Mataupu 15

Faamanatuga o le Talisuaga a le Alii

“A o tago [Iesu] i le areto ma tofitofi, ma tago foi i le ipu ma faamanuia, sa ia tuu atu ia lava o leTamai Mamoe a le Atua o le o le a aumaia le faafailelega faaleagaga ma le olataga e faavavau.”

Mai le Soifuaga o Howard W. Hunter

Sa tausia Howard W. Hunter e se tina malosi o le Au Paia o Aso e Gata Ai, ma se tama lelei e lei auai o ia i se lotu i le taimi lea. E lei tetee le tama i le auai i le Ekalesia—sa o foi o ia ma le aiga i le sauniga faamanatuga i nisi aso—ae e lei manao e papatiso lana fanau ina ua ta’i 8 o la tausaga. Sa manatu o ia e le tatau ona la faia lena faaiuga seia matutua atu. Ina ua atoa le 12 o Howard, sa le mafai ona ia maua le Perisitua Arona ma faauuina o se tiakono aua e lei papatiso. E ui lava sa mafai ona ia auai ma alii talavou i isi gaoioiga, ae sa matua le fiafia lava Howard ona sa le mafai ona ia tufaina le faamanatuga ma i latou.

“Sa ou nofo i le sauniga faamanatuga ma isi tamaiti,” sa ia tomanatu ai. “A oo i le taimi latou te o ai e tufa le faamanatuga, ona ou faanounou ifo lea i lo’u nofoa. Sa ou matua lagonaina le le taulia. Sa ou manao e tufa le faamanatuga, ae sa le mafai aua ou te lei papatiso.”¹

Toeitiiti atoa le lima masina talu ona uma lona aso fanau lona 12, sa tauanau ai e Howard lona tama e faataga o ia e papatiso. E lei umi mulimuli ane ai, ae faauu e avea o se tiakono. “Ou te manatua le uluai taimi na ou tufaina ai le faamanatuga,” na ia fai mai ai. “Sa ou fefe, ae sa ou matuai fiafia ua maua le avanoa. Ina ua uma le sauniga sa faafetai mai le epikopo ia te au i le ala na ou faatinoina ai.”²

Ina ua tofia Howard W. Hunter o se Aposetolo, sa auai e le aunoa o ia i le faatinoga o le sauniga faamanatuga ma isi Au Pulega Aoao i le Malumalu o Sate Leki. Sa faamatala e Elder David B. Haight, o le sa galulue faatasi ma Elder Hunter i le Korama a le Toasefululua, le aafiaga o le faalogo atu ia te ia o faamanuia le faamanatuga:

“Maimau pe ana mafai e tamaiti o le Perisitua Arona i le Ekalesia atoa ona maua le avanoa lea e tasi e faalogo ai ia Elder Howard W. Hunter o faamanuia le faamanatuga pei ona sa matou faia ai i le malumalu. O ia o se molimau faapitoa a Keriso. A o ou faalogo atu ia te ia o aioi atu i lo tatou Tama Faalelagi e faamanuia le faamanatuga, sa ou lagonaina le loloto o le faaleagaga i lona agaga. Sa manino ma anoa upu taitasi. E lei televave, pe faatopetope o ia. Sa avea o ia ma fofoga mo Aposetolo uma e talanoa i le Tama Faalelagi.”³

O tala ia e faamatala ai le migao o Peresitene Hunter i lona soifuaga atoa mo faatusa paia o le taulaga togiola a Keriso.

E pei ona faaalia i aoaoga i le mataupu lea, o se tasi o auala na sailia e Peresitene Hunter e fesoasoani ai i tagata o le Ekalesia ia malamalama i le taua o le faamanatuga, o le faamalamalama lea o lona sootaga i le faamanatuina anamua o le Paseka, ma toe iloilo le folasia mai e le Faaola o lenei sauniga i le taimi o se tausamaaga o le Paseka ma Ona soo.

O Keriso i le Talisuaga Mulimuli — “Ia outou faia lenei mea ma faamanatuga ia te au(Luka 22:19).

O Aoaoga a Howard W. Hunter

Na tautino mai e le Paseka o le oti e leai sona mana tumau ia i tatou.

