Mataupu 11
Maoae Moni
O le tuu atu o se taumafaiga faifai pea i mea iti i aso taitasi e tau atu ai i le maoae moni.”
Mai le Soifuaga o Howard W. Hunter
Ua aoao mai e Peresitene Howard W. Hunter o le maoae moni e le maua mai manuia faalelalolagi ae mai “galuega iti e fiaafe … o auaunaga ma taulaga lea e aofia ai le ofoina atu, po o le uma o le ola o se tasi mo isi ma mo le Alii.” 1 na soifua Peresitene Hunter i lona soifuaga e tusa ai ma lenei aoaoga. Nai lo le saili ia patipatia pe viia e isi, sa ia faatinoina galuega o aso taitasi o le tautua ma le ositaulaga, ia sa tele lava ina le iloa.
O se tasi faataitaiga o le auaunaga e matua le iloa lava a Peresitene Hunter, o le tausiga na ia tuu atu i lona faletua, a o tauivi o ia ma le faiifo o lona soifua mo le silia ma le sefulu tausaga. I le popofou o le 1970, sa amata ai ona aafia Claire Hunter i le tiga o le ulu ma na le toe manatua ai se mea. Sa ia mafatia mulimuli ane i le pe o le tino (stroke), lea na faigata ai ona ia tautala pe faaaoga ona lima. Ina ua amata ona ia manaomia le tausiga faifai pea, sa tuuina atu e Peresitene Hunter le tausiga sa ia mafaia, a o ia faataunuuina foi ona tiutetauave o se Aposetolo. Sa ia faatulagaiina se tasi e nonofo ma Claire i le ao, ae sa ia tausia o ia i le po.
O le sao o le palapala i le faiai i le 1981, na le mafai ai e Claire ona savali pe tautala. E ui o lea, o nisi taimi sa fesoasoani ai Peresitene Hunter e sii ese o ia mai lona nofoafaataavale ma opomau o ia ina ia mafai ai ona la sisiva e pei ona sa la faia i tausaga ua mavae.
Ina ua sao faalua le palapala i le faiai o Claire, o lea na naunau ai fomai e tuu o ia i se nofoaga e tausi ai, ma sa nofo ai o ia iina mo le 18 masina na totoe o lona soifua. I lena taimi, sa alu ai lava Peresitene Hunter e vaai o ia i aso taitasi, sei vagana ai pe a malaga i ona tofiga faale-Ekalesia. A oo ina toe taliu mai, e alu sa’o lava o ia mai le malaevaalele ina ia la mafuta ma ia. O le tele o taimi a le o moegapepe, pe o le le iloaina foi o ia, ae sa ia ta’u atu pea lava pea ia te ia lona alofa ma faamautinoa o la e toafimalie lelei.
Sa ta’ua e Elder James E. Faust o le Korama a Aposetolo e Toasefululua e faapea, o le “tausiga mutimutivale o lona faletua o Claire mo le silia i le sefulu tausaga a o gasegase, o le tuuto aupito tamalii lea a se tane i se tamaitai na vaaia e le toatele o i matou i o matou olaga. 2
Ina ua mavae le maliu o Peresitene Hunter, sa ta’ua e se talaaga o lona soifua i le Ensign ana aoaoga e uiga i le maoae moni ma aotele ai le ala na taialaina ai lona soifua:
“E ui e ono taofia o ia i le lotomaualalo tele mai lona faatusaina o ia lava i lana faauigaga, ae na fetaui tonu lava ia Peresitene Hunter lea faauigaga o le maoae. Na faatupuina lona maoae i taimi o lona soifua e lei lauiloa ai i lona faia o faaiuga iloga e galue malosi, e toe taumafai pe a toilalo, ma fesoasoani i ona uso a tagata. O na uiga na atagia i lona tomai maoae ia manuia ni taumafaiga eseese e pei o musika, tulafono, sootaga faavaomalo, kamuta, ma, e sili atu i na mea uma, o le avea ai ma se ‘auauna lelei ma le faamaoni’ a le Alii [Mataio 25:21]. …
“Mo le Peresitene lona sefulufa o le Ekalesia, o le faataunuuina o faamoemoega o le Alii ma le le faatuaoia ma se tulaga masani e pei foi o lona galue o se tamaitiiti a’oga, se tama talavou, se epikopo, ma se Aposetolo e galue e le malolo. O le tovine a le Alii, e pei ona silasila i ai Howard W. Hunter, e manaomia le tausia pea lava pea, ma na pau le mea sa manaomia mai e lona Matai mai ia te ia, o le avea o se ‘auauna lelei ma le faamaoni.’ Sa faataunuu e lenei Peresitene Hunter ma le maoae moni, faatasi ai ma lona silasila totoa pea lava pea i le faataitaiga a le Faaola, o le na ia auauna i ai seia oo i le iuga.”3
O Howard ma Claire Hunter
O Aoaoga a Howard W. Hunter
1
O le faauigaga a le lalolagi o le maoae, e tele lava ina taitaiseseina ma e mafai ona faia ai ni faatusatusaga faataumaoia.
