Mataupu 9

O Le Meaalofa Taua o le Molimau

“Tatou te tautatala i ni gagana eseese. Tatou te nonofo i lalo o ni tulaga eseese. Ae i totonu o o tatou loto taitoatasi o loo tata ai se molimau e tasi.”

Mai le Soifuaga o Gordon B. Hinckley

“O le faataitaiga muamua lava ou te manatuaina e uiga i lagona faaleagaga,” na fai mai ai Peresitene Gordon B. Hinckley, “o le taimi lea pe tusa ma le lima o’u tausaga, o se tama mosi lava. Sa ou tagi ona o le tiga o [lo’u] taliga. … Sa saunia e lou tina se pepa masima ma tuu i luga o le ogaumu e faamafanafana ai. Sa tuu malie e lo’u tama ona lima i luga o lo’u ulu ma tuuina mai ia te a’u se faamanuiaga, e faatonu ai le tiga ma le ma’i e ala i le pule o le perisitua paia ma i le suafa o Iesu Keriso. Ona ia siiina lea o a’u ma le alofa ma tuu le pepa masima mafanafana i lo’u taliga. Sa oo ina feololo le tiga ma te’a atu ai. Sa oo ina ou moe i lima saogalemu o lo’u tama. A o o’u moe, sa faasolo mai i lo’u mafaufau upu o lana faamanuiaga. O le taimi muamua lava lena ou te manatuaina na faaaoga ai le pule o le perisitua i le suafa o le Alii.

“Mulimuli ane a o o’u talavou, sa ma momoe ai ma lo’u uso i se potu sa le’i i ai se potumoe sa lei faamafanafanaina i le taimi o le taumalulu. … Ae ma te le’i taooto i se moega mafanafana, sa ma tootutuli e fai a ma’ua tatalo. Sa faapea ona faailoa atu ai se faafetai faatauvaa. … Ou te manatua lo’u oso i luga o lo’u moega ina ua uma ona ou fai atu amene, ma toso a’e ieafu i luga o lo’u ua, ma mafaufau i le mea na faatoa uma lava ona ou faia i le talanoa atu i lo’u Tama oi le Lagi i le suafa o Lona Alo. Sa le’i tele so’u iloa e uiga i le talalelei. Ae sa i ai se ituaiga o toafilemu ma le puipuiga tumau i le talanoa atu i le lagi i le, ma e ala i le Alii o Iesu Keriso. …

“Sa tupu a’e lena molimau i lo’u loto a o avea [a’u] ma se faifeautalai i le taimi na ou faitauina ai le Feagaiga Fou ma le Tusi a Mamona, lea sa atili molimau mai ia te Ia. O lena malamalama na avea ma faavae o lo’u olaga, sa oo mai i tatalo sa taliina mai a o o’u laitiiti. Talu mai lena taimi ua tuputupu a’e atili ai lava lo’u faatuatua. Ua avea a’u ma Ana Aposetolo, na tofia e fai Lona finagalo ma aoao atu Lana afioga. Ua avea a’u ma Ana moilmau i le lalolagi.”¹

O Le Alii o Iesu Keriso — I le avea ai ma Au Paia o Aso e Gata Ai, ua tatou autasi ai i la tatou molimau e uiga ia Iesu Keriso.

Aoaoga a Gordon B. Hinckley

O le molimau o le malosiaga tele lea o le Ekalesia ma le alia ola o le faatuatua.

Ua avea i tatou o se aiga toatele ua salalau atu i lenei lalolagi tele. Tatou te tautatala i ni gagana eseese. Tatou te nonofo i lalo o ni tulaga eseese. Ae i totonu o o tatou loto taitoatasi o loo tata ai se molimau e tasi: Ua e iloa ma ou iloa o loo soifua le Atua, ma o loo tu i le foeuli o Lana galuega paia lenei. Ua tatou iloa o Iesu o lo tatou Togiola, o loo tu o le faaao o lenei Ekalesia o loo tauavea Lona suafa. Ua tatou iloa o Iosefa Samita na avea ma perofeta ma o se perofeta o loo tu o le faaao o lenei tisipenisione o le atoaga o taimi. Ua tatou iloa na toefuatai mai le perisitua i luga o lona ao ma ua tuufaasolo mai ai e tau mai ia i tatou i lenei vaitaimi i se faasologa e le’i motusia. Ua tatou iloa o le Tusi a Mamona o se molimau moni i le moni ma le paia o le Alii o Iesu Keriso.²

