Mataupu 12

Usiusitai: Tau Lava o le Ola i le Talalelei

“O le ala o le talalelei e faigofie lava. … Ia faamaualalo outou lava ma savavali i le usiusitai.”

Mai le Soifuaga o Gordon B. Hinckley

Pe a ma le 14 o tausaga o Gordon B. Hinckley, sa ia maua ai se aafiaga i le Tapeneko i Sate Leki na faapea ona faaosofia ai o ia e fai se tautinoga taua. Sa ia faamatalaina mulimuli ane:

“Sa ou [faalogo] o faamatala e Peresitene Heber J. Grant e uiga i lona aafiaga i le faitauina o le Tusi a Mamona a o laitiiti o ia. Sa ia saunoa e uiga ia Nifae ma le faatosinaga maoae sa ia faia i lona olaga. Ona sosoo ai lea, ma se leo na tatagi leotele i se tautinoga o le a le mafai lava ona ou faagaloina, sa ia siiina mai ai na upu maoae a Nifae: ‘O le a ou alu ma fai mea ua poloaiina e le Alii, aua ua ou iloa e le tuuina mai e le Alii ni poloaiga i le fanauga a tagata, vagana o le a saunia e ia se ala mo i latou ina ia mafai ai ona latou faataunuuina o le mea ua ia poloaiina ai i latou’ (1 Ni. 3:7).

“Sa faapea ona oo mai ai i totonu o lo’u loto talavou i lena taimi se tautinoga e fai le mea ua poloai mai ai le Alii.”¹

Sa tauave e le aunoa e Gordon B. Hinckley lena tautinoga i lona loto. O tausaga mulimuli ane, ina ua avea o ia ma Peresitene o le Ekalesia, o ana aoaoga sa toe faalogoina ai le savali sa ia faalogoina a o talavou. O le saunoa atu i se vaega o le Au Paia o Aso e Gata Ai i se konafesi faalisone, sa ia faapea atu ai:

“Ua toatele le au fai lipoti faasalalau o [tala fou] ua faatalanoaina a’u. O le mea e tasi latou te fai mai ai o le, ‘Ia o le a la le manulauti a lau au peresitene?’ Sa na ona ou faapea atu, ‘O le manulauti lava e tasi lea na ou faalogo o fai pea lava pea i lenei Ekalesia e peresitene o le Ekalesia ma aposetolo i le mamao i tua e mafai ona ou manatuaina: Tau lava o le ola i le talalelei, ma o tagata uma e faia lena mea o le a maua i lona loto se tautinoga o le moni o lena mea o loo ia ola ai.’”²

I lana uluai konafesi aoao o se Peresitene o le Ekalesia, sa tuuina mai ai e Peresitene Hinckley se valaau mo tagata uma ia taumafai malosi atu e ola i le talalelei:

“O lenei, o’u uso e ma tuafafine, ua oo mai le taimi tatou te tutu maualuluga teisi ai, ia faaea ae la tatou vaai ma fetāla’i o tatou mafaufau i se iloa ma se malamalama sili atu o le misiona mamalu faameleniuma o lenei [ekalesia], Le Ekalesia a Iesu Keriso o le Au Paia o Aso e Gata Ai. O le vaitau lenei ia malolosi ai. O se taimi e agai atu i luma e aunoa ma le faatuai, ua iloa lelei le uiga, le lautele, ma le taua o la tatou misiona. O se taimi e fai ai le mea sa’o, e tusa lava po o a taunuuga a ono mulimuli mai ai. O se taimi ia maua mai o tausia poloaiga. O se vaitau e aapa atu ai ma le agalelei ma le alofa ia i latou o mafatia ma i latou o loo feofeoa’i solo i le pogisa ma le tiga. O se taimi ia magafagafa ai ma amio lelei, tausaafia ma faaaloalo i le tasi ma le isi i a tatou sootaga uma. I se isi faaupuga, ia avea atili e faapei o Keriso.”³

Sa faaauau pea ona faamamafa mai e Peresitene Hinckley lenei savali. I le sefulu tausaga mulimuli ane, sa ia toe saunoa mai ai i nei upu i le konafesi aoao ma faaopoopo mai ai, “E ao ona faamasino lava oe po o le a le mamao ua tatou oo i ai i le faataunuuga o lena valaaulia na tuuina atu i le 10 tausaga talu ai.”⁴

Nifae o loo tulimanu — O le faataitaiga a Nifae o le usiusitai na musuia ai le alii talavou o Gordon B. Hinckley.

