Mauaina o le Filemu i le Le Atoatoa
O le faamoemoe mo na’o le atoatoa i le taimi nei, o lona uiga ua taofia mai ia i tatou lava o le avanoa mo le tuputupu a’e.
Ata ma tusia e Alisha Johnson; faatusa o le lupe © Photomaster/Shutterstock
O se tasi o manatu sese tatou te ono tauivi i le aluga o lenei olaga faalelalolagi, e faatatau lea i le manatu o le atoatoa. E toatele ua talitonu sese e faapea, e tatau ona tatou ausia le atoatoa i lenei olaga ia mafai ai ona faasaoina pe faaeaina.
I le avea ai ma se tagata tomai i fofo faapitoa, sa i ai se aso na ma talanoa ai ma se tamaitai ma na amata ona tagi o ia. Sa ia faapea mai, “E faapefea ea ona lava lo’u lelei?” Sa talanoa mai i lona le agavaa sa i ai. A o ma talanoa i ona lagona, na leai se agasala matuia na aliae mai i lona olaga ua tuanai po o le taimi nei. Sa na’o lona lagonaina lava le le lava o lona [lelei]. Sa ia faatusatusaina o ia lava i tuaoi, uo, ma tagata o ona aiga, ma o tagata uma lava sa ia ta’ua, i lona mafaufau, na “lelei atu,” nai lo ia.
O Mafaufauga e Avea ma o Tatou Tulaga Moni
Ou te iloa, e toatele i latou na i ai ni lagona o le le atoatoa ma le fememeai, a le i se valaauga, o le avea ai ma se matua, pe soo se mea lava. O nei lagona e mafai ona mafua ai ona nana a tatou taleni ma taofiofi mai i isi pe lagona ai le lotovaivai, fāatu po o le olopalaina. O o tatou mafaufauga e uiga ia i tatou lava e aafia tele ai a tatou amioga ma faalogona. O le toatele o i tatou, tatou te faia ni tala ia i tatou lava ia e le mafai ona tatou fai atua i se isi tagata. Mulimuli ane, o lenei mea e taotaomia ai i tatou mai o tatou gafatia moni ma tuuitiitia ai o tatou tomai ma taleni. Na saunoa mai Peresitene Ezra Taft Benson (1899–1994), ua faateteleina ai le taumafai o Satani e faatoilalo le Au Paia i le faanoanoa, lotovaivai, leai o se faamoemoe, ma le olopalaina.”1
O le mea e lelei ai, “e na o le pau le manatu e taua ia i tatou o le mea o loo finagalo ai lo tatou Tama Faalelagi ia i tatou,” na aoao mai ai Elder J. Devn Cornish o le Fitugafulu. “Faamolemole ia ole atu ma le faamaoni ia te Ia po o le a Sona finagalo ia te oe. O le a Ia alofa ma faasa’o mai ae le faalotovaivaia i tatou; o le togafiti lena a Satani.”2
O le Le Atoatoa O se Avanoa
Ua tatou i ai i luga o le fogaeleele ina ia maua le olioli, ma o se vaega o lena olioli o mea ia tatou te fatufatuaiina, o mea tatou te talitonu i ai, ma mea tatou te taliaina. Afai tatou te taliaina o i tatou o ni fanau faaletonu a le Atua, o e o loo aoao a o tatou agai i luma, ona mafai lea ona tatou talia o tatou le atoatoa. O le faamoemoe ia maua vave le atoatoa o lona uiga, o le taofia mai ia i tatou o le avanoa mo le tuputupu a’e. O le a tatou taofia le meaalofa o le salamo ma le mana o Iesu Keriso ma Lana Togiola i o tatou olaga. Na saunoa Elder Bruce R. McConkie (1915–85) o le Korama a Aposetolo e Toasefululua e faapea: “E na o le toatasi lava le tagata atoatoa, o le Alii o Iesu. Ana faapea na tatau ona atoatoa alii [ma tamaitai] ma ola i tulafono uma ma le sa’o tonu, a’ia’i, ma atoatoa, o lona uiga e na o le toatasi lava le tagata e faasaoina i le faavavau. Na aoao mai le perofeta o [Iosefa Samita] e faapea, e tele lava mea e tatau ona fai, e faapena foi i tua atu o le tuugamau, i le galueaiina o lo tatou faaolataga.”3 O o tatou lava le atoatoa, atonu o se auala lea o loo tapena ai e le Atua i tatou e toe foi atu ia te Ia.
O Vaivaiga e Mafai ona Avea ma Malosiaga
O le liliu atu i lo tatou Tama Faalelagi i [o tatou] le atoatoa e manaomia ai le lotomaualalo. O lenei faagasologa o loo faamatalaina i le Eteru: “Ma afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga, ina ia faalotomaualalo ai i latou; ma ua lava lo’u alofa tunoa mo tagata uma o e e latou te faalotomaualaloina i latou lava i o’u luma; aua afai latou te faalotomaualaloina i latou lava i o’u luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou” (Eteru 12:27). Pe a tatou lotomaualalo, o le a faaloaloa mai e lo tatou Tama oi le Lagi Ona aao ia i tatou ma fesoasoani ia tatou aoao mai o tatou vaivaiga. O se faataitaiga o lenei mea o loo i le Feagaiga Fou. A o tauivi Paulo ma le “mea matuitui i [lona] tino,” sa ia iloaina ai, o lenei vaivaiga na faalotomaualaloina ai o ia ma latalata atili atu ai i le Atua (tagai 2 Korinito 12:7). O lenei lotomaualalo ma le naunau e aoao, o le mea tonu lea e tatau ona tatou faia i o tatou lava le atoatoa. E tatau ona tatou aoao mai i nei vaivaiga ina ia mafai ona avea ma malosiaga.
