Loka i Fafo!

Sa matuai malulu fafo, ma na maatiati le ea malulu i alafau ma taliga o le auaiga o Sitivenisone. Ina ua uma se aso malie o faaseega, sa latou asa atu i le kiona e o atu i le latou taavale. Sa latou tulimatai e o i totonu o le taavale ma faamafanafana ai i le ea mafanafana.

Ae ina ua aapa ifo Elder Sitivenisone i lana taga, ua leai ni ki! “Po o fea o i ai ki?” sa ia mafaufau ai. Sa faatalitali ma le le to’a tagata uma mo lona tatalaina o le taavale. A leai ni ki, e loka i latou i fafo! E le mafai ona latou tatalaina le faitotoa pe faaola foi le taavale. E le mafai ona latou kiina le ea mafanafana.

O le mea muamua lava na fai e Elder Sitivenisone o le faia o se tatalo. Sa ia ole atu i le Tama Faalelagi e fesoasoani ia latou maua ki o le taavale. Na sosoo ai ma lona matuai mafaufau toto’a po o gafea na ono pau ai. Ona ia mafaufau lea i sana puna faasee na ia faia i se taimi na muamua atu o le aso. “Atonu na i ai ki iina i le kiona,” na ia mafaufau ai.

Sa toe foi atu Elder Sitivenisone ma nisi o le aiga i le tumutumu o le mati’e faasee ma faasesee mai i le ala o le faaseega. E oo ane i le taimi na taunuu ai i le pito i lalo o le puna faasee, ua faasolo ina goto le la. Sa latou su’e solo mo le ki a o faasolo ina pogisa. O le mea na latou ofo ai, na latou mauaina ki ae lei pogisa tele.

O le tatalo ma le mauaina o ki o le latou taavale, na faamanatu mai ai ia Elder Sitivenisone, o le a le tuua e le Tama Faalelagi i tatou e tutu i le malulu. Ua Ia tuuina mai ki ma le pule o le perisitua i taitai o le Ekalesia e fesoasoani e taitai saogalemu atu ai i tatou ia te Ia.