Mataupu 5

Iosefa Samita, Perofeta o le Toefuataiga

“Ou te tuuina atu la’u molimau faamaoni i le Perofeta o Iosefa Samita, o se auauna faauuina a le Alii i nei aso e gata ai.”

Mai le Soifuaga o Howard W. Hunter

O Nancy Nowell, o se tasi o tina o le tina o le tinamatua o le tama o Howard W. Hunter, na malaga mai ma nofo i Lapeer, i Michigan, i le ogatotonu o le 1830. I le 1842, sa sau ai se faifeautalai o Le Ekalesia a Iesu Keriso o le Au Paia o Aso e Gata Ai i Lapeer mai Navu, Ilinoi. Sa faalogologo Nancy i lana savali, sa tatalo, ma ia maua ai se molimau e moni ana aoaoga. Sa alu o ia i Navu e aoao atili i le Ekalesia, ma sa ia tusia lona aafiaga lea i lana apitalaaga:

“Sa ou alu e faalogologo i le failauga Mamona [o Iosefa Samita] ma le faaeteete tele, ma le faamoemoe ia aua nei faaseseina au. O lana mataupu o le afio mai faalua o Keriso. Sa i ai sa’u molimau e faapea sa ia tautala i le upumoni, ma o Iosefa Samita o se perofeta moni, sa tofia ma faauuina e le Atua e faia se galuega tele, aua sa ia aumaia le upumoni e pei ona sa aoao mai e Iesu Keriso. Sa ou talosaga ina ia ou papatiso.”¹

E pei o le tina, o le tina, o lona tinamatua o Nancy Nowell, sa i ai foi ia Howard W. Hunter se molimau mautu i le misiona faaperofeta a Iosefa Samita. E tolu vaiaso talu ona avea ma Peresitene o le Ekalesia, sa malaga ai o ia i Navu i le faamanatuina o le 150 tausaga o le tagatavaleina o Iosefa ma Ailama Samita. I se sauniga sa faia i le nofoaga o le Malumalu o Navu, na saunoa ai Peresitene Hunter:

“O le tiutetauave ua ou lagonaina mo le galuega na amatalia e le Perofeta o Iosefa Samita, ua faatumulia ai a’u i se naunautaiga e faia mea uma ou te mafaia i le taimi ma le vaitau ua tuuina mai ia te au. E mautinoa lava sa faatuatua ma faamaoni Iosefa i lona taimi ma lona vaitau! … Ou te tuuina atu la’u molimau faamaoni i le Perofeta o Iosefa Samita, o se auauna faauuina a le Alii i nei aso e gata ai. I lana molimau e uiga i le paia ma le moni o Iesu Keriso, ou te faaopoopo atu i ai ma la’u molimau.” ²

Mulimuli ane i lena aso, i se fonotaga sa faia e lata ane i le Falepuipui i Karefasi, sa molimau atu ai Peresitene Hunter, “O Iosefa Samita, o le sa ofoina atu lona soifua i le nofoaga lenei, sa avea ma meafaigaluega sa faaaogaina e le Alii e toefuatai mai ai le atoaga o le talalelei, ma le pule o Lana perisitua.” ³

O Aoaoga a Peresitene Howard W. Hunter

Na afio ifo le Atua le Tama ma Iesu Keriso ia Iosefa Samita ia amatalia le Toefuataiga.

E tele taimi [na] tuuina mai ai i le lalolagi le talalelei e ala mai i perofeta, ma o taimi taitasi [sa ] leiloa ai ona o le le usiusitai. I le tausaga e 1820, sa motusia ai le sāō, ma sa toe afio ifo ai le Alii i se perofeta. Sa mafai e lenei perofeta, o Iosefa Samita i lona lava silafia lelei, ona molimau atu o loo soifua le Atua, o Iesu o le Keriso, o le Alo o le Atua, o se Tagata Toetu, e ese lava ia mai le Tama. Na te lei molimau atu i mea sa ia talitonu i ai, pe o mea sa manatu ai pe taumatemate e isi tagata, ae o le mea sa ia iloa. Na oo mai lea silafia ia te ia aua sa afio ifo lava le Atua le Tama ma le Alo ia te ia, ma talanoa atu ia te ia.⁴

