Mataupu 1

O Le Amataga ma le Taunuuga o le Tagata

O i tatou o fanau a le Atua, ma ua silafia e le Atua e tatau ona tatou fesootai ma Ia i nei aso e gata ai. Ua ia tuuina i tatou i se tulaga e mafai ai ona tatou faataunuuina le faamoemoega o lo tatou foafoaga, e ala i lona faaalia mai o ia lava ma lona Alo o Iesu Keriso, e ala mai foi i galuega a agelu paia ma le toefuataiina mai o le perisitua paia lea e aumai mai le Atua, o le perisitua lava foi lea o loo pulea ai ia lava.¹

Mai le Soifuaga o Ioane Teila

I se saunoaga na ia tuuina mai a o Peresitene i le Korama a le Toasefululua, sa toe ta’ua ai e Peresitene Teila le uunaiga faaleagaga sa ia lagonaina ao tamaitiiti, ina ia malamalama i le faamoemoega o le olaga ma lona sootaga i le Atua. Na ia saunoa: “A o ou laitiiti lava, e masani ona ou fesili ifo ia te au lava, O ai au? O fea na ou sau ai? O le a la’u mea lea e fai iinei? Ae aisea foi ua ou sau ai iinei? O loo tatou fenumiai pea i nei mea, e toatele lava o loo fenumiai, peitai o mafaufauga nei e le mafai ona aveesea mai o tatou mafaufau. Tatou te vaai i fanau o fananau mai i le lalolagi, tatou te vaai foi i le tautotogo ma le taumafanafana, o le tautoulu foi ma le taumalulu, e faapena lava ona mulimuli mai le tasi i le isi i se faasologa masani, ma e tatou te fesili foi ia i tatou lava, Pe o le a le mana na mafai ai ona faia nei mea? Aisea ua tatou o mai ai iinei ae pe o le a foi le faamoemoega o nei mea uma o loo siomia ai i tatou?”²

E faaalia i aoaoga a Peresitene Teila le olioli na ia maua i aoaoga faavae o le talalelei lea na fesoasoani ia te ia e malamalama ai i lona amataga paia ma lona taunuuga o se atalii o le Atua. Na ia tautino mai “pe a mafaufau se tagata paia o le Atua i le faavavau, ma ua tatalaina mai ia te ia vaaiga o le faavavau ma faamoemoega o le Atua e le masuia i lona mafaufau—pe a ia mafaufau loloto i lona tulaga moni i luma o le Atua, agelu, ma tagata, ona mafai ai lea e ia ona aveesea mai lona mafaufau mai mea o le lalolagi atoa foi ma lagona o loo noatia ai o ia i mea faalelalolagi. E mafaufau loloto o ia i le Atua ma lona lava taunuuga i le fuafuaga e faavavau a le Tama, ma olioli ai i se faamoemoega tele mo le mamalu o se tino ola pea.”³

O Aoaoga a Ioane Teila

O i tatou o fanau a lo tatou Tama Faalelagi ma ua ia te i tatou le tulaga gafatia e avea ai faapei o Ia.

“Se a ea le tagata e te manatu mai ai ia te ia; ma le atalii o le tagata e te asiasi mai ai ia te ia?” (Salamo 8:4.)

I se tasi manatu, e foliga mai o le tagata e mativa, e vaivai, ma faavalevalea, ma e le taua foi: a o se isi manatu, e foliga mai e atamai, e poto, e malosi, mamalu, ma faaeaina. Ona pau lava o le tulaga e te vaavaai ai i se tagata ua taitai oe e faatupu ai ou manatu e faatatau ia te ia. I se tasi foi itu, e foliga mai e pei ona sa ta’ua ai, e pei o le vao o le fanua, e ola mai nei, ae lafoina a taeao i le ogaumu. E fesuisuiai i ona manatu, o ona mafaufauga, o ona uiga, ma ana taga. E paie o ia, e vaivai, ma e maua foi faaaliga, e aunoa ma le tau puleaina e se mataupu faavae sa’o. E fanau mai, e pei ona ta’ua, e pei o se lelefua, e felelea’i solo mo sina taimi, ona mate ai lea, ma le toe vaaia.

