Mataupu 24

O Le Togiola a Iesu Keriso E Maua e Tagata Uma, ma Patino Lona Aafiaga i Tagata Taitoatasi

“Ou te tuuina atu le molimau [e uiga] i le Togiola a le Alii o Iesu Keriso. A aunoa ma lena, e leai se uiga o le olaga. O le maa’au’au o lo tatou olaga.”

Mai le Soifuaga o Gordon B. Hinckley

I le aso 1 o Ianuari, 2000, sa taitaia ai e Peresitene Gordon B. Hinckley le Au Peresitene Sili ma le Korama a Aposetolo e Toasefululua i le lolomiina ma le faasalalauina o le latou molimau aufaatasi e uiga i le Faaola. I lea savali, ua faaulutalaina “O Le Keriso Soifua,” sa latou tautino mai ai: “Matou te tuuina atu la matou molimau i le moni o Lona soifua le mafaatusalia ma le uiga mama faifaipea o Lana taulaga togiola sili. E leai lava se isi ua i ai se aafiaga matua loloto na’uā o i latou uma na soifua ma o le a soifua ai i luga o le fogaeleele.¹

I se lauga i le konafesi aoao i le tolu masina mulimuli ane, sa molimau atu ai Peresitene Hinckley e uiga i le aafiaga loloto o le Faaola i lona lava ia soifuaga. Sa ia saunoa ma le agamalu ma le patino lava, ae o nisi taimi sa tautoai ai i lagona ootia:

“I mea uma o loo ou lagona ai le lotofaafetai i lenei taeao, e tasi o loo tumatilatila lava lona silisili naua. O lena mea o le molimau ola e uiga ia Iesu Keriso, le Alo o le Atua Silisili ese, le Aloalii o le Filemu, le Tasi Paia. …

“O Iesu Keriso o la’u uo. E leai se tasi ua ia tuuina mai ia te au ni mea ua tele naua. ‘E le sili lava le alofa o se tasi i lenei alofa, ia tuuina atu e se tasi lona ola e sui a’i ana uo” (Ioane 15:13). Na Ia foai mai Lona soifua mo au. Na Ia tatalaina le ala i le ola e faavavau. E na o se Atua lava e mafai ona faia lea mea. Ou te faamoemoe o loo o’u agavaa e avea ma uo ia te Ia.

“O Ia o lou faaa’oa’o. O le ala na Ia soifua ai, o Ona uiga e matua le faapito lava, o Lona aapa atu i e le tagolima, ma Lana taulaga faaiu ua tutu uma o se faataitaiga ia te au. E le mafai ona ou agavaa atoatoa, ae e mafai ona ou taumafai. …

“O Ia o le faamalolo ia te au. Ou te tu ma le maofa lava i Ana vavega ofoofogia. E ui lava ou te iloa na tutupu. Ua ou taliaina le moni o nei mea ona ou te iloa o Ia o le Matai o le ola ma le oti. O vavega o Lana auaunaga ua faailoa ai le agalelei, alofa, ma se lagona o le tagata ua matagofie tele i le vaai.

“O Ia o lo’u taitai. Ua faamamaluina au i le avea ma se tasi o le solo umi a i latou o e alolofa ia te Ia, ma mulimuli ia te Ia i le lua afe tausaga ua mavae talu Lona soifua mai. …

“O Ia o lo’u Faaola ma lo’u Togiola. E ala i le tuuina mai o Lona soifua i le tiga ma le puapuaga lemafaamatalaina, na Ia aapa mai ai i lalo ma sii ae au, ma i tatou uma taitoatasi, ma atalii ma afafine uma o le Atua mai le loloto le mafuatiaina o le pogisa e faavavau pe a mavae le oti. Ua Ia saunia se mea sili atu—o se ala o le malamalama ma le malamalamaaga, tuputupu ae ma le matagofie lea e mafai ona tatou agai ai i luma i luga o le ala lea e tau atu i le ola e faavavau. E leai se tuaoi o lo‘u agaga faafetai. E leai foi se faaiuga o la‘u faafetai i le Alii.

“O Ia o lo‘u Atua ma lo‘u Tupu. Mai le vavau e oo atu i le faavavau, o le a nofotupu o Ia ma pule o le Tupu o Tupu ma le Alii o Alii. I Lana pule o le a leai se iuga. I Lona mamalu o le a leai se pouliuli.