O le mea lenei ua tatou ta’ua o le molimau o le malosiaga tele lea o le Ekalesia. O le alia ola o le faatuatua. … E tutusa lava lona moni ma lona malosi ma soo se malosiaga i luga o le fogaeleele. Na faamatalaina e le Alii ina ua Ia fetalai atu ia Nikotemo e faapea, “E agi le matagi i le mea e loto i ai o ia, e te faalogo foi i lona agi, a e te le iloa le mea na sau ai, ma le mea e alu atu i ai: e faapena i latou uma o e ua fanau mai e le Agaga” (Ioane 3:8). O lenei mea tatou te ta’ua o le molimau, e faigata ona faamatala ae e iloagofie lava ona fua. O le Agaga Paia lea e molimau mai i totonu ia i tatou.³

O le molimau o se leo filemu ma faamalosiau lea e lagolagoina i tatou a o tatou savavali i le faatuatua ma uunai i tatou e faatino.

O le molimau a le tagata lava ia o le vaega lea na te suia le ala e ola ai tagata a o latou o mai i lenei Ekalesia. O le elemene lenei e faaosofia tagata auai e lafoai mea uma mo le galuega a le Alii. O le leo malu, faamalosiau lenei e lagolago atu e aunoa ma se malolo ia i latou o e savavali ma le faatuatua seia oo lava i aso mulimuli o o latou soifua.

O se mea e tulaga ese ma matagofie, o se meaalofa mai le Atua i le tagata. E sili atu lona taua i le tamaoaiga po o le mativa pe a valaauina se tagata e auauna atu. O lenei molimau lea e momoliina atu i loto o tagata e faaosofia ai i se tiute faamalosi. E maua i e laiti ma e matutua. E maua i le tamaitiiti aoga o le seminare, i le faifeautalai, i le epikopo ma le peresitene o le siteki, i le peresitene o le misiona, i le tuafafine o le Aualofa, i le Au Pulega Aoao uma. E faalogoina mai ia i latou o e e leai ni tofiga ae na o le avea ma se tagata o le au paia. O le ute moni lea o lenei galuega. O le mea lea o loo faaminoi ai le galuega a le Alii i luma ma le salafa o le lalolagi atoa. Na te faaosofia [tagata] e galulue. Ua poloai mai ia tatou faia mea ua talosagaina i tatou e fai. Na te aumaia faatasi ai le faamautinoaga e faapea, e i ai le faamoemoega o le olaga, ma o nisi o mea e sili atu le taua nai lo o isi, ma o loo tatou i ai i se malaga e faavavau, ma tatou te tali atu i le Atua. …

O le elemene lenei, e vaivai ma fai si maaleale i le taimi muamua, lea e faaosofia ai tagata sailiili uma i le ala o le liuaina. Na te tuleia tagata uma e liliu mai agai atu i le saogalemu i le faatuatua. …

Po o fea lava e faatulagaina ai le Ekalesia e lagonaina ai lava lona mana. Tatou te tutu i o tatou vae ma faapea atu ua tatou iloa. … O le upumoni faigofie e faapea, tatou te iloa lava o loo soifua le Atua, o Iesu o le Keriso, ma o le la’ua faamoemoega ma le malo lenei. O upu e faigofie; ae o le faailoaina atu e sau mai i le loto. E galue i soo se mea lava e faatulagaina ai le Ekalesia, soo se mea lava e i ai faifeautalai o loo aoaoina atu le talalelei, soo se mea lava e i ai le au paia o loo faasoaina atu o latou faatuatua.

