Su’e, Ave, Aoao Atu: Talia o le Lu’i o le Malumalu
E alala le tusitala i Iuta, ISA.
Ua tuuina atu le lu’i—ua e taliaina ea?
Ua valaaulia e Elder Neil L. Andersen o le Korama a Aposetolo e Toasefululua le autalavou e “saunia ni igoa se tele mo le malumalu mo papatisoga tou te faia i le malumalu ma fesoasoani i se isi tagata e faia foi lea mea.”1 Na folafola mai foi e Elder Dale G. Renlund o le Korama a Aposetolo e Toasefululua, o le auai i lenei lu’i faaAposetolo e mafai ona aumaia ai le puipuiga faaleagaga ma le faamalologa mo aiga.2
Mafaufau i ai—Ua uunaia e aposetolo o le Alii ia tagata uma ia auai i le galuega o talafaasolopito o aiga, e ala i le aveina atu o igoa o o latou lava aiga i le malumalu. Pe le o se mea maoae ea, pe afai o sauniga uma e te faia i le malumalu sa mo lou lava aiga? Ua valaaulia e Elder Andersen le autalavou i le lalolagi atoa ina ia faia lena lava mea ma ia fesoasoani i uo ma aiga ia faia foi o lea.
A e talia lenei lu’i, e mafai ona e lagona ai le Agaga, faateleina lau molimau, ma faaleleia atili lou aafiaga i le malumalu. E le o mautinoa pe faapefea ona amata? Se’i o tatou vaevaeina le lu’i i ni laasaga:
Su’e
Muamua, su’e igoa e ave i le malumalu ona ta lea i luga o le FamilySearch.org. Afai ua silia ma le fa au augatupulaga ua mae’a, faataitai [ona faaaoga le] FamilySearch’s Descendancy view [vaaiga o se Suli]. A le o lea, afai o loo gaogao le laau o le gafa o lou aiga, e mafai ona e amata i le siakiina o le FamilySearch.org/findnames.
Ave
A uma ona faaleoleo ma lolomi ia sauniga e ala i le FamilySearch.org, ona, faatasi ai ma se pepa faataga, ua mafai ona e aveina atu ia igoa mo papatisoga ma faamauga i le malumalu! Valaaulia aiga po o uo ua maua faaeega paia e faauma isi sauniga uma, pe auina atu i le malumalu e ala i le FamilySearch mo le faia o galuega.
Aoao Atu
Faasoa atu le olioli e uiga i talafaasolopito o aiga ia i latou o siomia oe! Fai se po o talafaasolopito o aiga faatasi ma au uo, pe saofafai i lalo ma ou matua ma nai ou tei ma faatumu faatasi la outou laau o le gafa o le aiga. E mafai ona faasoa atu lou aafiaga i luga o faasalalauga faaagafesootai e faaaoga ai le #TempleChallenge.
Ua E Sauni?
Po o le a lava ou aafiaga i talafaasolopito o aiga, e tele auala e mafai ona e auai i le lu’i. Mafaufau i ni auala e mafai ona e fesoasoani ai e tulei i luma le galuega a le Alii i le aso.