Mataupu 23
O Faamanuiaga o le Malumalu Paia
“O sauniga o le malumalu ua avea ma faamanuiaga aupito maualuga e ofoina atu e le Ekalesia.”
Mai le Soifuaga o Gordon B. Hinckley
Na saunoa mai Peresitene Gordon B. Hinckley i le sauniga perisitua o le konafesi aoao ia Oketopa 1997, “Ou te talitonu e leai se tagata o le Ekalesia ua mauaina le mea aupito maualuga ua ofoina atu e lenei Ekalesia seia ina ia mauaina faamanuiaga o le malumalu i totonu o le maota o le Alii.” “Ona o lea, o loo tatou faia ai mea uma tatou te iloa ona fai e faavavevave ai le fausiaina o nei maota paia ma ia atili toatele ai tagata e mauaina faamanuiaga o loo maua ai iina.”1 Sa ia ta’ua nisi o malumalu ma tulaga eseese o lo latou fuafuaina ma le fausiaina, ona ia fofogaina lea o se faasilasilaga o le a suia ai olaga o tagata i le lalolagi atoa:
“E tele eria o le Ekalesia e taumamao, lea e gaogao ai le faitau aofai o tagata auai ma e masalo o le a le tele se tuputupu a’e i se taimi lata mai. Pe o le a taofia ai lava e faavavau ia faamanuiaga o sauniga o le malumalu mai ia i latou o e alala i nei nofoaga? A o matou asiasi atu i se eria faapena i nai masina ua tuanai, sa matou mafaufau loloto ai ma le agaga tatalo i lenei fesili? Matou te talitonu, o le tali, sa malamalama ma manino le oo mai.
“O le a tatou fausia ni malumalu laiti i nisi o nei eria. … [O le a] fausia ia malumalu i tulaga faatonuina mo malumalu, lea e sili atu ona maualuluga nai lo o tulaga faatonuina mo falelotu. [O le a] faia ai i ia malumalu papatisoga mo e ua maliliu, o sauniga o le faaeega paia, faamauga, ma isi sauniga uma e tatau ona faia i totonu o le maota o le Alii mo e o lo o soifua ma e ua maliliu.”2
O le musumusuga mo lenei fuafuaga sa amatalia i le silia ma le 20 tausaga na muamua atu, a o tautua ai Peresitene Hinckley o se taitaifono o le Komiti o Malumalu a le Ekalesia. O lona popole ona e toatele le Au Paia o Aso e Gata Ai sa le faigofie ona latou mauaina faamanuiaga o le malumalu, sa ia tusia ai i lana api talaaga e faapea, “E mafai e le Ekalesia ona fau ni malumalu [laiti ifo se tele] mo le tau o le Malumalu o Uosigitone [lea na fausiaina i lena taimi]. O le a ave atu ai malumalu i tagata nai lo o le tau malaga mamao atu o tagata e o atu i ai.”3
I le 1997 o se faaaliga mai le Alii na faapea ona faatino ai loa lenei manatu. Sa faasoa mai e Peresitene Hinckley se mea e uiga i lena faaaliga ina ua ia fofogaina le tatalo o le faapaiaga mo le Malumau o Colonia Juárez Chihuahua Mekisiko. “O iinei i Mekisiko i Matu,” sa ia tatalo ai, “na faaali mai ai e Lau Afio le manatu ma le fuafuaga o se malumalu laitiiti ifo, na i ai atoa faamatalaga uma na manaomia, ae na fetaui lelei foi le tele ma manaoga ma tulaga o tagata auai o le Ekalesia i lenei itu o Lau tovine. O lena faaaliga na oo mai ona o se naunau ma se tatalo ia fesoasoani i Ou tagata o nei atunuu o e ua amiosa’o ma faamaoni.”4
O le ono o masina talu ona uma le fofogaina o le fuafuaga e fausia ni malumalu laiti ifo, sa fofoga ai e Peresitene Hinckley se isi faasilasilaga taua:
“Ua matou malaga mamao atu i tagata o le Ekalesia. Sa ou faatasi ma le toatele o i latou o e sa itiiti ni mea o lenei lalolagi na latou maua. Ae sa i ai i o latou loto se faatuatua mumu ola e faatatau i lenei galuega i aso e gata ai. Latou te alolofa i le Ekalesia. Latou te alolofa i le talalelei. Latou te alolofa i le Alii ma mananao e fai Lona finagalo. E totogi a latou sefuluai, e ui lava ina faatauvaa. E tele ni osigataulaga latou te faia e o atu ai i malumalu. Latou te faimalaga mo le tele o aso i se taimi e tasi i pasi taugofie ma i ni vaa tuai. E sefe a latou tupe, ae ositaulaga mea latou te manaomia ina ia mafai ona latou malaga atu.
