Mataupu 24

O Le Malo o le Atua

Ua tatou faataatiaina le faavae o se malo o le a tumau e faavavau;—o le a ola talaulau i le olaga nei ma fuga tele mai i le faavavau. Ua tatou i ai i se galuega e sili atu nai lo se isi mea e gauai atu i ai tagata soifua.¹

Mai le Soifuaga o Ioane Teila

Na matua talitonu Ioane Teila o le a faatuina le malo o le Atua i le lalolagi. Sa malamalama o ia, e le faalagolago lenei galuega i le Perofeta o Iosefa Samita po o se isi lava tagata, ae e taitaiina atoatoa e le Alii. Ma sa saunia o ia e puipuia lenei taumafaiga i lona lava ola.

I le 1838, ina ua faatoa uma ona tofia o ia i le Korama a le Toasefululua, sa malaga atu Ioane Teila i Sisifo Mamao, i Misuri, e faatasi atu i le Au Paia. I lana malaga, sa faatulagaina ai se taimi e lauga ai i se faapotopotoga e latalata i Kolumpasa, i Ohio. Ae toeitiiti oo i le taimi na atofaina, sa o mai nisi uso ma se tala ua i ai ni tagata ua faapotopoto i le mea e fai ai le fonotaga, ua latou taupulepule e vali ta Elder Teila ma faapipii i ai fulumanu. Sa fautuaina o ia e nei uso, e aua nei faataunuuina le fonotaga aua e toatele atu tagata taupulepule leaga nai lo i latou, ma o le a le mafai ona latou puipuia o ia. Peitai, sa tumau pea le manao o Elder Teila e alu atu ma tala’i atu e pei ona sa fuafuaina, ma o le a alu lava tusa pe alu na o ia.

Ina ua taunuu o ia i le potopotoga tele sa o mai e fia faalogologo ia te ia, sa amata i lona saunoa atu e uiga i lona faatoa malaga mai atunuu e pulea e ni tupu. Sa ia ta’u atu ia te i latou le tulaga faamamaluina sa ia lagona ina ua tu i se laueleele saoloto. I lona ta’ua o le auala na maua ai lena saolotoga, na ia saunoa ai: “Afioga e, ua ou tu nei i luma o se faapotopotoga, o o latou tuaa sa tauivi ma latou maua ai se tasi o faamanuiaga aupito silisili ua faaee i luga o le fanauga a tagata—o le aia tatau lea e mafaufau ai, e tautala ai, e tusitusi ai; o le aia tatau e fai atu ai pe o ai e pulea i latou, ma le aia tatau e tapuai atu ai i le Atua e tusa ai ma uunaiga a o latou lava mafaufau manino—o ia aia tatau uma e paia, o aia tatau a tagata soifua, ma ua faamaonia nei e le Faavae o Tagata Amerika. Ua ou vaai atu nei i alo o na tamalii, o e na tuuina atu lo latou soifua, o o latou tamaoaiga ma mamalu paia e uunaia ai gaoioiga mo le saolotoga, tusa pe oti ai ia latou taumafaiga, nai lo le usitai i poloaiga a se pule saua, ia latou olioli i le saolotoga, ma tuufaasolo mai ai i a latou fanau.”

Sa faaauau le saunoaga a Elder Taylor: “E le gata i lea, ae ou te fia ta’u atu foi, ua uma ona faailoa mai ia te au o loo outou fuafua e vali ta a’u ma faapipii i ai fulumanu, ona o o’u manatu faalelotu. Pe o le faamanuiaga ea lena na outou maua mai i o outou tuaa? Pe o le faamanuiaga ea lenei na latou faatauina i le toto faapelepele o o latou fatu—o lo outou saolotoga lenei? Afai o lea, ia le tagata lenei, ma o le a fai ai se tatou taulaga i le atua tamaitai o le saolotoga.”

