Tiakono

Vaaiga Aoao

O le perisitua o le mana ma le pule a le Atua. E mafai e alii talavou agavaa ona maua le Perisitua Arona e tuuina atu i o latou luga e amata ia Ianuari o le tausaga e atoa i ai lo latou ta’i 12 tausaga. I lena taimi, e faauuina ai foi i latou i le tofi o le tiakono—o se tofi e masani ona latou umia seia oo i le tausaga e atoa i ai lo latou ta’i 14 tausaga.

O Tiakono e faatulagaina i ni korama i totonu o a latou uarota ma paranesi. O korama taitasi e pulefaamalumalu ai se tiakono o lē ua vaetofia o se peresitene ma lē ua umia ki o le perisitua e taitai ai le korama (tagai Tusitaulima 2: Taitaiina o le Ekalesia, 8.3.2; Mataupu Faavae ma Feagaiga 107:85).

O le au epikopo o le au peresitene lea o le Perisitua Arona (tagai Mataupu Faavae ma Feagaiga 107:15). O le fesoasoani lua i le au epikopo e faufautua faatasi ma le korama a tiakono ma aoao i latou i tiute o lo latou tofi.

O tiutetauave o se tiakono e aofia ai mea nei (tagai Tusitaulima 2, 8.1.1.1):

Na te tufaina le faamanatuga.
O ia “e tofia e leoleo i luga o le ekalesia” (Mataupu Faavae ma Feagaiga 84:111). E tatau foi ona ia “lapatai atu, faamalamalama atu, apoapoai atu, aoao atu, ma valaau atu i tagata uma ia o mai ia Keriso” (Mataupu Faavae ma Feagaiga 20:59). O lea tiutetauave e aofia ai ma le faaaumeaina o tagata o le korama ma isi alii talavou, faailoa i uso o le korama sauniga Lotu, lauga i sauniga, faasoa atu le talalelei, ma le tuuina atu o molimau.
E fesoasoani o ia i le epikopo i le “faia o … mea faaletino” (Mataupu Faavae ma Feagaiga 107:68). O lenei tiutetauave e mafai ona aofia ai le aoina o taulaga anapogi, tausia o e matitiva ma lē tagolima, tausia o falelotu ma lotoa, auauna atu o se avefeau mo le epikopo i sauniga Lotu.
E fesoasoani o ia i le au epikopo i isi auala e tusa ai ma le tofi o se tiakono. E fesoasoani foi o ia i aoao “i [o latou] tiute uma i le ekalesia pe afai e manaomia ai i se tulaga” (Mataupu Faavae ma Feagaiga 20:57).