Mataupu 16

Faamalolosia o a Tatou Sootaga ma le Atua

E sili ia te au le avea o le Atua ma a’u uo nai lo isi faatosinaga uma ma mana e le ni o le Atua.¹

Mai le Soifuaga o Ioane Teila

Sa i ai ia Ioane Teila se alofa loloto ma le patino mo lo tatou Tama Faalelagi. Na te ta’ua o Ia o “o lo tatou tama, uo ma le faalagolagomaga.” Na ia saunoa, “Tatou te faalagolago i lona aao, ma e matou te iloa o le a ia taitai ma faatonu i tatou, na te uunaia ma pulea mea e faia e lona nuu, o le mea lea, tatou te faalagolago ai ia te ia.”²

I le molimauina o le alofa o le Atua ma le atugaluga mo Ana fanau, o lea na ta’ua ai e Peresitene Teila: “E leai se tagata i lenei lalolagi ua tuu atu lona faatuatuaga i le Atua, e le mafai ona faapea mai e le’i laveaiina o ia e le Atua, ou te le popole po o fea le vaega o le lalolagi sa i ai. Ou te iloa o le tulaga lea, aemaise lava o au. Sa faamalieina au, a o ou i ai i atunuu ese, sa leai se mea ou te liliu i ai, ua na o le Silisiliese, sa ma faatasi ma ia, ma ou te iloa sa ia tali mai i a’u tatalo.”³

O lenei faatuatuaga [o Peresitene Teila] i le Atua, sa molimauina i le 1839, ina ua malaga atu Elder Teila ma Uilifoti Uitilafi mo se misiona i Atumotu o Peletania. Sa matua gasegase tigaina Elder Teila i le malaga mai Navu i Niu Ioka, i le mea e pu’e ai le vaa mo Egelani. Sa tuutuuloa le malaga a Elder Uitilafi i Niu Ioka e faatali mai ai mo Elder Teila, o le sa faatuatuai lana faigamalaga ona o lona gasegase.

Ina ua taunuu Elder Teila i Niu Ioka, sa naunau Elder Uitilafi e tuuvaa ese loa lava, ma o lea sa alu atu ai loa lava ma totogi lona pasese mo Egelani. E ui lava ina sa leai se tupe a Elder Teila, ae sa ia fai atu ia Elder Uitilafi, “Ia, Uso Uitilafi, afai e te manatu e sili ona ou alu, o le a ta o.” Sa fesili Elder Uitilafi pe o fea a maua mai ai e Elder Teila se tupe e pasese ai, ma o lea sa tali atu ai Elder Teila: “Oi, e leai a se faigata o lena mea. Alu e faatonu so’u avanoa i le vaa lena e te alu ai, ae o le a ou avatua le tupe.”

Sa lagona e Uso Theodore Turley le talanoaga a Elder Teila ma Elder Uitilafi, ma sa ia fai atu foi e manao e malaga ma Aposetolo, ma sa ofo atu e fai o ia ma a la’ua kuka, e ui foi ina leai sana tupe. O le tali i le manao o Uso Turley e fia auai foi i le galuega, o lea sa fai atu ai Elder Teila ia Elder Uitilafi e faatonu ma se avanoa o Uso Turley.

E le’i umi, ae saunia e le Alii tupe mo le malaga. Sa tusia e Elder B.H. Roberts o le Fitugafulu: “I le taimi na faia ai nei fuafuaga, e leai se tupe a Elder Teila, ae sa musumusu atu le Agaga [ia] te ia o le a maua le tupe, ma e le’i i ai lava se taimi e le’i taunuu ai musumusuga a lena leo lemu ma le itiiti! Sa faalagolago [Elder Teila] i lena leo ma e le’i ‘asa lava. E ui lava ina sa le’i ‘aisi o ia i se tagata mo se pene, ae na ofo atu e ni tagata ni tupe na totogi ai lona pasese faapea foi Uso Turley, e leai ma se tupe na sili.”⁴

O Aoaoga a Ioane Teila

O le Atua o lo tatou Tama, ma e tausi e Ia ma faapelepele i tatou e pei ona faia e se tama.

