Sa Ou Alu e Su’e se Malumalu
E alala le tusitala i Auvergne-Rhône-Alpes, Farani.
Sa ou saili mo se nofoaga paia ae iu ane ua ou maua se auala e avea ai o se aiga e faavavau.
Ata na tusia e Andrew Cobb
O le 1973. O le tauivi ai ma nisi o luitau, sa matuai o’u manao ai lava e iloa le Atua, o lea na ou filifili ai e faitau le Tusi Paia. O se tasi aso na ou faitau ai e uiga i le malumalu o Solomona i le 2 Nofoaiga Tupu 2–5, ma na ou manatu ai, atonu o i ai se nofoaga paia faapena i luga o le fogaeleele. O lea na ou anapogi ma tatalo ai ina ia mafai ona taiala a’u e le Agaga Paia ia maua ai. Sa ou manatu, afai ou te maua se malumalu, o le a mafai ona ou ta’u atu i se tasi o auauna a le Alii o’u faafitauli, ma o le a fesoasoani mai o ia e foia.
O lea na ou alu ai e sue se malumalu. O le taimi lena, sa ou nofo ai i Fontenay-sous-Bois, o se pitonuu o Pale, o lea na amata ai ona ou tietie atu agai i le taulaga e sue se malumalu. Sa ou vaaia ni fale se tele, e aofia ai falelotu ma sunako, ae ou te le’i maua se malumalu. Ina ua ou toe foi mai i le fale, sa ou tatalo ma mafaufau pe aisea na ou le maua ai se malumalu. Pe na le lava lo’u mama? Pe ona sa ou le saunia?
Sa matuai galo lava ia te a’u la’u sailiga le faamanuiaina, seia oo ina o mai tamaitai faifeautalai o Le Ekalesia a Iesu Keriso o le Au Paia o Aso e Gata Ai i lo’u fale ia Fepuari 1980. Sa laua ta’u mai ia te a’u, o le malumalu aupito lata mai sa i ai lea i Zollikofen, Suitiselani—o le Malumalu o Bern Suitiselani.
Sa papatisoina a’u i le aso 12 o Aperila, 1980, ma sa ou alu i le malumalu mo le uluai taimi ina ua te’a laitiiti ma se tausaga mulimuli ane, i le aso 5 o Me, 1981. O iina na mafai ai ona ou faia galuega faalemalumalu mo nisi o tamaitai o lo’u aiga, e aofia ai o’u tinamatutua, olomatutua [o lo’u aiga] ma tausoga.
O nei tamaitai uma, na pau le toatasi na ou iloaina o lo’u tausoga o Olga.
O Olga, na sau mai Italia, sa faaipoipo a o talavou lava, ae o le mea e faanoanoa ai, sa saua tele ma sa le faamaoni lona toalua ia te ia. Faatasi ai ma le fesoasoani a lona tama ma lona tuagane, na filifili ai Olga e sola ese a’o maitaga o ia i lana tama lona lima.
Sa ia alu ma nonofo ma ona matua ma lona tuagane. Na maliu Olga ina ua fanau si ana tama. Sa le’i toe foi i tulaga masani o le mafaufau ia matua o Olga mai le faateia i lona maliu faafuasei.
A o ou faia sauniga mo Olga i le malumalu, e tasi se upu na oo soo mai i lo’u mafaufau: misiona. Ae sa ou le malamalama—sa ou pisi e tausi toatasi ni tamaiti se toatolu, ma e le mafai ona ou alu i se misiona.
Na oo mai le tali i ni nai masina mulimuli ane. I se tasi aso, na ta’u mai ai e lo’u tausoga o Renzo e faapea, ua maliu le tina o Olga, le olomatua o Anita. Sa faafuasei ona ou manatua, na ou faamaeaina galuega faalemalumalu mo Olga i le Aso Lua, ae na maliu lona tina i le Aso Faraile na sosoo ai. Faatasi ai ma le ootia tele, sa ou lagonaina le faagaeetia e faapea, sa naunau lava Olga ia maua ona sauniga o le malumalu ina ia mafai ona ia faafeiloaia ma aoaoina lona tina i le lalolagi o agaga. Atonu o le misiona lena a Olga.
Ae na i ai sa’u lava misiona o le fesoasoani atu foi i o’u lava matua. Sa i ai ni nai taimi na ou taumafai ai e talanoa atu ia i laua e uiga i le Ekalesia, ae sa le’i mananao ai. O lea la, ina ua maliliu lo’u tina ma lo’u tama, sa ou faia galuega faalemalumalu mo i la’ua i se vave na ou mafaia ai.
Ina ua faamauina o’u matua, sa tatamalosi lo’u fatu, ma na tumu o’u mata i loimata o le alofa. Ona faamauina ai lea o a’u i o’u matua. Sa le mafai ona taofi lo’u mafaufau i lo’u tina, ma sa ou manao e opo i le uso sa fai ma sui mo ia. Sa ou faafetai atu ia te ia mo le avea ma sui o lo’u tina. Sa maligi foi loimata o le uso, ma faafetai mai ia te a’u mo le aafiaga. E ui ina sa ou le masani ia te ia, sa ma lagonaina le pei o ni tagata o le aiga lava e tasi.
Ona faamauina lea o o’u matua i o laua matua, ae o Olga, o le sa fai ai a’u ma ona sui i le sauniga, sa faamauina i ona matua, le toeaina o Marino ma le olomatua o Anita.
O taimi uma lava ou te faamatalaina ai na aafiaga, e lofituina lava a’u i lagona ootia. Ou te mafaufau ia Olga, ma ou te faamoemoe o loo ia faataunuuina lana misiona i le isi itu o le veli. Ona o sauniga o le malumalu, ua le o toe na’o a’u ai le tagata o le Ekalesia i lo’u aiga. Ou te talitonu ua talia e o’u matua sauniga na faataunuuina mo i laua. Ua tumu a’u i le olioli ma le faafetai i le Alii mo le mafai ona ou faatuina o se aiga e faavavau e ala i faamanuiaga o Lona malumalu paia.