O se mea e le mafai ona teenaina. E mafai ona le mafai ona sii mai e fili ia mau ma finauina aoaoga faavae. E mafai ona latou popoto ma faatauanau. Ae a faapea mai loa se tagata, “Ou te iloa,” o le a faapea ona le toe i ai lava nisi tala. Atonu e i ai le le taliaina, ae o ai e mafai ona faafitia pe teena le leo malu o le loto i totonu lea e talanoa mai ma se tautinoga patino?⁴

“Malamalama i totonu o o matou olaga”

Sa nonofo [David Castañeda], lona faletua o Tomasa, ma le la fanau i se faatoaga matutu laitiiti ua tuai lava e lata i Torreón [i Mekisiko]. Na latou anaina ni moa se 30, meatuaolo se 2, ma se solofanua tino leaga se 1. Sa maua mai i moa ni nai fuamoa e tausi ai i latou, ma le auala e mafai ona latou maua ai ni nai peso i lea taimi ma lea taimi. Sa latou ola i le mativa. Ona afea lea o i latou e faifeautalai. Na fai mai Sister Castañeda, “Na aveese e alii faifeautalai pupuni mai o matou mata ma aumaia le malamalama i totonu o o matou olaga. Na leai se mea na matou iloa e uiga ia Iesu Keriso. Ana le oo mai i laua, matou te le iloa se mea e uiga i le Atua.”

E lua ni tausaga o ana aoaoga, ae o lana tane e leai se mea. Na aoaoina i latou e alii faifeautalai, ma na iu ai ina latou papatisoina. … Sa faifaimalie ona latou atinaeina se pisinisi manuia, lea sa galulue ai le tama ma ona atalii e toalima. Faatasi ai ma le faatuatua faigofie sa totogi ai a latou sefuluai. Sa tuu atu lo latou faatuatuaga i le Alii. Sa latou ola i le talalelei. Sa latou auauna atu i soo se mea na valaauina i latou e fai. O le toafa o o laua atalii ma le toatolu o o laua afafine sa faataunuuina ni misiona. … Sa tele ni faamatalaga a tagata faitio ia i latou. O le latou tali o se molimau i le mana o le Alii i o latou olaga.

Pe a ma le 200 o o latou aiga ma uo ua auai i le Ekalesia ona o a latou faatosinaga. E silia ma le 30 atalii ma afafine o aiga ma uo ua auauna atu i ni misiona. Sa latou foaia le fanua lea o loo tu ai nei se falesa.

O tamaiti, lea ua matutua i le taimi nei, ma matua, e auauai e o atu i le Aai o Mekisiko i masina taitasi, o iina e galulue ai i le malumalu. Latou te tutu o se molimau ola i le mana maoae o lenei galuega a le Alii e siitia ma suia ai tagata. O i latou o faatusa o le faitau afe ma afe i le lalolagi atoa o e ua oo i le vavega o le FaaMamona a o oo mai i totonu o o latou olaga se molimau i le paia o le galuega.⁵

“E moni, a ea? O le a la se isi mea e sili atu ona taua?”

Sa ou feiloai i se alii ofisa o le neivi mai i se atunuu mamao, o se alii talavou atamai o le na aumai i le Iunaite Setete mo aoaoga faamasani maualuluga atu. O nisi o ana aumea faigaluega i le Neivi a le Iunaite Setete, na faatosinaina o ia i a latou amioga, na faasoa atu ia te ia ona o sana talosaga, o latou talitonuga faalelotu. Sa le o ia o se tagata Kerisiano, ae sa fiafia i ai o ia. Sa latou ta’u atu ia te ia e uiga i le Faaola o le lalolagi, o Iesu Keriso, na soifua mai i Peteleema, o le na tuuina mai lona soifua mo tagata uma. Sa latou ta’u atu ia te ia e uiga i le faaali mai o le Atua, le Tama e Faavavau, ma le Alii toetu i le taulealea o Iosefa Samita. Sa latou talanoa atu e uiga i perofeta o aso nei. Sa latou aoaoina o ia i le talalelei a le Matai. Sa pai atu le Agaga i lona loto, ma sa papatisoina o ia.

Sa faailoa mai o ia ia te a’u i le taimi tonu o le a toe foi atu ai i lona atunuu moni. Sa ma talanoa e uiga i mea nei, ona ou fai atu lea: “O ou tagata e le o ni Kerisiano. O le a se mea o le a tupu pe a e toe foi atu i lou aiga o se Kerisiano, ma le mea e sili ona faapitoa, o se Kerisiano Mamona?”

