Mataupu 20

O le Malumalu, o le Faitotoa lea i le Faaeaga

Ua tatou i ai iinei e galulue faatasi ma le Atua i le faaolataga o e ola [ma le] faaolaina o e ua oti.¹

Mai le Soifuaga o Ioane Teila

Ona o le faateleina o sauaga i Navu, o lea na popole ai le Perofeta o Iosefa Samita nei te’i ua le ola ia vaai ua faamaeaina le Malumalu o Navu. Ona o lona manao ia mautinoa ua faaee atu ki ma le malamalama manaomia i luga o isi, o lea na ia saunia ai se potu i luga o se faleoloa i Navu, ia mafai ai ona ia faataunuuina sauniga o le malumalu mo nai tagata sa filifilia.² O i latou na filifilia na i ai ma Ioane Teila, o le sa matuai naunau lava i sauniga o le malumalu, mai lava i le taimi na uluai faaalia mai ai na mataupu faavae i le Ekalesia. O lenei aafiaga ma isi mea na oo i ai, sa atinae ai e Peresitene Teila se malamalama ma le agaga faafetai ona o le malumalu ma sauniga o loo faia ai.

A o saunoa Peresitene Teila i le faapaiaga o le tulaga o le Malumalu o Logan i Iuta, sa ia faamatalaina ai i le faapotopotoga ni lagona na oo ia te ia a o asiasi atu i le Malumalu i St. George i Iuta, o le uluai malumalu lea na maea i le Itumalo o Iuta.

“Ina ua ou asiasi atu i lena Malumalu paia, faatasi ma o’u uso sa matou malaga, sa matou maua se lagona ootia o le olioli ma se faalogona malosi o le paia, ma le mamalu. A o matou ulufale atu i ona faitotoa paia, sa matou lagona ua matou tutu i eleele paia, ma iloa ai, e faapei ona ta’ua anamua, ‘E moni o le fale lava lenei o le Atua, ma o le faitotoa o le lagi.’ [Tagai Kenese 28:17.] Ua le na o se tala faafaatusa lena, ae o se mea moni, aua o totonu o lena Fale, ma o totonu o le Fale o le a fausia i lenei laueleele, o le a faia ai sauniga e aupito sili ona paia a le Atua, e soofaatasi ma mea e manaomia e le fanauga a tagata, o e ola ma e ua oti, ma lo latou fiafia. Sa ou lagona le olioli o lo’u loto ona ua faamanuiaina a matou taumafaiga i le fausiaina lea o se tasi malumalu i le suafa o lo tatou Tama ma le Atua.”³

E le gata i le malamalama i le taua o le malumalu, ae sa silafia e Peresitene Teila o le a faaauau pea ona faateleina le numera o malumalu ma i latou e galulue ai a o faataunuuina le fuafuaga a le Atua. A o faasino atu e Peresitene Teila le tulaga e tu ai le malumalu i se tagata asiasi mai se isi atunuu, sa ia valoia ai le matua faateleina o le aofaiga o malumalu i le lalolagi: “Ua matou faamoemoe e fausia le faitau fia selau o isi malumalu i tausaga o i luma, ma galulue ai i le faataunuuina o le galuega a le Atua.”⁴

O Aoaoga a Ioane Teila

E naunau le Atua i le faaeaga o e maliliu faapea foi e o soifua.

Sa i ai se fuafuaga tele ma le lavelave a le Silisiliese i lana faatulagaga mae’ae’a e fesootai ma le faaolataga o le fanauga a tagata, o ana fanau ia, aua o ia o le Atua ma le Tama o agaga o tagata uma. O lona uiga, e naunau o Ia i lo latou soifua solo lelei, o lo latou tamaoaiga, o lo latou fiafia, ma mea uma e faatatau i lo latou faaeaga i le olaga nei ma le faavavau atoa o le a oo mai. Ona o lona naunau mai, ma le itiiti tele o le talalelei na faaalia i augatupulaga eseese, ma le tele naua o le malosi o le pouliuli ma le amioleaga o tagata, o lea sa tatau ai ona i ai se mea e fai mo e ola ma e ua oti. E naunau le Atua i e ola ma e oti.⁵

