Mataupu 13

O Le Perisitua, o le Malo ma le Mana o le Atua

O le perisitua…o le mana ola.¹

Mai le Soifuaga o Ioane Teila

Ua manatu Ioane Teila, o le perisitua, e le gata o le pule e fai ai galuega i le suafa o le Atua, ae o se malosiaga mamana foi e mafai ai ona faataunuu mea tetele. Sa ia aoao mai o i latou o loo umia le perisitua, e tatau ona toaaga e faaaoga le perisitua e auauna atu ai i isi, e faataunuu ai faamoemoega amiotonu uma o le Atua. Sa ia uunaia i latou uma o loo umia le perisitua ina ia fai o latou tiute ma faalautele o latou valaauga, ma sa ia saunoa ai “o le aoao po o le tiakono na te faataunuuina ona tiute, e sili atu ona faamamaluina o ia nai lo se peresitene po o se isi o le toasefululua e le o faia.”²

Sa aloaia foi e Peresitene Teila ma talisapaia le pule a i latou sa faaaogaina o latou perisitua e auauna atu ai ia te ia ma lona aiga. O lona lotomaualalo ma le faaaloalo i le pule o le perisitua, sa faaalia lea i se tala sa faamatala e lona atalii o Mose W. Teila, e uiga i se afiafi i le aiga o le au Teila, a o i ai le asiasiga a o latou faiaoga o aiga. “O le tasi o faiaoga o se taulealea e sefuluono tausaga le matua,” sa tomanatu ai le atalii o Teila, “ma o le po lena ua oo ai ia te ia le faasologa e pulefaamalumalu. Sa faapotopoto mai e Tama le aiga, ma ta’u atu i faiaoga o lea ua matou i ai uma: ‘Ua i ou aao lo matou aiga, ma ua matou faatalitali mo au aoaoga.’”

Ona fesili atu lea o le taulealea ia Peresitene Teila pe fai a latou tatalo faaleaiga ma tatalo a le tagata lava ia, pe agalelei i o latou tuaoi, pe latou te o foi e le aunoa i le lotu, ma lagolago i le au pulega o le Ekalesia. “O nei fesili, sa tali auaua’i e lo’u tama, e pei lava o la e tali e le uii o le matou aiga. Ina ua maea le galuega a faiaoga, ona la’ua talosagaina lea o lo’u tama e tuu atu ni nai faatonuga mo i laua.

“Sa ia fai atu ia te i la’ua, ua fiafia lava i lo la’ua faamaoni, ma sa ia faafetai atu foi i ai mo la la’ua asiasiga, ma sa ia uunaia i la-’ua e saga asiasi mai pea, aua ua ia iloa le lelei tele e mafai e se tagata o umia le perisitua—le mana o le Atua—ona fai mo lona aiga, ma sa ia ta’u atu foi ia i la’ua e leai se tofi i le ekalesia e tele atu mea lelei e mafai ona fai ai, nai lo se faiaoga. Na ia ta’u atu i faiaoga, ina ia ua’i atu i lana fanau ma fautuaina i latou e pei o se tama.

“ ‘E le tele se taimi ou te i ai i le fale,’ o lana saunoaga lea, ‘ona e tele naua ona ou alu i o’u tiute faale-ekalesia, ma ou te popole pe afai e le maua faalausosoo e la’u fanau ni fautuaga lelei, e ono taitaiseseina i latou.’”³

O Aoaoga a Ioane Teila

O le Perisitua o le mana o le Atua.

O le a le perisitua?…O le a faapuupuu atu la’u tali, o le malo o le Atua, pe i le lalolagi po o le lagi foi, aua o le mana ma le pule o le perisitua o loo pulea ai mea uma lava i le lalolagi ma le lagi, ma o le mana foi lena o loo taofia ai ma tausia mea uma. E pulea ai mea uma—e taitaia ai mea uma—e lagolago ai mea uma—ma e i ai lana faia i mea uma na faia e le Atua atoa ma upumoni. O le mana o le Atua ua tuuina atu i agaga i le lagi atoa foi ma tagata i le lalolagi; ma pe afai tatou te taunuu atu i le malo selesitila o le Atua, o le a tatou vaai ai i se faatulagaga aupito sili ona atoatoa ma toafilemu, aua o loo i ai iina le faatulagaga atoatoa lelei, o loo i ai se malo e aupito sili ona faatulagaina lelei, ma pe o fea lava na atinae ai na mataupu faavae i le lalolagi, i le tele sa faasalalau ai ma faaaoga ai, na pau foi lena o le tele na latou maua ai faamanuiaga ma le faaolataga i le fanauga a tagata. Ma pe a oo ina taliaina le malo o le Atua e le salafa [o le lalolagi], ma a oo ina tali mai le tatalo a Iesu lea na ia aoao i ona soo, ma ua oo mai i le lalolagi le malo o le Atua, ma ua faia lona finagalo i lalo nei e pei ona faia ai i le lagi [tagai Mataio 6:10], ae seiloga ua oo i le taimi lena, ona malo ai lea o le alofa aoao, le manuia, le toafilemu, ma le lotogatasi.⁴

