Mataupu 18

Auaunaga i le Ekalesia

Tatou te fiafia uma lava i le galuega tele o aso e gata ai a le Atua, ma tatau ona tatou galulue felagolagomai uma ai.¹

Mai le Soifuaga o Ioane Teila

Mai le taimi na liua ai Ioane Teila, sa ia tautino atu e tuu atu ana mea uma i le galuega a le Alii. I lona toe mafaufau i lona valaauga i le 1837 e avea ma se Aposetolo, sa ia faamatala mai ai mafaufauga nei: “Sa foliga e tele le galuega, e mamafa tiute ma faigata ona faataunuu. Sa ou lagonaina lo’u vaivai ma le faatauvaa; ae sa ou lagona le naunautai ou te taumafai e faalautele, o le a fesoasoani mai le Alii. Ina ua ou taliaina le faa-Mamona, sa ou faia lava ma le pupula o o’u mata. Sa ou faitauina mea uma o le a manaomia mai ia te au. Sa ou tilotilo i ai o se galuega i le olaga atoa, ma sa ou mafaufau i ai e le na o le olaga nei ou te auai, ae faapena foi le faavavau, ma sa ou le manao ou te solomuli, e ui ina sa ou lagona e le lava lo’u tomai.”²

Sa oo ina taunuu le mea sa ia manao ai o le “galue i le olaga atoa”. O nei tausaga e fiasefulu o le auaunaga, sa tuu atu ai e Ioane Teila lona faatuatuaga i le Alii, ma lona silafia, afai e auauna atu ma le faamaoni, o le a tausia o ia e le Alii ma mafai ai ona faataunuu Lona finagalo. O se tasi o faataitaiga o auala e tausia ai e le Alii i latou e auauna atu ia te Ia, na tulai mai a o talai atu e Elder Teila le talalelei i le Motu o le Tagata, o se motu e latalata i Egelani. Sa faatonuina e ia le lolomiga o tusi na ia tusia e tali atu ai i tuuaiga sese e faasaga i le Ekalesia ma le Perofeta o Iosefa Samita. Peitai, sa musu le lomitusi sei vagana ua totogi atoa le tau. Ona o le naunau ia vave ona tufatufa tusi, o lea na tatalo atu ai Elder Teila i le Alii mo se fesoasoani, ma e le’i pine ae tuuina mai.

“[I ni] nai minute talu ona uma lana tatalo, sa sau se taulealea i le faitotoa, ma sa ulu mai o ia i totonu ma tuu atu ia Elder Teila se teutusi ma toe savali i fafo. E le masani o ia i le taulealea. Sa i ai i le teutusi se tupe ma se faaupuga sa faitauina faapea: ‘E tatau ona avatu i le faigaluega lona taui,’ ae leai se isi na saini ai. [I ni] nai minute mulimuli ane sa alu ane ai se fafine mativa faatau i’a i le fale, ma ofo atu ia te ia sina tupe itiiti e fesoasoani ai i lana galuega auauna atu. Sa ia fai atu i le fafine, e anoanoai tupe o i ai i le lalolagi, ae le manao na te aveina lana tupe. Sa tauanau atu pea le fafine o le a tele atu ona faamanuiaga mai le Alii, ma o le a fiafia foi o ia [fafine] pe afai na te taliaina, ma o lea na talia ai e [Ioane Teila] le taulaga, ma sa ofo o ia, aua o le tupe itiiti a le fafine mativa, ina ua faaopoopo faatasi ma le tupe na avatu i le taulealea, sa atoa lelei ai lava le totogi o le lomitusi.”³

O Aoaoga a Ioane Teila

E tofu i tatou ma se tiute e auauna atu i le Ekalesia ma faalauteleina o tatou valaauga.

E le sa’o le faapea o le tiute atoa o le tauaveina o le malo e i luga ia o le toasefululua po o le Au Peresitene Sili, pe a faapea o lena, po o luga foi o peresitene o siteki, po o luga o faitaulaga sili, po o luga o fitugafulu, po o luga o epikopo, po o se isi lava taitai o le ekalesia ma le malo o le Atua; e ese la mai lena, e tofu i tatou uma ma tiute eseese e fai. Ma ou te fia tautala atili e uiga i tiute o alii, faapea foi i tamaitai; e tofu i latou uma ma tiute e fai i luma o le Atua. O le faatulagaga o lenei ekalesia ma le malo, e mo le faamoemoega manino o le faatulagaina o tagata taitoatasi i lona tulaga, o iina la ua faamoemoe ai o le a faalauteleina e tagata taitoatasi lona tofiga ma ona valaauga.⁴