E le o ta’u mai…e lo tatou talitonuga faalelotu se Atua e faapea o se tagata e soona ‘ina’ina e le mafai ona tatou faalatalata atu i ai, ae o loo ta’u mai o ia o lo tatou Tama, ma o i tatou o ana fanau, ma na te teulotoina se alofa faatama mo i tatou; ma ua tatou iloaina ni lagona i le va o le tama ma se atalii, tina ma le tama teine, o matua foi ma fanau.⁵

O le a se lagona o le Atua i le fanauga a tagata? Na te lagonaina o i latou o ana fanau. O lona uiga la o tagata uma? Ioe, o le paepae, o le meauli, o le mumu, o le Iutaia, o le tagata ese, o le faapaupau, o le Kerisiano, ma ituaiga tagata uma. E alofa o ia i tagata uma. Na faia lava e Ia mai le amataga ma o le a faia pea lava e oo i le iuga. O le a Ia faia mea uma na te mafaia mo le manuia, fiafia, ma le faaeaga o le fanauga a tagata, e le gata i le olaga nei ae faapea foi ma le faavavau.⁶

O i tatou uma o fanau a le Atua. O Ia o lo tatou Tama ma ua ia te ia le aia tatau e taitai i tatou, e le gata ia i tatou, ae ua ia te ia foi le aia tatau atoatoa e pulea ai mataupu a le fanauga uma a tagata o loo i ai i luga o le fogaeleele aua o i latou uma o ana fanau.⁷

O le faamoemoega o le Atua, ia manuia ai le tagata i mea uma na te mafaia i Lona mana. Tatou te talanoa i nisi taimi e uiga i le faagaoioiina o le lagi ma le lalolagi mo le faataunuuina o lena faamoemoe. … E naunau le Atua i lo tatou ola solo lelei, ma ua Ia faatuina tulafono mo lena faamoemoe. Ua ia folasia mai le Talalelei o le faavavau mo lena faamoemoe; ma ua Ia toefuataiina mai le Perisitua Paia sa i ai anamua, faatasi ai ma mataupu faavae uma, o faamanuiaga, o mana, ma le faiga o sauniga, o sauniga, ma avanoa sa i ai i le lalolagi mai le amataga.⁸

Afai tatou te malamalama sa’o ia i tatou lava, e tatau ona tatou tilotilo ia i tatou lava o ni tagata o le faavavau, ma le Atua o lo tatou Tama, aua ua aoaoina i tatou ia tatou faapea atu pe a tatou tatalo, “Lo matou Tama e, o i le lagi, ia paia lou suafa.” [Tagai Mataio 6:9.] E i ai o tatou tama i la le tino, o e e aoai mai ia i tatou, tatou te faalogo i ai; ae e le sili ea i se a ona tatou usiusitai i le Tama o o tatou agaga tatou te ola ai.” [Tagai Eperu 12:9.] Ou te le tau avatua se faamaoniga e faatatau i lenei mea, aua ua malamalama lelei uma i ai le au paia, o le Atua o le tama o o tatou agaga, ma a oo i le taimi tatou te toe foi atu ai i lona afioaga, o le a tatou iloa o ia, faapei ona tatou iloa o tatou matua faalelalolagi. Ua aoaoina i tatou e faalatalata atu ia te ia e faapei ona tatou faia i o tatou matua faalelalolagi, e fesili atu ai ia te ia mo faamanuiaga tatou te manaomia; ma ua ia fetalai mai “o ai foi se tagata o outou pe a ole mai lona atalii i se areto, na te avane ea ia te ia se maa, a ole mai foi i se i’a, na te avane ea ia te ia se gata? O outou e leaga, afai ua iloa e outou ona avatu o mea lelei ma a outou fanau, e le sili ea ona foaiina mai e lo outou Tama o i le lagi o mea lelei i e ole atu ai ia te ia.” [Tagai Mataio 7:9–11.]⁹

O le a faamanuiaina i tatou e le Tama Faalelagi pe a tatou saili atu ia te Ia i le tatalo faamaualalo.

E tatau ona tatou lagonaina o le Atua o lo tatou Tama ma o i tatou o ana fanau, ma ua folafola mai na te faafofogaina a tatou tatalo, ma ua poloaiina i tatou ia usiusitai i lona finagalo ma faataunuuina ana fuafuaga. Ina ia maua la tali o a tatou tatalo, e tatau ona faataunuuina o tatou tiute eseese ua tuuina mai i o tatou luga, e pei ona ta’ua, ma e tatau foi ona tatou faamaoni ma faamamalu ia tatou fegalegaleaiga o le tasi i le isi. Afai tatou te taumafai e taufaavalea i lo tatou uso po o se tagata, e mafai la faapefea ona tatou faamoemoe e faamanuiaina i tatou e le Atua i lena mea, aua o [lo tatou uso] o ia foi o se atalii o lo tatou Tama Faalelagi e faapei foi o i tatou… E manatu tele foi le [Atua] i lona soifua solo lelei, ma afai tatou te taumafai e faaaoga le avanoa e faamanu’a ai le atalii o le Alii; tou te manatu ea o le a fiafia mai [le Alii] ia te i tatou?¹⁰