Ua tatou o mai iinei e galulue faatasi ma le Atua i le faaolataga o e ola, ma le faaolaina o e ua oti, i le faamanuiaina o o tatou augatama, ia liligi mai faamanuiaga i luga o a tatou fanau; ua tatou o mai mo le faamoemoega o le faaolaina ma le toe galueaiina o le laueleele o tatou nonofo ai, ma ua tuuina mai e le Atua lana pule ma ana apoapoaiga i le lalolagi mo lena faamoemoe, ina ia aoao ai tagata e faia le finagalo o le Atua i le lalolagi e pei ona faia ai i le lagi. O le faamoemoga lea o lo tatou ola ai; ma o le tatou matafaioi o le malamalama lea i lea tulaga.⁶

O loo tatou ola, e pei ona ou fai atu, i se vaitaimi taua o le lalolagi. … Sa faapolopolo e le [Atua] i tatou mo aso nei e gata ai, ina ia tatou faia ai lena galuega sa Ia folafola mai a o le’i faavaeina le lalolagi. Afai sa i ai ni faamanuiaga sa olioli ai tagata i tisipenisione o le lalolagi ua mavae atu, o le a tuuina atu foi ia te outou, outou na le Au Paia o Aso e Gata Ai, pe afai tou te ola i o outou talitonuga faalelotu ma usiusitai i tulafono a le Atua. E leai se mea e natia ae o le a faaali mai, na fetalai mai ai le Alii. Ua saunia o Ia e faailoa mai mea uma; o mea uma i le lagi ma le lalolagi, o mea uma e faatatau i tagata sa soifua, o loo soifua nei pe o le a soifua mai, ina ia mafai ona aoaoina i tatou i mataupu faavae uma o le poto e fesootai ma le lalolagi o loo tatou ola ai, po o Atua foi i lalolagi e faavavau.⁷

Tatou te fausia malumalu mo le faaeaga o tagata uma.

Ina ua faaali mai Elia le perofeta ia Iosefa Samita, sa ia tuuina atu ia te ia ki o lenei tisipenisione; o le ala lea ua tatou galulue ai e fausia malumalu. … E i ai sauniga e i tua atu o nei mea, e tau i tua i le faavavau; ma e oo atu ai foi i le faavavau;…ua faamoemoe mo lo tatou soifua solo lelei, o le fiafia, ma le faaeaga o le tagata; mo i latou o loo soifua ma i latou ua maliliu ma i latou foi o le a soifua mai, e faatatau i e na tatou tupuga mai ai ma a tatou fanau. Ma o se tasi na o ki ua tatalaina.⁸

Aisea tatou te fausia ai malumalu? Aua ua faaee mai e Elia ki faapitoa sa ia umia, i luga o Iosefa Samita. Ma ina ua ia tuu ona aao i luga o toeaina ma faaee atu ia i latou le perisitua paia, o loo i ai mataupu faavae na faailoa mai e Elia ia Iosefa, ma tuuina atu ai ia te outou ma isi. … Ma ina ua mavae ni tausaga, ina ua amata ona faapotopoto faatasi le ekalesia, sa amata ona tatou talatalanoa e uiga i le fausiaina o malumalu ina ia maua ma faia ai sauniga sa faaalia mai ia Iosefa Samita, e faatatau mo e ola ma e ua oti, ma e tatau ai mo lo tatou faaolataga ma le faaeaga i le malo o lo tatou Atua, faapea foi i latou tatou te auauna atu i ai. Ma ua le gata ina tatou talanoa i ai, ae ua tele naua foi ua faataunuuina.⁹

O lea ua maea le malumalu [o Logan Iuta], ma ua fesili foi tagata, o le a le mea e fai ai? E tele mea e fai ai: ina ia faia ai o tatou faamauga ma sauniga i se ala e talia i luma o le Atua ma agelu paia; aua o mea e fusifusia i le lalolagi e tusa ai ma tulafono o le perisitua e faavavau e fusifusia foi i le lagi; ina ia i ai se sootaga o e ola ma e ua oti, o e foi sa ola, o tama anamua sa ou ta’- ua e naunau i le soifua solo lelei o a latou fanau; ina ia i ai se perisitua faatupu, o se nuu paia, o se nuu e mama atoatoa, o se nuu e amioatua i le lalolagi e faia ma faataunuuina mea e manaomia e e ola ma ua oti; ia le vaavaai ifo ia i latou lava, ae o le Atua, le galuega a le Atua, ma le faataunuuina o mea sa fuafuaina e le Atua ina ia faataunuuina i le tisipenisione o le atoaga o taimi [tagai MFF 128:18] pe a tuufaatasia mea uma ia tasi, ma ia mafai ai ona latou saunia e galulue faatasi ma le perisitua o i le lagi i le faaolaina o tagata o lenei lalolagi e amata mai le taimi o Atamu seia oo mai i le taimi nei.¹⁰

E tatau ona tatou agavaa e ulufale atu i le malumalu paia o le Atua.

