Tatou te Talanoa ia Keriso
O Le Vavega Moni o le Faamalologa
E alala le tusitala i Wyoming, ISA.
Ina ua mavae le faalavelave na ou lavea ai, na ou aoao ai o le supa faaletino e le mafai ona faamaloloina—ae ona o le Togiola a Iesu Keriso, ua mafai ai [ona faamalolo] le supa faaleagaga.
O le tausaga e 2000 sa tumu i ni mea taua na tutupu mo a’u ma lo’u aiga. Sa ma faamanatuina ma lo’u toalua le tasi tausaga o le ma faaipoipoga. Sa avea i ma’ua o ni matua mo le taimi muamua. O le tausaga foi lea na ou supa ai, i le na o le lima vaiaso talu ona fanau mai le ma afafine.
O le taumafanafana lena, sa ou fesoasoani ai i se tuafafine matua o le matou uarota e ala i lo’u tietie atu e le aunoa i nai vaifale mai lo matou fale mautotogi e tau atu i lona fale e moa lona fanua, ae i se tasi o taeao, sa matuai o’u lelava lava ma sa ou le mataala foi e pei ona sa tatau ai—ma na faafuasei ona so’a a’u e se taavale. E ui o se vavega lo’u sao mai ai, ae o le mea e leaga ai, ou te le’i sao e aunoa ma ni manuaga. E tasi le vaiaso talu ona uma le faalavelave, na ou ala ae ai ma le iloaina ua ou supa, ua le mafai ona minoi se maso i lalo ifo o lo’u fatafata.
O le supa o se manaoga tumau. E ui lava i taumafaiga maoae i aso nei i le saienisi faaonaponei ma vailaau faafomai, e le mafai ona faamaloloina ai. Ma o le tulaga masani, sa ou fefe i le taimi muamua, ma popole pe o le a faapefea ona avea a’u o se tane ma se tama. Ona faapea ai lea ona suia le fefe i le ita ia te a’u lava ona o lo’u faavalevalea—mo le le tu i lena fetaulaigaala ma mo le le faia o se pulou malo.
Sa ou lagona na pei a’u o se avega. E tele ni masina na faaalu i se falemai faagaoioi tino e aoao mai ai le ola i lo’u olaga atoa ma lo’u ma’i ma le auala ia ou toe ola tutoatasi ai. I le taimi lava lea, o le ola ai ma lo’u ma’i supa, na fesoasoani ou te malamalama lelei ai i tusitusiga paia ma le Togiola a le Faaola.
Christus im Getsemani-Garten betend, saunia e Hermann Clementz
Na oo mai se tasi o malamalama faapitoa a o ou mafaufau loloto i vavega na faia e Keriso. I le Mareko 2, ua faamagalo ai e Iesu se tagata ma’i supa i ana agasala ona faamalolo lea o ia. Ina ua fesiliga e le au tusiupu Lona tuuina atu o le faamagaloga, sa fetalai atu Iesu, “Po o le fea e faigofie? Po o le fai atu i le supa, Ua faamagaloina au agasala; po o le fai atu, Ina tulai ia, ma ave lou moega?” (fuaiupu e 9).
Na tele ni taimi sa ou faitau muamua ai i lenei mau, ae ana le mavae le faalavelave na ou aafia ai, ou te le malamalama i ai. I le faitauga o le mataupu, o loo faamanatu mai ai ia i tatou le faavavega moni o le faamalologa. I le aso, e ui lava ina mavae le 2,000 o tausaga ma le tele o le alualu i luma i tulaga faafomai, ae e le mafai lava ona ausia e le tagata na’o ia se faamalologa faapena, ma ou te nofo ma lenei mea moni i aso uma lava. E toatele ua manatu o le lesona lenei o loo i tua atu o lenei mau—e faapea o loo ia Keriso le mana e fofo ai e oo lava i ma’i e leai ni fofo. Ae e sili atu le tele o lesona o i lenei mau, ae maise lava pe a sopo atu la tatou vaai i tua atu o le vavega faaletino ae taulai atu i le vavega faaleagaga.
E pei lava ona le mafai e se tagata e maua i le supa faaletino ona “tulai” ma “savali,” e tutusa lava le le mafai e le tagata na o ia ona faatoilalo le supa faaleagaga na mafua i le agasala. Ua ou aoaoina o le Togiola a le Faaola o le vavega moni lea i lenei mau. Atonu e le mafai ona tupu ia te a’u le vavega o le mafai ona tulai faaletino ma toe savali i lo’u olaga i le lalolagi, ae ua ou maua le vavega sili atu o le faamagaloga mo a’u agasala e ala i le Togiola a lo’u Alii ma le Faaola, o Iesu Keriso. O le tulaga moni o lenei vavega o loo tautino mai i fuaiupu e 10 ma le 11:
“Ae peitai ina ia outou iloa o i ai i le Atalii o le tagata i le lalolagi le pule e faamagalo ai agasala, (ua fetalai ane ia i le supa,)
“Ou te fai atu ia te oe, Ina tulai ia, ina ave lou moega, ma alu atu i lou fale.”
O le faamaloloina i aafiaga o le agasala o le vaega silisili lea e mafai ona tatou maua taitoatasi i o tatou olaga, ona o Iesu Keriso. I le togiola ai mo a tatou agasala, na ave ai e Keriso i Ona lava luga o tatou faaletonu ma agasala. Na te silafia mea tatou te oo i ai i le olaga. E malamalama o ia i o tatou faaletonu, vaivaiga, ma luitau taitoatasi, e tusa lava po o le a le tele pe laitiiti. E leai se isi lava tagata i le lalolagi e mafai ona faamaloloina le supa faaleagaga o le agasala.
Ou te faafetai mo le malamalamaaga ua faamanuiaina ai a’u. Ua tuuina mai ai se vaaiga manaomia a o ou ola ai ma lo’u manaoga faapitoa ma taumafai e faaaoga e fesoasoani ia ou aoao ma tuputupu a’e ai. Ua mafai ona tuu lo’u misialofa ia te a’u lava ae alu atu ma fai ia lava mea e tasi na ou fiafia e fai a o le’i tupu le faalavelave, ma ua faamanuiaina a’u i le mafai ona auauna atu e ui lava i lo’u tulaga. Atonu e faafaigata i nisi ona loto faafetai pe a ola ai ma se manaoga faapitoa, ae e faaauau pea ona faamanuia i tatou e le Atua—e oo lava i taimi faapenei. Ou te faafetai i lo’u Faaola, mo Lana Togiola, ma mo lenei vavega ofoofogia i lo’u olaga.