Sa faanoanoa o ia, ma sa ia tali mai, “O le a le fiafia lo’u aiga. “Atonu latou te tuliesea a’u ma manatu faapea ua ou oti. O lo’u lumanai foi ma la’u matata faalegaluega, atonu foi o le a tapunia mo au.”

Sa ou fesili atu, “Ua e manao e totogi se tau ina a tele mo le talalelei?”

O ona mata uli sa susu i loimata, na susulu mai i ona foliga aulelei enaena a o ia tali mai, “E moni, a ea?”

O le matamuli ai i le faia mai o le fesili, na ou tali atu ai, “Ioe, e moni.”

O lea na ia tali mai ai, “Ia o le a la se isi mea e sili atu le taua?”

O fesili nei ou te fia tuua ia te outou: “E moni, a ea? Ia o le a la se isi mea e sili atu le taua?”⁶

O se vaaiga fou i le olaga

Sa i ai se taimi na ou faalogo ai i le aafiaga a se enisinia o le sa le’i leva ona auai i le Ekalesia. Sa oo atu faifeautalai i lona maota, ma sa valaaulia e lona faletua i laua i totonu. Sa tali atu o ia ma le naunautai i la laua savali, a o ia [alii] lagonaina le toso ese mai o ia mai lona manao. I se tasi afiafi sa ia faailoa atu ai ua manao ina ia papatisoina. Sa matuai ita lava o ia [le alii]. Na te le’i iloa le uiga o lenei mea? O lona uiga o le taimi. O lona uiga o le totogi o le sefuluai. O lona uiga o le lafoai o a laua uo. O le uiga o lenei mea o le le toe ulaula. Sa faamaulu lona ofutele ma savali atu i fafo i le po, ma ato mai le faitotoa i ona tua. Sa savali o ia i le auala, ma palauvale i lona toalua, palauvale i faifeautalai, palauvale ia te ia lava mo le faatagaina o i laua e aoao i latou. A o faasolo ina lelava o ia sa to’amalie mai lona ita, ma oo ai ina oo mai se agaga o le tatalo i totonu o lona loto. Sa tatalo o ia a’o savali. Sa ia aioi atu i le Atua mo se tali i ana fesili. Ma sa oo mai se faalogona, manino ma le le sese, na pei uma lava na tautala mai i upu na faapea mai, “E moni.”

“E moni,” sa faafia ona ia fai ifo ai ia te ia lava. “E moni.” Sa oo mai se toafilemu i totonu o lona loto. A o savali atu o ia agai i le fale, sa amata ona foliga mai o ni avanoa ia faatapulaa, o poloai, o mea e manaomia, ia sa matuai ita ai. Ina ua ia tatalaina le faitotoa, sa tau atu i lona faletua o tootuli o loo tatalo.

… I luma o le aulotu lea na ia faamatalaina ai lenei mea, sa ia faamatala e uiga i le fiafia na faapea ona oo mai i o latou olaga. Sa le o se faafitauli le sefuluai. O le faasoaina atu o a latou mea na maua i le Atua, o le na tuuina mai mea uma ia i latou sa foliga mai o se mea itiiti lava. O le taimi mo auaunaga sa le o se faafitauli. Na pau le mea na manaomia i lenei mea o si paketiina ma le faaeteete o itula o le vaiaso. O tiutetauave sa le o se faafitauli. Mai [tiutetauave] na oo mai ai le tuputupu a’e ma se vaaiga fou i le olaga. Ona sosoo ai lea ma le tuuina mai e lenei tamalii atamai ma aoaoina, lenei enisinia na masani ona taulimaina mea moni o le olaga faaletino lea o loo tatou ola ai, o se molimau faamaoni faatasi ma loimata, e uiga i le vavega na faapea ona oo mai i lona olaga.⁷

o le tamaloa o loo tatalo — “O ai e mafai ona faafitia pe teena le leo malu o le loto i totonu lea e talanoa mai ma se tautinoga patino?”

