Mataupu 4

O Le Usitai, o se Tiute Paia

Tau lava ina tatou tausia o poloaiga a le Atua, ona tatou le atuatuvale ai lea; aua o le a faatasi le Alii ma i tatou i le olaga nei ma le faavavau.¹

Mai le Soifuaga o Ioane Teila

Sa faaalia e Ioane Teila le usitai ma le naunautai i le Atua i lona soifuaga atoa. Na patino ona faamaonia lea tulaga ina ua ia taulimaina le valaauga e tuua e na pele ia te ia ae auauna atu o se faifeautalai a le Alii i Egelani.

Na oo mai le valaauga ia Iulai 1838 i se faaaliga o loo tusia i le Mataupu Faavae ma Feagaiga vaega e 118. I lena faaaliga, na poloaiina ai Aposetolo e malaga atu mo a latou auaunaga faafaifeautalai mai le itu e tu ai le malumalu i Sisifo Mamao, Misuri, i le aso 26 o Aperila 1839. O le usiusitai i lenei poloaiga sa matua faigata tele ona o sauaga ma le tuliesea o le Au Paia mai Misuri i le taumalulu o le 1838–39. Peitai, e ui lava i le tulaga matautia na latou feagai i le toe taliu atu i Misuri, ae na tumau le faatuatua ma le usiusitai o Elder Teila ma ona uso a Aposetolo i le Alii. Ina ua faatoa te’a le valuapo i le aso 26 o Aperila 1839, sa latou toe foi i Sisifo Mamao ma faapotopoto ai i le mea e faatu ai le malumalu, lea na latou faataatia ai le maa faavae mo le malumalu ae malaga ese mo Navu e faia ai toe sauniuniga mo la latou misiona i Egelani.²

Sa malaga ese Elder Teila mo lana misiona mai Montrose, i Iowa, i le mea sa nonofo ai ma lona aiga i se fale laupapa faatoso i le isi itu o le vaitafe mai Navu. E ui lava ina sa mama’i lona aiga i le malalia, ae na usitai lava o ia i le valaauga e auauna atu i se misiona i Egelani. I se faamatalaga e uiga i le tiga o le tuua o le aiga, sa ia ta’ua ai e faapea: “Pe a mafaufau i faigata na se’i faatoa o latou feagai, o le le mautinoa pe mafai ona nonofo pea i le fale o loo nonofo ai nei—ma e na o le tasi foi le potu feololo o lena fale—o le pesi o le faama’i, o le matitiva o le usoga, o le le malupuipuia mai tagata faatupu faalavelave, faatasi ai ma le le mautinoa po o a mea o le a tutupu pe a ou le i ai, na tutupu a’e ai ni lagona malolosi ia te au. Sa matua faatuputeleina foi nei lagona malolosi i le taimi ma le mamao o le a matou valavala ai. Peitai, o le mafaufau ou te alu i le poloaiga a le Atua o Isaraelu e toe asiasi i lo’u nuu na ou fanau ai, e talai atu mataupu faavae o le upumoni e faavavau ma faailoa atu i ai mea na faaalia mai e le Atua mo le faaolataga o le lalolagi, na faatoilaloina ai isi lagona uma.”³

Sa maua e Peresitene Teila lona malosi mai lana molimau o’oo’o i le talalelei. “Ina ua ou faatoa faalogo i le talalelei, sa uunaia au e tautino atu e i ai se mea manaia o i ai. Sa toetoe lava ina ou faamoemoe e le sa’o. ‘Afai e sa’o,’ sa ou fai atu ai, ‘ona o au o se tagata faamaoni, o le a ou usitai i ai, a leai, e le mafai ona ou talitonuina a’u lava.’”⁴

O Aoaoga a Ioane Teila

O soo moni o le Alii e filifili e usitai i Lona finagalo.

O le a faataunuuina e le Alii lona faamoemoega uiga ese, ma faataunuu le mea sa ia fuafuaina. Ua ia te i tatou le tiutetauave e ola ai i lo tatou talitonuga faalelotu, ia talisapaia le talalelei ua tatou umia, ma usitai ma le atoatoa i ona tulaga manaomia, usitai atu i ona tulafono, ma faamatuu atu i mea ua poloaiina ai, ma mulimuli i taitaiga a le perisitua paia, o loo umia ki o mealilo o faaaliga a le Atua, ia faalauteteleina o tatou valaauga, ma faamamalu i lo tatou Atua, ina ia mafai ai ona tatou saunia e faataunuu lo tatou taunuuga i luga o le fogaeleele, ma mafai ai ona avea i tatou ma faamanuiaga ia i latou o loo siomia ai i tatou, ma liligi atu ai faamanuiaga i a tatou fanau, ma faasalalau atu mataupu faavae sili o le faavavau, ia ua faamoemoe e faamanuia ai, faamalamalama, aloaia, ma faaeaina i latou uma o le a usitaia ia mataupu faavae.⁵

