Mataupu 25

Agai i Luma i le Faatuatua

“Afai e i ai se mea e tasi e manaomia e oe ma au, … [o] le ituaiga lea o faatuatua e uunaia i taua e tootuli ifo ai i tulivae ma ole atu i le Alii mo se taitaiga, ma a oo, ina maua se fuataga o le talitonuga paia, tu i luga ma alu e galue e fesoasoani ia maua mai taunuuga moomia.”

Mai le Soifuaga o Gordon B. Hinckley

“Ina ua ou aluese atu mo se misiona [a o avea ma se alii talavou],” sa to manatu ai Peresitene Gordon B. Hinckley, “sa tuuina mai e lo’u tama lelei se kata sa tusia ai ni upu se lima. O saunoaga ia a le Alii i le pule o sunako o le na maua le tala o le maliu o lona afafine: ‘Aua le mata’u, ae faatuatua.’ Mareko 5:36.)”¹ A o talai le alii talavou o Elder Hinckley i Egelani, sa feagai o ia ma ni luitau e tele sa ia manaomia ai le manatua o na upu e lima. Mulimuli ane sa ia faamatala se tasi o nei aafiaga:

“I se tasi aso sa lolomiina ai e le tolu pe fa o nusipepa o Lonetona faamatalaga o se lomiga mai se tusi tuai, e faatauemu ma aamu lona uiga, e faailoa mai ai e faapea o le tusi o se talafaasolopito o tagata Mamona. Sa saunoa mai Peresetene Merrill [o le peresitene o la’u misiona] ia te au, ‘Ou te manao e te alu atu i le faatonu o le nusipepa ma tetee i ai i lenei mea.’ Sa ou tilotilo atu ia te ia ma toetoe ina a ou fai atu, ‘Ioe e le o au.’ Ae sa ou fai atu ma le agamalu, ‘Ua lelei lau susuga.’

“E le faatuai ona ou fai atu sa ou fefe. Na ou alu i lou potu ma lagona e pei ona ou manatu sa lagona foi e Mose ina ua fetalai i ai le Alii e alu e vaai Farao. Sa ou faia se tatalo. Sa gogolo lo’u manava a o ou savali atu i le fale e faatali ai nofoaafi o le Goodge Street e pue ai le nofoaafi e alu i lalo o le ala mo Fleet Street. Sa ou maua le ofisa o le peresitene ma sa tuuina atu lau kata i le failautusi. Sa ia tauaaoina [lau pepa] ma alu atu i le ofisa tutotonu ma sa le i pine ae toe foi mai ma faapea mai sa pisi tele le peresitene e vaai ia te au. Sa ou tali atu na ou sau e tusa o le lima afe maila [8,000 kilomita] ma o le a ou faatali. I le lua itula na sosoo ai sa faalua pe faatolu ona alu atu [le failautusi] i le ofisa [o le peresitene]; ona faatoa ona ia valaaulia mai lea o au i totonu. O le a le galo lava ia te au le ata ina ua ou taunuu atu. Sa ia ulaina se tapaa umi ma foliga e pei na faapea mai, ‘Aua le faalavelave mai ia te au.’

“Sa uu i lou lima ia mataupu ua maea ona iloiloina. Sa ou le manatuaina lau tala sa fai mulimuli ane. Na foliga mai sa tautala se isi malosiaga e ala atu ia te au. I le amataga sa tetee ma iu ina finauvale. Ona amata lea ona faamaluluina o ia. Na ia faaiu i le folafola mai o le a faia se mea [e uiga i iloiloga]. E tusa o le itula ae oo atu le tala i tagata faatau tusi uma i Egelani e toe faafoi ane tusi i le lomitusi. I se tau tele lava sa ia lolomiina ma faamauina ai i luma o tusi taitasi se faamatalaga e faailoa atu ai, e aua nei manatu o le tusi o se talafaasolopito, ae ua na o se talafatu, ma sa leai se agaga e faatiga faasaga i tagata Mamona faaaloalogia. I ni tausaga mulimuli ane, sa ia faia ai se isi mea lelei e tele sona aoga i le Ekalesia, ma o tausaga taitasi seia oo i le taimi na maliu ai, sa ou maua mai ai se faamanuiaga o le Kerisimasi mai ia te ia.”²