“E leai se tasi e mafai ona suia Lona nofoaga. E leai lava ma se tasi o le a mafaia. E atoatoa ma aunoa ma se mea sese o soo se ituaiga, o Ia o le Tamai Mamoe a le Atua, o le ou te ifo i ai ma o le ou te auala atu ai i lo‘u Tama i le Lagi. …

“I le agaga faafetai, ma le alofa e le faaitiitia, ou te molimau atu ai i nei mea i Lona suafa Paia.”²

O Keriso o loo tatalo i Ketesemane — “E faalagolago mea uma ia te Ia—Lana taulaga togiola. … O le maa’au’au lena i le malutaga o le fuafuaga sili [a] le Tama.”

Aoaoga a Gordon B. Hinckley

O le alofa o lo tatou Tama Faalelagi ua faailoaina i le meaalofa o Lona Alo e Toatasi na Fanaua.

E nofo lo’u fatu pe a ou mafaufau i le alofa sili o lo’u Tama Faalelagi. E maeu lo’u lotofaafetai i le iloaina e alofa le Atua ia i tatou. O le loloto lemafaamatalaina o lena alofa ua faailoa i le meaalofa o Lona Alo e Toatasi na Fanaua e afio mai i le lalolagi e aumai le faamoemoe i o tatou loto, e aumai le agalelei ma le agafaatamalii i a tatou mafutaga, ma le mea e sili i mea uma ia laveai i tatou mai i a tatou agasala ma taiala i tatou i luga o le ala lea e taitai atu i le ola e faavavau.³

O le galuega a le Faaola i le muai olaga

Sa tuuina mai e le Tama o i tatou uma, faatasi ma le alofa ia i tatou o Lana fanau, se fuafuaga … e i ai lo tatou saolotoga e filifili ai le ala tatou te ola ai. O Lona Alo Ulumatua, lo tatou Uso Matua, o le autu lea o lena fuafuaga. O le a maua e le tagata lona faitalia, ma e faatasi ai ma lena faitalia o le a tali atu ai mo ia lava. O le a savali le tagata i ala o le lalolagi ma agasala ma tautevateva. Ae o le Alo o le Atua o le a tauaveina i Ona luga i la le tino ma ofo mai o Ia lava e fai ma taulaga e togiola mo agasala a tagata uma. E ala i puapuaga le mafaamatalaina o le a avea ai o Ia ma Togiola maoae, le Faaola o tagata uma.⁴

O le galuega a le Faaola i le lalolagi

I le talafaasolopito atoa e leai ma se mamalu e pei o Lona mamalu. O Ia, le Ieova silisili, na faamaualalo ina ia soifua mai i le olaga faaletino i se faatanoavao i Peteleema. Na Ia tuputupu ae o se tamaitiiti i Nasareta ma na “tupu le poto ma le tino, ua alofagia o ia e le Atua atoa ma tagata” (Luka 2:52).

Sa papatisoina o Ia e Ioane i le vaitafe o Ioritana, “faauta foi, ua faaavanoaina le lagi ia te ia, ua ia iloa atu foi le Agaga o le Atua ua afio ifo e peiseai o se lupe, ua oo i ona luga:

“Faauta foi o le siufofoga mai le lagi, ua faapea mai, O lo‘u Atalii pele lena, ua ou fiafia lava ia te ia” (Mata.) 3:16–17).

I le taimi o le tolu tausaga o Lana auaunaga faalelalolagi, sa Ia faia mea e leai ma se tasi na faia muamua; sa Ia aoao mai mea e leai ma se tasi na aoao maia muamua.

