Mataupu 3

Faafaileleina o se Uiga o le Fiafia ma se Agaga o le Faamoemoe

“Ia talitonu. Ia fiafia. Aua le faavaivai. O le a lelei mea uma.”

Mai le Soifuaga o Gordon B. Hinckley

Sa masani ona faapea mai le tina o Peresitene Gordon B. Hinckley o Ada Bitner Hinckley e faapea, “o se uiga faaalia fiafia ma se foliga ataata e mafai ona faaosofia ai le fiafia o se tagata i le toetoe lava o soo se faafitauli, ma e nafa lava le tagata ia ma lona lava fiafia.”¹ Sa i ai foi i lona tama o Bryant S. Hinckley, se “vaaiga mautinoa tumau.”² Na faamatala e Peresitene Hinckley, “A o ou talavou ma toetoe a ou faitio, e faapea mai lo’u tama: ‘O tagata femoumouai e leai ni o latou sao, o tagata le talitonu e le fatuina [ni mea], o tagata masalosalo e le ausiaina se mea.’”³ O le uunaia ai e fautuaga ma faataitaiga a ona matua, sa aoao ai e le taulealea o Gordon Hinckley le taulimaina o le olaga i se faamoemoe lelei faapea ma le faatuatua.

A o avea ai o se faifeautalai i Egelani, sa galue malosi ai Elder Hinckley ia mulimuli i le fautuaga a ona matua. O taeao uma lava e lululima ai o ia ma ana soa ma fai atu le tasi i le isi, “E manaia le olaga.”⁴ O le toeitiiti ai 70 tausaga mulimuli ane, sa ia fautuaina atu ai i se vaega o faifeautalai i Filipaina ina ia mulimuli i lena lava faiga masani. Sa ia ta’u atu ia i latou, “O ananafi o se aso sa sili ona manaia i lo’u olaga.” “O aso uma lava o se aso sili ona manaia i lo’u olaga. Ou te faamoemoe o aso uma lava o se aso sili lea ona manaia i o outou olaga—outou uma lava. Ou te faamoemoe e mafai ona outou saunia e o atu i le taeao ma lululima ma lau soa ma faapea atu, ‘Uso, e manaia le olaga. Ta o ma ia maua se ta aso manaia.’ Ma a oulua foi mai i le afiafi, ou te faamoemoe e mafai ona outou fai atu i le tasi ma le isi, ‘O se aso manaia lenei. Sa ta maua se taimi fiafia. Sa ta fesoasoani i se tasi i le ala. … O le a ta tulitatao ia i latou ma tatalo ma faamoemoe o le a latou o mai i le Ekalesia.’ O aso uma lava e tatau ona avea o se aso manaia i totonu o le misiona.”⁵

O lenei fautuaga sa o se faiga o le ala na taulima ai e Peresitene Hinckley le olaga. Sa faasoa mai e Peresitene Russell M. Nelson o le Korama a Aposetolo e Toasefululua le manatu lenei e uiga ia Peresitene Hinckley ma lona faletua o Marjorie: “La te le maumaua se taimi e mafaufau ai i mea ua tuanai pe popole i taimi uma i le lumanai. Ma la te filiga e ui lava ina faigata.”⁶ Sa ta’ua foi e Elder Jeffrey R. Holland, o le Korama a le Toasefululua: “E masalo o le faamautinoaga fai soo lava lenei a Peresitene Hinckley i aiga, uo, ma aumea, ‘O le a lelei mea uma.’ ‘Taumafai pea,’ o le a ia fai mai ai. ‘Ia talitonu. Ia fiafia. Aua le faavaivai. O le a lelei mea uma.’”⁷

O Peresitene Hinckley faatasi ma le autalavou — “O loo ia i tatou mafuaaga uma e tatau ai ona talitonu o le a lelei mea uma.”

Aoaoga a Gordon B. Hinckley

E tusa lava pe toatele tagata e le fiafia ma manatu o le a leai se mea e lelei, e mafai ona tatou atinaeina se agaga o le fiafia ma le faamoemoe o le a lelei mea uma.