I le taliaina o le tofiga e asiasi atu i le ofisa o le lomitusi, sa faataitai ai e Elder Hinckley se mamanu o le soifuaga atoa: ma le faatuatua, talia le luitau; ma aioi atu i le Alii mo se fesoasoani; ona galue ai loa lea.

tamaitai o loo faitauina tusitusiga paia — “O le faatuatua, ina ua maea ona faia o mea uma, ua pau lea o lo tatou faamoemoe moni ma tumau.”

Aoaoga a Gordon B. Hinckley

O le Faatuatua i le Tama Faalelagi ma Iesu Keriso e mafai ona avea ma vaipuna o le ola mo se faamoemoega.

Afai e i ai lava se mea se tasi e manaomia e oe ma au, e fesoasoani tatou te maua ai le fiafia ma faamalieina i lenei lalolagi, o le faatuatua—o lena elemene matautia, malosi, ofoofogia e pei ona taua e Paulo, sa faavaeina ai lava lalolagi (tagai Eperu 11:3). Ou te le o faatatau atu i nisi manatu taufaavalea ae o le faatuatua faatino, faamaoni, ma galue—o le ituaiga o faatuatua e tuleia i tatou e tootutuli i o tatou tulivae ma aioi atu i le Alii mo se taitaiga, ma o lea, pe a i ai le fuataga o le talitonuga faaleatua, ia tutu i luga ma o atu e galulue ina ia fesoasoani e maua mai faaiuga moomia. O lea faatuatua o se aseta e le mafaatusalia. O lea faatuatua, ina ua maea ona faia o mea uma, ua pau lea o lo tatou faamoemoe moni ma tumau.

… O le faatuatua e mafai ona avea o se vaipuna moni o le ola mo se faamoemoega. Ua le toe i ai se uunaiga faamalosi i taumafaiga lelei nai lo le malamalama o i tatou o fanau a le Atua, ua faamoemoe le Atua tatou te faia se mea mo o tatou olaga, ma o le a Ia tuuina mai le fesoasoani pe afai tatou te saili i ai. …

… A ou talanoa i le faatuatua, ou te le o faapea atu na o ni manatu. Ou te manatu o se malosiaga ola, ma le taua e sau mai le iloa o le Atua o lo tatou Tama ma o Iesu Keriso o lo tatou Faaola. …

… Faatuatua i se Atua Mamana, i le Silisiliese, o le mana gaoioi sili e mafai ona suia o tatou olaga.³

I aso lava la ua leva, sa ou galue ai i se tasi o auala mo nofoaafi, o ona ala uamea sa ui agai atu i mauga. Sa masani ona ou tietie i nofoaafi. O le vaitaimi lea sa i ai nofoaafi e faaaoga ai le ausa. O na saualii tinoese o auala uamea sa lapopoa ma saosaoa ma lamatia. Sa masani ona ou fiailoa pe faapefea ona gafatia e le inisinia le malaga umi i le taualumaga o le po. Ona ou iloa ai lea e le o se malaga umi e tasi, ae o le faaauauina pea lava pea o se malaga puupuu. E i ai le sulu malosi i luma o le nofoaafi e mafai ona susulu atu mo se mamao e 400 pe 500 iata. Na o le pau lea o le mamao e iloa atu e le enisinia, ma ua lava foi lena, aua sa i ona luma pea [le sulu] i le po atoa seia oo i le malama o le aso fou. …

Ma e faapena foi la tatou malaga e faavavau. Tatou te fai se laasaga se tasi i le taimi. I le faia o lea mea tatou te oo atu ai i mea tatou le iloa, ae o le faatuatua e faamalamalamaina le ala. Afai tatou atiina ae lena faatuatua, o le a tatou le savavali lava i le pogisa. …

O le luitau o loo feagai pea ma tagata taitasi o lenei Ekalesia, o le faia lea o le laasaga e sosoo ai, o le talia lea o le tiutetauve ua tofia i ai, e ui lava ina ona lagona e le talafeagai ma ia, ae o le faia o lea mea i le faatuatua ma le faamoemoega atoa o le a faamalamalama e le Alii le ala i ona luma.⁴

O le faatuatua o le faavae o le molimau ma le malosi o le galuega a le Alii i luga o le fogaeleele.