“O le mea aupito sili ona pele i lo’u olaga”

O ni tausaga ua mavae, sa lauga ai se tamaitai atamai ma maualuga lona aoaoina i Berchtesgaden, Siamani, i se konafesi a taitai o le militeli o e o ni tagata o le Ekalesia. Sa ou i ai iina ma faalogo ai ia te ia. Sa avea o ia ma se taitai sili [major] i le fitafita, o se fomai o vailaau faafomai, o se tagata e maualuga le faaaloalogia i lana matata. Fai mai a ia:

“O lo’u manao e auauna atu i le Atua, sa sili atu nai lo o se isi lava mea o le lalolagi. Ae na tusa lava po o le a le malosi na ou taumafai ai, sa le mafai ona ou maua o ia. O le vavega o lena mea atoa, o lona mauaina o a’u. I se aoauli o se tasi o Aso Sa ia Setema 1969, sa ou i ai i le fale i Berkeley, Kalefonia, ma faalogoina ai le tatagi o le logo o lo’u faitotoa. Sa i ai iina ni alii talavou se toalua, sa ofuina ni suti, ma ni ofutino papae ma ni fusiua. Sa selu faalelei o laua ulu. Sa matuai faagaeetia a’u ia te i laua o lea na ou fai atu ai: ‘Ou te le iloa po o le a le mea o loo oulua faatauina mai, ae o le a ou faatauina.’ Sa fai mai se tasi o alii talavou: ‘Ma te le o faatauina atu se mea. O i ma’ua o faifeautalai O Le Ekalesia a Iesu Keriso o le Au Paia o Aso e Gata ai, ma ma te fia talanoa ia te oe.’ Sa ou valaaulia i laua e o mai i totonu, ma sa laua talanoa mai e uiga i lo laua faatuatuaga.

“O le amataga lenei o la’u molimau. E sili atu nai lo lo’u faamatalaina i upu la’u faafetai mo le avanoa ma le faamamaluga i le avea ma se tasi o Le Ekalesia a Iesu Keriso o le Au Paia o Aso e Gata Ai. O le olioli ma le filemu ua aumaia e lenei talalelei i lo’u loto o le lagi lea i le fogaeleele. O la’u molimau i lenei galuega o le mea aupito sili lea ona pele i lo’u olaga, o se meaalofa mai i lo’u Tama Faalelagi, o lea o le a faavavau ona ou faafetai ai.”⁸

E faapena foi i le faitau selau o afe i le tele o atunuu—o alii ma tamaitai gafatia ma aoaoina, o pisinisi ma galuega, o [tagata] ulu-malo ma gaoioi o e e faia mea i le galuega a le lalolagi, o totonu o o latou loto o loo mumu ai se molimau le leoa e faapea, o loo soifua le Atua, o Iesu o le Keriso, o lenei galuega e paia, ma sa toefuataiina mai i le lalolagi mo le faamanuiaina o tagata uma o e o le a auai i ona avanoa.⁹

E mafai e i tatou taitoatasi ona maua se molimau i le moni o le Atua ma Lona Alo Pele ma le toefuataiga o le Laua galuega.

O lenei tautinoga, o lenei molimau, e mafai ona avea ma mea aupito sili ona pele o meaalofa uma a le Atua. O se faaeega faalelagi pe afai e i ai le taumafaiga sa’o. O le avanoa, o le tiutetauave a alii ma tamaitai uma i lenei Ekalesia le mauaina e ia lava o se tautinoga o le moni o lenei galuega tele i aso e gata ai, ma e uiga ia i latou o e o loo tutu i lona ao, tainane foi le Atua soifua ma le Alii o Iesu Keriso.

Na faasino mai e Iesu le ala mo le mauaina o se molimau faapena ina ua Ia fetalai mai: “O la’u mataupu, e le o sa’u lava, a o lana na auina mai a’u.

“Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a’u” (Ioane 7:16–17).

Tatou te tuputupu a’e i le faatuatua ma le poto a o tatou auauna atu, a o tatou suesue, a o tatou tatalo.