Ona oo mai lea o Lona taimi e taulaga ai. Sa i ai le tausamaaga i le Afeafe Aupito a Luga, o Lana tausamaaga mulimuli lea ma le Toasefululua i le olaga faaletino. A o Ia mulumuluina o latou vae, sa Ia aoao atu se leosna i le lotomaulalo ma le auauna atu o le a le galo lava ia i latou.⁵

O Mafatiaga i le Faatoaga o Ketesemane

O iina na sosoo ai ma puapuaga o Ketesemane, “o le mafatia lea,” na Ia fetalai ai, “na oo ai ia te a‘u lava, o le Atua lava lea, o le ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga” (MF&F 19:18).⁶

I le Faatoaga o Ketesemane, na matuai mafatia tele ai o Ia lea na afu toto ai o ia a o Ia aioi atu i Lona Tama. Ae o nei mea uma o se vaega o Lana taulaga togiola maoae.⁷

[Sa i ai se tasi taimi na ou saofai ai] i le paolo o se laau olive tuai [i le Faatoaga o Ketesemane] ma faitau i lena tauiviga matuia a le Alo o le Atua a o Ia feagai ma le lumanai mautinoa, le afu toto ai ma tatalo i Lona Tama ina ia aveese le ipu pe a mafai—ae fetalai atu, e ui i lea, ia faia Lou finagalo, ae le o lo‘u loto. … Sa ou maua se lagona lofituina sa Ia le‘i faia Lana aioiga, sa le‘i feagai o Ia ma lena tofotofoga e tusa ma tiga faaletino lea sa sauni e fetaiai ai, le faasatauroga matuia ma matautia i luga o le satauro. Ou te mautinoa o se vaega lena. Ae i se fuataga tele, ou te manatu, o se lagona i Lana vaega o Lana matafaioi i le tulaga manuia e faavavau o atalii ma afafine uma o le Atua, i augatupulaga uma o taimi.

O mea uma e faalagolago ia te Ia—Lana taulaga togiola. O le ki lena! O le vaega autu lena i le iloaina o le fuafuaga sili lea na aumai e le Tama mo le ola e faavavau o Ona atalii ma afafine. O le matautia e pei ona feagai ai, ma mamafatu e pei ona iloaina, sa Ia feagai ai, sa Ia faataunuuina, ma o se mea ofoofogia ma matagofie. Ou te talitonu e le mafai ona tatou malamalama atoatoa i ai. Ae ui i lea, tatou te maua sina malamalama itiiti i ai ma e tatau ona aoao ia saga faateleina pea ona talisapaia.⁸

Molia, faasatauro, ma le maliu

Sa aveina o ia e lima malo ma le le mafaufau, ma i le po, e tusa ai ma le tulafono, sa aumai ai o [Ia] i luma o Ana, ona sosoo ai lea ma Kaiafa, le taitai taufaalata ma le amioleaga o le Au Fono. O iina i le taeao po na sosoo ai o le tulai faalua ai lea i luma o lena tamaloa poto leaga ma le loto aasa. Ona avatu ai lea o Ia ia Pilato, le kovana o roma, o le na lapatai atu i ai lana ava, “Ne‘i e mao i lea tagata amiotonu” (Mataio 27:19). O le tagata Roma, i le mafaufau faapea, e aloese mai le tiutetauave, na auina atu o Ia ia Herota, le taitai pi‘opi‘o, agasala ma le amioleaga o Kalilaia. Sa sauaina ma sasaina ai Keriso. Sa faapaleina Lona ao i se paletuitui maamaai; sa lafo atu ma le taufaifai i luga o Lona papatua na lavatoto se ofutele viole. Ma sa toe aveina atu o Ia i luma o Pilato, o le na alalaga atu i ai tagata leaga, “Ina faasatauro ia, ina faasatauro ia ia te ia” (Luka 23:21).

Faatasi ai ma ni laa tautevateva, sa Ia savalia ai le ala i Kolokota, lea sa tutuia ai lona tino na faamanualia i le satauro i se auala o faasalaga aupito sili ona faalealofa ma tiga e mafai ona tuuina atu e ni tagata le alolofa.

Ae sa Ia alaga atu, “Lo‘u Tama e, ia e faamagaloina atu ia te i latou; aua ua latou le iloa le mea ua latou faia” (Luka 23:34).⁹

Ua le toe i ai se mea na sili ona tiga ai lagona i le talafaasolopito atoa nai lo na o Iesu i Ketesemane ma luga o le satauro, na o ia lava: o le Togiola o tagata, le Faaola o le lalolagi, ua faataunuuina le Togiola.