Na faaalia e le Atua-…ia lava [ia Iosefa Samita] o se tagata soifua. E le gata i lea, sa faaalia foi e le Tama ma le Alo le mea moni e le mafaafitia, o i la’ua o ni peresona mavaevae. O le mea moni, sa faamautinoa ai le faiā a le Tama ma le Alo e ala i le folasaga paia i le perofeta taulealea, “O Lo’u Atalii Pele Lenei. Faalogo ia te Ia!” [Iosefa Samita—Talafaasolopito 1:17].⁵.

Ina ua faalogo tagata ua faamatala e Iosefa sa faaali atu le Atua lava Ia i le tamaitiiti, sa latou faatauemu ia te ia ma latou fulitua ia te ia, e faapei lava o le vaitau o Keriso, sa teena ai e tagata popoto i Atenai se alii na auauna atu ia i latou. Ae na tumau le mea moni, i lena aafiaga i na ona po, o Paulo sa na o le pau lena o le tagata i lena nuu tele o le atamai, sa iloaina e mafai ona oti se tagata ma toe ola mai. Na o ia le tagata i Atenai sa mafai ona faamatalaina le eseesega i le va o le ifo i tupua ma le tapuai ma le loto i le Atua moni e toatasi. [Tagai Galuega 17:19–20, 22–23.]⁶

O e na teenaina le Faaola ina ua afio mai o ia i le lalolagi ma le tautinoga o ia o le Alo o le Atua, sa latou fai mai e uiga ia te ia: “E le o le atalii ea lenei o le tufuga?” (Mataio 13:55.) Ina ua faasilasila mai e Iosefa sa vaai o ia i se faaaliga ma sa ia vaai i le Tama ma le Alo, sa mafaufau tuaoi, ma faifeau, ma tagatanuu ma fesili: “E le o le atalii ea lenei o le faifaatoaga?” Sa sauaina Keriso ma fasiotia ae sa molimauina i ona taimi. E faapei o le atalii o le tufuga, sa faapena foi le atalii o le faifaatoaga.⁷

Sa le gata ina avea Iosefa Samita ma se tamalii sili, ae o ia foi o se auauna musuia a le Alii, o se perofeta a le Atua. O lona maoae e aofia ai i le mea e tasi—o le moni a’ia’i o lana tautinoga na ia vaai i le Tama ma le Alo, ma sa ia tali i le moni o lena faaaliga paia. …

Ou te molimau atu … na faaali lava le Tama ma le Alo i le Perofeta o Iosefa Samita e amatalia ai lenei taavale i luma o le galuega tele i aso e gata ai i o tatou taimi.

Ou te molimau atu o le perofeta taulealea, o le e tele itu e tumau ai pea ona avea o se vavega tutotonu … o le aafiaga o lenei ekalesia, o se faamaoniga ola lea, o i aao o le Atua ma i lalo o le taitaiga a le Faaola o le lalolagi, ua tatau ai ona oo mai mea vaivai ma le faatauvaa e lepeti i lalo mea matautia ma le malolosi.⁸

Na toefaatuina e Iesu Keriso Lana Ekalesia e ala mai i le Perofeta o Iosefa Samita.