O loo i ai se gasegase leaga lava o le manatu o le a leai se mea e lelei i le lalolagi. Ua toetoe lava a soo ai le lalolagi. O loo fafagaina pea lava pea i tatou i se taumafataga masani ma le oona o le faalumaina o uiga lelei o se tagata, saili masei, ma le tautala le mafaufau e uiga i le tasi ma le isi. …

Ua ou sau … ma se talosaga ia taofi le suesue masei ae ia faateleina le fiafia i le lasusulu. O loo ou fai atu ia tatou faatauaina mea lelei. O loo ou talosaga atu ina ia tatou vaavaai loloto atu mo le lelei i ni mea faigata, ia tuu a tatou faamatalaga faatiga ma faauigalua, ina ia tatou atili patipatia ma le agalelei le amio mama ma taumafaiga.

Ou te le o faapea atu e aua le ano i faitioga uma. O le tuputupu a’e e o mai faatasi ma faasa’oga. O le malosi e o mai faatasi ma le salamo. O se alii po o se tamaitai poto, o le sa faailoa atu ia te ia e nisi o tagata ni mea sese sa ia faia, e suia lona ala. Ou te le o fautua atu e faapea o a tatou talanoaga o le a logomalie i taimi uma. O faamatalaga atamai e sau mai i le loto ma faamaoni, o se tomai lea e tatau ona sailia ma atinaeina. O le mea o loo ou fautuaina atu ma talosagaina, ia tatou liliu ese mai uiga le lelei lea ua masani tele ai le lalolagi, ae vaavaai mo le lelei sili atu i le lalolagi ma i taimi o loo tatou ola ai, ina ia tatou talanoa soo i uiga mama o le tasi ma le isi, nai lo o le talanoa e uiga i o latou sese, ia suia e le talitonu o le a lelei mea uma, le talitonuga e leai se mea o le a lelei. Ia suitulaga e o tatou faatuatua o tatou popoleaga.⁸

O loo ia i tatou mafuaaga uma e tatau ai ona talitonu o le a lelei mea uma i lenei lalolagi. Ioe, e i ai lava mala. Ioe, e i ai faafitauli i soo se mea. Ae … e le mafai ma e te le, atiaeina se mea mai le masalosalo ma le le talitonu. E vaavaai atu ma le talitonu o le a lelei mea uma, galue ma le faatuatua, ona tutupu ai lea o mea.⁹

Aua le faanoanoa. Aua le fiugofie. Vaavaai mo le lasusulu i talaatu o ao. O le a iu lava ina matala atu ni avanoa ia te outou. Aua ne’i faatagaina tagata e faamoemoe ia tutupu ni mea leaga e lamatia ai mea ua e filifilia.¹⁰

Ia atinae se uiga faaalia o le fiafia. Ia atinae se agaga o le talitonu o le a lelei mea uma. Savali ma le faatuatua, olioli i le matagofie o le natura, i le lelei o i latou e te alofa i ai, i le molimau o loo e tauaveina i lou loto e uiga i mea paia.¹¹

O le fuafuaga a le Tama Faalelagi o se fuafuaga o le fiafia. O le a mama le ala, o le a itiiti popolega, o le a le faigata tele ia feteenaiga pe afai o le a tatou atinaeina se agaga o le fiafia.¹²

Nai lo o le mafaufau i o tatou faafitauli, e mafai ona tatou faataga se agaga o le loto faafetai e taitaia ma faamanuia i tatou.

Oka se matagofie o le faamanuiaina o i tatou! Oka se agaga faafetai e tatau ona tatou maua! … Atinae se agaga o le agaga faafetai mo faamanuiaga o le ola, ma mo meaalofa ofoofogia ma avanoa o loo taitasi i tatou ma olioli ai. Na fetalai mai le Alii, o e e agamalu e fai mo latou tofi le nuu. (Tagai Mataio 5:5.) E le mafai lava ona ou aloese mai le faaliliuga e faapea, o le agamalu e fautuaina ai se agaga o le loto faafetai ae le o se uiga o le, [matou te] le manaomia se fesoasoani mai se isi, o se faailoaga o se mana e sili atu nai lo o le malosi o le tagata lava ia, o se faamamaluga o le Atua, ma se taliaina o ana poloaiga. O le amataga lenei o le poto. Savali ma le agaga faafetai i ona luma, o le na tuuina mai le ola ma meaalofa lelei uma.¹³

