Mataupu 14

O Tiutetauave ma le Faasologa o le Perisitua

O le faatulagaga o le ekalesia e… tusa ai ma mataupu faavae ua faaalia mai e le Atua.¹

Mai le Soifuaga o Ioane Teila

Sa malosi le lagona o Peresitene Teila e uiga i le faasologa ma le faatulagaga o le perisitua, ma sa ia aoao mai o le perisitua “o se faatusa o mea o i le lagi” ma o le auala “e tafe mai ai faamanuiaga a le Atua i lona nuu i le fogaeleele.”² Sa ia amataina le faia o sauniga faaleperisitua i vaiaso taitasi i uarota, faatasi ai ma sauniga faaleperisitua i le siteki i masina taitasi, ma konafesi faalekuata a siteki, e uunaia ai i latou e umia le perisitua e aoao ma faataunuu o latou tiute.

Ina ua maliu Polika Iaga ia Aokuso 1877, sa soloia le Au Peresitene Sili ae avea ai le Korama a Aposetolo e Toasefululua, lea sa Peresitene ai Ioane Teila, ma tino pulefaamalumalu o le Ekalesia. E ui ina sa silafia e Peresitene Teila, o tulaga faapea, e tutusa ai le pule ua i ai i le korama a le Toasefululua ma le Au Peresitene Sili (tagai MFF 107:22–24), ae sa ia silafia foi le faasologa sa’o o le perisitua, ma le malamalama o loo taitaia le Ekalesia e se Peresitene ma ona fesoasonai e toalua. E le gata foi i lea, ae sa ia sailia foi ma le lotomaualalo e faia le finagalo o le Alii ma sa le’i manao e faia fua e ia lenei faiva .

Ina ua silia laitiiti ma le tolu tausaga talu ona maliu Polika Iaga, sa toe faatulagaina le Au Peresitene Sili. I le aso 10 Oketopa 1880, sa lagolagoina ai Peresitene Ioane Teila e avea ma Peresitene o le Ekalesia, faatasi ai ma George Q. Cannon ma Iosefa F. Samita e avea ma fesoasoani. I lana saunoaga i le aso na lagolagoina ai, na tulei saunoa ai Peresitene Teila: “Pe ana leai lo tatou tiute e faatulaga atoatoa le ekalesia i ona tofiga uma, semanu e sili ia te au ona ou galue pea ma le usoga a le toasefululua, ua na o so’u manatu lava faaletagata. Peitai, o loo i ai fesili ua tulai mai e tusa ai ma nei mataupu, e le tatau ona faapea atu o le mea lea sa tatau ona i ai, po o le faapea foi o le ala lea e tatau ona tulimata’ia. Ina ua tuuina mai e le Atua ia i tatou se poloaiga ma tofia se faatulagaga i lana ekalesia, faatasi ai ma korama eseese o le perisitua e pei ona tuuina mai ia i tatou i se faaaliga e ala mai i le Perofeta o Iosefa Samita, e leai so’u manatu e i ai se aia a le Au Peresitene Sili, o faitaulaga sili, o fitugafulu, epikopo, po o soo se isi lava, e suia ai pe toe fetuunai lena fuafuaga ua folasia mai ma faatuina e le Alii.”

Ona ia ta’ua lea talu mai le maliu o Polika Iaga, ua faatulagaina atoatoa le perisitua, sei vagana ai le Au Peresitene Sili, ma ua alagatatau ai ona nofoia nofoaga o le korama a le Au Peresitene Sili, faapea foi ma isi korama, e pei ona tofia ai e le Silisiliese.