Aoaoga a Gordon B. Hinckley

O i tatou o tagata o le feagaiga, ma e tele ni tiute e o mai faatasi ma lena feagaiga.

O i tatou o tagata o le feagaiga, ma o se tulaga sili ona ogaoga lena. Ina ua toefuataiina mai le galuega lenei ma faatulaga e le Alii faamoemoega mo lena toefuataiga, na Ia fetalai e faapea, o se tasi o mafuaaga mo le toefuataiga, ina ia mafai ona toe faatulagaina Lana feagaiga e faavavau. O lena feagaiga … sa faia i le va o Aperaamo ma Ieova i le taimi na faia ai e le Ieova silisili se folafolaga maoae ma le faamaoni ia Aperaamo. Na Ia fetalai e faapea, o le a avea ana fanau e pei o le oneone i luga o le matafaga, ma o le a faamanuiaina malo uma ona o ia. Sa Ia faia lenei feagaiga ia te ia [Aperaamo], o le a avea o Ia ma o latou Atua ma o le a avea i latou ma Ona nuu. … O iina na faatuina ai se mafutaga sa faavavau ona taunuuga i olaga e faavavau o i latou o le a ulu i ai [i le feagaiga]. E ofoofogia ona faatatauga: afai o le a tatou galulue i auala e tatau ona galulue ai le fanau a le Atua, o le a avea o Ia ma o tatou Atua e faamanuia i tatou, e alofa ia i tatou, ma fesoasoani ia i tatou.

I le taimi nei, i lenei tisipenisione, ua toe faamautuina ai lena fegaiga e faavavau. E pei na tatou faia lena feagaiga i le taimi na tatou papatiso ai. Ua oo ina avea i tatou ma se vaega o Lona aiga faalelagi, e pei ona sa i ai. O fanau uma a le Atua o Lona aiga lea, ae i se auala e faapitoa ma matagofie, ua i ai se sootaga faapitoa i le va o le Atua ma le fanau o Lana feagaiga. Ma ina ua tatou o mai i le Ekalesia, … ua avea i tatou o se vaega o tagata o le feagaiga; ma o taimi uma tatou te talia ai le faamanatuga, e le gata ina tatou faia e faamanatu ai le taulaga a le Alo o le Atua, o le na tuuina mai Lona soifua mo i tatou taitoatasi, ae ua i ai foi se elemene faaopoopo tatou te tauave i o tatou luga le suafa o Iesu Keriso ma folafola atu i tatou lava e tausi Ana poloaiga ae ua Ia folafola mai o le a Ia faamanuia i tatou i Lona Agaga Paia.

O i tatou o tagata o le feagaiga, ma e tele ni tiute e o mai faatasi ma lena feagaiga. E le mafai ona avea i tatou ma tagata masani. E ao ona tatou tulai maualuga a’e i le tumutumu [o tagata]. E ao ona tatou tutu maualuga teisi atu. E ao ona tatou lelei teisi atu, agalelei teisi atu, agaalofa teisi atu, faaaloalo teisi atu, magafagafa teisi atu, loto fesoasoani teisi atu i isi.⁵

O i tatou o se nuu ua tauaveina i o tatou luga se feagaiga paia ma le suafa o le Alii o Iesu Keriso. Ina tatou taumafai malosi teisi atu e tausi poloaiga, ia ola e pei ona fetalai mai le Alii ia tatou ola ai.⁶

sauniga faamanatuga — “O taimi uma tatou te talia ai le faamanatuga, … tatou te tauave i o tatou luga le suafa o Iesu Keriso ma folafola atu i tatou lava e tausi Ana poloaiga.”

O loo faamoemoe mai le Alii ia tatou ola i le talalelei i ona tulaga uma.

