Mataupu 6

O Le Mana o le Togiola mo i Tatou Taitoatasi

O le togiola sili, le taulaga togisala paia [po o le togiola] a le Alo o le Atua, ua mafai ai ona faaolaina le tagata, toefuata’ia, toetu ma faaeaina i tulaga siitia na fuafuaina mo ia i le foafoaga.¹

Mai le Soifuaga o Ioane Teila

E masani ona aoao atu e Peresitene Ioane Teila aafiaga o le Togiola a Iesu Keriso i tagata uma. Na ia saunoa foi i le olioli na mauaina e ia lava, a o mafaufau loloto i le alofa tunoa na aumaia e le Togiola i tagata. “Ua ou fiafia lava aua ua i ai so tatou Faaola, o le ua tele naua lona alofa ia i tatou, ua afio mai ai e togiola i tatou,” na ia saunoa ai, “ma ua ou olioli aua ua i ai so tatou Faaola ua naunautai i le togiolaina o le lalolagi.”²

Ae le’i leva ae maliu Peresitene Teila, na ia tusia ai mea nei i tagata o lona aiga, ma faamatala atu i ai le faamoemoe na ia maua e ala i le Togiola.

“Ou te tatalo i le Atua le Tama Faavavau, pe afai e maea uma lo tatou olaga faata’ita’i iinei, ia mafai ona tatou tutu atu i le Alii e aunoa ma se ila po o se pona, o ni sui mamalu ma le mama atoatoa o le Ekalesia ma le malo o le Atua i le fogaeleele, ona tatou maua ai lea o le mamalu faaselesitila i le malo o lo tatou Atua, ma olioli ai i le fiafia e faavavau ma i latou e faamaoni ma amiotonu, i le nofoaga e leai se pouliuli, e ala lea i le togisala a le Alii o Iesu Keriso, o lo tatou Faaola ma le Togiola, i lalolagi e le gata.”³

O Aoaoga a Ioane Teila

O le a toe tutu tagata uma e ala i le Togiola a Iesu Keriso.

Ua avea nei ma o tatou tiute le fesili…po o a mea na faataunuuina i le togiola.

Muamua, o le Toetu. O le faasalaga o le solia o le tulafono i ona po o Atamu o le oti; ma ua oo mai ai le oti i tagata uma. O le fetalaiga a le Alii, “Aua o le aso e te ‘ai ai, e te oti ai lava.” [Kenese 2:17; tagai foi i le Mose 3:17.] O le togiola na faia e Iesu Keriso, ua maua ai le toetu mai le oti, ma ua toefuata’i mai ai le ola. O lea na fetalai mai ai Iesu: “O a’u nei o le toe tu ma le ola; o le faatuatua mai ia te au, e ui lava ina oti, ae ola lava ia;” [Ioane 11:25] ma o Iesu lava Ia na avea ma ulua’i fua o le toetu.

O le isi fesili ua tulai mai e faapea, o le a le mamao e oo atu i ai lenei mataupu faavae, ma o ai foi e faatatau i ai? E oo atu i le fanauga uma a tagata; o tagata uma o atunuu uma.⁴

E ao ona tutu mai uma i latou mai tuugamau, po o le fea lava le taimi, i tino faitino lava e tasi na latou maua a o ola ai i le fogaeleele. E pei lava ona sa faamatalaina e Esekielu—o le a fesootai le ivi i le ivi, o uaua foi ma aano o le a ufitia ai foi auivi, o le a ulu atu foi le manava ola o le Alii i le tino, ona tatou tutu mai ai lea, e toatele foi i tatou, o le a maofa ia i tatou lava [tagai Esekielu 37:1–14].

