Mataupu 5

O Afafine o le Atua

“E ofoofogia le mana o tamaitai o le faatuatua.”

Mai le Soifuaga o Gordon B. Hinckley

I lona soifuaga atoa, sa faailoa atu ai e Gordon B. Hinckley le agaga faafetai mo tomai ma saofaga a tamaitai. Sa ia faailoa atu foi lana molimau malosi e uiga i le taua o tamaitai i le fuafuaga e faavavau a le Atua. Sa fiafia o ia i le faateleina o avanoa o tamaitai, faapea ai foi ma lo latou faatuatua i le Faaola ma lo latou tuuto atu i o latou aiga ma le Ekalesia.

O le tina o Gordon B. Hinckley, o Ada, sa atamai ma aotauina ma sa fiafia o ia i le mataupu o le iloa faitautusi ma le tusitusi, musika, ma faatufugaga. I le 29 o ona tausaga, sa ia faaipoipo atu ai ia Bryant Hinckley o le sa maliu lona faletua, ma tauve ai le tiute mo le fanau e toavalu o e sa faavauvau i le maliu o lo latou tina. Sa ia faafaileleina i latou i le alofa, tuu atu ia i latou le lagolagosua sa latou manaomia, ma aoao e faafoeina se aiga toatele. O Gordon o le ulumatua lea o le fanau e toalima na fanauina e Ada ma Bryant. E ui sa maliu Ada ina ua 20 tausaga le matua o Gordon, ae o ana aoaoga ma faataitaiga sa tumau pea o se malosiaga mo le lelei i le olaga atoa [o Gordon]. A saunoa o ia e uiga i [lona tina], na te taua lava i taimi uma lana faatosinaga maoae ia te ia.

Sa i ai foi se faatosinaga loloto a le faletua o Gordon B. Hinckley, o Marjorie Pay, ia te ia. O ia o se tamaitai malosi sa tuuto atu i le talalelei a Iesu Keriso. Sa tulaga ese lava lona faatuatua, o se uiga tausaafia, ma se fiafiaga i le olaga. I se tusi faamemelo ia te ia, sa faailoa atu ai e Peresitene Hinckley lona alofa ma le faaaloalo:

“Ua ta faimalaga faatasi i ni mea mamao ma lautetele. Ua ta asia uma konetineta. Ua ta faia ni fonotaga i ni aai tetele o le lalolagi faapea ai ma le tele o tamai aai laiti. … Ua ta talanoa atu i le faitau miliona o e e matua talisapaiaina oe. Faatasi ai ma au upu masani ua e manumaloina ai le alofa o tagata uma o e ua faalogo ia te oe. O ou lagona lelei lē faailoga tagata, o ou uiga fiafia ma agamalie faafouina, lou atamai filemu ma le le mafaatoilaloina, ma lou faatuatua maoae ma le tumau pea ua manumaloina ai loto o tagata uma o e ua faalogologo ia te oe. … O lou matelaina i le fia faitau pea ma lau sailiga le mataofiofia mo le malamalama ua faatumauina ai pea lou nofouta ma le faafouina o lagona i le aluga atoa o se olaga umi ma le uluuluola.”¹

E masani lava ona saunoa Peresitene Hinckley e uiga i le natura paia o tamaitai ma uunaia i latou i luma ia ausia ni mea sili atu atoa ai ma se faatuatua sili atu. I tamaitai talavou, sa ia tautino atu: “O oe moni lava o se afafine o le Silisili Ese. E leai se tapulaa o lou gafatia. Afai o le a outou puleaina o outou olaga, o le a faatumulia le lumanai i avanoa ma le fiafia. E le mafai ona outou faamaumaua a outou taleni po o o outou taimi. O loo taoto i o outou luma atu ni avanoa silisili.”² E faatatau i tamaitai matutua, sa ia saunoa ai: “O loo manaomia e le lalolagi le faatosinaga a tamaitai ma lo latou alolofa, lo latou mafanafana, ma lo latou malosi. O lo tatou siosiomaga matamataita e manaomiaina o latou leo faamalosiau, le matagofie lea e foliga mai e i ai i totonu o o latou natura, le agaga o le alofa mama o lo latou tofi lea.”³

I le konafesi aoao lea na sosoo ma le maliu o si ana soa faapelepele, o Marjorie, sa faaiu ai e Peresitene Hinckley se tasi o ana saunoaga i le faailoaga faamomoiloto lenei o le lotofaafetai: “E maeu lo’u loto faafetai, e maeu le lotofaafetai e tatau ona tatou lagonaina uma, mo tamaitai i o tatou olaga. Ia faamanuia le Atua ia i latou. Ia faamamaina e Lona alofa sili i latou ma faapale i latou i le susulu ma le matagofie, le alofatunoa ma le faatuatua.”⁴

tina, afafine — “O outou taitoatasi o se afafine o le Atua. Ia mafaufau i uiga ofoofogia uma o lena mea moni silisili e tasi.”