E toatele le Au Paia o Aso e Gata Ai ua fiafia ma sapi i avanoa e ofoina mai e le olaga. Ae ou te popole lava ona o loo i ai nisi o i tatou e le o fiafia. Ua manatu nisi tatou te le o ausia mea o faamoemoeina mai. E faapitoa lo’u popolega mo i latou sa ola amiotonu ae ua manatu—ona latou te lei ausia mea o le lalolagi po o le Ekalesia ua ausia e isi tagata—ua latou toilalo. E tofu mananao i tatou ia ausia se fuataga o le maoae i lenei olaga. Ae aisea o le a tatou le fapea ai? E pei ona matauina e se tasi, o loo i ai i totonu o i tatou taitoatasi se tauiviga tele e toe fia foi i lo tatou aiga selesitila. (Tagai Epe. 11:13–16; MF&F 45:11–14.)
O le iloaina pe o ai i tatou ma ituaiga tagata e mafai ona avea ai i tatou, e faamautinoa mai ai ia i tatou, a tatou au ma le Atua e leai lava se mea o le a le mafaia. Mai le taimi tatou te iloa ai e finagalo Iesu ia avea i tatou o se Aveolela seia oo i le taimi tatou te aoao atoa ai i mataupu faavae o le talalelei, ua aoaoina lava i tatou e taumafai ina ia atoatoa. E le o se mea fou la ia i tatou, le talanoa e uiga i le taua o le ausia o se mea. E tulai mai faigata pe a suia e faamoemoega soona fai o le lalolagi mo i tatou, le faauigaga o le maoae.
O le a la le maoae moni? O le a le mea e avea ai se tasi ma tagata maoae?
Ua tatou ola i se lalolagi e foliga mai e tapuai i lona lava tulaga maoae ma aumaia ai ana lava ituaiga o toa. O se suesuega talu ai nei o talavou e tai sefuluvalu e oo i le luasefulufa, na faaalia ai e sili atu i talavou o nei onapo le “tutoatasi, ma le faatoilalo e le tagata lava ia, ma latou te sailia ma le manino ina ia mamanu o latou olaga ia viia ma “matuai mauoa.” I le 1950, o toa manumanu sa aofia ai Winston Churchill, Albert Schweitzer, Peresitene Harry Truman, Kuini Elisapeta, ma Helen Keller—le tusitala ma le faiaoga tauaso ma logonoa. O tagata lauiloa nei o e sa fesoasoani e mamanu mai le talafaasolopito pe sa lauiloa foi ona o o latou soifuaga musuia. O le taimi nei, o le toatele o toa e toasefulu pito i luga, o tagata o atatifaga ma isi faafiafiaga, lea ua ta’u mai ai se suiga o o tatou uiga faaalia. (Tagai U.S. News & World Report, 22 Ape. 1985, pp. 44–48.)