O le [Perisitua] o le … pule ma le mana lea e faagaoioi ai, pulea, faatonutonu, ma taitai Ana fuafuaga, o Ana lalolagi, o Ona malo, o Ana alii sili, o Ona malosi, O ona atamai, ma mea uma o i lalo ma luga atu foi o Ia, ma mea uma Na te fai.⁵

O le mana na faaalia mai e le perisitua o le mana lava lea o le Atua, aua o ia o le ao o le perisitua…; ma o le pule foi lenei ua faataunuuina ai galuega uma a le Atua, pe o le lalolagi po o le lagi; ma soo se faaaliga mai o le mana e ala mai i le perisitua i le lalolagi, o le mana lava lea mai le perisitua i le lagi, ma o le tele ona ogatasi o le perisitua i le fogaeleele ma gauai atu i le perisitua i le lagi, o le tele foi lena o lo tatou mauaina o lenei mana.⁶

O le perisitua ola o loo i le lalolagi, e faatonutonu mai le lagi.

Sa faatulagaina e le Atua le perisitua, e pulea ai mea uma i le lalolagi ma le lagi; o le isi ona vaega o loo i le lagi, a o le isi vaega o loo i le lalolagi; e galulue faatasi mo le fausiaina o Siona, o le faaolaina o e oti ma e ola, ma le faataunuuina o “tausaga e toefuatai ai mea uma lava;” [tagai Galuega 3:21] ma ona o lo la’ua vavalalata tele, o lea e alagatatau ai ona i ai se fesootaiga i le va o le tasi ma le isi, ma e tatau ia i latou o i le lalolagi ona maua faatonuga mai e o i le lagi, o e ua masani i mea i le lalolagi ma mea faalelagi, ua i ai le poto masani i ia mea uma, e faapei foi ona sa latou taitai ai i le perisitua lava lea e tasi i le lalolagi.⁷

O sootaga ma fesootaiga o le perisitua i le lagi, lea e aumai ai le mana, ola, ma aafiaga manaomia i le perisitua ola o i le lalolagi, ma ana leai, semanu e pei o la laau ua mamate ma mamae: ma afai e i ai i se tagata le ola, po o le mana, o le mana ma le ola o le perisitua, o le meaalofa ma le mana o le Atua na fesootai mai i ala masani o le perisitua, e le gata i le lagi ae faapea foi le lalolagi; ma o le saili e aunoa ma lea, e pei ia o se vaitafe o loo saili ia maua ni vai ae o loo pe le punavai, pe pei foi o se lala laau o loo saili ia maua le ola po o ni meaai, ae ua motu ese le ogalaau mai le aa: ma afai foi e talanoa i se ekalesia e aunoa ma lenei perisitua, e selo lea talanoaga—ua na o se punavai ua matutu, po o se laau ua mate ma mamae.⁸

E leai se tagata e [mafai] ona taialaina lenei malo. E le mafai sei vagana ua faatasi le Atua ma ia, ma ia i ai i le itu o toeaina o Isaraelu. Peitai, o le i ai o ia i le latou itu, o le a sagatonu ai mea uma, ma o le a liligi mai ai foi le atamai ma faaaliga a le Atua. O le a faaalia mai Ana tulafono, ma o le a atinae mataupu faavae o le upumoni; aua a leai, e le o le malo o le Atua lea. Ma e ao ia i tatou uma ona faamaulalo ia i tatou lava i luma o le Atua, ma saili atu mo le taitaiga a le Silisiliese. …