I le aso 6 o Aperila, 1830, … sa faapotopoto ai se vaega o alii ma tamaitai ona o le usiusitai i se poloaiga a le Atua, i le fale o Pita Uitimera [Matua], e faatulaga Le Ekalesia a Iesu Keriso o le Au Paia o Aso e Gata Ai. … E leai se tasi o i latou sa aotauina faapitoa pe i ai se tulaga maoae faaletaitaiga. O i latou o ni tagata taualoa ma o ni tagatanuu faaaloalogia, ae toetoe lava ina a le iloa e se isi vagana ai si o latou lava pitonuu. …

Sa potopoto nei alii masani ma agamaulalo, ona o se tasi o i latou, o Iosefa Samita, Le Itiiti, o se alii talavou lava, sa faamatalaina se tala aupito sili ona ofoofogia. Sa ia tautino atu ia te i latou ma isi tagata uma sa faalogo, e faapea sa ia mauaina se fesootaiga faalelagi e aofia ai se faaaliga vaaia o le Atua le Tama ma lona Alo Pele, o Iesu Keriso. O le taunuuga o nei aafiaga faafaaaliga, ua uma ona lolomiina ai e Iosefa Samita le Tusi a Mamona, o se faamaumauga o taualumaga a Keriso ma tagatanuu anamua o Amerika. E le gata i lea, ae na poloaiina foi e le Alii lenei alii talavou, o le taimi lea e na o le luasefulufa tausaga o lona matua, e toefaatuina le Ekalesia lea na i ai i taimi o le Feagaiga Fou, ma i le toefuataiina o lona mama a’ia’i, e tatau lava ona toe faaigoa ai i le igoa o le maatulimanu autu ma le faaao e faavavau, o le Alii o Iesu Keriso lava ia.

O le mea lea, na faatauvaa ae na amatalia ai le uluai vaaiga taua i le Ekalesia lea o le a oo ina aafia ai e le gata i lena augatupulaga o tagata ae faapea foi le lalolagi atoa. … O se amataga faatauvaa, ioe, ae o le mea lea na fetalai i ai le Atua, ua toefaatulagaina le Ekalesia a Keriso ma ona aoaoga faavae, na toefaamautinoa mai ai e ala i faaaliga paia, o le tautinoga e sili ona tulagaese lea na faia i le lalolagi talu mai ona po o le Faaola lava ia ina o femaliuai i ala o Iutaia ma mauga o Kalilaia.⁹

O se vaega o le faaaliga paia [na maua e Iosefa Samita] o le faatonuga ia toefaatuina le Ekalesia moni ma le ola, ia toefuatai i aso nei e faapei ona i ai i ona po o le misiona a le Faaola lava ia i le lalolagi. Fai mai le Perofeta o Iosefa Samita o le Ekalesia a Iesu Keriso sa “faavaeina e tusa ai ma poloaiga ma faaaliga na tuuina mai e Ia ia i matou i nei aso amuli, e faapea foi ma le faatulagaga o le Ekalesia e pei ona tusia i le Feagaiga Fou” [O Aoaoga a Peresitene o le Ekalesia: Iosefa Samita (2007), 147]. …

… O i latou na papatiso i le Ekalesia i le aso ono o Aperila, 1830, sa talitonu i le i ai o se Atua e patino; sa latou talitonu i le moni o ia ma le moni foi o lona Alo, o Iesu Keriso, ua fatua’i ai le faavae e faavavau lea ua atiae ai i luga lenei ekalesia. ¹⁰

Na ala mai ia [Iosefa Samita] ma mea na tutupu mulimuli ane, na toefuatai mai ai le perisitua ma le talalelei i lona atoaga, i le lalolagi, ma o le a le toe aveesea lava [tagai MF&F 65:2]. O Le Ekalesia a Keriso, le malo o le Atua i le lalolagi, sa toefaatuina ma faatulagaina e tusa ai ma le mau, ia taavale atu ma faatumulia ai le lalolagi [tagai Tanielu 2:35].¹¹

Iosefa Samita ma le failautusi — O le soifua o le Perofeta o Iosefa Samita “na taitaia i faaaliga.”

O Iosefa Samita o se perofeta, tagatavaai, ma se talifaaaliga.

O le oo mai o le Perofeta o Iosefa Samita i le lalolagi, o le faataunuuga o se valoaga na talatala mai i le tele o seneturi talu ai e Iosefa lea sa faatauina atu i Aikupito:

“E faatuina e le Alii lo’u Atua le tagatavaai e fai ma tagatavaai filifilia i le fua o o’u sulugatiti. … Ma o lonaigoa o le a faaigoa ia te aʼu; ma o le a faaigoa i leigoa o lona tamā.” (2 Nifae 3:6, 15).

