Mataupu 1

O Iesu Keriso—Lo Tatou Ala e Tasi i le Faamoemoe ma le Olioli

“Afai e faatotonugalemu o tatou olaga ma lo tatou faatuatua ia Iesu Keriso ma lana talalelei toefuataiina, e leai lava la se mea e mafai ona tumau sona sese.”

Mai le Soifuaga o Howard W. Hunter

O se anavatau tumau i aoaoga a Peresitene Howard W. Hunter e faapea, e na o le pau le taimi e oo mai ai le filemu moni, faamalologa, ma le fiafia, pe a taumafai se tagata ia iloa ma mulimuli ia Iesu Keriso. Na aoao mai Peresitene Hunter e faapea, “O le ala o Keriso e le gata o le ala sa’o lea, aepau foi lea o le ala i le faamoemoe ma le olioli.”¹

Na faapena foi ona lototoa Peresitene Hunter e molimau atu i le misiona paia a le Faaola. “I le avea o au ma se Aposetolo faauuina ma se molimau faapitoa ia Keriso, ou te tuuina atu ia te outou la’u molimau faamaoni o Iesu Keriso o le Alo moni o le Atua,” na ia tautino mai ai. “O Ia o le Mesia na molimau ai perofeta o le Feagaiga Tuai. O Ia o le Faamoemoega o Isaraelu, o le na tatalo ai le fanau a Aperaamo, Isaako, ma Iakopo mo lona afio mai i seneturi e tele o tapuaiga ua faamatalaina. …

“E ala i le mana o le Agaga Paia ou te tuuina atu ai la’u molimau. Ou te iloa le moni o Keriso e pei lava na vaai i ai o’u mata ma faalogo i ai o’u taliga. Ou te iloa foi o le Agaga Paia o le a faamaonia atu le moni o la’u molimau i loto o i latou uma o e faalogo ma le faatuatua.”²

O le lagonaina o le fia alu i nofoaga na galue ai Iesu, o lea sa faimalaga ai Peresitene Hunter i le Nuu Paia e sili atu ma le luasefulu fa taimi. Na saunoa Elder James E. Faust o le Korama a Aposetolo e Toasefululua e faapea, o “Ierusalema sa pei o se maneta ia te ia. … O lona naunau ia i ai i mea sa femaliuai ai le Faaola ma aoao atu, sa foliga mai e lei faamalieina. Sa fiafia o ia i vaaiga ma leo uma. Sa sili ona fiafia o ia i Kalilaia. Ae e tasi le nofoaga sa sili ona fiafia i ai o ia. E fai maipealava o ia, ‘Tatou toe o tasi lava i le Tuugamau, sei toe faamanatu na taimi anamua.’ O iina e nofonofo ai ma manatunatu loloto e faapei na te faalogoina so la sootaga ma le Faaola.”³

O Keriso o loo sapaiina se tamaimamoe — “E faafia ona tatou mafaufau i le Faaola? O le a le loloto o le lotofaafetai ma le lotofaamamai tatou te mafaufau ai i lona soifuaga? O le a le taua o Ia i o tatou olaga?”

O Aoaoga a Peresitene Howard W. Hunter

E tatau ona sili atu lo tatou iloa ia Keriso nai lo le mea ua tatou iloa ai o Ia ma manatua atili o Ia nai lo mea o tatou manatuaina ai o Ia.

E lagiina ma le migao e tagata o Le Ekalesia a Iesu Keriso o le Au Paia o Aso e Gata Ai:

Iesu a Mafaufau ia Oe
Ou te fiafia naua;
Ae sili le mau ai ma oe
I lou afioaga. …

…E faafia ona tatou mafaufau i le Faaola? O le a le loloto o le lotofaafetai ma le lotofaamamai tatou te mafaufau ai i lona soifuaga? O le a le taua o Ia i o tatou olaga?

Mo se faataitaiga, e faafia i se aso masani, se vaiaso faigaluega, po o se masina e vave ona mou atu, ona tuuto atu ia “Iesu, a mafaufau ia Oe”? Atonu e mo nisi o i tatou, e le lava.

