Mataupu 2

O Le Talalelei e Faavavau

O le talalelei e faavavau…e le’i iloa sei vagana ai ina ua faaalia mai e le Alii mai le lagi i le leo o lana agelu, ma pe a tatou mauaina nei mataupu faavae ma tatou talitonu ma ola ai, ona tatou maua ai lea o mataupu faavae o le ola faavavau.¹

Mai le Soifuaga o Ioane Teila

I le tausaga e 1836 i Toronto, i Kanata, sa faatele ai ona faatasitasi Ioane Teila ma nisi tagata i le vaiaso, e suesue i le Tusi Paia ma saili ia malamalama i le upumoni. Sa malosi lo latou talitonuga i le faapotopotoina o Isaraelu, o meaalofa a le Agaga, o le nofotupu o le Faaola i le meleniuma, o le tulaga manaomia o aposetolo ma perofeta, ma le taua o le faia o sauniga i le pule sa-’o mai le Atua. Peitai, o le taimi lena, latou te le i iloa ai se lotu e aoaoina ai nei mea. E tusa ai ma la latou sailiga mo le upumoni, sa ta’ua ai e Ioane Teila, “Sa matou tatalo i le Alii ma anapogi ma tatalo ia aoaoina i matou e le Atua i mataupu faavae moni, ia toefuataiina mai e Ia le Talalelei atoatoa anamua, ma afai o i ai se ekalesia moni i luga o le fogaeleele, ia auina mai e ia se avefeaau ia i matou.”

E le i pine ae talia a latou tatalo ina ua taunuu atu Elder Parley P. Pratt. A o le’i tuuvaa ese atu Elder Pratt mo lana misiona, sa vavalo atu Elder Heber C. Kimball ia te ia e faapea, “Ua finagalo le Alii e te alu i Kanata, o loo i ai ni tagata iina ua latou sailiili ma le filiga mo le upumoni, ma e toatele i latou o le a talitonu i au upu, ma latou taliaina ai le Talalelei.”

Sa amata talai Elder Pratt i Toronto, ma e le’i umi ae faafeiloai atu o ia ia Ioane Teila ma i latou sa latou suesue faatasi. Sa tusia mulimuli ane e Peresitene Teila: “Sa matua faagaeetia i matou i lana talaiga; peitai ina ua ia tuuina mai lana molimau ia Iosefa Samita ma le Tusi a Mamona, sa matou le iloa sa matou upu e fai. Sa ou tusia ana uluai lauga e valu na ia lauga ai ma ou faatusatusaina i tusitusiga paia. Sa ou sailiili foi i ni faamaoniga e faatatau i le Tusi a Mamona ma faitau i le Mataupu Faavae ma Feagaiga. Sa fai ma au galuega masani mo vaiaso e tolu le mulimuli ia [Uso] Parley mai lea nofoaga i lea nofoaga.”²

E le’i pine ae faatalitonuina Ioane Teila ua toefuataiina mai le talalelei o le faavavau. Sa papatisoina o ia i le aso 9 o Me 1836. Ina ua avea o se faifeautalai, se Aposetolo, ma mulimuli ane ai avea ma Peresitene o le Ekalesia, sa ia olioli i le aoaoina atu o upumoni e faavavau ma le le masuia o le talalelei.

O Aoaoga a Ioane Teila

E fesoasoani le talalelei ia tatou malamalama i uiga o le Atua ma saunia i tatou mo le mauaina o le faaeaga.

O i tatou, o Au Paia o Aso e Gata Ai, e talitonu muamua i le talalelei, ma o se mea taua tele ma le maoae lea e tautala ai, aua ua i ai i le talalelei o mataupu faavae e loloto, e lautele, ma e mamao ona taunuuga nai lo se isi lava mea e mafai ona tatou vaaia. E aoaoina i tatou e le talalelei e uiga i le Atua ma ona uiga. E aoao ai foi i tatou i lo tatou sootaga ma lena Atua ma o tatou tiutetuave eseese o ni ana fanau. E aoao ai foi i tatou i o tatou tiute ma matafaioi eseese i o tatou aiga ma uo, o nuu, o e ola ma ua oti. E faailoa mai ai ia te i tatou o mataupu faavae e faatatau i le lumanai. O le mea moni, e tusa ai ma se saunoaga a se tasi o soo i le feagaiga tuai, na te “aumaia le ola ma le tino ola pea i le malamalama,” [tagai 2 Timoteo 1:10] e aumaia ai i tatou e fegalegaleai ma le Atua, ma saunia ai i tatou mo se faaeaga i le lalolagi e faavavau.³