Sa faaauau le saunoaga a Peresitene Teila: “O fautuaga nei a le Agaga o le Alii ia te au. Sa ou faaalia o’u lagona i le toasefululua, o e sa ioe foi i ai, ma e moni lava, e toatele i latou sa tutusa o matou lagona. E le o ia i matou, pe le tatau foi ona i ai, e le o le nofoaga, tulaga, po o le mamalu, e ui lava ina o se tulaga faamamaluina le avea ai ma se auauna a le Atua. O se tulaga faamamaluina tele le umia o le perisitua, e le o se tulaga faamamaluina i se tagata po o ni tagata le saili atu mo ni tulaga i le perisitua paia. Na fetalai mai Iesu, Ua le filifilia a’u e outou, a ua filifilia outou e a’u [tagai Ioane 15:16]. Ma e pei lava ona ou fai atu muamua, pe ana faapea ou te fesili i o’u lava lagona faaletagata, semanu ou te faapea atu, o loo solosolo lelei, toafimalie, ma talafeagai mea uma; ma o loo i ai ni a’u paaga lelei ou te faaaloalo i ai ma ou vaai maualuga foi i ai, o se usoga ia te au, ma ou te fiafia lava i a latou fautuaga. Tuu ai pea i le mea lea o loo i ai. Ae peitai, e le tatau ona ou tautala atu ai, e le tatau foi ona outou faapea mai o le mea lea matou te mananao e fai e tagata taitoatasi, ae e tatau ia i tatou o loo umia le perisitua ona tatou vaai o loo tausisia lelei faatulagaga o lena perisitua, ma ia faatulagaina mea uma i le ekalesia ma le malo o le Atua e tusa ai ma le fuafuaga sa faaalia mai. O le mea lea, ua tatou faataunuuina ai le faamoemoe ua tofia ai outou e faamaonia i lo outou lagolagoina i le aso.”³

O Aoaoga a Ioane Teila

E lua perisitua, ua faaigoaina o le Faa-Mekisateko ma le Faa-Arona.

Muamua.—Ua tatou iloa e lua lava perisitua eseese ua faaigoaina o le faa-Mekisateko, ma le faa- Arona. … Lona lua—Sa faaee mai e le Alii; e faavavau uma foi ia perisitua, ma e faaaogaina i le olaga nei ma le faavavau. Lona tolu—o le perisitua faa-Mekisateko e umia aia tatau e fai ai ma peresitene, e i ai foi le mana ma le pule i tofiga uma i le ekalesia, i tupulaga uma o le lalolagi; e taitai ai i mea faaleagaga. Lona fa—o lona lua o perisitua ua ta’ua o le perisitua o Arona, aua na tuuina atu ia Arona ma lana fanau i a latou tupulaga uma. Lona lima—O le perisitua maualalo [po o le faa-Arona] aua o se lala i le perisitua sili, po o le perisitua faa-Mekisateko, e i ai foi le mana e fai ai sauniga faaletino. … Lona ono—e i ai se au peresitene e vaaia nei perisitua taitasi, e le gata i le faa-Mekisateko ae faapea foi i le faa-Arona.

Lona fitu—O le mana ma le pule o le perisitua maualuga, po o le Mekisateko, o le taofia lea o ki o faamanuiaga faaleagaga uma o le ekalesia; o le avanoa foi lea e maua ai mea lilo a le malo o le lagi ma le faaavanoaina o le lagi ia te i latou, e fesootai ma le faapotopotoga aoao ma le ekalesia a le Ulumatua, ma le olioli i le fesootaiga ma le faatasi mai o le Atua le Tama, ma Iesu le Puluvaga o le feagaiga fou, ma pulefaamalumalu ai i tofiga uma faaleagaga o le ekalesia, ae o le peresitene foi o le perisitua maualuga, e tusa ai ma le faatulagaga a Mekisateko, e i ai le aia e galue ai i tofiga uma o le ekalesia, e le gata i le faaleagaga ae faapea foi i le faaletino.