E le’i i ai lava se taimi ua sili atu i le talafaasolopito o le lalolagi e ola ai i luga o le fogaeleele nai lo o lenei. E matuai tatau ia i tatou uma ona lagona le loto faafetai mo le ola ai i lenei vaitaimi matagofie, faatasi ai ma faamanuiaga ofoofogia uma ua tatou maua.¹⁴

A ou mafaufau i mea ofoofogia ua oo mai i lo’u olaga—ua matuai tele atu nai lo o le tuufaatasiga uma o le talafaasolopito o le tagata—Ou te tu ma le migao ma le loto faafetai. Ou te mafaufau i taavale ma vaalele, i komepiuta, masini fesi, i-meli, ma le Initoneti. E ese le ofoofogia ma le matagofie o ia mea uma. Ou te mafaufau i le taumafaiga maoae na faia i vailaau faafomai ma tulaga mo le soifua maloloina o tagata lautele. … Ma faatasi ai ma nei mea uma, ua i ai le toefuataiga o le talalelei mama a Iesu Keriso. O oe ma a’u o se vaega o le vavega ma le ofoofogia o lenei faamoemoega ma le malo maoae, ua faapea ona salalau atu i luga o le fogaeleele ma faamanuiaina ai olaga o tagata i soo se mea lava e oo atu i ai. Oka se loloto o lo’u agaga faafetai.¹⁵

Ua tatou ola i le atoatoaga o taimi. Matau le fuaitau lena. Matau le upu atoatoaga. E faailoa ai mea lelei uma ua faapotopotoina faatasi [mai] aso anamua ma toefuataiina mai i le lalolagi i lenei tisipenisione faaiu.

Ua tumu lou loto … i le agaga faafetai i le Atua Silisili Ese. E ala mai i le meaalofa o Lona Alo, o le Atua o lenei lalolagi, ua matuai maoae ai le faamanuiaina o i tatou. E ootia lou loto i upu o le tatou viiga, “Faitau ia o ou manuia; faitau taitasi. Faitau ou manuia e tele; mai le Atua” (Viiga, nu. 151).¹⁶

Faatasi ai ma le agaga faafetai i o tatou loto, ia aua nei o tatou mafaufau i ni faafitauli laiti sa tatou oo i ai. Ae ia faitau o tatou faamanuiaga ma i se agaga sili o le loto faafetai, e faaosofia e se faatuatua maoae, ia tatou agai i luma e atinae le malo o le Atua i le lalolagi.¹⁷

Ia avea se agaga o le faafetai e taitaia ou ao ma po. Galue i ai. O le a e iloa ai o le a maua mai ai taunuuga matagofie.¹⁸

Ua tuuina mai e le talalelei a Iesu Keriso se pogai mo le fiafia.

Na fetalai le Alii: “O le mea lea, ia sii aʼe i luga lou loto ma olioli, ma pipii i feagaiga ua e faia” [MF&F 25:13]. Ou te talitonu o loo fetalai mai o ia ia i tatou taitoatasi, ia fiafia. O le talalelei o se mea e olioli ai. Ua tuuina mai ai ia i tatou se pogai mo le fiafia.¹⁹

Aua ne’i galo po o ai oe. … O oe lava o se atalii/afafine moni o le Atua. … O Ia o lou Tama e Faavavau. E alofa o Ia ia te oe. … E finagalo i Ona atalii ma afafine ina ia fiafia. E le’i avea lava le agasala ma fiafia. E le’i avea lava le solitulafono ma fiafia. E le’i avea lava le le usiusitai ma fiafia. O le ala o le fiafia o loo maua i le fuafuaga a lo tatou Tama oi le Lagi ma i le usiusitai i poloaiga a Lona Alo Pele, le Alii o Iesu Keriso.²⁰

E tusa lava po o le a lau auala na fai ai mea i le taimi ua tuanai, ou te tuuina atu ia te outou se lu’i … ia faaogatasi o outou olaga ma aoaoga o le talalelei, ia vaai atu i lenei Ekalesia ma le alofa ma le faaaloalo ma le talisapaia i le avea ai ma tina o lou faatuatua, ia ola i o outou olaga o se faataitaiga o le mea o le a faia e le talalelei a Iesu Keriso i le aumaia o le fiafia i se tagata.²¹

o le au Hinckley faatasi ma tamaiti laiti — “I le ola ai i le olaga atoa, ia tele ni mea malie ma taliega. O le olaga e tatau ona fiafia ai, ae le na o le onosaia.”