O Iosefa Samita, Le Itiiti, sa faaigoa i le igoa o Iosefa o anamua, o le sa aveina faapagota i Aikupito, ma o le igoa foi o lona tama, o Iosefa Samita, Le Matua, ma o lea ua faataunuuina ai lenei valoaga. Ua lauiloa o ia o le Perofeta o Iosefa Samita, ma ua ta’ua o “Iosefa le Tagatavaai.” E tele ina faasino o ia o se “perofeta, tagatavaai, ma talifaaaliga.”

O faaupuga “Perofeta” ma “Tagatavaai” ma Talifaaaliga” e tele ina faaaoga felafoai, ma ua mafaufauina e le toatele o le mea lava e tasi. Peitai, e le tutusa, ma o nei faaupuga e tolu, e i ai ni faauigaga eseese ma ma’oti.

Na faauiga e [Elder] John A. Widtsoe se perofeta, o se faiaoga—o se tasi na te faapupula maia le mea moni. Na te aoao maia upumoni e pei ona faaalia e le Alii i tagata, ma e ala i musumusuga na te faamatalaina ia malamalama ia tagata. O le upu “perofeta” e tele ina faaaoga e faaigoa ai se e mauaina faaaliga ma taitaiga mai le Alii. E toatele ua manatu o se perofeta o se e muai ta’u maia mea e tutupu i le lumanai, ae na o se tasi lea o le mau matafaioi a se perofeta. O ia o se fofoga taumomoli o le Alii.

O se tagatavaai o se tasi e vaai. E le faapea e vaai atu i ona mata faalenatura, ae e ala i ona mata faaleagaga. O le meaalofa vaai o se faamanuiaga i talaatu o le mana faaletagata. O Iosefa e faapei foi o Mose, le tagatavaai anamua, ma sa vaai Mose i le Atua, ae sa ia faamatalaina le ala na ia vaai ai ia te ia i upu nei:

“Aʼo lenei ua vaai oʼu lava mata i le Atua ae e lē o oʼu mata faaletino aʼo oʼu mata faaleagaga aua sa lē mafai e oʼu mata faaletino ona vaaia po ua ou mamae ma oti i ona luma ae sa iai lona mamalu i oʼu luga ma sa ou vaai i ona fofoga ona sa liua aʼu i ona luma”(Mose 1:11).

E le tatau ona tatou manatu o le vaai faaleagaga e le o le vaai lea i le tino mai. O ia ituaiga o vaaiga e le o ni manatunatuga. E vaaia moni lava le tino mai, ae e le vaaia i mata faaletino. E tofu i tatou ma mata faaleagaga e tutusa ma o tatou mata faaletino. Na muai foafoaina i tatou faaleagaga, ona foafoaina ai lea o o tatou tino e fai ma ufiufi o o tatou agaga. Ua ta’u mai ia i tatou i lo tatou uluai esetete, sa tatou savavali i lo tatou ātaāta. E ala lea i le vaaiga a o tatou mata faaleagaga aua e lei i ai ni o tatou tino ma mata faaletino. E tofu tagata uma ma vaaiga faaleagaga, ae e le maua pea se avanoa e faaaoga ai lea ituaiga o vaaiga sei vagana ai ua segia e le Agaga o le Alii. …

O le mana o le Agaga Paia, e auina mai ai ni tagata patino, i le lalolagi mo lena faamoemoega, e mafai ona vaai ma iloa mea tau i le Atua. O se tagatavaai o se tasi lea e vaai ma iloa mea ua tuanai, faapea foi mea o le a oo mai, ma e ala mai ia i latou ona faaalia mai o mea uma (tagai Mosaea 8:15–17). I se aotelega, o ia o le e vaai, o le e savali i le malamalama o le Alii ma mata faaleagaga e matala ma segia i le mana o le Agaga Paia. O Mose, Samuelu, Isaia, ma Esekielu, ma le toatele o isi o ni tagatavaai, aua sa latou maua le avanoa e maua ai se vaaiga latalata i le mamalu faalelagi ma le mana nai lo isi tagata soifua.