E moni, o le a sili atu ona toafilemu le olaga, e moni o le a malolosi atu faaipoipoga ma aiga, e moni o le a sili ona saogalemu tuaoi ma malo ma agalelei atu ma sili ona manuia pe afai e sili atu le tele o le talalelei a Iesu Keriso “ma le fiafia” e mafai ona faatumulia ai o tatou loto.

Vagana ua tele lo tatou gauai atu i mafaufauga o o tatou loto, ou te le mailoa po o le a le se faamoemoe o ia i tatou e maua ai le olioli e sili atu, lena taui matagofie: i se aso, o ona “fofoga [alofa] e vaaia / Ma i [lona] afioaga, e malolo ai.”

O aso uma o o tatou olaga ma i vaitau uma o le tausaga … , e fesili mai ai Iesu ia i tatou taitoatasi, e pei ona ia faia i lana malaga faatupu i Ierusalema i le tele o tausaga ua mavae, “Se a lo outou taofi ia Keriso? Se atalii ea ia o ai?” (Mata. 22:42.)

Tatou te tautino atu o ia o le Alo o le Atua, ma o le moni o lena mea e tatau ai ona matua aafia loloto soo ai o tatou agaga.⁴

E tatau ona tatou iloa lelei Keriso nai lo le na ona iloa o ia; e tatau ona tele atu lo tatou manatua o ia nai lo le na ona manatua o ia; e tatau ona faatele ona tatou auauna atu ia te ia ma le totoa nai lo le na ona auauna atu ia te ia. Ona tatou feinu lea i le vai o loo puna a’e i le ola e faavavau ma o le a aai foi i le areto o le ola.⁵

Vaega aoao a Keriso — “Ia avea i tatou ma soo e sili ona tuuto ma amio pulea o Keriso. Ia tatou faapelepele ia te ia i o tatou manatu ma tautala i lona suafa ma le alofa.”

Ua na o Iesu lava lo tatou punavai moni o le faamoemoe ma le olioli tumau.

Faamoemoe o e salamo,
Fiafia o e agamalu,
Alofa oe i e sese!
Ma e saili oe!

Se fuaiupu ina a matagofie o le pese, o se savali foi o le faamoemoe ua taula i le talalelei a Keriso! Pe o i ai ea se tasi o i tatou, i soo se tulaga lava o le olaga, e le o manaomia le faamoemoe ma o loo sailia le olioli e sili atu? O manaoga laugatasia nei ma moomooga o le tagata, ma o folafolaga na a Keriso i ona soo. Ua tuuina atu le faamoemoe i “e salamo” uma ma e maua le olioli e i “latou uma o e agamalu.”

E taugata le lotomomomo—e manaomia ai le tuu o le faamaualuga ma le le magafagafa, aemaise ai e tatau ona lafoai a tatou agasala. E faapei ona iloa e le tama o le Tupu o Lamonae i le luasefulu seneturi ua mavae, o le tau lea o le faamoemoe moni. “Le Atua e,” na ia alaga ai, “sei e faailoa mai oe lava ia te au, ma o le a ou lafoai ese au agasala uma ina ia ou iloa oe … ma ia mafai ona faatuina o au mai le oti, ma faaolaina i le aso gataaga.” (Alema 22:18.) A tatou naunau foi e lafoai a tatou agasala uma ina ia iloa o ia ma mulimuli ia te ia, o le a faatumulia foi i tatou i le olioli o le ola e faavavau.