Sa ou faalogo ia Iosefa Samita o faapea mai, i le taimi a o ia faia se tuugamau i Navu, ma lona faamoemoe, a oo mai le taimi e matalatala ai tuugamau, o le a ia toetu mai ma opo atu i lona tama ma lona tina, ma lululima ma ana uo. Sa tusia i lana talosaga tusitusia pe afai e oti o ia, ia faamolemole ni ana uo agalelei, ia teu o ia i tafatafa o ana uo faapelepele, ina ia toe tutu a’e ai o ia ma i latou i le taeao o le uluai toetu, ma mafai ona ia opoina i latou ma faapea atu, “Lo’u tama e! Lo’u tina e!”

E maeu le faamafanafana loto ia i latou o e faanoanoa ona o le toesea o uo pele i le oti, o le iloa o le a tatou toe mafuta ma i latou! O se lagona faamalosiau foi i tagata uma o e ola e tusa ai ma mataupu faavae ua faaalia mai o le upumoni, atonu e sili atu foi ia i latou o e ua pulapula lagoto le soifua, o e ua leva ona tauivi mai ma faigata ma tumau e oo i le iuga, ma ua latou iloa e le o toe mamao, ona latou toe tula’i mai lea i tuugamau, ma toe soifua ai i ni tino ola pea, ma latou olioli ai faatasi ma a tatou uo ua faamaonia lo latou faamaoni, o le a le toe mafatia i le oti, ma tatou faamaeaina ai le galuega na tuuina mai e le Tama ia te i tatou e fai!⁵

O le Togiola e mafai ai e le au faatuatua ona faatoilalo le oti faaleagaga ma maua ai le faaeaga.

O le fuafuaga a le Atua mo le tagata, e tatau ona pau, ma afai e pau ma maua ai se malamalamaaga i le lelei ma le leaga, (o le malamalama lea e le mafai ona ia maua e aunoa ma lona oo i lena tulaga o le pau), ona tatau ai lea ona ia iloa e uiga i le togiola ma le faaolataga lea e tatau ona puluvagaina e Iesu Keriso.⁶

E faapefea ona faamanuiaina tagata i le togiola ma le toetu? E faapea, ona o le togiola ua toefuata’i ai le tagata i lona tulaga sa i ai i luma o le Alii, ua tuu ai o ia i le tulaga e mafai ai ona ia maua le faaeaga ma le mamalu semanu na te le mauaina pe ana leai le togiola; e oo lava i le avea ai ma se atalii tamafai o le Atua; ma o le avea ai foi la ma se atalii ua avea ai ma suli o le Atua, ma se suli faatasi ma Iesu Keriso [tagai Roma 8:16–17]; ma o lea, ina ua manumalo Keriso, o Ia foi ua mafai ai, ma ua i ai foi i e talitonu ia te Ia, le mana latou te manumalo ai; ma ua faatagaina ai o Ia e maua le mamalu o Lona Tama lea na i ai faatasi ma Ia a o le’i faia le lalolagi, faatasi ai ma Lona tino toetu, o lea, o le avea ai o i tatou ma tamafai, ua mafai foi ona tatou manumalo ma nonofo faatasi ai ma Ia i Lona nofoalii, e faapei ona Ia manumalo ma ua nofo ai i le nofoalii o Lona Tama…

… O Lana togiola, e maua ai e i latou e talitonu ia Keriso, ma i latou e usitai i Lana tulafono, Lona mamalu ma le faaeaga, ma o ni suli o le Aigaatua; a o i latou e le usitai i Lana tulafono, e ui ina o le a toetutu mai, ae le mafai ona latou maua lenei faaeaga; o le a toetutu mai nai e ua oti, ae le mafai ona latou maua se mamalu faaselesitila e aunoa ma le usiusitai i se tulafono faaselesitila… . Ua fetalai mai Iesu, “Ua faapea ona tusia, e faapea foi ona tatau ina tiga o le Keriso, ma toe tu nai e ua oti i le aso tolu; ina ia talaiina foi le salamo ma le faamagaloina o agasala i nuu uma i lona igoa, e amata mai i Ierusalema.” [Luka 24:46–47.]⁷

E faaolaina e le Togiola tamaiti laiti ma i latou na maliliu e aunoa ma se malamalama i le talalelei.

