Mataupu 17

Faaauau i le Faagasologa Sili o le Aoaoina

“E tatau ona faaauau pea ona tatou tuputupu ae. E tatau ona faaauau pea ona tatou aoao. O se poloaiga ua tuuina mai le lagi ina ia tatou faaauau pea ona faaopoopo atu mea i lo tatou malamalama.”

Mai le Soifuaga o Gordon B. Hinckley

“Ou te fiafia e aoao,” sa saunoa ai Peresitene Gordon B. Hinckley. “Ou te fiafia i soo se avanoa e maua ai le malamalama. O le mea moni, ou te talitonu ma lagolagoina malosi, i lou olaga atoa, le sailiga mo le aotauina—mo au lava ia ma mo isi foi. … I lou lava ia manatu, o le aoaoina o se mataupu o le faatinoga faaletino ma faaleagaga.”¹

Sa maofa lava e na auauna faatasi ma Peresitene Hinckley i tofiga faaleautaitai i le Ekalesia i lana meaalofa o le faatupulaia o le malamalama ma faaaoga i lana galuega. Na matauina e Elder Robert D. Hales o le Korama a Aposetolo e Toasefululua e faapea: “Ou te lei feiloai muamua lava i se tagata e mafai ona matua atamai e ala i le faitau ma ala i fesootaiga ma tagata. A ia faaaluina se afiafi i se taumafataga ma se tasi, e alu ese atu o ia ua ia iloaina se mea e uiga i tomai o lena tagata.” Na saunoa mai foi Elder Neal A. Maxwell o le Korama a Aposetolo e Toasefululua: “O le mea e tulagaese ai Peresitene Hinckley o lona manatuaina lea o mea na te faitauina ma taofimau i mea na te finagalo e faatumauina. O lona atamai o se atamai aoaotetele. E mafai ona ia utuvai i mea ua ia iloaina e faia ai ni faaiuga atamai.”²

I ana taumafaiga i le olaga atoa e aoao ma faaleleia o ia lava, na mulimuli ai Peresitene Hinckley i le faataitaiga a ona matua. Sa ia faamatalaina le tala lenei i le auala na tuuto atu ai lona tama, o Bryant S. Hinckley i le aoaoina:

“Ina ua pei lona matua o lou matua lea ua i ai i le taimi nei, sa litaea o ia. Ae sa malosi lava o ia. Sa nofo o ia i se fale faatauvaa ae sa toafilemu i se nofoaga maotua. Sa siomia o ia i se fanua o fualaau aina suamalie ma sa fiafia e tufatufa atu fua [i isi]. O lona tuafale sa i ai se fanua taalaelae ma pupulaau ma laau. Sa i ai se pa maa pe tusa ma le lua futu le maualuga na tuueseese ai le tasi vaega mai le isi vaega. Soo se taimi lava na lelei ai le tau, e nofo ai lava o ia i luga o le pa, ma sona pulou tuai i lona ulu e faamalumalu ai ona mata mai le vevela o le la. A matou o e asi o ia, ou te nofo i ona talaane. I sina uunaiga teisi na te talatalanoa mai ai i lona olaga. …

“Sa avea o ia ma se faiaoga. Sa avea foi o ia ma se tagata faipisinisi faamanuiaina. Sa pulefaamalumalu o ia i se siteki sa sili ona tele i le Ekalesia e silia ma le 15,000 tagata. Sa auauna atu o ia o se peresitene o se misiona ma le tele o isi tulaga. Ma o lea ua litaea nei o ia, ma nofonofo i luga o le aupa. O ia foi o se tagata sa sili ona faitau tusi faatasi ai ma se potutusi matagofie. Sa avea o ia ma se failauga ma se tusitala lelei tele. E toetoe lava a oo i le taimi na maliu ai, toeitiiti lava atoa lona 94 tausaga, sa faitautusi lava ma tusitusi ma manatunatu i mea ua ia iloa.

