Mataupu 23

Upumoni e Faavavau

E leai se isi mea e sili atu ona taua ia te au nai lo mataupu faavae o le upumoni e faavavau.¹

Mai le Soifuaga o Ioane Teila

Ose tasi o uiga tausaafia o Ioane Teila o lona faamaoni lea i le upumoni, tusa lava pe o a manatu o isi tagata. “Sa itiiti le tosina atu o le mafaufau o Ioane Teila i viiga ma faitioga a le lalolagi pe a aafia ai le upumoni,” na tusia ai e Elder B.H. Roberts. “O le tele o le inosia o le [upumoni], o le tele foi lena o lona faamaoni.”² O mea na tutupu i le liliu mai o Ioane Teila i le talalelei, o se tasi lea o uluai faataitaiga o lona fiafia i le upumoni.

O Parley Pratt na uluai faailoa atu le talalelei ia Ioane Teila i Kanata. Na faagaeetia Ioane Teila ma ana uo lolotu i aoaoga a Elder Pratt, ma sa i ai foi i uo a Ioane Teila ni talitonuga foliga tutusa e uiga i sauniga e pei o le papatisoga i le faatofuina ma le faaee atu o lima mo le meaalofa o le Agaga Paia. Peitai, ina ua faamatala atu e Elder Pratt ia i latou e uiga ia Iosefa Samita ma le Tusi a Mamona, sa toatele uo a Ioane Teila sa le toe fia faalogo i ai, ma sa mumusu nisi e sailiili i le Tusi a Mamona ma ona aoaoga. Sa tautala atu ma le le fefe Ioane Teila i le latou vaega e faapea:

“Ua tatou o mai iinei, ma le faamoemoe e saili i le upumoni. Ma e oo mai i le taimi nei, ua tatou suesueina atoatoa isi talitonuga faalelotu ma aoaoga faavae, ma ua tatou faamaonia le sese. Tatou te fefe la i se a e suesue i le Faa-Mamona? Ua aumaia e le Susuga a Pratt ia i tatou le tele o aoaoga faavae e tutusa ma o tatou lava manatu. … Sa tatou tatalo i le Atua e auina mai se avefeau, ma i ai Sana Ekalesia sa’o i le fogaeleele. O lea ua susu mai le Susuga a Pratt…e aunoa ma se tupe po o se ato, e faapei ona malaga aposetolo anamua; ma e leai se tasi o i tatou e mafai ona faamaonia le sa’o po o le sese o ana aoaoga faavae i se mau po o se manatu maumaututu. Ou te manao e sailiili i ana aoaoga faavae ma le pule ua ia ta’ua. … Afai ou te iloa e moni lana lotu, o le a ou taliaina, tusa lava pe o a ona taunuuga.” O le sailiiliga mae’ae’a a Ioane Teila na iu ai ina papatisoina o ia i le aso 9 Me 1836. Sa ia ta’ua mulimuli ane, “E le’i i ai ma so’u masalosalo i se mataupu faavae o le faa-Mamona mai lena taimi.”³

O le avea ai ma se tagata o le Ekalesia ma se taitai, e mafai ona talitonuina e le aunoa ia Ioane Teila e aoao mai ma puipuia le upumoni. “Sa ia folafola atu le talalelei i le tele o nuu; ma ona o ia o se siamupini o le upumoni, o lea foi ua ia saunia ai e faafetaia’i ia i latou uma e osofa’ia; tusa pe felafolafoa’i ma i latou e tetee i se sauniga faalauaitele, po o luma o se motu o tagata e faasausili, po o ni tusitusiga i nusipepa, sa tutusa lava lona manumalo ai ona o ana faaupuga malolosi o le upumoni.”⁴

O Aoaoga a Ioane Teila

O i latou e fiafia i le upumoni e faamanuiaina foi i le malamalama ma le mana.