[O le Paseka] o sauniga faamanatu aupito leva ia a le au Iutaia, e faamanatu ai se mea na tupu a o lei mauaina le Tulafono a Mose. E faamanatu ai i augatupulaga uma le toe foi o le fanauga a Isaraelu i le nuu folafolaina, ma tofotofoga faigata na latou feagai i Aikupito a o lei foi atu. E faamanatu ai le o ese mai o se nuu mai pulega saua ma le pologa i se saolotoga ma le faasaoina. O le sauniga i le Feagaiga Tuai i le taimi o le tautotogo pe a alafa’i mai le natura o le lalolagi i le ola, tuputupu a’e, ma fuāta.

E fesootai le Paseka ma le faamamaluina e Kerisiano o le Eseta. … O le Paseka [ma le Eseta] e molimauina le meaalofa sili a le Atua na tuuina mai faapea foi le taulaga sa aofia ai ma lona faaeeina mai. O nei faamanatuga tele faalelotu e lua e tautino mai ai o le oti o le a “sopo loa” mai ia i tatou, ma o le a le i ai sona mana tumau i o tatou luga, ma o le a le manumalo lava le tuugamau.

I le faasaolotoina o le fanauga a Isaraelu mai Aikupito, o Ieova lava ia na fetalai ia Mose mai le laau talatala na mu i sinai ma faapea mai:

“Ua ou matua vaai atu i le puapuaga o lo’u nuu o loo i Aikupito, ua ou faalogo atu foi i lo latou alaga ona o e pule faasaua ia i latou; ua ou iloa foi lo latou tiga. …

O lenei, ina sau ia, ou te auina atu oe ia Farao, ina ia e aumai lo’u nuu, o le fanauga a Isaraelu mai Aikupito.” (Eso. 3:7, 10.)

Talu ai sa le matuu mai le loto o Farao, o lea sa tele mala na oo mai i Aikupito ae sa “faamaaaina lava le loto o Farao, e lei tuuina atu lava le fanauga a Isaraelu e o.” (Eso. 9:35.)

I le tali atu i lena musu o Farao, na fetalai atu ai le Alii, “Ona oti ai lea o ulumatua uma i le nuu o Aikupito, e afua i le ulumatua a Farao, o le tietie i lona nofoalii, e oo lava i le ulumatua a le auauna fafine o loo i tua o le maaolo; atoa ma ulumatua uma lava a manu.” (Eso. 11:5.)

E avea o se puipuiga mai lenei faasalaga mulimuli ma le matautia na faatigaina ai tagata Aikupito, sa faatonuina ai Mose e le Alii ia ave e le fanauga a Isaraelu, o tagata uma se tamai mamoe e leai se ila.

“Ia latou ave foi nisi toto, ma avatu i pou e lua o le faitotoa ma ona faalava i luga o o latou fale latou te aai ai.

“Latou te aai foi le tino i lea lava po, ua tunu i le afi, atoa foi ma areto e le faafefeteina; ma laau oona latou te ina’i ai. …

Ia faapea foi ona outou aai ai, o outou sulugatiti ia fusia, ma o outou see io outou vae, ma o outou tootoo i o outou lima, tou te aai ai faataalise: o le paseka lava lea ia Ieova. …

“Pe a fai mai foi a outou fanau ia te outou, O le a ea le uiga ia te outou o lenei sauniga?

“Ona outou tali atu ai lea, O le taulaga o le paseka lenei ia Ieova, o le na sosopo ane i fale o le fanauga a Isaraelu.” (Eso. 12:7–8, 11, 26–27.)

Ina ua mavae le sosola ese o Isaraelu mai lima o Farao ma ua oo mai le oti i ulumatua a Aikupito, sa iu ina sopoia e Isaraelu ia Ioritana. O loo tusia faapea “na tolauapi le fanauga a Isaraelu i Kilikala, ma sa latou faia le paseka i le aso lona sefulu ma le fa o le masina i le afiafi, i le eleele laugatasi o Ieriko.” (Iosu. 5:10.) Ma sa faapea ai lava ona faia e aiga Iutaia i lea tausaga ma lea tausaga mulimuli ane ai, e aofia ai ma le aiga o Iosefa ma Maria ma le tamaitiiti, o Iesu.⁴

I se tausamaaga na faamanatu ai le Paseka, sa faatuina ai e le Faaola le sauniga o le faamanatuga.