Ina ua uma ona ia saunoa atu i lena mea, sa ia saeia lona taoofu ma alaga: “O mai la’ia ma a outou ta ma fulumanu, ua ou sauni; ae se’i silasila mai i ai agaga o tagata lotonuu totoa ua lagomau i tia sa, i a outou fanau le magafagafa! O mai loa, alii! O mai la’ia, o lea ua ou sauni!” Sa malolo Elder Teila mo ni nai minute, ae ua le toe magagana se isi pe gaioi. Ona faaauau ai lea o lana saunoaga, ma tala’i atu i tagata ma le lototoa ma le mana mo le tolu itula.²

Sa ta’ua e Elder Matthias F. Cowley o le Korama a le Toasefululua ina ua mavae ni tausaga se tele talu ona maliu Peresitene Teila, “Sa soifua o ia, sa galue, ma sa maliu, o se faa taitaiga atoatoa o lana faaupuga e sili ona fiafia i ai, ‘O Le Malo o le Atua po o le leai.’”³

O Aoaoga a Ioane Teila

O le lalolagi o a le Alii ia, ma o Ia o le pule, faamasino, ma le tupu moni.

O ai na faia lenei lalolagi? O le Alii. O ai na te pulea? O le Alii. O ai na te fafagaina ma faalavalava le miliona ma miliona o le fanauga a tagata o loo i ai, e le gata i le Au Paia ae faapea foi ma e agasala? O le Alii. O ai e pulea mea uma i le atulaulau? O le Alii. … O ai na tuuina le malamalama i le tagata? O le Alii. O ai na tuuina i le tagata ese le tofamanino, le fai masini, ma isi mea., vaega eseese o le atamai ua latou maua e faatatau i telekalafi faaeletise, o le paoa ma lona faaaogaina e tusa ma mea e mananao i ai le fanauga a tagata ma ituaiga uma o mea fou ua gaosia ma alia’e mai i le senituri talu ai? O le Alii. … O ai e i ai le aia tatau e pulea ai atunuu, e pulea ai malo ma pulea ai tagata uma o i lalolagi? ⁴

O lenei lalolagi o le nofoaga, ma le tofi moni o le Au Paia. Talu ai ona e o Iesu Keriso ia, o mea foi a ana auauna ma ona soo, aua ua ta’u mai ia te i tatou, “O le lalolagi ma mea ua tumu ai, o a Ieova ia,” [Salamo 24:1] ma pe a i ai mea i lo latou tulaga sa’o, “e maua le malo e le Au Paia a le Silisili Ese,” [Tagai Tanielu 7:18, 27.] O lona uiga, o lo latou tofi moni. ⁵

O Tusitusiga Paia…o le sui o Keriso o lo latou tofi moni lea, ma o le e ona lenei lalolagi; ua latou suitulaga ia te ia o le na afio mai e togiolaina agasala a le lalolagi; ma o le a toe afio mai i se taimi mulimuli e fai ma pule, faamasino, ma le tupu.⁶

O le Ekalesia o le sui vaaia o le folasaga mai o le malo o le Atua i le lalolagi.

O le malo o le Atua, o lona uiga o le faigamalo o le Atua. O lona uiga, o le mana, pule, aia faaletulafono, ma tagata e pule ai. Peitai, o le a le faataunuuina lena mataupu faavae, e le mafai lava ona faataunuuina atoatoa, sei vagana, e pei ona ta’u mai i tusitu siga paia, ua avea malo o lenei lalolagi ma malo o lo tatou Alii ma lona Keriso, ma o le a ia pule ai [tagai Faaaliga 11:15], ma pe afai e tootutuli tulivae uma ma ifo atu, ma ta’uta’u atu e laulaufaiva uma o ia o le Keriso [tagai MFF 88:104], ma avatu le viiga i le Atua, le Tama. E le’i oo mai lena taimi, ae o loo i ai mataupu faavae patino e faasino i ai, ua oo mai; e pei o le folasaga mai o lena malo, ma le folasaga mai o lena malo e na o Ia, o le Tupu ma le Pule e mafai ai, ma o le Ulu foi o lena faigamalo. E muai faafesootai mai lona finagalo, o ana mataupu faavae, o ana poloaiga, o lana faigamalo i tagata. A leai, o le a tatou le iloaina po o a ana poloaiga.⁷

O le a le mea muamua e tatau ai mo le faatuina o lona malo? O le faatuina mai lea o se perofeta na te folafolaina atu le finagalo o le Atua; o le mea e sosoo ai o le i ai lea o se nuu e usiusitai i le Alii e ala i lena perofeta. Afai e le mafai ona maua nei mea, e le mafai lava ona outou faatuina le malo o le Atua i le lalolagi.⁸