“Sa ou iloaina o na taimi sa nofonofo ai i luga o le pa, i le tele o itula o ia taimi taitasi [e nofonofo ai] i se aso mafanafana, na te manatunatu lava i mea sa ia faitauina mai lana potutusi.

“Ou te manatu na toeaina lava o ia ma le alofatunoa ma le ofoofogia. Sa ia te ia ni tusi na i ai ni oa taua sa i ai i manatu o alii ma tamaitai maoae o vaitausaga uma o le olaga. Sa lei tuua lava lona aoao, ma a o ia nofonofo ai i luga o le pa sa ia mafaufau loloto lava i mea sa ia faitauina i le po na muamua atu. …

“… Aisea ua ou faamatalaina atu ai ia te outou se toeaina matua ma le pa sa nofonofo ai i luga? Ua ou faamatalaina atu ia te outou ona ou te manatu o loo i ai se lesona mo i tatou taitoatasi. E le tatau lava ona tatou tuua le aoaoina. Tatou te talitonu i le alualu i luma e faavavau ma o lenei olaga o se vaega o le faavavau ina ia ola ai ma le manuia seia oo i le iuga.”³

tamaitai talavou o loo faitauina ia tusitusiga paia — “Saili i le aoaoina, e ala lava lea i le suesue ma le faatuatua foi” (MF&F 88:118).

Aoaoga a Gordon B. Hinckley

E finagalo le Alii ia tatou aoao i tatou lava ina ia mafai ai ona tatou alualu i luma faaletagata lava ia ma saofaga atu i le malo.

Tou te auai i se ekalesia e aoao ai le taua o le aotauina. Ua ia te outou se poloaiga mai le Alii ina ia aoaoina o outou mafaufau ma o outou loto ma o outou lima. Ua fetalai mai le Alii, “Ia outou aoao atu ma le filiga … mea o i le lagi ma o i le lalolagi, ma o i lalo o le lalolagi; o mea sa i ai, o mea o i ai, o mea ua vave ona oo mai; o mea o loo i le atunuu, o mea o i isi atunuu; o taua ma faafatiatamaʼiga o atunuu, ma faamasinoga o loo i luga o le laueleele; ma se malamalama foi i atunuu ma malo—ina ia mafai ona outou saunia i mea uma” (MF&F 88:78–80).⁴

O i tatou i lenei Ekalesia, ua tuuina mai i ai se folafolaga ofoofogia e le Alii. Na Ia fetalai mai: “O le mea e mai i le Atua o le malamalama lea; ma o ia o lē e mauaina le malamalama, ma tumau pea i le Atua, e mauaina le malamalama atili; ma o lena malamalama o le a tupu susulu malamalama tele pea lava pea seia oo i le aso e atoatoa ai” (MF&F 50:24).

E maeu lea faamatalaga matagofie. O se tasi lea o fuaiupu e sili ona ou fiafia i ai i tusitusiga paia. O loo talanoa i le tuputupu ae, o le atinaega, o le savaliga e taitai atu i luma i le faaleatua. E o gatasi ma nei tautinoga tetele: “O le mamalu o le Atua o le atamai lea, po o, i ni isi upu, o le malamalama ma le upumoni” (MF&F 93:36); “Afai e maua e se tagata le poto ma le tomai sili atu i le olaga lenei i lo se isi tagata e ala i lona filiga ma le usiusitai, o le a maua e ia le avanoa tele atu i le lalolagi a sau” (MF&F 130:19). …

O se lui taua tele lea o loo maua i nei fetalaiga ofoofogia. E tatau ona tatou faaauau pea ona tuputupu ae. E tatau ona tatou faaauau pea ona aoao. O se poloaiga ua tuuina mai le lagi ia tatou faaauau pea ona faaopoopo atu mea i lo tatou malamalama. …

… Na fetalai mai le Alii ia te oe ma au: “Ia outou saili mai totonu o tusi sili ona lelei upu o le poto; saili i le aoaoina, e ala lava lea i le suesue ma le faatuatua foi. … Ia outou faatulaga tatau outou lava. … Tuu le faapaie” (MF&F 88:118–119, 124).⁵