Pau lava le tamaoaiga moni o le Ekalesia o loo i ai lea i le faatuatua o ona tagata.⁵

O se mea ofoofogia ma le matagofie ona e faitau afe [tagata] ua pa’i atu i ai le vavega a le Agaga Paia, ua latou talitonu ma talia ma avea ai ma ni tagata [o le Ekalesia]. Ua papatisoina i latou. Ua suia e faavavau o latou olaga mo le lelei. E tutupu vavega. Ua oo mai i o latou loto se fatu o le faatuatua. E faateleina a o latou aoao. Ma ua latou talia lea mataupu faavae ma lea mataupu faavae, seia o latou maua faamanuiaga ofoofogia taitasi e oo mai ia i latou o e savavali i le faatuatua i lenei [ekalesia], Le Ekalesia a Iesu Keriso o le Au Paia o Aso e Gata Ai.

… O lenei meaalofa taua ma le ofoofogia o le faatuatua, o lenei meaalofa mai le Atua lo tatou Tama e Faavavau, o le malosiaga lava lea o lenei galuega ma le ola toafimalie o lana feau. E faapogai uma lava i le faatuatua. O le faatuatua o le aano lea o mea uma. Po o le alu i le galuega faamisiona, ola i le Upu o le Poto, totogiina o le sefuluai, e tusa pau lava ia mea. O le faatuatua o loo i totonu ia i tatou ua faamaonia i mea uma tatou te faia.

… O le malosiaga o lenei galuega ma le malo [o le Atua] e le maua lea i aseta faaletino, e ui ina ua matagofie lava i latou. Ua maua lea i loto o ona tagata. O le ala lea ua manuia ai. O le ala lea ua malosi ma ola ai. O le ala lea ua mafai ai ona ausia mea matagofie uma ua ia faia. E afua uma mai lava i le meaalofa o le faatuatua, ua faaeeina mai e le Silisiliese i luga o Ana fanau o e ua le masalosalo ma le fefefe, ae ua agai i luma. …

O le faatautua o le faavae o le molimau. O le faatuatua e faapogai ai le faamaoni i le Ekalesia. O le faatuatua o le faailoga o le ositaulaga, e tuuina atu ma le fiafia e faaalualu ai i luma le galuega a le Alii.⁶

O le talalelei o se tala fou fiafia. O le savali o le manumalo. O se faamoemoega e ao ona opogi ma le naunautai. …

Aua nei o tatou matatau O Iesu o lo tatou taitai, o lo tatou malosi, ma o lo tatou tupu.

O le vaitaimi lenei o le le mautonu. O la tatou o le misiona o le faatuatua. I ou uso ma tuafafine i soo se mea lava, ua ou valaau atu ia te outou ina ia toe faatumauina lo outou faatuatua, ia faaalualu i luma lenei galuega i le lalolagi atoa. …

“Uso e, tatou te lē o atu pea ea i lenei savali sili? O atu i luma ae lē o le solomuli. Lototetele, uso e; o atu pea, o atu pea i le manumalo!” (MF&F 128:22). E pei ona tusia e Perofeta Iosefa i se salamo o le faatuatua.