Sa finagalo le Atua e folasia mai lona malo i le lalolagi, ma o le mea muamua, sa tatau ona ia faatuina lana ekalesia, ina ia faatulaga lelei ai lona nuu sa ia faasalalauina i atunuu ma toe faapotopoto mai ai, ina ia tasi le lafu ma le leoleo mamoe e toatasi [tagai Ioane 10:16], ma le Alii e toatasi, tasi le faatuatua, ma le papatisoga e tasi, ma le Atua e toatasi, o le e tatau ona i ai i mea uma ma tagata uma [tagai Efeso 4:5–6], ma e tatau ona pulea ai mea uma. Ina ia mafai la ona faataunuu lea faamoemoega, o lea na ia faatulagaina ai lana perisitua paia e pei ona i ai i le lagi.⁹

Tatou te talanoa i nisi taimi e uiga i le Ekalesia, aisea? Tatou te talanoa e uiga i le malo o le Atua, aisea? Aua a’o le’i mafai ona i ai se malo o le Atua, e tatau lava ona i ai se ekalesia a le Atua, ma o lea e manaomia ai uluai mataupu faavae o le talalelei e talai atu ai i nuu uma, e pei ona sa faia ai e le Alii o Iesu Keriso ma isi i le lalolagi i aso ua mavae. Ae pe aisea? Aua e le mafai ona folasia atu le tulafono a le Atua i se nuu e le usitai ma taitaia e le agaga o faaaliga.¹⁰

E le mafai ona fausia e le Atua se malo i le lalolagi sei vagana ua i ai sana ekalesia ma sona nuu ua gauai atu i ana tulafono, ma ua naunau e usitai atu i ai; ma o totonu o se faalapotopotoga a sea nuu, e faapotopoto mai atunuu uma o le lalolagi i lalo o le taitaiga a se tagata e musuia e le Atua, le fofoga taumomoli o Ieova i lona nuu; ou te fai atu, o lena faalapotopotoga, o loo i ai se avanoa e faaali mai i ai le Alii le Atua, o loo i ai se avanoa e faaalia mai i ai tulafono o le ola, o loo i ai se avanoa mo le Atua e folasia mai ai mataupu faavae o le lagi i le lalolagi, ma faia ai le finagalo o le Atua i le lalolagi e pei ona faia ai i le lagi. ¹¹

O le a faatuina atoatoa e Iesu Keriso Lona malo ma nofotupu ai i le lalolagi.

“Ia oo mai Lou malo.” [Mataio 6:10.] … Sa aoao atu e Iesu le mea lenei i ona soo ina ua latou o atu ia te ia ma faapea atu, aoao mai i matou i le tatalo. … Ia oo mai lou malo. O le a le malo? O le a le uiga o le “ia oo mai lou malo”? O lona uiga o le pule a le Atua. O lona uiga o le tulafono a le Atua. O lona uiga o le faigamalo a le Atua. O lona uiga o tagata ua faalogo, ma ua naunau e faalogo, ma tausi poloaiga a Ieova. O lona uiga foi, o loo i ai se Atua ua naunau e taiala ma faatonutonu ma lagolago lona nuu. Ia oo mai lou malo, ina ia faatuina ai lau faigamalo, ma ia mafai ai ona tuu atu i tagata mataupu faavae o le upuoni e faavavau e pei ona i ai i le lagi; ma pe a tuu atu foi i tagata, ona mafai ai lea e na tagata ona usitai i na tulafono ma lena faigamalo, ma ola matatau ai i le Atua, ma tausia ana poloaiga ma i ai i lalo o lana taitaiga. Ia oo mai lou malo, ina ia le toe i ai se faanunununu, o le faatiapolo, ma le amioleaga, o le fasioti tagata foi ma le faamaligi toto o loo i ai nei i tagata, ma ia mau foi ma i tatou mataupu faavae o le upumoni ma le sa’o, o mataupu faavae o le agalelei, agaalofa, ma le alofa e pei ona i ai i le finagalo o Atua. ¹²