Ua faamanatu mai ai ia te au le taimi o lo’u tamaitiiti. I le popofou o lo’u olaga, sa ou aoao ai e faalatalata atu i le Atua. E tele taimi ou te alu ai i le vao ma ou lafi i tua o ni faapuloulou, ma ou punou ifo ai i luma o le Alii ma ou valaau atu ia te Ia e taitai ma faatonu au. Ma sa faafofoga mai o Ia i a’u tatalo. O nisi taimi ou te alu ai aumai ni tamaiti matou te o. E le afaina i tamaiti, ma teineiti, le valaau atu i le Alii i ni mea lilo, e pei ona sa ou faia. O le agaga lena sa ou maua a o o’u tamaitiiti. Ma sa taitaiina au e le Atua mai lea mea i lea mea. … Sa pipii atu lo’u agaga i le Atua i lena taimi; ma o loo faapena foi o’u lagona i le taimi nei.¹¹

O le a ou faamatalaina atu le mea muamua sa masani ona ou faia pe a ou alu ou te talai, aemaise lava pe a ou alu i se nofoaga [fou]—o lo’u alu lea i se nofoaga, soo se mea lava e mafai ona ou maua, o se laufanua, o se fale e teu ai meafaigaluega o se faatoaga, o le togavao, po o lo’u potu, ma ole atu ai i le Atua e faamanuia ia te au, ma aumai le poto e taulima ai tulaga uma e tatau ona ona ou faafetaia’ia; ma sa aumai e le Alii ia te au le poto sa ou manaomia ma sa ia lagolagoina au. Afai tou te tulituliloaina se faiga faapea, o le a ia faamanuia foi ia te outou. Aua tou te faalagolago ia te outou lava, ae suesue i tusi e sili ona lelei—le Tusi Paia ma le Tusi a Mamona—ma ia outou maua faamatalaga uma tou te mafaia, ona pipiimau atu lea i le Atua ma tausisia lo outou saoloto mai mea pi’opi’o ma ituaiga eseese o mea leaga, ona avea ai lea o faamanuiaga a Le Silisili mo outou.¹²

Aua nei galo ona outou valaau atu i le Alii i li’o faaleaiga, ia faapaiaina outou lava ma a outou mea uma i aso taitasi o o outou olaga i le Atua; ma saili e fai le mea sa’o, ma ia atinae le agaga o le lotogatasi ma le alofa, ona i ai lea o le filemu ma faamanuiaga a le Atua Soifua ia i tatou, ma o le a Ia taitai foi i tatou i ala o le ola; ma o le a lagolagoina ma sapasapaia i tatou e agelu paia ma peteriaka ma tagata o le Atua anamua, ma o le a saga vavala mai ai le veli i lo tatou va ma le Atua, ma o le a tatou latalata atili atu ai foi ia te ia, ma tatou saga faamanuina ai Ieova o ‘au.¹³

E tatau ona tatou faalagolago ma faatuatua i le Atua.

Ou te le talitonu i se lotu e le o i ai uma mea ou te faananau i ai, ae ou te talitonu i se lotu e mafai ona ou ola pe oti ai foi. Ou te le o talanoa i mea ou te le o malamalama ai; sa ou tauivi ma le oti, sa tulimata’ia lava a’u e le tiapolo, ma ou te le’i kea lava i ai. Pe afai ou te alu ese mai lenei faamoemoe ua le aoga atoa lava o’u talitonuga faalelotu. … E tatau ona tatou galulue i luga o le mataupu faavae sa tatou amata ai; ia faalagolago ma faatuatua i le Atua; ina ia avea lea ma mea e uunaia ai mea e fai e le tasi i le isi.¹⁴