E i ai foi se eseesega i le va o le lotomaualalo ma le lagona o le tauleaogaina po o le faaletaua. O le lotomaualalo e faalatalata atu ai i tatou i le Alii, ae o le matamuli ma le lagona tausalaina e aveese atu ai i tatou mai le Alii. E le finagalo le Atua ina ia tatou ta’ufaatauvaaina i tatou lava ma manatu e faaletaua i tatou i Lana silafaga. O se mea tiga lea ia te Ia ma ia i tatou. E taua le iloa, e aoga le taimi ma taumafaiga e manaomia ai, ina ia sui ai. O se vaega o le mea e faatatau i ai lenei olaga, o le sailia lea o auala e suia ai o tatou vaivaiga. Atonu o nisi o vaivaiga o ni tauiviga umi, ae o isi e mafai ona vave foia.
O ni nai tausaga ua mavae, sa ou galue ai i se tagata sa manaomia la’u auaunaga, o Rasela (ua suia le igoa), o le sa i ai sona faafitauli o le inu ava malosi. Sa avea le inu ava malosi ma se mea na faalagolago tele i ai ma se auala e aveese atu ai le mamafatu o lona olaga faigata. Sa naunau lava o ia, o le a mafai ona ia faatoilaloina lenei vaisu, ma faatasi ai ma ni fesoasoaniga ma faamalosiauga, na tuu ai lana inu ava malosi. A o le’i faatoilaloina atoatoa lona faafitauli o le inu ava malosi, na te le’i taufaatauvaaina o ia ona o lona vaivaiga. Sa ia iloaina. Ma, faatasi ai ma le naunautai ma le fesoasoani a se epikopo lelei, le Alii, ma nai isi tagata autu, sa naunau ai lava Rasela o le a ia tuua le inu ava malosi. O le taimi mulimuli na ma talanoa ai, sa ia lipoti mai na leai sona manao e toe inu.
Ina ia mafai ona tatou tuputupu a’e mai o tatou vaivaiga, e ao lava ona tatou liliu atu i le Alii ma le faatuatua, faamoemoe, ma se malamalama o le a Ia puipuia ma lagolagoina i tatou i Ona aao. Na fautua mai Peresitene Russell M. Nelson, Peresitene o le Korama a Aposetolo e Toasefululua: “I le tagata o loto vaivai, loto mata’u, ia e onosai ia te oe lava. O le atoatoa e le oo mai i lenei olaga, ae o le olaga a sau. Aua le faamalosia mea e le fetaui. Ae ia faamalosi oe lava ia alualu i luma. A o e tuu atu ia fesoasoani mai le Alii ia te oe i lena mea, o le a Ia faaatoa le eseesega.”4
Filifili Nei Loa le Fiafia
I le totonugalemu o le avea ma se tagata lelei atu, e mafai ona tatou filifilia nei loa le filemu ma le fiafia. E oo lava i le totonugalemu o tulaga aupito pogisa, e mafai ona tatou filifilia o tatou uiga faaalia. Na saunoa mai Viktor Frankl, o se fomai lauiloa o le mafaufau ma o se tasi na sao mai i se au maliliu e toatele [Holocaust], “O mea uma lava e mafai ona aveesea mai i se tagata, vagana ai le mea e tasi: o le saolotoga mulimuli lea o se tagata soifua—o le filifilia o se uiga faaalia o se tagata i soo se tulaga e tulai mai, o le filifilia o le ala o le tagata lava ia.”5
Ua ta’u mai ia i tatou, “Ua ola tagata ina ia latou maua le olioli” (2 Nifae 2:25). E le faapea ai la, o le a faamaneta ona faatumu e le Atua o tatou olaga i le fiafia. O le fiafia o se filifiliga lea mo le toatele o i tatou. E manaomia ai taumafaiga ma le faataitaia o le lotofaafetai, talitonu ma le faatuatua. E mafai e lagona le lelei ona nofofale i avanoa uma o o tatou olaga pe a tatou faatagaina ai. Atonu e le mafai ona tatou suia tulaga i o tatou olaga, ae e mafai ona tatou suia le ala tatou te tali atu ai i ia tulaga. Na saunoa mai Peresitene Thomas S. Monson, “E le mafai ona tatou faatonuina le matagi, ae e mafai ona tatou fetuunaia ia la. Mo le fiafia atoatoa, filemu, ma le faamalieina, sei o tatou filifilia se uiga faaalia lelei.”6
A o tatou filifili e taulai atu i mea lelei, faalagolago i le Alii ma Lana Togiola, ma talia ma aoao mai o tatou le atoatoa, e mafai ona tatou aveesea faamoemoega le talafeagai mai ia i tatou lava ae taumafai mo le amiolelei ma le fiafia i o tatou olaga. O le a tatou toafilemu i o tatou le atoatoa ma maua le mafanafana i le alofa togiola o le Atua. O le a tatou maua le olioli i o tatou loto, i le iloa o le ata o le faaolataga e mafai ona toe taitai atu ai i tatou i lo tatou Tama Faalelagi pe a tatou faia a tatou taumafaiga sili ona lelei, e ui lava i lo latou le atoatoa, ina ia agavaa e toe mafuta faatasi ma Ia.