Ae faapefea e agamalu? I se lalolagi ua faatumuina tele i le manumalo e ala i le taufaamatau ma le sailia ia avea ma numera tasi, ua leai ni tagata se toatele o tutu i laina e faatau ni tusi o loo alagaina ai le agamalu moni. Ae o e agamalu e fai mo latou tofi le nuu, o se aga matagofie tele—ma e faia e aunoa ma le taufaamatau! A le o le taimi nei, ia vave ma e matou te tatalo ia vave nai lole tuai, o le a faailoa ai e tagata uma o le ala a Keriso e le gata o le ala sa’olea ae, pau lea o le ala i le faamoemoe ma le olioli. O le a tootutuli tulivae uma ma tautau atu e laulaufaiva uma e sili atu le agamalu nai lo le faafiamalosi, e sili atu le agalelei nai lo le taufaamatau, o le leo filemu foi e liliu ese ai le ita. I le faaiuga, ma e le o toe mamao le taimi e tatau ai, e tatau ona tatou avea atili e faapei o ia. …

Iesu, lo matou fiafia,
Lo matou faaola;
Iesu avea ma o matou,
Mamalu e faavavau.

O la’u tatalo patino lava lea ma lo’u manao mo le lalolagi uma. … Ou te molimau atu o Iesu ua na o le pau lea o le punavai moni o le olioli tumau, ua ia te Ia lo tatou filemu moni tumau. Ou te manao ia te ia ia avea ma “o tatou mamalu i le aso,” le mamalu o loo tofu faamamai i ai i tatou taitoatasi, ma na o le pau lea o le taui e mafai e tagata ma malo ona umia tumau. O Ia o lo tatou taui i le olaga nei ma le faavavau. O isi taui uma e oo mai le taimi e le toe fua mai ai. O isi mamalu uma e matafi pe a mou atu taimi ma e goto ifo faatasi ma elemene o le lalolagi. I le iuga, … o le a tatou iloa ai e leai se olioli moni ua na o Keriso.

… Ia avea atili i tatou o ni soo amio pulea ma tuuto o Keriso. Ia tatou faapelepele ia te ia i o tatou mafaufauga ma tautalatala i lona suafa ma le alofa. Ia tatou tootutuli i ona luma ma le agamalu ma le alofa. Ia tatou faamanuiaina ma auauna atu i isi ina ia latou faia foi lea lava mea e tasi.⁶

O le manaoga silisili i le lalolagi uma o se faatuatua ola ma le faamaoni lea i le Faaola ma Ana aoaoga.

O loo i ai i latou ua fai mai o se aga faaanamua le talitonu i le Tusi Paia. Pe o se aga faaanamua ea le talitonu i le Atua, ia Iesu Keriso, le Alo o le Atua Soifua? Pe o se aga faaanamua ea le talitonu i lana taulaga togiola ma le toetu? Afai o lea, ou te tautino atu a’u lava ou te aga faaanamua, ma e faaanamua foi le Ekalesia. I se tulaga aupito faigofie sa aoao mai ai e le Matai ia mataupu faavae o le ola e faavavau ma lesona e aumaia ai le fiafia ia i latou ua i ai le faatuatua e talitonu. E le foliga talafeauga ona faapea e tatau ona faaonapo nei aoaoga nei a le Matai. O Lana savali ua faatatau i mataupu faavae e faavavau.⁷

I lenei vaitau, e faapei o isi vaitau uma i o tatou luma atu ma isi o le a mulimuli mai, o le manaoga aupito sili i le lalolagi uma o se faatuatua ola ma le faamaoni lea i aoaoga faavae a Iesu le Nasareta, le Alo soifua o le Atua soifua. Talu ai e toatele ua teena na aoaoga, o le mafuaaga lea e tatau ai i e ua talitonu faamaoni i le talalelei a Iesu Keriso, ona latou folafola atu lona moni ma faaali atu e ala i faataitaiga le mana ma le filemu o se olaga amiotonu, ma le agamalu. …

E faapefea a tatou aga pe a faatiga mai i tatou, le malamalama, pe faia ma le le tonu pe agaleagaina foi, pe tausalaina? O le a se mea e tatau ona tatou fai pe a faatiga i tatou e i latou tatou te alolofa i ai, pe le taulia i se siitaga, pe tuuaifuaina, pe osofaia ma le le tonu o tatou faamoemoega?