“Ona oo lea i le Perisitua Maualuga, le sili. O lea, e tatau ona tofia ai se tasi o le Perisitua Maualuga e taitai i le perisitua, ma ta- ’ua o ia o le Peresitene o le Perisitua Maualuga o le Ekalesia; O lona uiga, o le Faitaulaga Sili Pulefaamalumalu i le Perisitua Maualuga o le Ekalesia.” [MFF 107:64–66.]

O le mea lea, ua manino ai o le perisitua lenei e pulefaamalumalu i peresitene uma, o epikopo, e aofia ai ma le epikopo pulefaamalumalu; o aufono uma, faalapotopotoga, ma taitai i le Ekalesia atoa, i le lalolagi uma.

O le au epikopo o le au peresitene lea o le perisitua Arona, o se lala o le perisitua sili po o le perisitua Mekisateko [tagai MFF 107:14], ma e leai se tasi e aia faaletulafono e taofia ki o le perisitua Arona. Peitai, ona e i ai le pule i le faitaulaga sili o le perisitua faa-Mekisateko e galue ai i tofiga maulalo uma, o lea e mafai ai ona ia galue i le tofi o le epikopo… pe afai ua valaauina, tofia, ma faauuina o ia i lenei mana e le au peresitene o le perisitua Mekisateko. [Tagai MFF 107:17.]⁴

O lenei perisitua maualuga [po o le faa-Mekisateko], ua ta’u mai ia i tatou, sa umia le aia e avea ai ma peresitene i tupulaga uma o le lalolagi [tagai MFF 107:8]. Peitai, e i ai le eseesega i mana masani o le perisitua, ma le tofiga ma le valaauga faapitoa e tofia i ai alii. … Ona o se alii faapea o se faitaulaga sili, pe o ia foi la o se aposetolo? E leai. Ona o se alii o se faitaulaga sili, pe o ia foi la o se peresitene o le siteki, po o se fesoasoani i le peresitene o le siteki? E leai. Ona o ia o se faitaulaga sili, pe o ia foi la o se epikopo? E leai, leai lava. Ma e faapena foi i isi tofiga eseese. O le perisitua maualuga, na te umia le pule e galue ai i na sauniga, tofiga, ma tulaga, pe a tofia ai i latou e le pule tatau, ae le o se isi lava taimi; ma lagolagoina e tagata. … e le faapea a umia e se tagata se tulaga faapitoa o le perisitua, ona ia galue ai lea i tofi uma o le perisitua. Seiloga lava ua tofia ma faamanuia ai o ia i lena tofiga, ona ia galue ai lea.⁵

Ua tuuina mai tofi o le Perisitua mo le faaatoatoaina o le Au Paia.

Ua tuuina e le Alii i lana ekalesia, o aposetolo ma perofeta, o faitaulaga sili, fitugafulu, toeaina ma isi. Aisea? Mo le faaatoatoaina o le Au Paia. [Tagai Efeso 4:11–12.] Ae pe ua tatou atoatoa ea? E leai. O nei tofiga eseese e mo le faaatoatoaina o le Au Paia. O le a ma le isi? Mo le galuega o le malo, ina ia mafai ona agavaa tagata ma aoaoina, ma ia tutumu i le atamai, poto, ma le malamalama, ma ia iloa ona talai atu mataupu faavae o le upumoni e faavavau, ma aumaia i le malamalama o mea fou ma mea anamua mai le teuga’oa a le Atua, o mea na fuafua e siitia ai le soifua sololelei o tagata. O lenei, ona o nei tofiga ua tuuina i le ekalesia, o lea e tatau ai i tagata uma ona faaaloalogia i lona tofiga.⁶