Ua tatou ola i se vaitau o fetuutuunaiga ma le taliaina. I tulaga ia e faafetauia ai i tatou i aso uma, ua tatou iloa le mea sa’o, ae o le malosi ai o uunaiga mai a tatou tupulaga ma leo faatosina a i latou o e o le a faatauanauina i tatou, tatou te gauai atu ai. Tatou te fetuunaia. Tatou te talia. Tatou te gauai atu, ma ua tatou nē ia i tatou lava. … E ao ona tatou atinae le malosi e mulimuli i ai i a tatou tautinoga.⁷

O le ala o le talalelei o se ala faigofie. O nisi o tulaga e manaomia atonu e foliga mai ia te oe e tulagalua pe faaletatau. Aua le faamasino atu i na mea. Ia faamaualalo outou lava ma savavali i le usiusitai. Ou te folafola atu, o taunuuga o le a mulimuli mai ai, o le a ofoofogia i le vaai ma faamalieina le oo i ai.⁸

O la’u augani sili lava, ia tatou taumafai uma ia malosi teisi atu e ola i taua paia o loo i totonu ia i tatou. E mafai ona faateleina le lelei o mea tatou te faia nai lo o mea o loo tatou faia. E mafai ona tatou lelei atu nai lo o tagata ua tatou i ai. O le a tatou uuina e le aunoa i o tatou luma lena vaaiga o le tofi paia, ma le tulaga Faaletama o le Atua ma le usoga o tagata o ni mea moni, o le a tatou faapalepale teisi atu, agalelei teisi atu, loto fesoasoani teisi atu e siia’e ma fesoasoani ma lagolago i latou o faatasi ma i tatou. O le a faaitiitia lo tatou ono ta’ufaatauvaaina o na mea e manino lava e le talafeagai [ia i] tatou.⁹

O le tapuaiga lea o loo avea ai oe o se vaega e fitu aso o le vaiaso, ae e le na o le Aso Sa. … O taimi uma lava—luasefulufa itula o le aso, fitu aso o le vaiaso, 365 aso o le tausaga.¹⁰

O loo faamoemoe mai le Alii o le a tatou faatulaga lelei o tatou olaga, o le a tatou ola i le talalelei i ona vaega uma.¹¹

O le liligi mai e le Atua faamanuiaga i luga o i latou o e savavali i le usiusitai i Ana poloaiga.

Sa faatonu e le Alii ia Elia e alu e lafi i le alia i Kirita, ma o iina e tatau ona ia inu ai mai le alia, ma o le a fafagaina o ia e oreva. O loo tusia i le mau se faamatalaga faigofie ma matagofie e uiga ia Elia: “Ona alu ai lea o ia, mana faia e tusa ma le afioga a Ieova” (1 Tupu 17:5).

Sa leai ni finauga. Sa leai ni alofaga. Sa leai ni pepelo. Sa na “ona alu [o Elia], mana faia e tusa ma le afioga a Ieova.” Ma sa faasaoina o ia mai mala leaga na pau ifo ia i latou o e sa amuamu ma le le migao ma finauvale ma fesiligia [le faatonuga].¹²

O le tala atoa o le Tusi a Mamona o se tala o loo talanoa mai e uiga i le nuu o e, a o latou amiotonu, a o latou tapuai atu ia Iesu Keriso, sa manuia i le laueleele ma sa matuai faamanuiaina lava e le Alii; ae ina ua latou agasala ma o ese ma galo lo latou Atua, sa latou pauu i le faanoanoa ma taua ma faafitauli. O lou saogalemu, o lou toafilemu, o lou fiafia e taoto lea i le usiusitai i poloaiga a le Silisili Ese.¹³

“Tausi i a’u poloaiga e lē aunoa, ma o le a e maua ai se pale o le amiotonu.” [MF&F 25:15.] O le folafolaga lena a le Alii ia Ema Hale Samita. O le folafolaga foi lena a le Alii ia te outou taitoatasi. O le fiafia o loo taoto i le tausiga o poloaiga. Mo se Au Paia o Aso e Gata Ai … e na o le faanoanoa lava le mea e i ai i le solia o na poloaiga. Ma mo i latou taitoatasi o e matauina i latou, o loo i ai se folafolaga o se pale … o le amiotonu ma le upumoni e faavavau.¹⁴

O le saolotoga moni o loo taoto lea i le usiusitai i fautuaga a le Alii. Sa ta’ua i anamua e faapea, “o le poloaiga o le sulu; ma le upu e aoao atu o le malamalama lea.” Faataoto 6:23.)