O le Togiola lava Ia, a o soifua ai i la le tino, na Ia fetalai i Ona soo…, “Ina tuu mai ia o tama iti e o mai ia te au, ae aua tou te vavao ia te i latou; aua e faapei o i latou nei o e o i le malo o le Atua. E moni, ou te fai atu ia te outou, Ai se le tali i le malo o le Atua e pei o se tama itiiti, e le sao lava ia i ai.” [Luka 18:16–17.] Ma ina ua mavae Lona faasatauroga ma le toetu, sa ia toe faia foi lenei apoapoaiga e tasi i Ona soo sa Nifae: “Ou te toe fai atu foi ia te outou, e tatau ona outou salamo, ma papatisoina i lo’u igoa, ma liua ia pei o se tamaitiiti, a leai, e le mafai lava ona fai mo outou tofi le malo o le Atua.” [3 Nifae 11:38.]

A na leai le agasala a Atamu, semanu e le ola mai na tamaiti; ma o le togiola ua mafai ai ona latou i ai i se tulaga o le faaolataga e aunoa ma se isi mea e faia e na tamaiti. E tusa ai ma manatu o tagata e faia faamaumauga faafuainumera, o nei tamaiti o le a silia ma le afa o le fanauga a tagata, o e e mafai ona maua lo latou faaolataga i le na o le puluvagaina e le Faaola ma le togiola. O le mea lea, e pei ona ta’ua i isi taimi, i se ala e le iloa ma le mafai ona malamalama i ai, na tauaveina ai e Iesu le tiutetauave, lea na semanu o le tiute faanatura o Atamu; ae peitai e na o le puluvagaina o Ia lava e mafai ai ona faataunuu, ma Lona tauaveina e Ia lava o faanoanoaga e fai ma ana matafaioi, ma le tauaveina foi o a latou solitulafono po o agasala.

I se tulaga e faigata ona tatou malamalama i ai ma le le mafaamatalaina foi, na ia tauaveina ai le mamafatu o agasala a le lalolagi atoa; ua le na o Atamu, ae faapea foi ana fanau; ma o le faia o lea tulaga, ua tatalaina ai le malo o le lagi, ua le gata mo tagata uma e talitonu ma i latou uma e usitai i le tulafono a le Atua, ae faapea foi i le silia ma le afa o le fanauga a tagata o e na maliliu a’o le’i avea ma tagata matutua, faapea foi i tagata faapaupau, o e na maliliu e aunoa ma le tulafono, ma o Lana fautuaga, o le a toetutu ai e aunoa ma le tulafono, ma o le a faamasinoina foi e aunoa ma se tulafono, ma o lea o le a latou maua ai faamanuiaga o Lana togiola, e tusa ma o latou tulaga sa gafatia, o a latou galuega foi ma le agavaa.⁸

Ona ua “tiga alofa le Faaola ma i tatou i o tatou vaivai,” o lea ua mafai ai ona ia malamalama atoatoa i o tatou tofotofoga.

A o i ai le Faaola i le fogaeleele, o lea sa tatau ai ona faaosoosoina o Ia i mea uma, e faapei foi o i tatou, ma “sa tiga alofa ai ma i tatou i o tatou vaivai,” [Eperu 4:15] ina ia malamalama ai i vaivaiga ma malosiaga, o le atoatoa ma le le atoatoa o le natura pau o le tagata soifua. Ma ina ua faataunuu le mea na sau ai o ia i le lalolagi e fai; o le tauivi ma le faagutugutulua, o le amioleaga, vaivaiga, ma le faavalevalea o le tagata; o le fetaiai ma soo se ituaiga faaosoosoga ma tofotofoga, ma faatoilaloina; ua avea ai o ia ma se “faitaulaga sili faamaoni” [Eperu 2:17] e faufautua mo i tatou i le malo faavavau o lona Tama.