O loo i ai se mataupu faavae e fesootai ma le malo o le Atua e faailoa atu le Atua i mea uma, ma e faailoa atu foi le perisitua i mea uma, ma o i latou e le faia, ua tatau ona salamo aua a leai, o le a le mafai ona latou alualu i luma; ou te fai atu ia te outou i le suafa o le Alii. Aua nei outou manatu ua outou popoto, ma faapea e mafai ona outou faafoeina le perisitua i le faiga tou te mananao ai, aua e le mafai. E tatau ona pulea e le Atua, faafoe, faatonutonu, ma e tu foi i le ao, ae tu le tagata i lona tulaga. E le manaomia ona taofiofi le atolaau a le Atua [tagai 2 Samuelu 6:3, 6-7], aemaise lava o tagata e le agavaa, e aunoa ma ni faaaliga, ma e aunoa foi ma se malamalama i le malo o le Atua ma ona tulafono. O se galuega tele o loo tatou feagai ai nei, ma e tatau ona tatou saunia i tatou lava mo le galuega o i o tatou luma, ma ia faailoa atu le Atua, o lana pule ma lana perisitua i mea uma.⁹

Tatou te fia auauna atu i le Atua i le olaga nei ma le faavavau atoa pe a oo mai. O lea ua tatou amata, ma o le a tatou taumafai e ala i le fesoasoani a le Atua ma le malamalama a Lona Agaga Paia, ma faaaliga o le a Ia tuuina mai ia i tatou mai lea taimi i lea taimi—o le a tatou taumafai ai e faaaoga lelei ma galulue faatasi ma le Perisitua i lalolagi o le faavavau, a le o le lalolagi nei po o le lagi. O le a tatou faagaoioia seia oo ina faataunuuina le galuega sa fuafuaina e le Atua i lenei lalolagi, ma ua faaolaina e ola ma ua oti i le mamao na mafai ai, e tusa ai ma tulafono o le faavavau o loo i ai i le lagi, ma tusa ai foi ma poloaiga a le Silisiliese. …

Ou te saga fai atu pea lava, “Le Atua e, taitai au i le ala sa’o: Le Atua e, laveai au mai mea sese uma; Le Atua e, o au o se tagata mativa, augavale, vaivai ma le sese, e tumu i vaivaiga. Ou te manaomia Lou fesoasoani mai i le aso atoa. Le Atua e, fesoasoani mai ia te au.” O o’u lagona na, ma lagona o o’u uso o le Au Peresitene Sili, ma le Toasefululua ma isi. Matou te lagona tatou te manaomia le fesoasoani a le Silisiliese. Ia tatou taumafai e lotomaualalo, ma faamaoni ma tausi a tatou feagaiga. Ma afai tatou te faalogo ma usiusitai i tulafono a le Atua, ma faia mea o loo manaomia e Ia mai o tatou lima, o le a Ia fesoasoani mai ma faamanuia i tatou, ma o le a Ia faamanuia foi i Siona ma faasaoina Isaraelu.¹⁰

Ua tuuina mai le perisitua ina ia mafai ai ona tatou fausia Siona.

O le a le mea ua tuuina mai ai lenei perisitua ia i tatou? Ina ia mafai ai ona tatou fausia le Siona o le Atua. O le a le mea e fai ai? Ina ia faamuta ai mea sese ma mea pi’opi’o, o le tu’ianau, pepelo, gaoi, o le le faamaoni, ma le loto matau’a, faatasi ai ma isi ituaiga uma o mea faatiapolo, ma ia uunaia ai foi le faatuatua, o le agamalu, agaalofa, mama atoatoa, agalelei faauso, ma le tautala sa’o, amio sa’o, faamaoni, ma mea uma ua fuafua e faaeaina ai ma siitia le tagata i luga, ina ia mafai ai ona avea i tatou ma sui moni ma le lelei o le Atua lo tatou Tama i le lalolagi, ina ia tatou aoao ai ia iloa lona finagalo ma faia; ina ia faia ai lona finagalo i le lalolagi e pei ona faia i le lagi.¹¹