“Latou te manaomia ni malumalu latalata—laiti, matagofie, ma mafai ona faaaoga. O lea la, ou te avea ai lenei avanoa e faasilasila atu ai i le Ekalesia atoa se polokalama e fausia ai i le taimi lava lenei ni malumalu laiti se 30. …
“O se taumafaiga faigata tele lenei. E leai se mea e tau latalata i ai na taumafaia muamua. … O lenei mea o le a atoa i ai le 47 o malumalu fou e faaopoopo atu i le 51 o loo galueaina nei. Ou te manatu e sili ai ona tatou faaopoopo i ai le isi 2 ina ia oo atu i le faaiuga o le seneturi lenei ua sogia le 100, e 2,000 i ai tausaga ‘talu ai le afio mai o lo tatou Alii ma le Faaola o Iesu Keriso i la le tino’ (MF&F 20:1). I lenei polokalama ua tatou faia ai i se alafua o se ituaiga tatou te le’i vaai muamua lava i ai.”5
I le aso 1 o Oketpa 2000, na faapaia ai e Peresitene Hinckley le Malumalu o Boston Massachusetts, o le malumalu lona 100 ua faaaogaina. A o le’i oo i le faaiuga o le tausaga, sa ia faapaiaina ia ni malumalu se lua i Pasila. Ina ua maliu o ia i le aso 27 o Ianuari, 2008, ua 124 malumalu a le Ekalesia ua faagaoioia, ae 13 isi na faasilasilaina. Mai le 124 malumalu o loo faagaoioia, na auai Peresitene Hinckley i le fuafuaina ma le fausiaina o le tele lava o i latou ma sa ia faapaiaina le 85 o ia malumalu.
E ui lava ina sa fofogaina e Peresitene Hinckley se numera tele o malumalu fou, ma e ui foi ina maofa o ia i lo latou matagofie, ae sa ia faamanatu mai i le Au Paia o Aso e Gata Ai le faamoemoega o na maota paia: ina ia faamanuia ai tagata taitasi ma aiga, taitoatasi. I lana saunoaga e uiga i le Malumalu o San Diego Kalefonia, sa ia saunoa ai: “O se maota ina a mataina le matagofie lena. Ae faatasi ai ma le matagofie uma o lena maota, o lena fausaga ua na o se ala e maua ai le mea tatou te mananao i ai, ae ua le na o se faamoemoega. O lena maota sa faavaeina ma faapaiaina mo le faia o sauniga paia ia ua faaali mai e le Alii i lenei vaitaimi.”6
I se isi taimi na ia molimau faapea: “E leai se tagata na te maua uma le talalelei seia oo ina mafai ona ia maua [sauniga o le malumalu]. Ma e a tatou le tiutetauave o le vaai o i ai ia maota. Ou te le o iloa po o le a se umi ou te ola ai, ae ou te faamoemoe ina ia faauma o’u aso i le fausiga o malumalu o le Alii, i le avatuina o malumalu i tagata ina ia mafai ona latou maua faamanuiaga ofoofogia ia e tatau ona maua ai [iina].”7
O Le Malumalu o Colonia Juárez Chihuahua Mekisiko
Aoaoga a Gordon B. Hinckley
1
O Malumalu o faailoaga o la tatou molimau, ma o le faatusa o la tatou tapuaiga silisili ona maualuga.