E moni o toa o le lalolagi, e le umi ona i ai i le mafaufau o tagata lautele; ae, ui o lea, e le faaitiitia lava siamupini ma e ausia mea maoae. Toetoe o aso taitasi tatou te faalogo ai i le au afeleti o faatutuina matatia fou; o saienitisi ua fausia ni mea fou, o masini, ma faiga; ma fomai e faasaoina ola i ni togafitiga fou. E faalauiloa mai pea lava pea foi ia i tatou le aufai musika talenia ma le au faafiafia, ma le au faatufugaga e maoae le talenia, o tusiata o fale, ma tufuga. E tuu mai foi i o tatou luma mekasini, o laupapa tetele o faasalalauga e i ai ata o tagata e lelei atoatoa nifo ma foliga mananaia, ma sitaili o o latou ofu, ma faia soo se mea e faia e tagata “faamanuiaina.”
Talu ai tatou te vaai ma faalogo pea i le faauigaga a le lalolagi o le upu maoae, ua malamalama ai lava, tatou te faia faatusatusaga o i tatou lava ma isi—pe o foliga mai ai—-faapea foi i a tatou mea o i ai ma mea a isi tagata. E ui ina e sa’o faapea o le faia o ni faatusatusaga e mafai ona manuia ai ma mafai foi ona ausia ai le tele o mea lelei ma faaleleia atili ai o tatou olaga, ae e tele taimi tatou te faatagaina ai faatusatusaga le tonu ma le tatau e faatamaia ai lo tatou fiafia, pe a afua ai ona tatou lagona faapea ua le ausia pe ua le lava pe ua le manuia. O nisi taimi, ona ua i ai nei lagona, e taitai atu ai i tatou i le sese ma nopiai ai i o tatou toilalo ae faagalogalo i vaega o o tatou olaga atonu o i ai elemene o le maoae moni. 4
“O le maoae moni e [maua mai] galuega iti e fiaafe ma galuega o auaunaga ma taulaga lea e aofia ai le ofoina atu, po o le uma o le ola o se tasi mo isi ma mo le Alii.”
2
O le tuuina atu o taumafaiga faifai pea i nai mea iti i le olaga i lea aso ma lea aso, e tau atu ai i le maoae moni.
I le 1905, na fai ai e Peresitene Iosefa F. Samita le saunoaga aupito iloga lea e uiga i le maoae moni:
“O mea na tatou te ta’ua e tulagaese, ofoofogia, pe le masani ai, e mafai ona manatua i le talafaasolopito, ae e le aumaia ai mea tonu o loo tutupu i le olaga.
O le mea moni, o le faia lelei o mea na sa faauuina e le Atua ia laugatasia ai tagata uma, o le maoae moni lea. O le avea ma se tama faamanuiaina po o se tina faamanuiaina, e sili atu nai lo le avea o se taitai militeli manuia po o se taitai manuia faaupufai. (Juvenile Instructor, 15 Tes. 1905, p. 752.)
Ua tulai mai i lea saunoaga se fesili: “O a mea na faauuina e le Atua e avea ma “mea e laugatasia ai tagata uma”? E aofia moni ai mea e tatau ona fai ina ia avea ai o se tama lelei po o se tina lelei, se atalii lelei po o se afafine lelei, se tagata a’oga lelei po o se uo lelei, po o se tuaoi lelei.
… O le ofoina atu o taumafaiga faifai pea i mea iti i le olaga i aso taitasi, o le maoae moni lea. E patino lava, o galuega iti e fiaafe ma galuega o auaunaga ma taulaga lea e aofia ai le ofoina atu, po o le uma o le ola o se tasi mo isi ma mo le Alii. E aofia ai le maua o se iloa i lo tatou Tama oi le Lagi ma le talalelei. E aofia ai foi le aumaia o isi i le faatuatuaga ma faaaumea i lona malo. E le masani ona patipatia e le lalolagi nei mea. 5
3
Sa popole le Perofeta o Iosefa i galuega o aso taitasi o le auauna atu ma le tausiga o isi.
E le i manatuaina Iosefa Samita o se taitai militeli, pulenuu, tusiata fale, faatonu, po o se suitauva faaperesitene. Tatou te manatuaina o ia o le perofeta o le Toefuataiga, o se tagata na tuuto lona alofa i le Atua ma le faalauteleiina o Lana galuega. O le Perofeta o Iosefa sa soifua o se Kerisiano i aso uma. Sa popole o ia i galuega o aso taitasi o le auauna atu ma le tausiga o isi. A o tamaitiiti e sefulutolu tausaga, sa auai faatasi Lyman O. Littlefield ma le tolauapiga a Siona, lea na o i Misuri. Na ia faamatalaina mulimuli ane se mea itiiti na tupu, ae o se galuega auauna atu patino ma le taua i le soifuaga o le Perofeta.
