Mataupu 15

O Filifiliga ma le Tali Atu o Le Tagata Mo Ia Lava

O so tatou avanoa paia le filifili o lo tatou lava faaeaga po o le faatoilaloina; o lo tatou avanoa paia le filifili o lo tatou lava fiafia po o le faanoanoa i le lalolagi a sau.¹

Mai le Soifuaga o Ioane Teila

“Tatou te talanoa i nisi taimi e uiga i le loto faitalia,” sa saunoa i ai Peresitene Ioane Teila. “Pe o se mataupu faavae sa’o ea lena? Ioe. Ma o se mataupu faavae sa i ai pea lava, ma e mai le Atua, lo tatou Tama Faalelagi.”² E faatauaina e Peresitene Teila le mataupu faavae o le filifiliga saoloto—o le mana na tuuina mai e le Tama Faalelagi i Lana fanau, e filifili ai le lelei po o le leaga mo i latou lava. Peitai, sa ia aoao mai foi e tali atu le tagata lava ia i le Atua mo ana mea na fai. Na ia faamautinoa mai, “E le i tuuina mai lava e le Atua i le tagata se pulega e le faatuaoia i mea o lenei lalolagi; ae e fetalai pea lava o loo i lalo o lana taitaiga, o loo nonofo i lona nuu, ma e tali atu ia te ia i mea na te fai.”³

Ina ia faamamafaina le sootaga o le filifiliga ma le tali atu o le tagata mo ia lava, o lea na faamatala mai ai e Peresitene Teila le tala faatatau lea: “E i ai se tamaloa e lisi atu sana tovine po o se faatoaga. O le tagata la o loo faaaogaina nei, ua i ona lima sana filifiliga patino ma se paoa e pule ai, ae e ao lava ona usitai i tuutuuga patino sa tuu atu i ai e le pule o le faatoaga. Na faapena foi ona osia e le Atua se feagaiga ma Noa, Aperaamo, o le Fanauga a Isaraelu, ma uluai tagata o le au paia. O le osia o se feagaiga, e atagia mai ai e toalua ni tagata po o ni vaega o tagata, o le Atua le tasi a o tagata le isi. Afai e tausia e tagata la latou feagaiga, ua noatia le Alii ma ua tatau ona faataunuu foi lana [vaega]; ae afai e agasala le tagata o le a le noatia foi le Alii e faataunuu lana vaega o le feagaiga. … E mafai e le tagata, ona faia ana lava faaiuga mo ia lava, pe faaleleia e ala i faamanuiaga na tuuina atu e le Atua i lona malosi na te mafaia ai, pe leai foi, e tuu lava i lana faitalia.”⁴

I le vaitaimi o Peresitene Teila, sa i ai nisi tagata na fai mai, o le talalelei ma le perisitua sa faamoemoe e “faapologa ai le tagata pe pule sauaina ai foi i mafaufauga o tagata.” Sa matua tu malosi atu o ia e faamaonia le le sa’o o lea manatu, ma ia ta’utino atu o le faamoemoega o le talalelei, o le “faasaolotoina lea o tagata uma e faapei ona saoloto le Atua; ina ia latou feinu i magavai ‘ia faafiafia le aai o le Atua’; [Salamo 46:4] ina ia siitia i latou ae le o le faatoilaloina; ina ia faamamaina ae le o le faapi’opi’o; ina ia latou iloa tulafono o le ola ma savavali ai, ae le o le savavali i ala faapi’opi’o ma o ifo ai i le oti.”⁵

O Aoaoga a Ioane Teila

Mai lava i le amataga, sa tuuina mai e le Atua ia i tatou le meaalofa o le filifiliga.

