Malumalu

O malumalu o maota totino moni o le Alii. O maota paia o tapuaiga e osia ai e tagata ia feagaiga paia ma le Atua. I le talafaasolopito atoa lava, na poloaiina ai e le Alii Ona tagata ia fausia ni malumalu. O loo galue le Ekalesia i le lalolagi atoa ia atili avanoa faamanuiaga o le malumalu mo se fuainumera e tele atu o fanau a le Tama Faalelagi.

Vaaiga Aoao

O malumalu o maota totino moni o le Alii. O maota paia o tapuaiga e osia ai e tagata ia feagaiga paia ma le Atua. Ona o le osia o feagaiga ma le Atua o se tiutetauave paia na’ua, o lea e le mafai ai e tagata ona ulu atu i le malumalu e maua o latou faaeega pe faamauina i le faaipoipoga mo le faavavau seia vagana ua latou saunia atoatoa i latou lava ma ua avea ma tagata o le Ekalesia ia le itiiti ifo ma se tausaga. I le talafaasolopito atoa lava, na poloaiina ai e le Alii Ona tagata ia fausia ni malumalu. O loo galue le Ekalesia i le lalolagi atoa ia atili avanoa faamanuiaga o le malumalu mo se fuainumera e tele atu o fanau a le Tama Faalelagi.

Tusifaamaumau Ou Lagona Uunai

O Nofoaga o le Aoaoina

O malumalu o nofoaga o le aoaoina. O lo latou faamoemoega autu lava o le tuuina atu lea o sauniga e manaomia mo fanau a le Atua ia mafai ai ona latou toe foi atu e mau faatasi ma Ia. O sauniga o le malumalu e taitai atu ai i faamanuiaga silisili o loo avanoa e auala mai i le Togiola a Iesu Keriso. O mea uma i le Ekalesia—o sauniga ma gaoioiga, taumafaiga faafaifeautalai, o lesona aoaoina ma viiga—e tau atu uma lava i galuega o loo faia i totonu o malumalu paia.

O le tasi sauniga e maua i totonu o le malumalu e ta’ua o le faaeega paia. O le upu faaeega paia o lona uiga o “meaalofa”, ma o le faaeega paia i le malumalu o se meaalofa moni lava mai le Atua. O le sauniga e i ai se faagasologa o aoaoga ma e aofia ai feagaiga ia ola amiotonu ma mulimuli i aoaoga o le talalelei. O le faaeega paia e taulai atu i le Faaola, Lana matafaioi i le fuafuaga a le Tama Faalelagi, ma le naunautai patino o tagata taitoatasi e mulimuli ia te Ia.

O le isi sauniga o le malumalu o le faaipoipoga faaselesitila. I lenei sauniga e faamauina ai le tane ma le ava o le tasi i le isi mo le faavavau. O se faamauga e faia i totonu o le malumalu e faaauau e faavavau pe afai e faamaoni le tane ma le ava i feagaiga la te osia.

O fanau e fananau i matua ua uma ona faamau i le malumalu ua fananau i totonu o le feagaiga. E otometi lava ona avea nei fanau ma itutino o se aiga e faavavau. O fanau e le fananau i le feagaiga e mafai foi ona avea ma itutino o se aiga faavavau pe a faamauina o latou matua moni po o matua vaetamaina i le tasi ma le isi. O le sauniga o le faamauina o fanau i matua e faia i totonu o le malumalu.

O tagata na maliliu e aunoa ma sauniga tatau ai o le talalelei e mafai ona maua na sauniga e ala i galuega i totonu o malumalu. O le faatinoina mo tuaa ma isi ua maliliu, e papatisoina ai tagata o le Ekalesia ma faamauina, mauaina faaeega paia, ma auai i faamauga o le tane i le ava ma fanau i matua.

O i latou e ulu atu i le malumalu e tatau ona agavaa, o lona uiga latou te tausia poloaiga ma saunia e osia ma tausia feagaiga paia o le malumalu. I faatalanoaga e lua—o le tasi ma se tasi o le au epikopo po o se peresitene o le paranesi ma le isi ma se tasi o le au peresitene o le siteki po o se peresitene o le misiona—e faamaonia atu ai e tagata o le Ekalesia lo latou agavaa e ulu atu i le malumalu. I nei faatalanoaga, e fesili atu le taitai perisitua e uiga i amioga patino ma le agavaa o le tagata. O i latou e agavaa e mafai ona maua se pepa faataga o le malumalu, e faataga ai i latou e ulu atu i le malumalu.

Laei o le Malumalu

Pe a o atu tagata i le malumalu, e tatau ona fai o latou laei e sili ona lelei, e pei ona latou faia pe a auai atu i le lotu. Pe a i ai i latou i totonu o le malumalu, latou te suia o latou ofu mo laei papae o le malumalu. O lenei suiga o laei e faia i se potu e fai ai laei, lea e faaaoga ai e tagata taitoatsi se loka ma se avanoa mo laei na o ia lava. I le malumalu, e faatumauina ma le faaeteete le tauagafau.onomea.

Ao tuu e tagata o latou laei i totonu o le loka, e mafai ona latou tuua ai uma a latou mea faalavefau faalelalolagi i tua. O le laei i le paepae, e mafai ai ona latou lagona le lototasi ma se lagona o le tusapau ma isi i le malumalu, ona o loo laei tutusa uma tagata o siomia ai i latou.

Ofuina o le Ofusa o le Malumalu

O le taimi lava e maua ai e tagata faaeega paia, latou te maua ai le faamanuiaga o le ofuina o le ofusa o le malumalu i o latou olaga atoa. E tatau ona latou ofuina e tusa ai ma faatonuga na tuuina atu i le faaeega paia. O i latou na maua faaeega paia i le malumalu e tatau ona manatua o faamanuiaga e faatatau i lenei avanoa paia e faalagolago i lo latou agavaa ma lo latou faamaoni i le tausia o feagaiga o le malumalu.

O le ofusa e tuuina atu ai se faamanatu faifai pea o feagaiga na osia i totonu o le malumalu. O le ofusa e tatau ona taulimaina ma le faaaloalo i taimi uma. E le tatau ona faaalia e vaai i ai i latou e le malamalama i lona taua, ma e le tatau foi ona fetuunaia e faamalie ai le faiga o isi sitaili eseese o lavalava. Afai e ofuina faalelei, e maua mai i le ofusa le puipuiga e tetee atu ai i faaosoosoga ma mea leaga. O le ofuina o le ofusa o se faailoga vaaia foi lea o se tautinoga i le loto ina ia mulimuli i le Faaola.

Faamanuiaga mai le Auai Atu i le Malumalu

E faaopoopo atu i le avea ma se nofoaga e faatino ai sauniga paia o le perisitua, o le malumalu o se nofoaga o le filemu ma faaaliga. O se nofoaga e mafai ona maua ai le taitaiga faaleagaga mo filifiliga ma popolega taua.

E faamanuiaina e le Alii i latou e auai i galuega o sauniga paia i le malumalu. Ma o faamanuiaga Na te tuuina mai e le tapulaa i le taimi e faaalu i le malumalu. O i latou e faia galuega o le malumalu o le a faamanuiaina i vaega uma o o latou olaga. O a latou galuega i totonu o le malumalu o le a faamalolosia ai i latou ma faamamaina ai i latou faaleagaga.