Na te silafia ona fuafua faatatau ma faavasega le taua o le natura o le tagata soifua, aua, ua avea le tuuina o ia i le tulaga lava e tasi e pei ona tatou i ai nei, ua na silafia ai le ala e tauaveina ai o tatou vaivaiga ma aleu, ma mafai ai foi ona malamalama atoatoa i le loloto, mamana, ma le malosi o mea tiga ma tofotofoga o le a feagai ai ma tagata i lenei lalolagi. Ma o lea, ua mafai ai ona ia onosa’ia ma le malamalama ma le poto masani.⁹

E taua uluai mataupu faavae ma sauniga o le talalelei tatou te maua ai faamanuiaga atoatoa o le Togiola.

Ina ua tatou iloaina faamanuiaga silisili, o avanoa, mana ma faaolataga ua mafai ona ausia e le tagata, e ala i le togiola a Iesu Keriso, o le mea e sosoo ai, o le avea lea ma o tatou tiute le saili po o a mea e manaomia e le tagata ina ia mauaina ai….

O tuutuuga e manaomia e le fanauga a tagata ina ia mafai ai ona latou maua le faaeaga maualuga lea ua mafai ona latou maua ona o le togiola: Muamua, Faatuatua i le Atua o lo tatou Tama ma le Pule Silisiliese o le lagi ma le lalolagi; o ona aao foi o i ai le taunuuga o le fanauga a tagata; o ia o loo ola ai i tatou ma gaoioi ai, o loo i ai foi i tatou talu o ia. Ma o Lona Alo o Iesu Keriso, na avea ma Tamai Mamoe e fasia a o le’i faavaeina le lalolagi, o le Puluvaga sili ma le togiola sili na saunia e le Tama a o le’i faia le foafoaga, ma faaatoatoa ai i le ofoina atu o Ia lava i luga o le satauro. Aua “ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.” [Ioane 3:16.] Pe, faaaogaina foi upu a le Tupu o Peniamina o Sa Nifae:

“Ina faatuatua ia i le Atua; ma ia talitonu o loo soifua o ia, na ia faia foi mea uma ua i le lagi atoa ma le lalolagi; ia talitonu foi ua le iloa e tagata mea uma e mafai ona silafia e le Atua.” [Mosaea 4:9.]

E faapei foi ona tusia e Paulo: “E tatau i le e alu atu i le Atua ona talitonu o loo soifua o ia, o ia foi na te tauia mai o e matua saili ia te ia.” [Eperu 11:6.]

O le mataupu faavae lona lua o le Talalelei o le faaolataga, o le salamo. O le tiga e tusa i le Atua ma le faamaoni ma le lafoa’-ia o le agasala, e tuufaatasi ma le loto atoa e tausia poloaiga a le Atua. E pei ona tusia e le Perofeta o Isaia: “Ia lafoai e le ua amio leaga lona ala, ma le tagata agasala ia lafoai e ia ona manatu: ma ia foi mai ia Ieova, ona alofa mai lea o ia ia te ia; ia foi mai i lo tatou Atua, aua na te matua faamagaloina lava.” [Isaia 55:7.] O loo i ai foi se upusii mai le Tusi a Mamona:

“I le ma lea, ina talitonu ia e ao ina outou salamo i a outou agasala, ma lafoai ai, ma faamaulalo outou e outou lava i luma o le Atua; ma ia faatoga atu i le faamaoni o le loto ia faamagaloina outou e ia; o lenei foi, afai ua outou talitonu i nei mea uma, ina outou faia ia.” [Mosaea 4:10.]

