Toefuataiga o le Ekalesia

Vaaiga Aoao

Ao i ai Iesu Keriso i le lalolagi, na Ia faavaeina Lana Ekalesia i totonu o Ona soo. Ina ua mavae Lona Faasatauroga ma le maliliu o Ona Aposetolo, sa aveesea ai le atoaga o le talalelei mai le lalolagi ona o le faateleina o le liliuese. Na ala mai i le Perofeta o Iosefa Samita, le toefuataiina mai e lo tatou Tama o i le Lagi ma Lona Alo o Iesu Keriso le atoaga o le talalelei. O le Ekalesia moni a Iesu Keriso ua toe i ai i le lalolagi. Ona o le Toefuataiga, ua avanoa ai i tagata uma aoaoga ma sauniga manaomia mo le faaolataga.

O le otootoga lenei ua aotele ai ni nai mea taua na tutupu i le toefuataiga o le talalelei ma le faatuina o le Ekalesia a Iesu Keriso o le Au Paia o Aso e Gata Ai, lea na folafola mai e le Alii, “le ekalesia moni ma ola e tasi i luga o le fogaeleele atoa” (Mataupu Faavae ma Feagaiga 1:30).

Amataga o le tautotogo, 1820 I le sailia o le Ekalesia moni a Iesu Keriso, na tatalo ai Iosefa Samita e 14-tausaga i se togavao e lata ane i lona aiga i Palamaira, Niu Ioka. I le tali mai i lana tatalo faamaulalo, na asiasi mai ai le Tama Faalelagi ma Iesu Keriso ia te ia ma ta’u atu ia te ia e aua nei auai i soo se ekalesia i luga o le fogaeleele i lena vaitaimi. (Tagai Iosefa Samita—Talafaasolopito 1:11–19.) I le Ekalesia tatou te faatatau i lenei aafiaga o le Uluai Faaaliga a Iosefa Samita.

21--22 Setema, 1823. Na asiasi atu se agelu e igoa ia Moronae ia Iosefa Samita. Na valoia e Moronae mea o le a tutupu ma tau atu ia Iosefa le faamaumauga o le Tusi a Mamona, o loo tusia i papatusi auro. Na faataga e le agelu Iosefa e vaai i papatusi auro, ia na tanumia i le Mauga o Kumora e latalata ane. (Tagai Iosefa Samita—Talafaasolopito 1:27–53.)

22 Setema, 1827. Na taliaina e Iosefa Samita papatusi auro mai ia Moronae i le Mauga o Kumora ina ua mavae ai le feiloaiga ma Moronae i le aso 22 o Setema i tausaga taitasi e fa talu ai. (Tagai Iosefa Samita—Talafaasolopito 1:, 53, 59.)

15 Me, 1829. Ina ua faitau e uiga i le papatisoga mo le faamagaloina o agasala ao la galulue i le faaliliuga o papatusi auro, na malaga atu ai Iosefa Samita ma lana tusiupu o Oliva Kaotui i se nofoaga tuufua e ole atu i le Alii e faatatau i lea mataupu. O iina, i auvai o le Vaitafe o Susikuana e lata i Heremoni, Penisilevania, na la maua ai le tali i le la tatalo. Na afio mai Ioane le Papatiso, o se tagata toetu ia i laua, “sa afio ifo mai le lagi se avefeau … i se ao o le malamalama.” Na ia faaee i luga o i laua le Perisitua Arona. I le mulimuli ai i ana faatonuga, na papatisoina ai e Iosefa ma Oliva ia le tasi ma le isi ma faauuina le tasi ma le isi i le Perisitua Arona. (Tagai Iosefa Samita—Talafaasolopito 1:68–72; tagai foi Mataupu Faavae ma Feagaiga 13.)

Me 1829. O Aposetolo anamua o Peteru, Iakopo, ma Ioane na faae’eina le Perisitua Mekisateko i luga o Iosefa Samita ma Oliva Kaotui. (Tagai Mataupu Faavae ma Feagaiga 128:20.)

Iuni 1829. Na taialaina “e le meaalofa ma le mana o le Atua” (Mataupu Faavae ma Feagaiga 135:3), le Perofeta o Iosefa Samita e faamaeaina le faaliliuina o le Tusi a Mamona.

26 Mati, 1830. Na maua ai i Palamaira, Niu Ioka uluai kopi na lolomiina o le Tusi a Mamona.

6 Aperila, 1830. Na faatuina le Ekalesia i le Taulaga o Feieti, Niu Ioka, na amata i le toaono tagata.

27 Mati, 1836. Sa faapaiaina le Malumalu o Katelani, o le malumalu muamua lea na fausia i lenei tisipenisione. Na ofoina atu e le Perofeta o Iosefa Samita le tatalo o le faapaiaga, lea na tuuina atu ia te ia e ala i se faaaliga. (Tagai Mataupu Faavae ma Feagaiga 109.)

3 Aperila, 1836. Na faaali atu le Faaola ia Iosefa Samita ma Oliva Kaotui i le Malumalu o Katelani. Sa faaali atu foi Mose, Elaia, ma Elia ma tuuina atu ki o le perisitua ia Iosefa ma Oliva. O Elia na aumaia ki o le mana o faamauga, lea e mafai ai mo aiga ona faamauina faatasi e faavavau. (Tagai Mataupu Faavae ma Feagaiga 110.)

Faamolemole tagai i le itulau fou o le uepi, “O Le Uluai Faaaliga,” na fatuina mo le luaselau tausaga o le Toefuataiga.

Mo faamatalaga faaopoopo, faitau le “O le Toefuata’iga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Seneturi i le Lalolagi.”

Tusifaamaumau Ou Lagona Uunai