Aoaoga a Gordon B. Hinckley

E i ai se nofoaga maualuga ma paia o tamaitai i le fuafuaga e faavavau a le Atua.

O outou taitoatasi o se afafine o le Atua. Ia mafaufau i uiga ofoofogia uma o lena mea moni silisili e tasi. …

Ou te faamanatu atu ia te outou upu sa saunoa i ai le Perofeta o Iosefa i tamaitai o le Aualofa ia Aperila o le 1842. Na ia saunoa: “Afai e te ola e tusa ma ou avanoa, e le mafai la ona taofia agelu mai le avea ai ma a outou paaga” [Aoaoga a Peresitene o le Ekalesia: Iosefa Samita (2007), 454]. E ofoofogia gafatia o loo i totonu o outou.⁵

E pele tele outou, outou taitoatasi. … Ua outou nofoia se nofoaga maualuga ma paia i le fuafuaga e faavavau a le Atua, lo tatou Tama i le Lagi. O outou o Ona afafine, e pele ia te Ia, e alofagia e Ia, ma e taua tele ia te Ia. E le mafai ona faamanuiaina Lana fuafuaga silisili e aunoa ma outou.⁶

Sei ou fai atu lava ia te outou tuafafine tou te le umiaina se nofoaga e itiiti ifo sona taua i le fuafuaga a lo tatou Tama mo le fiafia e faavavau ma le manuia o Lana fanau. O outou o se vaega e matua taua lava o lena fuafuaga. A aunoa ma outou e le mafai ona faagaoioi le fuafuaga. A na le seanoa ma outou e lofituina le polokalama atoa.⁷

Ua oo atu ia te outou ona o lo outou tofitautupu se mea matagofie ma paia ma faalelagi. Aua lava nei galo lena mea. O lo outou Tama e Faavavau o le Mataisau sili o le atulaulau. E pulea e Ia mea uma, ae o le a faafofoga foi o Ia i au tatalo o Lona afafine ma faafofoga ia te oe a o oulua talanoa ma Ia. O le a Ia taliina au tatalo. O le a Ia le tuua lava na o oe.⁸

O le fautuaga a le Alii ia Ema Samita e faatatau foi i tagata uma.

O le vaega e luasefulu lima o le Mataupu Faavae ma Feagaiga … o se faaaliga na auala mai ia Iosefa le Perofeta e tuu atu i lona faletua o Ema. … Sa fetalai atu o Ia ia Ema, ma ia i tatou taitoatasi:

“Ou te tuu atu ia te oe se faaaliga e faatatau i loʼu manao; ma afai e te faamaoni ma savali i oʼu luma i ala o le amiomama, o le a Ou faasaoina lou ola, ma o le a e maua se tofi i Siona” [MF&F 25:2; tagai foi i le fuaiupu e 16]. …

I se fuataga tele lava ua umia ai e i tatou taitoatasi le ki i faamanuiaga a le Silisili Ese i o tatou luga. Afai tatou te mananao i se faamanuiaga, e tatau ona tatou totogia le tau. O se vaega o lena tau o loo taoto i le faamaoni. Faamaoni i le a? Faamaoni ia i tatou lava, i mea aupito silisili o loo i totonu o i tatou. E leai se tamaitai e tatau ona manatu maualalo ia te ia lava, pe na te tuuina o ia i lalo, pe manatu faatauvaa i ona tomai po o ona gafatia. Ia faamaoni tamaitai taitoatasi i uiga paia silisili o loo i totonu ia te ia. Ia faamaoni i le talalelei. Ia faamaoni i le Ekalesia. E anoanoai tagata o siomiaina i tatou o loo saili lava e faaleaga le Ekalesia, e saili mo vaivaiga i ona uluai taitai, e sailiili masei i ana polokalama, ma faitio i le ekalesia. Ou te tuu atu ia te outou la’u molimau o le galuega lenei a le Atua, ma o i latou e tautatala e tetee i ai o loo tautatala ma le tetee ia te Ia.

