Mataupu 9
O Le Tulafono o le Sefuluai
“O se molimau i le tulafono o le sefuluai e sau mai le ola ai.
Mai le Soifuaga o Howard W. Hunter
A o lei toe mamao ae faaipoipo Howard W. Hunter ma Claire Jeffs, sa alu ai Howard i lona epikopo ina ia maua se pepa faataga o le malumalu. Sa ofo o ia i le taimi o le faatalanoaga, sa fesili atu ai le epikopo ia te ia pe mafai ona ia tausia se toalua ma se aiga i lana tupe maua. Sa toe ta’ua e Howard, “Ina ua ia ta’u atu ia te ia le aofai o le tupe sa ou mauaina, sa ia fai mai o le mafuaaga o lona le mautinoa pe mafai ona ou lagolagoina se toalua sa faalagolago i le aofai o le sefulai sa ou totogia.”
E oo atu i le taimi lena, sa lei totogia atoa e Howard se sefuluai ona sa lei malamalama o ia i le taua o le totogiina atoa o le sefuluai. Sa ia faamatala, “Ona sa le o se tagata o le Ekalesia lo’u tama i le taimi sa ou ola ae ai i lo matou aiga, o lea sa lei talanoaina ai lava le sefuluai i lo matou aiga, ma ou te lei manatu lava i ai i lona taua.”
Fai mai Howard a o faaauau ona la talanoa ma lona epikopo, “sa aoaoina au …. e le epikopo i lana auala agalelei i le taua o le tulafono ma ina ua ou ta’u atu ia te ia o le a amata atu i lena taimi ona ou totogi atoa le sefuluai, sa faaauau le faatalanoaga ma faatea ese ai lo’u popole i lona faatumuina lea ma saini le pepa faataga.”
Ina ua faamatala atu e Howard lenei mea ia Claire, sa ia aoao ai o la sa totogi atoa lava e [Claire] lana sefuluai. “Sa tonu ia i maua o le a ma ola i lenei tulafono i la ma faaipoipoga atoa ma o le a faamuamua le sefuluai,” o lana tala lea.1
“O le totogiina o le sefuluai e faamalosia ai le faatuatua, e faateleina ai le faaleagaga ma mana faaleagaga, ma e faamausali ai le molimau.”
O Aoaoga a Howard W. Hunter
1
O le faauigaga a le Alii o le tulafono o le sefuluai e faigofie.
O le tulafono [o le sefuluai] e faigofie lava lona faaupuga o le “tasi vaesefulu o mea faaopoopo uma latou te maua” (MF&F 119:4). Mea faaopoopo o lona uiga o le tupe mama, taui, faatelega faaopoopo. O le totogi o se tagata faigaluega, o le tupe mama mai le faatinoga o se pisinisi, o le faatelega faaopoopo a se tasi e toto ma fua mai, po o se tupe maua a se tagata mai se isi lava alamanuia. Na fetalai mai le Alii o se tulafono tumau e “faavavau” e pei ona sa i ai i le taimi ua tuanai. 2
E faapei o poloaiga ma tulafono uma a le Alii, [o le tulafono o le sefuluai] e faigofie pe afai e i ai sina o tatou faatuatua itiiti. Na fetalai mai le Alii i lona aotelega, “Aveese mai le tesimale, ma tuu atu i tua i le laa e tasi. O le tulafono lena o le sefuluai. E matua faigofie lava.3
2
O le tulafono o le sefuluai sa i ai lava mai le amataga ma o loo faaauau pea i le taimi nei.
O le uluai ta’ua manino o le upu “sefuluai” o loo maua lea i le Tusi Paia i le uluai tusi o le Feagaiga Tuai. O Aperamo … na feiloai ma Mekisateko, le tupu o Salema ma o le faitaulaga a le Atua Silisili Ese. Sa faamanuia o ia e Mekisateko, ma sa “avatu [e Aperamo] sefuluai o mea uma ia te ia.” (Ken. 14:20.)
