O Le Mana Faamafanafana o Keriso
Ata na tusia e Allen Garns
O ni nai tausaga ua mavae, sa fuafua ai la’u uo o Iosefa e malaga i lana taavale mai Iuta i Uosigitone, D.C., ISA. Sa ia valaaulia a’u ma te o ma te toalua atu i le ala. I le aluga o le malaga sa ma asiasi ai i nofoaga lauiloa eseese a le Ekalesia, ma ina ua ma oo atu i le Talafatai i Sasae, sa ma tietie atu i le Aai o Niu Ioka.
Sa ma i ai iina ae faatoa lua vaiaso talu ona uma mea matautia na tutupu i le aso 11 o Setema, 2001. Sa ma lagonaina se uunaiga malosi e tatau ona ma asiasi atu i le nofoaga lea na faaleagaina ai ’Olo Masaga [Twin Towers].
Sa ma vaaia se fitafita o faatonutonuina tagata i se auala tumutumu a o latou matamata i mea na faaleagaina. Sa ia tufaina atu ni pepasolo e soloi ai loimata o tagata.
Sa ma lagonaina ma Iosefa le loloto o le tiga o tagata uma ona o nei mea na tutupu, ma sa ma mananao ai e fai se mea e uiga i ai. Sa tonu ia i ma’ua o le mea aupito lelei e mafai ona ma faia, o le talanoa lea i tagata, faalogo i a latou tala, ma atonu e faasoa atu ia i latou se savali e uiga i le faamoemoe o le talalelei toefuataiina a Iesu Keriso.
A o ma toe foi atu i le ma faletalimalo, sa ma malaga ai i le nofoaafi e fealuai i lalo o le ana. Sa saofai e faasaga mai ia te au se tamaitai sa faitau sana tusi. Sa ou mafaufau e faapea, po o a ni mea na tutupu i lona olaga. Sa ou faailoa atu i ai a’u lava ma fai atu i ai, o loo ma asiasi atu i Niu Ioka. Sa ou fai atu i ai, sa ma fia iloa ona aafiaga e uiga i mea na tutupu talu ai nei i le aso 11 o Setema.
O lona igoa o Maria, ua fiasefulu tausaga o nofo i le Aai o Niu Ioka. Sa faigaluega o ia i se fale e na o ni nai vaifale le mamao mai i olo. Sa ia faamatala mai ia i ma’ua, o ni nai vaiaso a o lumanai le aso 11 o Setema, sa ia lagonaina ai se uunaiga malosi e tatau ona tatalo ma fesili atu pe sa i ai iina le Atua. Fai mai o ia, e oo ane i le taimi lena o lona olaga, sa le’i masani ona tatalo ma sa le’i manatu tele sa ia manaomia ona tatalo. Na te le’i lagonaina se tali i lana tatalo seia oo ina taia e le au faatupu faalavelave ia ’olo i lena taeao matautia. Na aliae le vevesi ma le le mautonu i ona itu uma, ae sa faafuasei ona ia lagonaina le toafimalie. Na faamatala mai e Maria ia i ma’ua, sa ia lagonaina lenei filemu tulaga ese ma, e ui lava i faatamaiaga lemafaamatalaina i lena taimi, ae sa ia lagonaina sa i ai iina le Atua e puipui o ia.
Ina ua uma ona faasoa mai e Maria lenei mea ia i ma’ua, sa ma faamatala atu ma Iosefa ia te ia e faapea, sa ia lagonaina le Agaga o lona Tama Faalelagi e ala i lena filemu faapitoa ma le mafanafana. Sa ma ta’u atu ia te ia, e mafai ona ia lagona i taimi uma lena filemu, a o ia saili atu ia te Ia i le tatalo ma e ala i le suesueina o le Tusi a Mamona. Sa ma tuuina atu ia te ia se kopi o le Tusi a Mamona ma fai atu ia te ia, o le a aumaia e le tusi ia te ia se faaauauga o le filemu sa ia sailia. Sa ia taliaina ma le fiafia ma faafetai mai ia i ma’ua.
Ou te le iloa po o le a le isi mea na sosoo mai i le tala a Maria, ona na tatau ona ma o ese ma Iosefa i le nofoaga ma te nonofo ai, ae ou te iloa e alofa le Tama Faalelagi i Ona atalii ma afafine taitoatasi. Ou te iloa e popole o Ia i tulaga uma o o tatou olaga, aemaise lava pe a foliga mai ua faaletonu mea uma e siomia ai i tatou. E mafai ona ia tuuina mai le filemu e lemafaamatalaina lea e oo mai e ala mai i Lona Agaga, e ala i le mana o Lona Alo, o Iesu Keriso. E mafai ona susulu malosi mai le malamalama o Keriso i soo se faafitauli po o faalavelave faigata aua ua manumalo o Ia i mea uma.