Pe tatou te talitualimaina ea? Pe tatou te sii atu ea se taua e sili atu? Pe tatou te mulimuli i le mataupu faavae o le taui atu o le mata i le mata po o le nifo i le nifo, pe … tatou te malamalama ea o lenei mataupu faavae e iu ina tuua ai i tatou ia tauaso ma lē nifoa? …

I le silisiliese o lona soifua ma le faataitaiga o ana aoaoga, na tuu mai ai e Keriso le tele o apoapoaiga faatasi ai ma folafolaga mautinoa e pipii mai ai i taimi uma. Sa Ia aoao mai ma le mamalu ma le pule lea sa faatumulia ai i le faamoemoe le au atamamai ma le au valelea, ē mauoa ma ē matitiva, o ē malolosi ma ē mamai. ⁸

Taumafai e fausia se molimau patino ia Iesu Keriso ma le togiola. O se suesuega i le soifuaga o Keriso ma le molimau o lona moni, o se mea e ao ia i tatou taitoatasi ona sailia. A oo ina tatou malamalama i lana misiona, ma le togiola lea na ia faatinoina, o le a tatou naunau e ola atili e faapei o ia.⁹

O Keriso i luga o le vaa faatasi ma Aposetolo. — E mafai e le Faaola ona faatoafilemuina afa i o tatou olaga.

A tatou faaaoga le faatuatua i le Faaola, o le a Ia faatoafilemuina le sami sousou i o tatou olaga.

E tofu i tatou uma ma ni afa faafuasei i o tatou olaga. O nisi o na afa … e ono matautia ma taufaafefe ma e ono faataumaoi. I le avea ai ma ni tagata taitoatasi, ni aiga, ni nuu, ni malo, e oo lava i se ekalesia, ua tatou feagai ma ni afa fulifao faafuasei e tulai mai, ma afua ai ona tatou tuufesili, “Le Matai e, e te le manatu mai ea ia te i matou a fano?” [Mareko 4:38.] Tatou te faalogoina lava i taimi uma i le toafimalie pe a mavae se afa, “Se a le mea tou te fefefe ai? Se a le mea tou te le faatuatua ai?” [Mareko 4:40.]

E leai se tasi o i tatou e fia manatu ua leaise faatuatua, ae ou te manatu ua talafeauga lelei lava le aoaiga filemu lea a le Alii. O Ieova silisili, lea tatou te faapea ua tatou talitonu i ai, ma o lona suafa foi lea ua tatou tauaveina i o tatou luga, na fetalai, “Ia i le va o vai le vanimonimo, e va a’i isi vai ma isi vai.” Ken. 1:6 O Ia foi lea na fetalai, “Ia potopoto i le mea e tasi o vai i lalo o le lagi, ia iloa foi le eleele matutu.” Ken. 1: 9 E le gata i lea, o ia foi lea na vaeluaina le Sami Ulaula, ma mafai ai e Isaraelu ona savavali i le alititai matutu. (Tagai Eso. 14:21–22.) E moni lava, e le o se mea e ofo ai i lona mafai ona poloaiina ni nai elemene e gaoioi i le Sami o Kalilaia. E ao foi ona faamanatu mai e lo tatou faatuatua e mafai foi ona ia faatoafilemuina le sami sousou i o tatou olaga. …

O le a tofu lava i tatou uma ma ni faigata i o tatou olaga. Ou te manatu e mafai ona tatou talitonu i lena mea. O nisi mea e ono matautia ma faataumaoi ma faatafuna. O nisi e ono muta ai lo tatou faatuatua i se Atua alofa o le o loo i ai le mana e aumaia ai le mapusaga mo i tatou.

O na atuatuvalega ou te manatu ai o le a fetalai mai le Tama o i tatou uma, “Se a le mea tou te fefefe ai? Se a le mea tou te le faatuatua ai?” Ma o le faatuatua lena e tatau ona i ai i le malaga atoa, le aafiaga atoa, le atoaga o o tatou olaga, ae le na o ni nai vaega ma taimi sousou. …

Na fetalai Iesu, “E maua foi outou e le puapuaga i le lalolagi a ia outou lototetele ua ou manumalo i le lalolagi.” (Ioane 16:33.)¹⁰

A o taulai atu o tatou olaga i le Faaola, e le tatau ona tatou fefefe, ma o le a liua o tatou popolega i le olioli.