I ni nai mataupu mulimuli ane i le tusi lava lea e tasi, sa tauto atu ai Iakopo, i Peteli i upu nei: … “O mea uma foi e te foai mai ia te au ou te avatu lava ia te oe mea e sefulu a’i.” [Ken. 28:20–22.]
O le ta’uaina lona tolu e fesootai ma le tulafono faa-sa Levi. Sa fetalai le Alii e ala atu ia Mose:
“O mea uma foi e sefulua’i mea i le fanua, o saito e luluina i le fanua po o fua o laau o mea ia a Ieova ua paia lava ia Ieova.” (Lev. 27:30.)
I le tulafono faa-sa Levi na tuu atu i le au sa Levi mo lo latou tausiga, ma sa faapea foi ona poloaiina i latou e totogi sefuluai mai mea sa latou maua e pei ona faaalia i upu a le Alii a o ia faatonuina Mose:
“Ia e fai atu foi i sa Levi, ia faapea atu ia te i latou, Pe a outou talia mai le fanauga a Isaraelu o lona sefulu o mea ua foaiina e a’u ia te outou mai ia te i latou, e fai mo outou tofi, ona outou aumai ai lea ai ia mea o lona sefulu nai le sefulu e fai ma taulaga sii ia Ieova.” (Num. 18:26.)
O loo ta’u manino mai i lenei mea, o le tulafono o le sefuluai o se vaega o le tulafono i sa Levi ma sa totogia e tagata uma—e oo lava i sa Levi latou, o e sa faatonuina ia totogi sefuluai mai sefulua’i sa latou mauaina.
E i ai nisi ua latou faapea, o le tulafono o le sefuluai e na o sa Levi, ae ua faamautu mai e le talafaasolopito le mea moni, sa avea ma o loo avea pea ma tulafono aoao. O se mea masani i le tulafono a Mose. Na i ai lava mai le amataga ma o loo maua foi i le tulafono a Aikupito anamua, i Papelonia, ma e mafai ona tosi i le talafaasolopito atoa faatusi paia. Sa ta’ua e le Perofeta o Amosa [tagai Amosa 4:4] faapea foi ma Neemia o le sa poloaiina e toe fausia ia papuipui o Ierusalema [tagai Neemia 10:37–38; 12:44; 13:5, 12]. E lei leva ona amata e Malaki se galuega sili atu o le fausia lea o le faatuatua ma le ola mama o se malo. I ana taumafaiga maoae e faasagatau i le matapeapea o i latou sa na ona mapo lotu i le na o le ta’u, sa ia tuuaia i latou i le faia o se agasala i luma o le Atua.
“Pe faoa e le tagata mea a le Atua? Ae o outou ua outou faoa a’u mea. A ua outou fai mai, Ni a ea au mea ua matou faoa? O sefuluai ma taulaga.
“Ua matua faafanoina outou, o le nuu uma lava, aua ua outou faoa a’u mea.
“Ina aumaia mea e sefulu a’i a outou mea uma lava i le fale e tuu ai mea; ina ia i ai mea e ai i lo’u fale; ma ia outou tofotofo mai ai ia te au i lenei mea, ua fetalai mai ai Ieova o ’au; pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele.” (Mal. 3:8–10.) …
O upu a Malaki o loo faauma ai le Feagaiga Tuai i se toe faafouga o le faamamafa o le tulafono o le sefuluai, ua ta’u mai ai e lei aveesea lava lenei tulafono mai lava i le amataga. O lea, o le tisipenisione o le Feagaiga Fou, na amata lava i lalo o lea apoapoaiga. …
E lei leva talu ona toefuatai mai le talalelei i lenei tisipenisione, sa tuuina mai ai e le Alii se faaaliga i lona nuu e ala mai i se perofeta o aso e gata ai, e faamanino mai ai le tulafono … :
“Ma a mavae lena, o i latou o e ua faapea ona faasefuluaiina, ia totogi atu le tasi-vaesefulu o a latou mea faaopoopo uma i tausaga taitasi; ma ia avea lenei ma tulafono tumau ia te i latou e faavavau, mo la’u perisitua paia, ua faapea ona fettalai mai ai le Alii.” (MF&F 119:4.)4
3
Tatou te tuuina atu se meaalofa ma tatou faataunuuina la tatou matafaioi o le totogiina lea o a tatou sefuluai.