Ia faamaoni ia te Ia. O Ia o le puna moni e tasi o lou malosi. O Ia o lou Tama i le Lagi. O loo soifua o Ia. E faafofoga o Ia ma tali mai i tatalo. Ia faamaoni i le Atua.

Sa faaauau le fetalaiga a le Alii ia Ema, “Afai e te … savali … i ala o le amiomama.”

Ou te manatu o tamaitai uma … e malamalama i le uiga o lena mea. Ou te lagona o na upu sa tuuina atu ia Ema Samita, ma o lea ua faapena foi ia i tatou uma, e fai ma tuutuuga ina ia tausisia pe afai e ao ina tatou mauaina se tofi i le malo o le Atua. O le leai o se amiomama e matua le ogatusa atoatoa ma le usiusitai i poloaiga a le Atua. Ua leai se isi mea e sili atu ona matagofie nai lo le amiomama. E leai se malosi e sili atu nai lo le malosi o le amiomama. E leai se isi uiga tamalii e tutusa ma le tamalii o le amiomama. E leai se uiga auau mama e matua faafiafiaina, leai se ofu e matua matagofie. …

Sa taua Ema o “se tamaitai filifilia” [MF&F 25:3]. O lona uiga, pe a toe faaaoga se isi laina o mau, o ia o se “ipu filifilia a le Alii.” (Tagai Moro. 7:31.) O outou taitoatasi o se tamaitai filifilia. Ua outou o ese mai le lalolagi ia avea ma ni tagata auai o le talalelei toefuataiina a Iesu Keriso. Ua outou faia a outou filifiliga, ma afai o outou ola agavaa mo le talalelei, o le a faamamaluina outou e le Alii ma faalauteleina outou. …

Sa ao ona faauuina Ema⁹ i lalo o le lima o Iosefa “e faamalamalama tusitusiga paia, ma apoapoai atu i le ekalesia, e tusa ma mea o le a tuuina atu ia te oe e lou Agaga” [MF&F 25:7].

Sa ao ona avea o ia ma faiaoga. Sa ao ona avea o ia ma faiaoga o le amiotonu ma le upumoni. Aua na fetalai le Alii e faatatau i lenei valaauga ia te ia, “O le a e maua ai le Agaga Paia, ma ia tuu atu lou taimi i le tusitusi, ma le aoao tele” [MF&F 25:8].

Sa ao ona ia suesueina le talalelei. Sa ao foi ona ia suesueina mea o le lalolagi sa ia ola ai. Sa manino lena mea i faaaliga na sosoo ai ia e faatatau foi ia i tatou uma. Sa ao ona tuuto atu lona taimi i “le aoao tele.” Sa ao ona ia tusitusi, tuu atu lagona ma ona mafaufauga.

Ia te outou o tamaitai i nei aso, o e matutua pe talavou, sei ou fautua atu ia outou tusitusi, ia outou tausia ni apitalaaga, ia faailoa o outou mafaufauga i luga o pepa. O le tusitusi o se amiopulea sili. O se taumafaiga maoae faaleaoaoga. O le a fesoasoani ia te oe i le tele o auala, ma o le a e faamanuiaina ai olaga o le toatele. …

I le gagana o le faaaliga, sa ao ia [Ema] ona ia “faamalamalama atu tusitusiga paia, ma apoapoai atu i le ekalesia, e tusa ma mea o le a tuuina atu ia te oe e loʼu Agaga.”

O se tiute ofoofogia ia te ia ma i tamaitai uma o lenei Ekalesia. E tatau ona i ai le aoaoina, e tatau ona i ai ni sauniuniga, e tatau ona i ai se faatulagaga o manatu, e tatau ona i ai se faamalamalamaga o tusitusiga paia, e tatau ona i ai se apoapoaiga i galuega lelei e pei ona taitai ai e le Agaga Paia.

Sa faaauau le fetalaiga a le Alii, “Ma e moni Ou te fai atu ia te oe, ia e tuu ese mea o lenei lalolagi, ma saili mo mea o se lalolagi sili atu ona lelei” [MF&F 25:10].