E finagalo le Alii ia outou aoaoina o outou mafaufau ma lima, po o le a lava le matata ua e filifilia. Pe o le lipeaina o pusaaisa, po o se galuega a se fomai tipitipi atamai, e tatau lava ona outou aoaoina outou lava. Saili mo avanoa silisili e aoga ai. Ia avea ma se tagata galue o le amiosao i le lalolagi o loo taoto i o outou luma. … O le a e aumaia le mamalu i le Ekalesia ma o le a faamanuiaina ma le agaalofa oe ona o lena aoaoga.

O le a le masalosalo lava, leai ma se isi lava mea, o le a tauia le aotauina. Aua nei faia ni auala alo i o outou olaga. Afai e te faia lea mea, o le a e totogia pea lava pea le tau.⁶

E le lava le tau na ona ola, tau na ona sao mai lea aso i lea aso. O le tiute mo i tatou taitoatasi le faatotogaina o i tatou lava ia faia se mea taua i le malo—ia maua atili pea le malamalama, ina ia mafai e lo tatou malamalama faaletagata lava ia ona fesoasoani e faamalamalamaina se lalolagi pogisa. Ma e mafai lenei mea e ala i le aoaoina, e ala i le aotauina o i tatou lava, e ala i le alualu i luma ma le tuputupu ae uma i le mafaufau ma le agaga.⁷

se tamaitai o loo faitau atu i se tamaitiiti — “Amata vave i le faalauiloa atu o tusi i tamaiti.”

Faatasi ai ma fuafuaga ma le loto-pulea, e mafai ai e matua ona fatuina se siosiomaga o le aoaoina i o latou aiga.

O se mea mataina ma le ofoofogia le vaaia o ni mafaufau talavou o faalauteleina ma faamalosia. O au o se tasi e talisapaia tele le gafatia lautele o televise mo le lelei. Ae o au foi o se tagata e faitioina le soona faamaumauina o le taimi ma avanoa pe a maimoaina e le fanau i nisi o aiga ia TV, i le tele o itula, lea ua le faamalamalamaina ai pe faamalosia ai.

A o ou laitiiti sa matou nonofo i se fale tuai tele lava. O le tasi potu sa faaigoa o le potutusi. Sa i ai se laulau malo ma se moli lelei, tolu i le fa nofoa lelei faatasi ma se moli lelei, ma ni tusi i totonu o pusa na faalaina i le puipui. Sa tele ni voluma—o mea na faaputuputu e lou tama ma lou tina i se vaitau o le tele o tausaga.

Sa lei faamalosia lava i matou e faitau, ae sa tuu i le mea sa faigofie ona tau i ai ma le mea sa mafai ona matou mauaina ai i soo se taimi matou te mananao i ai.

Sa i ai le filemu i lena potu. Sa malamalama lelei o se nofoaga lena e suesue ai.

Sa i ai foi ni mekasini—o mekasini a le Ekalesia ma isi mekasini lelei pe lua pe tolu. Sa i ai ni tusi o talafaasolopito ma tusi aoga, tusi e uiga i mataupu faatekinolosi, o lomifefiloi, se seti o tusi o faamatalaga eseese (encyclopaedia), ma se faafanua o le lalolagi. Ae sa leai se televise i lena taimi. Sa oo mai le leitio a o ou tuputupu ae. Ae sa i ai se siosiomaga, se siosiomaga o le aoaoina. E le mafai ona ou faatalitonuina outou o i matou o ni tagata atamamai tele. Ae sa matou mauaina aoaoga sili i le faitautusi ma le tusitusi, manatu maoae mai tagata mafaufau maoae, atoa ai ma le gagana a alii ma tamaitai sa mafaufau loloto ma tusitusi ma le matagofie.