Ou te manatua le faatasi ai ma Peresitene Harold B. Lee … i le Faatoaga o Ketesemane i Ierusalema. Pe ana mafai ona tatou iloa i sina vaega itiiti lava, le tauiviga faigata na faia iina, o se tauiviga na matuai tigaina, a o tauivi toatasi Iesu i le agaga, o lea na sau ai le toto mai puafu uma lava (tagai Luka 22:44; MF&F 19:18). Tatou te manatua le faalataga e le tasi o le sa ia valaauina i se tulaga o le faatuatuaina. Tatou te manatua na tagata leaga na pa‘i atu o latou lima saua i le Alo o le Atua. Tatou te manatua lena tagata ua tuua na o ia i luga o le satauro, na alaga atu i le lototiga, “Lo‘u Atua e, lo‘u Atua e, se a le mea ua e tuulafoai mai ai a‘u?” (Mataio 27:46). Ae peitai, sa agai i luma ma le lototele le Faaola o le lalolagi e faataunuu le Togiola e fai ai ma o tatou sui.¹⁰

Sa mavae atu le tele o itula a o fai ifo Lona soifua i le tiga. Sa luluina le lalolagi ma na saeluaina le ie o le malumalu. Mai ona laufofoga mavaevae na sau ai upu, “Lo‘u Tama e, ou te tuuina atu lo‘u nei agaga i ou aao: ua na fetalai ia upu, ona to ai lea o lana manava” (Luka 23:46).

Ua mae‘a. Ua muta Lona soifua i le olaga faitno, Ua Ia ofoina atu o se tau mo tagata uma. Ua o ese atu faamoemoe o i latou na alofaina o Ia. Ua galo folafolaga sa Ia faia. Sa faanatinati ae sa faapelepele le tuuina o Lona tino i totonu o se tuugamau na faanoiina i le afiafi o le vai Sapati faaIutaia.¹¹

Toetu

I le taeao po o le Aso Sa, na o mai ai Maria le Makatala ma isi fafine i le tuugamau. Sa latou manatunatu a o latou faatopetope atu pe mata o le a faapefea ona aveese le maa mai le gutu o le tuugamau. O le taunuu atu, sa latou vaaia ai se agelu o le na fai atu ia i latou: “Ua ou iloa ua oulua sailia mai Iesu na faasatauroina.

“E le o iinei o ia: aua ua toe tu mai o ia” (Mataio 28:5–6).

Sa le‘i tupu muamua lava. O le tuugamau avanoa o le tali lea i le fesili taua ua loa ona fesiligia. Na faamatalaina lelei e Paulo e faapea: “Le oti e, o fea o i ai lou tui? Le tuugamau e, o fea o i ai lou manumalo?” (1 Kori. 15:55).¹²

O le a toetutu tagata uma mai le tuugamau, e ala i le taulaga togiola a le Faaola.

O le vavega o lena taeao o le toetu … o se vavega mo tagata uma. O le vavega o le mana o le Atua, o lona Alo Pele lea na tuuina mai Lona soifua e togiola mo agasala a tagata uma, o se taulaga o le alofa mo atalii ma afafine uma o le Atua. I le faia o lea mea ua Ia motusia ai noataga o le oti.¹³

E leai se mea e sili atu ona aoao nai lo o le oti, ma e leai se mea e sili atu ona susulu i le faamoemoe ma le faatuatua nai lo le faamautinoaga o le tino ola pea. O le faanoanoa ogaoga lea e o mai faatasi ma le oti, o le faavauvau lea e sosoo mai ma le maliu o se tasi e pele, e na o le mautinoa o le Toetu o le Alo o le Atua e faate‘a ai le tiga. …

Soo se taimi lava e faalava mai ai le aao malulu o le oti, o le a susulu mai i le pouliuli ma le pogisa o lena taimi faanoanoa le foliga manumalo o le Alii o Iesu Keriso, o Ia, o le Alo o le Atua, o Lona mana e le mafaatusalia ma faavavau na faatoilalo ai le oti. O Ia o le Togiola o le lalolagi. Sa Ia foai mai Lona soifua mo i tatou taitoatasi. Sa Ia toe tu mai ma avea ma uluai fua o i latou o e na momoe. O Ia, o le Tupu o Tupu, ua tu manumalo i luga a‘e o tupu uma. O Ia, o Le e Puleaoao, ua tu i luga a‘e o taitai uma. O Ia o lo tatou fesoasoani, o lo tatou fesoasoani moni e tasi, pe a ufitia i tatou e le ao pogisa pe a tuua e le agaga le tino o le tagata.