O se faaaliga e faailoa mai ai se mea e le mailoa, pe o se mea na iloa muamua e tagata ma ua toe mou atu mai le mafaufau. O faaaliga i taimi uma e taulima ai upumoni, ma e oo mai i taimi uma ma se faamaoniga mai le lagi. E maua faaaliga i ala eseese, ae e muai manatu pea lava e tatau i le talifaaaliga ona soifua ma ola ia ogatusa ma le agaga paia o faaaliga, le agaga o le upumoni, ona mafai lea ona agavaa mo le mauaina o savali paia.

Ina ia aotele, e mafai ona tatou faapea o le perofeta o se faiaoga o upumoni paia, o se talifaaaliga i itu uma o le upu. O le lagona o le vaaiga faaleagaga [o Iosefa Samita] sa segia i se tulaga ofoofogia ma faaleagaga e le Agaga Paia. O le meaalofa lea na ia vaai ai i le Tama ma le Alo ina ua alu o ia i le vao e tatalo ai. A tatou mulimuli i lona soifua ma galuega mai lena taimi, ona tatou iloa ai lea, e lei taumafai lava o ia e faaauau i lona lava malosi. Sa faalagolago o ia i le Alii ma o lea na ia maua ai le fesoasoani ma tuuina i ai faatonuga. Sa taitaiina lona olaga i faaaliga. ¹²

Viia le na fetaiai ma Ieova.

A tatou pepese e uiga ia Iosefa Samita “Viia Le Na Fetaiai ma Ieova”Viiga1985, nu. 15, tatou te manatuaina le anoanoai o mea e viia ai o ia.

Tatou te viia o ia i lona mana e talanoa ai e le gata ia Ieova ae faapea foi isi peresona o le lagi. E toatele naua sa asia o ia, ma tuuina atu i ai ki, ma aoaoina lena “tagatavaai filifilia” na faatuina mai i aso e gata ai (2 Ni. 3:6–7). Ina ua faamanuia e Tamā Samita ia Iosefa le itiiti i le 1834, sa ia tautino atu na vaai Iosefa anamua o Aikupito i lenei tagatavaai o aso e gata ai. Sa tagi Iosefa o Anamua ina ua ia iloaina le auala o le a faamanuiaina ai e galuega a le Perofeta o Iosefa le anoanoai o fanau a Iosefa anamua.

Tatou te viia foi Iosefa Samita, mo lona maelega ma le mana e faaliliu ai ma mauaina le fiaselau o itulau o tusitusiga paia na faaalia. O ia o le ala faaalia o fesootaiga. Na auala mai ia te ia, ua faatatau ai, e sili atu itulau ofoofogia o tusitusiga paia na pasi mai ai nai lo se isi lava tagata soifua i le talafaasolopito.

Tatou te viia Iosefa e le gata i lona mana e onosaia ai ae sa ia “tumau lelei ai”(MF&F 121:8). I se taimi, a o tamaitiiti, sa faia ai se taotoga tiga tele i lona vae—ana le faia lea taotoga semanu e le mafai ona ia gafatia le savaliga matautia o le Tolauapiga a Siona mai Ohaio i Misuri. I le taimi o lea savaliga “sa savali [ai Iosefa] i le tele o le taimi ma sa afaina ona aao i le mafoe o le pa’u, vae tiga ma le totolia,” Aoaoga a Peresitene o le Ekalesia: Iosefa Samita 307]. E faapena foi, tatou te viia o ia ma Ema mo le onosaia o le maliliu o le toaono o a la fanau moni ma fanau fai. O matua e i ai se tasi o le la fanau e maliu e tumu i le lotofaavauvau.