Afai tatou te faatino la tatou vaega, e le mafai ona le faia e le Alii Lana. Talu ai e faavalevalea mea e fai e isi, o lea e le tatau ai ona tatou faataitai i ai. Tatou te folafola atu o i tatou o le Siona o le Atua, o e loto mama. Tatou te folafola atu o i tatou o alii ma tamaitai o le amio sa’o, upu moni ma le amioatua, ma faatuatua i le Atua. E le tatau ona na ona avea lenei mea ma a tatou mau, ae ia avea ma mea tatou te ola ai; e tatau ona tatou faia ma faataunuu le afioga ma le finagalo ma le tulafono a le Atua.¹⁵

O le faatuatua e aunoa ma galuega e mate [tagai Iakopo 2:17, 26], ua faamaonia o le ola i le faatuatua ma mea e fiafia i ai le Atua, ia le na o se talitonu i le Atua, ae aofia ai le faatinoina o mea e afua mai i lena talitonuga. E le na o se mafuaaga o se mea e fai, ae e aofia ai le mafuaaga ma le faatinoga. Pe a tuu foi i se isi faa upuga, o le talitonuga po o le faatuatuaga ua faaatoatoaina e galuega.¹⁶

E tatau ona tuu lo tatou faatuatuaga i le Atua, e le afaina po o a taunuuga. Pau lava le mea a tatou faia lenei mea, ma a tatou tausisia feagaiga paia sa tatou osia ma ia ma le tasi foi i le isi, o le a olioli Siona….

Ae sei ou ta’uina atu le mea e tatau ona fai, o’u uso e ma tuafafine, e tatau ona tatou matatau i le Atua i o tatou loto; e tatau ona tatou faataatia ese lo tatou loto matau’a ma lo tatou faalogogata, o lo tatou faafiapopoto ma soo se ituaiga o faavalevalea. … E tatau ona faamaualalo i tatou lava i luma o le Alii, ia salamo ai a tatou agasala, ma tausisia le mama atoatoa o o tatou tino ma agaga, e avea ma vaa ma ipu mo le Agaga o le Atua soifua, ma taialaina ai e ia i a tatou galuega uma mo e ola ma e ua oti. O o tatou faanaunauga, e ao ona faia mo le Atua ma lana amiotonu, seia oo ina tatou faapea atu e pei o se tasi anamua: Le Atua e, ia e suesue mai ia te au, ma ia e silafia lo’u loto; tofotofo mai ma ia e silafia o’u manatunatu; ma ia e silafia po o ia te au se ala e tiga ai; ma e taitaiina mai au i le ala o le faavavau [tagai Salamo 139:23–24]. O lo tatou tiutetauave lea, i le avea ai ma tama ma tina, ia o atu i luma o le Alii i le lotomaualalo atoatoa ma valaau atu ia te ia ina ia i ai lona filemu i o tatou loto; ma afai e i ai se mea sese ua tatou fai, ia ta’uta’u atu lena sese ma faaleleia i le mea sili tatou te mafaia; ma o le ala lea e amata ai ona saunia lelei e tane ma fafine uma o Isaraelu o latou aiga, ma ia atinae ai e faavavau le agaga o le filemu, le agaga o le lotogatasi ma le alofa.

Ma afai foi e faia e aiga o Isaraelu lenei mea i le laueleele uma o Siona, ma matatau tagata uma i le Atua ma galulue i le amiotonu, ma teuloto le agaga o le lotomaualalo ma le agamalu, ma tuu atu le faatuatuaga ia te ia, e leai lava se mana o i ai nei e mafai ona faamanu’alia i tatou.¹⁷

O le filemu o le meaalofa lea a le Atua ia i latou o e savavali e tusa ai ma Lona malamalama.

O le filemu o le meaalofa lea a le Atua. Tou te mananao ea i le filemu? O i le Atua. Tou te mananao ia i ai le filemu i o outou aiga? O i le Atua. Tou te mananao e puipuia o outou aiga e le filemu? Afai o lea, ia outou ola e tusa ai ma o outou talitonuga faalelotu, ona mau ai lea ma mafuta atu le filemu o le Atua, aua o iina e sau ai le filemu, ma e [le maua lava i se isi mea]….E lelei le filemu, ma ou te fai atu, e o e saili, ia teu fatu i o outou loto, i o outou tuaoi, ma soo se mea tou te o i ai i a outou uo ma paaga. Pe a tau lava ina tatou mauaina mai lena filemu mai le Atua, o le a lelei mea uma….