O le sefuluai o se tulafono a le Atua i ana fanau, ae o le totogiina, e i le faitalia atoatoa. I lea tulaga, e leai se mea e ese ai mai le tulafono o le Sapati po o soo se isi o ana tulafono. E mafai lava ona tatou mumusu e usitaia se tasi po o tulafono uma foi. O lo tatou usiusitai e i le faitalia foi, ae o lo tatou mumus e totogi e le aveesea pe suia ai le tulafono.
Afai o le sefuluai o se mataupu e tuu i le faitalia, mata la o se meaalofa po o se faataunuuina o se matafaioi? E tele lava le eseesega o ia mea e lua. O le meaalofa o le avatu lea i le faitalia o se tupe po o se meatotino e aunoa ma se mafaufau e maua mai se taui. O se mea e ofo fua atu. E leai se tasi faapea o sana matafaioi le tuuina atu o ni meaalofa. Afai la o le sefuluai o se meaalofa, e mafai ona tatou avatu soo se mea lava tatou te malilie i ai, pe a tatou malilie i ai, po o le leai lava o se meaalofa e tuuina atu. O lona uiga ua tatou tuua lo tatou Tama Faalelagi i le vaega e tasi e i ai tagata aisi i le ala, lea tatou te togi atu i ai se tupe siliva pe a tatou ui atu ai.
Ua faatuina e le Alii le tulafono o le sefuluai, ma talu ai o se tulafono, ua avea ai ma a tatou matafaioi le tausia pe afai tatou te alolofa ia te Ia ma i ai se naunautaiga e tausi ana poloaiga ma maua ana faamanuiaga. I lea la tulaga, ua avea ai ma aitalafu. O le tagata e le totogia lana sefuluai ona o la e nofo aitalafu, e ao ona fesili ifo ia te ia lava pe le o nofo aitalafu foi la i le Alii. Na fetalai le Matai: “Ae ia outou muai saili le malo o le Atua ma lana amiotonu; ona faaopoopo atu ai lea o nei mea uma ia te outou.” (Mata. 6:33.)
E le mafai ona tatou savavali i sasae ma sisifo i le taimi e tasi. E le mafai ona tatou auauna atu i le Atua ma mamone. O le tagata na te teena le tulafono o le sefuluai o le tagata lea na te lei matuai taumafai atoatoa e fai. E moni e alu ai le malosi. E tatau ai ona galue ma alu ai le mafaufau ma taumafaiga e ola ai i tulafono o le talalelei po o so o sona mataupu faavae. …
E mafai ona tatou tuuina atu se meaalofa ma faataunuu ai la tatou matafaioi o le totogiina o a tatou sefuluai. O le faataunuuina o le matafaioi i le Alii. O le meaalofa e mo o tatou uso a tagata e fausia ai le malo o le Atua. Afai e mataituina ma e manatunatu se tasi i le talaiga o loo faia e faifeautalai, o le polokalama aoao atu a le Ekalesia, o le ofisa o aoga, ma le polokalama o le fausiaina o fale tapuai, ona oo mai ai lea o le silafia e le o se avega mamafa le totogiina o le sefuluai, ae o se avanoa paia sili. O faamanuiaga o le talalelei ua faasafua atu i le toatele e ala i a tatou sefuluai. 5
“E le o se avega mamafa le totogi o le sefuluai, ae o se avanoa paia sili.”
4
O se foai i le Alii e ao ona avea o se mea taua i le na te foai atu.
I le 2 Samuel 24:18–25tatou te faitau ai sa lei faia e Tavita se taulaga i le Atua i se mea e maua fua. E mautinoa sa ia manatu sei vagana ua faatauina pe totogi e le na te foai atu se meaalofa e taua, o lona uiga e le fetaui ma e le talafeagai foi ona avea o se taulaga i le Atua.