Afai e te le faalauteleina ou valaauga, o le a faamasinoina oe e le Atua mo i latou sa mafai ona e laveaiina, pe ana fai e te faia lou tiute.⁵

O le a le uiga o le avea ma se Tagata Paia? O le a le mamao ua ou oo i ai, ae o le a foi le mamao ua e oo i ai i le faataunuuina o matafaioi ua faatietie i o tatou luga o ni Au Paia a le Atua, o ni Toeaina o Isaraelu, o ni tama o aiga ma tina foi o aiga? Ia tatou fesili ifo ia i tatou lava i nei fesili. Pe o tatou faia ea o tatou tiute eseese i le galueaiina o le malo o le Atua, i le tuleia i luma o le galuega i le lalolagi? Ae o le a foi le mea o tatou faia ina ia maua ai le mamalu o aso e gata ai? O a mea o tatou faia e maua ai lena mamalu? O aumaia e nisi o mea o tatou faia po o mea uma lava? Ae o le a moni lava le tulaga o tatou i ai? O mea nei e tatau ona tatou matua manatunatu lelei i ai, fuafua ma vaai ia iloa po o a matafaioi tonu ua faatietie i o tatou luga.⁶

E le lava…le na ona tatou papatiso ma faatietie mai lima i o tatou luga mo le meaalofa a le Agaga Paia. E le lava foi lo tatou laa atu i se isi tulaga ma maua o tatou [sauniga o le malumalu], ae ia tatou ola e tusa ai o o tatou talitonuga faalelotu, ia faateleina le i ai o le Agaga o le Atua ma ia i ai pea lava pea ia i tatou e pei ‘o se vaipuna e puna i luga i le ola e faavavau,’ [tagai Ioane 4:14] e talaia ai, atinae, ma faaalia mai ia te i tatou faamoemoega ma fuafuaga a le Atua, ina ia mafai ai ona tatou savavali e tusa ma le valaau ua valaauina ai outou, o ni atalii ma ni afafine o le Atua. … O le a matua faigata lava mo soo se tagata ona fai le mea sa’o, mafaufau sa’o, tautala sa’o, ma faataunuuina le finagalo ma le tulafono a le Atua i le lalolagi, o le mea foi lea ua tatau ai le faatulagaga o le ekalesia ma le malo o le Atua i le lalolagi, o le perisitua ua faatulagaina lelei, o le ala aloa’ia i le pule, o mea e fai ma mea e le tatau ona fai, o tulafono ma malo ua folasia mai e le Silisiliese i lana ekalesia ma le malo, mo taitaiga, faatonuga, puipuiga, uelefea, ma le galueaiina o le saga alualu i luma o lana ekalesia ma le malo i le fogaeleele. …

… E faapei o lala o se laau, ma a’a ma le ogalaau o se laau. E ola talaulau lala i luga o se ogalaau ola lelei, ma o sina lala laitiiti e pipii i ai, ma ni nai lau lanumeamata o i ai ma sina tama’i fua, e matua fua lava, e matagofie ma manaia i le matamata, ae ua na o se vaega lava o le laau, ae e le o le laau atoa. O fea e maua mai ai ana meaai? Mai le a’a ma le ogalaau po o le pogati laau, ma lala eseese o loo i ai i le laau. …

I le avea ai o se Tagata Paia e te faapea, “Ou te manatu ua ou malamalama i o’u tiute ma o loo lelei lava.” Atonu e sa’o. A e tagai i le tama’i lala; e lanumeamata, e lauolaola ma o le ata tonu lava lena o le olaga, na te tauaveina lana vaega i le laau, ma o loo pipii foi i le ogalaau, lala ma le a’a; ae mata e mafai ona ola laau e aunoa ma lena tama’i lala? Ioe, e mafai. E le mafai ona mitamita o ia lava ma faafefeteina ma faapea, “oka so’u lanumeamata ma e maeu lo’u lauolaola, ma e maeu le matalasi o le tulaga ua ou i ai nei, ma ua maoae a’u taumafaiga ma ua sa’o foi le tulaga lea ou te i ai.” Ae pe mafai ea ona e faia pe ola e aunoa ma a’a? E leai; e mafai ona o le laau. E faapena foi i nei tagata. …

O se faataitaiga tonu lava lea o le ekalesia ma le malo o le Atua. Ua fusia faatasi i tatou i noataga o le feagaiga e tasi. O i tatou o se vaega taua o le ekalesia ma le malo o le Atua lea na faatuina e le Alii i le fogaeleele i aso mulimuli mo le faataunuuina o ona faamoemoega ma le faatuina o lona malo, ma faataunuuina ai foi mea na ta’ua mai i fofoga o perofeta paia uma talu mai le amataga o le lalolagi. Tatou te tutu uma lava i o tatou tulaga sa’o.