O malumalu taitasi ua fausia e Le Ekalesia a Iesu Keriso o le Au Paia o Aso e Gata Ai, ua avea o se faailoaga o le molimau o lenei nuu e faapea, o loo soifua le Atua lo tatou Tama e Faavavau, ma o loo i ai Lana fuafuaga mo le faamanuiaina o Ona atalii ma afafine o tupulaga uma, ma o Lona Alo Pele o Iesu Keriso, o le sa soifua a’e i Petelema i Iutaia, sa faasatauroina i luga o le satauro o Kolokota, o le Faaola ma le Togiola o le lalolagi, o Lana taulaga togiola ua mafai ai ona faataunuuina lena fuafuaga i le ola e faavavau o i latou taitoatasi o e talia ma ola i le talalelei.8
O mea uma e tutupu i totonu [o le] malumalu e faagaeetia ma faamamaluina ai i tatou. E faatatau i le olaga iinei ma le olaga i talaatu o le tuugamau. E faatatau i le taua o le tagata toatasi o se atalii/afafine o le Atua. E faatatau i le taua o le aiga o se foafoaga a le Silisili Ese. E faatatau i le faavavau o le mafutaga o le faaipoipoga. E faatatau i le faaauau atu i le mamalu e sili atu. O se nofoaga o le malamalama, o se nofoaga o le filemu, o se nofoaga o le alofa lea tatou te taulimaina ai mea o le faavavau.9
O malumalu uma lava … ua tutu o se maa faamanatu i lo tatou talitonuga i le tino ola pea o le tagata soifua, ma o le vaega lenei o le olaga faitino lea tatou te uia, i se faaupuga, o se vaega o se feaeiga faifaipea agai i luga, ma e pei lava le mautinoa o le i ai o le olaga iinei, o le a i ai foi se olaga iina. O le tatou talitonuga mausali lena. E oo mai e ala i le Togiola a le Faaola, ma o malumalu e avea, e pei ona ou faailoaina atu, ma ala laupapa mai le olaga lenei i le olaga a sau. O le malumalu e nafa ma mea o le tino ola pea.10
O nei maota tulaga ese ma matagofie, ma sauniga e faia ai iina, e faatusa i le faatumutumuga i la tatou tapuaiga. O nei sauniga e avea ma faailoaga aupito sili ona o’oo’o o la tatou talitonuga faalelotu.11
O mataupu paia e tatau i ai manatunatuga paia. … Pe a e tuua faitotoa o le Maota o le Alii, ia e faamaoni i se faatuatuaga paia ina ia e le tautala e uiga i mea e mamalu ma faapaiaina.
Na fetalai mai le Alii, “ia manatua o le mea e sau mai luga ua paia, ma e ao ona tautalagia ma le faaeteete, ma i le taofiofiga a le Agaga.” (MF&F 63:64.) Ma le isi foi, “Aua le faatauvaaina mea paia.” (MF&F 6:12.)12
2
Tatou te maua faamanuiaga aupito maualuga o le talalelei e ala i sauniga o le malumalu.
O malumalu nei, ia ua soo ai le lalolagi, e alagatatau i le faataunuuga atoatoa o le Togiola a le Faaola. O iinei, i lalo o le pule o le Perisitua Paia, o le a faataunuuina ai na sauniga lea e tau atu e le gata i le faaolataga, ae faapea foi i le faaeaga e faavavau.13
O Iesu Keriso, le Alo o le Atua, na tuuina mai Lona soifua i luga o le satauro i Kalevaria o se togiola mo agasala a tagata. O Lana [Togiola] o se ositaulaga e sui ai mo i tatou taitoatasi. E ala mai i lena osigataulaga na oo mai ai le folafolaga o le toetutu mo tagata uma. Ua ala mai lenei mea i le alofa tunoa o le Atua, e aunoa ma se taumafaiga i le vaega a tagata. Ma i tua atu o lenei mea, e ala i ki o le perisitua paia na faaeeina i luga o le Toasefululua e le Alii ao Ia femaliua’i faatasi ma i latou, o ia ki na toefuataiina mai i lenei tisipenisione e i latou o e sa umia anamua—e ala mai i nei mea ua oo mai ai faamanuiaga silisili faaopoopo, e aofia ai na sauniga tulagaese ma mataina e faia i totonu o le maota o le Alii. E na o na sauniga e iloa ai le faaaogaina o le “atoatoaga o le perisitua.” (MF&F 124:28.)14
O sauniga o le malumalu [o] faamanuiaga aupito maualuga e ofoina atu e le Ekalesia.15