Na fetalai Keriso e sili atu ona faamanuiaina le na te foai atu nai lo le na te talia [tagai Galuega 20:35], peitai e i ai nisi latou te foai atu pe afai o se mea maua fua. E le tusa ai lea ma aoaoga a le Matai o le na fetalai mai: Ai se e fia mulimuli mai ia te au, aua nei usiusitai o ia ia te ia“(Mataio 16:24).
E i ai nisi e le tausia le tulafono o le sefuluai ona o se mea e totogi. Ua eseese lea ma le faautautaga a Tavita o le e le osia se taulaga i le Alii sei vagana ua ia totogia se mea. O mataupu faavae sili moni e fesootai i le tulafono o le sefuluai, e tele ina le amanaiaina e i latou e le totogia ni sefuluai, ma e le malamalama i le tulafono ma le mafuaaga ua faia ai.” 6
5
O le totogiina o le sefuluai e aumaia ai faamanuiaga sili.
Na tuuina mai e le Alii le tulafono [o le sefuluai]. Afai tatou te mulimuli i lana tulafono, o le a tatou manuia, ae a tatou faapea e sili atu le mea lea tatou te mafaufau i ai, o le a tatou fetaiai ma le toilalo. A o ou femalagaai i le Ekalesia ma vaaia taunuuga o le totogi o sefuluai, ona ou faia lea o se faaiuga, e le o se avega mamafa, ae o se faamanuiaga tele.7
Totogi se sefuluai faamaoni. O lenei tulafono e faavavau, ua faailoa mai e le Alii ma ua ola ai le toatele o e faamaoni mai i perofeta anamua seia oo mai i le taimi nei, ua aoao mai ai ia faamuamua le Alii i o tatou olaga. Atonu e le o poloaiina i tatou ia taulagaina o tatou fale po o o tatou olaga, e faapei o le tulaga na i ai le Au Paia anamua. Ua luitauina i tatou i le taimi nei ia faatoilalo lo tatou manatu faapito. Tatou te totogia sefuluai aua tatou te alolofa i le Alii, ae le faapea ona e i ai mea tatou te faia ai. E mafai ona tatou faamoemoe o le a tatala mai e le Alii “pupuni o le lagi”(Malaki 3:10) ma sasaa mai faamanuiaga i luga o le au faatuatua.8
Tatou te mulimuli i le mataupu faavae o le toe faafoi atu i le Alii o se vaega o lona agalelei mo i tatou, ma o lea vaega ua tatou ta’ua o le sefuluai. O le sefuluai … e i le faitalia atoatoa. E mafai ona tatou totogi le sefuluai pe le totogia foi. O i latou e faia, e maua faamanuiaga e le iloa e isi.9
O Maria Filitia Samita [sa o se] tina paionia sa le mafai ona faatoilaloina, o ia o le ava ma se tina ua oti lana tane o Peteriaka Ailama Samita, le uso o le Perofeta. … I se tasi tautotogo ina ua talaia a latou lua pateta, sa ia faatonuina lana fanau tama e fai se uta o pateta aupito sili e ave i le ofisa o le sefuluai.
Sa faafeiloai o ia i le faasitepu o le ofisa e se tasi o failautusi, o le sa [tetee] a o amata la’u i lalo e tamaiti ia pateta. “Faletua Samita,” na ia fai mai ai, a o ia manatua faigata ma ana osigataulaga o loo feagai ai, “e te le tau totogia se sefuluai.” Sa ia … otegia o ia i le totogi o lana sefuluai, ma sa ia faapea ua le faautauta o ia ma atamai. …
Sa tu faasasao le tina ua oti lana tane ma fai atu, “Viliamu, ua tatau ona e maasiasi. Pe e te taofia ea au mai le mauaina o so’u faamanuiaga? Afai ou te le totogia la’u sefuluai, ua tatau foi la ona ou faamoemoe e taofia e le Alii Ana faamanuiaga mai ia te au; ou te totogi a’u sefuluai, aua e le gata o se tulafono a le Atua ae o loo ou faamoemoe foi i se faamanuiaga i le faia. E ala i le tausiga o lea tulafono ma isi, ou te faamoemoe ai ia manuia ma ia mafai ona tausi lo’u aiga.” (Iosefa Filitia Samita, Soifuaga o Iosefa F. Samita [Salt Lake City, 1938], 158–59.)10
O le mataupu faavae o le sefuluai e tatau ona sili atu i le na o se usitai e aunoa ma se lagona faamatematika i le tulafono. Sa fetuuina e le Alii le au Faresaio i lo latou faasefulua’i o laau e aunoa ma le faia o se mataupu faaleagaga [tagai Mataio 23:23]. Afai tatou te totogia a tatou sefuluai ona o lo tatou alolofa i le Alii, i le saolotoga atoatoa ma le faatuatua, ua tatou faaitiitia lo tatou mamao mai ia te ia, ma ua vavalalata foi la tatou sootaga ma ia. Ua faamatuu mai i tatou mai le noataga faaletulafono, ma e tuia foi o tatou loto i le agaga, ma lagonaina le tasi ma le Atua.