I le tele o o tatou aiga i aso nei e le o toe i ai se avanoa mo sea potutusi. O le tele o aiga ua noatia mo se avanoa. Ae a fuafuaina e mafai lava ona i ai se tulimanu, e mafai ona i ai se vaega e mafai ona avea ma se mea e lafi ai mai le pisapisao i o tatou talaane, se mea e mafai ona tatou nofonofo ai ma faitau ma mafaufau. O se mea matagofie le i ai o se kesi po o se laulau, e matua faatauvaa lava, lea e maua ai i luga ia tusitusiga faavae o le Ekalesia, ni nai tusi lelei, ni mekasini a le Ekalesia, ma isi mea e agavaa mo lo tatou faitauina.

Ia vave amata ona faalauiloa atu tusi i tamaiti. O le tina e le faitau i lana fanau laiti na te faia se faatinoga faatiga ia i latou ma se faatinoga faatiga ia te ia lava. E manaomia ai le taimi, ioe, tele o le taimi. E manaomia ai le loto-pulea. E manaomia ai le faatulagaina ma le paketiina o minute ma itula o le aso. Ae o le a le ’iva lava pe a e vaavaai atu i mafaufau talavou ua iloaina uiga o tagata, faaupuga, ma manatu. O se faitauga lelei e mafai ona avea ma se mataupu o le alofa, e sili atu ona fua tele mai i aafiaga mo se taimi umi nai lo le tele o isi mau gaoioiga o loo faaalu ai e fanau o latou taimi. …

Matua, … ia faailoa atu i lau fanau ia mafaufau maoae, manatu maoae, upumoni faavavau, ma mea na o le a fausia ai ma uunaia ai mo le lelei. … Taumafai ia fatufatuai i totonu o lou aiga se siosiomaga o le aoaoina ma le tuputupu ae lea o le a tupu mai ai.⁸

E tatalaina e le aotauina le faitotoa o avanoa mo le autalavou ma talavou matutua.

O le aso sili lenei o avanoa mo outou le autalavou, lenei taimi ofoofogia e i ai ai i luga o le lalolagi. O loo outou tutu i le tumutumu o tausaga uma ua tuanai. Ua outou mauaina mea uma tau le aoaoina o tagata uma na soifua i lenei lalolagi, o lena aoaoina ua tuufaatasia i ni kosi ia ua mafai ai ona e mauaina le malamalama i se taimi puupuu, o lena malamalama sa faafaigata lava ona aoaoina e tagata i auga seneturi uma ua mavae. Aua ne’i faama’umauina outou lava. Aua ne’i misia lo outou avanoa sili. Ia oo i ai, ia galueaiina, suesue malosi.⁹

E matua taua tele le mauaina e outou alii talavou ma tamaitai talavou le a’otauina uma e mafai ona outou mauaina. … O le a’otauina o le ki lea o le a tatalaina ai le faitotoa o avanoa mo oe. E tauia le ositaulaga ai. E tauia le galue i ai, ma afai e te a’otauina lou mafaufau ma ou lima, o le a e mafai ona faia se saofaga i le malo o loo e avea ai ma sona vaega, ma o le a mafai ai ona atagia atu ma le mamalu ia te oe le Ekalesia lea o loo avea ai oe ma ona sui. Ou uso e ma tuafafine talavou, ia faaaoga ia avanoa uma faaleaoaoga e mafai ona e gafataulimaina, ma ia te outou tama ma tina, ia uunai o outou atalii ma afafine ia maua le a’otauina lea o le a faamanuiaina ai o latou olaga.¹⁰

Masalo e te le mauaina ni tupe ina ia maua ai le atamai uma e te manaomia. Ia faaaoga lau tupe i le mea e gata mai ai lou mafai, ma faaaoga ni avanoa sikolasipi, tupe faameaalofa, ma nonogatupe e te gafatia ona toe totogiina.¹¹