Lona tolu, o le Papatisoga mo le faamagaloina o agasala, o a tatou lava solitulafono, ma o le auala foi lea, ua saunia i le alofa tunoa paia, e ala i le togiola, e soloia ese ai. O upu a Paulo: “O lenei ua tatanu faatasi i tatou ma ia i le papatisoga i lona maliu; ina ia tatou savavali i le ola toefuataiina, e pei ona toe faatuina mai o Keriso nai e ua oti, i le mana o le Tama.” [Roma 6:4– 5.]

O le isi, o le taliaina o le Agaga Paia e ala i le faaee atu o lima o i latou ua maua le Perisitua Mekisateko, ma ua faatagaina lelei ma faauuina, ma avatu i ai le mana e tuuina atu ai lenei faamanuiaga: O lea na talai atu ai Peteru i le aso o le Penetekoso:

“Ina salamo ia, ma ia taitasi ma papatisoina outou uma i le suafa o Iesu Keriso, mo le faamagaloina o agasala; ona maua lea e outou o le mea foai fua mai, o le Agaga Paia lea. Aua o ia te outou ma a outou fanau le mea ua folafolaina mai, atoa ma e o mamao uma lava, o i latou uma e valaauina e le Alii lo tatou Atua.” [Galuega 2:38–39.]

O folasaga nei po o uluai mataupu faavae o le Talalelei e faavavau, e le masuia a lo tatou Alii ma le Faaola o Iesu Keriso, o le talalelei lava e tasi i tagata uma, o nuu uma, o augatupulaga uma, pe o le a lava le taimi, pe o fea foi na aoao atu ai i le pule o le lagi. Ma ua tatou faitau foi e faapea: Sa “faapea lava ina amata ona talai atu le talalelei mai le amataga e agelu paia na auina mai i le afioaga o le Atua, ma Lona lava foi siufofoga, atoa ma le meaalofa o le Agaga Paia. Ma sa faapea ona faamauina atu ia Atamu mea uma i se sauniga paia, ma le Talalelei ua talai atu, ma sa auina atu se poloaiga, e tatau ina i ai i le lalolagi, seia oo i le iuga.” [Tagai Mose 5:58–59.]¹⁰

Tatou te aai ma feinu i le faamanatuga e faamanatu ai le Togiola a le Faaola.

O taulaga, sa amata ofoina atu i ona po o Atamu…, o [faatusa] o le taulaga sili o le togiola e tatau ona faia e Ia i le taulagaina lea o Ia lava. Sa tele naua ata ma faatusa e iloa ai o Ia lava le uluai faataitaiga—o le autu moni lea na faatusa i ai isi taulaga sa muai osia mai le amataga.

Ae a’o le i ofoina atu Ia lava, e fai ma taulaga sili o le togiola, ina ua uma ona faataunuu le tulafono ma faamamaluina ai, ma folasia mai le Talalelei, sa faapotopoto e Ia Ona soo…i le taumafataga o le Paseka. Sa ia fetalai atu ia te i latou, “O lo’u manao, ua tele lava lo’u manao e muai ‘ai lenei paseka ma outou, a o lei oo i lo’u tiga.” [Luka 22:15.] E aai faatasi ma outou? I le Paseka. E aai i le a faatasi ma outou? Le Faamanatuga o le Talisuaga a le Alii… .O ia sauniga uma e lua, e faaautu ia te Ia, o Ia o le faatinoga o ia mea e lua, o Ia Le na i ai a o le’i faavaeina le lalolagi, ma sa valoia e tagata o le Atua i augatupulaga uma na muamua; ma o loo tusia foi o ia le sa ofoina atu ai taulaga e auauna uma a le Alii, mai le pau o Atamu e oo mai i lena taimi; ma o [taulaga] eseese uma sa ofo atu i aso ua mavae sa faasino atu ia te Ia, o le ua osia i ai ma o le foi o loo faaautu i ai. A tuu i se isi itu, o Ia le sa folasia mai le tulafono e sili ona atoatoa, ma le ofoina atu o Ia lava mo tagata uma, o se togiola e le i’u, o Ia foi e ala i le taulaga, na faataunuuina ai mea uma sa fuafuaina e le Silisiliese a o le’i faavaeina le lalolagi, ma lea sa na ona avea ai le toto o povi poa taanoa, ma tamai mamoe, atoa ma ‘oti poa ma se faatusa.