Ou te lagona sa lei fetalai atu o ia ia Ema e le tatau ona ia popole i se nofoaga e nofo ai, meaai i luga o lana laulau, ma lavalava. Sa ia fetalai atu ia te ia e le tatau ona faananau atu i nei mea, e pei foi ona faananau i ai le toatele o i tatou. Sa ia tau atu ia te ia ia mafaufau i mea e sili atu ona lelei o le olaga, o mea o le amiotonu ma le lelei, o mataupu o le alofa mama ma le alofa mo isi, o mea o le faavavau. …

Na faaauau pea le fetalaiga a le Alii: “O le mea lea, ia sii aʼe i luga lou loto ma olioli, ma pipii i feagaiga ua e faia” [MF&F 25:13].

Ou te talitonu o loo ia fetalai mai ia i tatou taitoatasi, ia fiafia. O le talalelei o se mea e olioli ai. Ua tatou maua ai se mafuaaga mo le fiafia. Ioe, e i ai taimi o faanoanoaga. Ioe, e i ai itula o popolega ma atuatuvalega. Tatou te popole uma lava. Ae ua tau mai e le Alii ia i tatou ia sii ae o tatou loto ma olioli.¹⁰

tamaitai, tina, tinamatua i Tailani — “Ia faamanuia le Atua ia te outou, tina! … O le a outou i ai iina, e tatau ona outou i ai iina, e fai ma malosiaga mo se tupulaga fou.”

Ua i ai i tina se valaauga paia e tausi a’e a latou fanau i le amiotonu ma le upumoni.

O le malosiaga moni lava o soo se malo, faalapotopotoga, po o se aiga e taoto lea i totonu o na uiga auau mama faaletagata na mauaina i se fuataga tele e fanau o loo aoaoina i auala filemu ma faigofie a tina i aso uma.¹¹

O le aiga e fatufatuai ai le faafailelega o tupulaga fou. Ou te faamoemoe o le a iloaina e outou tina pe a uma ona faia o mea uma lava, e le toe i ai sa outou tiutetauave faatauanau, po o soo se avega e i ai ni taui sili atu, nai lo le tausiga e te tuuina atu i lau fanau i se siosiomaga o le saogalemu, filemu, faalesoa, alofa, ma le faaosofiaina e tuputupu ae ma faia mea ia lelei.¹²

Ou te faamanatu atu i tina i soo se mea le paia o lou valaauga. E leai ma se tasi e mafai ona gafatiaina ona suitulaga ia te oe. E leai se tiutetauave e sili atu, leai se matafaioi e sili atu ona noatiaina nai lo lou tausiaina i le alofa ma le filemu ma le amiosa’o o i latou ua e aumaia i lenei lalolagi.¹³

Tausi lau fanau i le malamalama ma le upumoni. Aoao i latou e tatalo a o laiti i latou. Faitau atu ia i latou mai tusitusiga paia e tusa lava pe le o mafai ona latou malamalama i mea uma o loo e faitauina. Aoao i latou e totogi a latou sefuluai ma taulaga i le tupe muamua lava latou te mauaina. Ia avea lenei faiga ma se mausa i o latou olaga. Aoao ou atalii ia faamamalu i tulaga faatamaitai. Aoao ou afafine ia savavali i le amiomama. Ia talia se tiutetauave i le Ekalesia, ma ia faalagolago i le Alii ia tutusa ia te oe soo se valaauga e te ono mauaina. O lau faataitaiga o le a seti ai se mamanu mo lau fanau.¹⁴

Ia faamanuia le Atua ia te outou, tina! A faitauina uma manumalo ma toilalo o taumafaiga uma a alii, a oo ina toamalie ifo vevesi o taua o le olaga, a oo ina mou ese atu mea uma sa tatou galulue malolosi ai i lenei lalolagi mai la tatou vaai, o le a e i ai iina, e tatau ona e i ai iina, e fai ma malosiaga mo se tupulaga fou, o le mau sili ona siitiaina ma agai i luma o le aiga o tagata. O lona tulaga auau mama o le a faalagolago lea ia te oe.¹⁵

Ua i ai i tamaitai ni tiutetauave sili i le galuega o le faaolataga.