O tagata e fia o e faia nei sauniga i nei maota, e tatau ona i ai se pepa faataga mai lo latou epikopo. … Ma afai ua latou maua mai lenei pepa faataga mai le epikopo, e tatau ona faamaonia e le peresitene o le siteki. … O se mea faigata lea i nisi tagata. O alii ma tamaitai o e amiotonu, amioatua, ma faamamalu, o [se] mea faigofie tele lea; e le faigata ia i latou i soo se taimi. Peitai, o i latou e faatalale i o latou tiute, o e ua o ese mai tulafono a le Atua, ma latou fai mea pi’opi’o, pe solia sauniga o le talalelei—o se taimi matautia lea i na ituaiga o tagata.

Peitai, e i ai se mea e sili atu ona faigata o le a oo mai. Ua na o se amataga lea. O mea o loo loma mai, e sili atu ona faigata ona ausia. O a ia mea? O le a oo mai le taimi tatou te savavali atu ai i luma o na taitai sa ou ta’ua—faapea, ina ia maua le faamaoniga a lo tatou epikopo [ma] le peresitene o le siteki…, ae ua ta’u mai ia te i tatou i le tusi lenei (O le Mataupu Faavae ma Feagaiga) o le a tatou pasi atu i luma o agelu ma Atua. Atonu sa tatou tau faaofiofi atu i le isi itu [faia le mea e mafai ia maua ai se pepa faataga]; atonu sa talia lelei i tatou, ma pasia ma maua ai, o nisi taimi “sa matua faaimamago lava” ona fai. Ae e faapefea la pe a tatou oo atu i le isi itu o le veli, ma ua i ai agelu ma Atua e ao ona tatou pasi atu ai a o le’i mafai ona tatou ulu atu i lo tatou faaeaga? Afai e le mafai ona tatou pasi atu, ona a lea? O lona uiga, e le mafai, pau lava lena. Ma afai e le mafai, pe mata la e mafai ona tatou ulu atu i lo tatou faaeaga? Ou te manatu e leai.¹¹

E mafai ona e ‘olegia le Epikopo ma e mafai foi ona e ‘olegia le Peresitene o le Siteki, ma e mafai foi one e ‘olegia le Au pulega Aoao o le Ekalesia, ae e le mafai ona e ‘olegia le Alii o Iesu Keriso po o le Agaga Paia. E sili lo outou silafia o outou lava nai lo se isi lava tagata, ma afai o i ai sau mea o sese, o le taimi lenei e te salamo ai ma faasa’o oe lava i luma o le Alii; ma afai e te le salamo, o le a oo mai le taimi e faamaualaloina ai oe, ma o le maualuga atu o le mea e te oo i ai, o le tele foi lena o lou pau.¹²

Ua ia te i tatou se tiutetauave e avea ai ma faaola i le Mauga o Siona.

Ua tatou i ai iinei e sauni ai e ola, ma aoao a tatou fanau i le ala e ola ai e faapei o i tatou; ma aoao atu i le lalolagi lesona lava nei pe afai latou te taliaina. Ua tatou iloa na i ai faatasi o tatou agaga ma le Tama ae tatou te le i o mai iinei. Ua tatou iloa o i tatou o tagata e tino ola pea ma o tagata foi e ola faaletino, ma ua i ai lo tatou poto masani i se isi lalolagi faapea foi ma lenei. Ua tatou iloa ua mafiafia faiga pi’opi’o i le lalolagi; peitai, o lo tatou tiute le aloese mai ai, ma ia alualu i luma i le amioatua, upumoni, amiosa’o ma le paia.