E le matagofie ea lenei savali sili. E tumu i le toa, lototele, le fefe, ma le faatuatua. E maeu le ofoofogia o le taimi nei a o tatou agai atu i luma e faamanuia soifuaga o tagata po o fea lava ua latou faalogo ai i le feau a auauna a le Alii. E maeu le matagofie o le lumanai a o fofola atu e le Silisiliese Lana galuega paia, ma pai atu mo le lelei ia i latou uma lava o le a talia ma ola ai i Lana talalelei, ma oo atu foi i faamanuiaga e faavavau o Ona atalii ma afafine o tupulaga uma e ala i le galuega le faapito a i latou ua faatumulia o latou loto i le alofa mo le Togiola o le lalolagi. …

Ou te valaau atu ia te outou taitoatasi, po o fea lava o o outou i ai o tagata o lenei Ekalesia, ina ia tutu ia i luga ma le pese i o outou loto ma agai i luma, ola ai i le talalelei, alofa i le Alii, ma atinae le malo [o le Atua]. Ia tatou i ai faatasi i le ala ma tumau i le faatuatua, o le Silisiliese o lo tatou malosiaga.⁷

Faatasi ai ma le faatuatua, e mafai ona tatou tulai ae i luga o le mata’u ma soo se toatuga po o se luitau i o tatou olaga.

O ai o i tatou e mafai ona faapea mai na te le’i lagona le mata’u? Ou te iloa e leai se tasi na sao mai ai. Ioe, o nisi, sa aafia i le mata’u sili atu nai lo isi. O nisi o le a mafai ona tulai vave ae i lenei [mata’u], ae o nisi o le a maileia ma tosoina i lalo ma oo ai lava ina toilalo. Tatou te mafatia mai le mata’u o le tauemu, le mata’u o le toilalo, le mata’u o le tuua toatasi, le mata’u o le valea. O nisi ua matata’u i le taimi nei, o nisi o le lumanai. O nisi ua tauave le avega o le agasala ma ua faia o soo se mea ina ia tuusaoloto ai i latou mai na avega ae matata’u e suia o latou olaga. E ao ina tatou iloa o le mata’u e le mai le Atua, ae o lenei elemene faalavelave faataumaoi e mai le fili o le upumoni ma le amiotonu. O le mata’u o le faafeagai o le faatuatua. E oona ona aafiaga, e oo lava ina faatamaia ai. ⁸

Na tusi atu Paulo ia Timoteo: “Aua ua le foaiina mai e le Atua ia te i tatou le Agaga e mata’u ai, a o le Agaga e faamalosi ai, ma alofa ai, ma mafaufau tonu ai.

“O lenei, aua e te mā i le molimau i lo tatou Alii.” (2 Timoteo 1:7–8).

Ou te faamoemoe o le a tuuina e tagata taitasi o le ekalesia na upu i se mea e mafai ona ia vaai i ai i taeao uma a o ia amataina lona aso. O le a latou aumaia ia i tatou le lototele e tautatala ai, o le a latou aumaia ia i tatou le faatuatua e taumafai ai, o le a latou faamalosia lo tatou talitonuga i lo tatou Alii o Iesu Keriso. Ou te talitonu o le a tele vavega e tutupu i luga o le fogaeleele. ⁹

Iesu Keriso — “Aua e te … mā i le molimau i lo tatou Alii” (2 Timoteo 1:8).

Sa ou talanoa i se tasi aso i sau uo o le na solaese mai lona atunuu na fanau ai. Ona o le toilalo o lona atunuu, sa pueina ma faafalepuipui o ia. Sa mafai ona sosolaese lona toalua ma lana fanau, ae mo le tolu tausaga ma le sili atu sa faapagotaina ai o ia e aunoa ma se auala e fesootai atu ai ma i latou na ia alofa i ai. Sa faaletonu meaai, mataga nofoaga sa nonofo ai, ma sa leai se faamoemoe e toe faaleleia.

“O le a le mea na fesoasoani ia te oe i na aso pogisa uma?” Sa ou fesili ai.