O loo i ai se malosiaga ma se gafatia tele i tamaitai o lenei Ekalesia. O loo i ai le taitaiga ma le taiala, o se agaga mautinoa o le olatutoatasi, ma se faamalieina sili i le avea ai ma se vaega o lenei malo, le malo o le Alii, ma le galulue soosootauau ai ma [ē umiaina] le perisitua ia tulei agai i luma.¹⁶

Ua tuuina mai e le Atua i tamaitai o lenei ekalesia se galuega e fai i le fausiaina o lona malo. Ua aafia i lena mea vaega uma o la tatou tafatolu tele o tiutetauave—o lona uiga, muamua, ia aoao atu le talalelei i le lalolagi; lua, ia faamalosia le faatuatua ma atiae le fiafia o tagata o le Ekalesia; ma le, tolu, ia ave atu i luma le galuega tele o le faaolataga mo e ua maliliu.¹⁷

E fegalegaleai faatasi tamaitai o le Ekalesia ma o latou tuagane i le tuleia i luma o lenei galuega sili a le Alii. … Ua tauave e tamaitai ni tiutetauave ofoofogia ma e nafa i latou ma le faataunuuina o na tiutetauave. Latou te taitaia a latou lava faalapotopotoga, ma o na faalapotopotoga e malolosi ma ola ma o ni malosiaga taua tele mo le lelei i le lalolagi. Latou te tutu i se matafaioi fesootai ma le perisitua, o loo taufai tauivi faatasi e fausia le malo o le Atua i le lalolagi. Matou te faamamaluina ma faaaloalogiaina outou mo lo outou gafatia. Matou te faamoemoeina le taitaiga, ma le malosi, ma taunuuga faagaeetiaina mai la outou pulega o faalapotopotoga o loo outou gafataulimaina. Matou te puipuia ma lagolagoina outou o afafine o le Atua, o loo galulue i se faigapaaga tele e fesoasoani ia te ia i le aumaia o le tino ola pea ma le ola e faavavau o atalii ma afafine uma o le Atua.¹⁸

tamaitai talavou i luma o le malumalu — “Ou te … valaauliaina tamaitai i soo se mea ia faateleina le gafatia maoae o loo i totonu o outou.”

O le Aualofa o se punavai o faamanuiaga lemafuatiaina.

E moni lava o loo siosioina e faavavau ia tamaitai o le Aualofa i aao o lo tatou Alii. I la’u lava faaiuga, o le faalapotopotoga aupito silisili lenei a tamaitai i le lalolagi atoa. O se foafoaga na foaiina mai e le Atua. Sa saunoa ma galue Iosefa Samita o se perofeta ina ua ia faatulagaina le Aualofa i le 1842.¹⁹

E matuai taua lava le tutu mausali ma le le mafaagaeetia o tamaitai o le Ekalesia mo le mea sa’o ma tonu e tusa ma le fuafuaga a le Alii. Ou te talitonu e le o i ai se isi faalapotopotoga i soo se mea e tutusa ma le Aualofa o lenei Ekalesia. … Afai e tutu faatasi [ona sui auai] ma tautatala atu i le leo e tasi.²⁰

Sa ou auai i se konafesi faalesiteki na lauga ai se tamaitai talavou, o le peresitene o le Aualofa o se uarota a le au nofofua, e uiga i le auauna atu ma le avanoa maoae ua maua e tamaitai talavou o lana uarota. Ua ia te outou nei mea uma. Ua i ai la outou lava faalapotopotoga. Ua i ai ni o outou taitai agavaa e fautuaina outou. Ua ia te outou i latou o e o le a aapa atu e fesoasoani ia te outou i taimi o faafitauli ma mafatiaga.²¹

O ai e mafai ona fuaina aafiaga ofoofogia i luga o olaga o le faitau miliona o tamaitai ua faateleina o latou atamai, ua faatele atu o latou vaaiga mamao, ua faalauteleina o latou olaga, ma ua faatamaoaigaina o latou malamalamaaga e uiga i mea a le Atua e ala i le anoanoai o lesona na lelei ona aoao atu ma aoaoina i fonotaga a le Aualofa?

O ai e mafai ona fuatia le olioli ua oo mai i olaga o nei tamaitai a o latou milo faatasi, miomio i le siosiomaga o le uarota po o le paranesi, faatamaoaiga olaga o le tasi ma le isi e ala i faiga faapaaga matagofie ma teufatuina?