Ina ia mafai ona faataunuu lenei sini manaomia—o le toefuatai o foafoaga i lona tulaga mama atoatoa sa i ai i le amataga—o le faaola, laveai, faaeaina, ma faamamaluina le tagata—ia faaola ma laveai e ua oti ma e ola, ma i latou uma o le a ola e tusa ai ma ana tulafono, o le fuafuaga lea ma le faamoemoega o le faatuina mai o le perisitua i le lalolagi i aso e gata ai. Na faia mo le faamoemoega e faataunuu ai mea e le’i faataunuuina—ina ia faaatoatoa ai le galuega a le Atua—ina ia oo mai ai le taimi e toe fuatai mai ai mea uma, ma i le soofaatasi ai ma le perisitua faavavau i le lagi (o e a aunoa ma i tatou, ma a aunoa foi ma i latou, e le mafai ona faaatoatoaina), e mafai ona tatou faataunuuina mea uma sa i ai i le mafaufau o le Atua, pe sa fetalaia mai e le Agaga o le Atua, e ala mai i fofoga o perofeta paia uma lava talu ona i ai le lalolagi. …

O loo aufaatasi le perisitua i le lagi ma i tatou e faataunuu ai nei faamoemoega, ma talu ai ona o loo pulea e le mataupu faavae lava e tasi, ina ia autasi a tatou galuega—ina ia tatou maua le fesoasoani mai le lagi, ma faapena foi ona maua e le lagi la tatou fesoasoani, ma ia faia ai le finagalo o le Atua (e tusa ma mea e tatau ona tatou faia) i le lalolagi e pei foi ona faia i le lagi. O le mea lea e tatau ona tatou iloa, ma tatou faia ina ia faataunuu ai o tatou valaauga, ma tuuina atu a tatou galuega e fia silasila i ai le Atua ma agelu paia, faapea foi i le silafaga a o tatou uso, o e o tatou faifai mea faatasi i le perisitua i le malo o le Atua i le fogaeleele.¹²

Ua tuuina le perisitua i le ekalesia, ma le faamoemoe, e tapu-’e ai, toto, ma faafailele, ia aoao ai mataupu faavae sa’o, ma atinae ai le faatulagaga o le malo o le Atua, e tau ai ma tiapolo, ma faatumauina ma lagolago taitai o le ekalesia a Keriso i luga o le fogaeleele. O lo tatou tiute lo tatou taufai galulue faatasi e faatulaga ai le iunite tele e tasi—o le tino tele e tasi ua tuufaatasi [po o se tino ua faatulagaina], ma le folafolaga e faamaoni i le malo o le Atua; ona gasolosolo filemu ai lea o mea uma, ma le toafilemu, ma le faigofie, ona matua itiiti ai lea o ni faaletonu.¹³

Ua tuuina mai le Perisitua mo le manuia o le fanauga a tagata.

O le Perisitua lava ia sa tuuina mai i taimi uma mo le manuia o le fanauga a tagata. E talanoa i ai tagata e pei sa faapitoa mo le manuia o tagata taitoatasi. O le a le tala sa fai e uiga ia Aperaamo? “Ia te oe ma au fanau”—ia le a? O le a ou faaee atu faamanuiaga ia te oe. Ia, e sa’o lava. Peitai “o oe ma au fanau o le a manuia ai aiga uma o le lalolagi.” [Tagai Aperaamo 2:11] Ia avea i tatou ma ni e e agalelei atu, ma afai tatou te tupuga mai ia Aperaamo, i na tatou savavali ia i ona tulaga aao ma ia faaagavaaina i tatou lava mo folafolaga, ia tatou naunau atu e fesoasoani i e ola ma ua oti, ma saili atu e faamanuia ma ia aoga, ia tatou sii a’e ma faamamalu i latou uma o loo siomia ai i tatou; ina ia tatou taufai fiafia faatasi ma faaeaina i mataupu faavae lava ia e tasi, ua uma ona faailoa mai mo le manuia o tagata uma. …