I se isi foi manatu, tatou te vaai ia te ia e sau mai le Atua—o se tagata e mafai ona avea ma Atua—o se tagata e faavavau na i ai se mea na soifua ai muamua a o le’i sau iinei, ma o le a toe soifua foi pe a mavae ona liu efuefu lona tino, o le mea na ia sau ai, ma o le a ia toetu a’e ai ma ‘ae’ae ai i lena fiafia o le a ia taunuu i ai, po o le maua foi o le taui o ana amioga mataga, e tusa ai ma ona tulaga na i ai. …

…O le a ea le [tagata]? Sa ola o ia i lalolagi o le faavavau; sa ola o ia a’o le’i sau iinei. E le gata o ia o le atalii o le tagata, ae o ia foi o le atalii o le Atua. O ia o se tagata e mafai ona avea ma Atua, ma ua i ai i totonu ia te ia se aloiafi o lena afi mumu o le faavavau, lea e sau mai le mumu saesae o le afi e faavavau a le Atua i le lalolagi o le faavavau, ma ua tuuina le tagata i le lalolagi ina ia ona maua ai le poto moni, o le malamalama moni, le atamai moni,—ina ia iloa ai e ia o ia lava—ina ia iloa ai e ia le Atua— ina ia iloa ai e ia se mea e tatau ona ia taunuu i ai ina ia olioli ai i lalolagi e faavavau.⁴

Afai tatou te manatu i le tagata, e faapea na faia o ia i le faatusa o le Atua, ona o se mafuaaga faigofie, ona o ia o se atalii o le Atua, ma o le avea ai la ma ona atalii, e moni lava, o se tasi o ana fanau, na sau mai le Atua, o lona faatusa na faia ai o ia, e pei ona ta’u mai ia i tatou. E le’i amataina mai o ia i ni mea sa soona nunumi, ni mea sa gaoioi pe le gaoioi foi, ae na sau i se tulaga e pei o se fatu, ae ua i ai tulaga uma ma mana o se Atua. Ma a oo ina faaatoatoaina o ia, ma oo ina matua, o le a avea o ia e faapei o lona Tama—o se Atua, o se tasi o Ana fanau. E faapei o le solofanua, le ‘oti, le mamoe, ma meaola uma lava, e aofia ai ma le tagata, e fanauina lona lava ituaiga ma faaauau lona lava ituaiga, e faapena foi ona faaauau e le Atua lona foi ituaiga.⁵

E tu le [tagata] i le fogaeleele i le faatusa o lona Foafoa silisili; ua matagofie ona fausia i ona vaega uma, ua i ai se tino ma vaega uma e faatino ai mea uma mo lona tausiga faaletagata; e le gata ona ua i ai ia te ia le aia tatau e faia ai, ae ua i ai foi ia te ia le tomai e fesuisuia’i ai i ona tulaga, o le lalelei, matagofie ma le mamalu, i le faauluuluga o foafoaga uma; ua i ai foi ma mana faalemafaufau ma le tulaga e gafatia ai ona mafaufau i le taimi ua tuanai, faatasi ai ma tomai e malamalama ai i mafuaaga ma aafiaga, ma o le faaaogaina foi o mana e fuafua ai mea i lona mafaufau, e ala i musumusuga a le Silisiliese, e malamalama ai i tulafono maoae o le natura e pei ona faaalia i galuega o le foafoaga; faatasi ai foi ma le tomai o le faaaogaina o elemene ma malosiaga o le natura, ma le fetuutuuna’ia o ia mea mo lona lava manuia faapitoa; ma ua ia te ia foi mana e vailiili ai le loloto o le sami, e alu a’e ai i le vanimonimo, e faanatinati atu ai i le saosaoa tele i le salafa o le lalolagi, ma faaaoga ai malosiaga eseese o le natura o loo siomia ai o ia ma ia pulea e tusa ma lona manao; e faapena foi ona ia pulea i lona atamai ia i’a o le sami, o manu felelei o le vanimonimo, ma manu uma o le fogaeleele.⁶

Tatou te manaomia Iesu Keriso ina ia mafai ai ona tatou maua lo tatou taunuuga paia.

