalesia.

E faitau afe tagata i le lalolagi atoa … o e o tagata o le Ekalesia i le igoa, ae ua o ese, ma i le taimi lenei i totonu o o latou loto, ua leva ona toe fia foi mai, ae le iloa le ala ma ua fefefe tele e taumafai [ia toe foi mai]. …

Ia te outou, ou uso e ma tuafafine, o e ua ave o outou tofi faaleagaga ma o ese atu, ma ua faapea ona gaogao o outou olaga, o loo matala pea le ala mo lo outou toe foi mai. … Afai o le a outou faia ma le fefe le laa muamua e toe foi mai ai, o le a outou tau mai i lima matala faafetauia outou ma uo lelei e faafeiloaia outou.

Ou te manatu ua ou iloa le pogai e o ese ai nisi o outou. Na faaita outou e se tagata e toatasi e leai se mafaufau, o le na faamanualia outou, ma ua outou ave sese ai ana amioga e faapea o se sui lena o le Ekalesia. Pe, atonu na outou siitia mai i se eria sa lauiloa ai outou i se eria na tele ina tuua na o outou, ma faapea ona outou ola a’e ai ma na o se malamalama itiiti e uiga i le Ekalesia.

Pe atonu foi na taina atu outou i isi vaega po o ni faiga masani na outou manatu sa feteenai ma fegalegaleaiga i le Ekalesia. Pe atonu foi na outou lagona ua outou atamamai atu i le poto o le lalolagi nai lo o i latou tou te fegalegaleai i le Ekalesia, ma faatasi ai ma sina manatu e sili atu outou nai lo o i latou, ua outou faasee ese mai ai i la latou vaega.

Ou te le o sau e nofonofo ai i mafuaaga. Ou te faamoemoe o le a outou le [nofonofo] ai foi. Ia faagalo mea ua tuanai. … E mafai ona tatou maua ni mea se tele ae leai se mea e maumau. Toe foi mai, a’u uo e. E tele atu le filemu e mafai ona maua i le Ekalesia nai lo le mea ua outou iloa mo se taimi umi. E toatele i latou o le a outou fiafia i a latou faauoga.²⁰

O’u uso e ma tuafafine pele, o e atonu … ua seesee ese atu, e manaomia outou e le Ekalesia, ma tou te manaomia le Ekalesia. O le a outou maua ni taliga se tele o le a faalogo ma le loto malamalama. O le a tele ni lima e fesoasoani e toe su’e mai lo outou auala. O le a i ai loto e faamafanafanaina o outou loto. O le a i ai loimata, e le o loimata o le tiga ae o le fiafia.²¹

Mo le Au Paia o Aso e Gata Ai o e ua toe foi mai i le toaaga i le Ekalesia, o le a manaia le lagona o le toe foi mai i le aiga.

I se tasi o Aso Sa na ou auai ai i se aai i Kalefonia mo se konafesi faalesiteki. Sa i ai lo’u igoa ma lo’u ata i le nusipepa a le lotoifale. Sa tatagi le telefoni i le faleautu o le siteki a o ma ulufale atu i le fale ma le peresitene o le siteki i lena taeao. O le valaau sa mo a’u, ma sa faailoa mai e le tagata na valaau mai o ia. Sa fia vaai o ia ia te a’u. Sa ou faanoi mai le fonotaga sa tuu ou te faia i le taeao po o lena taeao, ma talosaga atu i le peresitene o le siteki na te faia. Sa i ai se mea na sili atu ona taua e tatau ona ou faia.