O le talalelei e le o se filosofia o faiga faamalosi, e pei ona manatu i ai le toatele. O se fuafuaga o le saolotoga lea e tuuina mai ai le aoaiga i tuinanau ma faatonutonu ai amioga. O ona fua e suamalie ma ona taui lautele. …

“O lenei ia outou tumau i le saolotoga ua faasaoloto mai ai Keriso ia te i tatou, ae aua nei toe taofia outou i le amo o le pologa.” (Kalatia 5:1.)

“O le mea o i ai le Agaga o le Alii, o i ai le saolotoga.” (2 Kori. 3:17.)¹⁵

O lo tatou saogalemu o loo taoto i le salamo. E sau mai lo tatou malosiaga i le usiusitai i poloaiga a le Atua. … Ina tatou tutu mausali e faasaga i le tiapolo, i le lotoifale ma fafo atu. Ina tatou ola agavaa i faamanuiaga o le lagi, ma faafou o tatou olaga i tulaga e manaomia ai ma vaai atu ia te Ia, o le Tama o i tatou uma.¹⁶

E leai se mea tatou te matatau ai. O le Atua o loo i le foeuli. O le a pulea o Ia mo le manuia o lenei galuega. O le a Ia liligi mai faamanuiaga i luga o i latou o e savavali i le usiusitai i Ana poloaiga. O Lana folafolaga lena. E leai se tasi o i tatou e mafai ona masalomia Lona gafatia ona tausia lena folafolaga.¹⁷

O taitai o le Ekalesia e faasino maia le ala ma valaaulia tagata ia ola i le talalelei.

E i ai i latou o e faapea mai, “E le faatonua mai au e le Ekalesia i le ala ou te mafaufau ai e uiga i lenei, i lena, po o le isi, pe faapefea ona ola lo’u olaga.”

Ou te tali atu, e leai, o le a le faatonu atu e le Ekalesia soo se tagata i le ala e tatau ona mafaufau ai po o le mea e tatau ona ia faia. O le a faailoa atu e le Ekalesia le ala ma valaaulia tagata uma ia ola i le talalelei ma olioli i faamanuiaga ia e oo mai i le ola ai faapena. O le a le faatonu atu e le Ekalesia i soo se tagata, ae o le a fautua atu, o le a tauanau atu, o le a uunaia, ma o le a faamoemoe i le faamaoni mai ia i latou o e ua tautino mai e auai ai.

A o avea au ma se tagata aoga i le iunivesite, sa ou faapea atu i lo’u tama i se tasi o taimi, lea sa ou manatu ai ua ova tele le aia o le Au Pulega Aoao pe a latou fautua mai e uiga i se mea patino. O ia o se alii atamai tele ma lelei. Sa ia faapea mai, “Ua aoao mai i tatou e le Peresitene o le Ekalesia, ma ou te lagolago ia te ia o le perofeta, tagatavaai, ma talifaaaliga ma naunau e mulimuli i ana fautuaga.”

Ua ou … auauna atu i aufono aoao a lenei Ekalesia mo le [tele] o tausaga. … Ou te fia tuuina atu ia te outou la’u molimau, e ui lava ina sa ou nofo ai i le fiaafe o fonotaga e talanoaina ai tulafono ma polokalama a le Ekalesia, ae e le i ai se fono e lei sailia ai le taitaiga a le Alii, e leai foi se mea na i ai se tasi e manao e fautuaina pe fai se mea e faamanualia ai se tasi pe fai faamalosi ai foi se tagata e faia se mea.¹⁸