Ou te le popole po o le a le matata e te manao i ai, pau lava le mea o se matata mamalu. O se enisinia taavale, lei piliki, se palama, se fai eletise, se fomai, se loia, se faatauoloa, ae le o se gaoi. Ae po o le a lava lau matata, faaaoga le avanoa e aoao ai ma ia matua faaaoga tatau lena avanoa. O le a tauia oe e le malo e tusa ma lou taua pe a ia vaaia lena taua. O le aso nei o le aso tele lea o sauniuniga mo outou taitoatasi. Afai o lona uiga o le ositaulaga, ona ositaulaga lea. O lena taulaga o le a avea ma saofaga aupito silisili tou te faia, aua o le a outou seleseleina mai ai fua i aso uma o o outou olaga.¹²

Ou te uunaia outou tamaitai talavou taitoatasi ina ia maua uma le atamai e mafai ona outou mauaina. O le a outou manaomiaina mo le lalolagi lea o le a outou femalagaai ai. Ua matua faateleina le faatautava o le olaga. … O loo fesuisuiai pea le lalolagi, ma e matua taua tele lo tatou faatotogaina o i tatou lava ia o faatasi ma lena suiga. Ae o loo i ai se itu matagofie i nei mea uma. E leai se isi lava tupulaga i le talafaasolopito atoa na ofoina atu i tamaitai le tele o avanoa [i lo lenei tupulaga]. E tatau ona avea se faaipoipoga fiafia ma au sini faamoemoeina muamua lava, faamau i le malumalu o le Alii, ma sosoo ai ma le tausiaina o se aiga lelei. E mafai e le a’otauina ona faatotogaina lelei atili oe mo le faatinoina o na mea lelei.¹³

E anoanoai tiutetauave mo tamaitai i le Ekalesia faapea ai foi i totonu o nuu ia e tutusa ma ogatusa atoa ma le faaipoipoga, tulaga faatina, ma le tausiaina o ni fanau lelei ma malolosi.¹⁴

O le fuataga atoa lava o galuega faaletagata soifua ua talala atu nei i tamaitai. E leai ma se mea e le mafai ona e faia pe afai o le a tuu tonu i ai lou mafaufau. E mafai ona e faaaofia ai i au miti o le tamaitai e te fia avea ai se ata o se tamaitai ua agavaa e auauna atu i le malo ma faia se saofaga iloga i le lalolagi lea o le a avea ai o ia ma se vaega.¹⁵

Ou te faafetai ua gafatia e tamaitai i nei aso le avanoa lava e tasi [e pei ona maua e alii] e suesue ai mo mea faasaienisi, mo galuega faalematata, ma mo isi uma vaega o le malamalama faaletagata soifua. Ua tutusa lava la outou aia ma le aia a alii i le Agaga o Keriso, lea e faamalamalamaina ai alii ma tamaitai uma e omai i le lalolagi. (Tagai i le MF&F 84:46.) Ia seti mea e te faamuamuaina i tuutuuga o faaipoipoga ma aiga, ae ia tulitulimatagauina foi polokalama faaleaoaoga ia o le a taitai atu ai i le faamalieina i le galue ma galuega uluuluola pe a faapea e te le o faaipoipo, po o se lagona o le saogalemu ma le faamalieina i le taimi ua e faaipoipo ai.¹⁶

[Alii talavou], o loo outou fetaiai ma luitau maoae o loo i luma atu. O loo outou agai atu i se lalolagi o le vevela o le fia faatautava. E tatau ona e maua a’otauina uma e te mafaia. Ua faatonuina i tatou e le Alii e uiga i le taua o le a’otauina. O le a faaagavaaina ai oe mo avanoa sili atu. O le a faaauupegaina ai oe e fai se mea aoga i le lalolagi tele o avanoa o loo taooto mai i luma atu. Afai e mafai ona e alu i le kolisi ma o ou moomooga na, ona fai lea. Afai e te le manao e aoga i le kolisi, ona alu lea i se aoga o matata eseese pe faapisinisi e faama’ai ai ou tomai ma faateleina ai lou gafatia” (“Converts and Young Men,” Ensign, May 1997, 49–50).¹⁷