Ua uma ona ou faamatala atu … o le a faatuina moni lava le malo o le Atua i le lalolagi. O le a le pei o se ata aitu, e pei o faamatalaga a nisi faapea ua latou maua ni faaaliga, ae o se mea moni atoatoa. O le a faatuina, e pei ona ta’ua muamua, i se fogaeleele moni, ma o le a i ai tane moni, o fafine, ma tamaiti; o tagata soifua o le au paia o e tausia poloaiga a le Atua, ma faapea foi tino toetutu o le a toe tutu moni mai lava mai tuugamau, ma ola ai i le fogaeleele. O le a nofotupu le Alii i le lalolagi atoa, ma o le a i ai moni tagata uma i lalo o lana puleaga, ma o le a faailoa atu e nuu uma i lalo o le lagi lana pule, ma ifo atu i lona tootoo. O i latou e auauna atu ia te ia i le amiotonu o le a fesootai ma le Atua, ma Iesu; o le a i ai foi le auaunaga a agelu, ma o le a latou iloa le taimi ua tuanai, o le taimi nei, ma le lumanai; a o isi tagata, e le usiusitai atoatoa atu i ana poloaiga, pe aoaoina atoa foi i ana feagaiga, e tatau ona matua usitai atu ma le atoatoa i lana faigamalo. Aua o le nofoaiga a le Atua i le lalolagi, o le a ia faamalosia ana tulafono, ma ua poloaiina o le a usitai mai nuu uma o le lalolagi o lana aia tatau tonu lava lea. O le a le faatagaina Satani e pulea ona tagata, aua o le a avea le Alii le Atua ma tupu i le lalolagi uma, ma o le a tuuina atu i le au paia le malo ma le silisili ese o le malo i lalo o le lagi.¹³

O le a le aafiaga o le faatuina o le malo o Keriso, po o le nofotupu o leAtua i le lalolagi?…O le a le toe i ai ni taua, faamaligi toto, faanoanoa, faama’i, ma agasala, ma o le oo mai se ma lo o le filemu, amiotonu, faamasinoga tonu, fiafia, ma le tamaoaiga. O le toefuataiina o le fogaeleele ma le tagata i lona muai mamalu ma le silisiliese sa i ai; o le mea moni, o le toefuataiina mai o mea uma sa tulei i ai perofeta uma talu ona amata le lalolagi [tagai Galuega 3:21].¹⁴

Ua valaauina e le Alii Ona Au Paia e fesoasoani i le faatuina o Lona malo.

Sa amata ona talanoa mai se alii Falani ia te au, ma sa ia fia iloa pe o mafaufau le au paia e faataunuu se mea ofoofogia i le lalolagi? Sa ou ta’u atu ia te ia, na tatou o mai e folafola atu le talalelei i le lalolagi; ma ua tau atu i tuluiga o le lalolagi. E le o se galuega e faia na o sina tulimanu itiiti, ae o le a aofia ai le olaga atoa e oo atu i le faavavau. O le a toe foi lava i le faavavau, ma aumaia i latou ua fia afe tausaga talu ona maliliu, i le malo o le Atua. O le a liligi mai ai faamanuiaga i augatupulaga o le a oo mai, ma o le mea moni o le a soofaatasia le lagi ma le lalolagi, ma o le a faataunuuina lenei mea i le suafa o le Atua o Isaraelu. O le a fesoasoani mai mana o le lagi, ma o loo au faatasi o tatou tama i le lalolagi faavavau ma i tatou; aua ua ia te i tatou le folafolaga o le olaga lea ua i ai nei, ma le olaga a sau.

O lea ua faatoa amata la tatou galuega mamalu. A o gasolosolo aso, o le a tatou faataunuuina lava mea uma na tulei mai i fofoga o perofeta anamua. … O le a tatou agai pea i luma uso e, ae tatou te le suesue i o tatou lava manaoga po o autu, ae ia faataunuuina faamoemoega viia o le Atua. … E ao ona agai i luma le mana o le upumoni, e tatau ona motusi filifili o le pouliuli, ma e tatau ona fausia le malo o le Atua, ma e leai se mana e mafai ona taofia.¹⁵

Ua tele tausaga o tatou talanoa e uiga i tulafono ma le faigamalo o le malo o le Atua ma lona toe fausiaina i luga o le fogaeleele, i le filemu ma le amiotonu; faapea foi le taimi o le a faalogoina ai mea ola uma o i le lagi ma le lalolagi, ma lalo o le lalolagi, ma le sami o faapea mai, “Ia ia te ia o le tietie i le nofoalii atoa ma le Tamai mamoe le faamanu, ma le faaneeneega, ma le viiga, ma le malosi e faavavau faavavau lava.” (Faaaliga 5:13.) Sa tatou talanoa i nei mea, peitai e anoanoai mea e tatau ona fai i le va o le taimi lenei ma lena vaitau e faigata ona malamalama i ai i le lumanai. E le faapea ua na o se mataupu o le faatuatua, ae i ai ni faatinoga e manaomia; o se mea e ao ona tatou faia e i tatou lava, e le gata o tagata taitasi ae faapea foi le faia faatasi o se nuu, ma o se mataupu e matua taua tele.¹⁶