Ou te tautala atu mo i latou uma taitoatasi [o e saofafai i aufono aoao a le Ekalesia] e leai ni a matou lisi o fuafuaga patino. E na’o le lisi lava o fuafuaga a le Alii. E i ai i latou o e faitio pe a matou tuuina atu se faamatalaga o se fautuaga po o se lapataiga. Faamolemole ia outou silafia, o a matou aioiga e le faaosofiaina e se manao manatu faapito. Faamolemole ia outou silafia, o a matou lapataiga e le faapea ua aunoa ma ni pogai ma ni mafuaaga. Faamolemole ia outou silafia, o faaiuga e talanoa atu e uiga i ni mataupu eseese, e le mafai ona ausia e aunoa ma ni feutagaiga, soalaupulega, ma tatalo. Faamolemole ia outou silafia, na pau lava la matou faanaunauga ia fesoasoani atu ia te outou taitoatasi i a outou faafitauli, a outou tauiviga, o outou aiga, ma o outou soifuaga. … E le o i ai ma se manao e aoao atu se mea e ese mai i le mea e finagalo le Alii e aoao atu. …

O la matou, o le tiutetauave lea na faataatia mai e Esekielu: “Le atalii e o le tagata, ua ou faia oe ma tagata vaai i le aiga o Isaraelu: o le mea lea ia e faalogo mai ai le upu a lo’u gutu, ma e apoapoai atu ia te i latou mai ia te a’u.” Esekielu 3:17.)

E leai ni o matou manao manatu faapito i lenei lava mea, nai lo o le naunau ina ia fiafia o tatou uso ma tuafafine, ina ia i ai le filemu ma le alofa i o tatou aiga, ina ia faamanuiaina i latou e ala i le mana o le Silisili Ese i a latou taumafaiga eseese i le amiotonu.¹⁹

O loo faailoa mai e le aunoa e le Alii i lana lava ala, lona finagalo e faatatau i lona nuu. E tuuina atu la’u molimau, o le a le mafai lava ona fai mai taitai o lenei Ekalesia ia tatou faia soo se mea e le mafai ona tatou faia ma le fesoasoani a le Alii. Tatou te lagona le le agavaa. O na mea e talosagaina i tatou e fai, atonu tatou te le fiafia i ai pe fetaui foi ma o tatou manatu. Ae afai o le a tatou taumafai ma le faatuatua ma tatalo ma le talitonuga, e mafai ona tatou ausia.

E tuuina atu la’u molimau ia te outou, o le fiafia o le Au Paia o Aso e Gata Ai, o le filemu o le Au Paia o Aso e Gata Ai, o le alualu i luma o le Au Paia o Aso e Gata Ai, o le faamanuiaina o le Au Paia o Aso e Gata Ai, ma le faaolataga e faavavau ma le faaeaga o lenei nuu o loo taoto lea i le savavali usiusitai i fautuaga a le perisitua a le Atua.²⁰

O faaiuga laiti e mafai ona oo atu ai i taunuuga tetele.

E mafai ona ou faamatala atu se mataupu faavae … lea, afai e usitaia, o le a matuai faateleina ai le ono mafai ona sa’o o a tatou faaiuga, ma o se taunuuga, o le a lemafaatusalia ai le faateleina o lo tatou alualu i luma ma le fiafia i le olaga. O lenei mataupu faavae maoae o le faatumauina o le faatuatua. …

E le mafai ona ou auiliiliina atu auala e filifili ai mea uma. Ae e mafai ona ou folafola atu, afai o le a outou faia a outou faaiuga e tusa ai ma tulaga faatonuina o le talalelei ma aoaoga a le Ekalesia, ma afai o le a outou faatumauina le faatuatua, o le a manuia o outou olaga ma o le a outou iloa le tele o le fiafia ma mea e ausia.²¹

O ni tausaga se tele ua mavae sa ou faigaluega ai mo se auala o nofoaafi. … O aso na sa toeitiiti o tagata uma sa tietie i nofoaafi laupasese. I se tasi taeao, na ou maua ai se valaau mai la’u soatau i Newark, New Jersey. Sa faapea mai o ia, “Ua taunuu mai le nofoaafi numera fia ma fia, ae e le o i ai se uta o atopau. Po o fea se mea ua leiloloa ai atopau a le 300 o le pasese, ma ua feitai lava.”

