E Faaauau Pea Le Savaliga!
O le savaliga e toe foi atu i lo tatou Tama Faalelagi o se savaliga taua tele i o tatou olaga.
O le selau fitusefulu tausaga talu ai, sa tagatagai atu ai Polika Iaga i le Vanu o Sate Leki mo le uluai taimi ma tautino atu, “O le nofoaga tonu lenei!” Na ia iloa le nofoaga aua sa faaali e le Alii ia te ia.
E oo atu i le 1869 ua silia ma le 70,000 le Au Paia ua faia lea lava savaliga e tasi. E ui i le tele o o latou eseesega i le gagana, aganuu, ma tulaganuu, sa latou faasoaina se molimau i le Tama, le Alo, ma le Agaga Paia, o le Toefuataiga o le talalelei a Iesu Keriso, ma se manao e fausia Siona—o se nofoaga o le filemu, fiafia, ma le matagofie e sauniuni ai mo le Afio Mai Faalua o le Faaola.
Na i ai faatasi ma na uluai Au Paia ia na taunuu i Iuta ia Jane Manning James—o le afafine o se pologa ua faasaoloto, o se tagata liliu mai i le Ekalesia toefuataiina, ma se soo mataina o le na fetaiai ma ni luitau faigata. Sa tumau faamaoni Sister James o se tagata o le Au Paia o Aso e Gata Ai seia oo i lona maliu i le 1908.
Na ia tusia: “Ou te fia tau atu ii, o lo’u faatuatua i le talalelei a Iesu Keriso, e pei ona aoaoina e Le Ekalesia a Iesu Keriso o le Au Paia o Aso e Gata Ai, e tutusa lava le malosi i le asō, leai, atonu, ua malosi atu nai lo le aso na ou muai papatiso ai. Ou te totogiina a’u sefuluai ma taulaga, tausia le upu o le poto, ou te vave moe ma vave ala, ou te taumafai i o’u auala vaivai e seti se faataitaiga lelei i tagata uma.”
O Sister James, e pei o le toatele o isi Au Paia o Aso e Gata Ai, e le gata na fausia Siona i le toto, afu, ma loimata ae sa sailia foi ia faamanuiaga a le Alii e ala i le ola ai i mataupu faavae o le talalelei i le mea sili na te mafaia a o tumau ai i le faatuatua ia Iesu Keriso—o le fomai sili mo tagata uma o e sailia ma le faamaoni o Ia.
O le Au Paia anamua sa le atoatoa, peitai sa latou faatulagaina se faavae lea ua tatou fausia ai aiga ma se lalolagi e fiafia ma osia ia feagaiga, lea ua faamamafaina i tala fou eseese i le salafa o le lalolagi ona o la tatou tautinoga ia Iesu Keriso ma a tatou taumafaiga ofo fua atu e fesoasoani ia i latou o e lata mai ma mamao ese atu.
Peresitene Eyring, sei ou faaopoopo atu i lau faamamaluga le agaga talisapaia i le faitau sefulu afe o agelu mitiafu samasama loo auauna atu i Texas, Mekisiko, ma isi nofoaga.
E i ai sou talitonuga loloto afai e aveesea o tatou sootaga ma i latou o e ua muamua atu ia i tatou, e aofia ai o tatou augatama ma augatina paionia, o le a aveesea mai ia i tatou se oa taua. Na ou talanoa e uiga i le “Faatuatua i Tulaga Aoao Uma” i le tuanai ma o le a faaauau pea i le lumanai ona ua ou iloa e tatau ona maua e le tupulaga faiae lea lava ituaiga o faatuatua sa i ai i le Au Paia anamua e uiga i le Alii o Iesu Keriso ma Lana talalelei toefuataiina.
Sa i ai faatasi foi ou augatama ma augatina paionia ma na paionia faamaoni o e na tuleia taavale tosolima, tietie i taavale solofanua, ma savavali i Iuta.Sa ia i latou, e pei o Sister Jane Manning James, le faatuatua loloto i o latou tulagavae a o latou faia se latou lava savaliga.
Ua faatumulia a latou api o talaaga i faamatalaga o faigata, fiaaai, ma gasegase atoa ai ma molimau o lo latou faatuatua i le Atua ma le talalelei toefuataiina a Iesu Keriso.
Na i ai ni a latou oloa faalelalolagi ae sa fiafia i le tele o faamanuiaga mai le tulaga faaleusoga o alii ma tamaitai sa latou mauaina i le Ekalesia a Iesu Keriso. Pe a mafai ona latou faia, latou te siitia ae e ua lotovaivai ma faamanuia i e ua mamai e ala i le auaunaga a le tasi i le isi ma e ala i le perisitua a le Atua.