O le totogiina o le sefuluai e faamalolosia ai le faatuatua, e faateleina ai le faaleagaga ma le mana faaleagaga, ma faamausaliina ai molimau. E aumaia ai le faamalieina i le iloa ai o loo e faia e tusa ma le finagalo o le Alii. E aumaia ai faamanuiaga lea e maua mai le fefaasoaai ma isi e ala i faamoemoega o loo faaaoga ai le sefuluai. E le mafai ona tatou taofia i tatou lava mai nei faamanuiaga. E le mafai foi ona tatou faapea e le totogia a tatou sefuluai. E i ai so tatou sootaga patino i le lumanai faapea foi i le taimi nei. O mea tatou te foai atu, ma le ala tatou te foai atu ai, ma le ala tatou te faatino ai a tatou matafaioi i le Alii e i ai lona taua e faavavau.
E maua se molimau i le tulafono o le sefuluai mai le ola ai.11
Fautuaga mo Suesuega ma le Aoaoina Atu
Fesili
-
Iloilo le faauigaga o le tulafono o le sefuluai i le vaega 1. O le a le sefuluai? O le a se mea e mafai ona tatou aoaoina mai ia Peresitene Hunter e uiga i le faigofie o le tulafono o le sefuluai?
-
O a ni malamalamaaga ua e maua mai aoaoga a Peresitene Hunter e uiga i le talaaga o le sefuluai? (Tagai vaega e 2.) Aisea e te manatu ai e manao Peresitene Hunter ia tatou malamalama o le tulafono o le sefuluai “o se tulafono aoao”?
-
E faapefea ona tatou “tuuina atu se meaalofa ma faataunuu ai foi la tatou matafaioi i le totogiina o a tatou sefuluai”? (Tagai vaega e 3.) E faapefea ona faaalia lo tatou alolofa i le Alii i le totogiina o a tatou sefuluai? E mafai faapefea ona tatou lagonaina o le totogi o le sefuluai o se avanoa paia ae le o se avega mamafa?
-
Aisea e tatau ai i se e foai atu ona tuuina atu se mea e taua i le Alii? (Tagai vaega e 4.) E mafai faapefea ona faatoilaloina soo se luitau po o se musua e totogi le sefuluai?
-
Iloilo le tele o faamanuiaga ua ta’ua e Peresitene Hunter faapea e oo mai i le totogi o sefuluai (tagai vaega e 5.) Ua faapefea ona e vaaia nei faamanuiaga i lou olaga?
Mau Fesootai
Alema 13:15; MF&F 64:23; 104:14–18; 119; 120;Lomifefiloi Tusi Paia, “Sefuluai”
Fesoasoani mo Suesuega
Pe a e faitauina muamua se mataupu, atonu e te manao e faitau faavavevave pe iloilo foi ulutala ia maua ai se vaaiga aoao i le aano. Ona toe faitau lea o le mataupu, ia faagesegese ma suesue i ai i le loloto. Atonu foi e te manao e faitau vaega taitasi ma faaaoga ai fesili suesue i lou mafaufau. A e faia lenei mea, o le a mafai ona e iloa ni malamalamaaga maoae ma le faaaogaaga.