Ua tuuina mai e le Atua i le Au Paia o Aso e Gata Ai, mataupu faavae e le’i malamalama ai tagata o le lalolagi, ma ona o lo latou le malamalama i ai, o lea latou te le iloa ai pe faapefea ona latou talisapaia o tatou lagona. Latou te fai mai ua lelei le mea ua leaga, o le malamalama ma pouliuli, o le mea sese ma mea moni, ma le mea moni ma mea sese, aua e le o ia te i latou mea e iloa ai le eseesega o le tasi mai le isi. “A o outou o tupulaga filifilia outou, o tupu ma ositaulaga, o le nuu paia,” [tagai 1 Peteru 2:9] ua tuuesea ma faamanuiaina e le Silisiliese mo le faataunuuina o ona faamoemoega. Ua faauuina e le Atua mai ia te outou o peresitene, aposetolo, perofeta, faitaulaga sili, fitugafulu, epikopo, ma isi taitai; o ana tofiga, ua faamaonia ma faatonutonuina e ia i lalo o lana taitaiga, ma aoao atu ai lana tulafono, ma tatala atu i ai mataupu faavae o le olaga, ma ua faatulagaina ma faauuina faapitoa e taitai tagata i ala o le faaeaga ma le mamalu e faavavau.⁷

Oi, maimau e pe ana mafai ona tatou malamalama i le mamalu, o le mana, o le paia, ma le nofoalii o lo tatou Tama faalelagi! Pe ana mafai ona tatou mafaufau loloto i le faaeaga, o e mamalu, o le fiafia o loo faatalitali mai i le amiotonu, o le mama atoatoa, ma le amioatua o i latou e matata’u i le Atua, o Tagata Paia o le Silisili Ese! Pe ana mafai ona tatou malamalama i faamanuiga silisili o loo teuina e le Atua mo i latou e matatau ia te Ia ma tausi Ana tulafono ma Ana poloaiga, semanu ua matua ese lava o tatou lagona nai lo le mea o loo tatou i ai nei. Ae peitai, e leai. Ua aumaia i tatou e le Alii mai atunuu eseese, ina ia mafai ona aoaoina i tatou i mea o le malo o le Atua. Ua Ia faaee mai le Perisitua Paia mo lena faamoemoega. Ma o a tatou faatulagaga ia ua i ai, o Siteki ma Uarota, ma o latou Au Peresitene ma Epikopo, o Fautua Maualuga, Faitaulaga Sili, Fitugafulu, Toeaina, Aoao ma Tiakono ma isi, ua tuuina i le Ekalesia e le Silisiliese ina ia aoao ai ma siitia maualuga i tatou.⁸

Ua faatulagaina i tatou ma ni aposetolo ma perofeta: faatasi ai ma peresitene ma o latou fesoasoani, o epikopo ma o latou fesoasoani, o toeaina, ositaulaga, aoao ma tiakono. Ua faatulagaina i tatou e tusa ai ma le faatulagaga a le Atua, ma o mataupu faavae foi nei tatou te manatu e iti, e mai le Atua lava. E i ai o tatou fitugafulu ma faitaulaga sili, ma o nei tagata uma latou te umia tofiga patino, ma le faamoemoe o le a latou faataunuuina ma faalautele, i le olaga nei, mo le atinaeina o le upumoni ma le amiotonu; o le atinaeina o le malo o le Atua ma le faatuina o mataupu faavae sa’o i le Au Paia a le Silisiliese. Ua tatou i ai iinei e galulue faatasi ma le Atua i le faaolaina o e ola, o le togiolaina o e ua maliliu, o le faamanuiaina o o tatou augatuaa, o le sasaaina atu o faamanuiaga i luga o a tatou fanau; ua tatou i ai iinei mo le faamoemoega o le toe faaola ma toe faaleleia le lalolagi o loo tatou o ola ai, ma ua tuuina mai foi e le Atua lana pule ma ana apoapoaiga i le lalolagi mo lena faamoemoega, ina ia iloa ai e tagata le finagalo o le Atua i le lalolagi e pei foi ona faia i le lagi. O le faamoemoega lena o lo tatou ola ai. Ma e ao ia i tatou ona malamalama i o tatou tulaga ma le taua o o tatou tiute.⁹

Ua faatulagaina le perisitua e tusa ai ma le poloaiga a le Atua.