O tuafafine sa i ai i le Vanu o Cache, Iuta, na auauna atu i le Au Paia i le agaga o le Aualofa ina ia “galulue ma le lotogatasi ma fesoasoani ia i latou e le tagolima.” O le tina o lo’u tina matua o Margaret McNeil Ballard sa ia auauna soosootauau ma lana tane, o Henry, a o ia pulefaamalumalu ai o se epikopo i le Uarota Lua a Logan mo le 40 tausaga. Sa avea Margaret ma peresitene o le Aualofa mo le 30 o na tausaga. Sa ia aveina atu i lo latou fale e matitiva, mamai, fafine ua oti a latou tane ma tamaiti ua matua oti, ma sa ia faalaeiina i latou ua maliliu i o latou laei mama o le malumalu.
E ui e talafeagai ma taua le manatua o le savaliga faasolopito a paionia Mamona i le seneturi lona 19, ae e manaomia le tatou manatuaina o “loo faaauau pea le savaliga i le olaga” mo i tatou taitasi a o tatou faamaonia atu lo tatou lava “faatuatua i tulaga aoao uma.”
E le o toe potopoto ia tagata fou liliu mai i nofoaga o paionia i sisifo o le Iunaite Setete. Ae, ua potopoto tagata liliu mai i a latou faapotopotoga i le lotoifale, lea e tapuai ai le Au Paia i lo tatou Tama Faalelagi i le suafa o Iesu Keriso. Ma le silia ma le 30,000 faapotopotoga ua faatuina i le salafa o le lalolagi, ua tatou potopoto i la tatou lava Siona. E pei ona taua i tusitusiga paia, “O Siona lenei—o e ua loto mama.”
A o tatou savalia le ala o le olaga, ua tofotofoina i tatou e vaavaai atu pe o le a tatou “vaai [ua] fai mea uma o soo se mea ua poloaiina ai o ia [e le Alii].”
O le toatele o i tatou o loo faia ni malaga ofoofogia o le sailiga—e taitai atu ai i le faamalieina patino ma le faamalamalamaina faaleagaga. Ae, o nisi o i tatou, o loo i ai i se savaliga lea e taitai atu ai i le faanoanoa, agasala, ita, ma le faavauvau.
I lenei tulaga, faamolemole fesili ifo ia te oe lava: O le a lou taunuuga mulimuli? O fea o aveina atu i ai oe e ou tulagavae? Ma o taitai atu oe e lau faigamalaga i lena “faatelega o manuia” ua folafola mai e le Faaola?
O le savaliga e toe foi atu i lo tatou Tama Faalelagi o se savaliga taua tele i o tatou olaga, ma e faaauau pea i aso taitasi, vaiaso taitasi, masina taitasi, ma tausaga taitasi a o faateleina lo tatou faatuatua ia te Ia ma i Lona Alo Pele, o Iesu Keriso.
E ao ona tatou faaeteete i le mea e aveina atu i ai i tatou e o tatou tulagavae i le olaga. E ao ona tatou mataala ma faalogo i le fautuaga a Iesu i Ona soo a o Ia tali atu i fesili nei: “Ia e fetalai mai ia te i matou pe oo afea ia mea? pe se a foi le faailoga o lou maliu mai, ma le galuega o le lalolagi?
“Ma sa tali atu Iesu, ma fetalai atu ia te i latou: Ia outou, nei faaseseina outou e se tasi.”
I le asō ou te toe taua fautuaga anamua mai taitai o le Ekalesia.
-
Uso e ma tuafafine, tausi ia mama le aoaoga faavae a Keriso ma aua nei faaseseina e i latou o e suia le aoaoga faavae.O le talalelei a le Tama ma le Alo sa toefuataiina e ala mai ia Iosefa Samita, o le perofeta mo lenei tisipenisione mulimuli.
-
Aua nei faalogo ia i latou o e e leifaauuina ma/pe ua vaetofia i o latou valaauga faale-Ekalesia ma ua aloaia i le finagalo autasi o tagata o le Ekalesia.
-
Ia nofouta i faalapotopotoga, vaega, po o tagata taitoatasi e faia tali faalilolilo i fesili faaleaoaoga faavae lea latou te fai mai o aposetolo ma perofeta o aso nei e le maua pe malamalama.
-
Aua nei faalogo atu ia i latou o e faatosinaina outou i gaoioiga e vave ai ona tamaoaiga. Ua tele naua tupe a o tatou tagata ua leiloloa, o lea ia faaeteete ai.