O le salamo o se tasi o uluai mataupu faavae o le talalelei. O le faamagalo atu o se uiga faaalia o le faavavau. O loo i ai le faamoemoe mo outou. O o outou olaga o loo i lumanai, ma e mafai ona faatumulia i le fiafia, e ui atonu ua pisia le taimi ua tuanai i le agasala. O le galuega lenei o le faaolataga ma le lagolagoina o tagata ma o latou faafitauli. O le faamoemoega lenei o le talalelei.²²

Ua ou feiloai i le toatele o tagata o e faasea i taimi uma e uiga i le mamafa o o latou tiutetauave. E sa’o lava e tele naua mea faigata. O loo tele, tele naua mea e tatau ona fai. O loo i ai avega tautupe e faaopoopo atu i nei mea mamafa uma, ma faatasi ai ma nei mea uma, atonu tatou te tigaina i faitioga, e masani lava i le aiga, ma le tele o le taimi e mai i le lautele. Ia sui le mea e te mafaufau i ai. O le talalelei o le tala fou fiafia. Ua i ai le tagata ina ia ona maua le olioli [tagai 2 Nifae 2:25]. Ia fiafia! Ia susulu atu le fiafia e ala i o outou foliga ma tautala atu e ala i a outou molimau. E mafai ona i ai faafitauli. Atonu e i ai taimi e oo mai ai mala. Peitai o le susulu atu i nei mea uma o le augani mai lea a le Alii:

“Ia outou o mai ia te au, outou uma o e tigaina ma mafatia i avega, o au foi e malolo ai outou.

“Ia outou amoina la’u amo, ma ia outou faaa’oa’o ia te au, aua o au lē agamalu ma le loto maulalo, ona maua lea e outou o le malologa mo outou agaga.

“Aua e avegofie la’u amo, o la’u avega foi e mama ia.” (Mataio 11:28–30.)

Ou te fiafia i upu nei a Jenkins Lloyd Jones lea sa ou otiina mai i se tusiga i le Deseret News i ni nai tausaga ua mavae. Ou te fia faasoa atu ia te outou. … Fai mai a ia:

“Soo se tasi lava e manatu o le fiafia atoatoa o se mea masani lea, o le a maumauina se taimi tele e tamo’e solo ai ma alaga ua vane faamalosi o ia.

“O le tele lava o polo e ta e le o i totonu o pu. O le tele lava o aano o manufasi e fefeu. O le tele lava o tamaiti e tutupu a’e ma avea o ni tagata masani. O le tele foi o faaipoipoga manuia e manaomia ai se tulaga maualuga o le onosai o itugalua. O le tele o galuega e masani lava ona faalemanaia nai lo o isi. …

“O le olaga e pei o se malaga i se nofoaafi i aso lava la—e faatuai, faalavelaveina, asu, pefu, aloiafia, ma tuuoso, na pau le mea e taape ai i nisi o taimi, o ni vaaiga matagofie ma le manaia o le alu saoasaoa.

“O le togafiti o le faafetai i le Alii mo le faatagaina o oe e te tietie.” (Deseret News, 12 Iuni 1973.)

Ou te toe faapea atu, o’u uso e ma tuafafine, o le togafiti o le faafetai i le Alii mo le faatagaina o oe e te tietie; o le mea moni, o se tietiega ina a manaia a ea? Ia fiafia i ai! Ata i ai! Pese e faatatau i ai! Manatua upu a le tusi tala o le Faataoto:

“O le loto fiafia e fai ma vailaau aoga lea: a o le loto faanoanoa e mamago ai ivi.” (Faataoto 17:22.)²³

Tau ina ia i ai se fiafiaga i lou olaga. Ia i ai ni mea malie ma fiafia, se aga malie, le malosi e ata ai i lea taimi ma lea taimi i mea e malie.²⁴

I le olaga atoa ia [outou] maua ni taimi fiafia ma ni taliega se tele. O le olaga e tatau ona fiafia, ae le na o le onosaia.²⁵

O le talalelei o se savali o le manumalo e tatau ona taliaina ma le naunautai, faapelepele, ma le talitonu o le a lelei mea uma.