E pei ona faamanino mai e le talalelei na tusia e Ioane, o le tausamaaga o le Paseka na faailoga ai mea taua na tutupu i le taimi o le galuega a Keriso i la le tino. I le Paseka muamua i lana galuega, sa faailoa atu ai e Iesu lana misiona e ala i le faamamaina o le malumalu ina ua ia tutuliesea le au faatauoa ma tupe ma i latou sa faatau atu ai manu. I le Paseka lona lua sa faaalia ai e Iesu lona mana i le vavega o areto ma i‘a. Na folasia ai i i e Keriso ia faatusa o le a i ai mulimuli ane se uiga e sili atu, i le Afeafe Pito i Luga. “O au o le areto o le ola,” na ia fetalai ai. “O le sau ia te au e le laina lava ia; o le faatuatua foi ia te au e le fiainu lava ia.” (Ioane 6:35.)

Ioe, o le tausamaaga o lana Paseka faaiu e aumaia ai le faailoaga atoa i lenei faamanatuga anamua. E oo atu i lena vaiaso faaiu o lana galuega i la le tino, sa silafia lelei e Iesu le uiga ia te ia o lenei Paseka faapitoa. Ua mafai ona iloa o le a oo mai faalavelave. Na tusia e Mataio:

“Ua faaiu e Iesu ia upu uma, ona fetalai atu ai lea o ia i ona soo,

“Ua outou iloa a mavae aso e lua ona fai ai lea o le paseka, e tuuina atu ai le Atalii o le tagata ina ia faasatauroina.” (Mata. 26:1–2.)

I le silafia lelei ai o le mea o loo faatalitali mai mo ia, sa faatonu ai e Iesu ia Peteru ma Ioane e fai fuafuaga mo le tausamaaga o le paseka. Na ia fai atu ia te i laua e fai atu i le matai o le fale, “Po o i fea le afeafe e api ai malo, ina ia matou aai ai le paseka, o a’u ma o’u soo?” (Luka 22:11.)

O le le amanaiaina o lona soifua mai, i se faauigaina, ua faaluaina i le tuua na o ia i lona maliu. E fai lua o alope e fai foi ofaga o manulele, ae o le Atalii o le Tagata e leai se mea e moe ai e le gata i lona fanau mai ae faapea foi i nai itula mulimuli i le olaga nei [tagaiMataio 8:20].

O le mea mulimuli, na maea tapenaga mo le tausamiga o le Paseka, i le tausisia ai o le toetoe atoa le afe limaselau o tausaga o le agaifanua. Na nonofo ai i lalo Iesu ma ona soo, ma ina ua uma ona aai i le tamai mamoe o le taulaga, ma le areto ma le uaina o lea tausamaaga anamua, sa ia aoaoina i latou i se uiga aupito fou ma paia o lena faamanuiaga anamua mai le Atua.

Na ia tago i se tasi o areto mafolafola ma lapotopoto, o se areto e le faafefeteina, ma faamanuia ona tofitofi ai lea ina ia tufatufa atu i Aposetolo ma faapea atu, “O lo’u tino lenei, ua foaiina atu mo outou: tou te faia le mea nei ma faamanatuga ia te au.” (Luka 22:19.)

A o liligiina le ipu, sa ia tago i ai, ma faafetai, ona valaaulia ai lea o i latou e feinu i ai, ma faapea atu, “O lenei ipu o le feagaiga fou lea i lo’u toto ua faamaligiina mo outou.” (Luka 22:20.) Fai mai Paulo: “Aua o aso uma tou te aai ai i lenei areto ma feinu i lenei ipu tou te faailoa atu ai le maliu o le Alii seia afio mai o Ia.” (1 Kori. 11:26.)

O le areto ma le uaina, nai lo manu ma laau, o le a avea ma faatusa o le tino o le Tamai Mamoe ma le toto, o faatusa e aai ma feinu ai ma le migao ma ia manatua ai o ia e faavavau.

I lea faiga faigofie ae ofoofogia, na faatuina ai e le Faaola le sauniga ua lauiloa nei o le faamanatuga o le Talisuaga a le Alii. Faatasi ai ma le mafatiaga i Ketesemane, o le taulaga i Kalevario, ma le toetu mai se tuugamau togalaau, sa faataunuuina ai e Iesu le tulafono anamua ma amatalia ai se tisipenisione fou e faavae i se malamalama e maualuga atu ma paia i se tulafono o le taulaga. O le a le toe moomia mai tagata ona ofoina atu le tamai mamoe ulumatua mai a latou lafu, aua na afio mai le Ulumatua a le Atua e ofoina atu ia lava e fai ma “taulaga e le iu ma faavavau.”