O faamanuiaga o le malumalu mo alii ma tamaitai uma o e e agavaa e ulu atu i ai … e aofia ai o tatou mulumuluga ma faauuga ina ia mafai ona tatou mama i luma o le Alii. E aofia ai le sauniga o le aoaoga lea e tuuina mai ai ia i tatou se faaeega paia o tautinoga ma faamanuiaga e faaosofia ai i tatou i amioga e ogatasi ma mataupu faavae o le talalelei. E aofia ai sauniga o le faamauga lea e faapea o mea e fusifusia i le lalolagi e fusifusia foi i le lagi, e tuuina atu ai le faaauauina o le aiga.16
Sa valaauina atu i se [tasi] taimi i talaane o le moega i le falemai a se tasi o tina sa i ai i tulaga na le toe foi i se lelei o se gasegase tuga. Sa maliu o ia i se taimi puupuu mulimuli ane, ma tuua ai lana tane ma se fanau e toafa, e aofia ai se tamaitiiti laitiiti e ono tausaga. Sa i ai le tigaalofa, faanoanoa, ma le ootia ma le faavauvau. Ae peitai sa susulu mai i o latou loimata se faatuatua matagofie ma le mautinoa, e pei ona moni le i ai i le taimi nei o se tuueseeseina faanoanoa; o le a i ai i se aso se toe faatasia fiafia, ona o lena faaipoipoga sa amatalia i se faamauga mo le taimi nei ma le faavavau i le maota o le Alii, i lalo o le pule o le perisitua paia. …
E toatele tagata e malaga [mamao lava] ina ia maua faamanuiaga o se faaipoipoga i le malumalu. Sa ou vaai i se vaega o le Au Paia o Aso e Gata Ai mai Iapani o e—a o le’i fausia se malumalu i lo latou atunuu—sa le faatauaina ni a latou mea taumafa ina ia mafai ona latou faia le malaga umi i le Malumalu o Laie Hawaii. A o le’i i ai sa tatou malumalu i Johannesburg, sa matou feiloai ma i latou o e sa ola e aunoa ma mea na manaomia o le olaga ina ia mafai ai ona totogi o latou pasese mo se malaga i le vaalele e 7,000-maila (11,000-km) mai Aferika i Saute agai atu i le malumalu i Surrey, Egelani. Sa i ai se malamalama i o latou mata ma ni ataata i o latou foliga ma molimau mai o latou laugutu e faapea, sa le mafaitaulia le tele atu o le aoga nai lo le tau atoa sa i ai.
Ma ou te manatua na ou faalogo i Niu Sila i le tele o tausaga ua mavae i le molimau e uiga i se alii mai se itu mamao lava o Ausetalia o le, sa faamauina muamua e ala i le pule faalemalo ona auai lea i le Ekalesia ma lona faletua ma lana fanau, sa faapea ona malaga mamao mai lava i lena konetineta tele, ma sopoia le Vasa Tasemenia e tau mai i Aukilani, ma agai atu i lalo i le malumalu i le vanu matagofie o Waikato. Ou te manatua ana upu, sa ia fai mai, “Sa matou le gafatia le tau e malaga mai ai. O a matou meatotino faalelalolagi sa na o se taavale tuai, o a matou meafale, ma a matou ipu. Sa ou fai atu i lo’u aiga, ‘Tatou te le gafatia le tau e o ai.’ Ona ou vaai atu lea i foliga o si o’u toalua lelei ma le ma fanau matagofie, ona ou faapea lea, ‘Tatou te le gafatai ona tatou le o. Afai o le a tuuina mai e le Alii le malosi ia te a’u, e mafai ona ou faigaluega ma lava ni tupe maua mo se isi taavale ma meafale ma ipu, ae afai ou te le maua i latou nei ua pele ia te a’u, o le a mautinoa lava lou mativa i le olaga nei ma le i le faavavau.’”17
E le o se mea e faateia ai, ou uso e ma tuafafine, faatasi ai ma le tatalaina o … malumalu, ua ou vaai ai i loimata o alii malolosi o e na opoina a latou ava i fata faitaulaga i totonu o nei maota paia. Ua ou vaai i loimata o tama ma tina a o latou opoina a latou fanau i nei lava fata faitaulaga. E ala i le mana ua faaaogaina ai, ua latou iloa ai e le mafai e le taimi po o le oti ona faatamaia ia fusi ua faapea ona fusia faatasi ai i latou.18
3
O le malumalu o se nofoaga paia o auaunaga lea tatou te maua ai sauniga faaola e fai ai ma sui o i latou o e ua maliliu ae lei mauaina le talalelei.