I nisi nofoaga, o le toatele naua o o tatou tagata o loo vaavaai i talaatu o le faailoga ma saili ni atamai faalilolilo i faataitaiga taugata ma fesiligia ia saunia ai ni faamalologa ma le lagolagosua.
O se faamatalaga aloaia a le Ekalesia, na faasilasila atu i le tausaga ua tea, e faapea: “Matou te uunaia tagata o le Ekalesia ina ia faaeteete i le auai atu i soo se vaega e faia folafolaga—faafesuiai mo tupe—faamalologa faavavega pe o faapea mai ua i ai ni metotia faapitoa mo le mauaina o le mana o le faamalologa i fafo atu o le e umia le perisitua ua faauuina tatau.”
Ua fautua mai le Tusitaulima a le Ekalesia: “E le tatau i tagata ona faaaogaina ia faiga faafomai pefaale-soifua maloloina ia e fesiligia i tulaga o le tonu ma le sao po o le faatulafonoina. E tatau i taitai i le lotoifale ona fautuaina tagata o le ekalesia o i ai ni faafitauli tau le soifua maloloina ina ia vaai ni fomai atamamai ua laiseneina i atunuu o loo latou galulue ai.”
Uso e ma tuafafine, Ia atamamai ma mataala ona o na ituaiga o faiga atonu e faatosina faalelagona ae e mafai ona faamaonia mulimuli ane e lamatia ai le faaleagaga ma faaletino.
Mo o tatou augatuaa paionia, o le saoloto ma le ola tutoatasi sa taua tele, ae sa taua foi lo latou lagona faalenuu. Sa latou galulue faatasi ma fesoasoani le tasi i le isi e foia luitau faaletino ma faalelagona o lo latou taimi. Mo alii, sa i ai le korama a le au perisitua, ma o tamaitai na auauna atu i ai le Aualofa. O nei taunuuga e lei suia lava i o tatou aso.
O le Aualofa ma korama a le au perisitua e saunia mo le soifua laulelei faaleagaga ma faaletino o o tatou tagata.
Tumau i le ala o le talalelei i le mauaina o le “faatuatua i tulaga aoao uma” ina ia mafai ona e toe foi saogalemu atu i le afioaga a le Tama Faalelagi ma le Alii o Iesu Keriso. O le Alii o lo tatou Faaola pele. O Ia o le Togiola o le lalolagi. E tatau ona tatou faamamaluina Lona suafa ma aua nei faaaogaina sese i soo se auala, ma taumafai pea e tausi Ana poloaiga.Afai tatou te faia, o le a Ia faamanuiaina i tatou ma taitai saogalemu atu i tatou i le aiga.
Ou te valaaulia tagata uma o loo lagonaina lo’u leo ina ia talisapaia ma opomauaina soo se tasi o e o loo faia sana lava savaliga i le asō, po o fea lava o latou i ai i la latou faigamalaga.
Faamolemole ia manatua e leai se faamanuiaga sili atu e mafai e se tasi ona faasoaina atu nai lo le savali o le Toefuataiga, lea a mauaina ma ola ai, ua folafola mai le olioli ma le filemu tumau—e oo lava i le ola e faavavau. Sei o tatou faaaogaina lo tatou malosiaga, malosi, ma molimau e fesoasoani atu ai i o tatou faifeautalai ina ia saili, aoao atu, ma papatiso le fanau a le Atua ina ia latou maua le mana o le aoaoga faavae o le talalelei e taitai ai o latou olaga i aso taitasi.
E tatau ona tatou taliaina ma le agaalofa fanau a le Atua ma faaitiitia soo se faaituau, e aofia ai le faailogalanu, faailoga tagata, ma le manatu faapito. Ia faapea ona tau atu ua tatou talitonu moni o faamanuiaga o le talalelei toefuataiina a Iesu Keriso e mo fanau uma a le Atua.
Ou te molimau atu o loo “faaauau pea le savaliga,” ma ou te valaaulia outou ina ia tumau ai i le ala o le talalelei a o faaauau pea ona e fetaomi atu i luma i le aapa atu i fanau uma a le Atua i le alofa ma le agalelei ina ia mafai ona tatou faamamaina faatasi o tatou loto ma mama o tatou lima e talia ai le “faatelega o manuia” o loo faatalitali mai mo i latou uma o e alolofa moni i lo tatou Tama Faalelagi ma Lona Alo Pele, lea ou te tatalo atu ai ma le faamaulalo i le suafa o Iesu Keriso, amene.