I lona tu ai i luga o le faavae [o le upumoni], ma ufita’i i le ofu o le upumoni, ua pulato’a atu ai le tagata o le Atua i le lumanai, e ala i le faatuatua, ma ua mafai ai ona iloa atu le faavavau, ua tatalaina mai i ai mea lilo o le lagi, ma ua mafai ona iloa atu mea na tutupu i le talafaasolopito o le lalolagi, ma faamoemoega o le Elohima Silisiliese, a o faataunuuina i lo latou mamalu uma ma le mana ma le viiga. Ma o le ola ai i sina taimi puupuu, ma vaai atu i aso ua tuanai, o le taimi nei, ma le lumanai, ua ia vaaia ai ia lava o se tagata e faavavau ua mauaina le tulaga e faapei o le Atua, o se atalii o le Atua, ua i ai ni uiga o le Atua e faapei o se aloiafi mai se afi mumu e faavavau. Ua ia vaavaai atu i le lalolagi ma le tagata, i o latou foliga eseese, ua iloa mea moni e fiafia i ai, ma ona o le poto na tuuina mai i ai e lona Tama i Luga, ua ia malamalama ai i o latou tupuaga ma taunuuga. …

O lona poto, na tuuina i ai e le Atua ma gaua’i i ai, o le a faalauteleina e pei ona salalau o le lalolagi; o le tulafono na ia soifua ai o le tulafono o le alofa; o lana tulafono na soifua ai, o le tulafono o le faamaoni i tagata uma. E alofa o ia i ona tuaoi, ma e agalelei i ai; e alofa i lona Atua ma o lea e tapuai ai o ia ia te ia; ua vaai o ia i le mana o le upumoni, e pei o le malamalama o le Atua, e salalau i le lalolagi atoa, e sulugia ai lalolagi uma, ma ati atu ai i nofoaga e iloa ai le Atua, o tagata po o agelu; na te taofi mau i ai. O le upumoni o lona pulou lea, o lona fusi, ma lona talipupuni, o lona papa, ma lona olo maualuga; i le olaga atoa ma le faavavau. E faaigoa o ia e tagata o le vale, aua e le mafai ona ta’a’ina o ia i lo latou faavalevalea, pe mulimuli foi i a latou faataitaiga le faavaea e oo atu ai i le faatafunaga. Peitai, a o latou saili atu i mea e leai ni ola, ua ia maua ma malamalama i le mea moni e taua. A o faamalieina i latou i se lotu e le mautu ma tauautago, ma ua ogatasi ma ta’a’iga mo sina taimi, ae leai se mea e maua ai le faavavau, ma e le maua ai mataupu faavae maualuluga ma le mamalu mo le tagata, e tu atu o ia [Ioane Teila] ma le lototoa mo le Atua; na te faailoa atu [le Atua], e usitai o ia ma ta’uta’u ma faailoa atu le faatuatua ua avatu e le Atua ia te ia. Na te pu’e maia mea moni uma, mai le tagata faapea ma le lagi. E leai sona lava manatu faamama’i faaletagata e lagolagoina po o se talitonuga mautu faalelotu faapitoa e sapaia. Ua na lafoaia na o mea e sese, e leai foi se mea ua ia teuina, ua na o mea moni. Sa ia eli, galue, ma sailia e pei o se ‘oa sa natia; ma o isi sa faamlieina i aputi ma pa’u magumagu, ae sa ia opo mau i le fatu po o le aano; o le mea aupito taua o mea lelei uma, ma pipiimau ai i mea uma e siitia ai ma faaeaina le fanauga a tagata. …

Pe na maua ea e tagata anamua o le Atua le olioli i le upumoni? E faapena foi i tatou. Pe sa latou maua ea ni faaaliga? E faapena foi i tatou. Pe sa latou vavalo atu ea? E faapena foi i tatou. Pe sa fesootai ea i latou ma le Atua? O loo tatou fesootai foi ma Ia. Pe na latou vavalo ea i le “toefuataiina o mea uma?” [Tagai Galuega 3:21.] Matou te fai atu, ua i o tatou luga. Pe na latou valoia ea se malo o le Atua? O loo tatou fesoaoani nei e fausia. Pe na auauna atu ea agelu ia te i latou? E faapena foi i tatou. Pe sa i ai ni o latou perofeta, aposetolo, o e folafola le talalelei, o a’oa’o, ma leoleo? E faapena foi i tatou. Pe sa ia i latou le agaga o perofetaga ma faaaliga? E faapena foi i tatou. Pe na latou faatalitali i le afio faalua mai ma le toe faaalia mai ma le mamalu o lo tatou Alii ma le Faaola o Iesu Keriso? E faapena foi i tatou. Pe na latou iloa ea o le a vavaeeseina e le Atua o e amio leaga mai le fogaeleele, ae amatalia se nofoaiga o le amiotonu? E faapena foi i tatou. Pe na latou saili mo Iesu ma le au paia e fai ma tupu i le lalolagi? E faapena foi i tatou. O le mea moni, o loo tatou saili i mea uma sa latou faia; o loo saili ia iloa mea uma sa latou iloa, ma faataunuu mea uma sa latou valoia, le faataunuuga tele ma o le toefuataiga foi lea o mea uma; ma e mafai ona pepelo ma mateletele tagata; ae e le mafai ona latou taofia fuafuaga a le Atua, pe taofia foi le alualu i luma o le upumoni e faavavau—ua agai pea i luma, AGAI PEA I LUMA, AGAI PEA I LUMA, ma na te faafetaia’ia le itu tetee. …