Ua lava lo’u iloa i o outou olaga pisi ma le gaogaosa, e iloa ai tou te faaatu i nisi o taimi. Atonu tou te popole teisi foi mai lea taimi i lea taimi. Ua ou iloa na mea uma. …

O la’u savali mo outou i le aso o le “aua tou te fefefe, le lafu itiiti e.” E faamalosiau atu ai ia te outou ia olioli i faamanuiaga silisili o le olaga. E valaaulia ai outou ia lagonaina le sagisagi fiafia e ola i le talalelei ma le alofa o lo tatou Tama oi le Lagi. E matagofie le olaga, e oo lava i taimi faigata, ma o loo i ai le fiafia, olioli, ma le filemu, i taimi faapitoa i le ala atoa, ma vaega lē i’u i le mutaaga o le ala.

E moni, e tele mea e popole i ai—o nisi o na mea o ni mea matuia—ae o le mafuaaga lena tatou te talanoa ai i le faatuatua, ma le faamoemoe, ma le alofa mama. O le avea ai ma ni Au Paia o Aso e Gata Ai, o o tatou olaga o “le olaga manuia,” ma e tatou te taumafai e faamamafa o tatou faamanuiaga ma avanoa ae tuuitiitia mea tatou te le fiafia ma popole ai. “Saili ma le filiga, etatalo e lē aunoa, ma ia talitonu,” o le tala lea a le mau, “ma o le a galulue mea uma mo lo outou lelei”(MF&F 90:24). Ou te fia faamanatu atu ia te outou lena folafolaga. …

Faamolemole ia manatua le mea lenei e tasi. Afai e taulai atu o tatou olaga ma lo tatou faatuatua ia Iesu Keriso ma lana talalelei toefuataiina, e leai lava se mea e mafai ona tumau lona sese. I se isi itu, afai e le taulai atu o tatou olaga i le Faaola ma ana aoaoga, e leai se isi manuia e mafai ona tumau lona sa’o. …

Tatou te tauivi ma faafitauli tau i le soifua maloloina i nisi taimi—ae o isi e feagai pea ma na mea i taimi uma. O ma’i ma faama’i o se vaega o le avega o le olaga. Ia faatuatua ma talitonu. E moni le mana o le perisitua, ma e anoanoai mea lelei i le olaga, tusa lava foi pe tatou te tauivi i la le tino. O se olioliga le iloa o le a leai se manu’a po o se faamai i le Toetu.

E ono oo mai nisi o o tatou atugaluga i le tulaga o tofotofoga. O nisi atonu o ni faaiuga faigata e faatatau i a’oga po o galuega po o tupe po o faaipoipoga. Po o le a lava lau avega, o le a e maua le malosi e te manaomia ia Keriso. O Iesu Keriso o le Alefa ma le Omeka, o le amataga ma le gataaga. E faatasi o Ia ma i tatou mai le amataga e oo i le iuga, ma ua le na o se tasi e matauina o tatou olaga. …

Afai o le amo lea tatou te tauivi o le agasala lava, e tutusa lava le savali. Ua silafia e Keriso le mamafa atoa o a tatou agasala, aua na ia muai tauaveina. Afai o la tatou avega e le o le agasala, e le o tofotofoga foi, ae o ma’i po o le mativa po o le teena, e tutusa lava. Ua Ia silafia. …

E tele atu Lona mafatia nai lo a tatou agasala. O Ia le na ta’ua e Isaia o le “tagata faanoanoa” (Isaia 53:3; Mosaea 14:3) na te silafia faafitauli uma tatou te oo i ai, aua na ia filifili na te tauaveina le mamafa atoa o o tatou mafatiaga ma tiga. …

Uso e ma tuafafine, e i ai ma o le a i ai o outou popolega ma luitau o ituaiga eseese, ae ia talia le olaga ma le olioli ma ia tumu i le faatuatua. Suesue e le aunoa i tusitusiga paia. Tatalo ma le lotonaunau. Usitai i le siufofoga o le Agaga ma perofeta. Ia faia mea uma tou te mafaia e fesoasoani ai i isi. O le a outou maua le fiafiaga sili i le faia o na mea. O le a i ai se aso mamalu o le a liua ai o outou popolega i le olioli.