[O le perisitua] o se poloaiga, e pei ona ou malamalama i ai, e folasia mai e le Silisiliese, ma e na o Ia lava. E le pule ai se tagata, pe na sau foi mai se tagata, e le mafai foi ona alualu i luma pe faaatoatoaina e se tagata e aunoa ma le faatonuga a le Silisiliese. O le mea moni, o nei fesoasoani uma, faatasi ai ma nei faatulagaga uma, ma nei mataupu faavae uma, e faigata ona tatou tausia le mama atoatoa o na faatulagaga paia ua tuuina mai e le Atua ia i tatou, ona o vaivaiga ma faaletonu o le tagata, ma o lea tatou te saga manaomia ai pea le matua faaeteete, lotomaualalo, loto pulea, mataala, ma le faalagolago i le Atua.¹⁰

Afai ua tatou maua soo se tofiga, po o se valaauga, po o se pule, po o se mana e galue ai i soo se sauniga, sa tatou mauaina mai le aao o le Atua, ma e na o le perisitua ua faatagaina i tatou e umia, e mafai ai ona tatou faataunuuina nei sauniga. … Afai tatou te faia o tatou tiute, i tatou uma taitoatasi i o tatou tulaga sa’o, e aumaia e le Atua ia i tatou le mana e faataunuuina ai le faamoemoe ua i o tatou luma, e le afaina po o le a, pe o le a foi le perisitua o loo tatou umia, e le afaina po o le Peresitene o le Ekalesia, po o le Peresitene o le siteki, po o se epikopo, se Fautua Maualuga, se Faitaulaga Sili, se Fitugafulu, po o se Toeaina, Ositaulaga, Aoao po o se Tiakono; e le afaina lava po o le a, ae afai latou te faataunuuina o latou tiute ma le manatu tasi i le mamalu o le Atua, o le a ia lagolagoina i latou i a latou galuega ma taitaiga.¹¹

Atonu ta te solia a ta’ua feagaiga; atonu ta te faatuatuana’i i mataupu faavae o le Talalelei ma solia le faatonuga o le Perisitua ma le poloaiga a le Atua; ae o loo i ai i au a Isaraelu le faitauafe ma le fiasefulu afe o le a faamaoni i mataupu faavae o le upumoni, ma ua aufaatasi le Atua o le lagi, o agelu paia ma Perisitua anamua ua nonofo nei i le mea o afio ai le Atua, mo le faataunuuina o lenei faamoemoe. O le a tuleia e le Alii i luma Ona faamoemoega i Lana lava ala ma Lona lava taimi. Ma ona o lea ua faatulagaina, e pei ona ou ta’ua muamua, e le o se tatou tiute le faia e tusa ma o tatou manatu taitoatasi, ae o le mea e poloaiina ai i tatou e le Atua.

Ua i ai la tatou faatulagaga masani i le Ekalesia. O outou na uso e, o e o loo umia le Perisitua paia, ua malamalama i nei mea. Pe le’i aumaia ea e le Atua i tagata taitasi se vaega o Lona Agaga ina ia manuia ai? Ioe. Pe le’i tele ea ona Ia faia lenei mea i le au paia e faamaoni ma faatuatua? Pe Na te le’i tuuina mai ea ia i latou le meaalofa o le Agaga Paia? Ua Ia faia, ma ua latou iloaina foi. Ua latou fesootai o le tasi i le isi, ma ua fesootai foi ma le Atua ma au o le lagi. Peitai, ona ua i ai lenei Agaga, pe tatou te manaomia ea la isi e taitai i tatou? Aisea? Ona o le mana o le pogisa, o le faatosinaga a Satani ma vaivaiga o le tagata soifua. Tatou te manaomia ni leoleo i luga o olo o Siona, o e e mataala i le vaaiga o Isaraelu, ma ia mautinoa e le o taitai seseina le nuu o le Atua. … O tofiga uma e tatau ai mo le galuega o le malo, e maua i le Ekalesia, ma ua faatulagaina mea uma i le faatulagaga a le Atua.¹²

E tatau ona faaaoga le perisitua i le agalelei, ma le faamaoni i le Atua.