E le mafaitaulia miliona o tagata o e na soifua i le lalolaig ma o e e lei maua le avanoa e faalogo ai i le talalelei. Pe o le a taofia ea lo latou mauaina o na faamanuiaga o loo ofoina mai i totonu o maulmalu o le Ekalesia?
E maua e i latou o e ua o ese atu mai le olaga faitino na lava sauniga e ala i tagata o loo soifua e fai ma sui o i latou o e ua maliliu. Ona faapea lea ona latou saoloto i le lalolagi o agaga e filifili e talia pe teena ia na sauniga faalelalolagi na faia mo i latou, e aofia ai le papatisoga, faaipoipoga, ma le faamauga o sootaga faaleaiga. E le tatau ona i ai se faia faamalosi i le galuega a le Alii, ae e tatau ona i ai avanoa.19
O se nofoaga paia lenei o auaunaga. O le tele lava o galuega e faia i totonu o lenei maota paia e faataunuuina e fai ma sui o i latou o e ua o atu i le isi itu o le veli o le oti. E leai se isi lava galuega ua ou iloa e faatusalia i ai. E toeitiiti lava oo atu i le taulaga sui a le Alo o le Atua ua fai ai ma sui o tagata ola uma nai lo o se isi lava galuega ou te iloaina. E le o faamoemoeina se faafetai mai ia i latou o e o loo i le lalolagi i tua atu, o i latou e mauaina lenei auaunaga faapaiaina. O se auaunaga a e o loo ola e fai ai ma sui o e ua oti. O se auaunaga lea o le aano tonu o le le manatu faapito.20
Ua uma ona faamanatu atu i le toatele o tama ma teine … o nei malumalu e le mo nao o latou matua ae e mo i latou foi. Pe a atoa le 12 tausaga o le matutua, e mafai ona latou ulu atu i le maota o le Alii ma tutu o ni sui i papatisoga mo i latou ua i tua atu o le veli o le maliu. O se matuai auaunaga maoae ma le le manatu faapito lenei mea. Se mea ina a manaia mo a tatou autalavou le aafia ai i lenei galuega e matuai le manatu faapito e fai ai ma sui o isi o e ua le mafai ona latou fesoasoani ia i latou lava.
E o faatasi lava ma le … faateleina o le toaga i le malumalu le faateleina o a tatou galuega o talafaasolopito o aiga. O le komepiuta i ona aafiaga eseese ua faatelevaveina ai le galuega, ma ua faaaoga lelei e tagata ia auala fou ua ofoina atu ia i latou. E mafai faapefea ona le manatu se tasi e faapea, o loo i ai le Alii i nei mea uma? A o alualu i luma masini komepiuta, ua faateleina foi malumalu e taulima ai le faatelevaveina o le galuega o talafaasolopito o aiga.21
O i tatou e nafa ma faamanuiaga, o le faamanuiaga e faavavau, o tagata uma o e na soifua i le lalolagi, o augatupulaga e lei faitauina, e lei faanumeraina o alii ma tamaitai o e na soifua i luga o le fogaeleele, o e uma o loo soifua i luga o le fogaeleele i le taimi nei, ma i latou uma o e o le a soifua i luga o le fogaeleele. E matuai maoae lava la tatou tiutetauave. E tatau ona tatou tutu maualuluga teisi atu ma galulue malosi teisi atu ina ia ausia ai.22
O i latou o loo i le isi itu, o e e le o maliliu ae o loo ola i le agaga, o le a olioli ma o le a faafiafiaina a o latou feala ae ma agai atu i lo latou ala i le “tino ola pea ma le ola e faavavau” (Mose 1:39).23
4
O loo faatalitali mai faamanuiaga maoae ia i tatou pe a tatou tausisia lo tatou lava agavaa ma o atu soo i le malumalu.