“Sa matua faigata le malaga mo i matou uma, ae o mafatiaga faaletino, na o faatasi ma le iloa o sauaga o loo feagai ma o matou uso ia na matou malaga e fesoasoani i ai, na afua ai ona ou faaatu i se tasi aso. A o sauniuni le tolauapiga e faaauau, sa ou saofai ua lelava ma mata faauu i tafaala. O le Perofeta o le tagata aupito pisi o le toalauapiga, ae ina ua ia vaai mai ia te au, sa faliu mai ma le gaogaosa tele o isi tiute e fai mai se upu faamafanafana i se tamaitiiti. Na ia tuu lona lima i luga o lo’u ulu ma fai mai, ‘Pe ua leai ea se avanoa mo oe, si o’u atalii e? Afai e leai, ua tatau ona ta faia.’ Na i ai se aafiaga o lea mea i lo’u mafaufau ma e lei mou ese lava e ui i le tele o tausaga ma le mau atugaluga. (I le George Q. Cannon, Life of Joseph Smith the Prophet, Salt Lake City: Deseret Book Co., 1986, p. 344.)
I se tasi taimi, ina ua auina atu e Kovana Carlin o Ilinoi ia Sheriff Thomas King o le Itumalo o Adams ma nisi o se vaega faatagaina o leoleo e samania mai le Perofeta ma tuulima atu i avefeau a Kovana Boggs o Misuri, sa matuai gasegase Sheriff King. I Navu, sa ave e le Perofeta le leoleo i lona fale ma tausi ia te ia e pei o se uso mo aso e fa. (Ibid., p. 372.) O faatinoga iti, agalelei, ae o ni faatinoga taua i le auaunaga, e le o ni mea sa na o ni nai taimi e fai ai e le Perofeta.
I le tusiga e uiga i le tatalaina o le faleoloa o le [Perofeta o Iosefa Samita] i Navu, na tusia ai e Elder George Q. Cannon:
“E lei faatali le Perofeta lava ia e faatino le galuega o le faatau atu po o le gaosiga: o le talalelei sa ia folafola atu o se tasi o faaolataga i la le tino faapea foi le faaeaga faaleagaga; ma sa naunau o ia e faatino lana pitolaau o le galueaiina. Na ia faia lea mea e aunoa ma se mafaufau mo lona lava manuia.” (Ibid., p. 385.)
Ma i se tusi, sa tusia ai e le Perofeta:
“Ua matua tumu le [Faleoloa Piliki Lanumumu] i le oloa ma ua sili atu, ma sa ou tu i tua o le fata faifaatau i le aso atoa, ma tufatufa atu oloa i le vave e pei lava o se isi faatauoloa ua e vaai i ai, e fesoasoani ia i latou o e na faamalosia [e o latou tulaga matitiva] e leai ni a latou toonai o le Kerisimasi ma le Tausaga Fou, ona o le leai o sina suka laitiiti, molasi, vine, ma isi mea, ma ina ia faafiafiaina ai foi a’u lava, aua ou te fiafia tele e fesoasoani atu i le Au Paia, ma avea o se auauna i tagata uma, ma le faamoemoe o le a faaeaina au i le aso tatau o le Alii.” (Ibid., p. 386.)
Na tusia e George Q. Cannon e uiga i lea vaaiga:
“O se vaaiga ofoofogia lenei! O se tagata na filifilia e le Alii e faataatia le faavae o Lana Ekalesia, ma avea ma ona Perofeta ma Peresitene, a ua sagisagi fiafia o ia ma mitamita e auauna atu mo ona uso ma tuafafine e pei o se auauna. … E lei i ai se aso e lei lagonaina ai e Iosefa o loo ia auauna atu i le Atua ma alofagia o ia i le silafaga a Iesu Keriso e ala i le faaalia o le agalelei ma le gauai atu ‘e oo lava i se aupito itiiti o i latou nei.’” (Ibid., p. 386.)6
“O le Perofeta o Iosefa sa soifua o se Kerisiano i aso uma. Sa popole o ia i mea laiti, i galuega o aso taitasi o le auauna atu ma le tausiga o isi.
