O Ata o le Faatuatua
Adriana González
Matagaluega Tutotonu, Parakuei
Ina ua ou fesili e uiga i le laulau susulu lanumoana i le ogatotonu o le umukuka a Adriana, sa ou aoaoina ai sa i ai se taimi sa le mauaina ai e ia se laulau. I le tauivi ai ia maua le lava o le tupe mo manaoga a lona aiga, sa ia avea se tasi o kosi o le ola tutoatasi a le Ekalesia ma filifili ai e mafai e ia ona taoina ma faatauina atu ni falaoa—maimau pe ana i ai sana laulau. Sa ia tatalo mo se fesoasoani ma fausia se laulau mai ni fasi laau.
Cody Bell, tagata pueata
O se tasi o mea sa sili ona ou manaomia i lena taimi o se laulau. O le laulau sa ia te au, na malepe. Sa tuuina mai e se tasi ia te au ni fasi laupapa aua sa latou iloa e lei i ai sau tupe, ae sa ia te au ni tamai moa ma e mafai ona faaaoga ai le laupapa e fausia ai se pa moa. Sa ou tatalo ina ia iloa le mea e fai. Sa ou lagona e tatau ona ou valaau i se uo kamuta e vaai po o le a le mea e na te faia i ai. Sa ia fai mai, “Sei o ta fausia se laulau mo oe.” O le mea lena sa ou manaomia.
O mea uma sa ou talosagaina mai i lou loto, ua Ia faafofoga mai ia te au. Ua Ia faafofoga mai ia te au aua sa Ia silafia sa lelei mo au. O lea la ua lua a matou laulau. O lenei laulau e taua i lo matou aiga. Matou te nonofo iinei e fefaasoaai ai. Matou te galulue iinei. Matou te aoao atu mea ua matou aoaoina iinei i isi. E ala i le ola tutoatasi, sa ou aoao ai e faatauaina au lava ia. Sa ou iloa ai taleni ua tuuina mai ia te au e le Atua e fesoasoani ia te au ma lou aiga. Ou te taumafai e tuufaasolo atu na mea ua ou aoaoina i ou uso a Aualofa, e fesoasoani ia i latou e faataua i latou lava i le avea ai ma afafine o le Atua. Ou te faafetai e mafai ona ou faamanuiaina i latou o loo siomia au.
E te maua se lagona lelei pe a e iloa mea uma na tuuina atu e le Atua ia te oe ma e mafai ona e liliu atu ma faaaogaina e fesoasoani ai i isi. Tatou te manaomia ona atiina taleni taitasi o loo ia i tatou ina ia mafai ona tatou faasoa atu i isi.
E vave amata le aso mo Adriana a o ia tapenaina le paluga mo le falaoa o le a ia taoina ma faatauina atu. I le aso atoa sa avea le laulau o le umukuka ma se nofoaga e potopoto ai mo le aiga o Gonzalez.
O le fafagaina o moa o se vaega o le faagasologa o le pisinisi laitiiti a Adriana. Na tuuina mai e o latou fuamoa se elemene taua i lana falaoa.
O falaoa e faatau atu e Adriana e fesoasoani ai i lona aiga ia ola tutoatasi atili e ala i le faateleina o le tupe maua a le aiga. Na te tuuese ni nai falaoa e faasoa atu i lona aiga.
E tilivaina e Adriana se falaoa fou i ona tuaoi.