I se Fetaulaigaala ma A’u Uo
Saunia e Stephen W. Owen
Peresitene Aoao o Alii Talavou
Sa oo ina faisoo lo’u punipunia o a’u uo i o’u matua, ma punipuni foi o’u matua i a’u uo.
Ata na tusia e Christopher Thornock
I le 14 o o’u tausaga, sa ou faia ai se faaiuga na faapea ona suia ai mea uma. Sa matou savavali i le aualatele ma nisi o a’u uo i le po o se Aso Faraile, ma sa manaia lava la matou evaga, e pei ona sa matou masani ai. Ae peitai, o anapo sa i ai se faafitauli, ma na ou iloaina na tatau ona ou faia i ai se fuafuaga. Ae sa ou le mautinoa pe mafai ona ou faia.
Mo le lua tausaga ua tuanai, sa amata faataitai faaaoga ai e a’u uo ia sikaleti ma le ava malosi. O le taimi muamua na seasea ona faia, pe na o le faatasi pe faalua, ae e oo ane i le Aso Faraile lenei, ua fai soo lo latou ulaula ma inupia pe a matou tafafao na’o matou.
Sa ou manatu e faapea, afai ou te tausia pea lo’u mama, e mafai lava ona ou maua ni taimi fiafia ma a’u uo. Ioe, na iloa e o’u matua sa i ai se mea na le talafeagai i a’u uo. Ma na iloa foi e a’u uo sa le’i malilie o’u matua ia i latou. Sa faapea ona tuu ai a’u i le ogatotonu le lagolelei: Sa oo ina faisoo lo’u punipunia o a’u uo i o’u matua, ma punipuni foi o’u matua i a’u uo.
O lena la po o le Aso Faraile, sa matou savavali ai i le aualatele. Sa amata inupia ma ulaula a’u uo, ma na iu ina ou iloaina lo’u le lagolelei ia latou amioga. O lea na ou faia ai se filifiliga.
Sa ou savali atu i le isi itu o le aualatele.
Sa talie mai a’u uo ia te a’u. Sa latou taufono mai o a’u o se “fia agelu.” Ma na latou fai mai, afai ou te nofo ai lava i le ituala lena, o le a le toe avea a’u ma a latou uo.
Ia, na matou taunuu i le mea e gata ai le auala. Na afe a’u uo i le agavale, ae ou afe i le taumatau. E lua maila (3 km) na ou mamao ai mai le fale, ma o le lua maila aupito umi lea na ou savali ai. Atonu tou te manatu o le a lelei o’u lagona i le faia ai o se filifiliga lototele faapena, ae i le taimi lena, na ou lagonaina le le fiafia. Na ou ala a’e i le taeao na sosoo ai ma le malamalama taufaafefe, ua leai ni a’u uo ma ua tuua toatasi nei na’o a’u. I se tagata e 14 tausaga le matua, o se mea leaga tele lena mea.
O Se Uo Fou
E le’i tele tele ni aso mulimuli ane, ae telefoni mai se tagata o le Ekalesia na ou iloaina e igoa ia Tavita. Sa fesili mai pe ou te fia alu atu i lona fale i le po o le Aso Toonai. Sa ia valaaulia foi a’u matou te fai ’aiga faatasi ma lona aiga i le aso na sosoo ai. Sa foliga mai e sili atu le manaia nai lo le mea na ou i ai nei o le leai o ni uo, o lea na ou ioe ai.
Sa manaia le ma evaga ma Tavita—ma, ioe, sa leai ni sikaleti po o se ava malosi. A o ou faalogo o fai e le tama o Tavita le tatalo i le taumafataga, sa ou lagona le fiafia. Na amata ona ou mafuafau atonu—atonu lava—na faasolosolo lelei mea uma.
Sa avea i ma’ua ma Tavita ma se uo lelei lava. Sa ma tatalo lakapi faatasi, sa ma o faatasi i le aoga, sa fesoasoani le tasi i le isi ia o i ni misiona. Ina ua ma foi mai, sa ma potu faatasi i le kolisi. Sa ma fesoasoani le tasi i le isi i le sailia o tamaitai sa’o e faaipoipo i ai, ma faatumauina le tasi ma le isi i luga o le ala sa’o ma le vaapiapi seia tau atu lava i le malumalu ma tua atu. O nei tausaga uma lava, o loo avea pea i ma’ua o se uo lelei. Ma sa amataina i se telefoni faatauvaa, i le taimi tonu na ou manaomiaina ai.
Aafiaga o se Tina
E ui i lea, o le mea lena na ou faapea na amata ai. Vaai faalemafaufau i lo’u te’i ina ua oo i ni tausaga mulimuli ane, na ou iloa ai o lo’u tina, sa i tua o le mea atoa, o le na fuafuaina le ma faauoga! E le’i leva ona le toe i ai a’u uo tuai, ae ona matauina na i ai se mea na faaletonu ia te a’u, o lea na ia telefoni ai i le tina o Tavita e vaai pe mafai ona la faia se mea e fesoasoani [mai ai]. O lea na tauanau ai e le tina o Tavita ia Tavita e faafesootai ma valaaulia a’u ou te alu atu. O nisi taimi, o uunaiga ia fesoasoani atu i se tasi e manaomia le fesoasoani, e sau mai i le Agaga Paia; o nisi taimi e sau mai i se agelu—e pei o se tina—o le e “tautatala … i le mana o le Agaga Paia” (2 Nifae 32:3).
E masani ona ou mafaufau atonu ai se ese o le olaga—mo a’u ma mo Tavita—pe ana le muai iloa e lo’u tina le mea na ou tauivi ai ma fai loa se gaoioiga i ai. Pe le faamanatu atu ea e lena mea le ala e faamanuia ai i tatou e le Tama Faalelagi? E Na te silafia o tatou manaoga uma, ma Na te auina mai “ua e faamanuia mai i mea lelei latou te fai” (“E Latou te Fai Mea Lelei,” Viiga, nu. 134).
Tatou te Savavali Faatasi
Mulimuli ane, e nafa i tatou uma ma a tatou lava filifiliga. E pei ona saunoa mai pea lava pea Peresitene Thomas S. Monson, “O filifiliga tatou te faia e fuafua ai lo tatou taunuuga,”1 ma o le tele o na filifiliga e ao lava ona faia e le tagata lava ia, taitoatasi. O a tatou faaiuga e masani ona tatou lagona ai le faaesea, faapea ma le tuuatoatasi. Ae peitai, e le’i auina mai na’o i tatou iinei e le Tama Faalelagi.
O faaiuga na ou faia i taimi taua na faamanuiaina ma taialaina ai lo’u olaga atoa. Ae o na faaiuga na musuia ma faamalosia e taumafaiga agaga tatalo a lo’u tina ma le lagolago ma le faauo a Tavita.
O le suega lea tatou te ta’ua o le olaga i le lalolagi, e ese mai i suega e masani ona tatou faia i le aoga—lea e tatau ona e tilotilo ai i lau oe lava suega ma e le faatagaina ona e fesoasoani i lou tuaoi. E leai, i le suega lenei, e mafai ma e ao ona tatou fesoasoani i le tasi ma le isi; o le mea moni, o le vaega lena o le suega. O lea la, e ui o au filifiliga e ono i ai taimi e ave atu ai oe i le itu e tuuatoatasi o le auala, faamolemole ia [e] iloa, i lena auala atoa, o loo i ai isi o e na faia a latou faaiuga faigata ia i ai i le itu a le Alii. O le a latou savavali faatasi ma oe, ma latou te manaomia oe e savali faatasi ma i latou.