O le a le afaina lava le mana silisili o le upumoni e faavavau a o faapotopoto mai ‘au, ma o le a iloa e atunuu o le Atua e pule i le lagi.⁵

O le upumoni, le upumoni e faavavau, o le faavae lea o le faamoemoe o le Kerisiano: ua na o le pau lea o le papa mautu e mafai ona faavae ai. O le lafoaia o lena tulaga ina ia lagolagoina ai se manatu faalelotu e fiafia i ai, o le a pau atu ai le [Kerisiano] i le lavelave o le le faamaoni, masalosalo, sese, ma talitonuga sese, ma ua i ai i le ala vave o le faatafunaga. O le a i ai le mana o le Atua e le aunoa ia i latou e fiafia i le upumoni ma tausi i ai.⁶

O le a taitai atu i tatou e le talalelei mai lea upumoni i lea upumoni.

Ua fuafuaina le talalelei e taitai atu ai i tatou mai lea upumoni i lea upumoni, ma mai lea atamai i lea atamai, seia taunuu ai lena mau lea na tautino mai o le a tatou vaai e pei ona vaaia i latou, ma latou iloa e pei ona iloa i latou [tagai MFF 76:94], seia le toe aoao atu le tagata i lona tuaoi, ia outou iloa Ieova, aua e iloa o Ia e i latou uma lava, o tagatanuu atoa ma alii [tagai Ieremia 31:34], seia oo ina susulu mai le malamalama ma le poto o le Atua i tagata uma, ma latou ‘ae’ae ai ma le fiafia i le lasusulu o le upumoni e faavavau.⁷

E tusa ai ma lo tatou talitonuga faalelotu, ou te fai atu ua i ai uma mataupu faavae o le upumoni ma le poto e lelei, ma le mafaufau, e talafeagai ma tagata i le olaga nei ma le tino ola pea, e talafeagai foi ma lenei lalolagi ma le lalolagi a sau. Tatou te taliaina soo se ituaiga o upumoni, e le afaina po o fea e sau ai, pe o fea e tupuga mai ai, pe o ai foi e talitonu i ai. O le upumoni, pe a sosoo ma le upu “uma,” e aofia ai mea uma sa i ai pe o le a i ai ma iloa e tagata i le olaga nei ma augatupulaga uma o le faavavau. Ma o le tiute lea o tagata atamamai uma o e ua i ai le matafaioi o le tali atu i le Atua mo a latou amioga, ia saili i le upumoni, ma ia faatosina ai i latou ma mea latou te fai ma o latou olaga, ia saoloto mai manatu faapito’au uma, tusa lava pe foliga mai o se talitonuga e aoga ma moni.

O i tatou, o Au Paia o Aso e Gata Ai, e talitonu muamua i le talalelei, ma o se mea taua tele ma le maoae lea e tautala ai, aua ua i ai i le talalelei o mataupu faavae e loloto, e lautele, ma e mamao ona taunuuga nai lo se isi lava mea e mafai ona tatou vaaia. E aoaoina i tatou e le talalelei e uiga i le Atua ma ona uiga. E aoao ai foi i tatou i lo tatou sootaga ma lena Atua ma o tatou tiutetuave eseese o ni ana fanau. E aoao ai foi i tatou i o tatou tiute ma matafaioi eseese i o tatou aiga ma uo, o nuu, o e ola ma ua oti. E faailoa mai ai ia te i tatou o mataupu faavae e faatatau i le lumanai. O le mea moni, e tusa ai ma se saunoaga a se tasi o soo i le feagaiga tuai, na te “aumaia le ola ma le tino ola pea i le malamalama,” [tagai 2 Timoteo 1:10] e aumaia ai i tatou e fegalegaleai ma le Atua, ma saunia ai i tatou mo se faaeaga i le lalolagi e faavavau.⁸