O le taimi lava lena na ou galue ai loa e sue po o fea se mea ua alu i ai. Sa ou mauaina, sa utaina faalelei ma tuuina i totonu o le nofoaafi sa’o i Oakland, Kalefonia. Sa faaminoi mai i le matou auala nofoaafi i le Aai o Sate Leki [ma na iu ina taunuu ai i] St. Louis. O iina sa tatau ona taulimaina ai e se isi auala nofoaafi lea na tuu e ave atu ai i Newark, New Jersey. Peitai, sa faame’i e se tagata e fesuia’ia uamea ma le le magafagafa i St. Louis se fasi uamea e na o le tolu inisi [7.5 senitimita], o se ki e sui ai, ona toso lea o le taofi e vaelua ai le taavale. Sa matou iloa ane o se uta atopau na tatau ona alu i Newark, New Jersey, ua oo i New Orleans, Luisiana—e 1,500 maila [2,400 kilomita] mai le mea na faamoemoe e taunuu i ai. E na o le tolu inisi na faaminoi ai e se tagata faigaluega faatamala le ki i le lotoa i St. Louis ma faapea ona alu ai i le auala sese, ma sa matuai tele le mamao mai lona taunuuga moni. E faapena o tatou olaga. Nai lo o le mulimuli i se auala mautinoa, ua tosoina i tatou e se manatu sese i se isi auala. O le aluese mai la tatou nofoaga muamua e ao ona taunuu i ai, atonu e laitiiti lava, ae, afai e faaauauina pea, e faapea ona avea lena gaoioiga itiiti ma se ava tele ma iu ai ina tatou taumamao ese atu mai le mea sa tatou faamoemoe e o i ai. … O mea laiti ia e aafia ai o tatou olaga lea e faia se eseesega tele i o tatou olaga.²²

Sa ou tau atu i se tasi o aso i le faitotoa o le pa o se faatoaga tele lava. Sa ou tosoina i le lave ma tatala le faitotoa o le pa. Sa itiiti lava le minoi o taofi lea sa tau le iloa atu. Ae o le isi itu o le faitotoa na matala i le ono futu le vatele. O le vaai atu i le minoi a taofi lava ia, e le taitai mafaufau se tagata i le galuega tele na oo i ai o se taunuuga o lena tamai minoi.

E faapena filifiliga i o tatou olaga. O se mafaufauga itiiti, o se upu laititi, o se faatinoga laititi e mafai ona taitai atu ai i ni taunuuga tetele.²³

faitotoa uamea o loo matala — Sa faatusaina e Peresitene Hinckley a tatou filifiliga i taofi i luga o le faitotoa o le pa o se faatoaga.

O le ola ai i le talalelei, tatou te faamalosia ai le Ekalesia ma fesoasoani ai i le galuega a le Atua ia tuputupu a’e i le lalolagi atoa.

E mafai ona e faamalosia [le Ekalesia] e ala i le tulaga o loo e ola ai. Inā avea ia le talalelei ma au pelu ma au talitā. …

… Oka se mataina o le a i ai le lumanai a o tulei atu e le Silisili Ese Lana galuega mamalu, ma pa’i atu ai mo le manuia o i latou uma o e o le a talia ma ola i Lana talalelei.²⁴

O loo o’u vaaia se lumanai matagofie i se lalolagi ua sili ona le mautonu. Afai o le a tatou pipiimau pea i a tatou tulaga faatauaina, afai o le a tatou atinae i luga o lo tatou tofi, afai o le a tatou savavali i le usiusitai i luma o le Alii, afai o le a tau lava o le tatou ola i le talalelei, o le a faamanuiaina i tatou i se auala mataina ma matagofie. O le a vaavaai mai [tagata] ia i tatou o ni tagata tulaga ese o e ua mauaina le ki i se fiafiaga tulaga ese.²⁵

Ina filifili ia alii, tamaitai, ma tamaiti uma ia faia ia lelei atu ma malosi atu ma silisili atu le galuega a le Alii nai lo o se isi lava taimi muamua. O tulaga e i ai o tatou olaga e faia le eseesega. O la tatou filifiliga mausali e ola i le talalelei a Iesu Keriso e faia ai le eseesega. O se tulaga lenei e faatatau i le tagata lava ia. Afai tatou te tatalo uma, o le a faapea ona faateleina le malosi o le Ekalesia. Ma e faapena foi i mataupu faavae uma lava o le talalelei. Ina avea ia i tatou ma se vaega o lenei faamoemoe maoae alualu i luma, ua faapea ona sosolo atu i le lalolagi atoa. E le mafai ona tatou tutu faamalo; e tatau ona tatou minoi i luma. E taua tele lo tatou faia o lena mea. O le tautinoga patino lea e nofo i totonu o o tatou loto taitoatasi o le malosiaga moni lea o le Ekalesia. A aunoa ma lena mea, e tau leai lava se mea o ia i tatou; a i ai lena mea, ua ia i tatou mea uma.²⁶