Sa sau o ia, la’u uo lenei, sa fai sina fefe ma popole. Na umi se taimi o aluese o ia. Sa ma feofoofoa’i o ni uso ua leva ona valavala. Sa tau matamuli le ma talanoaga i le taimi muamua, ae sa vave ona mafana a o ma talanoa faatasi i aso na faaalu i Egelani i le tele o tausaga ua alu. Sa maligi loimata o lenei alii malosi a o talanoa mai e uiga i le Ekalesia lea sa avea ai muamua o ia o se vaega moni, ona faamatala mai lea e uiga i tausaga e tele o le gaogao ii na soo ane ai. Sa talanoa mai e uiga i ai e pei ona talanoa se tagata e uiga i ni miti taufaafefe. Ina ua uma ona ia faamatalaina na tausaga maumau, sa ma talanoa loa i lona toe foi mai. Sa manatu o ia o le a faigata, o le a faalumaina, ae sa malie o ia e taumafai.

Sa ou [mauaina] se tusi mai ia te ia i se aso na le’i mamao atu. Sa ia faapea mai, “Ua ou toe foi mai.” Ua ou foi mai, ma oka se matagofie o le lagona o le toe i ai i le aiga.”

Ma ia te outou, a’u uo e, o e, e pei o ia, ua leva ona toe fia foi mai ae palaai e fai lena laa muamua, ia taumafai. Se’i o matou faafetauia outou i le mea o loo outou tutu ai nei, ma taitai mai outou ma fesoasoani atu ia te outou. Ou te folafola atu ia te outou, o le a manaia le lagona o le toe i ai i le aiga.²²

Fautuaga mo Suesuega ma le Aoaoina Atu

Fesili

Aisea e ao ai ona i ai “o tatou mafaufau ma popolega, … i le tagata e toatasi,” e oo lava i le ekalesia aoao? (Tagai vaega 1.) O le a se taimi na faamanuiaina ai oe e se tasi o le sa fiafia patino ia te oe? O a nisi o auala e mafai ona tatou nofouta atili ai i le tausia o tagata taitoatasi?
O a ni mea e mafai ona tatou aoao ma faaaoga mai le tusi lea na faasoa mai e Peresitene Hinckley i le vaega 2? Mafaufau loloto i mea e mafai ona e faia e faamalosia ai i latou o e o loo galulue e atina’e o latou faatuatua.
Aisea e manaomia ai e tagata fou liliu mai uma se faauoga, tiutetauve, ma le faafaileleina i le afioga a le Atua? (Tagai vaega 3.) O a nisi o auala e mafai ona tatou faauoina ai tagata fou liliu mai? E mafai faapefea ona tatou lagolagoina tagata fou liliu mai i o latou tiutetauave o le Ekalesia? E mafai faapefea ona tatou fesoasoani i tagata fou liliu mai ia “faafaileleina i le afioga lelei a le Atua”?
Aisea e faigata ai i nisi o taimi e tagata o le Ekalesia ona toe foi mai ma toaaga i le Ekalesia? (Tagai vaega 4.) E mafai faapefea ona tatou fesoasoani i tagata ia toe foi mai? O le a se taimi na e aafia ai pe molimauina ai le olioli lea e o mai faatasi ma se toe foi mai ma toaga i le Ekalesia?
O a ni mea e te aoaoina mai i le tala na faasoa mai e Peresitene Hinckley i le vaega 5? Mafaufau pe faapefea ona e aapa atu e fesoasoani i se tasi e le o toaga i le Ekalesia “e toe sau i le aiga.”

Mau Fesootai

Luka 15; Ioane 10:1–16, 26–28; 13:34–35; Mosaeah 18:8–10; Helamana 6:3; 3 Nifae 18:32; Moronae 6:4–6; MF&F 38:24

Fesoasoani mo Suesuega

“E toatele ua iloa o le taimi sili e suesue ai o le taeao pe a mavae le malologa o le po. … O isi e sili ai ona suesue i itula paganoa pe a uma le aso ma popolega o galuega. … Atonu o le mea e sili atu ona taua nai lo o le itula o le aso, o se taimi masani lea e faataatia ese e suesue ai [tusitusiga paia]” (Howard W. Hunter, “Reading the Scriptures,” Ensign, Nov. 1979, 64).