Ou te tulai atu iinei i le aso, o se tagata e talitonu o le a lelei mea uma e faatatau i le galuega a le Alii. Ou te le talitonu ua faavaeina e le Atua lenei galuega i le lalolagi ina ia toilalo. Ou te le talitonu o faasolosolo vaivai atu. Ou te iloa o loo faasolosolo malosi lava. … E i ai lo’u faatuatua faatauvaa ma faamaoni e faapea, o le a manumalo le mea sa’o ma o le a silisili ona malosi le mea moni.²⁶

E ese lo’u fiafia i le tala ia Kalepo ma Iosua ma isi matavao o Isaraelu. Sa taitai atu e Mose le fanauga a Isaraelu i le vao. I le tausaga lona lua o le latou feofeoaiga, sa ia filifilia ai se sui mai ituaiga taitasi e sefululua e o atu e vaavaai ma suesue le laueleele o Kanana ma aumai se lipoti e uiga i ona punaoa ma ona tagata. O Kalepo sa fai ma sui o le ituaiga o Iuta, o Iosua o le ituaiga o Efaraima. Sa o atu le toasefululua o i latou i le laueleele o Kanana. Ma sa latou iloa ai e lafulemu. Sa latou o mo aso e fasefulu. Sa latou o mai ma aumai nisi o “vine e muai matutua” o le faamaoniga o le lafulemu o le laueleele (Num. 13:20).

Sa latou o mai ia Mose ma Arona ma le faapotopotoga atoa o le fanauga a Isaraelu ma latou fai mai e uiga i le laueleele o Kanana, “E moni foi ua tafe ai le suasusu ma le meli; o ona fua foi nei” (f. 27).

Ae peitai o le toasefulu o le au matavao, o e na afaina i lo latou lava masalosalo ma le matatau. Sa latou tuuina atu se lipoti le lelei e uiga i le aofai ma le malolosi o tagata sa Kanana. Sa latou faapea atu ai “e sili lo latou malosi i lo tatou” (f. 31). Sa latou faatusalia i latou i ni se e faatusa atu i sauai na latou vaaia i le nuu. Sa afaina lava i latou i lo latou lava palaaai.

Ona tutu atu lea o Iosua ma Kalepo i luma o le nuu ma faapea atu, “O le nuu na matou ui ai e asiasi ai, o le nuu e matua lelei tasi lava ia.

“Afai e finagalo alofa mai Ieova ia te i tatou, na te faaootia lava i tatou i lena nuu, ma foai mai ai ia te i tatou; o le nuu lava ua tafe ai le suasusu ma le meli.

“A e aua lava ne’i outou fouvale ia Ieova, ’aua foi tou te matatau i tagata o le nuu, aua e faia lava i latou ma mea e ai ma tatou: ua mavae lo latou mamalu ia te i latou, a o loo ia te i tatou Ieova: aua tou te matatau ia te i latou” (14:7–9).

Ae sa sili atu le mananao o tagata e talitonu i le au masalovale e toasefulu nai lo o le talitonu ia Kalepo ma Iosua.

Ona folafola mai lea e le Alii e faapea, o le a fesesea’i le fanauga a Isaraelu i le vao mo tausaga e fasefulu seiiloga e mavae atu le augatupulaga a i latou o e sa savavali i le masalosalo ma le matatau. O loo faamaumauina i tusitusiga paia e faapea, “o ia lava tagata na fai tala leaga i le nuu, ua oti lava i latou i le mala i luma o Ieova.

“A o Iosua … ma Kalepo … , na ola lava i laua ai ia tagata na o e asiasi i le nuu” (f. 37–38). Sa na’o i laua o lena vaega sa ola e tau mai i lena fasefulu tausaga o le fesesea’i, ma o e na i ai le avanoa e ulu atu ai i le nuu o le folafolaga e faatatau i mea na la’ua lipotia mai i se vaaiga lelei.

Ua tatou vaai i nisi o siomia i tatou o e e le popole e uiga i le lumanai o lenei galuega, o e fia ese, o e talanoa i mea e le mafai ona fai, o e faaalia le matatau, o e faaalu o latou taimi e elieli leaga ma tusitusi e uiga i mea ua latou manatu o vaivaiga ae o le mea moni e leai se taua. Faatasi ai ma masalosaloga e uiga i ona aso ua mavae, ua leai ai sa latou vaaiga mamao e uiga i lona lumanai.