E tu le [tagata] ma le mitamita i le faauluuluga o foafoaga uma, ma o le sui o le Atua i le fogaeleele. Peitai, e ui ina tu o ia i lenei tulaga faaeaina, ma o le faatusa foi o le Atua, ae ua ia te ia, o se tagata, na o mana e tatau ai mo se tagata; ma e mafai ona oo i ai le vaivai, ma faano’uno’u, o faama’i foi ma le oti. Ma afai foi la e oti o ia, a aunoa foi ma le tuuina atu i ai o se fesoasoani tele e faatatau i le lumanai, o lona uiga o le a taatia ai lena fausaga faatamalii ua le toe mafaia se mea, o ona totoga foi sa gaoioi ma olaola ma malolosi, ua le toe aoga nei, ma ua le toe i ai se mana. Ae faapefea la le mafaufau, lea sa mafai ona mafaufau ai i le faavavau, o le taimi ua tuanai ma le faavavau o le lumanai? Ae faapefea ona mana? Ae pe faapefea foi lena agaga, lea a tuufaatasi ma ona malosi faaleAtua, e mafai e lona atamai ma le mana ona malamalama e leai se gataaga? E faapefea lena tulaga, ma o fea foi la o i ai?. …

Afai … e i ai se agaga i le tagata lea e oo atu i le lumanai, lea e malamalama i le alualu i luma e faavavau, o olioliga e faavavau, ma le faaeaga e faavavau; o lona uiga la o na mamalu, o na faaeaga, o na tomai ma na foi mana e tatau o ni meaalofa a se tagata maoae, mana, po o se pule e sili atu nai lo le tulaga ua i ai le tagata. …O le meaalofa lena o loo tatou tautatala ai nei. O se mataupu faavae e sau mai le Atua, e tupuga mai i se poto e sili atu, o ana fuafuaga, ma mana, ma tomai e sili atu nai lo le tagata soifua, e pei ona maualuga o le lagi nai le fogaeleele, po o le faapei foi ona maoae o le mamalu o galuega a le Foafoa Silisili i le vanimonimo nai lo nai taumafaiga vaivai a fanau a tagata.

O le faaeaina o le tagata i le tulaga lea o le poto maoae ma le avea ai ma se Atua, o le mafuaaga lea o le puluvaga ma le togiola a Iesu Keriso; ma o lena foi aloalii, le tagata, na faia i le faatusa o le Atua, ua le gata ina avea ai o se atalii o le tagata, ae o se atalii foi o le Atua,…ma ua mafai ai foi ona avea o se Atua, ua i ai mana, o le mamalu, o le faaeaga ma le tulaga o se Atua. E faapei ona tusia, “Le au pele, o le fanau i tatou a le Atua i nei ona po, ae lei faaalia mai nei le uiga o i tatou a amuli: a ua tatou iloa, pe a faaali mai o ia, ona foliga ai lea o i tatou ia te ia, aua tatou te iloa tino ai lava o ia.” [1 Ioane 3:2.]

O se tagata, e ala i mana o lona tino, e mafai ona ia maua le mamalu ma le atoaga o le tulaga faaletagata, ae e le mafai ona sopo atu; aua ua fanau o ia o se tagata, e ola foi o se tagata, ma e oti foi o se tagata; peitai o le natura ma le mana o le Aigaatua, o loo i ai i totonu ia te ia, lea na aveina ifo ia te ia o le meaalofa a le Atua mai lona Tama Faalelagi, ua mafai ai e ia ona tula’i ae mai tulaga faatuaoia o le tagata i le mamalu o se Atua; ma o lea la ua ala mai i le togiola a Iesu Keriso…ua mafai ai e ia ona maua le faaeaga e faavavau, o ola e faavavau ma le alualu i luma e faavavau. Peitai, o lenei siitaga mai le tulaga faaletagata i le avea ai ma se Atua, e na o se mana lava e sili atu nai lo le tagata e mafai ai—o se mana e le uma, o se mana e faavavau, o le mana lava lea o le Aigaatua: aua e faapei ona oti uma ia Atamu, e faapena foi ona na o Keriso foi e ola ai [tagai 1 Korinito 15:22].

O [Keriso] foi e mafai ai ona fesootai le tagata ma talanoa ma le Atua; o Lana togiola foi ua latou mafai ai, e faapei foi o Ia, ona faatoilaloina le oti; o lena foi le togiola ma le mana o le Perisitua o loo i ai, ua avea ai i latou ma suli o le Atua ma ua suli foi faatasi ma Iesu Keriso, o le a mautofi foi i nofoalii, ma malo, o itumalo sili ma pulega i lalolagi o le faavavau. Ma o le a le toe oo i ai le oti, pe afai o le a faaumatia le toe fili, ma faaumatia le oti i le manumalo, o lena foi togiola o le a mafai ai ona avea i latou o tama ma tina o fanau e faavavau, ma maua ai le alualu i luma e leai se gataaga.⁷

E fesoasoani le Ekalesia a Iesu Keriso tatou te taunuu ai i lo tatou taunuuga paia.