Na fetalai Iesu, “Ia outou amoina la’u amo, ina ia outou faaaoao ia te au, aua o au le agamalu ma le lotomaualalo, ona maua lea e outou o le malologa mo outou agaga.” [Tagai Mataio 11:29.] O le a le amo na faatietie i soo o Iesu? O le mea moni lava, e tutusa lava ma le amo ua faatietie i o outou luga… .O le fetalaiga e faapea: O atu ia i lo’u igoa ma i la’u pule, ma o le a faatasi lo’u Agaga ma outou. Ma sa faapena ona ou faia, ma sa oo ina tasi tagata i le faatuatua, o aoaoga faavae ma le mataupu faavae, e pei lava ona ta’u mai i Tusitusiga Paia. “Ia outou amoina la’u amo.” O le a lea amo? Na ia fetalai mai, “Amuia e agamalu: aua e fai mo latou tofi le nuu… .Amuia e loto mama; aua latou te iloa atu le Atua… .Amuia e fia aai ma fia inu i le amiotonu; aua e maoona i latou.” [Tagai Mataio 5:5–6, 8.] O le ituaiga amo lea na faatietie e Iesu i o latou luga, ma o le ituaiga foi lenei ua faatietie atu i ou luga—ia fiafia i le amiotonu, tausia poloaiga a le Atua, ia ola i ou talitonuga faalelotu ma usitai i mataupu faavae o le upumoni, pe o se amo faigata ea lenei? O le mea lea e manaomia ona faia e le Au Paia o Aso e Gata Ai. “Ia outou amoina la’u amo ma aoao e uiga ia te au!” Ae na faapefea ona ia faia? Sa usitai o Ia i le finagalo o lona Tama, ona ia faamoemoe ai lea i ona soo e usitai i lona finagalo.⁶

O le le usitai i poloaiga a le Atua e oo mai ai taunuuga faatama’i.

E tusa ai ma poloaiga faavavau a le Atua ma le tulaga solo lelei o mea o le faavavau, e pei ona i ai faatasi ma ia i lalolagi faavavau, ma pei foi ona i ai i luga o le fogaeleele, e tatau ona i ai uma i tatou i lalo o le taitaiga ma faatonuga a le Atua, ma e tatau ona tatou faalogo i lana poloaiga ma pulea ai i ana apoapoaiga ma ana fautuaga—ma e tatau ona ou mafaufau teisi atu—nai lo le na o le totoina o le fatu saito ia ola po o le sefulu afe miliona ina ia ola, aua e le mafai ona tatou faia e aunoa ma le puleaina e na tulafono e tatau ai mo le faatuputeleina.

E le gata i lea, o i tatou uma lava o fanau a le Atua, pe le sa’o ea? Ou te manatu o loo faitauina le mau e faapea “O i tatou uma o ana fanau; o ia o le Atua ma le Tama o agaga o tagata uma;” [tagai Galuega 17:28; Eperu 12:9] ma ona o ia o le Atua ma le Tama o agaga o tagata uma, ma talu ai ua ia faia se lalolagi mo tagata uma e nonofo ai, ma saunia meaai e tausia ai na tagata, mo a latou meaai, o lavalava, o le tulaga solo lelei, faigofie foi ma le fiafia, ma tuuina atu ia i latou le atamai ma le faatonuga ia o atu ma pulea mea e tele o le natura latou te faaaogaina, pe le o ia te ia ea la se aia tatau e taitai ma faatonutonu ai i tatou, ma poloaiina i tatou e usitai i ana poloaiga? Pe le o se aia tatau tonu ea lena, pe a tatou mafaufau i ai?