E matilatila i luga a‘e o tagata uma o loo tu ai Iesu le Keriso.¹⁴

Ou te manatua lo‘u lauga ai i se sauniga o le maliu o se tamalii lelei, o se uo o lona agalelei na mafua ai ona ou oo i le lelei teisi atu. I le tele o tausaga na ou iloa ai ana ataata, ana upu alofa, le ala na galue ai lona mafaufau atamai, le aofaiga tele o ana auaunaga i isi. Ona faafuasei lea ona maliu o ia o le sa ese le atamai ma le lelei. Sa ou vaavaai atu i lona tino maliu. Sa na le iloa mai a‘u pe minoi pe tautala mai. …

Sa ou tepa atu i lona toalua ma lana fanau o loo fetagisi. Ua latou iloa, e pei ona ou iloa, o le a latou le toe faalogoina i le olaga nei lona leo. Ae o se agalelei matagofie, e le mafaamatalaina lona uiga, na aumaia ai se toafilemu ma le faamautinoaga. E foliga mai na fai mai, “Ina soia, ma ia outou iloa o a‘u lava o le Atua” (Salamo 46:10).

Na foliga mai sa faaopoopo mai, “Aua le popole. O nei mea uma o le vaega o la’u fuafuaga. E leai se tasi e mafai ona sao mai i le oti. Na oo lava i lo’u Alo Pele na faapea ona maliu i luga o le satauro. Ae e ala i le faia o lena mea, na avea ai o Ia ma uluai fua faamamaluina o le Toetu. Sa ia aveese mai le oti lona tui ma mai le tuugamau lona manumalo.”

E mafai ona ou faalogoina i lo’u mafaufau le fetalai mai o le Alii ia Mareta loto faavauvau: “O a’u nei o le toetu ma le ola: o lē faatuatua mai ia te a’u, e ui lava ina oti, a e ola lava ia: O tagata ola uma o e faatuatua mai ia te a’u, e le oti lava” (Ioane 11:25–26).¹⁵

E ala i le taulaga togiola a le Faaola, ua ofoina mai ai ia i tatou le avanoa o le faaeaga ma le ola e faavavau.

Ia faafetaia le Silisili Ese. Ua motusia e Lona Alo faamamaluina noataga o le oti, o le manumalo silisili i mea uma. … O Ia o lo tatou Alii manumalo. O Ia o lo tatou Togiola, o le na togiola mo a tatou agasala. E ala mai i Lana taulaga togiola o le a toetutu uma ai tagata mai le tuugamau. Ua Ia tatalaina le ala ina ia mafai ai ona tatou maua e le gata o le tino ola pea ae faapea foi ma le ola e faavavau.¹⁶

Ua ou iloa i sina ala itiiti le uiga o Lana Togiola. E le mafai ona ou malamalama atoa i ai. E ui lava ina avanoa mo tagata uma, ae e i ai ona aafiaga loloto ia i tatou taitoatasi e faapea ona teena ai le malamalama.¹⁷

O le ofoofogia o [le] Togiola e le oo i ai lo tatou tomai e malamalama atoa ai i ai. Na pau le mea ua ou iloa sa tupu, ma sa faia mo au ma oe. Sa matua tele le puapuaga, sa ogaoga ia tiga, ma e leai se tasi o i tatou e mafai ona malamalama i ai ina ua ofoina atu e le Faaola o Ia lava e totogi ai le tau mo agasala a tagata uma.

O Ia ua tatou maua ai le faamagaloga. O Ia na oo mai ai le folafolaga patino e faapea, o le a tuuina atu i tagata uma faamanuiaga o le faaolataga, faatasi ma le toetu mai le oti. O Ia ma Lana taulaga taua tele ua tatou maua ai le avanoa e ala i le usiusitai, o le faaolataga ma le ola e faavavau.¹⁸

Pe le o i tatou uma ea o atalii ma afafine faamaumau oa, o e e manaomia ona salamo ma tofo i le faamagaloga alofa mutimutivale a lo tatou Tama Faalelagi ona mulimuli lea i Ana faataitaiga?