O le mamalu lea o le Togiola ma le Toetu, ua le na o se sopo loa mai le oti, ae o se meaalofa o le ola e faavavau mai se taulaga e le iu.⁵

E maeu le fetaui lelei o le tausia o lenei feagaiga anamua o le puipuiga [le tausamaaga o le Paseka] ua ao ai ona faatuina e Iesu ia faatusa o le feagaiga fou o le saogalemu—o faatusa o lona lava tino ma le toto. A o tago o ia i le areto ma tofitofi, ma tago foi i le ipu ma faamanuia, sa ia tuuina mai ia lavao le Tamai Mamoe a le Atua e aumaia ai le faafailelega faaleagaga ma le olataga e faavavau.⁶

O Keriso ma le areto — “A o tago o ia i le areto ma tofitofi, ma tago foi i le ipu ma faamanuia, sa ia tuuina mai ia lavao le Tamai Mamoe a le Atua.”

O lo tatou auai i le faamanatuga o se avanoa lea e toeiloilo ai o tatou olaga ma faafou a tatou feagaiga.

E lei mamao atu sa ou [maua] ai le avanoa e auai i le sauniga faamanatuga i le matou uarota. … A o sauniuni e le au ositaulaga le faamanatuga, sa taitaia i matou e usu le:

Faafofoga mai le Tama;
I lenei aso pa’ia.
A o matou vagaia,
Le faatusa o le Faaola.

[Viiga, nu. 106]

Sa tootuli se ositaulaga ma tatalo i luga o le areto: “Ina ia latou taumamafa i le faamanatuina o le tino o lou Alo ma molimau atu ia te oe, Le Atua e, le Tama e Faavavau, latou te loto ina ave i o latou luga le suafa o lou Alo, ma manatua pea o ia ma tausi i ana poloaiga.” (MF&F 20:77.) Sa taapeape ia tiakono i le falesa e tufa atu le areto ua tofitofi. Sa sau te tasi i le matou laina nofoa ma tuu mai le fata lanusiliva a o ou tago atu i ai ma ‘ai [le areto]. Ona ou uuina lea o le fata sei taumafa Sister Hunter, ma sa ia uuina foi mo le isi tagata na sosoo ai. Ma sa faasolo atu le fata i le laina, ua tofusia ona tufa ma ua tofu taumamafa foi.

Sa ou mafaufau i mea na tutupu i le afiafi o le toetoe lua afe tausaga talu ai lea na faalataina ai Iesu. … [Sa] folasia mai le faamanatuga o le Talisuaga a le Alii e suia ai le taulaga i [manu] ma avea o se faamanatu mo i latou uma e taumamafa ai, e moni lava na Ia osia se taulaga mo i latou; ma ia avea o se faamanatu faaopoopo o feagaiga na latou faia ina ia mulimuli ia te Ia, tausi Ana poloaiga, ma ia faamaoni e oo i le iuga.

A o [o’u] mafaufau e uiga i lenei mea, sa oo mai i lo’u mafaufau le apoapoaiga a Paulo i lana tusi i le ekalesia i Korinito. Fai mai a ia: “O lenei ai se ai i lenei areto pe inu i le ipu a le Alii ma le faaletatau e nofosala o ia i le tino ma le toto o le Alii.

“A ia suesue ifo le tagata ia te ia i le ai ai o ia i lenei areto ma inu i lenei ipu.

“Aua o le ai ma inu faaletatau ua ai ma inu i lona lava faasala ina ua le faautauta o ia i le tino o le Alii.” (1 Kori. 11:27–29.)

Sa ou faaletonu. Sa ou fai ifo ia te au lava le fesili: “Pe o ou tuuina le Atua i luga atu o isi mea uma ma tausi Ana poloaiga?” Ona ou manatunatu loloto ai lea ma ou iloa ai lo’u tulaga. Ina ia osia se feagaiga ma le Alii ina ia tausia pea Ana poloaiga o se matafaioi taua tele, ma ina ia faafou lena feagaiga e ala i le taumamafa i le faamanatuga e faapena foi lona taua. O taimi paia o le mafaufau a o tufaina le faamanatuga e tele sona taua. O nai taimi ia e suesue ifo ai le tagata ia te ia lava, suesue ou lava mafaufauga ma le tulaga o i ai, ia malamalama lelei ia te oe lava—o se taimi e toe tepa ifo ai ma fai se faaiuga ia faaleleia.