Na tatou o mai iinei e avea ma faaola. “E a, faaola?” “Ioe.” “Ae faapea lava tatou e na o le toatasi le Faaola.” “Oi, ioe, e toatele. O le a se tala mai i tusitusiga paia?” Ina ua saunoa se tasi o perofeta e uiga i nei mea, sa ia faapea mai o le a o mai faaola i luga o le Mauga o Siona [tagai Opetaia 1:21]. Faaola? Ioe. O ai la o le a latou faaolaina? Muamua, o i latou lava, ona sosoo ai lea ma o latou aiga, sosoo ai ma o latou tuaoi, o uo ma paaga, ona sosoo ai lea ma o latou augatama, ona liligi mai ai lea o faamanuiaga i a latou fanau. E mo’i lena tala? Ioe. …

Tatou te mananao ia manuia a tatou fanau. Ua tatou faitau e uiga ia Aperaamo, Isaako ma Iakopo, ae latou te le’i tuua le lalolagi, sa faapotopoto faatasi o latou aiga, ma i lalo o le musumusuga a le agaga o valoaga ma faaaliga, na latou tuu ai o latou lima i luga o o latou ulu ma tuuina atu faamanuiaga faapitoa ia i latou, e tatau foi ona i ai i luga o a latou fanau ia faamanuiaga i augatupulaga uma o taimi. Ua ia te i tatou foi lea lava talalelei ma le perisitua, o le malamalama foi ma le poto e tasi, ma o loo tatou tulitulimatai mo le faaolataga ma le faaeaga o o tatou aiga e mulimuli mai, e pei foi ona i ai i latou na ta’ua, ma o loo tatou saili atu mo faamanuiaga a le Atua ina ia liligi atu i o latou luga. Ma afai e oti o tatou tama e aunoa ma le talalelei, e le i maua se avanoa e faalogo ai i ai, tatou te alolofa mo i latou, tatou te o atu ma papatiso mo i latou, ina ia faasaoina i latou ma faaeaina faatasi ma i tatou i le malo o le Atua.¹³

Ina ua afio mai Iesu, na afio mai o Ia e fai se galuega i ni auala se tele e faapei foi ona tatou faia ai nei, ma ina ua maea Lana galuega iinei, sa tulai o Ia o le Faaola o le lalolagi, ma le fanauga a tagata. Na afio mai o Ia e folafola le Talalelei i e matitiva, talaia faitotoa i e o i falepuipui, ina ia faasalotoina mai i latou, ma talai le tausaga e finagalo malie i ai le Alii, ma isi mea. O se galuega lenei e fesootai ma tagata sa ola i le taimi o le lolo ma sa faatafunaina ma ua i ai i le falepuipui seia silafia e le Alii ua tatau ona faaali atu Lona alofa mutimutivale ia te i latou. O lea, e pei ona faitau ai, “Aua o Keriso foi na tigaina o ia faatasi mo e agasala, o le amiotonu o le sui o le amioletonu, ina ia taitaiina e ia o i tatou i le Atua; na fasiotia o ia i le tino, a ua faaolaina mai i le Agaga; na ia maliu atu ai, ma talai atu i agaga i le falepuipui: o e na le faalogo anamua, ina o faatalitali mai le onosai o le Atua anamua i ona po o Noa.” [Tagai 1 Peteru 3:18–20.] Ina ua maea Lana galuega i le fogaeleele mo e ola, sa alu atu ma faia le galuega mo e ua oti; e pei ona ta’u mai ia te i tatou, “Na maliu atu o Ia ma talai atu i agaga i le falepuipui, o e na le faalogo anamua i ona po o Noa.”

O loo faatalitali mai mo i tatou e faia se galuega mo i latou ua oti, o e e le’i usitai pe le’i maua foi le Talalelei i o latou olaga. Ua tatou i ai iinei e faia se galuega e soofaatasi ma le faaolaina o e ua oti. Ina ua poloai mai e fausia le Malumalu i Navu, ina ua maea ona fausia le malumalu i Katelani, ma ina ua maea ona toe fuatai mai le tele o ki, ma ina ua mavae le tele o faaaliga, o vaaiga ma asiasiga, ae o loo faapea mai lava e leai se mea e tasi i le lalolagi e mafai ona fai ai le sauniga o le papatisoga mo e ua maliliu, ma o lea sa poloaiina ai Iosefa e fausia se fale mo lena faamoemoe.¹⁴

E toatele ua maliliu ma o loo faatalitali mai mo i tatou e faataunuu o tatou tiute.