E faafesootai e lenei Talalelei le tagata ma le Atua, lona Tama Faalelagi; e aumaia e lenei Talalelei le malamalama i le ola ma le tino ola pea; ua folafolaina lenei Talalelei mo le manuia o tagata uma i vaega uma o le lalolagi. …O se savali o le faaolataga i atunuu uma o le lalolagi. …E finagalo le Atua ia soifua solo lelei le fanauga uma a tagata, ma ona o lena la faamoemoega, o lea ua Ia faatuina ai mataupu faavae i luga o le fogaeleele e pei foi ona i ai i le lagi—o se Talalelei ua mulimulita’ia e Atua i lalolagi o le faavavau, o loo i ai mataupu faavae ua fuafuaina e siitia ai, ma faalauiloa, ma faaeaina le fanauga a tagata.⁴

E faavavau le talalelei ma e le masuia lava.

O mataupu faavae sili o le upumoni e eseese ma e anagata foi. …E tau i tua i le taimi ua tuanai, o loo i ai foi i le taimi nei, ma e oo atu foi i le lumanai. O loo i ai i le talalelei a Iesu Keriso upumoni uma, pe a manatu i le fanauga a tagata, ma o le ala foi lea e ta’ua ai i tusitusiga paia o le talalelei o le faavavau. …

… O le Atua, e faapei o lona Alo o Iesu Keriso, e “tutusa o ananafi, ma le aso, e oo foi i le faavavau.” [1 Nifae 10:18.] E tutusa i le atamai, e tutusa i le mama atoatoa, e tutusa i ana galuega faatino, o fuafuaga ma mamanu; i se isi faaupuga pe a aotele, e le masuia lava. Ma ou te talitonu foi, afai e toe tutu mai i lenei fogaeleele i le taimi nei le Au Paia sa fesootai ma ia i aso anamua, o le a latou iloaina ai e le o suia lava auala po o metotia o fesootaiga sa i ai, e tutusa foi le auala o loo tuuina mai ai le atamai, ma o le soifuaga foi lea sa i ai i le 1,800, 4,000, po o le 6,000 tausaga ua mavae.

E moni e le i mafai e tagata ona maua ma talisapaia lea ituaiga malamalama e tasi, upumoni, ma le atamai sa latou maua i isi taimi. Sa i ai taimi na aveesea ai e le Atua le malamalama o ona fofoga—o lona Agaga Paia—o le malamalama ma le atamai lea e maua mai ia te ia—i se tulaga patino mai le aiga o le tagata soifua; peitai o ana tulafono e le masuia lava ma e faavavau foi o ia ma e le masuia lava.

E le suia lava le upumoni. O le mea na moni i le 1,800, 4,000, po o le 6,000 tausaga ua mavae, o loo moni foi i le taimi nei, o le a foi le mea na sese i soo se augatupulaga o le lalolagi, e sese foi i le taimi nei. O le upumoni, e pei o le Elohima sili, e faavavau ma e le masuia lava, ma o lo tatou tiute le aoao i ona mataupu faavae, ia iloa ona talisapaia, ma pulea ai i tatou lava e tusa ai.

Ona o le talalelei o se mataupu faavae e mai le Atua, e faapei foi o le e ona ia, o le talalelei e tutusa lava ma ananafi, o le aso, ma le faavavau,”—e faavavau ma e le masuia lava. Sa faauuina e le Atua a’o le’i pepese fiafia faatasi fetu o le taeao, ma a’o le’i faavaeina foi lenei lalolagi, mo le faaolataga o le tagata. Sa i ai i le mafaufau o le Atua, ma o le tele ona mata’ituina, o le tele foi lena o le silafiaina o se fuafuaga e faavavau, e le masuia lava, ma tuusa’o e laveaiina ai, faamanuia, faaeaina, ma faamamaluina ai le tagata.⁵