E faapea mai le lalolagi, E Leai, e leai sana aia; Ou te pule lava a’u ia ia te au; O a’u o se tagata e tutoatasi; E pule lava a’u i lo’u ala, ma isi mea faapea. E i ai foi nisi o le Au Paia o Aso e Gata Ai e toetoe lava a tautatala mai i le mea lava lea e tasi; e le o matua patino mai, ae ua latou mananao e tau soso atu i ai. “O a’u o se tagata saoloto; ou te malaia pe a ou le faia le mea ou te fiafia i ai, ma isi mea.” Ia o le a ou ta’u atu le isi vaega o lena tala. O le a e malaia pe afai e te faia e tusa ma lou lava manao, sei vagana ua e fiafia e fai ma tausi poloaiga a le Atua. E le mafai ona tatou solia ana poloaiga e aunoa ma le talia o ona taunuuga, e le mafai foi ona solia i o tatou vae nei mataupu faavae faavavau o loo i ai i tulaga faanatura uma. Afai ua poloaiina mea uma o le natura ia pulea e tulafono po o le a pagatia, aisea la o le a le faapena ai foi le tagata?⁷

E le mafai ona tatou faia na o mea tatou te mananao e fai ae maua faamanuiaga a le Atua. Soo se tagata lava e taumafai e faia faapena, o le a ia iloaina lava ua faaseseina o ia. O le a aveeseina mai e le Atua lona Agaga mai ia ituaiga o tagata, ma o le a tuua ai na o i latou e faasevasevaloa solo i le pogisa, ma o ifo ai i lalo i le malaia. Ua faamoemoe o le a tatou ola i tulaga lelei e maualuga atu, ma ia tatou lagona o i tatou o fanau a le Atua, ma o le Atua o lo tatou Tama, ma o le a le taufaatauvaaina o ia e ni fanau e le usiusitai, po o i latou foi e faasagatau i ana poloaiga ma lana perisitua. O loo faamoemoe o Ia ia tatou ola i o tatou talitonuga faalelotu, ia usitai i Ana tulafono ma tusia Ana poloaiga.⁸

Afai o i tatou o le Au Paia a le Atua, e tatau la ona tatou amata aoao e fai le finagalo o le Atua i le fogaeleele e faapei ona faia i le lagi: aua e le o tagata uma e faapea mai, Le Alii e, Le Alii e, o le a ulu atu i le malo o Keriso, ae o le e faia le finagalo o le Tama o i le lagi [tagai Mataio 7:21]. Tatou te manatu i nisi taimi e mafai ona tatou faia e tusa ma mea tatou te fiafia i ai. E mafai ona tatou faia e tusa ma o tatou manao, ma o le a faia foi e le Atua e tusa ma Lona finagalo; ma o upu uma ma mafaufauga faalilolilo uma o le a faamasinoina ai i tatou, o mea ia ua ta’uina mai ia te i tatou… .

Tatou te le i o mai iinei e fai o tatou lava loto, ae o le finagalo o lo tatou Tama Faalelagi. O nisi tagata ua manatu o loo lelei lava mea ua latou faia, ma o le faia, e tusa ai ma o latou lava manatu, “o le faia lea e tusa ma o latou manao,” o le a i ai se taimi e fagua ai i latou ma iloa ai, latou te le i faia le finagalo o le Atua. Atonu sa latou manatu o la e i ai o latou taitoalua ma fanau, ae peitai o le a latou ala mai ma iloa ai e le o i ai, ma ua taofia i latou mai le tele o faamanuiaga sili na latou mananao e olioli ai. Faatasi ai ma lo tatou alofa mutimutivale uma, agalelei ma lagona faamomoiloto i o tatou uso ma tuafafine, ma tagata uma, e le mafai lava ona tatou solia poloaiga a le Atua, pe solia foi na mataupu faavae na Ia faataatia faatasi ma ona taunuuga. Ua faamoemoe o Ia ia tatou faia na mea e tusa ma Lona finagalo, ma afai tatou te le faia, e tatau ona tatou totogiina le sala o lo tatou o ese mai mataupu faavae sa’o.⁹

Afai e mafai e le Alii ona fai ia i ai tagata e faalogo i lana tulafono, atonu e i ai se avanoa e faatu ai lona malo i luga o le fogaeleele. Afai e leai, na pau le ala e mafai ai ona faatu lona malo o le aveeseina mai lea mai le fogaeleele, pe taofia foi lona malo seia aulia se isi taimi; aua e le mafai ona faatu lona malo e aunoa ma le i ai o ni tagata e usitai ia te ia… .

… Afai e leai se lagona o le usiusitai, o le a aveesea mai le Agaga o le Atua. E le mafai e tagata ona tausi le agaga ma fouvale i taitai ma tetee i fautuaga o le ekalesia ma le malo o le Atua.¹⁰

O le usitai e aumaia ai faamanuiaga i lenei olaga ma le faavavau.