O le galuega o loo tatou faia nei, e sili atu nai lo le mea e mafai ona tatou vaaia. O a tatou taga ma galuega i le taimi nei o loo fesootai atu lea i le taimi ua fano, o le taimi nei faapea foi le lumanai. Sa i ai se taimi sa fai atu ai Napoleone i lana autau a o i ai i Aikupito, e fasefulu augatupulaga o loo tilotilo ifo ia te i latou. Peitai, o ‘au o le lagi o loo vaavaai mai ia te i tatou. O Perisitua sa auauna atu i augatupulaga eseese ma tisipenisione eseese, mai lava i le amataga o le lalolagi, o loo vaavaai mai ia i tatou; o o tatou uso, sa tatou mafuta i lenei lalolagi ma ua fai i lagi a latou folauga, o loo vaavaai mai foi. O e ua maliliu e le mafaitaulia ua tofafa i tia e aunoa ma se malamalama i le talalelei, o loo vaavaai mai ia i tatou, ma o loo faamoemoe mai ia i tatou e faataunuuina o tatou tiute ma matafaioi ua tuuina mai i o tatou luga e fai, ma o loo latou naunau mai i ai.

O perisitua paia uma—o peteriaka anamua, perofeta ma aposetolo ma tagata o le Atua sa soifua i augatupulaga eseese, o loo vaavaai mai ia i tatou ia faataunuu mea sili ma le taua o loo manaomia e Ieova e tusa ai ma le soifua solo lelei ma le faaolataga o le lalolagi: o le faaolataga o e ola ma e ua oti. O le Atua, lo tatou Tama Faalelagi, ma lona alo o Iesu Keriso, lo tatou Togiola, o loo silasila mai foi ia i tatou, ma o loo faamoemoe mai ia tatou faamaoni i a tatou feagaiga.¹⁵

Fautuaga mo Suesuega ma Talanoaga

O le a le uiga ia te oe o le “galulue faatasi ma le Atua i le faaolataga o e ola [ma] le faaolaina o e ua oti”? O le a sou lagona pe a e faaaogaina le avanoa e faamanuia ai ou tuaa e ala i galuega faalemalumalu sa?
O le a le faamoemoe o Elia ina ua ia faaali atu i le Perofeta o Iosefa Samita i le Malumalu i Katelani? (Tagai foi MFF 110:13–16.) O a faamanuiaga o i ai nei mo i tatou ona o ki na toefuatai mai e Elia?
Aisea e taua ai le faamaoni i a tatou faatalanoaga mo pepa faataga o le malumalu? O a faamanuiaga ua folafola mai pe a tatou o ma le agavaa i le malumalu? (Tagai foi i le MFF 97:15–17.) Ua e iloa faapefea nei faamanuiaga? O a mea e mafai ona tatou faia e saunia ai tamaiti ma le tupulaga talavou ia agavaa e ulu atu i le malumalu?
O a mea e mafai ona avea ai i tatou ma “faaola i le Mauga o Siona”? Aisea e matua taua ai la tatou auaunaga mo le faaolataga o i latou ua maliliu?
O le a sou lagona pe a mafaufau o loo “vaavaai mai ‘au o le lagi ia i tatou…ma faamoemoe mai e faataunuu [o tatou] tiute ma matafaioi”? O a o tatou tiute ma matafaioi e tusa ai ma le galuega faalemalumalu sa ma talafaasolopito o aiga? E mafai faapefea ona faaleleia atili au galuega faalemalumalu sa ma talafaasolopito o aiga?
Faitau le MFF 135:3. E faateleina faapefea lou malamalama i lenei fuaiupu ona o le matafaioi a le Perofeta o Iosefa i le toefuataiina o le galuega faalemalumalu sa?
Aisea e manaomia ai lo tatou o soo i le malumalu? O le a le uiga o le malumalu ia te oe lava ia? E mafai faapefea ona tatou faateleina le faatosinaga a le malumalu i o tatou olaga ma olaga o o tatou aiga?

O Mau e Faatatau I Ai: MFF 109; 124:39–41; 128:15–25; 138

Logan Temple — O le Malumalu o Logan Iuta, na faapaiaina e Peresitene Teila i le 1884. I totonu o malumalu, “e faia ai sauniga aupito paia a le Atua, ia e soofaatasi ma mea o loo manaomia e le fanauga a tagata ma lo latou fiafia.”