Tatou te viia Iosefa mo le mana e onosaia ai sauaga, e aofia ai le faaaunuua umi ma le matuia i le Falepuipui i Liperate. O le toatele, sa foliga ua matua leai se faamoemoe o mea uma. Ae na faamautinoa mai e le Alii o le lagi ia Iosefa ina o falepuipui, e faapea“o le a tuufesilisili tuluiga o le lalolagi i lou igoa”MF&F 122:1). Ua tatou ola i se taimi ua faateleina ai le tuufesili e uiga ia Iosefa Samita ma le talalelei toefuataiina.

Ua leva ona faataunuu e Iosefa lona moomooga ina ia mafai ona ia umia “se fuataga tutusa ma paleni ma” i latou na soifua anamua Aoaoga a Peresitene o le Ekalesia: Iosefa Samita230]. Ua mafai nei ona tatou pepese e uiga i le ala na ““faapaleina ai [Iosefa] i le lotolotoi o perofeta o anamua” Viiga,1985, nu. 15).

Tatou te viia Iosefa mo le onosaia o le faalataina faifai pea ma faanoanoaga. O lea, na alu ai o ia i Karefasi “e faapei o se tamai mamoe i le fasiga,” toafilemu e pei o le taeao o se taumafanafana,” ma “aunoa ma se faatausuai faasaga … i tagata uma” MF&F 135:4). E lei alu o ia ma le lototiga i Karefasi. E lei alu o ia ma le tomumu i Karefasi. Se tulaga ina a ofoofogia o le onosaia lelei.

Sa iloa e Iosefa le itu e faasaga i ai. Sa faasaga atu i le Faaola o Iesu Keriso lea na ia faalogo i ai talu mai le taimi muamua na faatonuina ai e le Tama Faalelagi le taulealea o Iosefa, ina ua fetalai atu, “O Lo’u Atalii Pele Lenei. Faalogo ia te Ia!” [IosefaSamita—Talafaasolopito 1:17].¹³

O le soifuaga ma le misiona a le Perofeta o Iosefa Samita ua fesoasoani tatou te liliu atu ai i le ala e tau atu i le ola e faavavau.

Ou te matua faafetai i lenei tamalii, mo ana aoaoga, o ana faaaliga, mo mea sa ia tuua mo i tatou, aua o ia na toefuatai mai ai le talalelei i le lalolagi. Ou te manatu e leai se isi tala e sili atu ona matagofie i le talafaasolopito uma nai lo le tala malie, faigofie o le alii sa alu i le vao e lata ane i lona fale, ma tootuli ai e tatalo ma talia ai ni asiasiga mai le lagi.

Ua tatou tilotilo nei i lona soifua ma ana galuega. E toatele ua saili e sue ia mealilo uma o i tua atu o upu tusitusia, ae e leai se mealilo. … Sa i ai se faatuatua faigofie, le faatuatua o se tamaitiiti talavou sa tatau ona aoaoina i mea e faatatau i le Atua. Ma a o mavae atu taimi, o lenei alii talavou, e aunoa ma ni tulaga faaleaoaoga na ia ausia, sa aotauina e le Alii mo mea e tatau ona oo mai.

Ua tatou maua nei le atamai ma se mafaufau. Ua na ona manaomia lava ona tatou tolenia ma atiina ae, e faapei ona sa faatonutonuina ai e le Alii ia Iosefa ma ia i ai se faatuatua faigofie, e pei o ia, ma ia naunau e mulimulitai i ni faatonuga faigofie. A tatou faia faapena ma mulimuli i le ala e finagalo [le Alii] tatou te mulimuli ai ma aoao i lesona e finagalo o Ia tatou te aoao ai, ona tafiesea lea mai o tatou olaga o mea e faasagatau i faamoemoega o le Atua, ma na faapena foi Iosefa. Na oo ina avea o ia ma tamalii sa toetoe ina atoatoa, aua sa faamamaina lona agaga ma lona mafaufau ma sa soifua latalata i le Alii ma sa mafai ona talanoa ma Ia ma tautala i mea sa ia tuua mo i tatou e ala i ana faaaliga. Na ala atu i ona mata faaleagaga sa mafai ai ona ia vaai i mea ua tuanai, ma mea foi o i le lumanai, ma ua tatou maua se faamaoniga o le moni o mea sa ia vaai i ai. …