Ina ua fafagaina e Iesu le 5,000 o tagata, sa latou iloaina ma mafaufau loloto i le vavega sa Ia faataunuuina. O nisi sa toe foi mai. I nei tagata, sa Ia aoao atu i ai le aoaoga faavae o Lona paia, o Ia lava i le avea ai ma Areto o le Ola. Sa ia tuuaia i latou i lo latou le fiafia i le aoaoga faavae, ae na o le faamalieina o le fiaai o o latou tino. Ina ua faalogo ni isi ia te Ia ma Lana aoaoga faavae, sa fai mai, “O le upu faigata lena; o ai ea se na te mafaia ona faalogologo i ai?” (Ioane 6:60). O ai e mafai ona talitonu i le mea o loo aoao mai e lenei tagata?

“Mai lava i lena taimi, e toatele ona soo sa toe foi, ma sa le toe savavali faatasi ma ia.

“Ona faapea atu lea o Iesu i le toasefulu ma le toalua [Ou te manatu e faatasi ai ma sina lagona o le lotovaivai], Pe tou te fia o ese foi?

“Ona tali mai lea o Simona Peteru ia te ia, Le Alii e, a matou o ea ia te ai? O ia te oe upu o le ola e faavavau.

“Ua matou talitonu, ma ua matou iloa o oe o le Keriso, o le Alo o le Atua soifua” (Ioane 6:66–69).

O le fesili tele lenei, ma le tali e uiga i ai, lea e tatau ia i tatou uma ona talia. Afai e le o Lau Afio, Le Alii e, a matou o ea ia te ai? O ia te oe upu o le ola e faavavau. Ua matou talitonu, ma ua matou iloa o oe o le Keriso, o le Alo o le Atua soifua.”

O le tautinoga lenei, o lenei mautinoa filemu i totonu e uiga i le moni o le Atua soifua, i le paia o Lona Alo Pele, i le toefuataiga o le laua galuega i lenei taimi, ma i le faaaliga matagofie lea na mulimuli ane ai, lea ua avea mo i tatou taitoatasi ma faavae o lo tatou faatuatua. O lenei mea ua avea ma a tatou molimau.

… Sa ou i ai lata mai nei i Palemaira, Niu Ioka, [e lata i le mea na maua ai e Iosefa Samita le Uluai Faaaliga]. E uiga i mea na tutupu i lena eria, e tatau ona ioe e se tagata e faapea: “A le o le sa tupu, po o le le’i tupu foi. E le mafai ona i ai se itu e fetuunai ai, leai se auala e mafai ona sa’o ai ia manatu e lua.”

Ona musumusu mai lea o le leo o le faatuatua: “Sa tupu lava. Sa tupu e pei lava ona sa ia fai mai ai na tupu.”

O loo lata ane le Mauga o Kumora. Mai iina na oo mai ai le faamaumauga anamua, lea na faaliliuina mai ai le Tusi a Mamona. E tatau i se tagata ona talia pe teena lona afuaga paia. O le mafaufau moni i faamaoniga e tatau ona taitai atu ai alii ma tamaitai uma o e ua faitau i ai ma le faatuatua e faapea atu, “E moni.”

Ma e faapena foi i isi elemeni o lenei mea ofoofogia lea tatou te ta’ua o le toefuataiga o le talalelei mai anamua, o le perisitua mai anamua, ma le Ekalesia mai anamua.

Ua avea nei lenei molimau, e pei ona sa i ai i taimi uma, o se folafolaga, o se tautinoga faatauvaa o le upumoni e pei ona tatou iloa ai.¹⁰

E tatau ona tatou ola i a tatou molimau ma faasoa atu i isi.

Sa faapea atu Paulo ia Timoteo: “Ia oe lava ia te oe”—faafofoga i le mea lenei—“atoa ma lau e aoao atu; ia e tumau pea i ai: aua a e fai lena mea, e faaolaina ai oe e oe atoa ma e ua faalogologo ia te oe” (1 Timoteo 4:16). Oka se manaia o le taitaiga na tuuina atu e Paulo i le taulealea o Timoteo.