Ou te faamoemoe ia te outou [le autalavou] o le a outou tepa taulai atu i avanoa faaleaoaoga ua outou maua o se faamanuiaga sili. Ou te iloa o se mea fita. Ou te iloa e faigata. Ou te iloa e i ai taimi e faalotovaivaia ai outou. Ou te iloa tou te tuufesilisili lava pe aisea tou te faia ai i nisi taimi. Ae ia faaauau pea, faaauau pea ona tuleia ese, ma faaauau pea ona aoao. O le a e le salamo ai lava po o le a lava le umi e te ola ai ae o le a e faitauina o se faamanuiaga tele.¹⁸

O le aoaoina o le agaga e tutusa lava le taua, pe afai e le sili atu, ma le aoaoina o le mafaufau.

Ou te maofa lava i malosiaga maoae o le malamalama ua iloaina i o tatou taimi. E lei i ai ma se taimi muamua ua matua toatele ai tagata ua a’otauina i le aoaoina o le lalolagi. O se mea mamana tele—o le aoaoina tele o se pasene tele o le autalavou o le lalolagi, o e feiloai i aso uma ma faiaoga e aoao mai le malamalama mai tagata o vaitausaga uma.

O le lautele o lena malamalama e ofoofogia tele. Ua aofia ai fetu o le atulaulau, o le faataatiaga o le lalolagi, o le talafaasolopito o malo, o aganuu ma gagana a tagata, o le faagaoioiga o malo, o tulafono o fefaatauaiga, o amioga a vaegamea faasaienisi (atom), o aoga o le tino, ma mea ofoofogia o le mafaufau.

I le anoanoai ai o le malamalama o loo maua, e manatu ai se tasi ua latalata atu lava le lalolagi i se tulaga o le atoatoa. Ae o loo tatou iloa pea le isi itu o le tupe siliva—o gasegase o malo, o fefinauaiga ma faafitauli ia e aumaia le faanoanoa i olaga o le faitau miliona o tagata.

O aso taitasi o loo faateleina ai pea lo tatou iloaina o le mea moni e faapea, o le olaga e sili atu nai lo le saienisi ma matematika, e sili atu i lo le talafaasolopito ma le iloa faitautusi ma tusitusi. O loo i ai se isi manaoga mo le a’otauina, a aunoa ma lea, o le aano o le aoaoina o le potosalalau e mafai ona taitai atu i le faafanoga. Ou te faasino atu i le a’otauina o le loto, o le mafaufau fuatiaifo, o le uiga faaletagata, o le agaga—o nei vaaiga le mafaamatalaina o o tatou uiga faaletagata lea e iloa ai ma le mautinoa tele o tatou ituaiga o tagata ma mea tatou te faia i a tatou fegalegaleaiga o le tasi ma le isi.

… A o auauna ai i Egelani o se faifeautalai, sa ou alu atu ai i le YMCA i London Central. Ou te manatu o lena fale tuai ua leva ona le toe i ai, ae e le mafai lava ona galo ia te au upu na faasaga mai i tagata asiasi i le faapaologa i taimi taitasi latou te ulufale atu ai. O na upu o upu a Solomona: “O mea uma e te maua ia maua mai ai le [malamalama].” (Faata. 4:7.)

Malamalama i le a? Malamalama ia i tatou lava, e uiga i faamoemoega o le olaga, e uiga i lo tatou sootaga ma le Atua, lo tatou Tama, e uiga i mataupu faavae silisili ua tuuina mai le lagi lea ua tele seneturi o maua ai le malosiaga o le alualu i luma moni lava o le tagata! …

A o tatou tulitulimatagauina a tatou suesuega o le poto salalau, sei o tatou faaopoopo atu foi i o tatou olaga le faafailelega a le Agaga. Afai tatou te faia lea mea, o le a faamanuiaina i tatou e le Atua i lena filemu ma na faamanuiaga ia e na o Ia e sau mai ai.¹⁹

Iesu Keriso — “I a tatou suesuega uma lava, e manaomia ona tatou sailia le malamalama o le Matai.”