Pe a na o a’u o se Epikopo—ou te le iloa po o le a la’u mea e fai, ae ou te iloa le mea e tatau ona ou faia. E tatau ona faapea atu, Tama e, ua e tuuina mai se aofaiga o agaga i la’u tausiga; fesoasoani mai ia te au ina ia ou vaaia mea o latou manaomia i la le tino, ma siitia foi lo latou soifua solo lelei faaleagaga, ma ia ou mautinoa o loo aoaoina lelei i tulafono o le ola: fesoasoani mai foi ia te au e aoao faiaoga o loo asiasi atu i tagata, ina ia latou o atu ma loto ua faatumulia i le Agaga Paia, e faamanuia ai i tagata, ma faatasi ai ma le fesoasoani a o’u uso, ia avea a’u ma se Faaola ia i latou. O le lagona lena e tatau ona ou maua pe ana fai o a’u o se Epikopo; o le ala foi lena e tatau ona lagona e outou na Epikopo ma faatino ai, ma ia faia ma le lotomaualalo faatasi ma se faanaunauga ia faia mea lelei. Ma, afai foi o au o se Ositaulaga, Aoao, po o se Tiakono, ma o loo ou fealuai foi o se faiaoga i tagata, e tatau foi ona ou manao e vaai faalelei lo latou soifua solo lelei.¹⁴

[Sa fetalai Iesu], “Simona e, le atalii o Iona, pe sili mai lou alofa ia te au, i lo i latou nei? Ua fai mai o ia ia te ia, Ioe, le Alii e, ua e silafia ou te alofa ia te oe.” Afai e te alofa mai ia te au, afai o oe o sa’u uo ma so’u soo, “Ia e fafaga i a’u Tamai Mamoe.” Sa le faigata ona fai lena mea; sa valaauina o ia mo lena faamoemoega. “Ua toe fetalai atu faalua o ia ia te ia, Simona e, le atalii o Iona, pe e te alofa mai ea ia te au? Ua fai mai o ia ia te ia, Ioe, le Alii e, ua e silafia ou te alofa ia te oe. Ona fetalai atu lea o ia ia te ia, Ia e leoleo i a’u Mamoe.” Ua fetalai faatolu atu le Faaola ia Peteru, ma sa ia tali atu foi e pei o le taimi muamua, ona fetalai atu ai lea o ia, “Ia e Fafaga i a’u Mamoe.” [Tagai Ioane 21:15–17.] O le a le tiute o Aposetolo; o Peresitene o Siteki, o Faitaulaga Sili, ma Fitugafulu, aemaise i latou e masani ona pulefaamalumalu? Pe a na fai o i ai Iesu iinei, semanu o le a fetalai atu e tuu ese o outou manatu faavalevalea, o mea e le auga, ma o outou vaivaiga, ae amio faatagata matutua ma Tagata Paia ma o e galulue ma “Fafaga a’u Mamoe.”¹⁵

E tuu mai e le Atua le mana ia i latou e faalauteleina le perisitua.

Afai tatou te malamalama ia i tatou lava ma o tatou tulaga, e tatau ona tatou faamuamua le malo o le Atua ae faamulimuli i tatou lava. A mafai ona tatou aoao e faataunuu sina mea laitiiti, atonu o le a fetalai mai le Alii ia i tatou e fai se galuega e sili atu ona tele, aua ua tatou saunia e faia… .Afai o i tatou o le nuu o le Atua, ma ua ia faatuatuaina i tatou e faataunuuina nei faamoemoega tetele, e tatau ona tatou faaopoopo teisi atu nisi mea tatou te faia nai lo mea ua uma ona fai, ma e tatau ona tatou naunau ma usiusitai i faatonuga a le Alii ma ana auauna, o e ua ia tofia e taitai i tatou. Afai tatou te faia lenei mea, o galuega uma lava tatou te faia, o le a manaia ma tatou fiafia i ai, o le a tutumu o tatou loto i le filemu ma o le a i ai foi le manuia o le Atua i o tatou fale; e faamalumalu foi le Agaga o le Alii i o tatou luga, ma o le a tutumu o tatou loto i le olioli ma fiafia ai i le aso atoa, ma seia iu lenei olaga. Ou te le iloa lava se isi ala e faataunuu ai lenei galuega, ua na o le aoaoina e le Alii, ma o le faamoemoega foi lena na ia faatulagaina ai lona perisitua paia.¹⁶

E tele naua tiutetauave ua tuu mai i ositaulaga, o aoao, ma tiakono, ma i latou o le perisitua maualalo, e pei foi o soo se tagata o le ekalesia. Pe a latou le faataunuuina o latou tiute, o le a le mea e tupu? O le a o atu tagata i le toasefululua, po o le Au Peresitene Sili; latou te le o i o latou taitai e pito atu; ona tula’i mai ai lea o le fenumiai ma le le faatulagaina lelei; ma ua le faaaoga tatau ai le taimi taua;…ae e ala ona tulai mai le fenumiai ma le le faatulagaina lelei, ona e le iloa e tagata o latou tiute, ma latou te le faataunuuina foi [o latou tiute].

