“Talafaasolopito o Aiga,” Autu ma Fesili (2023)
Vaaiga Aoao
Talafaasolopito o Aiga
O loo mauaina ma aoao pea e talafaasolopito o aiga nisi mea e uiga i o tatou tagata o aiga ma aoina mai ma faasaoina faamatalaga e uiga ia i latou. O loo faia foi sauniga faaola mo i latou i malumalu o Le Ekalesia a Iesu Keriso o le Au Paia o Aso e Gata Ai.
O aiga o le totonugalemu lea o le fuafuaga o le fiafia a le Tama Faalelagi. Ua Ia saunia se ala mo sootaga o aiga e faaauau ai pea i le faavavau atoa. E ala i le auai i le auaunaga i malumalu ma talafaasolopito o aiga, tatou te maua ai nisi mea e uiga ia i tatou lava ma o tatou tuaa. E mafai ona tatou fesootai i o tatou tuaa i le faia o sauniga manaomia mo i latou i malumalu. Ao tatou fesoasoani i tagata o o tatou aiga ua maliliu e agai i luma i le ala o feagaiga, e mafai ona tatou faateleina le tosinaga a le Agaga i o tatou olaga ma faamalolosia a tatou molimau i le fuafuaga o le faaolataga.
E mafai foi e talafaasolopito o aiga ona faamalolosia o tatou sootaga ma tagata o tatou aiga o loo soifua. Ao tatou faasoa atu mea ua iloaina, tala, ata, ma isi manatuaga, ua tatou fausia ni sootaga ma faamalolosia le alofa i le va o tagata o o tatou aiga. I lenei tulaga, ua sili atu ai le talafaasolopito o aiga nai lo na o le toe sailiilia o igoa, aso, ma nofoaga.
Ua saunia e le Ekalesia a Iesu Keriso o le Au Paia o Aso e Gata Ai se auaunaga e le totogia, FamilySearch, e fesoasoani e fesootai ai tagata ma o latou aiga. O lenei auaunaga i le lalolagi atoa ua saunia ni meafaigaluega, auaunaga, ma tekinolosi e fesoasoani ai i tagata uma ia iloa, ao mai, ma fesootai i o latou aiga—ua tuanai, taimi nei, ma le lumanai.
Aoao atili i le ala e mafai ai ona e amata i lou talafaasolopito o aiga ma le ala e mafai ai ona ia faamanuiaina lou olaga.