O le Talalelei lava lenei e tasi sa talai atu ia Setu, ma Peteriaka uma sa i ai i le feagaiga tuai [po o luma atu o le Lolo], ma sa latou galulue auauna i lalo o le pule o le talalelei. O lona mana, e pei ona ua uma ona tatou iloa, sa faaliliuina ai Enoka ma lona nuu. Na tusia e faapea e uiga ia Noa: “Ma sa faauuina Noa e le Alii i lona lava finagalo, ma poloaiina o ia e alu e talai atu lana talalelei i le fanauga a tagata, e pei ona tuuina atu ia Enoka.” [Mose 8:19.] E le gata i lea, a’o loo ta’ua foi i le molimau a Noa a’o le’i oo mai le lolo: “Ma sa talai atu pea lava Noa i tagata, ua faapea atu, Ina uai maia, ma gauai mai i a’u upu. Ina talitonu ia ma salamo mai a outou agasala ma papatisoina i le suafa o Iesu Keriso, le Alo o le Atua, e pei ona faia e o tatou tama, ona outou maua ai lea o le Agaga Paia, ina ia faaalia mea uma ia te outou; ae afai tou te le faia ia mea, o le a oo mai le lolo i o outou luga.” [Tagai Mose 8:23–24.]

Ua tatou aoao mai lenei mea o mataupu faavae o le Talalelei i uluai augatupulaga o le lalolagi, e tutusa lava ma mea o loo aoao mai i o tatou aso.

Sa faaauau mai le Talalelei ma le Perisitua Paia mai ia Noa seia oo mai ia Aperaamo. “O Aperaamo foi na maua le perisitua mai ia Mekisateko, o le na maua mai le gafa o ona tama, e oo atu ia Noa.” [MFF 84:14.] … O le malamalama ma faatinoga o le Talalelei sa tumau e oo atu ia Isaako, o Iakopo, Iosefa ma isi Peteriaka, seia oo atu i le taimi o Mose. …

O le Talalelei foi lava lenei sa poloaiina ai e le Faaola lea sa faasatauroina Ona soo ina ia talai atu, ina ua ia fetalai atu ia te i latou, Ina o atu ia i le lalolagi uma, ina tala’i atu ai le tala lelei i tagata uma lava. O le faatuatua ma papatisoina, e faaolaina ia; a o le le faatuatua, e faasalaina ia. E mulimuli atu foi nei faailoga i e faatuatua; e tutuli e i latou temoni i lo’u igoa; e tautalatala i latou i gagana fou; e fetagofi i latou i gata; afai foi latou te inu i se mea e oti ai, latou te le afaina ai lava: e faaee atu foi o latou lima i luga o e mamai, ma faamaloloina i latou.” [Mareko 16:15–18.] …

O lea foi na tatou iloa ai i le aso Penetekoso, o Peteru, le Aposetolo sinia, o tali atu i le tagi atu o le motu o tagata ua talitonu, “Sema e, le au uso e, se a se mea matou te faia?”ma sa tali atu i upu e pei ona tusia: “Ina salamo ia, ma ia taitasi ma papatisoina outou uma i le suafa o Iesu Keriso, mo le faamagaloina o agasala; ona maua lea e outou o le mea foai fuai mai, o le Agaga Paia lea. Aua o ia te outou ma a outou fanau le mea ua folafolaina mai, atoa ma e o mamao uma lava, o i latou uma e valaauina e le Alii lo tatou Atua.” [Tagai Galuega 2:37–39.]

E toe faapea atu foi, o le Talalelei lava lenei e faavavau, e le mafetuuna’ia, e le masuia lava, lea na tautala i ai le Aposetolo o Ioane i lona toefuataiina mai i le fogaeleele e faapea:

“Na a’u iloa foi le tasi agelu ua lele i le taulotoaiga o le lagi, ua ia te ia le tala lelei e faavavau e folafola atu i e nonofo i le lalolagi i atunuu uma, ma ituaiga, ma gagana eseese, ma nuu, ua faapea atu ma le leo tele, Ia outou matatau i le Atua, ma avatu ia te ia le viiga, aua ua oo mai le itu aso o lana faamasinoga; ma ia outou ifo i le na faia le lagi, ma le fanua, ma le sami, atoa ma puna o vai.” [Faaaliga 14:6–7.]