Pe a tatou faalauteteleina o tatou valaauga, ua tatou faamamalu foi lena i lo tatou Atua. Pe a tatou faalauteteleina o tatou valaauga, ua ia te i tatou foi se vaega o le Agaga o le Atua; pe a tatou faalauteteleina o tatou valaauga, ona atoa ai lea o se laau pe a tuufaatasia i tatou; pe a tatou faalauteteleina o tatou valaauga, e oo mai le Agaga o le Atua i ala sa’o lea e maua ai meaai tonu e fafagaina ai i tatou, ma aoaoina ai i mea e tusa ma lo tatou ola solo lelei, fiafia ma faanaunauga e le gata i lenei lalolagi ae o lalolagi foi o le a i ai.⁷

Ua tupu ma ua faateleina le galuega a le Atua, ma o le a faifai pea seia taunuu upu na tulei i ai le perofeta e faapea, “O le toaitiiti e fai ma toaafe, ma le ua faatauvaa e fai ma nuu malosi: o a’u o Ieova, ou te faavave ona fai i ona lava aso” [Isaia 60:22] ae e faamoemoe o Ia o le a faalauteleina e tagata taitoatasi i le tulaga o i ai lona valaauga ma faamamalu i lona Atua. Ma e ui ina i ai le mea e leaga…, ae o loo tele naua foi le lelei, amioatua, o le le manatu faapito [po o le faafitia o oe lava], ma se faanaunauga tele e fai le finagalo o le Atua ma faataunuu Ona faamoemoega. Ma e tatau i alii uma ma tamaitai ona faia lana lava vaega.⁸

A o tatou auauna atu i le Ekalesia, e tatau ona tatou faia e tusa ma le afioga, le finagalo, ma le tulafono a le Atua.

Ua tatou i ai iinei e faapei foi ona i ai Iesu, e le ina ia faia o tatou loto, ae o le finagalo o lo tatou Tama o le na auina mai i tatou [tagai Ioane 5:30]. Na ia tuuina i tatou iinei; o loo i ai se galuega e tatau ona tatou faia i lo tatou vaitaimi ma le augatupulaga; ma e leai se isi mea e sili atu ona taua mo i tatou ua na o le aufaatasi ma le Atua ma Lana galuega, pe o le Peresitene o le Ekalesia, o Aposetolo e Toasefululua, o Peresitene o Siteki, o Epikopo, po o se isi lava, ma na pau le mea e mafai ai ona tatou tuuina atu soo se auaunaga, o lo tatou tutu lea i ni tulaga e faatino ai a o faatonu i tatou e le Atua; a o Ia pulea ma faafoe mataupu o Lana Ekalesia mo le manuia o tagata, mo e o ola ma e foi ua maliliu, mo le lalolagi o loo tatou o ola ai nei, ma mo i latou sa soifua i luma atu o i tatou, ma i latou o le a mulimuli mai. Sei vagana ua fesoasoani mai, taiala ma taitaia i tatou e le Alii ona mafai lea ona tatou faia o se mea. …

… Ua tatau ona tatou ala ma faatulaga tonu o tatou aiga ma faatulaga tonu foi o tatou loto; ua tatau ona tatou ola i le afioga, finagalo, ma le tulafono a le Atua; ua tatau ona tatou tuu atu i le Atua e pule i Siona, ia tusia foi Lana tulafono i o tatou loto, ma ia lagona le taua o lenei galuega tele ua tofia i tatou e fai. E tatau ona tatou vaai ia mama o tatou tino ma o tatou agaga, ma ia leai se eleelea po o sina mea e faaleaga ai. Ua tatou i ai iinei e fausia le Siona o le Atua, ma o lea e tatau ai ona usitai atu o tatou tino ma agaga i le tulafono, i le afioga, ma le finagalo o le Atua. Ona ua tatou i ai i Siona, o lea tatou te mananao ai e vaai ua taunuu le mea lea na fetalai atu ai Iesu i Ona soo. “Ia oo mai lou malo. Ia faia Lou finagalo i le lalolagi, e pei ona faia i le lagi.” [Tagai Mataio 6:10.] Na faapefea ona faia i le lagi? Na fetalai le Atua ona faia ai lea o lalolagi e tusa ma Lana afioga. Na fetalai le Atua, ia tatou faia le mea lea, ma lea, ma le isi, ona i ai ai lea. Pe na i ai ea se tasi i le lagi na tetee ma faapea atu, “Ae le lelei pe a sei toeitiiti. Mata e le sili pe a faapea?” Ioe, o le tala lena a le tiapolo, ma o lana tala lava lena lea e fai, ma o nisi taimi e usitai i ai tagata agasala a o isi foi taimi e usitai i ai le Au Paia; aua e avea i tatou ma auauna a i latou tatou te usitai i ai [tagai MFF 29:45]. …