O le a le tiute o le tagata iinei? O le usitai lea i e ua fai ma fofoga taumomoli o le Atua o loo i ai iinei; ma afai lava tatou te tausia poloaiga a le Atua, e leai se mea leaga tatou te popole i ai; aua o le a faatasi le Alii ma i tatou i le olaga nei ma le faavavau.¹¹

Ua fetalai mai Keriso, “o lo’u manuia ou te avatu ai ia te outou: ou te le avatu ia te outou faapei ona avatu e le lalolagi.“ (Ioane 14:27.) Po o fea lava o i ai lenei manuia po o lenei filemu, o le a tuua ai lava se aafiaga e mafanafana ma faafouina i agaga o i latou e tofo i ai. E faapei o le sau o le taeao i laau ua fia feinu. O lenei manuia o le meaalofa lea mai le Atua lava ia, ma e mafai ona na o ia e maua mai ai e ala lea i le usiusitai i ana poloaiga. Afai e i ai se tagata e manao e folasia atu lenei manuia i lona aiga po o ana uo, ia atinae muamua e ia i totonu ia te ia lava; aua e mafai ona maua le manuia moni, i le na o le faia e tusa ai ma le tulafono aloaia ma le pule mai le lagi, atoa ai ma le usitai i ona tulafono.¹²

Ua tatou iloa le mea lenei, o loo soifua le Atua; ua tatou iloa foi afai tatou te valaau atu ia te ia na te faafofogaina a tatou tatalo; ua tatou iloa foi o le faatumutumuga o le fiafia o le tagata o le mata’u lea i le Atua ma tausia ana tulafono ma ana poloaiga; ua tatou iloa foi o se tiute ua tuuina mai ia te i tatou le taumafai ia fiafia ma popoto tagata uma, ma o le fiafia ma le poto e na o le usitai lava i tulafono a le Atua e mafai ona maua ai.¹³

O i tatou o le Au Paia o Aso e Gata Ai, ua tatou talitonu ua toefuataiina mai lenei Talalelei, e le gata foi i lea, ae ua tatou iloa ua ia te i tatou. O a’u o se tasi faataitaiga, ma e faapena foi outou; ma o le usiusitai i ona mataupu faavae ma le taliaina o le Agaga Paia, ua iloa ai e outou na o le Au Paia o Aso e Gata Ai, o le galuega lenei a le Atua, ma afai tou te le iloaina, e mafua ona tou te le o ola ai i o outou talitonuga faalelotu ma tausia poloaiga a le Atua; “ai se tasi e fia fai lona finagalo,” na fetalai mai ai Keriso, “e iloa ai e ia le mataupu, pe mai le Atua, pe ou te tautala fua lava a’u.” [Ioane 7:17.]¹⁴

E tatau ia te i tatou ona faalautetele valaauga ua tofia ai i tatou, ma afai e le taialaina ma taitaiina i tatou e le Silisiliese, e le mafai ona tatou faia—o lona uiga, o i latou e le filifili e usiusitai i le poloaiga a le Atua, e le mafai ona latou faia lena mea. Peitai o i latou e filifili e usiusitai i le poloaiga a le Atua, e mafai ona latou faia ma e faigofie foi ona latou faia, aua na fetalai Iesu: “Ia outou amoina la’u amo, ma ia outou faaaoao ia te au, aua o a’u le agamalu ma le lotomaualalo; ona maua lea e outou o le malologa mo outou agaga. Aua e avegofie la’u amo, o la’u avega foi e mama ia.” [Mataio 11:29–30.] O lea, afai tatou te filifili e usiusitai i le Atua ma agaga o i totonu ia te i tatou, ona avea ai lea o lo tatou malamalama e faapei o le malamalama o e amiotonu, e tuputupu pea le pupula o lea malamalama seia oo mai le aso atoatoa ona lelei; ae afai tatou te le usiusitai i le poloaiga ma le afioga ma le faatulagaga o le Ekalesia ma le Malo o le Atua i luga o le fogaeleele, o le a avea le malamalama i totonu ia i tatou ma pouliuli, e pei ona ta’ua, ona matua tele ai lea o le pouliuli! [Tagai Mataio 6:23.]¹⁵