4
O le maoae moni e maua mai le faapalepale i faigata o le olaga ma mai le auauna atu i ni auala e tele taimi e le amanaia ai e nisi.
Ina ia avea o se failautusi faamanuiaina o le korama a toeaina, po o se faiaoga o le Aualofa, po o se tuaoi agaalofa, po o se uo e faalogo, o mea uma na o le maoae moni. O le faia e se tasi o le mea sili a o feagai ai ma tauiviga faigata masani o le olaga—ma atonu foi i mata o le toilalo—ma faaauau ona onosaia ma faapalepale i faigata faifai pea o le olaga, ae o na tauiviga ma galuega e saofaga i le alualu i luma ma le fiafia o isi ma lona faaolataga e faavavau—o le maoae moni lena.
Tatou te mananao uma lava e ausia se fuataga o le maoae i lenei olaga. E toatele ua ausia mea tetele; o isi o loo taumafai e ausia mea maoae. Sei ou fautuaina atu oe ia e ausia, ma i le taimi foi lea, ia manatua lou faasinomaga. Aua nei e toilalo i manatu faavae sese o le lalolagi i le maoae. E toatele tagata ua avaga o latou agaga i na faaosoosoga. E le aoga lou faatau atu o lou igoa lelei—i soo se tau. O le maoae moni o le tumau le faamaoni—“Ia tumau i faatuatuaga, Na pele i matua ma e ua fasia.” (Viiga, 1985, nu. 159.)
Ou te mautinoa e tele toa maoae, e le o mailoa, ma ua faagaloina, o loo i ai i lo tatou lotolotoi. O loo ou tautala e uiga ia te outou o e o loo faia pea e le aunoa ma le le leoa o mea e tatau ona outou faia. O loo ou tautala e uiga ia i latou e i ai pea lava iina ma e naunau foi i taimi uma. O loo ou faasino i naunautaiga le masani o se tina, o le e nofo i lea itula ma lea itula, o le ao ma le po, ma tausi se tamaitiiti ma’i a o faigaluega lona toalua pe o alu foi i le aoga. O loo ou faaaofia ai ma i latou o e ofofua maia o latou toto pe galulue foi i le aumatutua. Ou te mafaufau ia te outou na o e faataunuuina ma le faamaoni o outou tiutetauave faaleperisitua ma faaleekalesia, ma tamaiti nofoa’oga e tusi e le aunoa i o latou aiga e faafetai i o latou matua mo lo latou alolofa ma le lagolago.
O loo ou tautala atu foi e uiga ia i latou o e ua totoina i loto o isi le faatuatua ma se manao e ola i le talalelei-— latou o e galulue punouai e fausia ma suia olaga o isi faaletino, faalevafealoai, ma faaleagaga. O loo ou faasino ia i latou o e faamaoni ma agalelei ma galulue malosi i a latou galuega o aso faisoo, ae o i latou foi o ni auauna a le Matai ma leoleo o ana mamoe.
Ia, e le faapea ua ou faatuatuanai ai i ausiaga tetele o le lalolagi, lea ua tatou maua ai le tele o avanoa e maua ai se aganuu ma le faatulagaina lelei, ma le sagisagi fiafia i o tatou olaga. Ua na ona ou faapea atu ia tatou taumafai atili e taulai tele atu ma le manino i mea o le olaga e silisili ona aoga. Ia outou manatua, o le Faaola na fetalai, “O ia o le sili ia te outou e fai lea ma a outou auauna.” (Mata. 23:11.)7
5
O le maoae moni e manaomia ai laa iti, faifai pea, ma o nisi taimi o ni laa masani mo se taimi umi.