Ae a o tatou fetotoa’i i nai mea iti, o le a le mea e tupu ia i tatou? Ua tatou le iloa o tatou valaauga; ua galo ia i tatou sa faatuina lenei malo i luga o le fogaeleele mo le faamoemoe e folasia mai ai le amiotonu ma tulafono o le lagi, i luga o le fogaeleele, ma le manuia o le tagata ma le faaolaina o e ola ma e oti. Ua galo ia i tatou le mea na tatou o mai ai iinei, ma le mea na mafua ai ona faatuina le malo o le Atua. E le mo oe, po o au po o se isi lava na o ia; e mo le manuia o le lalolagi ma le faaolataga o le tagata. O i tatou uma lava, ua faamoemoe, ia tatou faia o tatou tiute eseese ma a tatou matafaioi ua tuu mai i o tatou luga. Afai tatou te faatuatuanai i ai, pe le ta’usalaina ea i tatou i luma o le Atua? E mai fea ea faigata tatou te feagai? Aua e pei lava ona ou fai atu i le tele o taimi, o perisitua e le faia o latou tiute, e le mataala ma e le faamaoni foi.¹⁷

Ua ou maitauina i nisi o a’u malaga, i latou, e pei o soo o Iesu i aso anamua, e faaalia lo latou naunautai mo le malosi po o le mana, ma faaalia foi se naunautaiga e iloa pe o ai o i latou e aupito sili. O le faavalevalea lena mea, aua o le mamalu e le maua mai i le tofiga, ae e faaalia e se tagata na te faalauteleina lona tofiga ma le valaauga. Afai e i ai so tatou mamalu e maua mai pe ala mai foi i le perisitua, e mai le Atua ia, ma ua tatou faalialiavale moni lava pe a tatou gugutu i se meaalofa e le o so tatou tiute le aumaia, ua na o le taliaina. Afai e aumai mai le Atua, e ao foi la ona ia te ia le mamalu, ae le o i tatou, ma o le faalauteleina o o tatou valaauga, ua na o le pau lea o le ala e mafai ai ona tatou maua le mamalu po o le mana.¹⁸

Fautuaga mo Suesuega ma Talanoaga

O le a le perisitua a le Atua? O a faamanuiaga o i ai mo i tatou e ala i le perisitua? O le a sou lagona pe a e manatu ua tuuina mai e le Atua i le tagata, le mana o le perisitua?
O le a se mea e mafai ona fai e tagata taitoatasi o le aiga, e faamalosi ai le mana o le perisitua i le aiga?
E taua i se a ona maua pea lava pea e i latou o umia le perisitua, le taitaiga mai le Alii?
E fesoasoani faapefea le perisitua e “faaola, laveai, faaeaea, ma faamamalu le tagata”?
Ua faamanuiaina faapefea oe ma e pele ia te oe ona o le faaaogaina ma le amiotonu o le perisitua? E mafai faapefea e tamaitai ona maua faamanuiaga o le perisitua?
O a ni avanoa mo auaunaga faaleperisitua i lo outou eria? O a mea e mafai ona faia e i latou e umia le perisitua e fesoasoani ai i le faamalolosia o aiga e leai nisi o umia le perisitua?
Faitau le MFF 84:33–34. O le a le uiga o le faalautele o se valaauga po o se tofiga o le perisitua? O le a le uiga o le faalautele o soo se valaauga i le Ekalesia? E mafai faapefea ona tatou fesoasoani ia i latou i a tatou uarota po o paranesi, o e o loo taumafai e faalautele o latou valaauga?

O Mau e Faatatau I Ai: 1 Korinito 4:20; 1 Timoteo 4:12–16; Iakopo 1:18–19; MFF 58:26–28; 84:18–21, 26–27, 33–34; 107:99–100

Jesus bestowing priesthood — E tatau i e o umia le perisitua ona manatua le punavai o le mana uma o le perisitua. E faapei ona aoao mai e Peresitene Teila, “Afai e i ai so tatou mamalu e mai le perisitua pe ala mai foi i le perisitua, e mai le Atua ia.”