Sa fetalai mai Iesu: “Ia outou faaaoao ia te A’u. … Aua e avegofie la’u amo, o la’u avega foi e māmā ia.” (Mata. 11:29–30.)

E tatau foi ona ou fautua atu ina ia tatou mulimuli i lena poloaiga na tuuina mai e le Alo o le Atua. I a tatou aoaoga uma lava, ia tatou aoao foi e uiga ia te ia. I a tatou suesuega uma lava, e manaomia ona tatou saili i le malamalama o le Matai. O lena malamalama o le a o faatasi i se ala matagofie ma lo tatou aoaoga faalepoto salalau ma o le a tatou maua ai se uiga faaletagata ma se atoaga o le olaga lea e leai se isi lava auala e mafai ona oo mai ai.²⁰

Ou te luiina outou ina ia le galo lava, o le aoaoina o le agaga e tutusa lava le taua, pe afai e le sili atu, nai lo le aoaoina o le mafaufau.²¹

O loo agai i luma la tatou polokalama maoae o aoga a le Ekalesia. O le galuega o le aoaoina o tamaiti aoga e ala i polokalama a le seminare ma le inisitituti o loo faalauteleina pea. … O outou ia sa mauaina lenei polokalama ua outou silafiaina lona taua tele. Matou te uunaia outou uma o loo avanoa i ai lenei polokalama ina ia faaaogaina. Matou te le faatuai lava e folafola atu e faapea ,o le a faateleina lo outou malamalama o le talalelei, o le a faamalosia lo outou faatuatua, ma o le a outou atiaeina ni fegalegaleaiga matagofie.²²

Sei o tatou tauaveina i o tatou luga le suafa o le Alii ona tatou o atu lea i luma ma le faatuatua e faasoa atu ma le fitoitonu mea na o le a aafia ai olaga o tagata ma aumaia ai le filemu ma le olioli i le lalolagi. Ua manaomia e le lalolagi se augatupulaga o alii ma tamaitai o aoaoga ma aafiaga o e e mafai ma o le a tutu atu ma le faamaoni ma e aunoa ma le faapiopio e tautino atu o loo soifua le Atua ma o Iesu o le Keriso.²³

E le afaina po o le a le matua tatou te oo i ai, tatou te mafai lava ona mauaina le malamalama, ao mai le poto, ma faaauau pea ona tuputupu ae.

O se mea ofoofogia tele le aoaoina, o le faagasologa lea e aoteleina ai ma faaleleiina le malamalama faatupulaia o augaseneturi ina ia mafai ai i se vaitau puupuu ona tatou aoaoina mea sa na o faatinoga uumi o sailiiliga ma suesuega ma measese na muai aoaoina ai.

O le a’otauina o le faagasologa sili lea o le liuaina lea e oo ai ina avea le malamalama ua maua ma se gaoioiga aoga ma uluola. O se mea e le manaomia ona tuu. E tusa lava po o le a lo tatou matutua e oo i ai, e mafai lava ona maua le malamalama ma faaaoga. E mafai ona tatou aoina le poto ma manuia mai ai. E mafai ona faafiafiaina i tatou e ala i le vavega o le faitautusi ma le mauaina o faatufugaga ma faaopoopo atu i le faamanuiaga ma le faamalieina o le soifuaga. O le faateleina lava o lo’u matua, o le faateleina foi lena o lo’u fiafia i upu a tusitala mafaufau, o e anamua ma onapo nei, atoa ai ma le ’oa taua o mea latou te tusiaina.²⁴

E leai ma se tasi o i tatou … ua lava le iloa. O le faagasologa o le aoaoina o se faagasologa e le muta. E tatau lava ona tatou faitau, e tatau ona tatou matau, e tatau ona tatou malamalama atoatoa i ai, ma e tatau ona tatou mafaufau loloto i mea tatou te mafaufau i ai. … Ou te talitonu i le faaleleia o se mea. Ou te talitonu i le tuputupu ae. …