O le taimi lea ua tootuli ifo ai le isi ositaulaga i le laulau, ma tatalo mo i latou uma e feinu ai “ia latou faia le faamanatuina o le toto o lou Alo, sa faamaligiina mo i latou; … latou te manatua pea o ia, ina ia latou maua lona Agaga e faatasi ma i latou.” (MF&F 20:79.)

Sa i ai manatunatuga loloto filemu, na faateia le toafilemu i se leo o se pepe meamea lea na vave ona opoina e lona tina. Soo se mea e faateia le toafilemu i le taimi o lenei sauniga paia e foliga e le talafeagai; ae mautinoa lava o le leo o se pepe meamea o le a le afaina i le Alii. O Ia foi, sa faamoemoe e se tina alofa i le amataga o se soifuaga faaletino lea na amata i Peteleema ma faaiu ai i luga o le satauro i Kalevario.

Sa faaiuina e alii talavou le tufatufaina o le faamanatuga. Ona mulimuli lea i upu faalaeiau ma faatonuga, o se viiga faaiu ma le tatalo; ua oo ina faaiu le taimi paia “mai mea o le olaga” [tagai “Tatalo Faalilo,”Viiga, nu. 79]. A o toe foi i le fale … sa oo mai le mea lea i lo’u mafaufau: Se mea ina a matagofie pe afai e i ai i tagata uma se malamalama i le faamoemoega o le papatisoga ma le naunautai e taliaina ai; le manao e tausi feagaiga na osia i lena sauniga e auauna atu i le Alii ma ola i Ana poloaiga; e le gata i lea, o le manao e ai ma inu i le faamanatuga i le aso Sapati, e faafou ai na feagaiga e auauna atu ia te Ia ma faamaoni e oo i le iuga. …

O le auai i le sauniga faamanatuga ma ai ma inu i le faamanatuga, ua atili ai ona anoa le aso, ma sa ou lagonaina ua tatau ona ou malamalama i le mafuaaga na fetalai ai le Alii: “Ma ia mafai ona e tausi atili atoatoa oe lava i le le pisia mai le lalolagi, ia e alu atu i le fale tatalo ma osi a’e i luga au faamanatuga i lo’u aso paia;

Aua e moni o se aso lenei ua tofia mo oe e te malolo ai mai au galuega, ma avatu ai au tapuaiga i le Silisili Ese.” (MF&F 59:9–10.)⁷

Fautuaga mo Suesuega ma le Aoaoina Atu

Fesili

Toeiloilo aoaoga a Peresitene Hunter e uiga i le Paseka i Isaraelu anamua (tagai vaega 1). O le a se mea ua mafai ona tatou aoao mai le Paseka? E faapefea ona fesootai le Paseka ma le tausiga o le Eseta?
Toeiloilo le tala a Peresitene Hunter e uiga i le Faaola o faatuina le faamanatuga (tagai vaega e 2). Aisea e taua ai lenei mea ia te oe? O a ni auala ua avea ai le faamanatuga o se “feagaiga o le saogalemu” mo i tatou?
O le a se mea ua faagaeetia ai oe i le tala a Peresitene Hunter i le taumafa i le faamanatuga i le vaega e 3? O le a se mea ua mafai ona tatou aoao mai lenei tala ia atili anoa ai le faamanatuga? Ua avea faapefea le taumafa i le faamanatuga o se faamanuiaga ia te oe?

Mau Fesootai

1 Korinito 5:7–8; 11:23–29; 3 Nifaei 18:3–14; 20:8–9; Moronae 6:5–6; MF&F 20:75–79; 27:1–2

Fesoasoani mo le Aoaoina Atu

“A o tatou aoao atu le talalelei, e ao ona tatou faailoa atu ma le lotomaualalo o le Agaga Paia o le faiaoga moni. O lo tatou avanoa o le avea o ni meafaigaluega lea e mafai ona aoao atu le Agaga Paia, molimau, faamafanafana, ma musuia”O Le Aoao Atu e Leai Se Isi Valaauga e Sili Ai