Ua faaalia mai e le Atua ia i tatou upumoni sili ma le mamalu, ma ua Ia saunia e faaali mai isi upumoni pe afai tatou te tuu atu i tatou i Lana taitaiga ma Lana faatonuga. Ina tatou saili atu ia e mulimuli i le mataupu faavae ua aoao faafia mai e Iesu—ina ia faia le finagalo o lo tatou Tama o i le lagi, o le na fetalai, “Ou te le usiusitai i lo’u lava loto, a o le finagalo o le Tama, o le na auina mai au.” [Ioane 5:30.] Ua tatou i ai iinei e faapei foi ona sa afio ai o Ia iinei, ma ua ia te i tatou foi o matafaioi e pei foi ona tatau ai ia te Ia ona faia o le finagalo o lo tatou Tama Faalelagi. E tatau ona tatou usitai atu i tulafono a le Atua, le afioga a le Atua, ma le finagalo o le Atua.⁹

E le tatau ona tatou fefefe e ositaulaga mo le upumoni.

E teena e le aunoa le upumoni e le fanauga a tagata, e i ai le sootaga ma loto pi’opi’o ma amioleaga. Sa sauaina e le aunoa perofeta; ae aisea? aua latou te le fefefe e ta’u atu i tagata le afioga a le Alii. Na ta’ua e Setefano, a o tautala i lenei lava mataupu, “O ai so le au perofeta e le i saua i ai o outou tama, ua fasiotia foi e i latou e na muai tala’i i le afio mai o le Amiotonu, o ia ua outou faalataina ma fasiotia nei?” [Tagai Galuega 7:52.] “Peitai i lenei augatupulaga,” o loo faapea mai ai tagata, “matou te iloa sa amioleaga i latou, semanu matou te le faia lena mea [pe ana matou i ai].” O le tala foi lena a tagata Iutaia ia Iesu, ae o la na latou faasatauro ia te ia.. …

Ua toefuatai mai e le Alii le Talalelei e pei ona sa i ai i ona po o Aposetolo. E le ioe lenei Talalelei i faiga a tagata, aua e eseese ma feteenai; ma nai lo le latou faailoa atu o upumoni, pe a o i latou o ni tagata faamaoni, o upumoni o loo i ai i le Tusi Paia, lea latou te ta’uta’u mai e talitonu i ai, ae e leai. Ua latou taumafai e faaufiufi a latou faiga toilalo ma teori e le faavaea mai tusitusiga paia, e faapulupulu ai i latou lava i o latou ofutalaloa o le faafiaamiotonu. … Peitai o le a taavale atu pea le upumoni; o le a fagua mai e loto faamaoni mai lo latou moe; o le a taavale atu pea i luma faamoemoega o le Atua; o le a faatuina le malo o le Atua, ma…o le a tu faasasa’o ma le mitamita le upumoni, … ma e leai se mana e mafai ona taofia lona alualu i luma.¹⁰

O le a ou faamatalaina atu nisi o o’u lagona ina ua ou faatoa sau i lenei ekalesia. “Ina ua ou faatoa faalogo i le talalelei, sa uunaia au e tautino atu e i ai se mea manaia o i ai. Sa toetoe lava ina ou faamoemoe e le sa’o. ‘Afai e sa’o,’ sa ou fai atu ai, ‘ona o au o se tagata faamaoni, o le a ou usitai i ai, a leai, e le mafai ona ou talitonuina a’u lava.’” Ina ua uma ona ou suesueina le mataupu, ma ou talitonu e sa’o, sa ou fai atu, “Ua ou taliaina; e tatau ona ou taliaina; e le mafai ona ou teena mataupu faavae o le upumoni e faavavau.” E le gata i lea, ou te fai atu, ou te le iloa se isi taimi i lo’u olaga pe afai na tuuina mai ia te au se mea moni e le mafai ona faafitia, ae sa ou sauni e usitai i ai ma o loo ou usita’ia nei.

Afai e i ai se tagata i le lalolagi o lotu, po o le lalolagi faaupu fai, po o le lalolagi faasaienitisi, o le a tuuina mai ia te au se mataupu faavae e moni, ua ou saunia e talia, tusa lava pe o fea e sau ai. Ua faapea mai se tasi, e te talitonu i le Tusi Paia? Ioe. E te talitonu i le Tusi a Mamona? Ioe. E te talitonu i le Mataupu Faavae ma Feagaiga? Ioe. Ou te talitonu i mea uma sa tusia pe fetalai foi i ai le Atua, o mea uma ua i ai i a tatou faamaumauga, ma ua ou saunia e talitonu i mea uma o le a ia ta’u mai i le fanauga a tagata. Ua tatou folafola atu tatou te talitonu i upumoni uma, ma ia pulea e le upumoni uma.¹¹