Ina ua ia silafia le mea toetoe a oo mai, o lea na Ia faatuina ai le faamanatuga o le Talisuaga a le Alii, e fai ma faamanatuga o lenei galuega faaiu o le togiola. Ina ua nonofo i latou i lalo, “Sa tago o Ia i le areto, ua faafetai, ua tofitofi, ma avatu ia te i latou, ua faapea atu, O lo’u tino lenei, ua foaiina atu mo outou; tou te faia lenei mea e fai ma faamanatuga ia te au;” [Luka 22:19] mulimuli ane, “Ua tago foi o Ia i le ipu, ua faafetai, ona avatu ai lea e ia ia te i latou, ua faapea atu, Ina inu ia outou uma i ai; aua o lo’u toto lenei, o le toto o le feagaiga fou, ua faamaligiina mo tagata e toatele e faamagalo a’i agasala.” [Mataio 26:27–28.] …

Mai lava i le amataga o le lalolagi e oo mai i le taimi na faatuina ai le Paseka, sa ofoina atu taulaga e fai ma faamanatuga po o se faatusa o le taulaga a le Alo o le Atua; o lea la e mai le taimi o le Paseka e oo mai i le taimi na Ia ofoina atu ai Ia lava, sa faia pea ma le faaeteete e Perofeta ma Peteriaka nei taulaga ma ituaiga faatinoga; e tusa ai ma poloaiga na tuu atu ia Mose ma isi soo o le Alii. E oo lava foi ia te Ia lava, sa ia faataunuuina foi lea tulaga manaomia, ma tausia le Paseka e faapei ona faia e isi; ma e faapena foi ia i tatou, ina ua mavae ona ofoina atu le taulaga sili, ua tatou aai ma feinu i le Faamanatuga o le Talisuaga a le Alii, tatou te faamanatuina ai. O le mea foi lea, e avea ai lenei faatinoga ma sootaga sili o le taimi ua tuanai ma le lumanai; ma ua faataunuuina ai e Ia le tulafono, ua faamalie ai poloaiga a le tulafono, ma usitaia ai tulaga manaomia a Lona Tama Faalelagi.¹¹

Fautuaga mo Suesuega ma Talanoaga

O le a le mea na faataunuuina i le Togiola a Iesu Keriso?
E faapefea ona e maua le faamafanafanaina o oe i aoaoga faavae o le toetu?
E faapefea ona aafia lou tagata i le Togiola? E fesoasoani faapefea ia te oe lou iloa o le Faaola “e mafai ona malamalama atoatoa i le loloto, mamana, ma le malosi [o ou] puapuaga ma tofotofoga”? O a ni mea na e oo i ai ua faamalosi ai lau molimau i le Togiola?
O le a le uiga o le avea ma se atalii po o se afafine “tamafai” o Keriso? (Tagai foi i le Mosaea 5:1–9, 15; MFF 25:1.)
O le a le mea e manaomia mai ia i tatou ina ia mafai ai ona tatou maua “faamanuiaga sili, o avanoa, mana, ma faaeaga” ia ua avanoa mo i tatou ona o le Togiola? (Tagai foi i Mataupu Faavae o le Faatuatua 1:3–4.)
O le a le faia o le faamanatuga ma le Togiola?

O Mau e Faatatau I Ai:Mataio 26:26–28; Mosaea 15:22–25; Alema 34:13–15; 3 Nifae 18:1– 12; Moronae 10:32–33; Mose 5:4–8

Jesus Christ — “Ina ua manumalo Keriso, o Ia foi ua mafai ai, ma ua i ai foi i e talitonu ia te Ia,le mana latou te manumalo ai”