Pe a lotomaualalo tagata, mama ma amioatua, ma saili atu i le Alii mo Lana taitaiga, mo le malamalama o Lona Agaga Paia e taitaiina i latou i ala o le ola, ina ia mafai ai ona latou malamalama i Lana poloaiga, o Lana afioga ma Lona finagalo—ona usiusitai ai lea i ai pe a faaalia mai ia te i latou—o ia tagata, o na uso ma tuafafine o e mulimuli i lenei fuafuaga, e faaafe ona latou malamalama i mea a le Atua nai lo i latou e faatamala, faamaualuga, faavalevalea ma faatautee, ma faatalale i faamanuiaga ma avanoa e ofoina atu ia te i latou. O le a avea le malamalama o i totonu o na tagata ma pouliuli, ae o le ala o isi e faapei o le malamalama o e amiotonu, e tuputupu pea le pupula o lea malamalama seia oo mai le aso atoatoa ona lelei. [Tagai MFF 50:24.]¹⁶

E faalagolago lo tatou saogalemu ma le fiafia ma lo tatou tamaoaiga i lo tatou usiusitai i le Atua ma Ana poloaiga, ma o mea foi lava ia e faalagolago i ai lo tatou faaeaga i le olaga nei ma le faavavau. Afai e i ai mea i o tatou lima, tatou te fesili i lo tatou Tama ina ia mafai ona tatou faia i ai le mea sa’o, ma e faapei ona ou fai atu, tatou te ole atu ia te Ia mo a tatou meaai i aso taitasi, ma faafetai atu ia te Ia mo ia meaai; e faapei foi ona fai e le fanauga a Isaraelu. Sa auina atu ia te i latou e agelu le manai mai lea taimi i lea taimi. Ou te le iloa pe o a ituaiga masini fai falaoamata sa i ai ae pe o ai foi a latou fai falaoa sa i ai; ae na latou aumaia le manai. “O le ua tele ana mea, e leai sana mea e toe, o le ua itiiti ana mea, e le faalelava foi ana mea.” [Esoto 16:18.] Ou te manatu e faapena foi i tatou i nisi o taimi. E le fafagaina i tatou e agelu i le manai, ae e tausia i tatou e le Atua, ma ou te lagona lo’u fia faamanu atu i le suafa o le Atua o Isaraelu i le aso atoa; ma afai tatou te matatau i le Atua ma fai le amiotonu,…o i tatou, o tagata o Siona, o le a aupito sili ona tatou mauoa i lo tagata uma.¹⁷

Ou te manatua ina ua faatoa talai mai ia te au le Talalelei—ae ou te le i papatiso; sa ou faalogo ai i se aoaoga faapea: “Ia, e leai se mea faapitoa matou te folafola atu ia te oe, e na o le alofa lava o le Atua pe afai o le a e ola amiotonu ma tausia Ana poloaiga. Atonu o le a sauaina oe, puapuagatia, faafalepuipuiina pe fasiotia foi ona o le molimau atonu o le a e tuuina atu, ona o le talitonuga faalelotu ua valaauina oe e te usitai i ai; ae e mafai ona matou folafola atu ia te oe, afai e tula’i mai lenei mea, o le a e maua le ola e faavavau.”¹⁸

Fautuaga mo Suesuega ma Talanoaga

Aisea e te manatu ai e finagalo le Alii ia tatou usiusitai? O a ni faamanuiaga ua Ia folafola mai ia te i tatou pe afai tatou te usiusitai?
O a ni mea na e oo i ai, ua faaali atu ai ia te oe faamanuiaga o le usiusitai? Aisea e te manatu ai e lelei lau faalogona pe a e usitai?
Aisea e avea ai le tomai e filifili ma vaega taua o le usiusitai? E faasaolotoina faapefea i tatou e le usitai?
E fesoasoani faapefea le usitai ia i tatou e faamalosia a tatou molimau? O le a se aafiaga o le le usitai e mafai ona i ai i le molimau a se tagata? O le a sou manatu i le uiga o le saunoaga a Peresitene Teila faapea, “E le mafai ona tatou faia na o mea tatou te mananao e fai ae maua faamanuiaga a le Atua”?
Ina ua iloa e faalagolago lo tatou lava faaolataga i lo tatou usiusitai, o le a se mea e mafai ona tatou fai e aoao atu ai i a tatou fanau lenei mataupu faavae?
Aisea e feagai ai pea i latou e usiusitai ma faigata po o tofotofoga? (Tagai foi MFF 58:2–5.) E taua i se a le tumau i le usitai tusa lava pe ogaoga tofotofoga po o faigata?

O Mau e Faatatau I Ai:Mataio 11:29–30; Ioane 7:17; 14:15; 1 Nifae 3:7; Alema 3:26–27; MFF 58:26–29; 130:20–21

boy being baptized — “Ua tatou iloa foi o le faatumutumuga o le fiafia o le tagata o le mata’u lea i le Atua ma tausia ana tulafono ma ana poloaiga.”