Ou te tuuina atu … se lui mo outou uma taitoatasi i lenei aso, ia faatulaga tatau o outou olaga, ia agavaa e o atu i le maota o le Alii ma taumamafa ai iina i faamanuiaga ua faapitoa lava mo oe. … E tele mea e manaomia, ae e tele atu ai lava ia faamanuiaga.24
Ou te uunaia o tatou tagata po o fea lava e i ai, faatasi ai ma faatauanauga uma ou te mafaia, ia ola agavaa e umia se pepa faataga o le malumalu, ia mautinoa o i ai [se pepa faataga] ma ia faia o se meatotino faapelepele, ma ia faia se taumafaiga sili atu ia o atu i le malumalu o le Alii ma taumamafa i le agaga ma faamanuiaga e tatau ona taumamafa ai iina.25
E tusa pe mafai ona e alu soo pe leai [i le malumalu], ia e agavaa mo se pepa faataga o le malumalu ma ia tuu lau pepa faataga i lau taga. O le a avea ma se faamanatu ia te oe o le mea ua faamoemoeina mai ia te oe o se tagata o le Au Paia o Aso e Gata Ai.26
Ua faamalieina atu, o alii ma tamaitai uma e o atu i le malumalu i se agaga o le faamaoni ma le faatuatua, latou te tuua le fale o le Alii o se alii po o se tamaitai sili atu. O loo i ai le manaomia o le faaleleia pea lava pea o o tatou olaga. E i ai taimi e manaomia ai le tuua o le pisapisao ma le vavao o le lalolagi ae laa atu i totonu o puipui o se maota paia o le Atua, ina ia lagona ai Lona agaga i se siosiomaga o le paia ma le filemu.27
O lenei malutaga paia ua avea ma faleaoga o aoaoga o mea matagofie paia a le Atua. O iinei ua faamatala mai ai mo tatou le fuafuaga a le Tama alofa mo ona atalii ma afafine o augatupulaga uma. O iinei ua tusia ai i o tatou luma le tala o le faigamalaga e faavavau a le tagata mai le muai olaga e oo mai i lenei olaga seia oo atu i le olaga a sau. E tele upumoni taua ma faavae o loo aoaoina i le manino ma le faigofie e talafeagai lelei ma le malamalamaaga o i latou uma o e faalogo i ai. …
O le malumalu foi o se nofoaga o musumusuga ma faaaliga patino. O leteona i latou o e, i taimi o faigata, pe a faia ni filifiliga faigata ma i ai ia i latou nai faafitauli lavelave e tatau ona taulimaina, e o mai i le malumalu i se agaga o le anapogi ma talosaga paia. E toatele ua latou tautino mai e moni sa lei faalogoina ni leo o faaaliga, peitai sa oo ia i latou ni lagona e uiga i se mea e tatau ona mulimuli ai i lena taimi po o se taimi muimuli ane foi, lea na avea ai ma tali ia latou tatalo.
“O i le maota o le Alii ma lagona ai iina ia Lona Agaga ma talanoa ma Ia ma o le a outou iloa ai se filemu tou te le mauaina i se isi lava mea.”
O lenei malumalu o se punavai o upumoni e faavavau. “A o se inu i le vai ou te avatu ia te ia, e le toe fia inu ia.” (Ioane 4:14.) O iinei e aoaoina ai na upumoni ia e paia i o latou tulaga ma faavavau i o latou aafiaga.