Ou te valaaulia outou uma taitoatasi, po o fea lava o outou i ai o ni tagata o lenei Ekalesia, ia tutu i o outou vae ma faatasi ai ma se pese i o outou loto ia agai i luma, ola i le talalelei, alofa i le Alii, ma atinae le malo. O le tutu faatasi, o le a tatou tumau ai i le ala ma faatumauina le faatuatua, e avea le Silisili Ese ma o tatou malosiaga.²⁷

Fautuaga mo Suesuega ma le Aoaoina Atu

Fesili

O a ni mafuaaga, i le avea ai o i tatou ma tagata o le feagaiga a le Atua, “e le mafai ai ona avea i tatou ma ni tagata masani”? (Tagai vaega 1.) O a nisi o auala o aafia ai lou olaga i aso uma i feagaiga ua e osia ma le Atua?
Na aoao mai Peresitene Hinckley e faapea, “e tatau ona tatou atinae le malosi e mulimuli ai i o tatou talitonuga” (vaega 2). O a ni auala tatou te fetuunaia ai i nisi o taimi o tatou talitonuga? E mafai faapefea ona tatou faamalosia i tatou lava e tetee atu ai i faaosoosoga?
O a ni faatatauga ia i tatou o le faamatalaina e Peresitene Hinckley o le tala ia Elia? (Tagai vaega 3). E faapefea ona e tali atu i se tasi ua manatu o poloaiga ua faasasa tele [ai i tatou]? O a ni auala ua e vaaia ai le usitaia o poloaiga ua aumaia ai le saoloto, saogalemu, ma le filemu?
Toe faamanatu le faamalamalamaga a Peresitene Hinckley i le ala e tuuina mai ai e taitai o le Ekalesia ia fautuaga ma lapataiga (tagai vaega 4). Na faapefea ona faamanuiaina oe e ala i le mulimuli i fautuaga a taitai o le Ekalesia?
O a ni mea e mafai ona tatou aoao mai i le tala a Peresitene Hinckley e uiga i le uta atopau na leiloa? (Tagai vaega 5.) Aisea e faia ai e filifiliga po o faatinoga laiti se eseesega tele i o tatou olaga? O le a se filifiliga laitiiti na faapea ona faia se eseesega tele i lou olaga? E faapefea ona tatou iloa lelei pioga laiti ia e ono taitai ese atu ai i tatou mai ala o le Atua?
E mafai faapefea e le ola i le talalelei ona fesoasoani tatou te taulima ai le le mautinoa i le lalolagi? (Tagai vaega 6.) E mafai faapefea e le ola ai i le talalelei ona faafaigofie o tatou olaga? Mafaufau i ni auala e mafai ona e faamalosia atili ai le Ekalesia ma fesoasoani ia oo atu le ola o le galuega a le Alii i le lalolagi atoa.

Mau Fesootai

Teuteronome 4:39–40; Eperu 5:8–9; MF&F 64:33–34; 93:26–28; 98:22; Aperaamo 3:24–26; Mataupu Faavae o le Faatuatua 1:3

Fesoasoani mo Suesuega

“O le faitau, suesue, ma le manatunatu loloto e le tutusa. Tatou te faitau i upu ma mafai ona maua ai ni manatu. Tatou te suesue ma maua ai manatu ma sootaga o mau. Ae a tatou manatunatu loloto ua tatou valaaulia faaaliga e ala i le Agaga. Ia te au, o le manatunatu loloto, o le mafaufau lea ma le tatalo ou te faia pe a uma ona ou faitau ma suesue ma le faaeteete i tusitusiga paia” (Henry B.Eyring, “Auauna atu ma le Agaga,”Ensignpo oLiahonaNov. 2010, 59).