… E sao le tulafono a Ieova e faafoisia mai ai le agaga [tagai Salamo 19:7], ma e tatau ona pulea i tatou e lena tulafono ma faataunuuina, a leai, o le a tatou tali atu i le Alii lo tatou Atua e tusa ma le ala o loo tatou tulimata’i atu i ai, po o le le faia foi o o tatou tiute. O la’u lena vaai i ai, ma afai e le o lena, aisea la na aumai ai nei tulafono ia i tatou. O ni tulafono ea a le Atua? Ua tatou malamalama i ai. O le mea lea, tatou faia loa o tatou tiute ma saili e faalautetele o tatou valaauga ina ia mafai ai ona tatou faamaonia ma aloaia i tatou e le Alii. …

O le mea lea, tula’i ia! outou na o Toeaina o Isaraelu—outou na Ositaulaga, Aoao ma Tiakono, outou na Peresitene o Siteki, Epikopo ma Fautua Maualuga, outou na Aposetolo ma Au Peresitene Sili, ma i tatou uma lava—Ina tula’i ia ma tatou o atu e galulue ma o tatou loto e fai le finagalo o le Atua i le lalolagi e pei ona faia i le lagi; aua afai e fai, o fea e te manatu e amata ai, pe afai e le amata atu ia i tatou? O loo faamoemoe mai le Atua tatou te faia. E tumu i tatou i vaivaiga ma faaletonu, o i tatou uma lava; ae tatou te mananao e aoao lana afioga, o lona finagalo, ma le tulafono a le Atua, ma ola ai i lena afioga ma le finagalo ma le tulafono. Ia tusia lena tulafono i o tatou loto. Tatou saili e faalautetele o tatou valaauga ma faamamalu lo tatou Atua, ona faia ai lea e le Alii o mea o totoe. … Ia tatou…tuu atu lo tatou faatuatuaga i le Atua soifua, ma tulitulimata’i atu i se faiga e atamai, faautauta ma poto. Tatou te le vivii ifo ia i tatou lava, ae o Ieova o ‘Au.⁹

Tatou te manaomia le aao lagolago o le Silisiliese a o tatou auauna atu.

E le silasila Ieova pei o le vaai a le tagata; e le manatu foi e pei o le tagata. E ui lava atonu tatou te malamalama i nisi vaega o o tatou tiute, ae tatou te le malamalama i le ala e pulea ai le ekalesia a le Atua. E manaomia le faatulagaga masani ma le Agaga e taitaiina ai i ala sa’osup¹⁰

Tatou te galulue faatasi ma le Silisiliese, ma aposetolo ma perofeta ma tagata o le Atua o e sa soifua i augatupulaga eseese o le lalolagi, e faataunuu le polokalama tele sa mafaufau i ai le Atua e faatatau i le fanauga a tagata a o le’i i ai le lalolagi, ma e taunuu lava aua o loo soifua le Atua. Tatou te lagona i lea foi taimi, o loo siosiomia i tatou i ma’i, o lape, o faaletonu ma vaivaiga o le natura faaletagata, ma o le tele lava o mea e sese a tatou faamasinoga, ma e tatou te manaomia e le aunoa le aao lagolago o le Silisiliese; o le taiala ma le taitaiga a Lona Agaga Paia, ma apoapoaiga a lana perisitua ina ia taitaiina ai i tatou ma faasaoina i le ala e tau atu i le ola e faavavau.¹¹