Na ou iloa lava a ou sau i le ekalesia lenei, e tatau ona sauaina au ma faasino esea. Sa ou iloa o le a sauaina tagata. Ae sa ou talitonu na tulei mai le Atua, ua faailoa mai mataupu faavae faavavau o le upumoni, ma e i ai se galuega a le Atua e ao ona faataunuu e ui ina e le ogatasi ma manatu, o vaaiga, ma mafaufauga o tagata, ma ou te le’i iloa ae o le a manaomia ai lo’u ola ae e le’i maea. … Afai na latou fasioti ia Iesu i aso ua mavae, pe mata e le o lagona foi nei ma aafiaga o le a aumaia ai taunuuga lava e tasi i nei aso? Sa ou faitauina mea uma o le a manaomia mai ia te au ina ua ou faatoa amata, ma sa ou sauniuni e faafetaia’ia.¹²

O le Alii, e ala i nai mea iti, e mafaia ona tausia ma faasaoloto lona nuu, ae e tatau ona latou tuu atu lo latou faatuatuaga atoa ma le talitonuga ia te ia; ma afai e fetaiai ma ni tulaga faaletonu, e le tatau ona fefefe e ositaulaga ina ia tausisia ai le upumoni, ma o le a lelei mea uma mo i tatou, pe ola pe oti, i le olaga nei ma le faavavau.¹³

E tatau ona tatou sailia pea ma talia le upumoni.

O loo tatou saili atu i le upumoni. Na tatou amata sailia, ma o loo tatou saili atu pea e le aunoa, ma, e ese le vave pe a tatou maua soo se mataupu faavae moni e faaalia mai e soo se tagata, po o le Atua, po o agelu paia foi, tatou te taliaina ma avea o se vaega o lo tatou talitonuga faalelotu.¹⁴

O se tagata o loo saili i le upumoni, e leai se faiga patino e tumau ai, leai se manatu faalelotu e pupuia po o se teori e tautu i ai. Na te taliaina mea moni uma, ma o le mea moni, e pei o le la i le vanimonimo, e susulu mai ma sulugia uma i ona ‘ave malolosi foafoaga uma. Afai o le a lafoa’i e tagata lo latou faasausili ma le faamaualuluga, ae saili ma le loto tatalo ma le filiga i le upumoni, o le a latou mauaina i soo se mea e liliu atu i ai.¹⁵

O le isi mafuaaga tele e tautevateva ai tagata i le tele o taimi i le tele o a latou sailiga mo le upumoni, ona latou te sailia i lo latou lava poto, ma faaviivii i lo latou lava atamai, ae latou te le’i saili atu i le Atua mo lena poto ua tumu ma pulea ai le atulaulau ma faatonutonu ai mea uma. O se tasi lena o faigata tele i tagata popoto o le lalolagi, e pei ona i ai nei, e fai ifo le tagata ia te ia lava, o ia o le na muai iloa fai mea uma sa ia mauaina. Soo se tulafono ma se mataupu faavae fou faapea na ia muai maua, na te faaviivii ia te ia lava nai lo le avatu o le viiga i le Atua.¹⁶

E leai se isi mea e sili atu ona taua ia te au nai lo mataupu faavae o le faavavau; nai lo mataupu faavae o ola faavavau; faaolataga e faavavau, ma le faaolataga e faavavau i le malo o le Atua. Peitai, o lo tatou tiutetauave lo tatou malamalama i ai, aua afai tatou te le malamalama i ai, tusa lava pe o le a le maoae o upumoni, e le mafai ona tatou manuia ai.¹⁷

E mafai ona tatou taliaina upumoni uma, pe o le a lava lona natura, ma e tatou te mananao foi ia maua ma teuina, ia saili atu i ai e faapei o saili ni ‘oa natia; ma faaaoga uma le malamalama ua aumai e le Atua mo i tatou ina ia tatou maua ai le poto uma sa ia avatu i isi tagata; ma ole atu ia te ia e faaali mai lona finagalo ia i tatou, e tusa ai ma mea sili ua fuafua e siitia ai le fiafia ma le soifua solo lelei o le tagata..