Mai le Tusi Paia, tatou te liliu atu i le Tusi a Mamona, ma o ona itulau tatou te mauaina ai foi le Talalelei lava e tasi, lea na faatonuina ai e Iesu Ona soo e o atu i le lalolagi uma ma talai atu, o lea foi na talai atu i lenei konetineta [o Amerika], mai uluai augatupulaga. Sa masani i ai Sa Iareto e ala i faaaliga na tuuina atu i le uso o Iareto; lea na fetalai i ai Iesu:

“Faauta, o a’u o le na saunia talu le faavaeina o le lalolagi e togiolaina lo’u nuu. Faauta, o a’u o Iesu Keriso. O a’u o le Tama ma le Atalii. O a’u e maua ai e tagata uma le malamalama, e faavavau foi lea, o i latou lava o e faatuatua i lo’u igoa, e avea foi i latou mo’u atalii ma o’u afafine.” [Eteru 3:14.] …

Ina ua afio atu Iesu lava Ia i tagata Sa Nifae, sa Ia aoao atu ia te i latou mataupu faavae lava e tasi sa Ia aoaoina i tagata Iutaia, ma faaopoopo atili atu i ai le moni, ona o le faatuatua tele o tagata na ta’ua muamua, o sa Nifae ia; “Na ia faamatala atu foi mea uma, e afua i le amataga e oo lava i le aso e afio mai ai o ia i lona mamalu.” [Tagai 3 Nifae 26:3.] O nisi o mea sa Ia fetalai atu ai: “Ai se faalogo foi i a’u upu, ma salamo ma papatisoina, e faaolaina lea. Ina saili ia i le au perofeta, aua e toatele i latou na molimau mai i nei mea.” [3 Nifae 23:5.]

Ma o le Talalelei lava lea e tasi, na i ai faatasi ma le mana ma le agaga lava e tasi, ua faamanuiaina i le musumusuga lava e tasi, ma taitaia i le Perisitua lava lea e tasi, lea o loo talaiina nei i le lalolagi uma mo se molimau. ⁶

E taitai i tatou e le talalelei i se ala o le fiafia, tuputupu ae, ma le saolotoga.

O mataupu faavae o le talalelei, e le taua ma e leai foi se aoga i le tagata e le talitonu. Peitai, o i tatou ua talitonu i ai, o loo aofia ai mea uma e faatatau i le soifua lelei o le tagata i le olaga nei ma le faavavau. O le talalelei lava ia ia te i tatou, o le alefa ma le omeka, o le amataga foi ma le gataaga. O se vaega aupito taua o mea uma tatou te fiafia i ai, o le fiafiaga foi i le olaga nei ma le olaga a sau.

Tatou manatu i lena tulaga, pe a avea i tatou ma tagata o lenei ekalesia ma osia feagaiga fou e faavavau, o se auaunaga i le olaga atoa, ma e aafia ai a tatou fegalegaleaiga uma i le olaga nei ma le faavavau. Ma a o tatou agaigai atu i luma, o nei manatu i le taimi muamua e fai si nenefu ma e faalemanino, ae oo ina iloa lelei, tino mai, ma olaola, iloatino ma manino i lo tatou malamalama, ma tatou iloa ai o loo tatou i ai i le fogaeleele o ni atalii ma ni afafine o le Atua, o ni sui foi o le lagi. Tatou te lagonaina ua faaalia mai e le Atua ia i tatou se talalelei e faavavau, ma o loo aumaia ai faatasi ma feagaiga ma sootaga o le faavavau.

O le talalelei, i le amataga o lona faagaoioia, e amata lava faapei ona saunoa le perofeta e tatau ona “faaliliu ai loto o matua i fanau, ma loto foi o fanau i o latou matua.” [Tagai Malaki 4:6.] Tatou te le toe tau fesili e pei o aso muamua, “O ai au?” “O fea na ou sau ai?” “O le a la’u mea o loo fai iinei?” po o le “O le a le faamoemoega o lo’u i ai iinei?” aua ua i ai lo tatou talitonuga e faatatau i nei mea. Ua faamanino mai ia te i tatou e ala i fua o le talalelei. …O le malamalama i nei mea ma le tele o isi mea e talitutusa o latou natura, e mafua ai ona tatou tulitulimata’ia mea ua tatou faia nei. O lea foi le tulaga ua puipuia ai i tatou mai le uai atu i manatu, o faatosinaga, ma amioga faavalevalea a tagata.