O ai [se tagata], e oo lava i le mamao o ni mafaufauga faivavale, e mafai ona malamalama i gaoioiga lemafaitaulia o galuega alofa na faatinoina, o taumafa na tuuina i luga o laoai gaogao, o faatuatua na faafaileleina i taimi atuatuvale o gasegase, o manua na fusifusia, o tiga na fofoina e lima agaalofa ma upu filemu ma faamalosiau o faalaeiauga na faasafua atu i taimi o maliu ma le tuua toatasi na sosoo ane ai? …

E leai se tasi e mafai ona faitaulia galuega faatino na faataunuuina ma faamaeaina e Aualofa i lotoifale. E leai se tasi e mafai ona mateiaina mea lelei ua oo mai i olaga o tamaitai ua auai i nei faalapotopotoga ma i latou o e ua faamanuiaina ai e ala i a latou galuega lelei. …

Ia faamanuia le Atua i le Aualofa a Le Ekalesia a Iesu Keriso o le Au Paia o Aso e Gata Ai. Tau ina ia faaauau le tuputupu ae o le agaga o le alofa lea o loo faaosofiaina ia ona sui auai … ma ia lagonaina i le lalolagi atoa. Tau ina ia pa’i atu a latou galuega alofa mo le manuia o olaga e lemafaitaulia i soo se mea e oo atu i ai [a latou galuega alofa]. Ma talosia ia faamamaluina e le susulu ma le malamalama, aoaoina ma le atamai, ma upumoni e faavavau olaga o augatupulaga o tamaitai o le a oo mai, i malo uma o le lalolagi, ona o lenei faalapotopotoga tulagaese na faavaeina mai le lagi.²²

Ia faateleina le gafatia o le paia o loo i totonu ia te outou.

O outou o se faalapotopotoga tele o tamaitai O Le Ekalesia a Iesu Keriso o le Au Paia o Aso e Gata Ai. … E leai se tasi e mafai ona iloa le malosiaga tele mo le lelei e mafai ona avea ai outou. … Ou te apoapoai atu ia te outou ia tutu maualuga ma malolosi i le puipuia o na uiga mama maoae o loo avea ma poutu o lo tatou alualu i luma ua faia e le faalapotopotoga. A outou tutufaatasi, e le faatapulaaina lo outou malosi. E mafai ona outou ausia soo se mea tou te mananao e ausia. Ma e matuai tele, tele lava le manaomia o outou i se lalolagi ua olopalaina ona tulaga faatauaina, lea e foliga mai ua matuai pule ai le fili.²³

Ua ou manatu e valaaulia tamaitai uma i soo se mea ia faateleina le gafatia maoae o loo i totonu ia te outou. Ou te le o fai atu tou te tausili i mea e le oo i ai lo outou malosi. Ou te faamoemoe o le a outou le faatalua ia te outou lava ma ni manatu o le toilalo. Ou te faamoemoe o le a outou le taumafai e faatutu ni sini e le mafai ona outou ausia. Ou te faamoemoe o le a na ona outou faia o mea e mafai ona outou faia i le ala sili ona lelei ua outou iloa. Afai tou te faia lena mea, o le a outou molimauina le oo mai o vavega.²⁴

E faailoa atu lo’u agaga faafetai ia te outou tamaitai faamaoni o le Au Paia o Aso e Gata Ai, o lenei ua faitau miliona ma o loo i ai i le salafa o le lalolagi. E maoae lo outou malosiaga mo le lelei. E ofoofogia a outou taleni ma le E tele lo outou faatuatua ma lo outou alolofa mo le Alii, mo Lana galuega, ma mo Ona atalii ma afafine. Ia faaauau ona ola i le talalelei. Ia faalautele atu i a outou aumea uma. O a outou galuega lelei o le a tele atu le mamafa na te tauaveina nai lo soo se upu tou te fai atu ai. Ia savavali i le amiomama ma le upumoni, faapea ma le faatuatua ma le faamaoni. O outou o se vaega o se fuafuaga e faavavau, o se fuafuaga na mamanuina e le Atua lo tatou Tama e Favavau. O aso taitasi o se vaega o lena faavavau.

Ou te iloa o le toatele o outou ua tauaveina ni avega mamafatu. Talosia ia fesoasoani atu ia te outou au aumea i le Ekalesia, ou tuagane ma uso, i na avega. Ina ava’e ia a outou talosaga ia te Ia, o le e ana le malosi uma, o le e alofa ia te outou, ma o le e mafai ona faaaoga mea e mafai ona fesoasoani ia te outou. O se galuega lenei o vavega. Ua outou silafia lena mea, ma ua ou iloa foi. E faigofie ona ou fai atu ia te outou e aua le lotovaivai, peitai, ou te fai atu pea, a o ou uunaia outou e agai i luma i le faatuatua.²⁵

E ofoofogia le mana o tamaitai o le faatuatua. Ua faafia ona faaalia i le talafaasolopito o lenei Ekalesia. O loo alualu pea ia i tatou i aso nei. Ou te iloa o se vaega lea o le paia o loo i totonu ia te outou.