Tatou te faapea o i tatou o Tagata Paia o le Atua, ia e sa’o lava. … Ua tatou talitonu ua fetalai mai le Atua, ua faaali mai agelu ma ua tatalaina e le Atua se fesootaiga a le lagi ma le lalolagi. O se vaega lenei o lo tatou faatuatuaga faalelotu. Tatou te talitonu o le a suia atoatoa e le Atua le lalolagi, ia faasaoloto mai ai nai soo se amioleaga ae folasia mai i ai le amiotonu o soo se ituaiga, seia iu ina folasia atoa mai le meleniuma. E le gata i lea, ae ua tatou talitonu foi, talu ai ua amata e le Atua lana galuega, o lea o le a faaauau ai pea ona faaali mai ma faailoa mai lona finagalo i lana perisitua, o lana ekalesia ma le malo i le lalolagi, ma o le a i ai foi i lona nuu se faaaliga o le amioatua, o le upmoni, o le paia, o le amiosa’o, o le faamaoni, o le poto ma le malamalama o le Atua.¹²

Ou te lagona ua ou i ai i le taua [faasaga i le leaga], ma o le a uma le olaga o fai, e oo lava i le faavavau atoa; ma afai o au o se auauna a le Atua, ua ou i ai i lalo o le taitaiga a auauna a le Atua, o e sa ia filifilia e taiala ma fautuaina au e ala i faaaliga mai ia te ia, ua ia te i latou le aia tatau e pulea ai ma faatonutonu a’u i mea uma e tau i le malo o le Atua; ma e le gata i lea, ou te lagona o mea uma lava pe faaletino pe faaleagaga foi e faatatau i le olaga nei po o le faavavau, e tau lava i le malo o le Atua. O lo’u lagona faapena, na mafua ai ona i ai sina eseesega ia te au i le ala e fai ai mea; e le faapea o se mea e matua taua tele pe latou te ui i lena itu, po o lenei itu, po o le isi foi itu, pe gaoa pe lamolemole foi le ala, o le a na o sina taimi lava; ae o le mea e aupito sili ona taua ia te au o le, ala ou te taofiofi mau ai i lo’u faatuatua, ma tausisia la’u amiosa’o, ma faamamaluina lo’u valaauga, ma ia ou mautinoa o o’u faamaoni i le faaiuga o aso e gata ai, ae faapea foi i lalolagi e le gata; ma ia faaauau pea ona tuputupu a’e i le poto uma, malamalama, filiga, mana, ma le faaeaga.¹³

E tatau ona tatou lagolagoina isi tagata o le Ekalesia i o latou valaauga.

O taitai uma o le Ekalesia e muamua lava ona valaau e ala i faaaliga, po o i latou e i ai le pule, e tusa ai ma le natura o le tofiga, ona lagolagoina ai lea e tagata o le a latou pulefaamalumalu ai. E tofu le tagata ma le mana e tusa ai ma le tulaga ua ia tu ai; ma e faamoemoe lava o le a talia e tagata uma e aafia ai, ana faamasinoga ma faaiuga.¹⁴

Tatou te sii a’e o tatou lima taumatau pe a lagolagoina, o le faailoga i luma o le Atua ua tatou lagolaogina i latou sa tatou filifilia. Ma afai tatou te manatu e le mafai ona tatou lagolagoina i latou, e le tatau la ona sii i luga o tatou lima, aua o se pepelo lea pe afai tatou te faia. …

O le a le uiga o le lagolagoina o se tagata? Pe ua tatou malamalama i ai? O se mea faigofie tele ia te au, ae ou te le iloa ia te outou. Mo se faataitaiga, afai o se tagata e avea ma se faiaoga, ae ou palota faapea ou te lagolagoina o ia i lona tulaga, a oo ina asiasi mai o ia i lona tulaga aloaia, o le a ou faafeiloai atu ia te ia ma fai faalelei, agalelei ma faaaloalo i ai. Afai ou te manaomia se fautuaga, o le a ou fesili atu ia te ia, ma o le a ou faia mea uma ou te mafaia e lagolagoina ai o ia. O se mea sa’o lena ma se mataupu faavae o le amiotonu. O le a ou le tautala lava i se mea e ta’uleagaina ai o ia. Afai e le o le mea sa’o lena e fai, o lona uiga e tatau ona ou aoao le mea sa’o e fai. Ma afai e taumusumusu se tasi a’o ou i ai, i se mea e uiga ia te ia, e faaleaga ai lona tulaga ta’uleleia, o le a ou fai atu i ai, vaai oe, o oe o se Tagata Paia? Ioe. E le’i siiina ea lou lima e lagolago ai o ia? Ioe. Ae aisea la e te le faia ai? O lea, ou te ta’ua ai lena mea o le lagolagoina o ia. Afai e i ai se tagata na te osofa’ia lona igoa ta’uleleia—aua e taua uma lava le ta’uleleia o igoa ia i latou—o le a ou faia lava se mea e puipuia ai o ia.