Na ia tali mai: “O lou faatuatua: o lou faatuatua i le Alii o Iesu Keriso. Sa tuuina atu au avega i ona luga, ma sa faapei lava na matuai faamamaina.”¹⁰

Sa manuia mea uma. Aua le popole. Sa ou fai ifo ai ia te au lava i taeao taitasi. O le a manuia mea uma. Afai e te faia le mea sili, o le a manuia mea uma. Tuu atu lau faalagolago i le Atua, ma agai atu i luma ma le faatuatua ma le talitonuga mo le lumanai. O le a le tuulafoaia i tatou e le Alii. O le a Ia le tuulafoaia i tatou.¹¹

E le mafai ea e se tasi o i tatou ona faapea mai, afai e tele atu lo tatou faatuatua i le Atua o le a sili atu lo tatou manuia nai lo le tulaga o loo tatou i ai nei? E leai se toatuga e sili atu ona tele, leai se luitau e sili atu ona faigata, pe afai tatou te faatuatua. Afai tatou te faatuatua o le a tatou tulai ae i luga o na elemene leaga i o tatou olaga o loo taumafai pea e toso tatou i lalo. Faatasi ai ma le taumafai, e mafai ai ona tatou atiinaeina le tulaga e faaitiitia ai ia lagona e taitai atu ai i amioga mataga ma le faatiapolo. A tatou faatuatua e mafai ona tatou puleaina o tatou manaoga. E mafai ona tatou aapa atu ia i latou ua faavaivai ma toilalo, ma e mafai ona tatou faamafanafana i latou i le malosi ma le mana o lo tatou lava faatuatua.¹²

A o tatou galueaina lo tatou faatuatua, o le a fesoasoani le Alii e faateleina.

A o e galueaina ou taimi ma taleni i auaunaga, o le a faatupulaia lou faatuatua ma o le a aveesea ou le mautonu.¹³

O le a talosagaina outou e le Ekalesia e fai ni mea se tele. O le a talosagaina outou e auauna atu i ni valaauga eseese. E leai se nofoaga e aoaoina aloaia ai a tatou faifeau. E avea outou ma faifeau o lenei Ekalesia, ma o soo se taimi lava e valaauina ai oe e auauna atu, ou te faamalosiau atu ina ia e tali atu, ma afai o le a e faia o le a faamalosi ma faateleina lou faatuatua. O le faatuatua ua faapei o le uaua o lou lima. Afai ou te faaaogaina, afai ou te tausi i ai, o le a ola malosi; o le faia ni mea se tele. Ae afai ou te tuuina i totonu o se fusi ma leai se mea e faia i ai, o le a vaivai ma le aoga, ma e faapena foi ia te oe. Afai e te talia avanoa uma, afai e te talia valaauga uma, o le a faia e le Alii ina ia e mafai ona faataunuuina. O le a le talosaga atu le Ekalesia e te faia se mea e le mafai ona e faia e aunoa ma le fesoasoani a le Alii.¹⁴

O lau tatalo lenei mo i tatou uma—“Le Alii e, faatupulaia lo matou faatuatua” [tagai Luka 17:5]. Ia faateleina lo tatou faatuatua ina ia sosoo ai le eseesega o le le mautonu ma le masalosalo. …

… Le Alii e, faatupulaia lo matou faatuatua ina ia tutulai ai i luga ae o faatosinaga vaivai o Lau galuega tele ma le paia lenei. Faamalosia o matou loto. Fesoasoani ia matou atinaeina ma faateleina Lou malo e tusa ai ma Lau faatulagaga sili, ina ia mafai ona talaiina lenei talalelei i le lalolagi atoa o se molimau i atunuu uma. …

Faamatuu mai ia i matou le faatuatua pe a taia i matou i afa o faafatiatamai ma olopalaina i matou i le eleele. I taimi o ma’i ia malosi pea lo matou talitonuga i mana o le perisitua. Tau ina ia matou mulimuli i aoaoga a Iakopo:

“Afai e i ai se gasegase i so outou? Ina aami atu ia i toeaina o le ekalesia; ia latou tatalo mo ia, pe a uma ona faauu ia te ia i le suauu i le suafa o le Alii.