Ua faauuina e le Atua mo outou ni peresitene, o aposetolo, faitaulaga sili, o fitugafulu, epikopo ma isi taitai; o ni tofiga na faia e ia, ua ia tuuina i ai le pule ma o loo taitaiina foi e ia, o lana uunaiga foi, o loo aoao atu ai lana tulafono, ma faamalamalama ai mataupu faavae o le olaga, ma ua faatulagaina ma faauuina faapitoa e taitai tagata i le ala o le faaolataga ma le mamalu e faavavau.⁸

Sa tatou pogisa foi e faapei o isi tagata e uiga i mataupu faavae o le faaolataga, faapea foi lo tatou sootaga ma le Atua ma isi tagata, seia oo ina faailoa mai nei mea ia i tatou e Iosefa Samita.⁹

O i tatou o fanau a le Atua, ma ua silafia e le Atua e tatau ona tatou fesootai ma Ia i nei aso e gata ai. Ua ia tuuina i tatou i se tulaga e mafai ai ona tatou faataunuuina le faamoemoega o lo tatou foafoaga, e ala i lona faaalia mai o ia lava ma lona Alo o Iesu Keriso, e ala mai foi i galuega a agelu paia ma le toefuataiina mai o le perisitua paia lea e aumai mai le Atua, le perisitua lava foi lea o loo pulea ai ia lava.¹⁰

Tatou te mananao e iloa ma talisapaia le tulaga o loo tatou i ai i luma o le Atua ma faamanuiaga sili ma avanoa paia e mafai ona tatou maua. O lea ua faatoa tatou amata, i le galuega tele. …Tatou te le malamalama i taimi uma i nei mea, ma o lea tatou te galulue ai i mea faigata e tusa ai ma lenei faamoemoe, aua tatou te le vaai, tatou te le malamalama foi i le tulaga ma le sootaga i lo tatou va ma lo tatou Atua.

O le Atua o lo tatou Tama; o i tatou o lana fanau. Ua ia aumaia i tatou i lana feagaiga, ma o lo tatou avanoa paia lenei e o atu ai mai lea poto i lea poto, mai lea atamai i lea atamai, mai le malamalama i lea mataupu faavae i le isi, e agai atu ai i luma ma alualu i luma i le atinaeina o le upumoni seia oo lava ina mafai ona tatou malamalama i le Atua. Aua o i tatou o lana fanau, o i tatou o ona atalii ma afafine, ma o ia foi o lo tatou tama. Ua ia faatulagaina lenei Ekalesia ina ia mafai ai ona aoaoina i tatou i mataupu faavae o le olaga, ina ia tatou malamalama ai i na mataupu faavae a le Atua, ina ia mafai ai ona tatou aoaoina a tatou fanau i mataupu faavae sa’o, ina ia mafai ai ona tuu i tatou i se tulaga e mafai ai ona avea i tatou e faapei o lo tatou Tama Faalelagi.¹¹

E tatau ona tatou “taumafai ma le filiga” ina ia tatou ausia lo tatou taunuuga paia.

Ua faaalia mai e le Alii ia te i tatou le tele o faamanuiaga, ma o nisi taimi ou te manatu e seasea lava ona tatou talisapaia lea o le malamalama o le upumoni lea ua atinaeina, o le mamalu ua soofaatasi ma le talalelei lea ua toefuataiina mai, o le malamalama o faaaliga ua aumai, o le tulaga ua tatou i ai i le sootaga ma le Atua, agelu, o a tatou fanau ma o tatou tuaa; o le faamoemoe ua totoina e le talalelei i loto o tagata faamaoni taitasi o le Au Paia o Aso e Gata Ai, lea e salagi i le tino ola pea ma le ola e faavavau. …

O nisi taimi e galo ai ia i tatou a tatou tatalo, o tiutetauave, o tiute ma feagaiga, ae tatou gauai atu i le tele o mea e ono faapogisaina ai le mafaufau, e faanenefu ai le malamalama, e faavaivaia ai lo tatou faatuatua ma taofia ai le Agaga o le Atua mai ia te i tatou. Tatou faagalo i le lua na eli mai ai i tatou, ma le papa foi na foafoaina mai ai i tatou, ma e tatau ona tatou manatunatu i le tulaga ua tatou i ai, o lo tatou sootaga foi ma le Atua, o sootaga o le tasi i le isi ma o tatou aiga, ina ia mafai ona toe tosina atu o tatou mafaufau i le Atua o le na faia i tatou—o lo tatou Tama i le lagi, o le e faafofogaina a tatou tatalo, ma o loo saunia i taimi uma e foai mai mea e manaomia e ana Au Paia faamaoni. Ma o nisi foi taimi, e tatau ai ona tatou manatunatu i le tulaga o loo tatou umia i le lalolagi o loo tatou ola ai, o le tulaga sa tatou i ai ae tatou te le’i o mai iinei, ma le faavavau o le a oo mai.