Pe a tatou palota mo tagata i le auala mamalu o loo tatou faia ai, pe tatau ea ona tatou tausisia a tatou feagaiga? pe tatau ona tatou solia? Afai tatou te solia, ona avea ai lea o i tatou ma soli-feagaiga. Tatou te solia lo tatou faatuatua i luma o le Atua ma o tatou uso, e tusa ai ma aga a tagata sa tatou osi feagaiga e lagolagoina.

Ae faapefea la pe afai na te faia se mea sese, pe faapea na maua o ia o pepelo pe taufaa’ole’ole, pe taufaasese foi i se tagata, pe gaoi po o se isi lava mea, pe ua le mama foi i ona uiga masani? Pe e te lagolagoina pea lava o ia? O lo’u tiute lo’u talanoa ia te ia e pei ona ou talanoa i se isi tagata, ma ta’u i ai ua ou malamalama ua faapea ma faapea, ma ona o ia tulaga, o lea ua le mafai ai ona ou toe lagolagoina o ia. Afai ou te iloa faapea e sese le faamatalaga na ou maua, ona ou toe faataatia ese lea o lea mataupu; ae afai e leai, o lona uiga o lo’u tiute loa le vaai ua faia ia te ia le faamasinoga tonu, ina ia avatu o ia i luma o le faamasinoga e tatau ai ina ia tali atu ai i mea sa ia faia; ma ana leai lena mea, e leai sa’u pisinisi ou te talanoa ai e uiga ia te ia.¹⁵

Ia tatalo mo i latou ua tuu e le Atua i tofiga eseese o lenei ekalesia ina ia mafai ai ona latou faia o latou tiute eseese. O le a lagolaogina e le Alii ana auauna ma avatu ia te i latou lona Agaga Paia ma le malamalama o faaaliga, pe afai latou te saili atu ia te ia i le ala na tofia ai, ona ia taitai lea o i latou ma taitai foi oe i le ala sa’o. O le faatulagaga lea o le malo o le Atua, e pei ona ou malamalama i ai. … Ma o lo tatou tiute le aoao ia iloa lena faatulagaga ma usiusitai i ai.¹⁶

Fautuaga mo Suesuega ma Talanoaga

Pe ua e maua ea se valaauga na e lagona e te le’i saunia i ai? Na faapefea ona e tali atu i le luitau? (Tagai foi i le 1 Nifae 17:50.) E mafai faapefea ona saunia i tatou lava e auauna atu i le Alii i soo se tulaga?
Ua faamamafa mai e Peresitene Teila ua tofu i tatou uma ma tiute e faia i le Ekalesia. Aisea e taua ai le auauna atu o i tatou taitoatasi?
Na faapefea ona manuia lou olaga ona o ou valaauga i le Ekalesia? E mafai faapefea ona saga atoatoa lou auauna atu?
Na faamanuiaina faapefea oe ma lou aiga e se tagata o le Ekalesia sa faalauteleina lona valaauga? O a ni lagona na oo mai i lou loto mo i latou sa auauna atu ma le filiga ia te oe ma lou aiga?
O a ni mea na e oo i ai ina ua fesoasoani atu le Alii a o e auauna atu? O a ni mea e mafai ona e faia ia e maua ai Lana taitaiga i taimi uma e te auauna atu ai? Aisea e taua ai, a o tatou auauna atu, lo tatou le vivii ifo ia i tatou lava, ae o le Alii?
E mafai faapefea ona tatou lagolagoina malosi isi i o latou valaauga? E faamalosia ai faapefea le Ekalesia pe a faaalia le lagoagoina o le tasi o le isi? O a mea e mafai ona tatou faia i totonu o o tatou aiga e lagolago ai o tatou taitai o le Ekalesia?

O Mau e Faatatau I Ai: Faataoto 3:5–6; Mosaea 2:17; MFF 4:2–7; 24:7; 64:33–34; 76:5

trees — Sa faatusatusa e Peresitene Teila lo tatou auai taitoatasi ma auaunaga, i vaega o se laau, ma aoao mai ai “ua fusia faatasi i tatou i noataga o le feagaiga e tasi.”

sustaining — “Tatou te sii a’e o tatou lima taumatau pe a palota, o se faailoga i luma o le Atua o le a tatou lagolagoina i latou ua tatou palota i ai.”