Sa faia e le Atua … se poloaiga e tatau i e o i le lagi ma e o i le lalolagi ona i ai la latou filifiliga saoloto. O le tetee o Lusifelo i lea tulaga na fouvale ai; semanu e le mafai ona ia fouvale i se fuafuaga po o se poloaiga e le’i tuuina mai; aua o le fouvale e faaalia ai le solia o se tulafono, poloaiga, po o se pule; ma sa tuliesea o ia mai le lagi ona o lona fouvale. Semanu e le tulai mai lenei fouvale pe ana leai se filifiliga saoloto; aua a leai se filifiliga saoloto, semanu e faamalosia i latou i le finagalo o le Tama. Peitai o le i ai o le filifiliga saoloto, sa latou faaaogaina ai; ma sa tuli ese ai Lusifelo ma le tasi vaetolu o agelu ona o lo latou fouvale ma ua latou faaaogaina lea filifiliga e tetee atu ai i lo latou Tama faalelagi. Ma e le gata ina sa latou fouvale, ae e pei ona tusia, “sa latou saili e faaumatia le saolotoga o le tagata;” [tagai Mose 4:3] ma semanu e faaaoga la latou filifiliga e teena ai faanaunauga, fiafia ma le faaeaga e faavavau o le tagata, lea na fuafua e faataunuu e ala i le togiola ma le faaolataga na saunia e Iesu Keriso.⁶

Sa tuuina mai e le [Atua] ia i tatou le tomai e filifili ai le lelei ae teena le leaga. E mafai ona tatou fai le amioleaga po o le amiotonu, e tusa lava ma le tatou faitalia; ma sa faaaoga e le Tiapolo lea avanoa, ma taumafai ai e faatauaso mafaufau o tagata i ni faatosinaga e faatama’ia ai i latou, ina ia mafai ona ia taitai faatagataotauaina i latou i le mea e loto i ai o ia. E le’i noatia e le Alii i latou, pe pulea foi i latou; ae na ia pulea le taunuuga o a latou amioga, i soo se taimi latou te faia ai se mea e fuafua e faamanu- ’alia ai lona nuu.

O le a faatagaina …e le Alii tagata e tulimatai le fiafia i o latou lava ala, ma tusa ai foi ma o latou manaoga, o le a ia faatagaina ai i latou e inu i le ipu o a latou amioleaga i o latou lava ala. I se isi itu, ua ia faailoa mai lona lelei, ma o le a faaauau pea ona ia faia i lana fanau uma. O le a le mea ua ia fuafua ina ia taunuu? O le fausiaina o le malo lenei i luga o le fogaeleele, o le atinaeina o le amiotonu, o le teena o le fili ma le tuliesea o [Satani] mai le fogaeleele. O lea foi le ala, o le a oo atu ai mataupu faavae o le upumoni i le salafa o le lalolagi, ma o le a ifo atu mea uma i le Atua ma lona Keriso, ma o le a faafoeina e i latou ua filifilia ia sauniga o lona maota e faavavau faavavau lava. Ua loa ona silafia e le Silisiliese lenei faamoemoega.⁷

E tuu mai e le Atua ia i tatou le taitaiga, ae Na te le faamalosia le mafaufau o le tagata.

Ua tatou taliaina le talalelei. Pe sa faamalosia ea se tasi e usitai i ai? Pe sa i ai se tulaga faamalosia na faaalia mai ai? E leai se mea e tusa ai ma lo’u iloa. Pe na faamalosia ea Oliva Kaotui, le toeaina lona lua i le ekalesia, na te taliaina lenei talalelei? E leai, e le- ’i faamalosia. Pe na faamalosia ea Ailama Samita na te taliaina? E leai, e le’i faamalosia. Ae a isi molimau o le Tusi a Mamona—le au Uitimera ma isi? E leai. Ma ina ua uma ona avea i latou ma tagata o lenei ekalesia, pe na faamalosia ea i latou e tumau ai? E leai. Pe na faamalosia ea nisi o le korama a le toasefululua, o fitugafulu, po o soo se vaega o tagata i lenei ekalesia e tauaveina tulaga ua tofia i ai i latou? Ou te le o iloa se tasi, ae a outou? Ou te iloa sa leai se pule faamalosi sa fai mai ia te au, nai lo le malo siaga o le upumoni lava ia i lo’u mafaufau; e leai foi se isi o outou, sa i ai se tulaga faamalosia e sili atu nai lo le mana o le upumoni sa galueaiina ai o outou mafaufau.⁸