O Lona Alo Pele, o lo tatou Togiola, ua aapa mai ia i tatou i le faamagaloga ma le alofa mutimutivale, ae o le faia o lena mea ua ia poloai mai ai le salamo. … Na fetalai mai le Alii—ma ou te sii atu mai se faaaliga na tuuina mai i le Perofeta o Iosefa:

“O lea Ou te poloai atu ai ia te oe ia e salamo—salamo, ne’i Ou taia oe i le tootoo o lo’u gutu, ma i lo’u toasa, ma i lo’u ita, ma tiga tele ai ou mafatiaga—o le a le tetele o le tiga e te le iloa, o le a le malosi e te le iloa, ioe, o le a le faigata ona onosaia e te le iloa.

“Aua faauta, o A’u le Atua na puapuagatia i nei mea mo tagata uma, ina ia latou le puapuagatia pe afai latou te salamo;

“A e peitai, afai latou te le salamo e ao ina latou tiga e pei o A’u;

“O le tiga lea na faagateteina ai a’u lava, o le Atua, le silisili ese i mea uma, ona o le tiga, ma na maligi ai le toto mai pu laiti uma lava o le tino, ma na tiga le tino atoa ma le agaga. …

“Aoao mai ia te a’u, ma faalogo mai i a’u upu; savali i le agamalu o lo’u Agaga, ma o le a e maua ai le filemu ia te a’u.” (MF&F 19:15–18, 23.)¹⁹

I le faaiuga, pe a uma ona iloiloina uma le talafaasolopito, pe a suesueina vaega loloto uma o le mafaufau o le tagata, e leai se mea e matuai matagofie, matuai mamalu, matuai tele e pei o lenei faatinoga o le alofa tunoa, ina ua tuuina mai e le Alo o le Silisili Ese, le Aloalii o le aiga tautupu o Lona Tama, o le sa ta’ua o Ieova, o le na afio ifo e sau i le lalolagi o se pepe meamea e fanau i Peteleema, ia Lona soifua i se ala faalumaina ma le tiga ina ia mafai e atalii ma afafine uma o le Atua i augatupulaga uma o taimi, o tagata uma o e e tatau ona oti, ona toe savavali ma ola e faavavau. Na Ia faia mo i tatou le mea sa le mafai e se tasi o i tatou ona faia mo i tatou lava. …

Sa tautino mai le perofeta o Isaia:

“E moni, ua Ia tauave o tatou tiga, ma Ia tauave o tatou faanoanoaga: …

“… Sa manu’a o Ia mo a tatou solitulafono, sa totolia o ia mo a tatou amioletonu: sa i ona luga le aoaiga mo lo tatou filemu; ma o ona faalavalava ua faamaloloina ai i tatou” (Isa. 53:4–5).

O le tala ofoofogia ma moni lenei o le Kerisimasi. O le soifua mai o Iesu i Peteleema i Iutaia o le faatomuaga lea. O tausaga e tolu o le galuega a le Matai o le folasaga lea. O le aano mataina o le tala o Lana taulaga, o le galuega matuai le manatu faapito o le maliu ma le tiga i luga o le satauro i Kalevaria ina ia togiola ai mo agasala a i tatou uma.

O le faaiuga o le vavega o le Toetu, ua aumaia ai le faamautinoaga e faapea “aua faapei ona oti uma ia Atamu, e faapea foi ona faaolaina uma ia Keriso” (1 Kori. 15:22).

O le a leai se Kerisimasi pe ana faapea e leai se Eseta. O le pepe o Iesu o Peteleema o le a pei o se isi lava pepe e aunoa ma le Keriso togiola o Ketesemane ma Kalevaria, ma le manumalo moni o le Toetu.