Ua tatou taufai vaaia ni tagata ua maumea pe faamanuiaina e toetoe lava i se taimi vave—toetoe lava i se po se tasi. Ae ou te talitonu e ui lava e ono oo mai lea ituaiga o manuia i nisi e aunoa ma le faaumiumi ona tauivi, ae e leai se mea e igoa o le maoae i se taimi vave. O le ausiaina o le maoae moni, o se faiga e umi se taimi. E ono aofia ai ni taimi e toilalo ai. O le taunuuga atonu e le iloa lelei i taimi uma, ae e foliga mai e manaomia ai pea ni laa masani, faifai pea, laiti, ma o nisi taimi o ni laa faatauvaa mo se taimi umi. E ao ina tatou manatua o le Alii lava ia na fetalai, “O mea iti e tutupu mai ai mea tetele.” (MF&F 64:33.)
O le maoae moni e le o se taunuuga o se mea faafuaveta e tupu po o se taumafaiga mo se ausiaga i se taimi e tasi. O le maoae e manaomia ai le atinaega o uiga. E manaomia ai se anoanoai o faaiuga sa’o i filifiliga i aso taitasi i le va o le lelei ma le leaga lea na saunoa i ai Elder Boyd K. Packer e faapea, “A mavae le tele o tausaga o le a afifi faatasi nei filifiliga laiti ma faaalia manino ai mea sa tatou faatauaina.” (Ensign, Nov. 1980, i. 21.) O le a faaalia manino ai foi i na filifiliga o tatou tagata moni.8
6
O galuega masani e tele lava ina tetele atu o latou aafiaga lelei i isi.
A tatou iloiloina o tatou olaga, e taua lo tatou vaavaai, e le gata i mea tatou te ausia, ae faapea foi i tulaga sa tatou galulue ai. E eseese i tatou taitoatasi ma tulagaese; sa tofu i tatou ma se amataga ese i le olaga; e tofu i tatou ma suifefiloi tulagaese o taleni ma tomai; e tofu i tatou ma seti o luitau ma faigata tatou te feagai. O le mea lea, e le tatau ai ona tau na ona aofia i la tatou faamasinoga o i tatou lava ma mea tatou te ausia le lapoa po o le tele ma le aofaiga o mea e ausia; e tatau ona aofia ai foi ia tulaga na i ai ma le aafiaga ua faia e a tatou taumafaiga i isi.
O le vaega mulimuli lea o la tatou iloiloga patino—o le aafiaga o olaga o isi i o tatou olaga-—o le a fesoasoani tatou te malamalama ai pe aisea e taua tele ai ma maualuga nisi o galuega masani, faatauvaa o le olaga. O le tele o taimi o galuega masani tatou te faatinoina, e aupito tele lona aafiaga lelei i olaga o isi, pe a faatuatusa i mea e tele taimi o ta’ua e le lalolagi o mea maoae.9
7
O le faia o mea sa faauuina e le Atua o ni mea taua, o le a taitai atu ai i le maoae moni.
E foliga mai ia te au, o le ituaiga o maoae e finagalo lo tatou Tama i le Lagi e tulimatai, o loo i ai lea i le upega fesootai o le talalelei. Ua i ai o tatou avanoa e le faatapulaaina e faia ai mea e tele faigofie ma laiti ia e iu ina avea ai i tatou ma tagata maoae. Ia i latou ua tuuto atu o latou soifua i le auaunaga ma le ositaulaga mo o latou aiga, mo isi, ma mo le Alii, o le fautuaga sili o le na o le faaauau ai pea lava.
Ia i latou o loo faalauteleina le galuega a le Alii i le anoanoai o mea le leoa ae taua, ia i latou o e ua avea ma masima o le lalolagi ma le malosiaga o le lalolagi ma poutu o malo taitasi—ia te outou e na ona faailoa atu lava o lo matou faamemelo. Afai tou te tumau e oo i le iuga, ma afai tou te lotototoa i le molimau ia Iesu, o le a outou ausiaina le maoae moni ma o le a i ai se aso tou te nonofo ai i le afioaga o lo tatou Tama o i le Lagi.