Ou te le fia manao e pulea le mafaufau o le tagata. Ou te le fia pulea amioga a tagata. E le faia e le Atua, na te tuu atu lava i la latou filifiliga e tauivi ai ma faigata, o tofotofoga, o puapuaga, ma mea leaga eseese o loo i ai i le lalolagi, e mafai ona oo i ai le tagata. Peitai, ua ia tuu atu i ai o mataupu faavae patino, ma e manao e taitai atu i latou ia te ia lava ma e mafai ona taitai atu ai. Afai e leai, ona ia faia ai lea o le mea silisili na te mafaia mo i latou.⁹

Ua i ai i le tagata le aia tatau e filifili ai; i lalo o le taitaiga a le Alii, ma o le taunuuga, e tali atu ia te ia mo ana amioga, o se aafiaga o lana aia tatau. Peitai, pe na te tuulafoai ea i le tagata ma le fesoasoani ia faataunuu ana fuafuaga? E leai. E silasila atu ia te ia o lona atalii, ma e mai lea taimi i lea taimi na te ofoina atu ai lana fesoasoani, o ia o se tama. Ua ia tuuina mai faaaliga, e aoao ai ma lapataia lona nuu. Ua ia tuuina mai folafolaga i e usiusitai, ma faamata’u ai e le usiusitai. Sa ia aoao i tupu, o alii sili, ma perofeta. Sa ia puipuia foi e amiotonu, ma faasala e amioleaga i le faamasinoga. Sa Ia folafola mai ia Aperaamo ma isi o laueleele ma le tamaoaiga. Ua Ia tuuina mai folafolaga o le ola faavavau i e faamaoni; ae na te le’i pulea malosi pe faamalosia le mafaufau o le tagata.¹⁰

E faamasinoina i tatou e le Atua i le faaaogaina o la tatou filifiliga ma ia aumaia le taui e tusa ai ma a tatou faaiuga.

Pe le o tatou ea o tufuga o o tatou lava taunuuga? Pe le o tatou ea o faitonu o o tatou i’uga?…O so tatou avanoa paia le filifili o lo tatou lava faaeaga po o le faatoilaloina; o lo tatou avanoa paia le filifili o lo tatou lava fiafia po o le faanoanoa i le lalolagi a sau.¹¹

Pe a tatou suesueina ma le faaeteete Tusitusiga Paia, o le a tatou iloa ai e i ai mana patino na tuu atu i le tagata, lea e mafai ai ona pulea ma taitaiina o ia e le Alii; ma afai e galue o ia e aunoa ma le apoapoaiga, taitaiga, po o se faatonuga mai le Atua, o lona uiga ua sosopo atu o ia mai tuaoi na tofia i ai o ia e le Alii, ma e pei lava lona tausalaina o [se taitai o le malo] ua sosopo atu nai lo le mea e tatau ona gata ai ana faatonuga; po o se tagata foi e ona ia se faatoaga, po o se tovine, e lisiina atu, pe afai na te le faataunuuina tuutuuga o lena lisi, ma faatama’ia le faatoaga, po o le tovine; aua o le lalolagi o a le Alii ia, ma sa tuuina i ai le tagata e le Alii. E le o se meatotino a le tagata, sa na ona ia umia mai le Atua. … Afai e tuu i ai le tagata e fai ma sui, e galue ai mo le Alii, ma ia lava foi, ona ia le amanaiaina ai lea o le Alii, o ia lava o le a tali atu pe a faamasinoina e lona Foafoa.¹²