E sa’olele lava le upu mai anamua, “A leai se faaaliga, e faasalalauina le nuu” (Faataoto 29:18). E leai se avanoa i lenei galuega mo i latou e na’o le talalelei o faafitauli ma le faanoanoa e talitonu i ai. O le talalelei o le tala fou fiafia. O se savali o le manumalo. O se faamoemoega e tatau ona taliaina ma le naunautai.

E le’i faapea mai lava le Alii o le a leai ni faafitauli. Ua masani o tatou tagata i puapuaga o soo se ituaiga, e pei ona faafetauia ai e i latou o e o loo tetee i lenei galuega. Peitai, na aliali mai le faatuatua i o latou faanoanoaga uma. O loo agai pea i luma i taimi uma lenei galuega, ma e le’i solomuli lava talu lona amataga mai. …

… O le galuega lenei a le Silisili Ese. Pe tatou te agai i luma o ni tagata taitoatasi pe leai, e faalagolago lava lea ia i tatou. Ae o le Ekalesia, o le a le solomuli lava le agai i luma. …

Ina ua ave atu e le Alii ia Mose ia te Ia lava, ona Ia fetalai atu ai lea ia Iosua, “Ia e faamalosi ma lototele, aua e te fefe, aua e te mata’u; aua o Ieova lou Atua o loo ia te oe i mea uma e te alu i ai” (Iosua 1:9). O Lana galuega lenei. Ia aua lava ne’i galo. Ia talia ma le naunautai ma le faapelepele.²⁷

Faatasi ai ma le malamalama o i tatou uma o fanau a le Atua, e mafai ona tatou tutu maualuga teisi atu, tulai maualuga teisi atu, ma ia lelei teisi atu.

O loo i ai se faiga masani faanoanoa i lo tatou lalolagi i aso nei, o le faalumaluma lea e le tasi tagata o le isi. Pe ua outou iloa ea, e le faigata lava i le faiai ona fai ni faamatalaga e mafai ona faamanualia ai le isi? Ia taumafai e fai le faafeagai o lena mea. Taumafai e tuu atu ni faamalo. …

O loo i ai foi i lo tatou lalolagi se faiga masani faanoanoa i le toatele o i tatou e ta’ufaatauvaa ai i tatou lava. O isi tagata e foliga mai ia i tatou, o loo latou lagona le mautinoa ia i latou lava, ae o le mea moni, o le toatele o i tatou o loo i ai nisi o lagona o le vaivai. O le mea taua ia aua ne’i e tauina ia te oe lava e uiga i ai. … O le mea taua lava ia tatou faia le mea sili i mea uma ua tatou maua.

Aua le maumauina lou taimi e te faanoanoa ai ia te oe lava. Aua e te tau’faatauvaaina oe lava. Ia aua lava ne’i galo o oe o se atalii po o se afafine o le Atua. O loo i ai sou tofi paia. O loo i ai se mea moni o le natura o le Atua i totonu ia te oe.²⁸

Tatou te pepese, “O Le Atua Lo’u Tama” (Viiga, nu. 184). O lena mea e le na’o se mea e tupu fua, se manatu tupu fua—o lena mea o le upumoni ola. O loo i ai se mea paia i totonu o i tatou taitoatasi lea e manaomia ona faafailele, lea e manaomia ona aliali a’e, lea e manaomia ona ta’u atu. O outou tama ma tina, aoao a outou fanau o i latou, i se ala moni lava, o atalii ma afafine o le Atua. E leai se isi upumoni sili atu i le lalolagi atoa nai lo o le—mafaufau o loo i ai i totonu ia i tatou se mea paia.²⁹

Talitonu ia te oe lava. Talitonu i lou mafai ona e faia ni mea maoae ma lelei. Talitonu e leai se mauga e maualuga tele e le mafai ona e a’ea. Talitonu e leai se afa e malosi atu e le mafai ona e talitalia. … O oe o se atalii/afafine o le Atua, e le gata mai mea e te gafatia.³⁰