“Ma o tatalo o le faatuatua o le a manuia ai le mai, ma o le a faatulaia o ia e le Alii” Iakopo 5:14-15; ua faaopoopo le faatusilima). …

Le Alii e, a matou savalia le vanu o le ata o le oti, tuu mai ia i matou le faatuatua e ataata ai mai o matou loimata, ma le iloa o se vaega lava o le ata e faavavau a se Tama alofa, ae o tatou savalia le taunuuga mai lenei olaga o le a tatou ulu atu i seisi olaga sili atu lona matagofie, ma e ala mai le togiola a le Alo o le Atua o le a toetutu mai tagata uma mai le tuugamau ma o e faatuatua o le a o atu i le faaeaga.

Auina mai ia i matou le faatuatua e faataunuuina ai le galuega o le faaolaina o e ua maliliu ina ia faataunuuina ai Lou faamoemoega e faavavau mo Ou atalii ma afafine o augatupulaga uma.

Le Tama e, auina mai ia i matou le faatuatua e mulimuli ai i fautuaga i mea laiti e mafai ona aoga tele. …

Le Alii e, faatupulaia lo matou faatuatua o le tasi i le isi, ma ia i matou lava, ma lo matou mafai e faia ai mea lelei ma le sili. …

Le Tama e, faatupulaia lo matou faatuatua. O o matou manaoga uma lava, ou te manatu o le manaoga silisili o le faatupulaia lea o lo matou faatuatua. O lea, le Tama pele, faatupulaia lo matou faatuatua ia te i Lau Afio, ma Lou Alo Pele, ma i Lau galuega tele e faavavau, ia i matou lava o Au fanau, ma i lo matou mafai ona o atu ma fai e tusa ma Lou finagalo, ma Au aoaoga, ou te tatalo ai ma le loto maualalo i le suafa o Iesu Keriso, amene.¹⁵

Fautuaga mo Suesuega ma le Aoaoina Atu

Fesili

Sa aoao mai Peresitene Hinckley o le faatuatua i le Atua o le “mana gaoioi sili lea e mafai ona suia ai o tatou olaga” (vaega 1). O a ni aafiaga ua fesoasoani ia te oe e aoao ai i le mana o le faatuatua? E faapefea ona e iloa pe a “tatou aapa atu i mea tatou te le iloa, … e faamalamalama e le faatuatua le ala”?
O a ni mea e mafai ona tatou aoao mai i le vaega 2 e uiga i le puna o le malosiaga o le Ekalesia? O le a le fesootaiga o le faatuatua ma le ositaulaga i le tasi ma le isi? Mafaufau pe faapefea ona e talia le valaau a Peresitene Hinckley e “faaalualu i luma lenei galuega i le lalolagi atoa.”
Aisea e te manatu ai, ua i ai i le faatuatua le mana e fesoasoani ai ia i tatou i taimi o tofotofoga? (Tagai vaega 3.) O anafea na fesoasoani ai le faatuatua e te tulai maualuga ae ai mai le mata’u. O anafea na fesoasoani ai le faatuatua e te tulai maualuga ae ai mai isi toatuga?
Toe faamanatu le tatalo a Peresitene Hinckley i le vaega 4. O a upu o lenei tatalo e i ai ni faatatauga faapitoa mo oe? E faapefea ona fesoasoani le faatuatua ia tatou manumalo i le le mautonu ma le masalosalo? E faapefea ona fesoasoani le faatuatua ia tatou vaai ai i tua atu o faafitauli e iloa atu ai vavega?

Mau Fesootai

Ioane 14:12-14; Roma 5:1-5; 2 Nifae 26:12-13 Moronae 7:33-38; MF&F 27:16-18

Fesoasoani mo le Aoaoina Atu

“A o tatou suesue i tusitusiga paia i aso uma ma le maelega, saili atu ma le naunautai le taitaiga mai le Agaga, o le a tatou talia le faamalamalamaga i le ala e saunia ai lesona. O le a tatou saunia foi e talia ma mulimuli i musumusuga mai le Agaga a o tatou aoao atu” (O Le Aoao Atu E Leai Se Isi Valaauga E Sili Ai [1999], 14).