O La Tatou Avanoa
SEFULUAI MA SE FAAMANUIAGA E LE’I FAAMOEMOEINA
Ata na tusia e Katie Payne
Sa na o le tasi le masaina talu ona avea a’u ma se tagata o le Ekalesia ae ou totogia la’u uluai sefuluai atoa. Sa na o a’u le tagata o le ekalesia i lo matou aiga, ma sa faigata ona malamalama lo’u aiga i le sefuluai. Na faalotovaivaia a’u e lo’u tina mai le totogiina o le sefuluai, ae na manao e avatu le tupe ia te ia.
I se tasi aso ae ou te le’i alu i le galuega, na ou iloa ai ua leai se meaai i totonu o le pusaaisa, ma e tatau ona faatau sa’u meaai. Sa leai sa’u tupe na i ai, o lea na ou talosaga atu ai i lo’u tina e nono mai sana tupe mo sa’u meaai. Na musu o ia ma fai mai, ua leai sa’u tupe ona na totogi ai la’u sefuluai.
Sa ou alu ma aumai la’u Tusi a Mamona ma fai atu ia te ia, o le a aumai e le tusi lenei la’u meaai mo le aso—meaai faaleagaga. Na ou susuea i luma o lo’u tina ma ou tau ai i le 100 peso (na lava lava e faatau ai se meaai), na sulu ai i totonu. Sa o se vavega—ou te le’i tuua lena tupe i totonu o a’u tusitusiga paia. Na ou aoaoina se lesona maoae: e ui lava ina i ai luitau ma faaosoosoga i soo se mea, o le a faamanuiaina lava a’u e le aunoa pe a ou totogi atoa le sefuluai ma tausi poloaiga.
Montserrat L., Federal District, Mekisiko
Taimi mo le Malumalu
O le taimi lava na atoa ai lo’u 12, na maua ai la’u pepa faataga muamua o le malumalu. O le a le galo lava ia te a’u lena aafiaga muamua i le malumalu. O le filemu na ou lagonaina sa matuai tulaga ese. E ui o lo’u fale i Taiuani i saute na fa itula le mamao mai le malumalu, sa ou filifili lava e alu e taitasi i le masina i le aso malumalu a le matou siteki. Sa ou alu lava e tusa pe na leai se isi ma te o.
E le’i umi ae amata ona ou valaauliaina a’u uo o le Ekalesia matou te o. E ui ina sa le tele so latou naunautai na faaalia i le taimi muamua, ae o lea ua latou o i masina uma lava. E toatele foi tagata o le uarota ua amata ona o i le malumalu. E tusa lava pe faafia ona fuafua e le matou uarota se malaga i le malumalu, e toatele lava tagata e o mai—toatele atu nai lo o se taimi na vaaia muamua e le matou siteki.
E le’i leva ona uma la’u filifiliga e auai atu ta’i masina, ae filifili foi lo’u aiga e o i masina uma lava. E tusa lava pe i ai ni a matou suega i le aoga i le aso e sosoo ma le aso e uma ai le matou aso malumalu, ae matou te auai atu lava e le aunoa ma lo’u aiga. Ua fitu nei tausaga o matou auai atu e le aunoa ma lo’u aiga i le malumalu. O le malumalu o le maota o le Alii, ma ua matou iloa le taua o le o atu i le malumalu.
Chi-Yun Liu, Tainan, Taiuani