Sa faaauau ona ia faapea atu: “Aua ua le foaiina mai e le Atua ia te i tatou le Agaga e matau ai, a o le Agaga e faamalosi ai, ma alofa ai, ma mafaufau tonu ai” (2 Timoteo 1:7). E le’i tuuina mai e le Atua ia i tatou le agaga o le mata’u, ae o le mana—o le mana o le savali; ma o le alofa—alofa mo tagata, alofa mo le mea e tatau ona tatou ofoina atu; o se mafaufau tonu—o mataupu faavae faigofie, malamalama gofie o le talalelei toefuataiina a Iesu Keriso.

“O lenei, aua e te mā i le molimau i lo tatou Alii” (2 Timoteo 1:8). Ia aua lava o’u uso e ma tuafafine, ne’i outou mama i le molimau i lo tatou Alii. … O se tiute maoae lenei, o se poloaiga ua tuuina mai i o tatou luga: “Aua ua le foaiina mai e le Atua ia te i tatou le Agaga e mata’u ai, a o le Agaga e faamalosi ai, ma alofa ai, ma mafaufau tonu ai. O lenei, aua e te mā i le molimau i lo tatou Alii.” ¹¹

O le galuega paia lenei a le Atua. O Lana Ekalesia ma [Lona] malo lenei. O le faaaliga vaaia na tupu i le Togavao Paia e moni lava e pei ona sa fai mai ai Iosefa. O loo i ai i totonu o lo’u loto se malamalamaaga moni i le taua o le mea na tupu iina. E moni le Tusi a Mamona. O loo molimau mai i le Alii o Iesu Keriso. Ua toefuataiina mai Lana perisitua ma o loo i ai ia i tatou. O ki o lena perisitua, lea na oo mai mai avefeau faalelagi, o loo faaaogaina mo o tatou faamanuiaga e faavavau. O le tatou molimau lena—o lau ma la’u—o se molimau e tatau ona tatou ola ai, ma e tatau ona tatou faasoa atu i isi. Ou te tuuina atu lenei molimau, la’u faamanuiaga, ma lo’u alofa ia te outou taitoatasi ma la’u valaaulia ina ia faaauau ona avea ma se vaega o lenei vavega tele i aso e gata ai o Le Ekalesia a Iesu Keriso o le Au Paia o Aso e Gata Ai.¹²

Fautuaga mo Suesuega ma le Aoaoina Atu

Fesili

O a ni auala e saofaga ai lau molimau patino i le malosi o le Ekalesia? (Tagai vaega 1.)
Ua faamamafa mai e Peresitene Hinckley e faapea, o le molimau e lagolago ai i tatou ma “uunai i [tatou] e faatino” (vaega e 2). O a ni auala o lagolagoina ai oe e lau molimau? Na faapefea ona musuia e lau molimau au faatinoga? O a ni faatatauga patino e mafai ona e faia mai tala o loo i le vaega e 2?
O a ni mea e mafai ona tatou aoao mai i aoaoga a Peresitene Hinckley e uiga i le mauaina o se molimau? (Tagai vaega 3). O a ni aafiaga na fesoasoani ia te oe e maua ai lau molimau? O a ni mea e mafai ona tatou faia e faamalosia ai a tatou molimau?
Aisea e te manatu e tutupu malosi atili ai a tatou molimau pe a tatou faasoaina atu? Na faapefea ona e faatoilaloina lagona o le fefe e faasoa atu lau molimau? O a ni auala ua faamanuiaina ai oe e ala i molimau a isi? (Tagai vaega 4.)

Mau Fesootai

1 Korinito 12:3; 1 Peteru 3:15; Alema 5:43–46; 32:26–30; Moronae 10:3–5; MF&F 8:2–3; 80:3–5

Fesoasoani mo le Aoaoina Atu

“Ao amata ona e iloa ma malamalama i tagata taitoatasi, o le a sili atu ai foi ona e saunia e aoao atu au lesona lea e faafetaiaia ai o latou tulaga taitoatasi. O lenei malamalamaaga o le a fesoasoani ia te oe e saili ai ni auala e fesoasoani ai i tagata taitoatasi ia auai i talanoaga ma isi gaoioiga e aoao mai ai” (O Le Aoao Atu, E Leai Se Isi Valaauga E Sili Ai [1999], 36).