E tatau ona tatou taufai alolofa le tasi i le isi, ma ia lagona le agalelei i foafoaga aupito faatauvaa a le Atua, aemaise lava mo le Au Paia a le Atua, tusa lava po o le a le tulaga o latou tulai mai ai. Afai o i ai nisi o sese, taumafai e toe tapu’e mai i latou e ala i le agalelei atu i ai; afai o ia i latou se agaga leaga, faaali atu i ai se agaga e lelei; afai e i ai se tasi e le o faia le mea sa’o, ia outou faia e outou lava ia le mea sa’o ma faapea atu, “Sau, ma mulimuli mai ia te au, e pei ona ou mulimuli ia Keriso.” Pe le o le ala sa’o ea lena e tulimata’i? Ou te manatu o lena; o lo’u malamalama lena i le Talalelei. E leai lava se tasi o i tatou e umia le perisitua ina ia faatamaoaigaina ai ia lava, pe faaaoga foi e faapologa ai ma fiasili a’e i soo se tasi, pe faaaoga ai foi se gagana e le tatau ai; ae ia faaaoga ma le agalelei ma le onosai ma le faapalepale, ma le alofa e le lualuagia. O le a ou faitauina atu mai le Mataupu Faavae ma Feagaiga. …

“Faauta, e toatele e ua valaauina, ae toaitiiti e ua filifilia. E le filifilia foi i latou i se a? aua ua faapea ona manumanu o latou loto i mea o lenei lalolagi, ma manao i viiga mai tagata, latou te le aoaoina lenei aoaoga e tasi—” o le mea tonu lava lea sa faatoa ou talanoa atu ai—O aia tatau o le perisitua e faafesootaiina e le mavavaeeseina ma mana o le lagi, e le mafaia foi ona faatonuina pe faaaogaina ia mana o le lagi tau lava o mataupu faavae o le amiotonu.” Tou te manatu ea o le a tuuina mai e le Atua le mana i se tagata e tau ina faataunuu ai ona lava faamoemoega manatu faapito? Ou te fia tau ia te outou, e le taitai ona ia faia lena mea. “E moni lava e mafai ona tuuina mai ia i tatou; ae pe a tau ufiufi a tatou agasala, pe faamalie lo tatou loto maualuga, lo tatou fiasili le aoga, pe faatonuina pe pulea faamalosia i agaga o le fanau a tagata, i soo se faiga lava o le amioletonu, faauta, e punitia lava le lagi; e tiga le Agaga o le Alii; pe a aveeseina foi, Amene i le perisitua po o le pule a lena tagata.” [Tagai MFF 121:34–37.]

O nisi taimi tatou te mafaufau ai, ua tatou tutu faatasi ma Keriso Iesu i mea o i le lagi; ma ua faapea ona tatou i ai. Peitai, e leai se perisitua o le Alo o le Atua e faatagaina ai se tasi ona faapologa se isi, pe soona faaoga sese ai ana aia tatau. E leai se mea faapena i le faatulagaga; e le o i ai; e pei ona ta’ua—“Faauta, ae le’i iloa e ia, ua tuu lava o ia ia te ia lava, e a’a i tui, e faasaua i le au paia, ma faasagatau i le Atua.” [MFF 121:38.]¹³