E tele le tatou misiona e tatau ona fai—e tatau ona tatou taumafai e pulea i tatou lava e tusa ai ma tulafono o le malo o le Atua, ma o se tasi o galuega e sili ona faigata, o le aoao e pulea i tatou lava, o faanaunauga faaletino, o a tatou fuafuaga, o a tatou amio masani, o o tatou lagona, o o tatou olaga, o o tatou agaga, o a tatou faamasinoga, ma aumaia uma o tatou manaoga ia gauai atu i le tulafono o le malo o le Atua ma le agaga o le upumoni. O se mea taua tele le galulue i le fausiaina o le malo o le Atua— o se amataga o mea ua tatou faia iinei.¹⁷

Matatau i le Atua; galulue i galuega a e amiotonu; ola i o outou talitonuga faalelotu; tausi poloaiga ma faalotomaualaloina outou i ona luma; ia tasi outou, ma ia lotogatasi ma le perisitua paia ma le tasi i le isi, ona ou ta’uina atu lea ia te outou i le suafa o le Atua, o le a tulai mai Siona ma susulu atu ma o le a i ai le mana o le Atua i ona luga; ma o le a faaalia mai lona mamalu, ma o le a olioli ai i le atoaga o faamanuiaga o le talalelei o le filemu; ma o le a alu pea i luma le galuega a le Atua ma faateleina seia oo ina avea malo o lenei lalolagi ma malo o lo tatou Atua ma lona Keriso [tagai Faaaliga 11:15], ma o le a faalogoina meaola uma i le lagi ma le lalolagi ma lalo ifo o le lalolagi o faapea mai, Ia ia te ia o le tietie i le nofoalii atoa ma le Tamai mamoe le faamanu, ma le faaneeneega, ma le viiga, ma le malosi e faavavau faavavau lava [tagai Faaaliga 5:13].¹⁸

Fautuaga mo Suesuega ma Talanoaga

Aisea ua avea ai Iesu Keriso ma suli moni ma pule o le lalolagi? E mafai faapefea ona faatosinaina au sootaga ma Ia ona o lenei malamalama?
E taua i se a le Toefuataiga o le Ekalesia e faatu ai le malo o le Alii i le lalolagi? O le a se mea ua e aoaoina i le avea ai o oe ma se tagata o le Ekalesia, e uiga i le sauniuni e nonofo faatasi ma le Alii? O a ni auala e mafai ai ona saofaga la tatou auaunaga i le faatuina o le malo o le Alii?
O le a sau maitau i le ola o le Ekalesia ma le atinaeina atoatoa o le malo o le Atua i le lalolagi? O le a se mea e mafai ona e faia e oe lava ia ma faapea foi lou aiga e fesoasoani ai i le faatuina o le malo o le Atua i le lalolagi?
Sa saunoa Peresitene Teila i uiga i faamanuiaga silisili o le a tatou olioli ai pe a toe foi mai le Faaola e nofo tupu i Lona malo i le Meleniuma. Mata o le a faapefea le olaga i le lalolagi i le taimi o le Meleniuma? (Tagai foi i le MFF 29:11; 43:29–32; 101:22–35; Mataupu Faavae o le Faatuatua 1:10.)
O le faaupuga e tautu i ai Peresitene Teila lava ia o le “O le malo o le Atua po o le leai!” O a ni faataitaiga ua e vaaia i tagata e i ai foi lea lava talitonuga maumaututu? O le a le uiga o lea faaupuga ia te oe? Mata o le a le mea e oo i ai pe afai tatou te avea lenei faaupuga mo i tatou foi, o tagata o le Ekalesia?

O Mau e Faatatau I Ai: Tanielu 2:26–45; Mataio 6:33; MFF 45:1; 65; 104:58–59

John Taylor and men — Na oo lava ina faafesagai ma tagata tetee, sa tautino atu ma le lototoa e Ioane Teila le upumoni ma sa galue e aunoa ma se malolo, i le faatuina o le malo o le Atua.

Jesus Christ — Pe a toe afio mai Keriso e faatu Lona malo i le lalolagi, o le a Ia aumaia “se malo o le filemu, amiotonu, faamasinoga tonu, fiafia, ma le tamaoaiga.”