Afai e i ai nisi mataupu faavae, soo se tofa manino lelei tatou te le’i ausia, tatou te mananao ia tatou aoao i ai. Afai e i ai se isi mea i le lalolagi faasaienitisi tatou te le malamalama ai, tatou te mananao ia tatou faamasani i ai. Afai e i ai se isi lala o le tofa manino na fuafuaina e siitia ai le soifua solo lelei o le tagata, ae tatou te le’i mauaina, tatou te mananao foi ia tatou maua. Afai e i ai se isi mea e faatatau i le tulafono ma le puleaina o malo, po o polokiki, i se isi faaupuga, tatou te le’i iloa, tatou te mananao ia maua. Afai o i ai nisi manatu faalelotu, nisi upumoni faalelotu, nisi mataupu faavae e faatatau i le Atua, ae tatou te le’i aoao i ai, tatou te fesilisili i tagata, ma tatou tatalo i le Atua, lo tatou Tama Faalelagi, e faamalamalama i o tatou mafaufau ina ia mafai ai ona tatou malamalama, iloa, talia, ma ola ai e avea ma se vaega o lo tatou faatuatuaga faalelotu. O lea, o o tatou manatu ma mafaufauga o le a faalauteleina e pei ona lautele o le lalolagi, ma taliaina mea uma e faatatau i le malamalama, o le ola, po o mea o i ai e faatatau i lenei lalolagi po o le lalolagi a sau. … O le a latou saili atu i le poto o Atua o loo afifio i lalolagi e faavavau. O le a latou pu’e maia mea uma e lelei ma viia ma atoatoa, ma sa fuafua e fiafia ma siitia ai le soifua solo lelei o le fanauga a tagata.

E leai se tagata, po o ni tagata na tusilima i le ala e savavali ai o tatou vae, e tusa ai ma nei mea. E leai ni manatu faalelotu po o ni teori o i ai i le lalolagi tatou te tautino atu e faalogo i ai, sei vagana ua mafai ona faamaonia e mataupu faavae o le upumoni e faavavau. Tatou te mataituina, sailiili, faitioina, ma suesue mea uma tatou te vaai i ai, ma a o mafai ona tatou malamalama i se upumoni o i ai, ona tatou fiafia ai lea e avea ma se vaega o faatinoga o loo tatou i ai.¹⁸

Afai e i ai se upumoni i le lagi, lalolagi, po o seoli, ou te manao ou te taliaina; ou te le popole po o le a foliga e oo mai ai ia te au, po o ai na te aumaia; pe o ai e talitonu i ai; pe lauiloa pe leai foi, o le upumoni, upumoni e faavavau, ou te fia manao lava e siomia ai au ma fiafia ai.¹⁹

Fautuaga mo Suesuega ma Talanoaga

O a punavai o le upumoni o le faavavau o ia i tatou? E mafai faapefea ona e faaleleia le auala e te tali atu ai i nei punavai?
E faapefea ona taitai i tatou e le talalelei “mai lea upumoni i lea upumoni?” O a ni suiga ua e maitauina i lou olaga a o e aoao ma talia upumoni fou?
O a taulaga ua e faia pe fai foi e isi e te iloaina, ona o le upumoni? O a faamanuiaga ua e maua ona o lena mea?
E toatele tagata o le Atua ua maliliu ona o le upumoni. E mafai faapefea ona tatou ola mo le upumoni ma lea lava ituaiga faamaoni e tasi?
Aisea e masani ai ona teena le upumoni e faavavau e le lalolagi lautele? O le a se mea e mafai ona tatou faia e fesoasoani ai i fanau ia iloa ma taliaina upumoni e faavavau? O le a se mea e mafai ona tatou faia o ni aiga e faamalolosia ai a tatou tautinoga i le upumoni?
Aisea e taua ai le saga faateleina pea lava pea o lo tatou malamalama i le upumoni? E mafai faapefea ona tatou mulimuli i le fautuaga a Peresitene Teila e faaauau pea le saili atu mo le upumoni? E mafai faapefea ona tatou iloa le upumoni mai le mea e sese?
O a ni upumoni o le talalelei e te iloa e sili atu ona musuia ma faamalosi ai oe? E mafai faapefea e oe lena o le tagata o le Ekalesia ona fesoasoani i isi ia malamalama ma talia le upumoni?

O Mau e Faatatau I Ai: Filipi 4:8; 1 Tesalonia 5:21; Alema 32:28–29; Moronae 10:4–5; MFF 45:57; 93:24; Mataupu Faavae o le Faatuatua 1:13

wheat — “A o faamalieina isi i aputi ma pa’u magumagu, …e opoina [e le tagata o le Atua] le fatu po o le aano, [ma] o le mea aupito taua o mea lelei uma.”