Ona ua faamalamalamaina i tatou e le agaga o le upumoni e faavavau, ona ua ia te i tatou foi le Agaga Paia, ma lo tatou faamoemoega ua tuu i o tatou luma, i le mea ua afio atu i ai Iesu, o le ua muamua atu mo i tatou, ma lo tatou iloa o i tatou o fanau a le Atua, ma o loo tatou faatinoina mea uma ma le faamoemoe i le faavavau, o lea tatou te tulimataia ai ma le mautinoa lo tatou ala, tusa lava pe faamaonia pe le faamaonia foi e isi tagata. ⁷

Ua tuuina mai e le Atua ia i tatou le talalelei ma le perisitua maualuga, lea e le o faamoemoe e pei ona manatu ai nisi, faapea e faapologa ai tagata pe faavalea ai foi mafaufau o tagata, ae ia faasaoloto ai tagata uma e pei ona saoloto o le Atua; ina ia latou feinu i vaitafe “e faafiafia ona magavai i le aai o le Atua;” [Salamo 46:4] ina ia faagaeetia ai i latou ae le ta’ufaatauvaaina; ina ia faamamaina i latou ae le faaleagaina; ina ia latou iloa ai tulafono o le olaga ma savavali ai, ae le o le savavali i ala o le amioleaga ma oti ai faaleagaga.⁸

O le talalelei a Iesu Keriso ua tatou maua ai se sootaga ma le Atua. E pei ona ta’ua e se tasi o aposetolo anamua: “Le au pele, o le fanau i tatou a le Atua i nei ona po, ae lei faaalia mai nei le uiga o i tatou a amuli; a ua tatou iloa, pe a faaali mai o ia, ona foliga ai lea o i tatou ia te ia; aua tatou te iloa tino ai lava o ia.” [Tagai 1 Ioane 3:2.] O le Atua o lo tatou Tama, ma ua tatalaina se ala o fesootaiga i lo tatou va ma le Atua; ma afai tatou te ola ai i lo tatou talitonuga faalelotu, o le a tatou saunia i taimi uma e mauaina faamanuiaga mai Ona aao, ma aoao ai tatou te malamalama i mataupu faavae sa’o e tusa ai ma lo tatou faaolataga o ni tagata taitoatasi, ma le faaolataga o le aiga o le tagata soifua.⁹

Ua tatou maua ma talia le talalelei o le faavavau, o le talalelei lava lea e tasi sa i ai i ona po o Iesu; ma o lenei lava le talalelei ua faamalamalamaina o tatou mafaufau, ua faateleina ai lo tatou tulaga gafatia, ma ua tatou maua ai se malamalama i le taimi ua tuanai ma le lumanai, ma ua faaalia mai ai foi ia te i tatou o faamoemoega o le Atua, ma o le faatulagaga ma le faasologa o le perisitua lenei ua tatou manuia ai, laveaiina ai, puipuia, ma tumau e pei ona tatou i ai i le aso.¹⁰

Fautuaga mo Suesuega ma Talanoaga

Na faapefea ona faamatala e Peresitene Teila le talalelei? Mata e ese faapefea lou olaga pe ana faapea e leai sou malamalama i le talalelei? O a ni mea na e oo i ai na faaalia ai le “siitia, ma faalauiloa, ma faaeaina le aiga o le tagata soifua” i mataupu faavae o le talalelei?
E fesoasoani faapefea le talalelei ia tatou malamalama i uiga o le Atua ma lo tatou sootaga ma Ia? E taua i se a lenei malamalama mo lo tatou faaolataga? (Tagai foi i le Ioane 17:3.)
E mafai faapefea ona fesoasoani ia te oe e iloa ai e faavavau le talalelei ma le masuia? E faatosinaina faapefea e lenei malamalama o outou talitonuga ma faaiuga tou te fai?
Sa aoao mai e Peresitene Teila e faamoemoe le talalelei e “faasaoloto ai tagata uma.” O le a le mea e faasaoloto mai ai i tatou e le talalelei? O le a le mea ua faasaoloto i tatou e fai? E mafai faapefea ona tatou fesoasoani i isi ia malamalama o le talalelei e aumaia ai le saolotoga ae le o ni papupuni?
O le a se mea na e faia ua e maua ai se molimau i le talalelei? O a ni aafiaga ua faamalosi ai lau molimau? O a ni mea e mafai ona tatou faia e fesoasoani ai e faamautinoa o loo faaauau pea ona “tatou ola” i mataupu faavae o le talalelei?
E aumaia faapefea e le talalelei la tatou “sootaga ma le Atua”?

O Mau e Faatatau I Ai:Ioane 8:31–32; 2 Timoteo 1:8–10; 1 Nifae 10:18–19; 3 Nifae 27:13– 22; Mataupu Faavae o le Faatuatua 1:4

Noah preaching — Sa aoao mai e Peresitene Teila, o le talalelei sa talai atu e Noa ma isi perofeta uma anamua “o le talalelei lava lea e tasi…o loo talaiina nei i le lalolagi uma mo se molimau.”