E pei ona saunoa Peresitene Iosefa F. Samita, “E tatau ona tatou ola i se olaga faamaoni ae le o le faafoliga.” (Juvenile Instructor, 15 Tes. 1905, p. 753.) Ia tatou manatua o le faia o mea sa faauuina e le Atua ia taua ma manaomia ma tatau ai, e ui lava ina vaai i ai le lalolagi e le taua ma faatauvaa, o le a iu lava ina tau atu ai i le maoae moni.
E ao ina tatou manatuaina upu a le Aposetolo o Paulo aemaise pe afai o tatou le fiafia i o tatou olaga ma lagona faapea tatou te le o ausiaina se mea maoae. Na ia tusia:
“Aua o lo matou puapuaga mamasagia ma le vave mavae, e tupu mai ai mo i matou le manuia mamafa e matua silisili ese lava ma le faavavau;
“O loo matou le manatunatu i mea ua vaaia, a o mea e le vaaia; aua o mea ua vaaia e gata mai ia, a o mea e le vaaia e faavavau ia. (2 Kori. 4:17–18.)
E taua nai mea iti. Tatou te le manatuaina le aofaiga na ofo atu e Faresaio, a o le tupe iti a le fafine ua oti lana tane, e le o le mana ma le malosi o le autau a Filisitia, ae o le lototele ma le talitonuga maumaututu o Tavita.
Tau ina ia tatou le lotovaivai i le faia o na galuega o aso taitasi, ia sa faauuina e le Atua ina ia “laugatasia ai tagata.” 10
Fautuaga mo Suesuega ma le Aoaoina Atu
Fesili
-
Aisea tatou te faaluafesasi ai i nisi taimi po o le a le maoae moni? (Tagai vaega 1.) Aisea e taitai atu ai nisi tagata e lagona e leai se mea ua latou ausia pe le fiafia foi, ona o le faauigaga a le lalolagi?
-
E faapefea ona eseese le faauigaga a Peresitene Hunter o le maoae moni ma le faauigaga a le lalolagi? (Tagai vaega 2.) E mafai faapefea ona fesoasoani lea faauigaga o le maoae moni i lou olaga? Manatunatu i nisi o “mea iti” patino e lelei pe a faatele atu se taimi e fai ai ma gauai i ai.
-
O le a se mea ua faagaeetia ai oe i faatinoga laiti a Iosefa Samita o le auaunaga, e pei ona otooto mai i le vaega e 3? O a ni faatinoga laiti o le auauna atu ua faamanuiaina ai oe?
-
Iloilo ia faataitaiga i le vaega e 4 o mea ia e aofia i le maoae moni. O faapefea ona e vaaia tagata o faaalia le maoae moni i nei ala?
-
O le a se mea ua mafai ona tatou aoao mai i aoaoga o i le vaega e 5 e uiga i le ala e ausia ai le maoae moni?
-
O a ni faataitaiga ua e vaai i ai o “galuega masani tatou te faia [ua i ai] se aafiaga tele e lelei i olaga o isi (Tagai vaega 6)
-
Mafaufau i aoaoga a Peresitene Hunter i le vaega 7. E tau atu faapefea le auauna atu ma le ositaulaga i le maoae moni? E faapefea ona fesoasoani le “lototoa i le molimau ia Iesu”ia i tatou ia ausia le maoae moni?
Mau Fesootai
1 Samuelu 16:7; 1 Timoteo 4:12; Mosaea 2:17; Alema 17:24–25; 37:6; Moronae 10:32; MF&F 12:8; 59:23; 76:5–6; 88:125
Fesoasoani mo le Aoaoina Atu
“A o e sauniuni ma le lototatalo e aoao atu, e mafai ona taitaiina oe e faamamafa ni mataupu faavae patino. E mafai ona e maua se malamalama i le ala e sili ona e tuuina atu ai ni manatu patino. Atonu o le a e iloaina ia faataitaiga, lesona faatino, ma ni tala musuia i gaoioiga faigofie o le olaga. Atonu e te maua le lagona uunai e valaaulia se tagata faapitoa e fesoasoani atu i le lesona. Atonu o le a e manatua se aafiaga patino e mafai ona e faasoa”(Aoao Atu E Leai Se Isi Valaauga e Sili Ai [1999], 48).