E le tatau ona tatou faatuatuai ona gaioi ma faatamala ma lē manatu mamafa i ai; ae e faapei ona apoapoaia ai le Au Paia anamua, e faapena foi ona matou apoapoai atu ia te outou i le aso— ia taumafai ma le filiga ia maua le faatuatua e pei ona tuuina atu i le Au Paia [tagai Iuta 1:3]. …

… O i tatou, o ni tagata e faavavau, e fegalegaleai faatasi ma se Atua e faavavau, ua i ai se lotu e taitai atu ai i lena Atua, ua tatou mananao e iloa se mea e uiga ia te ia, e faapei foi ona i ai i latou anamua, ina ia faataunuuina le faamoemoega o lo tatou foafoaga ma lo tatou taunuuga i le fogaeleele, ma fesoasoani ai i le Alii ia faataunuuina mea na ia fuafuaina a o le’i faavaeina le lalolagi, e faatatau i le fanauga a tagata. …E le’i suia lava e le Silisiliese lona faamoemoega, e le’i suia lava ana fuafuaga, pe faa-leaogaina ana tulafono. …O Lona ala o se taamilosaga e tasi e faavavau. E tasi Lona faamoemoega, ma o lena faamoemoega o le a faataunuuina i le tagata ma le lalolagi o loo mau ai o ia.

Na pau lava le fesili e tatau ona tatou fesili ifo ai ia i tatou lava, pe o tatou galulue faatasi ma le Atua, pe o le a tatou galueaiina e i tatou lava lo tatou faaolataga pe leai; pe o le a tatou faataunuuina taitoatasi o tatou tiutetauave eseese e oo mai ia i tatou pe leai; pe o le a tatou fataunuuina sauniga ua folasia mai e le Atua ia i tatou pe leai; mo i tatou lava e amata ai, mo o tatou aiga, mo e o ola ma e ua oti. Pe o le a tatou galulue faatasi i le fausiaina o malumalu ma faia sauniga iina; pe o le a tatou aufaatasi ea ma le Silisiliese, i lalo o le taitaiga a lana perisitua paia, i le faataunuuina o mea na tulei mai i fofoga o perofeta paia talu mai le amataga o le lalolagi; pe o le a tatou taumafai ea ma le filiga ia maua le faatuatua na tuuina mai i le Au Paia. O nei mea o o tatou tiutetauave i se isi itu. …

… E finagalo o Ia ina ia taumafai ma le filiga lona nuu mo le faatuatua na tuuina mai i le Au Paia, ina ia mafai ai ona galulue faatasi ma le Silisiliese, o ni tagata ua maua le tino ola pea, ina ia mafai ai ona musuia i latou e le mataupu faavae o faaaliga; ia mafai ai ona latou malamalama i se mea e uiga i lo latou mamalu ma tulaga faaletagata; o lo latou sootaga ma le faavavau, i le lalolagi o loo tatou ola ai i le taimi nei ma le lumanai, faapea foi lalolagi o le a oo mai. …

O le agaga o le tagata, pe a maua se tino, o le a faaeaina e ala i le talalelei e faavavau; ma o lena foi tagata, afai e faamaoni, o le a i ai le taimi, e mafuta ai ma Atua i lalolagi e faavavau; ma a o tatou toto ma selesele, ma faia gaoioiga masani o le olaga, faapei foi ona faia e isi tagata, o lo tatou faamoemoega autu lava o le ola faavavau ma faaeaga; o lo tatou faamoemoega autu o le saunia lea o i tatou lava, o a tatou fanau ma o tatou augatuaa mo nofoalii, o malo ma itumalo sili i lalolagi o le faavavau.

