Mauaina o le Filemu i le Faamanatuga
Ata na tusia e Allen Garns
Ao avea [au] ma se tina talavou, sa ou tauivi ai i le sueina o ni taimi filemu i le aluga o ni aso pisi, a o taulai atu le olaga i le tausiga o ni tamaiti se toalima e ulavavale ma faigata. Sa na o le lima pe sefulu lava ni minute na mafai ona ou maua, ae sa ou faatauaina nai na taimi paganoa taitasi.
Sa masani ona ou liliu atu i lo’u Tama Faalelagi i le tatalo, ma ole atu mo le malosi, onosai, ma le filemu. O Aso Sa sa faapitoa le faavevesi mafaufau, o le fafagaina o se pepe, faiga o lavalava o se tamaitiiti mosimosi, ma le mataituina o tamaiti matutua atu ia sauni mo le lotu. O le mea e malie ai, o se Aso Sa pisi lava na maua ai la’u vaifofo.
A o ou faalogologo i tatalo o le faamanatuga i lena aso, sa faapitoa le taua o upu: “… ina ia latou maua pea lona Agaga e faatasi ma i latou” (MF&F 20:77).
Sa ou agavaa e maua le Agaga o le Alii e faatasi ma a’u. Na faapefea ona ou le iloaina muamua le taua o lena folafolaga?
Na avea le faamanatuga ma taimi filemu ma manatunatu loloto o lo’u olaga lea na masani ona pisapisao. I le sauniga o le faamanatuga, na ou maua ai le filemu sa ou sailia.
E ui atonu na ou tuua le sauniga faamanatuga ma se tamaitiiti mosimosi e le nofo lelei i le uma ai ona tagofia o le falaoa ma le vai, ae na ou faamautinoa sa ou i ai iina mo lena taimi faapitoa o le manatuaina. Sa ou matuai tulimatai atu i na taimi taua ma se naunautai tele lea ou te le’i lagonaina muamua.
O lenei la ua matutua la’u fanau, ua ou olioli nei i le matagofie naua o isi taimi filemu e tele. E ui i lea, ou te teufatuina pea na taimi na faaaluina e ai ma inu ai i le faamanatuga.