Mo i latou o e ulu atu i nei puipui, o lenei maota e avea o se maota o feagaiga. O iinei tatou te folafola atu ai, i le faamaoni ma le paia, e ola i le talalelei a Iesu Keriso i lona faailoaga aupito sili ona lelei. Tatou te osifeagaiga ma le Atua lo tatou Tama Faavavau e ola i na mataupu faavae o faavae mautu ia o tapuaiga moni uma.28
Pe o tumu ea le olaga i mea o loo e popole ai? O i ai ni ou faafitauli ma atugaluga ma popolega? Pe e te manao i le filemu i lou loto ma se avanoa e talanoa ai ma le Alii ma mafaufau loloto i ona ala? Alu i le maota o le Alii ma lagona ai iina Lona Agaga ma talanoa ma Ia, ma o le a e iloa ai se filemu lea e leai lava se isi mea e te maua i ai.29
I taimi o puapuaga, taumafai ia e oo atu i le maota o le Alii ma a o i ai iina, ia tapuni i fafo le lalolagi. Ia maua Ona sauniga paia, ma faasafua atu nei sauniga i ou augatama. I le faaiuga o se sauniga i le malumalu, ia nofonofo filemu i le potu selesitila ma mafaufau loloto i faamanuiaga ua e mauaina mo oe lava, pe na e faasafuaina atu foi ia i latou o e ua fai i lagi le folauga. O le a fefete lou loto i le agaga faafetai, ma o le a tumu lou agaga i manatu o upumoni e faavavau o le fuafuaga sili o le fiafia a le Alii.30
I lenei lalolagi pisapisaō, pisi, ma le faatautavā, o se matua’i faamanuiaga lava le i ai o se maota paia e mafai ona tatou maua ai le aafiaga faamamā o le Agaga o le Alii. E fetuleni mai e le aunoa ia i tatou elemene o le manatu faapito. E ao ona tatou faatoilaloina, ma e leai se isi auala e sili atu [e fai ai] nai lo le o i le maota o le Alii, ma galulue ai e fai ma sui o i latou ua fai i lagi folauga. …
… Ou te uunaia outou ina ia matua faaaoga lelei lenei avanoa matagofie. O le a faaatoatoa ai o outou natura. O le a fofo’e ese ai le atigi manatu faapito o loo nonofo ai le toatele o i tatou. O le a aumaia moni ai lava se aafiaga faamamā i o tatou olaga, ma avea ai i tatou ma ni alii ma ni tamaitai ua sili atu.31
Ou te iloa e pisi lava o outou olaga. Ou te iloa e tele a outou mea e fai. Ae ou te tuuina atu ia te outou se folafolaga, afai o le a outou o atu i le maota o le Alii, o le a faamanuiaina outou, o le a sili atu le lelei o le olaga mo outou. O lea la, faamolemole, faamolemole, o’u uso e ma tuafafine pele, ia faaavanoa outou lava mo le avanoa sili o le o atu i le maota o le Alii ma faapea ona taumamafa ai i faamanuiaga ofoofogia uma o le a outou mauaina iina.32
Fautuaga mo Suesuega ma le Aoaoina Atu
Fesili
-
Na saunoa Peresitene Hinckley o sauniga o le malumalu o “faailoaga aupito sili ona o’oo’o o la tatou talitonuga faalelotu” (vaega 1) ma “ le faamanuiaga aupito maualuga e ofoina atu e le Ekalesia” (vaega 2) O a nisi o faamanuiaga ua e maua e ala i nei sauniga?
-
Sa saunoa Peresitene Hinckley e uiga i alii ma tamaitai na maligi loimata o le olioli i totonu o malumalu (tagai i le vaega 2). Mai ou aafiaga, aisea e faaosofia ai e sauniga o le malumalu ia lagona loloto faapena?
-
Na saunoa Peresitene Hinckley e uiga i le galuega o le faaolaina o e ua maliliu, “Se mea ina a manaia mo a tatou autalavou le aafia ai i lenei galuega e matuai le manatu faapito” (vaega 3). O a ni mea e mafai ona fai e matua ma le autalavou e galulue faatasi ai i lenei auaunaga?
-
O a ni mea e mafai ona tatou faia e maua ai le taimi e auauna atu ma tapuai ai i totonu o le malumalu. O a ni auala e mafai ai e a tatou auaunaga i le malumalu ona faatosina ai o tatou olaga i fafo o le malumalu? (Mo ni faataitaiga, tagai i le vaega 4.) O faapefea ona faamanuiaina oe i le alu atu i le malumalu?
Mau Fesootai
Esoto 25:8; 1 Tupu 6:11–13; MF&F 88:119–20; 109:12–13, 24–28; 110:1–10; 128:22–24
Fesoasoani mo Suesuega
“Faasoa mea ua e aoaoina. A o e faia, o le a manino atili ou mafaufauga ma o le a faateleina lou mana e faatumauina ai” (O Le Aoao Atu e Leai Se Isi Valaauga e Sili Ai [1999], 17).