Ia tu maualuga teisi atu, tulai maualuga teisi atu, ma ia lelei teisi atu. Ia fai se taumafaiga faaopoopo. O le a e fiafia atili ai. O le a e iloa ai se lotomalie fou, se fiafiaga fou i lou loto.³¹

Oi ioe, o le a i ai ni faafitauli i le ala. O le a i ai mea faigata e faatoilalo. Ae o le a le tumau ai e faavavau. O le a le tuuaunoaina lava oe e le [Atua]. …

Vaai i le itu lelei. Ia [e] iloa o loo Ia leoleo mai ia te oe, o loo Ia faafofoga mai i au talosaga ma o le a tali mai i ai, e alofa o Ia ia te oe ma o le a [Ia] faaalia mai lena alofa.³²

E anoanoa’i le tele o mea lelei ma mananaia ma matagofie e galulue ai. O i tatou o tagata auai o le talalelei a Iesu Keriso. O le talalelei o lona uiga o le “tala fiafia!” O le savali a le Alii o le savali o le faamoemoe ma le faaolataga! O le siufofoga o le alii o se siufofoga o le tala e olioli ai! O le galuega a le Alii o se galuega o ausiga ofoofogia!

I se taimi faanoanoa ma le faigata, na fetalai atu ai le Alii ia i latou o e sa ia alofaina: “Aua le atuatuvale o outou loto, aua foi tou te matatau.” (Ioane 14:27.)

O nei tuleiga maoae o le lototoa o se sulu lea ia i tatou taitoatasi. Ia i ai moni lo tatou faatuatua ia te ia. Aua o le a le sese lava o ia ma ana folafolaga.³³

Fautuaga mo Suesuega ma le Aoaoina Atu

Fesili

Mafaufau i le fautuaga a Peresitene Hinckley ia “vaavaai loloto atu” mo le lelei ma ia “atinae se uiga faaalia o le fiafia [ma] se agaga o le talitonu o le a lelei mea uma” (vaega 1). Aiesa tatou te manaomia ai lenei fautuaga i aso nei? E mafai faapefea ona tatou atinae se uiga faaalia o le fiafia?
Na saunoa Peresitene Hinckley, e maua mai “taunuuga matagofie” pe a tatou “faataga se agaga o le loto faafetai e taitaia [i tatou]” (vaega 2). Aisea e te manatu e oo mai ai nei “taunuuga matagofie”? O a ni auala e faamanuiaina ai oe pe a e maua le agaga o le loto faafetai?
O a ni ou manatu e uiga i le tala faatatau o le olaga “e pei o se malaga i se nofoaafi i aso lava la”? (Tagai vaega 3.) E mafai faapefea e le “tala fiafia” o le talalelei ona aafia ai le ala e te taulimaina ai lena malaga?
O a ni auala e te manatu e faatatau ai le tala ia Kalepo ma Iosua i o tatou olaga? (Tagai vaega 4.) O a ni faataitaiga ua e vaai o ni tagata ua taliaina ma le naunautai le talalelei? Afai tatou te oo i ni lagona o le lotovaivai, e mafai faapefea ona tatou toe maua lo tatou talitonuga o le a lelei mea uma? O a ni aafiaga ua faateleina ai lou talitonu o le a lelei mea uma e faatatau i le galuega a le Alii?
Aisea e te manatu ai, o loo i ai se faiga masani o le taufaatauvaaina o isi ma i tatou lava? E mafai faapefea ona tatou faatoilaloina lenei faiga? O a ni mea e mafai ona tatou faia, o ni tagata taitoatasi ma aiga, e fesoasoani ai i isi ia “tutu maualuga teisi atu” ma “tulai maualuga teisi atu”? (Tagai vaega 5.)

Mau Fesootai

Ioane 16:33; Filipi 4:13; Mosaea 2:41; Alema 34:38; Eteru 12:4; MF&F 19:38–39; 128:19–23

Fesoasoani mo Suesuega

“O le faatinoina o mea ua e aoaoina o le a maua mai ai se malamalama faaopoopo lelei (tagai Ioane 7:17)” (Tala’i La’u Talalelei [2004], 19). Mafaufau e te fesili ifo ia te oe lava pe mafai faapefea ona e faaaogaina i le fale, i le galuega, ma ou tiutetauave faale-Ekalesia.