Pe a talanoa i taua ma faalavelave, e i ai nisi o le a faapea mai, e te le fefe? Leai, o au o se auauna a le Atua, ma ua lava lea, aua o loo faatautaia e le Atua. O au o se omea i lima o le fai omea, ia gauai atu ma savali i le malamalama o fofoga o le Agaga o le Alii, ona le afaina lava lea po o le a le mea e oo mai. E feemo uila ma papa faititili, ae o loo faatautaia e le Atua, ma e na o sina upu itiiti ou te fia fai atu ai, aua o le tupu le Alii le Atua Silisiliese, ma o le a fai pea lava lana galuega seia solia i ona aao ona fili uma, ma oo atu ai lona malo mai vaitafe i tuluiga uma o le lalolagi.¹⁸

Na o le pau lava le mea e ao ona tatou faia, o le ola lea i o tatou talitonuga faalelotu, ia usitai i fautuaga a lo tatou Peresitene, ia lotomaualalo ma faamaoni ma aua le faamaualuga i lo tatou lava malosi, ae ia fesili atu i le Atua mo le poto ma ia tatou lelei ma le Atua, o o tatou aiga, o le tasi ma le isi, ina ia i ai le filemu i o tatou loto ma o tatou alaalafaga.¹⁹

Pe tatou te ola i o tatou talitonuga faalelotu, pe a tatou savavali e tusa ma le malamalama o le Agaga o le Atua, pe a tatou aloese mai le mataga o le fai mea pi’opi’o, ma liligiina mai e le musumusuga matagofie a le Agaga o le Atua le poto i o tatou loto, ma leoleo i tatou, ma aumaia ai le filemu ma le olioli ia i tatou, ona tatou maua ai lea o sina malamalama i mea ua teuina mo e amiotonu, o iina foi tatou te lagonaina ai e pei o i tatou ma a tatou mea uma o i ai, ua i ai lea i aao o le Alii ma ua tatou saunia foi e ofoina atu i tatou lava [e fai] ma taulaga mo le faataunuuina o ona faamoemoega i luga o le fogaeleele.²⁰

O le filemu o se mea e manaomia tele; o se meaalofa mai le Atua, ma o le meaalofa silisili e mafai ona tuuina mai e le Atua i tagata soifua. O le a se isi mea e sili ona manaomia nai lo le filemu? O le filemu i atunuu, filemu i aai, filemu i aiga. E faapei o le agiagi malu mai o le savili mai sisifo, o si ona faatosinaga malu e faafilemuina ai le atuatuvale, e soloia ai loimata o le faanoanoa, ma tuliesea ai foi faaletonu mai le loto; ma a iloa e tagata uma, o le a aveesea ai le faanoanoa mai le lalolagi, ma avea ai lenei lalolagi ma parataiso. Peitai, o le filemu o le meaalofa lea mai le Atua.²¹

Fautuaga mo Suesuega ma Talanoaga

O a ni auala e faaalia mai ai e le Atua Lona alofa faatama mo i tatou? E mafai faapefea e le iloa e alofa faa-Tama o Ia mo i tatou, ona fesoasoani i taimi tatou te manaomia ai le fesoasoani faaleagaga ma le faaletino?
Aisea tatou te le faia ai ni tatalo ‘anoa masani i nisi taimi? O a ni mea e mafai ona tatou fai ia saga ‘anoa ai a tatou tatalo?
O a ni mea e mafai ona tatou aoao mai i mea na oo i ai Ioane Teila ona o tatalo? E mafai faapefea ona tatou aoao tamaiti e faalatalata i le Atua i le tatalo faapei ona faia e Ioane Teila?
E mafai faapefea ona tatou atinae lo tatou faatuatuaina o le Atua? Ua faamanuiaina faapefea oe ina ua e tuu atu lou faatuatuaga i le Atua?
O le a le uiga o le naunau e “savali e tusa ma le malamalama o le Agaga o le Atua”? E aafia faapefea lenei tulaga o le naunautai ona o le faatuatua? O a ni ala patino e mafai ona e faatinoina ai le faatuatua?
O a ni mea na e iloa ai le filemu o se meaalofa mai le Atua? Ua uunaiina faapefea e lenei filemu lou alofa mo Ia?
E mafai faapefea ona faaleleia atili le tulaga o le filemu i lou aiga?

O Mau e Faatatau I Ai: Faataoto 3:5–6; Filipi 4:6–7; 2 Nifae 32:8–9; Mosaea 4:9–10; MFF 19:23; 20:17–18; 59:23–24

woman praying — E mafai ona faamalolosia a tatou sootaga ma lo tatou Tama Faalelagi, e ala i tatalo patino e le aunoa.