Tuafafine, ia faateleina le gafatia o lena tulaga paia. I lena taumafaiga, ia fai le lalolagi o loo outou soifua ai o se nofoaga lelei atu mo oe lava ma mo i latou uma o e o le a mulimuli ia te oe.²⁶

Ia faafetaia le Atua mo tamaitai lelei o lenei Ekalesia. Tau ina ia toto i o outou loto se lagona o le mitamita i o outou gafatia ma se talitonuga maumaututu lea o le a avea o se foeuli e puipuia malu oe mai afa uma.²⁷

Fautuaga mo Suesuega ma le Aoaoina Atu

Fesili

O a ni mea ua tatou aoao mai ia Peresitene Hinckley e faatatau i lagona o le Tama Faalelagi i Ona afafine? (Tagai vaega 1.) Aisea e taua ai ona tatou malamalama i le “nofoaga maualuga ma paia” o tamaitai i le fuafuaga e faavavau a le Atua?
O a vaega o le fautuaga a le Alii ia Ema Samita e faapitoa ona aoga ia te oe? (Tagai vaega 2.) O a ni mea e mafai ona tatou aoao mai le vaega e 2 e uiga i le faamaoni? O a ni mea e mafai ona tatou aoao mai e uiga i le avea ma se “tamaitai filifilia”? O a ni mea e mafai ona tatou aoao mai i le auala e faatatau ai tusitusiga paia ia i tatou lava?
O a ni ou lagona a o e faitau i le fautuaga a Peresitene Hinckley i tina? (Tagai vaega 3). O a ni auala ua faamanuiaina ai oe i faatosinaga a se tina? Mo matua, aisea “e leai se matafaioi e sili atu ona noatiaina” nai lo le tausiaina o a latou fanau “i le alofa ma le filemu ma le amiosa’o”?
O a ni faataitaiga ua e vaaia o le “malosiaga ma se gafatia tele” o tamaitai i le Ekalesia? (Tagai vaega 4.) O a nisi o auala e mafai ai e tamaitai ona aumaia “le tino ola pea ma le ola e faavavau o atalii ma afafine uma o le Atua.”? Aisea e taua ai i alii ma tamaitai ona galulue faatasi i le faaaga’iina i luma o le galuega a le Alii? O a nisi o faataitaiga ua e vaaia o lenei mea?
Faamanatu faamanuiaga e oo mai mai le Aualofa, e pei ona faailoa mai e Peresitene Hinckley i le vaega e 5. O a ni faamanuiaga ua oo mai ia te oe mai taumafaiga a uso o le Aualofa, e aofia ai i latou o loo galulue i Tamaitai Talavou ma le Peraimeri? E mafai faapefea ona e faamalosia le Aualofa i lau uarota? E mafai faapefea ona fesoasoani le Aualofa i tamaitai ia faateleina o latou faatosinaga mo le lelei?
Mafaufau i le faamalosiauga a Peresitene Hinckley ia “faateleina le gafatia maoae o loo i totonu o outou” (vaega 6). E mafai faapefea ona tatou maua se vaaiga mamao lelei atu i mea tatou te gafatia o loo silafia e le Atua? E mafai faapefea ona tatou agai i luma i le ausiaina o o tatou gafatia? O le a se taimi na e vaaia ai le “mana … ofoofogia o tamaitai o le faatuatua”?

Mau Fesootai

Faataoto 31:10–31; Luka 10:38–42; Galuega 9:36–40; Roma 16:1–2; 2 Timoteo 1:1–5; Alema 56:41–48

Fesoasoani mo le Aoaoina Atu

“Ao e sauni e aoaoina atu ia lesona taitasi, ia tatalo mo le Agaga ina ia fesoasoani ia te oe ia e iloa le taimi e fetufaai atu ai ou lagona sili ona paia. Atonu e musuia oe ina ia tuuina atu soo lau molimau i le gasologa o le lesona, ae le na o le faaiuga” (O Le Aoao Atu, E Leai Se Isi Valaauga E Sili Ai [1999], 46).