E pei ona tusia e Iosefa Samita i le Au Paia sa feagai ma tauiviga, mai lona sela i le Falepuipui i Liperate:

Ia tatou faia ma le fiafia mea uma ua i ai i lo tatou mana; ona mafai lea ona tatou tutu, ma le mautinoa atoatoa, e vaai i le faaolataga a le Atua, ma lona aao e faaali mai [MF&F 123:17; faaopoopo le faamamafa].

[I upu a le Alii i le Perofeta o Iosefa Samita:]

Aua le matatau le lafu itiiti e; fai mea lelei; ia tuu le lalolagi ma seoli e aufaatasi faasaga mai ia te oulua, auā afai ua lua atiaʼe i luga o laʼupapa, e lē mafai ona latou manumalo. …

Vaai mai ia te aʼu i mafaufauga uma; aua le masalosalo, aua le fefefe.

Matau i manuʼa ua tuia ai loʼu itu, ma tulagafao foi i oʼu lima ma oʼu vae; ia faamaoni, tausi i aʼu poloaiga, ma o le a oulua mautofi ai i le malo o le lagi [M&F 6:34–37].¹¹

Fautuaga mo Suesuega ma le Aoaoina Atu

Fesili

Mafaufau pe faapefea ona e tali i fesili a Peresitene Hunter i le vaega 1. E mafai faapefea ona tatou faatutotonuina atili Iesu Keriso i o tatou olaga? E mafai faapefea ona tatou faatutotonuina atili o Ia i o tatou aiga? E mafai faapefea ona tatou iloaina atili Keriso i lo le na o le iloa o Ia?
O le a le tau “tatou te totogia” ina ia maua ai le faamoemoe, olioli, ma le filemu lea e ofo mai e Keriso? (Tagai vaega 2.) O anafea na e lagonaina ai le faamoemoe, filemu, ma le olioli lea e maua mai i le Faaola?
E te manatu i se a “o le manaoga aupito sili i le lalolagi uma o se faatuatua ola lea ma le faamaoni i aoaoga faavae a Iesu le Nasareta?” (Tagai vaega 3.) E mafai faapefea ona e faaalia lou faatuatua i aoaoga a Keriso pe a e lagonaina le “faatiga mai, malamalama sese, taulimaina [o oe] ma le le tonu pe agaleagaina, po o le fai mai o se agasala [ia te oe]”?
O a ni mea e mafai ona tatou aoao mai i aoaoga a Peresitene Hunter e uiga i le fefe ma le faatuatua? (Tagai vaega e 4.) E mafai faapefea ona fesoasoani le faatuatua tatou te faatoilaloina ai le fefe? Manatu i taimi sa faatoafilemuina ai e le Faaola ia afa i lou olaga a o e faaaogaina le faatuatua ia te Ia.
E mafai faapefa ona fesoasoani le fautuaga a Peresitene Hunter i le vaega e 5 tatou te “taliaina ai ma le olioli le olaga,” tusa lava pe oo mai le faanoanoa, le le fiafia ma ma’i? E mafai faapefea ona tatou atiina ae se vaaiga o le faavavau? Na fesoasoani faapefea le Faaola ia atili manuia lou olaga?

Mau Fesootai

Mataio 11:28–30; Ioane 14:6; 2 Nifae 31:19–21; Alema 5:14–16; 7:10–14; 23:6; Helamana 3:35; 5:9–12; MF&F 50:40–46; 93:1

Fesoasoani mo Suesuega

“A o e suesue, ia mataitu manatu e oo mai i lou mafaufau ma lagona e oo mai i lou loto”(Talai La’u Talalelei [2004], 18) Mafaufau e faamaumau uunaiga e te maua, tusa lava pe le fesootai i upu o loo e faitauina. E ono tulai mai o mea tonu na e finagalo le Alii e faaali atu ia te oe.