Ia faaauau pea ona tuputupu ae, ou uso e ma tuafafine, tusa lava pe tolusefulu pe fitusefulu ou tausaga. O lou maelega i le faia o lea mea o le a mafua ai le televave atu o tausaga nai lo le mea e te ono moomoo i ai, ae o le a faatumulia na tausaga i se naunautaiga matagofie ma suamalie lea o le a faaopoopo ai se tofo i lou olaga ma se mana i lou aoao atu.²⁵

I le itu tonu i sasae o le [Iunivesite o Polika Iaga i Provo, Iuta] o loo i ai se mauga. Ou te talitonu [o le toatele] na tepa atu i luga i lena mauga ma mafaufau, “E pe ana mafai lava ona tau ina ou a’ea le tumutumu o le a mata’ina le vaaia o vanu i loo i le isi itu.” Ae o outou na a’ea [le mauga] ua iloaina o na vanu ua na o se faanoanoaga itiiti ma papa’u, ma o tala atu e tele isi mau mauga maualuluga atu ina ia a’ea.

O lea ou te faamoemoe ai o le a outou faapena foi. … O le a outou iloaina e ui [atonu] e maoae sou aafiaga faaleaoaoga, ae o loo i ai ni avanoa ma ni luitau tetele atu o loo i luma atu. E faaopoopo atu i lou faleteuoloa o faamatalaga, ia faateleina lou malamalama, faaauau pea le faagasologa sili o le aoaoaina.²⁶

Fautuaga mo Suesuega ma le Aoaoina Atu

Fesili

Aisea e taua ai le “saga mauaina atili o le malamalama” e ala i le a’otauina? (Tagai vaega 1.) E mafai faapefea e le aoaoina ona fesoasoani ia i tatou ia alualu ai i luma le tagata lava ia? E mafai faapefea e le aoaoina ona fesoasoani ia i tatou ia “faamalamalamaina se lalolagi pogisa”?
Iloilo le tala a Peresitene Hinckley i le auala sa fatufatuai ai e ona matua se siosiomaga o le aoaoina i lo latou aiga (tagai vaega 2). E mafai faapefea ona tatou fesoasoani i fanau ia atiae se fiafia e aoao? E mafai faapefea ona tatou fesoasoani i fanau ia mananao e saili i le aoaoina mai punaoa e faamalamalama ma faaosofia ai mo le lelei?
E faapefea e le a’otauina ona “talaia faitotoa i avanoa” mo le autalavou ma talavou matutua? (Tagai vaega 3). E mafai faapefea e le autalavou ma talavou matutua ona avea ma punaoa i le faaaogaina o avanoa mo le a’otauina?
E faapefea ona e faamatalaina le uiga o le fasifuaitau “o le aoaoina o le agaga”? (Tagai vaega 4.) E mafai faapefea ona tatou aoaoina le loto, uiga faaletagata, ma le agaga? I lou olaga, o faapefea e le aoaoina faaleagaga ma le aoaoina faalepoto salalau ona faaatoatoaina le tasi ma le isi?
Aisea e tatau ai ona faaauau pea ona tatou aoao i o tatou olaga atoa? (Tagai vaega 5.) E mafai faapefea ona tatou faatumauina i le olaga atoa se fiafia e aoao? O le a se mea na e aoaoina talu ai nei lea e matua taua faapitoa ia te oe?

Mau Fesootai

Faataoto 1:5; 2 Peteru 1:1–8; 2 Nifae 9:28–29; 28:29–30; MF&F 6:7; 90:15; 131:6; 136:32–33

Fesoasoani mo le Aoaoina Atu

O se tasi o manatu e uunaia ai le talanoaga e uiga i aoaoga a Peresitene Hinckley o le fesili atu lea i tagata auai ia faasoa mai mea na latou aoaoina mai i a latou suesuega faaletagata lava ia o le mataupu (tagai itulau vii-viii i lenei tusi mo nisi manatu faaopoopo).