Ou te faafetai i lo’u auai i le Ekalesia, ma o la’u molimau i lona paia ua pine faamau i le tala faigofie o le alii sa tootuli i lalo o laau ma taliaina le asiasiga mai le lagi—e le o se Atua e toatasi, ae o peresona mavaevae e toalua, o le Tama ma le Alo, na toe faaalia mai ai i le lalolagi ia peresona o le Aigaatua. O lo’u faatuatua ma la’u molimau ua pine faamau i lenei tala faigofie, aua afai e le moni, ua pa’ū la le Faa-Mamona. Afai e moni-—ma ou te molimau atu e moni—o se tasi lea o mea aupito silisili e tasi na tupu i le talafaasolopito atoa.

O la’u tatalo [faapea] a o tatou faamanatuina lenei perofeta maoae ma mafaufau i lona soifuaga, ia tatou faafetai i o tatou loto mo mea ua oo mai i o tatou olaga, ona o lona tulaga faatagatavaai ma ana faaaliga ia i tatou—o se tagatavaai filifilia, na faatuina mai e le Alii e taitai i tatou i nei aso e gata ai, ina ia tatou toe savalia lena ala lea o le a taitai atu ai i tatou i le faaeaga ma le ola e faavavau.¹⁴

Fautuaga mo Suesuega ma le Aoaoina Atu

Fesili

Mafaufau i aoaoga a Peresitene Hunter e uiga i le Uluai Faaaliga a Iosefa Samita (tagai vaega 1). Na faapefea ona faatosina oe e lau molimau i le Uluai Faaaliga? E taua i se a ona i ai se molimau a le Au Paia o Aso e Gata Ai e faapea o Iosefa Samita o se perofeta a le Atua?
O a ni ou lagona a o e iloiloina aoaoga a Peresitene Hunter e uiga i le faatulagaga o le Ekalesia? (Tagai vaega 2.) O a ni faamanuiaga ua oo atu ia oe ma lou aiga e ala atu i le Ekalesia toefuataiina a Iesu Keriso?
Aisea e fesoasoani tele ai le malamalama i uiga o faalaniga perofeta, tagatavaai, ma talifaaaliga? (Tagai vaega 3.) Ua faamanuiaina faapefea oe e perofeta, tagatavaai, ma talifaaaliga?
I le vaega 4, o loo otooto mai ai e Peresitene Hunter nisi o mafuaaga tatou te viia ai Iosefa Samita. E faateleina faapefea e nei aoaoga lou agaga talisapaia o le Perofeta o Iosefa? O a ni mea e mafai ona e aoaoina mai le faataitaiga a Iosefa Samita?
Toe iloilo aoaoga a Peresitene Hunter e uiga i le faatuatua, aoaoga faaleagaga, ma le usiusitai o Iosefa Samita (tagai vaega e 5). E faatatau faapefea nei aoaoga ia i tatou? E mafai faapefea ona tatou faaalia le lotofaafetai mo faamanuiaga ua tatou maua e ala mai i le Perofeta o Iosefa Samita?

Mau Fesootai

Faaliliuga Iosefa Samita, Kenese 50:25–33; Tanielu 2:44; Efeso 2:19–22; 4:11–14; MF&F 1:17–32; 5:9–10; 122:1–2; 135; Iosefa Samita—Talafaasolopito

Fesoasoani mo Suesuega

“A e lagonaina le olioli e maua mai le malamalama i le talalelei, o le a e manao e faaaoga mea na e aoaoina. Ia taumafai ia e ola e tusa ma lou malamalama. O le faia ai faapena o le a faamalosia ai lou faatuatua, malamalama, ma le molimauTalai La’u Talalelei [2004], 19).