A e toe manatunatu i tua, ma mafai ona e manatua le taimi na e faia ai se galuega lelei, e mafai foi ona e manatua le taimi sa e faia ai se mea leaga; o loo teuina i ou manatu lena mea, ma e mafai ona e toe aumaia ma e sioa i ai i soo se taimi e te manao ai. … Afai sa e suesueina le gagana, e mafai ona e manatua lena gagana ma le fiafia, e mafai ona e faailoa atu ma le poto le eseesega o vaega eseese o le gagana. Afai sa e suesue faaenisinia, o le a alu foi lou mafaufau i le mea na e vaai ai i se masini faapitoa, ma o le a e alu e te galue ma fausia se isi mea faapena. Afai sa e malaga i ni aai, e mafai ona e manatua ituaiga fale, ma magaala, o aai taitasi e te pasi atu ai, ma uiga o tagata tou te mafuta; ma e mafai foi ona e toe mafaufau i ai, ma manatunatu i ai i lea aso po o lea po i soo se taimi lava e te mafaufau lelei ai, ma toe tomanatu i mea sa e faia ma vaai i ai. O fea e te faitau ai i nei mea uma? I lau lava tusi [o ou manatunatuga po o lou olaga], e te le alu fua i se tusi po o se potutusi o se isi tagata, o loo tusia i au lava faamaumauga, ma o loo i ai iina e te faitau i ai. Ua talia e ou mata ma ou taliga, ma ua tago foi i ai ou lima, ua faatino e tusa ai—ma mana e te manatu ua ia te oe, ona oo mai ai lea o lou faamasnioga.

O lenei, afai o ia te oe se agaga po o se ituaiga atamai faapena, e mafai ai ona e faitau i au lava amioga, mata e te le manatu o le tagata na tuuina atu lena agaga ma lena atamai ia te oe, o loo ia umia ki o lena atamai, ma e mafai ona ia faitau i ai i soo se taimi e manao ai? Pe ua le fetaui tonu ea, o se tofa manino, ma o se mau e pa’ia? Ou te manatu e sa’o. …

E moe le tagata i le moe o le oti, ae e nofo le agaga i le mea e teu ai faamaumauga o ana amioga—e le oti—e le mafai e le tagata ona fasiotia, e le oo i ai se pala, ma e tumau le manino, o le manatuaina o mea na tutupu a o le’i tuueseeseina e le oti, ia le tino ma le agaga o loo ola pea.¹³

O i tatou o le nuu o le Atua, ma ua noatia o ia i mea uma na fuafua e noatia ai le tagata po o le Atua. Ua noatia o Ia e tausia lona nuu, pe afai latou te tausia i latou lava; pe afai latou te faamamalu i o latou tofiga ma le perisitua; pe afai latou te faalauteleina ma aumaia le mamalu i le mana ma le pule sa faaeeina atu ia te i latou; pe afai latou te le liliuese mai mataupu faavae sa’o, ua noatia le Atua e faataunuu mea uma e tusa ai ma ana matafaioi; o le tasi o le saunia lea o mea e manaomia e lana Au Paia. … O ai se tasi ua iloa le Atua ae alu ese mai mataupu faavae sa’o?…Ou te le’i alu ese lava, ma ou te iloa foi tou te le’i o ese mai ai lava.¹⁴

Fautuaga mo Suesuega ma Talanoaga

Aisea e taua ai le filifiliga i lo tatou faaeaga? E aiga faapefea le filifiliga ma le Togiola a Iesu Keriso?
O a ni auala o loo taumafai ai pea Satani e faatosina atu a tatou filifiliga? E mafai faapefea ona tatou tetee atu i na taumafaiga?
O a ni ituaiga o taitaiga ua aumai e le Alii e fesoasoani ai ia te i tatou e faaaoga ma le amiotonu a tatou filifiliga? E faapefea ona Ia tauia lo tatou faaaogaina ma le amiotonu o a tatou filifiliga?
Aisea e taua ai mo tagata taitoatasi le maua o le avanoa e fai ai a latou lava faaiuga? E mafai faapefea ona tatou faamamaluina filifiliga a tagata o le aiga, ma uunaia foi i latou i lea lava taimi e fai faaiuga sa’o? E mafai faapefea ona e fesoasoani i tagata o le aiga ia malamalama i taunuuga o a latou faaiuga?
E ui lava ina tatou saoloto e fai a tatou faaiuga, aisea e mafai ai ona faatuaoia lo tatou saolotoga ona o faaiuga e le amiotonu? O le a sou lagona i le faateleina o lou saolotoga ona o faaiuga amiotonu?

O Mau e Faatatau I Ai: Iosua 24:15; Kalatia 6:7; 2 Nifae 2:14–16, 26–27; Helamana 14:30–31; MFF 58:26–28; 101:78; Mose 4:1–4; 6:33