O le mea lea o loo tatou tulitulimataia, ma sa tulimataia foi e le Au Paia anamua. O le mea lenei sa tulitulimataia e Atamu, Noa, Enoka, Aperaamo ma perofeta, ina ia latou ausia ai lo latou taunuuga i le lalolagi, ma e faapei ona saunoa se tasi o perofeta o anamua, “e te tu mai foi i lou tofi pe a oo i le iuga o aso,” [tagai Tanielu 12:13] pe a oo ina tatala tusi, pe a oo mai le nofoalii tele e sinasina, ma le o tietie ai, ua sosola ese le lalolagi ma le lagi i ona luma; ina ia saunia ai i tatou ma i latou, pea uma ona faataunuuina le faamoemoega o lo tatou foafoaga i le lalolagi, ina ia tuufaatasia ai ma atamai o i ai i lalolagi o le faavavau; ia toe ulu atu ai i le afioaga o lo tatou Tama, lea na tatou o mai ai, ma auai i na mataupu faavae faavavau o le upumoni, lea e le iloa lava e le tagata se mea e uiga i ai, e aunoa ma faaaliga. Ua tatou i ai iinei mo lena faamoemoega; ua tatou maua faaeega paia mo lena faamoemoega; ua tatou osia feagaiga mo lena faamoemoega; ua tatou galulue auauna atu mo e ola ma e oti ona o lena lava le faamoemoega, ma o o tatou faamoemoega uma lava, ma a tatou sini uma, e faapei o le faamoemoega ma sini a tagata musuia i aso ua mavae, e auga uma lava i upumoni o le faavavau faapea foi le olaga nei. …

O le mea lena o loo tatou tulimataia, ma o le a tatou ausia lava, ma e leai foi se tagata e mafai ona ia taofia, e leai se faalapotopotoga, leai se mana, leai se pule, aua o le Atua lava o loo taiulu, ma e agai pea lava pea i luma lona malo, ma o le a faaauau pea lava, ma tuputupu ae ma faateleina seia oo ina avea malo o lenei lalolagi ma malo o lo tatou Atua ma lana Keriso.¹²

Fautuaga mo Suesuega ma Talanoaga

E fesoasoani faapefea lou iloa o oe o le atalii/afafine o le Atua? E faatosinaina faapefea e lenei malamalama ou lagona e uiga i ou taunuuga? E faatosinaina faapefea e lenei malamalama au tatalo?
E aafia faapefea ou manatu i isi ona o le upumoni o atalii ma afafine tagata uma o le Atua? E tatau faapefea ona aafia a tatou fegalegaleaiga i totonu o o tatou aiga ona o lenei malamalama?
E tatau i se a ona tatou ola i se tulaga faaletino? (Tagai foi i le 2 Nifae 2:11–13, 24–27; Mose 5:9–11.) O le a le matafaioi a Iesu Keriso e fesoasoani ai i lo tatou ausiaina o o tatou taunuuga paia?
Ua fesoasoani faapefea aoaoga faavae o le Ekalesia ia e malamalama ai i lou amataga ma lou taunuuga? E fesoasoani faapefea le Ekalesia ia tatou ausia lo tatou taunuuga e faavavau?
O le a le uiga ia te oe o le “taumafai ma le filiga” e ausia ou taunuuga paia? O a ni faataitaiga ua e vaaia i tagata o loo faia? E mafai faapefea ona tatou “galulue faatasi ma le Atua” ia ausia lenei sini?
Sa aoao mai e Peresitene Teila “o lo tatou faamoemoega autu o le saunia lea o i tatou lava, o a tatou fanau, ma o tatou augatuaa mo nofoalii, o malo ma itumalo sili i lalolagi o le faavavau.” E mafai faapefea ona faatumauina lo tatou tulimatai atu i lena faamoemoega a o tatou ui atu i le olaga faitino?

O Mau e Faatatau I Ai: Kenese 1:26; Salamo 82:6–7; Roma 8:16–17; MFF 76:22–24, 50–70

galaxy — “Pe a mafaufau se tagata paia o le Atua… i lona tulaga moni i luma o le Atua, agelu, ma tagata, ona mafai ai lea e ia ona aveesea mai lona mafaufau i mea o le lalolagi atoa foi ma lagona o loo noatia ai o ia i mea faalelalolagi.”

baby — Ona o i tatou o fanau a le Atua, e le’i amataina mai i tatou i ni mea sa soona nunumi, ni mea sa gaoioi pe le gaoioi foi, ae na o mai i se tulaga e pei o se fatu, ae ua i ai tulaga uma ma mana o se Atua.”