E leai se pule e o faatasi ma le Perisitua Paia vagana ai i le mataupu faavae o le faatauanau, ma e leai se tagata e i ai se aia tatau e faalialia vale ai ia lava i soo se tulaga o loo galue ai i lenei Ekalesia, aua ua na o ia o se auauna a le Atua, ma se auauna a tagata, ma afai e i ai se tasi e taumafai na te faaaogaina soo se ituaiga o pule na maua fua atu i se isi tagata, ma galue ai i soo se faiga lava o le amioletonu, o le a faamasinoina e le Atua lena tagata i lena mea, ma o le a faamasinoina i tatou uma e tusa ai ma galuega na faia i le tino iuvale. Ua tatou i ai iinei o ni faaola o tagata, ae le o ni pule saua ma le faaaoga sese o le pule. …

… O i tatou ia o loo umia le Perisitua Paia e tatau ona mama atoatoa. “Ia mama outou o e tauave ipu a Ieova.” [Tagai Isaia 52:11.] E tatau ona tofu mama atoatoa i tatou, ona tatou fai atu lea i isi, “mulimuli mai ia te au, e faapei ona ou mulimuli ia Iesu.” E tatau ona tatou ola i o tatou talitonuga faalelotu, ma usitai i poloaiga a le Atua, ma ia faia o tatou tiute ua tuuina mai ia i tatou.¹⁴

Ou te le talitonu i soo se pulega saua. Ou te talitonu i le onosai, i le agaalofa, i le agalelei, i le faapalepale, ma le alofa ma le matau i le Atua. Ou te le talitonu na aumaia le Perisitua i le tagata e pulea faamalosi ai agaga o isi tagata. E tatau ona faia mea uma i le agalelei ma le onosai, ma ia faamaoni i le Atua.¹⁵

Fautuaga mo Suesuega ma Talanoaga

Aisea e taua ai le faatulagaina lelei i le perisitua? E mafai faapefea ona fesoasoani lenei faatulagaga ia i tatou, e taulima ai manaoga o i latou o loo tatou vaaia?
Aisea e i ai tofi eseese i le perisitua? (Tagai foi Efeso 4:11–12.) O le a sau tagai, e fesoasoani faapefea tofi eseese o le perisitua i le “faaatoatoaina o le Au Paia”?
O a ni mea na e oo i ai, na faamanuiaina ai oe, ona o lou mulimuli i fautuaga a taitai o le perisitua, tusa lava pe e te le’i malamalama pe ioe i le fautuaga i le taimi muamua?
I le talanoaina o taitaiga faa-Kerso, sa uunaia ai e Peresitene Teila i latou e umia le perisitua, ina ia ola i le faaupuga “Sau, ma mulimuli mai ia te au, e faapei ona ou mulimuli ia Keriso,” E mafai faapefea ona faamanuiaina e lenei fautuaga a tatou sootaga ma o tatou aiga ma isi? E faapefea ona fesoasoani le faamamalu i tamaitai, e faamamalu ai foi le perisitua?
Aisea e faaitiitia pe faatama’ia ai e le faamaualuga le mana o le perisitua o i se tagata? E mafai faapefea ona tatou atinae uiga o le agalelei, onosai, faapalepale, ma le alofa e le lualuagia? O a ni auala e mafai ai ona tatou uunaia nei uiga ia i latou o loo tatou auauna i ai i le Ekalesia?
O a ni auala e mafai ai ona e fesoasoani ia i latou o umia le Perisitua Arona i lou aiga ma le uarota, e saunia mo le avanoa e umia ai le Perisitua Mekisateko?

O Mau e Faatatau I Ai: Efeso 4:11–15; MFF 20:38–67; 84:18–32, 109–110; 107; 121:33–46

priesthood blessing — “Afai ua tatou maua soo se tofiga, po o se valaauga, po o se pule, po o se mana e galue ai i soo se sauniga, sa tatou mauaina mai le aao o le Atua.”

First Presidency 1887 — O Le Au Peresitene Sili o le Ekalesia mai le 1880 i le 1887: Peresitene Ioane Teila (ogatotonu) ma ona fesoasoani, o George Q. Cannon (tauagavale) ma Iosefa F. Samita (taumatau).