Ou te talitonu i le Alii o Iesu Keriso, le Alo o le Atua Soifua Faavavau. E leai se tagata ua sili atu na femaliuai i le lalolagi. E leai lava se isi tagata na faia se taulaga e lata i ai ma tuuina mai se faamanuiaga e pei o lea. O Ia o le Faaola ma le Togiola o le lalolagi. Tatou te talitonu ia te Ia. Ou te tautino atu Lona mamalu e aunoa ma le faa’alo’alo po o se fetuutuunaiga. Ou te alofa ia te Ia. Ou te tautala i Lona suafa i le migao ma le ofo. Ou te tapuai ia te Ia e pei ona ou tapuai i Lona Tama, i le agaga ma i le upumoni. Ou te faafetai ia te Ia ma tootuli i luma o Lona Alo Pele, o le ua leva ona aapa mai ma fetalai mai ia i tatou taitoatasi, “Ia outou o mai ia te a’u, o outou uma o e tigaina ma mafatia i avega, o a’u foi e malolo ai outou” (Mataio 11:28).

… Ou te manao ia taitasi outou ma faaavanoa se taimi, atonu pe na o se itula, e faaalu e manatunatu filemu ma tomanatu lemu i le maofa ma le mamalu o lenei, le Alo o le Atua.²⁰

Ou te tuuina atu le molimau [e uiga] i le Togiola a le Alii o Iesu Keriso. A aunoa ma lena, e leai se uiga o le olaga. O le maa’au’au o lo tatou olaga. E faamautinoa ai sa tatou ola muamua ae tatou te lei fananau mai i le olaga faitino. O le olaga faitino o se laasaga i se olaga e sili atu ona mamalu i le lumanai. Ua faamafanafanaina le faanoanoa i le oti, i le folafolaga o le Toetu.²¹

O Iesu o le Keriso, o le Alo o le Atua na muaifaauuina o le na afio ifo e sau i le lalolagi, o le sa soifua i se faatanoa vao, i se atunuu na faoa ma i ni tagata sa pulea e se isi atunuu, o le Alo o le Atua, o le Toatasi na Fanaua o le Tama i le tino, o le Ulumatua a le Tama ma le Mataisau o lo tatou faaolataga. O Ia o lo tatou Togiola, lo tatou Faaola, o lana Togiola ua mafai ai ona maua le ola e faavavau mo tagata uma o e savavali ma le usiusitai i Ana aoaoga.²²

Fautuaga mo Suesuega ma le Aoaoina Atu

Fesili

Aisea na tuuina mai ai e le Tama Faalelagi ia i tatou le “meaalofa o Lona Alo e Toatasi na Fanaua”? (Tagai vaega 1.) O a ni mea e mafai ona e faia e faaali atu ai lou agaga faafetai mo lenei meaalofa? O a ni ou manatu ma ni ou lagona a o e faitau i le aotelega a Peresitene Hinckley o le mea na faia e le Faaola mo i tatou?
I le vaega e 2, faatusatusa upu o loo faaaoga e Peresitene Hinckley e faamatala ai le oti ma upu o loo ia faaaogaina e faamatala ai le toetu. O le a se mea e te aoaoina mai i le eseesega o nei faaupuga? O le a se aafiaga o lou olaga i lau molimau e uiga i le Toetu o le Faaola?
O le a se mea ua e aoaoina mai le molimau a Peresitene Hinckley e uiga i le Togiola a Iesu Keriso? (Tagai vaega 3.) O faapefea ona faamanuiaina patino oe e le Togiola? O a ni ou lagona a o e mafaufau loloto i le taulaga a le Faaola mo oe? Ia fuafua se taimi e “manatunatu filemu ma tomanatu lemu” ai e uiga i le Faaola.

Mau Fesootai

Isaia 53; Ioane 3:16; 11:25; 2 Nifae 9:6–13; Alema 7:11–13; 34:8–10; Helamana 14:13–19; MF&F 18:10–12

Fesoasoani mo le Aoaoina Atu

“A o e sauniuni ma le lototatalo e aoao atu, e mafai ona taitaiina oe e faamamafa ni mataupu faavae patino. E mafai ona e maua se malamalama i le ala e sili ona e tuuina atu ai ni manatu patino. Atonu o le a e iloaina ia faataitaiga, lesona faatino, ma ni tala musuia i gaoioiga faigofie o le olaga. Atonu e te maua le lagona uunai e valaaulia se tagata faapitoa e fesoasoani atu i le lesona. Atonu o le a e manatua se aafiaga patino e mafai ona e faasoa atu”(Aoao Atu E Leai Se Isi Valaauga e Sili Ai [1999], 48).